လက်နက်ခဲယမ်းတွေကိုပါ PDF သိမ်းဆည်း

တောင်သာ၊ ဇွန် ၁၃၊ ၂၀၂၅။

မန္တလေးတိုင်း၊ တောင်သာမြို့နယ်မှာ စစ်ကောင်စီတပ်ဖွဲ့ဝင်တွေနဲ့ ဒေသခံတော်လှန်ရေးတပ်တို့ တိုက်ပွဲဖြစ်ပြီးနောက် စစ်ကောင်စီတပ်သား ၁ ဦးကိုအရှင်ဖမ်းမိခဲ့တယ်လို့ တောင်သာမြို့နယ် ပြည်သူ့ကာကွယ်ရေးအဖွဲ့ဆီက သိရပါတယ်။

တောင်သာမြို့နဲ့ ထနောင်းကုန်းရွာကထွက်လာတဲ့ စစ်ကောင်စီတပ်ဖွဲ့ဝင်ပူးပေါင်းစစ်ကြောင်းကို ဇွန် ၁၂ ရက်မနက် ၁၀ နာရီလောက်က တောင်သာမြို့အနောက်ဘက် ဆင်တဲဝဲချောင်းအနောက်ဘက်ကမ်းမှာ စတင်တိုက်ခိုက်ပြီးနောက် တိုက်ပွဲဖြစ်ခဲ့တာလို့ ဆိုပါတယ်။

“အင်အား ၃၀ ကျော်ပါတယ်၊ တောင်သာမြို့နယ်အတွင်းမှာတိုက်တာ၊ တိုက်ပွဲကြာမြင့်ချိန် ၂ နာရီလောက်ကြာတယ်၊ ၃ ဦးသေဆုံးတယ်၊ ၁ ဦးအရှင်မိတယ်” လို့ တောင်သာမြို့နယ်ပြည်သူ့ ကာကွယ်ရေးအဖွဲ့တာဝန်ရှိသူတဦးက ပြောပါတယ်။

အရှင်ဖမ်းမိသူဟာ တပ်သားကျော်နိုင်ဝင်းဖြစ်ပြီး လက်ရှိမှာ ဖမ်းဆီးထိန်းသိမ်းကာ စစ်ဆေးမေးမြန်းတာတွေလုပ်နေတယ်လို့ သိရပါတယ်။

ဒါ့အပြင် စစ်ကောင်စီတပ်ဖွဲ့ဝင်တွေဆီက G4 ၁ လက်၊ MA3 ၁ လက်၊ RPG ဖူး ၁၀ ဖူး၊ ကျည်ဘောက် ၃ ခု၊ ကျည် ၁၁၈ တောင့်၊ Drone Jammer ၁ ခုနဲ့ အခြားဆက်စပ်ပစ္စည်းတွေ သိမ်းဆည်းရခဲ့တယ်လို့ အထက်ပါတာဝန်ရှိသူကပြောပါတယ်။

ဒီတိုက်ခိုက်မှုကို တောင်သာမြို့နယ်ပြည်သူ့ကာကွယ်ရေးအဖွဲ့ နဲ့ မဟာမိတ်အဖွဲ့တွေက ပူးပေါင်းတိုက်ခိုက်ခဲ့တာဖြစ်ပါတယ်။

ပြီးခဲ့တဲ့ မေ ၂၇ ရက်ကလည်း တောင်သာမြို့ကနေ ဝဲလောင်ဘက်ကို စစ်ကူနဲ့ရိက္ခာပို့လာတဲ့ စစ်ကောင်စီ တပ်ဖွဲ့ဝင်တွေပါတဲ့ ကား ၁ စီးကို တောင်သာပကဖ က တိုက်ခိုက်ခဲ့ရာ စစ်ကောင်စီတပ်ဖွဲ့ဝင် ၂ ဦး‌သေဆုံးကာ ၁ ဦးအရှင်ဖမ်းမိပြီး ကား ၁ စီးနဲ့ လက်နက်ခဲယမ်းတွေ သိမ်းဆည်းရမိခဲ့ပါသေးတယ်။

စာတည်း – လင်း

တိုက်ပွဲအတွင်း စစ်ကောင်စီတပ်ဖွဲ့ဝင် ၃ ဦးသေဆုံး

ကျောက်ကြီး၊ ဇွန် ၁၁၊ ၂၀၂၅။

ပဲခူးတိုင်း၊ ကျောက်ကြီးမြို့နယ်၊ ရွာကြီးအင်းကျေးရွာထိပ်မှာတပ်စွဲထားတဲ့ စစ်ကောင်စီတပ်စခန်းကို ဝင်ရောက်တိုက်ခိုက်ခဲ့ရာ စစ်ကောင်စီတပ်ဖွဲ့ဝင် ၃ ဦးသေဆုံးပြီး လက်နက်ခဲယမ်းတွေ သိမ်းဆည်းခဲ့တယ်လို့ Falcons Guerilla Force ကပြောပါတယ်။

စစ်ကောင်စီတပ်ဖွဲ့ဝင် ၂၀ ခန့်နဲ့တပ်စွဲထားတဲ့ အဲ့ဒီစခန်းကို ဇွန် ၁၀ ရက်မနက် ၈ နာရီကျော်မှာ ဒေသကာကွယ်ရေးတပ်တွေက ထိုးစစ်ဆင်တိုက်ခိုက်ခဲ့ရာ မိနစ် ၂၀ ခန့်အကြာမှာ စစ်ကောင်စီဘက်က စခန်းကိုစွန့်ခွာထွက်ပြေးခဲ့တယ်လို့ဆိုပါတယ်။

“သူတို့(စကစ)ဝင်ရောက်တပ်စွဲထားတာက အများပြည်သူတွေရဲ့နေအိမ်တွေပါ။ ကျနော်တို့တိုက်ပွဲဖြစ်ပြီး ဝင်ရောက်ရှင်းလင်းချိန်မှာ MA 1 သေနတ် ၁ လက် ခဲယမ်းတွေ၊ စစ်သုံးဆောင်ပစ္စည်းတွေကို သိမ်းဆည်းရမိခဲ့တယ်ဗျ။ စစ်**အလောင်း ၃ လောင်းတွေ့ခဲ့တယ်”လို့ Falcons Guerilla Force မှတာ ဝန်ရှိသူတဦးကပြောပါတယ်။

ရွာကြီးအင်းကျေးရွာရှိစခန်းမှာ ကျောက်ကြီး-ပဲနွယ်ကုန်းလမ်းမကြီးနဲ့နီးပြီး စစ်ကောင်စီတပ်တွေ စခန်းစွန့်ထွက်ပြေးချိန်မှာလည်း လက်နက်ကြီးတွေနဲ့တောက်လျောက်ပြန်လည်ပစ်ခတ်ခဲ့တယ်လို့ ဆိုပါတယ်။

ပြီးခဲ့တဲ့ ဧပြီ ၂၈ ရက်ကလည်း ကျောက်ကြီးမြို့နယ်ရှိ ကျွန်းကုန်း၊ ရင်းတိုက်ကုန်း၊ တောင်စု၊ ရန်မျိုးအောင်၊ တမာခေါ၊ နောင်ကုန်းတံတားရှိ စစ်ကောင်စီတပ်စခန်းတွေကို ကရင်အမျိုးသား လွတ်မြောက်ရေးတပ်မတော် – KNLA နဲ့ ပူးပေါင်းတပ်ဖွဲ့တွေကတိုက်ခိုက်ရာ ဒုတပ်ရင်းမှူးအပါအဝင် ၂၀ ကျော်သေဆုံးပြီး လက်နက်မျိုးစုံ ၃၀ကျော်နဲ့ ခဲယမ်း၊ စစ်အသုံးအဆောင်ပစ္စည်းတွေ သိမ်းဆည်းရရှိခဲ့တယ်လို့ သိရပါတယ်။

စာတည်း – လင်း

စစ်ကိုင်း၊ ဖေဖော်ဝါရီ ၉၊ ၂၀၂၃။

စစ်ကိုင်းတိုင်း၊ ကန့်ဘလူမြို့နယ်၊ စိန်နားရွာက စစ်သားနဲ့ ပျူစောထီးတွေကို ကာကွယ်ရေးအဖွဲ့တွေ ပူးပေါင်းကာ ဝင်ရောက်တိုက်ခိုက်ခဲ့ပြီး လက်နက်တချို့ပါ သိမ်းဆည်းရမိခဲ့တယ်လို့ သိရပါတယ်။

ဖေဖော်ဝါရီလ ၉ ရက် ဒီကနေ့မနက် ၁ နာရီခန့်က စတင်တိုက်ခိုက်ကာ တိုက်ပွဲ ၁ နာရီကျော် ကြာပြီးနောက်မှာတော့ ရွာကိုသိမ်းနိုင်ခဲ့ပြီး စစ်ကောင်စီဘက်က တပ်ကူတွေ ရောက်လာလို့ အကျဆုံးအခြေအနေကို သေချာမကြည့်နိုင်ဘဲ ပြန်ဆုတ်ခွာခဲ့ကြတယ်လို့ တပ်ဖွဲ့နဲ့ နီးစပ်သူတဦးက ဆိုပါတယ်။

“ပျူစောထီးအများစုက လက်နက်မကောင်းတော့ တိုက်ပွဲဖြစ်နေချိန် ထွက်ပြေးကြတာ၊ ကန့်ဘလူ လက်နက်ကြီးတပ်က‌ လှမ်းထုတယ်။ စစ်ကူတွေကလည်း ရောက်လာဆိုတော့ နယ်မြေရှင်းလင်းရေးက အကြာကြီး မလုပ်နိုင်ခဲ့ဘူး။ ရွာထဲမှာလည်း အကျဆုံးတွေ အများကြီးရှိလောက်သေးတယ်” လို့ ပြောပါတယ်။

ဒီတိုက်ခိုက်မှုကို ရွှေဘိုခရိုင် တပ်ရင်း ၁၆ − Taze Revolution Force-TRF နဲ့ ကန့်ဘလူခရိုင် တပ်ရင်း-၁ရဲ့ တပ်ခွဲ ၁၊ ၂၊ ၄တို့ ပူးပေါင်းတိုက်ခိုက်ခဲ့တာဖြစ်ပြီး၊ အခုအချိန်မှာတော့ စစ်ကူလာတဲ့တပ်တွေ ရွာထဲမှာ ရောက်နေကာ ခံတပ်ကုန်းတွေနဲ့ တိုက်ပွဲအတွင်း ပျက်စီးသွားတာတွေကို ပြန်ပြင်တာတွေ လုပ်နေတယ်လို့ သိရပါတယ်။

ဝင်ရောက်စီးနင်းချိန် ဘန်ကာထဲမှာရှိတဲ့ စစ်သား ၂ ဦးရဲ့ အလောင်းကိုတွေ့ခဲ့ပြီး သူတို့ကိုင်ထားတဲ့ ကာဘိုင်တလက်၊ MA1 တလက်၊ ကျည်ဘောက်နဲ့ ကျည်ဆံတချို့ကို ယူနိုင်ခဲ့တယ်လို့ ဆိုပါတယ်။