သေဆုံး

မြေလတ်အသံ၊ ဇန်နဝါရီ ၁၉၊ ၂၀၂၆။

စစ်ကိုင်းတိုင်း၊ ဒီပဲယင်းမြို့နယ်၊ စိုင်းပြင်ကျေးရွာကို စစ်ကော်မရှင်တပ်က ဇန်နဝါရီ ၁၉ ရက်မနက် ၁၁ နာရီကျော်မှာ လေကြောင်းကနေ ဗုံးကြဲတိုက်ခိုက်ခဲ့ရာ အမျိုးသား ၁ ဦး သေဆုံးခဲ့တယ်လို့ ဒေသခံတွေကပြောပါတယ်။

စိုင်ပြင်ကျေးရွာတောက်ဘက်အထွက်ရှိ မူးသစ်ရေလွှတ်ဆည်မြောင်းအနီးကို တိုက်ခိုက်ရေးလေယာဥ် ၁ စီးနဲ့ ဗုံးကြဲတိုက်ခိုက်ခဲ့ရာ အသက် ၄၀ နှစ်အရွယ်အမျိုးသား ၁ ဦး သေဆုံးပြီး ၃၀ နှစ်အရွယ်အမျိုးသား ၁ ဦး ဒဏ်ရာရရှိခဲ့တာလို့ ဆိုပါတယ်။

“စိုင်းပြင် မြို့တောင်ဘက်အထွက် မူးသစ်ရဲ့တောင်ဘက်ပါ။ ပစ်သွားတာကတော့ ရော့ကတ်နဲ့ စက်လတ်လို့ ခန့်မှန်းရပါတယ်။ ပစ်ခတ်အပြီး နေအိမ်တချို့မီးလောင်တယ်။ ၁ ယောက် ပွဲချင်းပြီးသေတယ်။ နောက် ၁ ယောက်က်ကတော့ ဒဏ်ရာရတာ မစိုးရိမ်ရ။” လို့ ဒီပဲယင်းဒေသခံ အမျိုးသားတဦးက ပြောပါတယ်။

တိုက်ပွဲဖြစ်တာမရှိဘဲ စိုင်းပြင်ကျေးရွာကို အခုလိုလေကြောင်းကနေ ဗုံးကြဲခဲ့တာကြောင့် လူနေအိမ် ၃ လုံးလည်း မီးလောင်ပျက်စီးခဲ့တယ်လို့ သူကဆိုပါတယ်။

ပြီးခဲ့တဲ့ ဇန်နဝါရီ ၁ ရက်ကလည်း ဒီပဲယင်းမြို့နယ်၊ မူးကမ်းကြီးကျေးရွာရှိ စစ်ဘေးရှောင်တွေ ခိုလှုံနေကြတဲ့ စာသင်ကျောင်းဆောင်ကို စစ်ကော်မရှင်တပ်ကလေကြောင်းကနေ ဗုံးကြဲခဲ့တာကြောင့် စစ်ရှောင်အမျိုးသား ၁ ဦးဒဏ်ရာရရှိခဲ့တယ်လို့ သိရပါတယ်။

လက်ရှိအချိန်မှာ ဒီပဲယင်းမြို့နယ်ကို စစ်ကော်မရှင်တပ်က လေကြောင်းကနေ မကြာခဏ ဗုံးကြဲတိုက်ခိုက်နေတာကြောင့် ဒေသအတွင်းရှိပြည်သူတွေအနေနဲ့ လေကြောင်းသတိအမြဲရှိပြီး လေကြောင်းသတင်းကြားရင် ဘေးလွတ်ရာနေရာတွေမှာ အထူးဂရုစိုက်နေထိုင်ကြဖို့ ဒီပဲယင်းမြို့နယ်ရှိတော်လှန်ရေးတပ်ဖွဲ့တွေက တိုက်တွန်းထားပါတယ်။

စာတည်း – လင်း

ရွှေဘို၊ ဇန်နဝါရီ ၁၉၊ ၂၀၂၆။

စစ်ကိုင်းတိုင်း၊ ရွှေဘိုမြို့နယ်၊ မင်းကုန်းကျေးရွာအနီး ရွှေဘို-ဆိပ်ခွန်လမ်းပိုင်းမှာ သက်ကြီးပိုင်း အမျိုးသား ၁ ဦး မိုင်းထိပြီးသေဆုံးသွားတယ်လို့ ဖြစ်စဥ်ကိုသိရှိတဲ့ဒေသခံတွေဆီက သိရပါတယ်။

ဆိပ်ခွန်ကျေးရွာနေ အသက် ၆၀ ကျော်အရွယ်ရှိ ဦးစိုးတင့် ဟာ ဇန်နဝါရီ ၁၇ ရက်ညနေ ၆ နာရီကျော်မှာ ရွှေဘိုဘက်ကနေ ဆိပ်ခွန်ဘက်ကိုဆိုင်ကယ်နဲ့ပြန်လာချိန် မင်းကုန်းဘုန်းကြီးကျောင်း အနောက်ဘက် လမ်းမပေါ်အရောက်မှာ မိုင်းထိခဲ့ပြီး ခန္ဓာကိုယ်အနှံမိုင်းထိမှန်ဒဏ်ရာနဲ့ သေဆုံးခဲ့တာလို့ ဆိုပါတယ်။

“အနားဝန်းကျင်ရှိတဲ့သူတွေက သူကိုပြောသေးတယ်တဲ့ မိုင်းရှိတယ်မသွားတော့နဲ့ပြောတာကို ဖြတ်သွားတာမှာထိတာ။ ဒီဘက်ဒေသမှာက ကားလမ်းပေါ်သွားနေတဲ့သူတွေက ညနေ ၅ နာရီခွဲရင် မသွားကြတော့တာ”လို့ ဖြစ်စဥ်ကိုသိထားတဲ့ဒေသခံတဦးက ပြောပါတယ်။

ဦးစိုးတင့်အလောင်းကို မိသားစုဝင်တွေကပြန်ကောက်ယူပြီး ဇန်နဝါရီ ၁၈ ရက်က ကျေးရွာမှာပဲ သင်္ဂြိုဟ်လိုက်တယ်လို့ ဆိုပါတယ်။

အဆိုပါလမ်းပိုင်းဟာ စစ်ကော်မရှင်တပ်ရော၊ ဒေသကာကွယ်ရေးအဖွဲ့တွေကပါ သွားလာလှုပ်ရှားနေတဲ့ လမ်းပိုင်းဖြစ်လို့ ဘယ်အဖွဲ့ဘက်ကထောင်ထားတဲ့မိုင်းလဲဆိုတာ မသိရသေးဘူးလို့ အထက်ပါဒေသခံက ပြောပါတယ်။

ဧပြီ ၂၈ ရက်ကလည်း ရွှေဘိုမြို့နယ်၊ ကွေ့တက်ကြီးကျေးရွာမှာ မခေါက်ကျေးရွာ ပျူစောထီးအဖွဲ့ကလာချတဲ့ ဒရုန်းဗုံးထိမှန်လို့ မိသားစုဝင် ၃ ဦးဒဏ်ရာရတယ်လို့ သိရပါတယ်။

စာတည်း – လင်း

■ ရဲတွေစခန်းအပြင်မထွက်ရဲဘဲ ဒဏ်ရာရသူကိုဆေးရုံမပို့လို့ ၁ ဦးသေဆုံးခြင်းဖြစ်

ဝေါ၊ ဇန်နဝါရီ ၁၆၊ ၂၀၂၆။

ပဲခူးတိုင်း၊ ဝေါမြို့နယ်၊ သူရဲသမိန်ကျေးရွာရဲစခန်းအရှေ့မှာ သေနတ်ကျည်ဆန်ထိမှန်တာကြောင့် ရွာခံအမျိုးသား ၂ ဦးသေဆုံးခဲ့တယ်လို့ ဒေသခံတွေထံက သိရပါတယ်။

ဇန်နဝါရီ ၁၅ ရက် ​ယမန်နေ့ မနက် ၁၁ နာရီခန့်မှာ သူရဲသမိန်ရဲစခန်းအရှေ့ ဆိုင်ကယ်ရပ်နားရာနေရာမှာရှိနေတဲ့ စက်စုကျေးရွာနေအမျိုးသား ၂ ဦး ကျည်ဆန်ထိမှန်ခဲ့တာလို့ ဆိုပါတယ်။

“လယ်ကိစ္စအမှုဖြစ်လို့ လာရှင်းကြတာ သူရဲသမိန်စခန်းကခေါ်လို့။ ရှင်းပြီးလို့ပြန်အထွက်မှာ ဟိုဘက်(စစ်တောင်းမြစ်တဖက်ကမ်း)က စနိုက်ပါနဲ့ပစ်တာ။ အဲ့နေရာမှာ ရဲလည်းမတ်တပ်ရပ်နေတာ။ ရဲကိုမထိဘဲ သူတို့ကိုသွားထိတာ။”လို့ ဖြစ်စဥ်ကိုသိရှိတဲ့ ကျေးရွာနဲ့နီးစပ်သူတဦးက မြေလတ်အသံကို ပြောပါတယ်။

သေဆုံးသူ ၂ ဦးမှာ စက်စုကျေးရွာနေ အသက် ၆၄ နှစ် ဦးတိုးဝင်းနှင့် အသက် ၅၇ နှစ်ရှိ ဦးဖိုးဇော် တို့ဖြစ်ပြီး ဦးဖိုးဇော်ဟာ ရင်ဘတ်ကျည်ထိဒဏ်ရာနဲ့ နေရာမှာသေဆုံးသွားကာ ဦးတိုးဝင်းမှာ ဝမ်းဗိုက်ပွင့်ထွက်ဒဏ်ရာနဲ့ ရဲစခန်းအရှေ့မှာလဲကျနေခဲ့ပြီး ဆေးရုံပို့ပေးမယ့်သူမရှိတာကြောင့် သွေးထွက်လွန်သေဆုံးခဲ့တာလို့ သိရပါတယ်။

” အမှန်က ၁ ယောက်က မ​သေသင့်ဘဲသေတာ။ သွေးထွက်လွန်သွားတာ။ ဆေးရုံမရောက်တရောက်မှာ သေတာ။ သူကညနေ ၄ နာရီလောက်ထိ လှုပ်လှုပ်ရှားရှားရှိသေးတယ်။ အဲဒီအချိန် ဘယ်သူမကောက်ရဲဘူး။ ထွက်လည်းမထွက်ရဲဘူး။ လမ်းမပေါ်မှာဆိုတော့ စခန်းတံခါးကနေထွက်မယ်ဆိုရင်လည်း အရှေ့ကိုလေးငါးလှမ်းလောက် လှမ်းရမယ်။ အဲဒါကိုမထွက်ရဲတော့ အဲအတိုင်းပစ်ထားလိုက်တာ။ ည ၇ နာရီလောက်မှ မီးပိတ်ပြီးကောက်တာ”လို့ သူက ဆက်ပြောပါတယ်။

သေဆုံးသူတွေဟာ စက်စုကျေးရွာမှာနေထိုင်သူတွေဖြစ်ပေမယ့် သူရဲသမိန်နဲ့ ဆင်ရွာဇာတိဖြစ်ပြီး ၂ ဦးစလုံးက တောင်သူလုပ်ငန်းလုပ်ကိုင်သူတွေဖြစ်တယ်လို့ သိရပါတယ်။

သူရဲသမိန်ရဲစခန်းအရှေ့မှာ စစ်တောင်းမြစ်သာရှိတာကြောင့် သေနတ်ကျည်ဆန်က မြစ်တဖက်ကမ်း ရွှေကျင်မြို့နယ်၊ ကွမ်းဆိပ်ရွာဘက်က ပစ်ခတ်တာဖြစ်ကြောင်း ဒေသခံတွေက ပြောပါတယ်။

အခင်းဖြစ်ပြီးနောက် သူရဲသမိန်ရွာရဲ့ စက်လှေအဝင်၊အထွက်အားလုံးကို စစ်ကော်မရှင်ဘက်ကပိတ်လိုက်ပြီး ဇန်နဝါရီ ၂၅ ရက်နောက်ပိုင်းမှ ပြန်ဖွင့်ပေးမယ်လို့ သိရပါတယ်။

ပြီးခဲ့တဲ့ဒီဇင်ဘာ ၁၃ ရက်က ဝေါမြို့နယ်၊ စစ်တောင်းမြစ်ကမ်းဘေးကုန်းပေါ်ကြီးဂိတ်မှာ စစ်ဆေးရေးလုပ်နေတဲ့ ပျူစောထီးနဲ့ရဲအဖွဲ့ စနိုက်ပါနဲ့ပစ်ခတ်ခံရလို့ ပျူစောထီးခေါင်းဆောင်သေဆုံးတယ်လို့ သိရပါတယ်။

ကျောက်တံခါး၊ ဇန်နဝါရီ ၁၅၊ ၂၀၂၆။

ပဲခူးတိုင်း၊ ကျောက်တံခါးမြို့နယ်၊ ဘုရားကုန်းကျေးရွာမှာ လက်နက်ကြီးဗုံးစထိမှန်လို့ သက်ကြီးပိုင်း အဘိုးအဘွား ၂ ဦးသေဆုံးခဲ့တယ်လို့ ဒေသခံတွေထံက သိရပါတယ်။

ဇန်နဝါရီ ၁၄ ရက် ယမန်နေ့မနက် ၇ နာရီခန့်မှာ ရွှေဝါကျေးရွာအခြေစိုက် စစ်ကော်မရှင်တပ် ခမရ ၃၀၇ ကနေ လက်နက်ကြီးတွေနဲ့ ကြိမ်ခါးကုန်းကျေးရွာအုပ်စုအတွင်း ကျေးရွာတွေဘက်ကို ဦးတည်ပစ်ခတ်ခဲ့ရာ ၂ မိုင်ခွဲခန့်အကွာရှိ ဘုရားကုန်းကျေးရွာ နေအိမ်တွေပေါ် ကျရောက်ပေါက်ကွဲခဲ့တာလို့ ဆိုပါတယ်။

” ၃၀၇ ဘက်က လက်နက်ကြီးလှမ်းပစ်တာ။ အချက်ရေကတော့ ၃/၄လုံးလောက် ရှိတယ်။ အဲ့ဒီရွာမှာ အိမ်ပေါ်ကျတာ။ သူတို့က အိမ်ထဲမှာရှိနေကြတာ” လို့ ကျောက်တံခါးဒေသခံတဦးက မြေလတ်အသံကို ပြောပါတယ်။

လက်နက်ကြီးကျရောက်ပေါက်ကွဲမှုကြောင့် ဘုရားကုန်းကျေးရွာနေ အသက် ၇၈ နှစ် ဦးသောင်းမြင့်၊ ဇနီးဖြစ်သူ အသက် ၇၀ နှစ် ဒေါ်သန်းအေးတို့မှာ နေရာမှာပဲပွဲချင်းပြီးသေဆုံးခဲ့ကာ မြေးဖြစ်သူ အသက် ၁၆ နှစ်ရှိ မောင်နေဆန်းမှာ ပြင်းထန်ဒဏ်ရာရရှိခဲ့တ​ယ်လို့ ဆိုပါတယ်။

ဇန်နဝါရီ ၁၂ ရက်မှာ ကြိမ်ခါးကုန်းကျေးရွာအနီးကို စစ်ကြောင်းထိုးလာတဲ့ စစ်ကော်မရှင်တပ်တွေနဲ့ဒေသကာကွယ်ရေးတပ်တွေအကြား တိုက်ပွဲတွေဖြစ်ပွားခဲ့ပြီး တိုက်ပွဲတွေကြောင့် ကြိမ်ခါးကုန်းနဲ့အနီးတဝိုက်ကျေးရွာတွေဖြစ်တဲ့ ဘုရားကုန်း၊ ကြိမ်ခါးကုန်း၊ ကျောင်းဆိုး စတဲ့ရွာခံအများစုဟာ နေရပ်စွန့်ခွာထွက်ပြေးနေကြပေမယ့် သေဆုံးသူတွေဟာ ထွက်မပြေးနိုင်တာကြောင့် ကျေးရွာမှာ ဆက်လက်နေထိုင်နေတဲ့ သက် ကြီးပိုင်းတွေဖြစ်တယ်လို့ သိရပါတယ်။

တိုက်ပွဲတွင်းအထိနာခဲ့တာကြောင့် ကျောက်တံခါးအခြေစိုက် ခမရ ၃၀၇ စစ်ကော်မရှင်တပ်က ယမန်နေ့ ဇန်နဝါရီ ၁၄ ရက်မှာ တိုက်ပွဲဖြစ်ပွားခဲ့ရာနေရာတွေကို လက်နက်ကြီးတွေနဲ့ ဦးတည်ပစ်ခတ်ခဲ့တာလို့လည်း သိရပါတယ်။

ဇန်နဝါရီ ၁၂ ရက် ကြိမ်ခါးကုန်းရွာအနီးတိုက်ပွဲမှာ စစ်ကော်မရှင်တပ်စစ်ကြောင်းမှူး ဗိုလ်မှူးအပါ စစ်ကော်မရှင်တပ်ဖွဲ့ဝင် ၂၀ နီးပါး သေဆုံးခဲ့ပြီး သေနတ် ၁၈ လက်နဲ့ ခဲယမ်းအများအပြားကို သိမ်းဆည်းရမိခဲ့တယ်လို့ အမှတ် ၂ စစ်ဆင်ရေးနယ်မြေ သတင်းနဲ့ပြန်ကြားရေးတာဝန်ခံထံက သိရပါတယ်။

ညောင်လေးပင်၊ ဇန်နဝါရီ ၁၂၊ ၂၀၂၆။

ပဲခူးတိုင်း၊ ညောင်လေးပင်မြို့နယ်၊ ပြွန်တန်ဆာမြို့၊ မြို့မ ၁ ရပ်ကွက်မှာ အုပ်ချုပ်ရေးမှူး ၁ ဦး နေအိမ်ထဲပစ်သတ်ခံရတယ်လို့ 9Stars UG အဖွဲ့ဆီက သိရပါတယ်။

ပစ်သတ်ခံရသူဟာ မြို့မ ၁ ရပ်ကွက် အုပ်ချုပ်ရေးမှူး အသက် ၆၈ နှစ်အရွယ် ဦးလှသောင်းဖြစ်ပြီး ဇန်နဝါရီ ၁၂ ရက်မနက် ၅ နာရီခွဲမှာ နေအိမ်အတွင်းဝင်ရောက်ပစ်ခတ်ခဲ့တာလို့ ဆိုပါတယ်။

“သူက သူအိမ်အောက်မှာ အိပ်တာကုတင်နဲ့ အိပ်ယာထဲထိပဲဝင်ပစ်ခဲ့တာ။ ၃ ချက်ပစ်ခဲ့တယ်။ သူမိန်းမလည်း ရှိတယ်။ တွေ့တယ်အော်ဆဲနေတာ ဘာမှမလုပ်ပါဘူး။ ဒီတိုင်းပဲထားခဲ့တယ်။ “လို့ 9Stars UG ခေါင်းဆောင်မြွေပွေးက ပြောပါတယ်။

အုပ်ချုပ်ရေးမှူးနေထိုင်တဲ့နေရာက ပြွန်တန်ဆာရဲစခန်းနဲ့ ကိုက် ၆၀၀ လောက်သာ ဝေးကွာတာကြောင့် ပစ်ခတ်ပြီး အမြန်ပြန်ဆုတ်ခွာခဲ့တယ်လို့ သူကဆက်ပြောပါတယ်။

အုပ်ချုပ်ရေးမှူး ဦးလှသောင်းဟာ သထုံအခြေစိုက် အမှတ် ၅၂၅ ထောက်ပံ့နှင့်ပို့ဆောင်ရေးတပ်ခွဲကနေ တပ်ကြပ်ကြီးရာထူးနဲ့ အငြိမ်းစားယူထားသူဖြစ်ပြီး သား ၂ ဦးဖြစ်တဲ့ ကိုကိုလင်းက အဆိုပါတပ်မှ ဗိုလ်မှူးဖြစ်တယ်လို့သိရပြီး လှဌေးကတော့ ရဲတပ်ဖွဲ့ဝင်ဖြစ်တယ်လို့ 9Stars UG ခေါင်းဆောင်မြွေပွေးက ပြောပါတယ်။

ဦးလှသောင်းဟာ အငြိမ်းစားယူပြီးနောက် အုပ်ချုပ်ရေးမှူးဖြစ်လာပြီး NLD အစိုးရလက်ထက်အတွင်း အုပ်ချုပ်ရေးမှူးရာထူးက ရပ်နားခံခဲ့ရပြီး စစ်အာဏာသိမ်းပြီးနောက်ပိုင်းမှာ အုပ်ချုပ်ရေးမှူး ပြန်ဖြစ်လာသူဖြစ်တဘ်လို့ ခေါင်းဆောင်မြွေပွေးက ပြောပါတယ်။

ဒါ့အပြင် ပြွန်တန်ဆာပျူစောထီးအဖွဲ့ကိုဦးဆောင်ပြီး ဧည့်စာရင်းထောက်ခံစာလုပ်သူတွေကို ငွေအများအပြားတောင်းတာ၊ ဒေသခံတွေကို စစ်မှုထမ်းကြေး ၂ သောင်း၊ ကင်းကြေး ၂ ထောင် လစဥ်ကောက်ခံတာ၊ ရပ်ကွက်ထဲကသူတချို့ကိုလည်း စစ်မှုထမ်းအတွက်ရောင်းစားတာ၊ ရွေးကောက်ပွဲနဲ့ပတ်သက်ပြီး ပူးပေါင်းပါဝင်တာတွေရှိတဲ့အတွက် ခုလိုပစ်ခတ်ခဲ့တာလို့လည်း ဆိုပါတယ်။

ဒီဇင်ဘာ ၁၉ ရက်ကလည်း ညောင်လေးပင်မြို့နယ်၊ သံတံတားစံပြကျေးရွာမှာ လယ်ထဲကနေ ပြန်လာတဲ့ အုပ်ချုပ်ရေးမှူး သေနတ်နဲ့ပစ်ခံရပြီးသေဆုံးသွားတယ်လို့ သိရပါတယ်။

စာတည်း – လင်း

ကံမ၊ ဇန်နဝါရီ ၁၂၊ ၂၀၂၅။

မကွေးတိုင်း၊ သရက်ခရိုင်၊ ကံမမြို့နယ်၊ ပြောင်ကျရွာနဲ့ ပယ်ကျရွာအကြားမှာ မဲရုံတွေလိုက်စစ်ပြီး ပြန်လာတဲ့ ကံမမြို့နယ်အုပ်ချုပ်ရေးမှူးနဲ့အဖွဲ့ တိုက်ခိုက်ခံရပြီး အုပ်ချုပ်ရေးမှူးသေတယ်လို့ ဖြစ်စဥ်ကိုသိထားတဲ့ ဒေသကာကွယ်ရေးအဖွဲ့တွေဆီက သိရပါတယ်။

ဇန်နဝါရီ ၁၁ ရက်မနက် ၁၁ နာရီခန့်မှာ မြို့နယ်အထွေထွေအုပ်ချုပ်ရေးမှုး ဦးဇော်မင်းနိုင်၊ ရဲအဖွဲ့ဝင်တွေနဲ့ မြို့နယ်ကော်မရှင်အဖွဲ့ဝင်တွေ လိုက်ပါလာတဲ့ကားတန်း ကြားဖြတ်တိုက်ခိုက်ခံရတာလို့ ဆိုပါတယ်။

“ကံမမြို့နယ်အုပ်ချုပ်ရေးမှူး သူကမဲရုံတွေကို လိုက်စစ်တယ်ပြောတယ်။ အဲဒီမှာ ကြားဖြတ်တိုက်ခိုက်ခံရတယ်။ မြို့နယ်အုပ်ချုပ်ရေးမှူးက ကျဆုံးတယ်။ သေသွားတယ်ပေါ့။”လို့ ဖြစ်စဥ်ကိုသိထားတဲ့ ဒေသကာကွယ်ရေးအဖွဲ့ဝင်တဦးက ပြောပါတယ်။

စစ်ကော်မရှင်ထောက်ခံတယ်လီဂရမ်တွေမှာတော့ တိုက်ခိုက်ခံပြီးထိခိုက်ဒဏ်ရာရသွားသူတွေကို စစ်ကော်မရှင်အဖွဲ့တွေက ပြည်မြို့ ပြည်သူ့ဆေးရုံကို တင်ပို့ဆေးကုသချိန်မှာ နေ့လယ် ၁ နာရီခန့်မှာ ဦးဇော်မင်းနိုင် သေဆုံးသွားတယ်လို့လည်း ရေးသားဖော်ပြကြပါတယ်။

အဆိုပါပစ်ခတ်မှုအတွင်း မြို့နယ်အုပ်ချုပ်ရေးမှူး ဦးဇော်မင်းနိုင်၊ ယာဥ်မောင်းဖြစ်သူ ဦးသန့်ဇင်အောင်၊ ရဲတပ်ဖွဲ့ဝင်အချို့ ထိခိုက်ဒဏ်ရာရခဲ့တယ်လို့ သိရပါတယ်။

ဒီပစ်ခတ်မှုတွေမှုကို ဘယ်လက်နက်ကိုင်အဖွဲ့အစည်းက လုပ်ခဲ့တယ်ဆိုတာကိုတော့ အတည်ပြုထုတ်ပြန်လာတာ မရှိသေးပါဘူး။

ဇန်နဝါရီ ၆ ရက်ကလည်း မကွေးတိုင်း၊ မြို့သစ်မြို့နယ်၊ ရွှေပန်းကျေးရွာအနီး မြို့သစ်-ကန်ပြား လမ်းပိုင်းမှာ ရွေးကောက်ပွဲကော်မရှင်ဝန်ထမ်းတွေ လိုက်ပါလာတဲ့ယာဥ်တန်း တိုက်ခိုက်ခံရပြီး မြို့နယ်ရဲတပ်ဖွဲ့မှူးအပါ ၈ ဦးသေတယ်လို့ သိရပါတယ်။

စာတည်း – လင်း

ရွှေဘို၊ ဇန်နဝါရီ ၁၂၊ ၂၀၂၆။

စစ်ကိုင်းတိုင်း၊ ရွှေဘိုမြို့၊ မြို့ရှောင်လမ်းမှာ စစ်ကော်မရှင်လက်အောက်ခံ ရဲအဖွဲ့ တိုက်ခိုက်ခံရလို့ အရာရှိ ၃ ဦးသေတယ်လို့ ဖြစ်စဥ်ကိုသိထားတဲ့ မြို့ခံတွေဆီက သိရပါတယ်။

ဇန်နဝါရီ ၁၀ ရက်နေ့မနက် ၁၀ နာရီခန့်မှာ ရွှေဘိုခရိုင်ရဲတပ်ဖွဲ့ရုံးမှ ဒုရဲမှူး ထွန်းထွန်းလင်းပါ ၃ ဦးဟာ ကား ၁ စီးနဲ့သွားချိန် တိုက်ခိုက်ခံရတာလို့ဆိုပါတယ်။

“သူတို့က မြို့ရှောင်လမ်းမှာ စပါးကား၊ နွားကားတွေကို ဆက်ကြေးကောက်ဖို့ သွားတာလို့တော့ သိရတယ်။ သူတို့သွားတာကို မြေသယ်ယာဥ်ကားနဲ့လိုက်လာပြီး ပစ်သွားတာလို့တော့ သိရတယ်”လို့ မြို့ခံတဦးက ပြောပါတယ်။

ပစ်ခတ်ခံရလို့ ဒုရဲမှူး ထွန်းထွန်းလင်း အပါအဝင် ဒုရဲမှူး ၂ ဦး၊ ရဲအုပ် ၁ ဦး စုစုပေါင်း ၃ ဦးသေဆုံးကာပစ်ခတ်မှုဖြစ်ပြီးနောက် စစ်ကော်မရှင်နဲ့ရဲအဖွဲ့တွေက အလောင်းတွေကိုသယ်သွားပြီး သေဆုံးသူ ၃ ဦးရဲ့အလောင်းတွေကိုတော့ ဇန်နဝါရီ ၁၁ ရက်မနက် ၉ နာရီက ရွှေဘိုမြို့ပြင်ရှိ လေးထပ်ကြီးသုသာန်မှာ သင်္ဂြိုဟ်ခဲ့တယ်လို့ ဆိုပါတယ်။

အဆိုပါပစ်ခတ်မှုနဲ့ပတ်သက်ပြီး ပစ်ခတ်မှုပြုလုပ်သွားတဲ့ ရွှေဘိုအခြေစိုက်ပြည်သူ့ကာကွယ်ရေးတပ်ရင်းတခုဆီ မြေလတ်အသံကဆက်သွယ်မေးမြန်းခဲ့ရာ ပစ်ခတ်တာမှန်ကန်ပြီး လက်နက်အချို့လည်းသိမ်းဆည်းရမိခဲ့တယ်လို့ အတည်ပြုပါတယ်။

မေ ၅ ရက်ကလည်း ရွှေဘိုမြို့နယ်၊ ညောင်ပင်သာ စိုက်သိပ္ပံတက္ကသိုလ်နဲ့ ပန်းရံကျေးရွာသွားလမ်းပေါ်မှာ ဒုရဲအုပ်အပါအဝင် ၂ ဦးပစ်သတ်ခံရလို့ သေဆုံးခဲ့သေးတယ်လို့ သိရပါတယ်။

စာတည်း – လင်း