မြေလတ်အသံ၊ စက်တင်ဘာ ၂၈၊ ၂၀၂၅။

မိုးသည်းထန်စွာရွာပြီး တောင်နံရံပြိုကျမှုကြောင့် ပြိုကျပျက်စီးသွားတဲ့ မကွေးတိုင်း၊ ဆောမြို့နယ်၊ ဆော-ကျောက်ထု ကတ္တရာ ကားလမ်းပိုင်းကို ပြုပြင်နေဆဲဖြစ်တာကြောင့် ယာဥ်ငယ်တွေကို အချိန်အကန့်အသတ်နဲ့ သွားလာခွင့်ပြုထားရတယ်လို့ ဒေသခံတွေကပြောပါတယ်။

ပျက်စီးသွားတဲ့ လမ်းအရှည် ပေ ၂၀၀ ခန့်ကို စက်တင်ဘာ ၂၆ ရက်ကနေ ၂၈ ရက် ဒီကနေ့အထိ ပြုပြင်နေရဆဲဖြစ်တာကြောင့် ကုန်ကားကြီးတွေကိုသွားလာခွင့်မပေးဘဲ အိမ်စီးကား၊ ခရီးသည်တင် ကားငယ်တွေနဲ့ ကယ်ရီဆိုင်ကယ်တွေကိုသာ သွားခွင့်ပြုပေးနေရတာလို့ ဆိုပါတယ်။

“အချိန်တွေက အလုပ်လုပ်ချိန် ၁ နာရီခွဲလောက်ကြာရင် ၁ ကြိမ်သွားခွင့်ပြုပါတယ်။ အလုပ်နားချိန် ခွင့်ပြုတာမဟုတ်ပါ။ ခရီးသွားတွေသွားနိုင်ဖို့ လုပ်ငန်းရပ်ပေးရတာပါ။ အချိန်ကို နာရီနဲ့ပြောလို့မရဘူး။ စက်ယန္တရားတွေနဲ့ အလုပ်စလုပ်ပြီး ၁ နာရီလောက်ကြာရင် တကြိမ်သွားခွင့်ပြုတယ်” လို့ လမ်းပြုပြင်ရာမှာ ဦးဆောင်လုပ်ကိုင်ပေးနေတဲ့ ဆရာတော်တပါးက မိန့်ပါတယ်။

စက်တင်ဘာ ၂၇ ရက်မနေ့ကမနက်ပိုင်းမှာ လမ်းပြုပြင်နေဆဲကြားကနေ ကားတွေ၊ ဆိုင်ကယ်တွေကို ၃ ကြိမ်ခွင့်ပြုပေးခဲ့ရပြီး စက်တင်ဘာ ၂၈ ရက်ဒီကနေ့မှာတော့ မနက်ပိုင်း ၁ ကြိမ်သာ သွားခွင့်ပြုခဲ့ရပြီး လမ်းအနေနဲ့ ယာဥ်ကြောတဖက်စီပဲသွားခွင့်ပြုရတာကြောင့် ၁ ကြိမ်ကို မိနစ် ၂၀ ခန့်ကြာမြင့်တယ်လို့ သိရပါတယ်။

လက်ရှိပြုပြင်နေရတဲ့ ကားလမ်းပိုင်းဟာ ပြိုကျသွားတဲ့ကတ္တရာလမ်းအစား တောင်ခြေရင်းကနေ ဘက်ဟိုးတွေနဲ့ မြေသားလမ်းသစ်ဖောက်လုပ်ထားတာဖြစ်တာကြောင့် အဲဒီလမ်းကို နောက်ထပ် ရေတိုက်မစားရအောင် သစ်၊ ဝါးတွေနဲ့ဆည်ခတ်ပြီး မြေပြိုတာသက်သာအောင် ကမ်းပါးတွေကို သစ်တွေနဲ့ ဗန်းအဆင့်တွေလုပ်ရအုံးမှာဖြစ်တယ်လို့လည်း ဆိုပါတယ်။

“လမ်းပြင်တဲ့နေရာက ဖို့မြေအသစ်တွေဆိုတော့ လမ်းချော်တယ်။ ဗွက်ထတယ်။ သီးခြားလမ်းလွှဲ လုပ်ဖို့ကလည်းခက်နေတာ။ တောင် နဲ့ ရေချောင်းကြားဆိုတော့ ယာယီလမ်းလွှဲလုပ်လို့ မရဘူး။ လမ်းသစ်အခြေအနေက နောက်သုံးရက်လောက်ဆိုရင် ပြီးမှာပါ။ ကုန်ကျငွေကိုတော့ ပြည်သူတွေလှူကြပါတယ်”လို့ အထက်ပါ ဆရာတော်ကမိန့်ပါတယ်။

အဆိုပါ လမ်းသစ်ပြုပြင်နေမှုဟာ လာမယ့် အောက်တိုဘာ ၁ ရက်မှာ ပြီးစီးနိုင်ပြီး ပြုပြင်မှု ကုန်ကျစရိတ်ကတော့ သိန်း ၂၀၀ ခန့်မှန်းထားကာ လက်ရှိမှာပြည်သူတွေနဲ့ အဖွဲ့အစည်းတွေဆီကနေ အလှူငွေ သိန်း ၁၃၀ ခန့် ရရှိထားပြီဖြစ်တယ်လို့လည်း ဆရာတော်က မိန့်ကြားပါတယ်။

ခုပျက်စီးသွားတဲ့လမ်းပိုင်းဟာ မကွေးတိုင်းကနေ ရခိုင်ပြည်နယ်နဲ့ ချင်းပြည်နယ်ဖက်တို့ကို ကုန်စည်စီးဆင်းရာမှာအရေးပါတဲ့ လမ်းတခုဖြစ်ပြီး ပြီးခဲ့တဲ့ စက်တင်ဘာ ၂၅ ရက်နေ့လယ် ၃ နာရီကျော်မှာ မိုးရွာပြီးတောင်နံရံမြေပြိုကျရာကနေတဆင့် ပျက်စီးခဲ့တာလည်းဖြစ်ပါတယ်။

ဓာတ်ပုံ – ပေးပို့။

စာတည်း – လင်း

မြေလတ်အသံ၊ စက်တင်ဘာ၂၈၊ ၂၀၂၅ ။

စစ်ကိုင်းတိုင်း၊ ဆားလင်းကြီးမြို့နယ်ရှိ ကြေးစင်တောင်စီမံကိန်း ကြေးနီထုတ်စီမံကိန်းလုပ်ငန်းခွင်ထဲ လက်နက်ကြီးဗုံးသီး ကျရောက်ပေါက်ကွဲတာကြောင့် တရုတ်ကုမ္ပဏီဝမ်ပေါင်နဲ့ယန်စီရဲ့ ကြေးနီထုတ်လုပ်ရေးလုပ်ငန်းတွေကို ယာယီရပ်ဆိုင်းလိုက်တယ်လို့ ကုမ္ပဏီနဲ့နီးစပ်တဲ့ ဒေသခံဆီက သိရပါတယ်။

စက်တင်ဘာ ၂၇ ရက် ယမန်နေ့ မနက် ၁၀ နာရီလောက်မှာ ကြေးပြားထုတ်စက်ရုံအနီး ၁လုံး၊ မိုင်းမြို့တွင်း ၁ လုံး၊ စက်ကြီးပြင်စက်ရုံအနီး ၁ လုံး၊ စက်ရုံတွင်းလမ်းပေါ် ၂ လုံး စုစုပေါင်း ၅လုံး ကျရောက်ပေါက်ကွဲခဲ့တာဖြစ်ပြီး အဲ့ဒီနောက်တူးဖော်ရေးဌာနက စက်ယန္တရားတွေအပါ ထုတ်လုပ်မှုလုပ်ငန်းတွေကို ရပ်ဆိုင်းလိုက်တာလို့ ဆိုပါတယ်။

“ဆဲလိုင်း( နံပါတ် ၁၁) ပေါ်ကျတဲ့အလုံးဆို ကြေးပြားထုတ်တဲ့စက်ရုံနဲ့ အနီးစပ်ဆုံးကျတာ။ တရုတ်တွေတော်တော်ကြောက်သွားပုံရတယ်။ လုပ်ငန်းချက်ချင်းရပ်သွားတာ။” လို့ ကုမ္မဏီနဲ့နီးစပ်တဲ့ဒေသခံတဦးက မြေလတ်အသံကို ပြောပါတယ်။

အခင်းဖြစ်ပြီးနောက် ဒီကနေ့ စက်တင်ဘာ ၂၈ ရက်မနက်ပိုင်းအထိ ကြေးနီထုတ်လုပ်ရေးလုပ်ငန်းတွေ ရပ်ဆိုင်းထားဆဲဖြစ်ကြောင်းသိရပြီး ဖြစ်စဥ်နဲ့ပတ်သက်လို့ ဘယ်တပ်ဖွဲ့တွေက ပစ်ခတ်တယ်ဆိုတာ အတည်မပြုနိုင်သေးသလို ဒေသတွင်းတော်လှန်ရေးအင်အားစုတွေဘက်ကလည်း ထုတ်ပြန်ထားတာမတွေ့ရသေးပါဘူး။

ကြေးနီစီမံကိန်းအတွင်း ဗုံးသီးကျရောက်ပေါက်ကွဲပြီးနောက် ယန်စီကုမ္မဏီတွင်းတပ်စွဲနေတဲ့ စစ်ကော်မရှင်တပ်သားတွေက စီမံကိန်းအနီးရှိ ကျေးရွာတွေဘက်ကို လက်နက်ကြီးတွေနဲ့ ပြန်လည်ပစ်ခတ်ခဲ့လို့ ရွှေပန်းခိုင်နဲ့ သဲတောကြီးကျေးရွာတွေအနီး ကျရောက်ပေါက်ကွဲခဲ့ကာ လူထိခိုက်မှုတော့ မရှိဘူးလို့ သိရပါတယ်။

စစ်အာဏာသိမ်းပြီးနောက် လက်ပံတောင်းနဲ့ ကြေးစင်တောင် ကြေးနီထုတ်လုပ်ရေးစီမံကိန်းလုပ်ငန်း ခွင်ကအလုပ်သမားအများစု အကြမ်းမဖက်အာဏာဖီဆန်ရေးလှုပ်ရှားမှု CDM မှာပါဝင်ခဲ့လို့ လုပ်ငန်းတွေ ၃ နှစ်ကျော်ကြာရပ်ဆိုင်းခဲ့ရပေမယ့် အခုနှစ်စပိုင်းကစတင်ကာ CDM ဝန်ထမ်းအများစု လုပ်ငန်းခွင်ပြန်လည်ဝင်ရောက်သွားတာကြောင့် လက်ရှိမှာ အာဏာမသိမ်းမီကအတိုင်း ပုံမှန်ပြန်လည် လည်ပတ်နေတာလည်း ဖြစ်ပါတယ်။

စာတည်း – ဟိန်းစံ

◼ ဖမ်းဆီးခံ အမျိုးသား ၁၂ ဦးထဲက ၈ ဦးပြန်လွတ်ပြီး ၄ ဦးဆက်ဖမ်းခံထားရ

ဒိန်းဂျား ၊ ကျော်ကြီး

ကြို့ပင်ကောက်၊ စက်တင်ဘာ ၂၈၊ ၂၀၂၅။

ပဲခူးတိုင်း၊ ကြို့ပင်ကောက်မြို့နယ်မှာ စစ်ကော်မရှင်တပ်တွေက ဒရုန်းနဲ့ဗုံးကြဲတိုက်ခိုက်ပြီး ဒေသခံ အမျိုးသား ၁၂ ဦးကို ရုတ်တရက်ဝင်ရောက်ဖမ်းဆီးခဲ့ကာ အဲ့ဒီထဲက ၈ ဦးကိုပြန်လွှတ်ကာ ၄ ဦးကိုတော့ ဆက်လက်ဖမ်းဆီးထားတယ်လို့ ကျေးရွာနဲ့နီးစပ်သူတွေဆီက သိရပါတယ်။

စက်တင်ဘာ ၂၇ ရက်ညနေ ၃ နာရီခန့်မှာ ကျီစုကျေးရွာမှာအထိုင်ချထားတဲ့ စစ်ကော်မရှင်တပ်တွေ နဲ့ပျူစောထီးအင်အား ၁၀၀ ခန့်ဟာ ကားတွေ၊ ဆိုင်ကယ်တွေနဲ့ သရက်ကိုင်းကျိုးရွာကိုရောက်လာပြီး ဒေသခံတွေကိုဖမ်းဆီးခဲ့တာလို့ ဆိုပါတယ်။

“အချို့က စပါးတွေအငှားသယ်နေတဲ့အခါကျတော့ မထွက်သေးတဲ့အချိန်မှာ ဖမ်းခံရတာ။ သူတို့က ကားတွေနဲ့ဝင်လာတဲ့အခါကျတော့ အချို့က ကိုယ့်အိမ်ကိုယ်နေ အလုပ်လုပ်နေကြတာ။ မပြေးဖြစ်တော့ မိသွားတာ။ အချို့က စပါးသယ်နေ အလုပ်လုပ်နေကြတာ။ ပြေးရင်းလွှားရင်းနဲ့ မလွတ်တာ။ ပြေးတော့ ပြေးကြတယ်မလွတ်တာ။ သေနတ်တွေနဲ့လည်း လိုက်ပစ်သေးတယ်”လို့ ကျေးရွာနဲ့နီးစပ်သူတဦးက ပြောပါတယ်။

စစ်ကော်မရှင်တပ်သားတွေက ကျေးရွာကို ဝင်ရောက်ဖမ်းဆီးလို့ အသက် ၇၀ အရွယ် ဦးတင်မြင့်၊ အသက် ၄၀ ကျော်အရွယ် ကိုမင်းဇော်၊ အသက် ၃၀ အရွယ်ကိုဖြိုးနဲ့ကိုကရင်၊ နောက်ထပ် အသက် ၃၀ ကနေ ၅၀ ကြားအမျိုသား ၈ ဦးဖမ်းဆီးခံလိုက်ရပါတယ်။

ဒါ့အပြင် စစ်ကော်မရှင်တပ်သားတွေဟာ စပါးတင်ထားတဲ့ ထော်လာဂျီ ၁ စီးကိုလည်းယူဆောင်ကာ ညနေ ၅ နာရီကျော်ထိ ရွာထဲမှာမွှေနှောက်ခဲ့ပြီး ကျီစုရွာဘက်ကို ပြန်ဆုတ်ချိန် လမ်းခုလတ်မှာ ဦးတင်မြင့်၊ ကိုမင်းဇော် အပါအဝင် အသက် ၄၀ အထက် အမျိုးသား ၈ ဦးကို ပြန်လွှတ်ပေးခဲ့တယ်လို့ ဆိုပါတယ်။

ကျန် ၄ ဦးကို ကျီစုရွာဘက်ကိုဖမ်းဆီးသွားပြီး စက်တင်ဘာ ၂၈ ရက် ဒီကနေ့အထိ ပြန်မလွတ်လာသေးဘူးလို့ သိရပါတယ်။

စစ်ကော်မရှင်စစ်ကြောင်း ကျေးရွာထဲကိုဝင်လာချိန် အိမ်ခြေ ၈၀ ကျော်ရှိတဲ့ သရက်ကိုင်းကျိုးရွာက ဒေသခံအများစုလည်း ဘေးလွတ်ရာကိုထွက်ပြေးတိမ်းရှောင်ခဲ့ရပြီး စစ်ကြောင်းထွက်သွားပြီးနောက် ဒီကနေ့မနက်ပိုင်းမှာတော့ အနည်းစုလောက်သာ ကျေးရွာထဲပြန်လာနေကြတယ်လို့ သိရပါတယ်။

အလားတူ မနေ့ကညနေပိုင်းမှာပဲ အဆိုပါစစ်ကော်မရှင်တပ်တွေက ဖလံပင်ရွာကိုလည်း ဒရုန်းနဲ့ဗုံးကြဲ တိုက်ခိုက်တဲ့အပြင် အလယ်ကုန်းတိုက်နယ် ရဲစခန်းကနေ လက်နက်ကြီးတွေနဲ့ပစ်ခတ်တာတွေလည်းရှိခဲ့တယ်လို့ ၃၈၀၁ တပ်ခွဲ ၁ တပ်ခွဲမှူး ကရင်လေး က ပြောပါတယ်။

ဒရုန်းနဲ့ဗုံးကြဲလို့ ဖလံပင်ရွာက နေအိမ် ၂ လုံးပျက်စီးပြီး ဒေသခံတွေတော့ထိခိုက်သေဆုံးမှုမရှိခဲ့ဘဲ ဒီပစ်ခတ်မှုတွေကြောင့် ဖလံပင်ရွာသစ်၊ ဒေါင်းမန်းကွင်းရွာ၊ ဂွင်းကျယ်ရွာတွေက ဒေသခံ ၃၀၀ ကျော်လည်း ရွာကတိမ်းရှောင်နေရတယ်လို့ သိရပါတယ်။

“ပြည်သူ့နေအိမ် ၂ လုံး ပျက်စီးသွားတယ်၊ ၁ လုံးကတော့ ရွာထဲပဲကျတာ၊ အရပ်သားပြည်သူတွေ မထိခိုက်ဘူး၊ အလယ်ကုန်း တိုက်နယ်ရဲစခန်းကနေ ၈၁ လက်နက်ကြီးနဲ့ ၆ ချက်ထုတယ်၊ ရွာတွေထဲ ကျတယ်၊ အိမ်တွေတော့ ပျက်စီးသွားတာမရှိဘူး၊ ပြည်သူထိခိုက်သွားတာလည်း မရှိဘူး။” လို့ ဆိုပါတယ်။

စက်တင်ဘာ ၂၆ ရက်ကလည်း ကျီစုရွာမှာတပ်စွဲထားတဲ့ စစ်ကော်မရှင်တပ်ဘက်က မြို့ကိုင်းရွာကို ဒရုန်းနဲ့ ဗုံးချတိုက်ခိုက်ခဲ့လို့ နေအိမ် ၁ လုံးပျက်စီးခဲ့ပါသေးတယ်။

စာတည်း – လင်း

မြေလတ်အသံ၊ စက်တင်ဘာ ၂၈၊ ၂၀၂၅။

စစ်ကိုင်းတိုင်းအခြေစိုက် တမူးခရိုင်အမှတ် ၂ တပ်ရင်းမှ အပတ်စဥ် ၁ စစ်သင်တန်းဆင်းပွဲကို တပ်ရင်းဌာနချုပ်မှာ အောင်မြင်စွာပြုလုပ်ပေးခဲ့တယ်လို့ အဲ့ဒီတပ်ရင်းက စက်တင်ဘာ ၂၇ ရက်မှာ ထုတ်ပြန်ပါတယ်။

အဲ့ဒီသင်တန်းဆင်းပွဲအခမ်းအနားကို စက်တင်ဘာ ၂၆ ရက် မနက် ၆ နာရီခွဲကနေ မနက် ၁၀ နာရီထိ ၄ နာရီကြာ ပြုလုပ်ခဲ့တယ်လို့လည်း သိရပါတယ်။

ဩဂုတ်လဒုတိယပတ်ကစတင်ခဲ့တဲ့ဒီသင်တန်းကို ၄၅ ရက်ကြာ ပြုလုပ်ခဲ့ပြီး တိုက်ခိုက်ရေးတပ်ဖွဲ့၀င် အမျိုးသား ၅၂ ဦး၊ အမျိုးသမီး ၁၄ ဦး စုစုပေါင်း တပ်ဖွဲ့၀င် ၆၆ ဦးတို့ပါ၀င်ခဲ့တယ်လို့ တမူးခရိုင်အမှတ် ၂ တပ်ရင်းမှ တပ်ရင်းမှူးက ပြောပါတယ်။

တန့်ဆည်၊ စက်တင်ဘာ ၂၇၊ ၂၀၂၅။

စစ်ကိုင်းတိုင်း၊ တန့်ဆည်မြို့နယ်၊ ကံထူးမရွာ လေကြောင်းတိုက်ခိုက်ခံရမှုမှာ သေဆုံးသူ ၃ ဦးထပ်တိုးလာပြီးစုစုပေါင်း ၁၁ ဦးအထိရှိလာပြီး ဒဏ်ရာရသူတွေထဲမှာ စိုးရိမ်ဒဏ်ရာရထားသူတွေလည်းရှိတယ်လို့ ဒေသခံတွေဆီက သိရပါတယ်။

ကံထူးမရွာက ‘နိုဘယ်ဝမ်း’ ဆီပန့်ဆိုင်နဲ့ ‘ဇွဲထက်’ အအေးဆိုင်အနီး လူစည်ကားတဲ့ နေရာကို စက်တင်ဘာ ၂၆ ရက် မနေ့ကနေ့လယ် ၁၁ နာရီခွဲမှာ စစ်ကော်မရှင်တပ်က ဗုံးကြဲတိုက်ခိုက်ခဲ့တာပါ။

လေကြောင်းတိုက်ခံရမှုမှာ ကနဦး အသက်၂၀ အရွယ် ဆီဆိုင်ပိုင်ရှင်ရဲ့သမီး ကိုယ်ဝန်သည် မစံထိပ်ထားဝေ၊ ကုန်စိမ်းရောင်းသူ ၂၁ နှစ်အရွယ် မမိထက်၊ ၂၇ နှစ်အရွယ်ကိုသက်အောင်၊ ပန်းရံလုပ်ကိုင်နေတဲ့ အသက် ၄၃ နှစ် ကိုဖိုးထွန်း၊ အသက် ၂၀ ကျော်အရွယ် ကိုတူးနိုင်၊ ထထူး၊ နေအောင်၊ စိုးကို တို့ သေဆုံးခဲ့ပါတယ်။

“ညနေပိုင်း ထပ်ရှာတော့ ဆီဆိုင်ပိုင်ရှင် ကိုပြူးစိန်ကို ရှာမတွေ့တော့ဘူး။ သေဆုံးတဲ့အထဲပါသွားတယ်လို့ ယူဆရတယ်။ ဆောက်လက်စနှစ်ထပ်တိုက်ပိုင်ရှင်ပါ”လို့ မြို့နယ်ပြည်သူ့လုံခြုံရေးအဖွဲ့တာဝန်ခံက ပြောပါတယ်။

ဒါ့အပြင် မနေ့ညနေပိုင်းမှာဆေးကုသမှုခံယူနေတဲ့ ကိုအောင်ကိုဝင်း၊ စက်တင်ဘာ ၂၇ ရက် ဒီနေ့မနက်ပိုင်းမှာ ကိုကျော်ကိုလင်း သေဆုံးခဲ့ပြီး ပျောက်ဆုံးနေတဲ့ကိုပြူးစိန်ဆိုသူကိုလည်း သေဆုံးပြီလို့ ယူဆထားတယ်လို့ ဆိုပါတယ်။

“ကိုအောင်ကိုဝင်းက ဈေးလာဝယ်တဲ့သူ ကားဖြတ်မောင်းတဲ့အချိန် အချခံလိုက်တာ မနေ့ညနေက ဆုံးတာ။ ကိုကျော်ကိုလင်းက ချောင်းဆုံရွာက ဒီဘက်ရောက်နေတဲ့အချိန်နဲ့ တွေ့သွားတာ”လို့ မြို့နယ်ပလဖတာဝန်ခံက ပြောပါတယ်။

ကနဦးသေဆုံးသူတွေဟာ ရုပ်အလောင်း ၅ လောင်းသာရခဲ့ပြီး ကျန်တဲ့သူတွေဟာ အပိုင်းပိုင်းပြတ်နေတဲ့ ခန္ဓာကိုယ်တွေကို လိုက်လံကောက်ယူခဲ့ရတာလို့ သိရပါတယ်။

စစ်ကော်မရှင်က ရွေးကောက်ပွဲ‌ကြေညာပြီးနောက် စစ်ကိုင်းနဲ့မကွေးတိုင်းအပါ တိုင်းနဲ့ပြည်နယ်အများစုက ပြည်သူတွေရှိတဲ့နေရာတွေကို ဆက်တိုက်ဆိုသလို လေကြောင်းတိုက်ခိုက်မှုတွေ လုပ်ဆောင်လျှက်ရှိနေတာလည်း ဖြစ်ပါတယ်။

သတင်း – မြတ်