မြေလတ်အသံ

မြေလတ်အသံ၊ နိုဝင်ဘာ ၂၊ ၂၀၂၅။

မကွေးတိုင်း၊ ငဖဲမြို့နယ်၊ ရခိုင်ရိုးမပေါ်ရှိ နတ်ရေကန်တောင်ဗျူဟာစခန်းကုန်းကထွက်ပြေးလာတဲ့ စစ်ကော်မရှင်တပ်ဖွဲ့ဝင် ၆၆ ဦးကို ဖမ်းဆီးထိန်းသိမ်းထားတယ်လို့ နိုဝင်ဘာ ၂ ရက် ဒီကနေ့မှာ ချင်းကာကွယ်ရေးတပ်- အရှို (CDF- Asho) က ထုတ်ပြန်လာပါတယ်။

ဇွန် ၁ လအတွင်းက ၄၀ ဦး၊ စက်တင်ဘာနဲ့ အောက်တိုဘာ ၂ လအတွင်းက ၂၆ ဦး ဖမ်းမိခဲ့တာဖြစ်ပြီး အားလုံးက ပေါ်တာဆွဲခံရပြီးနောက် စစ်သားဖြစ်လာကြသူတွေဖြစ်တယ်လို့ ဆိုပါတယ်။

“တချို့ကတော့ လက်နက်နဲ့အတူဖမ်းမိတာရှိသလို တချို့ကတော့ လက်နက်မပါလာပါဘူး။ တိုက်ပွဲဖြစ်နေပြီးတော့မှ သူတို့ကလွတ်ရာလွတ်ကြောင်း ထွက်ပြေးလာသူတွေကို မိတာမျိုးတွေလည်းရှိတဲ့အတွက်ကြောင့်ပါ။ အားလုံးကတော့ နတ်ရေကန် လေကြောင်းရန်ကာကွယ်ရေးစခန်းတိုက်ပွဲတွေကနေပဲ ပြေးလာကြတဲ့သူတွေပါ”လို့ Chin Defence Force-Asho မှ တာဝန်ရှိသူက ပြောပါတယ်။

ဒါ့အပြင် ဇွန်လအတွင်းဖမ်းမိသူ ၄၀ ဦးဆီက MA အမျိုးသား သေနတ် ၁၅ လက်နဲ့ ကျည်ဆန်တွေရရှိခဲ့သလို စက်တင်ဘာနဲ့ အောက်တိုဘာ ၂ လအတွင်း ဖမ်းမိသူ ၂၆ ဦးဆီက သေနတ် ၄ လက်၊ RPG ကျည်၊ ကျည်ဆန်တွေ သိမ်းဆည်းရရှိခဲ့တယ်လို့ သူကဆိုပါတယ်။

အခုလိုဖမ်းဆီးထိန်းသိမ်းထားတွေဟာ အသက် ၁၆ နှစ်ကနေ ၄၀ ကျော်အရွယ်အထိဖြစ်ပြီး သူတို့ရဲ့ ကိုယ်ရေးအချက်အလက် အသေးစိတ်တွေကို ၎င်းတို့ရဲ့ မိသားစုတွေလုံခြုံရေးအရ ထုတ်ဖော်ပြောလို့မရဘဲ အားလုံးကို နိုင်ငံတကာစစ်သုံ့ပန်းဥပဒေနဲ့အညီ ထိန်းသိမ်းထားတယ်လို့ အထက်ပါတာဝန်ရှိသူကပြောပါတယ်။

CDF – Asho အနေနဲ့ စက်တင်ဘာလဆန်းကနေ နိုဝင်ဘာ ၂ ရက် ဒီကနေ့အထိ စစ်ကော်မရှင်တပ်ရဲ့ နတ်ရေကန်ဗျူဟာကုန်းကို စစ်ကူလာရောက်တဲ့စစ်ကြောင်းတွေကို မဟာမိတ်ပူးပေါင်းတပ်တွေနဲ့အတူ ကြားဖြတ်တိုက်ခိုက်မှုနဲ့အတူ ခုခံစစ်၊ ထိုးစစ်ဆင် တိုက်ခိုက်လျှက်ရှိနေတယ်လို့ ဆိုပါတယ်။

စက်တင်ဘာလကနေ အောက်တိုဘာလကုန် အထိ ၂ လတာ တိုက်ခိုက်မှုအတွင်း CDF – Asho မှ တပ်ဖွဲ့ဝင် ၂ ဦးကျဆုံးခဲ့ရပြီး ခြေလက်အင်္ဂါဆုံးရှုံးသူ ၂ ဦး၊ အခြားထိခိုက်ဒဏ်ရာရရှိ တပ်ဖွဲ့ဝင် ၇ ဦးအထိ ရှိခဲ့တယ်လို့ သိရပါတယ်။

စာတည်း – လင်း

ချောက်၊ နိုဝင်ဘာ ၂၊ ၂၀၂၅။

မကွေးတိုင်း၊ ချောက်မြို့နယ်၊ ဆင်ကကျေးရွာမှာ စစ်မှုထမ်းဟောင်း ၁ ဦးပစ်ခတ်ခံရပြီး သေဆုံးခဲ့တယ်လို့ ဒေသခံတွေဆီက သိရပါတယ်။

ပစ်သတ်ခံရသူဟာ စစ်မှုထမ်းဟောင်းအငြိမ်းစား အသက် ၄၅ နှစ်အရွယ် ကိုကျော်ဝင်းဆိုသူဖြစ်ပြီး အောက်တိုဘာ ၃၁ ရက်ညပိုင်းက နေအိမ်အနီးလမ်းပေါ်မှာ ပစ်သတ်ခံရတာလို့ဆိုပါတယ်။

“သူမိန်းမ အေးအေးမော်က ဒလန်လုပ်လို့ သူမိန်းမကိုဝင်ရှင်းတာ။ သူမိန်းမကလွတ်သွားချိန် သူ့ယောက်ျားက ကလန်ကဆန်လုပ်တယ်။ မချေမငံပြောရာကနေ ထွက်ပြေးတယ်ပြောတယ်။ အဲ့ကနေ လမ်းပေါ်ရောက်မှ ပစ်သတ်ခံရတာ။ စကစ က ညပိုင်းဆိုတော့ ဂိတ်မှာမနေချိန် လာလုပ်သွားတာ ဖြစ်နိုင်တယ်။”လို့ ဒေသခံတဦးကပြောပါတယ်။

သေနတ်နဲ့ပစ်ခတ်ခံရလို့ ကိုကျော်ဝင်းရဲ့ ရင်ဘတ်နဲ့ဦးခေါင်းတွေမှာ ကျည်ထိဒဏ်ရာတွေနဲ့ နေရာမှာတင် သေဆုံးသွားပြီး အလောင်းကိုဘယ်သူမှမကောက်ရဲတာကြောင့် နိုဝင်ဘာ ၁ ရက်မနက် စစ်ကော်မရှင်တပ်ဖွဲ့ဝင်တွေဂိတ်ဖွင့်ချိန်မှ ကောက်ရတယ်လို့ ဆိုပါတယ်။

ဆင်ကကျေးရွာအနီးမှာ ခလရ ၁၆ နဲ့ဝါဇီတပ်က စစ်ကော်မရှင်တပ်သားတွေက ဂိတ်ဖွင့်ထားပြီး ညနေပိုင်းဆို ဂိတ်မှာနေတာမရှိဘဲ တပ်ရင်းတွေထဲမှာပြန်နေကြတယ်လို့ သိရပါတယ်။

အဆိုပါ ဒေသတဝိုက်မှာ ဒေသကာကွယ်ရေးအဖွဲ့အများစုရှိနေတာကြောင့် ဘယ်အဖွဲ့တွေက ပစ်ခတ်မှုလုပ်သွားတယ်ဆိုတာမသိရသေးသလို သတင်းထုတ်ပြန်တာမျိုးလည်း မရှိသေးပါဘူး။

စစ်ကော်မရှင်ထောက်ခံတယ်လီဂရမ်တွေမှာတော့ ဆင်ကရွာနေအိမ်မှာရှိနေတဲ့ ပြည်သူ ၁ ဦးကို PDF တွေဘက်က လာရောက်ပစ်သတ်ပြီး ဆိုင်ကယ် ၁ စီး၊ ဖုန်း ၁ လုံး၊ ငွေကျပ် သိန်း ၅၀ ယူဆောင်သွားတယ်လို့ ရေးသားဖော်ပြထားကြပါတယ်။

အောက်တိုဘာ ၁ ရက်ကလည်း ချောက်မြို့နယ်၊ ဆင်ကကျေးရွာအနီး ချောက်-ညောင်ဦးလမ်းပေါ်မှာ ဆောက်လုပ်ရေးဝန်ကြီးဌာနက လက်ထောက်ညွန်ကြားရေးမှူးပါ Non CDM ဝန်ထမ်း ၂ ဦးကို လက်နက်ကိုင်အဖွဲ့တခုက ဖမ်းဆီးသွားတဲ့ဖြစ်စဥ်ရှိခဲ့ပါသေးတယ်။

စာတည်း – လင်း

မြိုင်၊ နိုဝင်ဘာ ၁၊ ၂၀၂၅။

မကွေးတိုင်း၊ မြိုင်မြို့နယ်၊ သရက်ကန်ရွာထဲကနေ နွားစာရိတ်ရန်ထွက်လာတဲ့ ပျူစောထီး ၁ ဦး စောင့်ကြိုပစ်ခတ်ခဲ့ရာ သေဆုံးမှုရှိခဲ့တယ်လို့ ပြည်သူ့လွတ်မြောက်ရေးတပ်ပေါင်းစု – PLC ဆီက သိရပါတယ်။

နိုဝင်ဘာ ၁ ရက် ဒီနေ့ မနက် ၈ နာရီ ၂၄ မိနစ်မှာ သရက်ကန်ရွာထဲကနေ နွားစာရိတ်ရန်ထွက်လာတဲ့ ပျူစောထီး ၁ ဦးကို မီတာ ၈၀ အကွာကနေ ပစ်ခတ်တိုက်ခိုက်ခဲ့တာလို့ ဆိုပါတယ်။
ပစ်ခတ်ခံရသူဟာ ကိုသိန်းတန်ဆိုသူဖြစ်ပြီး ၎င်းဟာ ရွာအပြင်က မြေပဲခင်းထဲကို နွားစာရိတ်ဖို့ လာတဲ့အချိန်ပစ်ခတ်ခဲ့တာလို့ သိရပါတယ်။

“ဒီနေ့မှ မြေပဲခင်းကို နွားစာရိတ်ဖို့ထွက်လာတာကို ကျ‌တော်တို့က စောင့်ပြီးပစ်တာ။ နွားစာရိတ်ဖို့ လာတဲ့အချိန် ပစ်ခတ်ခဲ့တာ။ သူရောက်နေတဲ့နေရာနဲ့ ကျတော်တို့က မီတာ ၈၀ လောက်ဝေးတယ်။ ရွာနဲ့ဆိုရင်တော့ မီတာ ၂၀၀ လောက်ဝေးတယ်။ သူလဲကျသေသွားတော့ နောက်ထပ်ရွာထဲက ထွက်လာကြသေးတယ်” ပြည်သူ့လွတ်မြောက်ရေးတပ်ပေါင်းစု – PLC တာဝန်ခံ ကိုမိုးက ပြောပါတယ်။

ရွာထဲက ထွက်လာတဲ့ ပျူစောထီး တွေနဲ့ ပြည်သူ့လွတ်မြောက်ရေးတပ်ပေါင်းစုတွေ အပြန်အလှန်ပစ်ခတ်မှုတချို့ ရှိခဲ့ပေမယ့် တော်လှန်ရေးတပ်တွေ အထိအခိုက်မရှိပြန်ဆုတ်ခွာခဲ့တယ်လို့ သိရပါတယ်။

မြိုင်မြို့နယ်မှာ သရက်ကန်ရွာကို ပျူစောထီးရွာလို့ တော်လှန်ရေးတပ်တွေက သတ်မှတ်ထားပြီး ကျေးရွာအတွင်းမှာ လက်နက်ကိုင်ပျူ စောထီး ၆၀ နဲ့ စစ်ကောင်စီတပ်က ၁၀ ဦး နေထိုင်တယ်လို့ သိရပါတယ်။

ကျေးရွာအတွင်းမှာနောက်ထပ်ပြည်သူတချို့ နေထိုင်ပြီး ၎င်းတို့ဟာလည်း ပျူစောထီးမိသားစုဝင်တွေဖြစ်တယ်လို့ ဆိုပါတယ်။

ဒီတိုက်ခိုက်မှုကို ပြည်သူ့လွတ်မြောက်ရေးတပ်ပေါင်းစု – PLC၊ မြိုင် ပ.က.ဖ တပ်ရင်း -၁ တပ်ခွဲ -၁၊ တပ်ခွဲ -၄ (စက်ြာ)၊ ဒေါင်းမာန်တပ်ဖွဲ့၊ အညာမြေတပ်ပေါင်းစု၊ ဝံပုလွေပြောက်ကျားတပ်ဖွဲ့၊ ဒေါင်းညီနောင်တပ်ဖွဲ့ နှင့် TYK ပြောက်ကျားတပ်ဖွဲ့တို့က လုပ်ဆောင်ခဲ့တယ်လို့ ဆိုပါတယ်။

ပြီးခဲ့တဲ့ အောက်တိုဘာ ၆ ရက်ကလည်း မြိုင်မြို့နယ် သရက်ကန်ရွာကို ပြည်သူ့လွတ်မြောက်ရေးတပ်ပေါင်းစု – PLC က သွားရောက်ပစ်ခတ်ခဲ့ရာ စစ်သား ၁ ဦးနဲ့ ပျူစောထီး ၃ ဦး သေဆုံးခဲ့ပါသေးတယ်။

စာတည်း – မြတ်

မလှိုင်၊ နိုဝင်ဘာ ၁၊ ၂၀၂၅။

မန္တလေးတိုင်း၊ မလှိုင်မြို့နယ်၊ ရေကမိုးကျေးရွာအနီး ပုန်းမကြည်ဆည် ဝန်ထမ်းလိုင်းခန်းမှာနေထိုင်တဲ့ စစ်မှုထမ်းဟောင်းအမျိုးသား ၁ ဦး သေနတ်နဲ့ပစ်သတ်ခံခဲ့ရတယ်လို့ ဒေသခံတွေထံက သိရပါတယ်။

သေနတ်ပစ်ခံရသူဟာ ရေကမိုးကျေးရွာသား စစ်မှုထမ်းဟောင်းအငြိမ်းစားဖြစ်သူ အသက် ၅၆ နှစ် အရွယ် ဦးအုန်းလွင် ဆိုသူဖြစ်ပြီး အောက်တိုဘာ ၃၀ ရက် မနက် ၈ နာရီကျော်မှာ ၎င်းရဲ့ဝန်ထမ်းလိုင်းခန်းနေအိမ်မှာရှိနေချိန် သေနတ်သမားတွေက လာရောက်ပစ်ခတ်သွားတာလို့ ဆိုပါတယ်။

“သူက စစ်မှုထမ်းကနေ ထွက်လာပြီးတော့ ရွာမှာနေတယ်။ တပ်သားအဆင့်နဲ့ ထွက်ထားတာလို့ သိရတယ်။ ပစ်တာက UG အဖွဲ့တခုက ရှင်းသွားတာလို့တော့ သိရတယ်။ တချက်တည်းပဲ။ သူက ရွာထဲမနေရဲလို့ အဲ့မှာ(ပုန်းမကြည်ဆည်အနီးမှာ) သွားနေနေတာ”လို့ ဒေသခံတဦးက ပြောပါတယ်။

သေနတ်နဲ့အနီးကပ်ပစ်ခံရလို့ ဦးအုန်းလွင်မှာ ဦးခေါင်းကျည်ထိဒဏ်ရာနဲ့ နေရာမှာပဲသေဆုံးသွားပြီး စစ်ကော်မရှင်တပ်ဖွဲ့တွေဘက်က လာရောက်စစ်ဆေးကာ အလောင်းကိုယူဆောင်သွားတယ်လို့ ဆိုပါတယ်။

သေဆုံးသူဟာ စစ်မှုထမ်းဟောင်းအဖွဲ့ဝင်ဖြစ်သလို ပုန်းမကြည်ဆည်မှာလည်း နေ့စားဝန်ထမ်းအဖြစ်လုပ်ကိုင်နေသူဖြစ်ကာ ကျေးရွာအတွင်းပြဿနာတစုံတခုဖြစ်ပါက ရဲနဲ့တပ်ကို မကြာခဏ ချိတ်ဆက်ခေါ်ဆောင်နေသူဖြစ်တယ်လို့ ဆိုပါတယ်။

စစ်ကော်မရှင်ထောက်ခံတယ်လီဂရမ်တွေမှာတော့ ပုန်းမကြည်ဆည်နေ့စားဝန်ထမ်း ၁ ဦးကို PDF ၄ ဦးက ဒလန်ဆိုကာ ပစ်ခတ်သတ်ဖြတ်သွားတယ်လို့ စွပ်စွဲဖော်ပြထားကြပါတယ်။

ပြီးခဲ့တဲ့ စက်တင်ဘာ ၁ ရက်မှာလည်း မလှိုင်မြို့နယ်၊ မလှိုင်-ဆည်တိုသွားကားလမ်း၊ ကံကျေးရွာလမ်း ဆုံအနီးမှာ သဲကန်ကျေးရွာနေအမျိုးသား ၂ ဦး ပစ်ခတ်ခံရပြီး ၁ ဦးသေဆုံးကာ ၁ ဦးဒဏ်ရာရခဲ့တယ်လို့ သိရပါတယ်။