အုတ်ဖို၊ ဇွန် ၃ ၊၂၀၂၅။

ပဲခူးတိုင်း၊ အုတ်ဖိုမြို့နယ်မှာ စစ်ကောင်စီလက်အောက် ရာအိမ်မှူး ၁ ဦး သေနတ်ပစ်ခံရပြီး သေဆုံးခဲ့တယ်လို့ သာယာဝတီခရိုင် တပ်ရင်း ၃၈၀၂ တပ်ခွဲ ၄ ထံက သိရပါတယ်။

သေဆုံးသူဟာ ထန်းပင်ကုန်းကျေးရွာနေ ရာအိမ်မှူး အောင်မိုးခိုင် ၅၂ နှစ် ဖြစ်ပြီး ချောင်းခွ(ကေ)ရွာနဲ့ သရက်နှစ်ဖျားလိန်ရွာကြားလမ်းပေါ်မှာ ဇွန် ၁ ရက်ညနေ ၆ နာရီကျော်က သေနတ်နဲ့ပစ်ခတ်ခံခဲ့ရတာလို့ ဆိုပါတယ်။

” ကျနော်တို့ရဲဘော်တွေ ကင်းပုန်း၀ပ်နေတဲ့အချိန်ဗျ။ သူလာမယ်ဆိုလို့ ကင်းပုန်း၀ပ်ပြီး စောင့်နေတာ၊ အောင်မိုးခိုင်တယောက်တည်းလာတာပါ။ ကျနော်တို့ကိုမြင်တော့ သူကအရင် လက်ပစ်ဗုံးနဲ့ စပစ်တာ၊ လက်ပစ်ဗုံးကကွဲတယ်ဗျ။ ကျနော်တို့ဘက်တော့မရောက်ဘူး၊ နေရာလွဲသွားတယ်” လို့ သာယာဝတီခရိုင်တပ်ရင်း ၃၈၀၂ တပ်ခွဲ ၄ မှ ပြန်ကြားရေးတာဝန်ခံက ပြောပါတယ်။

သေဆုံးသူရာအိမ်မှူးမှာ တိမ်မြုပ်ကျေးရွာအခြေစိုက် ခမရ ၆ တပ်ရင်းမှ ဆေးတပ်သားဟောင်းဖြစ်ပြီး စစ်အာဏာသိမ်းပြီးနောက် စစ်ကောင်စီလက်အောက်အုပ်ချုပ်ရေးအဖွဲ့ဝင်သတင်းပေးလုပ်ဆောင်ကာ လက်ပစ်ဗုံးကိုင်ဆောင်ထားသူဖြစ်တယ်လို့ သိရပါတယ်။

ရာအိမ်မှူး အောင်မိုးခိုင်ဟာ တော်လှန်ရေးတပ်ဖွဲ့တွေရဲ့အချက်အလက်တွေ စုံစမ်းထောက်လှမ်းတာ၊ ပြည်သူတွေထံ စစ်မှုထမ်းကြေးခြိမ်းခြောက်ကောက်ခံတာ၊ စစ်ကောင်စီတပ်ဖွဲ့တွေနဲ့အတူ လူငယ်တွေကို ပေါ်တာဆွဲဖမ်းဆီးတာ၊ စစ်ကောင်စီစစ်ကြောင်းတွေမှာ လမ်းပြလုပ်ဆောင်နေသူဖြစ်တယ်လို့ ဆိုပါတယ်။

အောင်မိုးခိုင် အသတ်ခံရပြီးနောက် ရုပ်အလောင်းကို ခမရ ၆ တပ်ရင်းမှ စစ်ကောင်စီတပ်ဖွဲ့ဝင်တွေက ကားတစီးနဲ့လာရောက် ကောက်ယူသွားတယ်လို့ သိရပါတယ်။

စာတည်း – ဟိန်းစံ

ညောင်ဦး၊ ဇွန် ၃၊ ၂၀၂၅။

မန္တလေးတိုင်း၊ ညောင်ဦးမြို့နယ်၊ ပုဂံမြို့သစ်၊ ဂန့်ဂါရပ်ကွက်ရှိ ဇရပ်မှာထိုင်နေတဲ့ အုပ်ချုပ်ရေးမှူးအဖွဲ့ ပစ်ခတ်ခံရပြီး ၈ ဦးသေဆုံးကာ လက်နက်အချို့ သိမ်းဆည်းရမိခဲ့တယ်လို့ ညောင်ဦးခရိုင်အခြေစိုက် ထနောင်းမြေစစ်ကြောင်းထံက သိရပါတယ်။

ဇွန် ၁ ရက် နေ့လယ် ၂ နာရီကျော်မှာ ဂန့်ဂါရပ်ကွက်အုပ်ချုပ်ရေးမှူး ပျူစောထီးခေါင်းဆောင် ဇော်ဇော်ဦးစီးအဖွဲ့ဟာ အလှူခံမဏ္ဍပ်ဖွင့်လှစ်ထားတဲ့ အခင်းဖြစ်နေရာမှာ ငွေကြေးကောက်နေကြောင်း သတင်းရတာကြောင့် သွားရောက်ပစ်ခတ်ခဲ့တာဖြစ်ပြီး ပစ်ခတ်ချိန်မှာ ဇရပ်အတွင်း နှစ်ဖက်ခွဲထိုင်နေကြတယ်လို့ ဆိုပါတယ်။

” ကျနော်တို့အထင်ကျည်ထိတာလား၊ သူ(အုပ်ချုပ်ရေးမှူး) ကလစ်ဖြုတ်ပြီး ပြန်ပစ်တဲ့ နာနတ်သီး (လက်ပစ်ဗုံး)ကျကွဲပြီး ထိတာလားဘဲ။ ကျနော်တို့က ကားနဲ့ဖြတ်ပြီး ပစ်သွားတာပဲ။ အဓိက သူ့ကို (အုပ်ချုပ်ရေးမှူး)ပစ်တာ။ သူ့နောက်လိုက်တွေတော့ပါတယ်။ ကားပြန်လှည့်ခါနီးမှာတော့ နာနတ်သီးကွဲသံကြားလိုက်သေးတယ်။ ကားနဲ့လမ်းမပေါ်ကဖြတ်သွားရင်း မစ်ရှင်လုပ်တာ၊ ပြန်လှည့်လာတော့ အကုန်လဲနေကြပြီ “လို့ ထနောင်းမြေစစ်ကြောင်း IO မူတူးက မြေလတ်အသံကို ပြောပါတယ်။

ပစ်ခတ်မှုအတွင်း အုပ်ချုပ်ရေးမှူး ဦးဇော်ဇော်အပါအဝင် ၈ ဦးသေဆုံး၊ ၁ ဦးဒဏ်ရာရထားတာကိုတွေ့ရကာ ပစ်ခတ်မှုဖြစ်ခဲ့တဲ့နေရာကို ဝင်ရောက်ရှင်းလင်းချိန်မှာ ဦးဇော်ဇော်ကိုင်ဆောင်တဲ့ လက်လုပ်သေနတ် ၂ လက်၊ လက်ပစ်ဗုံး ၁ လုံး၊ ဦးဇော်ဇော်ကိုင်ဆောင်တဲ့မှတ်ပုံတင်၊ ကျည်အချို့သိမ်းဆည်းရမိခဲ့တယ်လို့ သိရပါတယ်။

စစ်ကောင်စီထောက်ခံတယ်လီဂရမ်တွေမှာတော့ အုပ်ချုပ်ရေးမှူးနဲ့ရပ်မိရပ်ဖတွေဟာ ဂန့်ဂါရပ်ကွက်ရှိ ဓမ္မာရုံ၌ ရပ်ကွက်အုပ်ချုပ်ရေးမှူးနဲ့ လူ ၁၅ ဦးခန့်ဟာ ပဌာန်းပွဲအတွက် အစည်းအဝေးပြုလုပ်နေချိန် PDF တွေဘက်က ဝင်ရောက်ပစ်ခတ်ခဲ့တာကြောင့် အုပ်ချုပ်ရေးမှူး ဦးဇော်ဇော် (ခ)ဦးမြင့်ဇော် အပါ ဦးတင်မြိုင်၊ ဦးခင်မောင်ဌေး၊ ဦးခင်မောင်သန်း၊ ဦးသန်းထွန်း၊ ဦးစိုးမင်းနှင့် ဦးကြည်ထွန်းတို့ သေဆုံးခဲ့ပြီး ၆ ဦး ဒဏ်ရာပြင်းထန်ရခဲ့တယ်လို့ ရေးသားဖော်ပြကြပါတယ်။

စစ်ကောင်စီတယ်လီဂရမ်ချန်နယ်တွေမှာ ဖော်ပြနေမှုအပေါ် ထနောင်းမြေစစ်ကြောင်း IO မူတူးက အခုလိုတုံ့ပြန်ပါတယ်။

” ပဌာန်းပွဲလုပ်မယ့်သူတွေကလည်း သေနတ်တွေကော လက်ပစ်ဗုံးတွေကပါနေတာဆိုတော့ ဟုတ်၊ မဟုတ်ဆိုတာ စဥ်းစားကြည့်ပါအုန်း”လို့ ၎င်းက ပြောပါတယ်။

အဆိုပါ ပစ်ခတ်မှုကိုတော့ ထနောင်းမြေစစ်ကြောင်း၊ Bagan & Nyaung-U Special Task Force တို့က ပူးပေါင်းတိုက်ခိုက်ခဲ့တာလို့ ဆိုပါတယ်။

ဇွန် ၂ ရက် မနက် ၅ နာရီခန့်မှာလည်း ညောင်ဦးမြို့နယ်၊ စဥ့်ကူးကျေးရွာနေ ရာအိမ်မှူး အသက် ၄၀ ဝန်း ကျင်ရှိ ဦးထွန်းထွန်းနိုင်ဟာ နေအိမ်မှာ ရှိနေချိန်သေနတ်သမားတွေက ဝင်ပစ်သွားလို့ သေဆုံးသွားတယ်လို့ သိရပါတယ်။

စာတည်း – ဟိန်းစံ

မြေလတ်အသံ၊ ဇွန် ၂၊ ၂၀၂၅။

မကွေးတိုင်း၊ ပခုက္ကူအခြေစိုက်တပ်မ ၁၀၁ ကနေ လက်နက်၊ ရိက္ခာနဲ့ စစ်အင်အားရာကျော် တင်ဆောင်လာတဲ့ယာဥ်တန်းဟာ ဇွန် ၁ ရက်ကစပြီးပခုက္ကူမြို့ကထွက်လာတယ်လို့ မြေပြင်အခြေအနေကို သိရှိတဲ့ဒေသခံတွေဆီကသိရပါတယ်။

စစ်ကောင်စီတပ်ဖွဲ့ဝင် ၄၀၀ ဝန်းကျင်လိုက်ပါလာတဲ့ စစ်ကားနဲ့ပြည်သူပိုင်ကား ၁၂၆ စီးဟာ နေ့လယ် ၂ နာရီကျော်မှာစတင်ထွက်ခွာလာတာဖြစ်ပြီး ပေါက်မြို့နယ်နဲ့ မြိုင်မြို့နယ်ရှိ ပျူစောထီးအထိုင်စခန်းတွေဆီကိုသွားနေတာလို့ ဆိုပါတယ်။

ကားတန်းလာရာလမ်းတလျောက်မှာ စစ်ကောင်စီဘက်ကကင်းပုန်းတွေချထားတယ်လို့လည်း မြေပြင်အခြေအနေကိုသိရှိထားသူဖြစ်တဲ့ မြိုင်ဒေါင်းမင်းက ပြောပါတယ်။

“ကားတန်းက ပခုက္ကူ-ပေါက်လမ်းမအတိုင်းထွက်လာတာဗျ။ လမ်းတလျောက်ကိုတော့ ကင်းပုန်းတွေ ချထားတယ်။ စကစ အင်အားများတော့ တော်လှန်ရေးအဖွဲ့တွေက မိုင်းခွဲတိုက်လိုက်တာ အနည်းအကျဥ်းလောက်ပဲလုပ်နိုင်တယ်ဗျ” လို့ သူကဆိုပါတယ်။

ဇွန် ၂ ရက်ဒီနေ့လယ် ၂ နာရီကျော်မှာတော့ အထက်ပါစစ်ယာဥ်တန်းဟာ ပခုက္ကူမြို့နယ်၊ ကန်တော်စံပြကျေးရွာအနောက်ဘက်ရှိ စစ်ကောင်စီတပ်ဂိတ်မှာပဲ ရောက်ရှိနေတယ်လို့ မြိုင်ဒေါင်းမင်းကဆိုပါတယ်။

စစ်ယာဥ်တန်းလာတဲ့လမ်းတလျောက်မှာ တော်လှန်ရေးတပ်တွေဘက်က မိုင်းဆွဲတိုက်ခိုက်တာတွေရှိသလို စစ်ကောင်စီဂိတ်တွေမှာ နားရင်းသွားတဲ့အတွက် အဆိုပါစစ်ကြောင်းဟာ လမ်းမှာပဲ အချိန်ကြာမြင့်နေတယ်လို့ ဆိုပါတယ်။

လက်ရှိအချိန်ထိစစ်ကြောင်းထိုးတာမျိုးမရှိသေးဘဲ စစ်ရေးအခြေအနေလည်းငြိမ်သက်နေတယ်လို့ သူကဆက်ပြောပါတယ်။

အဆိုပါယာဥ်တန်းထွက်ခွာလာတဲ့ ဇွန် ၁ ရက်ကစလို့ ပခုက္ကူ-ပေါက်-မြိုင်အစပ်ကားလမ်း နံဘေးမှာရှိတဲ့ ပခုက္ကူမြို့နယ်က ကံရက်ကြီးရွာ၊ ကံရက်ကလေးရွာ၊ ရွာသာယာရွာ၊ ညောင်ပင်လှ၊ ကန်တော်ရွာ၊ မြိုင်မြို့နယ်က ကံမြင့်ကုန်းရွာနဲ့ ပေါက်မြို့နယ်ရှိ ရေပြာနဲ့ ရွှေလံရွာက ဒေသခံတွေလည်းရွာကတိမ်းရှောင်နေကြတယ်လို့ သိရပါတယ်။

စာတည်း – လင်း

အောင်လံ၊ ဇွန် ၂၊ ၂၀၂၅။

မကွေးတိုင်း၊ အောင်လံမြို့နယ်၊ ထိန်အင်းကျေးရွာမှာ ကျေးရွာအုပ်ချုပ်ရေးမှူးက စစ်မှုထမ်းကြေး ခြိမ်းခြောက်ပြီးတိုးကောက်နေတဲ့အတွက် အခက်တွေ့နေရတယ်လို့ ဒေသခံတွေဆီက သိရပါတယ်။

၂၀၂၄ နှစ်စကတည်းက စစ်မှုထမ်းကြေးကောက်ခံနေတာဖြစ်ပြီး ယခင်က ကျပ် ၂,၅၀၀၀၊ ၃,၀၀၀၀ ကောက်ခံရာကနေ မေလကစပြီး ကျပ် ၄၀,၀၀၀ နှုန်းနဲ့ကောက်ခံနေတာကြောင့် ဒေသခံလက်လုပ်လက်စားတွေအနေနဲ့ အခက်အခဲဖြစ်နေကြတယ်လို့ ဆိုပါတယ်။

” ၂၀၂၄ နှစ်စမှာ စပေးရတာ၊ အခုအထိပဲ အဲ့ဒါပေးနေရတာ။ ၁ လ ၁ကြိမ်၊ ၂ လ ၁ကြိမ်၊ ၃ လ ၁ကြိမ် (ပေးဆောင်ရတဲ့အချိန်)မမှန်ဘူး။ အခု လေးသောင်းကလည်း ၃ လ ၁ ကြိမ်ပေးရမယ်လို့ ပြောတယ်။ မပေးဘူးဆိုရင်လည်း သူတို့က ခြိမ်းခြောက်တယ်။ မပေးနိုင်ဘူးဆိုရင်လည်း ကိုယ့်ကိစ္စကိုယ်ရှင်းကြပေါ့၊ မပေးနိုင်လို့ လာဖမ်းရင်လည်း လိုက်သွားကြပေါ့ အဲ့လိုခြိမ်းခြောက်ထားတာ၊ မပေးချင်လည်း ပေးနေရတာပေါ့” လို့ ဒေသခံတဦးက ပြောပါတယ်။

ထိန်အင်းကျေးရွာဟာ ယခင်က ကျွဲသေကျေးရွာအုပ်စုဝင်ရွာဖြစ်ပြီး အခုအခါ ၎င်းကျေးရွာအုပ်စုဝင် မဟုတ်တော့ပေမယ့် ထိန်အင်းရွာအုပ်ချုပ်ရေးမှူး ဦးမောင်အေးနဲ့ ကျွဲသေရွာအုပ်ချုပ်ရေးမှူး ဦးစိန်ကုလား တို့က ပူးပေါင်းပြီး ခြိမ်းခြောက်ကောက်ခံနေတာလို့ သူက ဆက်ပြောပါတယ်။

“ကျွဲသေက ဥက္ကဌပေါ့ စိန်ကုလားဆိုတဲ့ဥက္ကဌနဲ့ သူ(ထိန်အင်းရွာ အုပ်ချုပ်ရေးမှူး ဦးမောင်အေး)နဲ့က ပေါင်းပြီးလုပ်နေတာပေါ့။ အဲ့ဒီ စိန်ကုလားက သူ့မှာ အနားမှာစစ်သားတွေရှိတယ် သေနတ်လည်း သူ့မှာကိုင်ထားတယ် သေနတ်ရှိတယ်။ အဲ့လို ပေါင်းပြီးလုပ်နေတာ မပေးနိုင်ရင် တခုခု ရန်ရှာမယ်ပေါ့။” လို့ အဆိုပါ ဒေသခံကပြောပါတယ်။

ထိန်အင်းကျေးရွာအပြင် အနီးအနားရွာတွေဖြစ်တဲ့ ရွာမ၊ အောင်ညီသာရွာအပါအဝင် တခြားရွာတွေမှာ စစ်မှုထမ်းကြေးကောက်ခံမှုရှိနေပြီး ပေးရတဲ့နှုန်းအတူတူလောက်ဖြစ်နိုင်မယ်လို့ ခန့်မှန်းပေမယ့် ဘယ်လိုပေးဆောင်ရတယ်ဆိုတာတော့ အတိအကျမသိရဘူးလို့ သူကဆိုပါတယ်

အဆိုပါ စစ်မှုထမ်းကြေးတိုးမြှင့်ကောက်ခံတာကြောင့် ဒေသခံလက်လုပ်လက်စားတွေအနေနဲ့ ပေးဆောင်ဖို့ အခက်အခဲရှိနေတဲ့အပြင် စစ်မှုထမ်းကြေးပေးထားပါကလည်း ကျေးရွာအတွင်းမှာသာအာမခံပြီး အပြင်ထွက်ချိန်ဖမ်းဆီခံရပါက တာဝန်မယူနိုင်ကြောင်း ကျေးရွာအုပ်ချုပ်ရေးမှူးကပြောထားတဲ့အတွက် ရွာအပြင်ထွက်အလုပ်လုပ်ကိုင်ရာမှာလည်း အခက်အခဲတွေရှိနေတယ်လို့ ဆိုပါတယ်။

ပြည်သူ့စစ်မှုထမ်းဥပဒေကို ၂၀၂၄ ခုနှစ် ဖေဖော်ဝါရီ ၁၀ ရက်မှာ စစ်ကောင်စီရဲ့ အမိန့်ကြေညာစာအမှတ် ၂၇ /၂၀၂၄ နဲ့ စစ်ခေါင်းဆောင် မင်းအောင်လှိုင်က ထုတ်ပြန်ခဲ့ပြီးတဲ့နောက် ၂၀၂၄ ခုနှစ် ဩဂုတ်လ ၈ ရက်မှာ ပြည်သူ့စစ်မှုထမ်းသင်တန်း စတင်ဖွင့်လှစ်ခဲ့ကာ လက်ရှိမှာ အပတ်စဉ် ၁၀ အထိ သင်တန်းပြီးဆုံးခဲ့ပြီး အပတ်စဉ် ၁၁၊ ၁၂ နဲ့ ၁၃ တို့ သင်တန်းတက်ရောက်နေဆဲ ဖြစ်ပါတယ်။

စာတည်း – လင်း