သေဆုံး

ချောင်းဦး၊ ဇန်နဝါရီ ၁၀၊ ၂၀၂၆။

စစ်ကိုင်းတိုင်း၊ ချောင်းဦးမြို့နယ်က ကျေးရွာ ၃ ရွာ စက်တပ်လေထီးနဲ့ဗုံးချခဲ့ရပြီး ကလေးငယ်အပါအဝင် ၂ ဦးသေဆုံးခဲ့တယ်လို့ ချောင်းဦးမြို့နယ်ပကဖ တာဝန်ရှိသူတွေဆီက သိရပါတယ်။

ဇန်နဝါရီ ၁၀ ရက် မနက် ၉ နာရီခွဲခန့်မှာ စက်တပ်လေထီးဟာ တောင်ဖီလာ၊ ညောင်ပင်တဲ၊ ညောင်ပင်သာရွာတွေကို ဗုံး ၁ လုံးစီကြဲချသွားတာလို့ ဆိုပါတယ်။

“ဗုံးတွေက ပြည်သူနေအိမ်တွေနား ရွာထဲကိုကျတာ။ ကလေးငယ် ၁ ယောက်နဲ့ အမျိုးသား ၁ ယောက် သေတယ်။ တောင်ဖီလာမှာက ရွာကိုလာလည်တဲ့ဧည့်သည်သေတာ။ ကလေးကကျတော့ စက်တပ်လေထီး လာတာကို ထွက်ကြည့်ချိန်ထိတာလို့တော့ ကြားတယ်”လို့ ချောင်းဦးမြို့နယ်ပကဖတာဝန်ရှိသူက ပြောပါတယ်။

ဗုံးထိမှန်တာကြောင့် ညောင်ပင်တဲကျေးရွာက အသက် ၁၀ နှစ်ဝန်းကျင် မိန်းကလေးငယ် ၁ ဦး၊ တောင်ဖီလာကျေးရွာက အသက် ၃၀ ကျော်အမျိုးသား ၁ ဦးတို့သေဆုံးခဲ့တယ်လို့ ဆိုပါတယ်။

ဒါ့အပြင် အဆိုပါကျေးရွာ ၂ ရွာပေါင်း ဒေသခံပြည်သူ ၅ ဦးခန့်ထိခိုက်ဒဏ်ရာရပြီး အရေးပေါ်ဆေးကုသနေကာ ညောင်ပင်သာကျေးရွာကတော့ လူထိခိုက်မရှိဘူးလို့ ဆိုပါတယ်။

ဗုံးကြဲခံရတဲ့ ကျေးရွာ ၃ ရွာက ၁ မိုင်ခွဲဝန်းကျင်ကွာဝေးပြီး ဒေသခံတွေကတော့ ဗုံးလာကြဲချိန် ကတုတ်ကျင်းတွေထဲ ဝင်ပုန်းခဲ့ကာ ရွာကနေထွက်ပြေးကြတာတော့မရှိဘူးလို့ သိရပါတယ်။

နိုဝင်ဘာ ၂ ရက်ကလည်း ချောင်းဦးမြို့နယ်၊ ငါးလုံးတင်ကျေးရွာမှာ လက်နက်ကြီးကျလို့ အမျိုးသမီး ၂ ဦးသေဆုံးခဲ့တယ်လို့ သိရပါတယ်။

စာတည်း – လင်း

မြေလတ်အသံ၊ ဇန်နဝါရီ ၈၊ ၂၀၂၆။

ပဲခူးတိုင်း၊ တောင်ငူခရိုင်၊ ဖြူးမြို့နယ်မှာ စစ်ကော်မရှင်တပ်ကို သတင်းပေးလုပ်နေသူ အမျိုးသား ၁ ဦး သေနတ်ပစ်ခံရပြီး သေဆုံးခဲ့တယ်လို့ ဖြူးမြို့နယ်ပကဖထံက သိရပါတယ်။

အသတ်ခံရသူမှာ ညောင်ပင်သာမြို့၊ ဇေယျာသီရိ ၉ လမ်းမှာနေထိုင်တဲ့ ဦးထွန်းဝင်း ဖြစ်ပြီး ဖြူးမြို့အခြေစိုက် ခလရ ၅ တပ်ရင်းအနီး သီရိဝေ ဘီယာဆိုင်မှာ ဘီယာသောက်နေချိန် ဇန်နဝါရီ ၆ ရက် ညနေ ၃ နာရီကျော်မှာ ဝင်ရောက်ပစ်ခတ်ခဲ့တာလို့ ဆိုပါတယ်။

“ထွန်းဝင်းက စကစအရာရှိတွေနဲ့ ပေါင်းပါတယ်။ လက်ပစ်ဗုံးရှိပါတယ်။ ပြည်သူတွေကို အိတ်ထဲမှာ သေနတ်ပါတယ်လို့ အမြဲခြိမ်းခြောက်နေသူပါ။ သူက အရာရှိတွေနဲ့ပေါင်းတော့ လူတိုင်းကြောက်နေရတာပါ။”လို့ ဖြူးမြို့နယ်ပကဖတာဝန်ခံက မြေလတ်အသံကို ပြောပါတယ်။

ဦးထွန်းဝင်း ဘီယာသောက်နေတဲ့ သီရိဝေဆိုင်ဟာ ခလရ ၅ တပ်ရင်းနဲ့ အမြန်လမ်းမကြီးပေါ်ရှိ စိမ့်ကြီးဂိတ် စစ်ကော်မရှင်စခန်းအကြားမှာရှိတာကြောင့် အမြန်လှုပ်ရှားခဲ့ရတယ်လို့ ဆိုပါတယ်။

ဦးထွန်း​ဝင်းဟာ ၂၀၂၁ စစ်အာဏာသိမ်းချိန်ကစတင်ပြီး လက်ရှိအချိန်ထိ စစ်ကော်မရှင်တပ်ရဲ့ အရာရှိတွေနဲ့ပူးပေါင်းကာ သစ်မှောင်ခိုလုပ်ငန်းကို လုပ်ကိုင်ရင်း ပဲခူးရိုးမရှိတော်လှန်ရေးအဖွဲ့တွေရဲ့ သတင်းကိုစုံစမ်းကာ သတင်းပေးလုပ်နေသူတဦးဖြစ်တယ်လို့ ဆိုပါတယ်။

ပြီးခဲ့တဲ့ ဒီဇင်ဘာ ၂၅ ရက်မှာလည်း ရေတာရှည်မြို့နယ်၊ ဆွာမြို့နယ်ရှိ စစ်စခန်းတွေနဲ့ မဲရုံထားရှိမယ့် အုပ်ချုပ်ရေးမှူးရုံးတွေ တိုက်ခိုက်ခံခဲ့ရပါသေးတယ်။

မြေလတ်အသံ၊ ဇန်နဝါရီ ၄၊ ၂၀၂၅။

မကွေးတိုင်း၊ အောင်လံမြို့နယ်မှာ အမျိုးသမီး ၁ ဦး ပစ္စည်းလုအသတ်ခံရပြီး စစ်ကော်မရှင်ခန့် ရပ်/ကျေးအုပ်ချုပ်ရေးမှူး ၁ ဦးလည်း ပစ်သတ်ခံလိုက်ရတယ်လို့ ဒေသခံတွေက ပြောပါတယ်။

အသတ်ခံရသူမှာ ပြကြီးကျေးရွာမှ အသက် ၆၀ နှစ်အရွယ်ရှိတဲ့ ဒေါ်မညွန့်ကြည်နဲ့ မိုးကောင်းကျေးရွာမှ အုပ်ချုပ်ရေးမှူး အသက် ၄၀ အရွယ် ဦးမင်းမင်းတို့ဖြစ်ပါတယ်။

ဒေါ်မညွန့်ကြည်ဟာ ပြည်ပအလုပ်အကိုင်ရှာဖွေရေးလုပ်ငန်းလုပ်ကိုင်နေသူတဦးဖြစ်ပြီး ဦးခေါင်းနဲ့ နံရိုးတို့မှာ ပေါက်ပြဲဒဏ်ရာတွေနဲ့ သေဆုံးနေတဲ့ရုပ်အလောင်းကို ပြလို့ကျေးရွာရှိ ဘုရားကိုးဆူရဲ့ တောင်ဘက်လမ်းကြားမှာ ဇန်နဝါရီ ၃ ရက်မနက်ပိုင်းက တွေ့ရှိခဲ့တာလို့ ဆိုပါတယ်။

“သူ(ဒေါ်မညွန့်ကြည်)ကတော့ ဒလန်မဟုတ်ဘူးဗျ။ လုယက်ခံရပြီး အသတ်ခံရတာပါ။ သူ့ရဲ့ အလောင်းကို က ပြလို့ရွာမှာ ရွာသားတွေတွေ့တာ။ မိသားစုပြောတာကတော့ အလောင်းမှာ နားကပ်၊ ဆွဲကြိုး၊ လက်စွပ်၊ ပိုက်ဆံထုတ်နဲ့ ဖုန်းမတွေ့ရဘူးတဲ့။ ပစ္စည်းတွေပျောက်နေတော့ လုယက် အသတ်ခံရတာလို့ ယူဆကြတာ”လို့ အောင်လံမြို့ မြေပြင်စစ်ရေးသတင်းအဖွဲ့မှ အမျိုးသားတဦးက ပြောပါတယ်။

ဒေါ်မညွန့်ကြည်ရဲ့ ရုပ်အလောင်းကို ပြလို့ရွာရဲစခန်းမှ ရဲသားတွေယူဆောင်ခဲ့ပြီးနောက် ရဲစခန်းကနေတဆင့် သူမရဲ့မိသားစုတွေက အလောင်းကိုလာယူခဲ့ကြတယ်လို့ သိရပါတယ်။

မိုးကောင်းကျေးရွာက အုပ်ချုပ်ရေးမှူး ဦးမင်းမင်းကတော့ ဇန်နဝါရီ ၃ ရက် နေ့လယ် ၁ နာရီကျော်မှာ ရွာရှိအလယ်တန်းကျောင်း(ခွဲ)မှာ ပညာရေးစုံညီပွဲတော်ကျင်းပနေချိန် လက်နက်ကိုင်လူတစုက ပွဲအတွင်းဝင်ရောက်ကာ ပစ်သတ်ခံတာလို့ ဆိုပါတယ်။

“ပစ်ခတ်ခဲ့သူတွေက သေနတ် ၅ ချက်ဖောက်ခဲ့တာဆိုတော့ စုံညီပွဲပျက်တယ်တဲ့။ ဘယ်အဖွဲ့က လုပ်တယ်ဆိုတာ မသိရပါ။ စပစ်တော့ လက်ကိုရှပ်ထိတော့ ထွက်ပြေးတဲ့အချိန် ခုံနဲ့တိုက်ပြီးလဲတာမှာ ၅ ချက်လောက်ထပ်အပစ်ခံရတယ်တဲ့။ ရွာကအကုန် စစ်တပ်ထောက်ခံတယ်လို့တော့ ပြောလို့မရဘူး။ ရွာနားမှာက အောင်လံမြို့မြောက်ဘက် မြို့အဝင်ဂိတ်ရှိတော့ ဒီကောင်ကထောင်(လွှား)တယ်။ သူက သိုင်းတတ်တယ်လည်း ပြောကြတယ်။”လို့ အထက်ပါအမျိုးသားက ပြောပါတယ်။

မိုးကောင်းကျေးရွာဟာ အောင်လံမြို့နဲ့ ၂ မိုင်သာကွာဝေးတာကြောင့် ဦးမင်းမင်းဟာ မြို့မြောက်ဘက်ရှိ ဂိတ်စခန်းမှ စစ်ကော်မရှင်တပ်သားတွေနဲ့ပူးပေါင်းကာ ရွာကနေစစ်မှုထမ်းကောက်ခံတာ၊ လူငယ်တွေကို ပေါ်တာဆွဲဖမ်းတာတွေ လုပ်ဆောင်နေသူတဦးဖြစ်တယ်လို့ သူကဆိုပါတယ်။

အုပ်ချုပ်ရေးမှူး ဦးမင်းမင်း ပစ်သတ်ခံရပြီးနောက် ပညာရေးစုံညီပွဲတော် ပွဲပျက်ခဲ့ပြီး အခင်းဖြစ်နေရာကို စစ်ကော်မရှင်တပ်ဖွဲ့ဝင်တွေရောက်လာတာမရှိခဲ့ဘူးလို့ သိရပါတယ်။

စာတည်း – လင်း

ကျော်ကြီး၊ ဒိန်းဂျား

ပွင့်ဖြူ၊ ဇန်နဝါရီ ၃၊ ၂၀၂၆။

မကွေးတိုင်း၊ ပွင့်ဖြူမြို့နယ်၊ ကျောင်းကုန်းကြီးကျေးရွာမှာ အုပ်ချုပ်ရေးမှူးနဲ့အဖွဲ့ပစ်ခတ်ခံရပြီး ၄ ဦးသေဆုံးခဲ့တယ်လို့ ပွင့်ဖြူမြို့နယ်တော်လှန်ရေးတပ်ပေါင်းစုတာဝန်ရှိသူဆီက သိရပါတယ်။

ဇန်နဝါရီ ၃ ရက်မနက် ၄ နာရီခန့်မှာ ကျေးရွာဘုန်းကြီးကျောင်းထဲ နေထိုင်နေတဲ့ ကျေးရွာအုပ်ချုပ်ရေးမှူး အသက် ၄၀ ကျော်အရွယ် ပြားဦး (ခ) မင်းခိုင်ဦးနဲ့အဖွဲ့ကို ဝင်ရောက်ပစ်ခတ်ခဲ့တာလို့ ဆိုပါတယ်။

“သူတို့က ဘုန်းကြီးကျောင်းထဲမှာ စုနေနေတာကိုသိလို့ သူတို့နေတဲ့အခန်းထဲထိ ဝင်ပစ်ခဲ့တယ်။ ထိခိုက်တဲ့ ပျူတယောက်ကတော့ ကျည်မှန်ပြီးကာမှ ပုဆိုးစလွယ်သိုင်းထွက်ပြေးသွားတယ်။”လို့ ပွင့်ဖြူမြို့နယ် တော်လှန်ရေးတပ်ပေါင်းစုတာဝန်ရှိသူတဦးက ပြောပါတယ်။

ပစ်ခတ်ခံရလို့အုပ်ချုပ်ရေးမှူး ပြားဦး (ခ) မင်းခိုင်ဦး၊ အုပ်ချုပ်ရေးမှူးလက်ထောက်တွေဖြစ်တဲ့ ပျူစောထီးအောင်အောင်၊ ရင်မင်းထွန်း၊ အောင်မြင့်သူတို့ ၄ ဦးဟာ နေရာတင်သေဆုံးခဲ့တယ်လို့ ဆိုပါတယ်။

ရွာကနေ တိမ်းရှောင်သွားသူတွေကိုလည်း အဆိုပါအုပ်ချုပ်ရေးမှူးနဲ့အဖွဲ့က ရွာကိုပြန်မလာရင် ငွေကျပ် ၅ သိန်းဒဏ်ရိုက်မယ်လို့ ခြိမ်းခြောက်တာနဲ့ တော်လှန်ရေးအဖွဲ့တွေထိန်းချုပ်ထားတဲ့ရွာတွေက ပြည်သူတွေကိုလည်း ဖမ်းဆီးငွေညှစ်၊ ဆိုင်ကယ်တွေသိမ်းယူတာကြောင့် သွားရောက်ပစ်ခတ်ခဲ့တာ လို့ဆိုပါတယ်။

ပစ်ခတ်ပြီးနောက် ပျူစောထီးအဖွဲ့တွေကိုင်ဆောင်တဲ့ ဓားရှည် ၂ လက်၊ သေနတ် ၁ လက်၊ ကျည်ကာ ၁ ထည်၊ လက်ပစ်ဗုံး ၁ လုံး၊ ကျည်ဘောက် ၂ ခု၊ ဖုန်း ၃ လုံး၊ ကျည်ဆန်အချို့နဲ့ ငွေအချို့ကို သိမ်းဆည်းခဲ့တယ်လို့ ဆိုပါတယ်။

ဒီဇင်ဘာ ၂၃ ရက်ကလည်း ပွင့်ဖြူမြို့နယ်၊ ကျောင်းကုန်းကြီး ပျုစောထီးစခန်းကို တော်လှန်ရေးတပ်ဖွဲ့ဝင်တွေက ဝင်ရောက်တိုက်ခိုက်ရာက အပြန်အလှန်ပစ်ခတ်မှုဖြစ်ပြီး ပျူစောထီး ၆ ဦးသေဆုံးခဲ့သေးတယ်လို့ သိရပါတယ်။

စာတည်း – လင်း

အောင်လံ၊ ဒီဇင်ဘာ ၃၀၊ ၂၀၂၅။

မကွေးတိုင်း၊ အောင်လံမြို့နယ်၊ ဆပ်ဆူဝကျေးရွာမှာ စစ်ကော်မရှင်တပ်ကပစ်ခတ်တဲ့ လက်နက်ကြီး ကျရောက်ပေါက်ကွဲပြီး ၄ ဦးသေဆုံးခဲ့တယ်လို့ ဒေသခံတွေဆီက သိရပါတယ်။

ဒီဇင်ဘာ ၂၉ ရက်မနေ့ကည ၉ နာရီဝန်းကျင်မှာ ကပစ ၁၅ နဲ့ ညောင်ကိုင်းလမ်းဆုံရှိ စစ်ကော်မရှင် စစ်ဆေးရေးဂိတ်တို့ကနေ လက်နက်ကြီးတွေပစ်ခတ်ချိန်မှာ ဆပ်ဆူဝရွာကနေအိမ် ၁ လုံးပေါ်ကျရောက်ပြီး မိသားစုလိုက်သေဆုံးခဲ့တာပါ။

“ဒီမှာက ရွာထဲကိုပစ်တာ ပထမဆုံးအရင်တုန်းကလည်း ပစ်နေတာပဲ ရွာပြင်တွေပဲပစ်တာ ၁ လုံးက တည့်တည့်ကျတော့ ကြေမွသွားတာ။ ဘေးအိမ် ၂ လုံးလောက်အစမှန်တယ်။ အများစုကရွာပြင်တွေ ကျတာ” လို့ ဆိုပါတယ်။

ဗုံးစထိမှန်လို့ ၁ အိမ်တည်းနေ အသက် ၆၀ အရွယ်အမျိုးသား ၁ ဦး၊ အသက် ၅၀ အရွယ်အမျိုးသား ၁ ဦးနဲ့ ကလေး ၂ ဦးတို့သေဆုံးခဲ့တာပါ။

တဆက်တည်းမှာပဲ စစ်ကော်မရှင်တပ်က လက်နက်ကြီး ၂၀ နီးပါးကိုပစ်ခတ်ခဲ့ရာ လှံတင်ရွာ၊ ပျဥ်ပုံရွာ၊ အင်ကြီးရွာအပြင်တွေကိုလည်း ကျရောက်ပေါက်ကွဲခဲ့တယ်လို့ သူက ဆက်ပြောပါတယ်။

ပြီးခဲ့တဲ့ ဒီဇင်ဘာ ၂၈ ရက်မှာ ဆပ်ဆူဝရွာရှိ စစ်တပ်ဂိတ်စခန်းကို ဒေသတွင်းတပ်ဖွဲ့ဝင်တွေက လက်နက်ကြီးနဲ့ပစ်ခတ်ခဲ့တာကြောင့် ခုလိုလက်နက်ကြီးတွေနဲ့ပြန်လည်ပစ်ခတ်ပြီး စစ်ကြောင်းဝင်လာတာဖြစ်နိုင်တယ်လို့ သူက ခန့်မှန်းပါတယ်။

“၂၈ ရက်နေ့က ရွေးကောက်ပွဲနေ့မတိုင်ခင်ကတည်းက ဆပ်ဆူဝနားမှာ ကာကင်းလိုချထားတာ အဲ့မှာ လက်နက်ကြီးနဲ့ ၄ ချက်အပစ်ခံရတာ ထိခိုက်မှုတော့မရှိဘူး။”လို့ အထက်ပါဒေသခံက ပြောပါတယ်။

၂၀၂၁၊ စစ်အာဏာသိမ်းချိန်ကနေ ၂၀၂၅၊ ဒီဇင်ဘာ ၃၀ ရက်ထိ စစ်ကော်မရှင်နဲ့ ၎င်းတို့ရဲ့ လက်အောက်ခံအဖွဲ့အစည်းတွေကြောင့် သေဆုံးခဲ့ရတဲ့ဒေသခံစုစုပေါင်း ၇,၆၄၀ ဦးရှိပြီလို့ နိုင်ငံရေးအကျဥ်းသားများ ကူညီစောင့်ရှောက်ရေးအသင်း-AAPP ရဲ့အစီရင်ခံစာမှာဖော်ပြထားပါတယ်။

စာတည်း – လင်း

ဝက်လက်၊ ဒီဇင်ဘာ ၃၀၊ ၂၀၂၅။

စစ်ကိုင်းတိုင်း၊ ဝက်လက်မြို့နယ်၊ လိန်ပင်ကျေးရွာမှာ စစ်ကော်မရှင်တပ်က ဗုံးကြဲတိုက်ခိုက်ခဲ့တာကြောင့် နေအိမ်ပေါ်ကျရောက်ပြီး အမျိုးသမီး ၂ ဦးမီးလောင်သေဆုံးခဲ့တယ်လို့ ဝက်လက်မြို့နယ်ပြည်သူ့ကာကွယ်ရေးတပ်ဖွဲ့ဆီက သိရပါတယ်။

ဒီဇင်ဘာ ၂၉ ရက် ၁၂ နာရီခွဲမှာ တံတားဦးကတက်လာတဲ့ ဂျက်ဖိုက်တာက ကျေးရွာထဲကို ဗုံး ၄ လုံးကြဲချပြီး ပွိုင့်ဖိုက်နဲ့ပစ်ခတ်ခဲ့တယ်လို့ ဆိုပါတယ်။

“ဖိုက်တာက ဗုံးက အိမ်ပေါ်ကျပြီး မီးလောင်တာ။ ပါသွားတဲ့ အမျိုးသမီးတွေလည်းဘယ်လိုမှ အလောင်းထုတ်မရဘူး၊ မီးကျွမ်းသွားတယ်။ ထိခိုက်ကတော့ ကောက်လို့ရလိုက်တယ်။ ထိတဲ့သူတွေက တမိသားစုတွေထဲပဲ”လို့ ဝက်လက်မြို့နယ်ပကဖ တာဝန်ရှိသူတဦးကပြောပါတယ်။

စစ်ကော်မရှင်ဘက်က လေကြောင်းကနေ ဗုံးလာကြဲသွားတဲ့ကျေးရွာအနီးမှာ စစ်ကြောင်းထိုး တိုက်ပွဲဖြစ်နေတာမရှိဘူးလို့ သူကဆက်ပြောပါတယ်။

ဗုံးကျရောက်ပေါက်ကွဲပြီး မီးလောင်လို့ အသက် ၄၀ ဝန်းကျင် အမျိုးသမီး ၂ ဦး မီးလောင်သေဆုံးပြီး အသက် ၂၀ ကနေ ၆၀ ကြား အမျိုးသမီး ၃ ဦးနဲ့အမျိုးသား ၁ ဦးဒဏ်ရာပြင်းထန်ရကာ နေအိမ် ၅ လုံးပျက်စီးခဲ့တယ်လို့လည်း ဆိုပါတယ်။

လေကြောင်းကနေ ဗုံးကြဲခံရတာကြောင့် ဒေသခံတွေမှာ စိုးရိမ်ကြောက်လန့်နေကြပေမယ့် ကျေးရွာကနေတော့ ထွက်ပြေးတိမ်းရှောင်ကြတာမျိုးမရှိဘူးလို့ သိရပါတယ်။

ပြီးခဲ့တဲ့ ဒီဇင်ဘာ ၂ ရက်ကလည်း ဝက်လက်မြို့နယ်၊ နတ်မှော်ဦးကျေးရွာ လေကြောင်းကနေ ဗုံးကြဲခံရပြီး ပြည်သူ ၅ ဦးသေဆုံးကာ ၅ ဦးဒဏ်ရာရခဲ့သေးတယ်လို့ သိရပါတယ်။

စာတည်း – လင်း

ကျော်ကြီး၊ အောင်စိုး

မြေလတ်အသံ၊ ဒီဇင်ဘာ ၂၆၊ ၂၀၂၅။

စစ်ကိုင်းတိုင်း၊ ဗန်းမောက်မြို့၊ ဘုတလင်မြို့နယ်နဲ့ မန္တလေးတိုင်း၊ မြင်းခြံမြို့နယ်မှာ စစ်ကော်မရှင်တပ်က ဗုံးကြဲတိုက်ခိုက်ခဲ့တာကြောင့် ဒေသခံအမျိုးသမီး ၂ ဦးသေဆုံးပြီး စျေးလည်းမီးလောင်ပျက်စီးခဲ့တယ်လို့ ဒေသခံတွေဆီက သိရပါတယ်။

ဒီဇင်ဘာ ၂၆ ရက်မနက် ၅ နာရီကျော်မှာ ဗန်းမောက်မြို့ပေါ်ကို တိုက်ခိုက်ရေးလေယာဥ် ၁ စီးနဲ့ ဗုံးသီး ၂ လုံးကြဲချခဲ့ရာ မြို့မစျေးကိုကျရောက်ပေါက်ကွဲခဲ့တာလို့ ဆိုပါတယ်။

“အန္တရာယ်များလို့ အရပ်သားပြည်သူက မဝင်ရဲဘူး။ ရှေ့တန်းရဲဘော်တွေပြောတာ စျေး တခုလုံး (အပြင်တန်း၊ အတွင်းတန်း) အကုန်လောင်တာ ဟုတ်တယ်။ စျေးဆိုင်တွေက နီးနီးလေး ကပ်နေတော့ အကုန်လောင်တာ။ ပေ ၂၀ လောက်ခြားတဲ့ ဆောက်လုပ်ရေးဝန်းပါ အကုန်လောင်တယ် ကြားတယ်ဗျာ” လို့ ဗန်းမောက်မြို့ခံအမျိုးသားတဦးကပြောပါတယ်။

NUG တပ်တွေထိန်းချုပ်ထားတဲ့ ဗန်းမောက်မြို့ကို စစ်ကော်မရှင်တပ်နဲ့ရှမ်းနီအမျိုးသား တပ်မတော် – SNA တို့က မြို့ကိုသိမ်းပိုက်နိုင်ရေး စစ်အင်အား ၆၀၀ ခန့်နဲ့ နေ့စဥ် ထိုးစစ်ဆင်တိုက်ခိုက်နေရာ ထိခိုက်၊ သေဆုံးမှုတွေ များလာနေတာကြောင့် အခုလို ဗုံးကြဲတိုက်ခိုက်နေတာဖြစ်နိုင်တယ်လို့ အထက်ပါ အမျိုးသားက ဆိုပါတယ်။

ပြီးခဲ့တဲ့ ဒီဇင်ဘာ ၂၁ ရက်ကလည်း ဗန်းမောက်မြို့နယ်၊ အနောက်ခြမ်းရှိ နားပင်ကျေးရွာ ဘုန်းတော်ကြီးကျောင်းကို တိုက်ခိုက်ရေးလေယာဥ် ၁ စီးနဲ့ ဗုံးကြဲတိုက်ခိုက်ခဲ့ရာ သံဃာတော် ၁ ပါးအပါအဝင် အမျိုးသား၊ အမျိုးသမီး ၆ ဦးဒဏ်ရာရရှိခဲ့ပါသေးတယ်။

ဒါ့အပြင် ဒီဇင်ဘာ ၂၄ ရက်နေ့လယ် ၂ နာရီကျော်မှာလည်း ဘုတလင်မြို့နယ်၊ ကင်းစမ်းကျေးရွာအနီးရှိ ဘုတလင်-ရေဦး လမ်းပိုင်းကို မုံရွာအခြေစိုက်၊ အနောက်မြောက်တိုင်းစစ်ဌာနချုပ်က တက်လာတဲ့ Gyrocopter ၃ စီးနဲ့ ဗုံးကြဲတိုက်ခိုက်ခဲ့ရာ အမျိုးသမီး ၁ ဦးသေဆုံးတယ်လို့ ဆိုပါတယ်။

“(ကုန်စုံဆိုင်)က ဘုတလင် စိုင်ပြင်လမ်းဘေး၊ ကင်းစမ်းလမ်းခွဲမှာရှိတာ။ အိမ်ဆိုင် ပေါ့။ ဗုံးသီးက ၂ လုံးချတာ။ သေဆုံးသူနဲ့ဒဏ်ရာရသူက လင်မယား ဆိုင်ရှင်တွေ”လို့ ဘုတလင်ဒေသခံ အမျိုးသားတဦးက ပြောပါတယ်။

သေဆုံးသူမှာ ကုန်စုံဆိုင်ပိုင်ရှင် ဒေါ် မိချစ်ဖြစ်ပြီး သူ့ရဲ့ အမျိုးသားမှာ ထိခိုက်ဒဏ်ရာရပြီး ဆေးကုသမှုခံယူထားတာကြောင့် အသက်အန္တရာယ်မစိုးရိမ်ရတော့ဘူးလို့ သူကဆိုပါတယ်။

ဒါ့အပြင် ကင်းစမ်းကျေးရွာလမ်းခွဲမှာရှိတဲ့ အများပြည်သူနားနေဆောင် ဇရပ်နဲ့ ရေအိုးစဥ်လည်း ပျက်စီးသွားခဲ့တယ်လို့ အထက်ပါ အမျိုးသားက ဆိုပါတယ်။

အလားတူ ဒီဇင်ဘာ ၂၄ ရက်ညနေ ၄ နာရီကျော်မှာ ဝက်လက်မြို့နယ်၊ ငါးပတ်ချောင်းကျေးရွာကို တိုက်ခိုက်ရေးလေယာဥ်နဲ့ဗုံးကြဲ တိုက်ခိုက်ခဲ့တာကြောင့် ၇ နှစ်ကလေးငယ် ၁ ဦးအပါအဝင် ၇ ဦးသေဆုံးခဲ့တယ်လို့ ဒေသခံတွေဆီက သိရပါတယ်။

မန္တလေးတိုင်း၊ မြင်းခြံမြို့နယ်၊ ကျောင်းဖြူကန်ကျေးရွာကိုလည်း ဒီဇင်ဘာ ၂၆ ရက် ဒီမနက် ၉ နာရီ မိနစ် ၄၀ ခန့်မှာ စစ်ကော်မရှင်ဘက်က ဂျက်ဖိုက်တာနဲ့ ကျေးရွာထဲကို ဗုံး ၂ လုံးကြဲချခဲ့တာကြောင့် အမျိုးသမီး ၁ ဦးသေ ၁ ဦးဒဏ်ရာရတယ်လို့ ကျေးရွာနဲ့နီးစပ်သူတွေဆီကသိရပါတယ်။

“သေတဲ့အမျိုးသမီးက နေအိမ်ထဲထမင်းချက်နေချိန်ထိတာ။ ဗုံးတွေက ရွာမြောက်ဖျားကိုကျတာ။ ကျောင်းဖြူကန်ရွာခံအချို့က ရှောင်နေကြတယ်။ ၂၁ ရက်နေ့စစ်ကြောင်းထိုးကတည်းက။ ခုထိတဲ့သူတွေက ရွာမှာအနည်းငယ်ကျန်နေသူတွေထဲက ထိတာ”လို့ ကျေးရွာနဲ့နီးစပ်သူတဦးက ပြောပါတယ်။

ဗုံးပေါက်ကွဲစထိမှန်လို အသက် ၄၀ ကျော်အရွယ် အမျိုးသမီး ၁ ဦးသေဆုံးပြီး အသက် ၃၀ ကျော်အရွယ်အမျိုးသား ၁ ဦးဒဏ်ရာရကာ နေအိမ် ၃ လုံးထက်မနည်း ပျက်စီးမှုရှိတယ်လို့ ဆိုပါတယ်။

လေကြောင်းကနေ ဗုံးကြဲခံကလို့ ကျေးရွာအတွင်း စစ်ဘေးမရှောင်ဘဲကျန်နေသူတွေအားလုံးရွာကနေ တိမ်းရှောင်သွားကြပြီပြီး ဒီဇင်ဘာ ၂၆ ရက်အထိ တလုပ်နဲ့အိုင်းမရွာကြားမှာလည်း စစ်ကော်မရှင်တပ်က စစ်ကြောင်းထိုးကာ စစ်ရေးတင်းမာမှုတွေရှိနေသေးတယ်လို့ ဆိုပါတယ်။

ပြီးခဲ့တဲ့ အောက်တိုဘာလအတွင်း စစ်ကော်မရှင်တပ်က လေကြောင်းတိုက်ခိုက်မှုအကြိမ်ရေ ၂၅၀ ပြုလုပ်ခဲ့ပြီး အဲ့ဒီထဲက မန္တလေး၊ စစ်ကိုင်း၊ မကွေးတို့မှာ ၁၈၅ ဦးသေဆုံးပြီး ၅၂၂ ဦးထိခိုက် ဒဏ်ရာရရှိခဲ့တယ်လို့ အမျိုးသားညီညွတ်ရေးအစိုးရ – NUG ရဲ့ လူ့အခွင့်ရေးဝန် ကြီးဌာန အချက်အလက်အရ သိရပါတယ်။

ပုံစာ – ဗုံးကြဲခံရသည့် ဗန်းမောက်မြို့။

စာတည်း – လင်း