မီးရှို့

အရာတော်၊ မေ ၅၊ ၂၀၂၃။

စစ်ကိုင်းတိုင်း၊ အရာတော်မြို့နယ်၊ ကြွေပုဂံကျေးရွာကနေအိမ်တွေကို မေလ ၅ ရက်ဒီမနက် ၉ နာရီလောက်မှာ စစ်ကောင်စီတပ်သားတွေက ဒုတိယအကြိမ် ဝင်ရောက်မီးရှို့ဖျက်ဆီးခဲ့ပါတယ်။

အရာတော်မြို့နယ် စစ်အခြေခံလေ့ကျင့်ရေးတပ် စ.ခ.တ (၁၀)မှ တပ်သားအင်အား ၆၀ လောက်ဟာ ဝက်ခဲကျေးရွာကနေ ၂ မိုင်ကျော်ဝေးတဲ့ ကြွေပုဂံကျေးရွာထဲကို ဒီမနက် ၈ နာရီလောက်မှာ ပစ်ခတ်ဝင်ရောက်လာပြီးနောက် နေအိမ်တွေကို မီးရှို့ခဲ့တာလို့ အရာတော်ပိုစ့်မှ တာဝန်ရှိသူတဦးက ပြောပါတယ်။

“တိုက်ပွဲမဖြစ်ပဲနဲ့ ရွာထဲကိုဝင်လာတယ်။ ပြီတော့ ရွာကိုမီးရှို့တယ်။ ဒီနေ့မနက်နေအိမ်တွေ မီးထဲဘယ်လောက်ပါသွားလဲ မသိရသေးပါဘူး။ ရွာသားတွေလည်း ထွက်ပြေးနေကြတယ်။ ရွာထဲကို မဝင်ကြသေးဘူး။ အခုချိန်ထိတော့ ဖမ်းဆီးခံရတဲ့ပြည်သူတွေ ရှိတယ်လို့မကြားမိသေးပါဘူး” လို့ အရာတော်ပို့စ် မှ တာဝန်ရှိသူတဦးက ပြောပါတယ်။

ကြွေပုဂံရွာကို မီးရှို့ပြီး မနက် ၁၀ နာရီလောက်မှာတော့ အဆိုပါစစ်ကောင်စီတပ်ဖွဲ့ဟာ ကြွေပုဂံရွာ အနောက်ဘက်ကို ပြန်လည်ဝင်ရောက်သွားခဲ့ပေမယ့် ကြွေပုဂံရွာနဲ့ ရွာနီးချင်း ဒုံဒစ်ရွာက ပြည်သူတွေကတော့ လက်ရှိအချိန်ထိ ရွာကနေ ထွက်ပြေးတိမ်းရှောင်နေရတယ်လို့ သိရပါတယ်။

ပြီးခဲ့တဲ့မတ်လ ၂၉ ရက်မှာလည်း ကြွေပုဂံကျေးရွာကို စစ်ကောင်စီတပ်က ပထမအကြိမ် စစ်ကြောင်းထိုး ဝင်ရောက်ကာ နေအိမ် ၂၉ လုံးကို မီးရှို့ဖျက်ဆီးခဲ့ပါသေးတယ်။

စာတည်း – လင်း

စစ်ကိုင်း၊ မေ ၁၊ ၂၀၂၃။

စစ်ကိုင်းတိုင်း၊ ရေဦးမြို့နယ်က ကျေးရွာ ၂ ရွာကို စစ်ကောင်စီတပ်သားတွေက တရက်တည်း မီးရှို့ဖျက်ဆီးခဲ့တဲ့အပြင် လက်နက်တွေနဲ့လည်းပစ်ခတ်ခဲ့လို့ ဒေသခံအမျိုးသမီးတဦး ထိခိုက်ဒဏ်ရာရသွားတယ်လို့ သိရပါတယ်။

မတ်လ ၁ ရက် ဒီမနက် ၁၀ နာရီလောက်မှာ အင်အား ၁၀၀ နီးပါးရှိတဲ့ စစ်ကောင်စီစစ်ကြောင်းက ရွာချင်းကပ်လျက်ရှိတဲ့ ဆည်ကြီးရွာနဲ့ ပေါက်သာရွာကို တဆက်တည်းပစ်ခတ်ဝင်ရောက်လာပြီး နေအိမ်တွေကို မီးရှို့ဖျက်စီးခဲ့တာလို့ ရေဦးဒေသခံတဦးက ပြောပါတယ်။

“ဒီနေ့မနက်ပိုင်း မုတ်စီရွာကနေ ရေဦးတောင်ဘက်ခြမ်း ပြည်တော်ဘက်ကနေတဆင့် ဆည်ကြီး၊ ပေါက်သာရွာဘက်ကို လက်နက်ကြီးငယ်တွေနဲ့ ပစ်ခတ်ပြီးဝင်လာတယ်။ ပေါက်သာရွာက လူလတ် အမျိုးသမီးတဦး ခြေထောက်ကိုကျည်ရှပ်မှန်ခဲ့တယ်။ ကာကွယ်ရေးတပ်ဖွဲ့တွေက ဒီအမျိုးသမီးကို ကယ်ထုတ်နိုင်ခဲ့တယ်။ အခုချိန်ထိမီးလောင်သွားတဲ့ အိမ်အရေအတွက်ကိုမသိရသေးဘူး”လို့ ဆိုပါတယ်။

ဆည်ကြီးရွာနဲ့ ပေါက်သာရွာကို မီးရှို့သွားတဲ့ စစ်ကောင်စီစစ်ကြောင်းဟာ ဧပြီလ ၃၀ ရက်မနေ့ကလည်း ငရုတ်တုံရွာကို မီးရှို့ခဲ့ပြီး အဲ့ဒီကတဆင့် မုတ်စီရွာထဲမှာ တညအိပ်တပ်စွဲထားပြီးနောက် ဒီနေ့မနက်ပိုင်းမှာ ဆည်ကြီးရွာနဲ့ ပေါက်သာရွာကို မီးရှို့ခဲ့တာလည်း ဖြစ်ပါတယ်။

မီးရှို့ပြီးနောက် ဒီနေ့လယ် ၂ နာရီလောက်မှာတော့ အဲဒီကျေးရွာ ၂ ရွာနဲ့ ၁ မိုင်လောက်သာဝေးတဲ့ ပိဋကတ်ကျရွာထဲက ရှေ့စုခံသီးတော ဘုန်ကြီးကျောင်းမှာ တပ်စွဲထားတယ်လို့ သိရပါတယ်။

“အခုချိန်ထိ အဲဒီကျေးရွာ ၃ ရွာက နေအိမ်တွေ ဘယ်လောက်မီးထဲပါသွားလဲ မသိရဘူး။ စစ်ကြောင်းတွေကကပ်နေတော့ အတည်မပြုနိုင်သေးဘူး။ ငရုတ်တုံရွာကအခုမှ ပထမအကြိမ် မီးရှို့ခံရတာ။ ဆည်ကြီးရွာနဲ့ ပေါက်သာရွာက အရင်စစ်ကြောင်းတွေတုန်းကလည်း ၂ ကြိမ် ၃ ကြိမ်လောက် မီးရှို့ခံထားရဖူးတယ်”လို့ အထက်ပါ ဒေသခံကဆက်ပြောပါတယ်။

ပြီးခဲ့တဲ့ ၂၀၂၂ ခုနှစ်၊ ဒီဇင်ဘာလ ၁၀ ရက်ကလည်း ပေါက်သာရွာနဲ့ ဆည်ကြီးရွာက နေအိမ်‌တွေကို စစ်ကောင်စီတပ်က မီးရှို့ဖျက်စီးခဲ့ပါသေးတယ်။

လက်ရှိမှာ စစ်ကြောင်းထိုးမီးရှို့နေတဲ့အတွက် ဆည်ကြီးရွာနဲ့ပေါက်သာရွာအပါအဝင် ကျေးရွာ ၁၀ ရွာက ထောင်နဲ့ချီတဲ့ ဒေသခံတွေဟာ ဘေးလွတ်ရာကို ထွက်ပြေးတိမ်းရှောင်နေရတယ်လို့ သိရပါတယ်။

စာတည်း – လင်း

အင်းတော်၊ မေ ၁၊ ၂၀၂၃။

စစ်ကိုင်းတိုင်း၊ အင်းတော်မြို့နယ်၊ တုံတော်ကျေးရွာနဲ့ အောင်ကုန်းကျေးရွာက ဒေသခံနေအိမ် ၁၂ လုံးကို စစ်ကောင်စီတပ်သားတွေက မီးရှို့ဖျက်စီးခဲ့ပြီး၊ အမျိုးသား ၂ ဦးကိုပါ ဖမ်းဆီးသွားတယ်လို့ သိရပါတယ်။

ဧပြီလ ၃၀ ရက် မနေ့ကမနက်ပိုင်းကစလို့ နန့်သာရွာမှာအခြေပြုပြီး ကျေးရွာတွေကို လှည့်ပတ်စစ်ကြောင်းထိုးနေတဲ့ စစ်ကောင်စီအင်အား ၅၀ ခန့်ဟာ တုံတော်ကျေးရွာကို မီးရှို့ပြီးနောက် အောင်ကုန်းကျေးရွာကိုပါ မီးဆက်ရှို့ခဲ့တယ်လို့ Indaw Revolution -IR တာဝန်ရှိသူက ပြောပါတယ်။

“အဲဒီစစ်ကောင်စီတပ်က နန့်သာကို အထိုင်ချပြီး ရွာစဥ်လှည့် စစ်ကြောင်းထိုးနေတာ။ သူတို့ တုံတော်ကိုရောက်တဲ့အချိန် စာသင်ကျောင်းနဲ့ကျောင်းနားကအိမ်တွေကို မီးရှို့သွားတယ်။ အောင်ကုန်းမှာလည်း ထပ်ရှို့သွားတယ်။ တိုက်ပွဲဖြစ်တာလည်းမရှိဘဲ အကြောင်းမဲ့ရွာထဲဝင်လာပြီး ရှို့သွားတာ။ ညနေပိုင်းမှာတော့ သူတို့အထိုင်ချတဲ့နေရာ ပြန်သွားတယ်”လို့ ပြောပါတယ်။

စစ်ကောင်စီတပ်ကမီးရှို့လို့ တုံတော်ရွာက နေအိမ် ၅ လုံး၊ အောင်ကုန်းရွာက နေအိမ် ၇ လုံး မီးလောင်ပျက်စီးခဲ့သလို တုံတော်ရွာကို စစ်ကြောင်းဝင်ချိန် လမ်းမှာတွေ့တဲ့ တုံတော်ရွာသား အမျိုးသား ၂ ဦးကိုလည်း ဖမ်းဆီးသွားတယ်လို့ ဆိုပါတယ်။

ခုလို စစ်တပ်က နေအိမ်တွေကိုမီးရှို့လို့ တုံတော်နဲ့ အောင်ကုန်းကျေးရွာက ဒေသခံ ၁၀၀၀ ဝန်းကျင်က ဘေးလွတ်ရာကို ထွက်ပြေးနေရတယ်လို့ သိရပါတယ်။

တုံတော်ရွာနဲ့ အောင်ကုန်းကျေးရွာဟာ ၃ မိုင်ခန့် ကွာဝေးပြီး အင်းတော်မြို့ရဲ့ အနောက်မြောက်ဘက်မှာတည်ရှိတဲ့ ကျေးရွာတွေဖြစ်ပါတယ်။

ပြီးခဲ့တဲ့ ဧပြီလ ၆ ရက်နဲ့ ၇ ရက်တွေမှာလည်း နန့်သာရွာနဲ့ မော်တိတ်ရွာကြားမှာ စစ်ကောင်စီတပ်နဲ့ KIA၊ PDF ပူးပေါင်းတပ်တွေအကြား တိုက်ပွဲ ၂ ရက်ဆက်ဖြစ်ခဲ့ပြီး စစ်ကောင်စီဘက်က ၄၀ ကျော်သေဆုံးသွားသလို KIA ပူးပေါင်းတပ်ဘက်က ၃ ဦးသေဆုံးခဲ့သေးတယ်လို့ သိရပါတယ်။

စာတည်း – လင်း

ဆားလင်းကြီး၊ ဧပြီ ၃၀၊ ၂၀၂၃။

စစ်ကိုင်းတိုင်း၊ ဆားလင်းကြီးမြို့နယ်၊ ကံကုန်း၊ ဂုဏ်တော၊ ဒုန်းတောကျေးရွာတွေမှာ စစ်ကောင်စီ စစ်ကြောင်းက နေအိမ် ၂ လုံးကိုမီးရှို့ပြီး နေအိမ် ၁၀ လုံးထက်မနည်းကို မွှေနှောက်ကာ ပစ္စည်းတွေ ယူသွားတယ်လို့ သိရပါတယ်။

ဧပြီလ ၂၉ ရက် မနက် ၆ နာရီဝန်းကျင်မှာ ကြေးနီသယ်ဆောင်မယ့်ကားတွေ လုံခြုံရေးအတွက် မုံရွာ(နမခ) ကနေ ဝမ်ပေါင်ကုမ္ပဏီကို ထွက်ခွာလာတဲ့ စစ်ကား ၂ စီးနဲ့ အင်အား ၇၀ ကျော်ပါ စစ်ကောင်စီ တပ်ဖွဲ့ဝင်တွေဟာ ဝမ်ပေါင်ဆိုက်အနီးရွာတွေက နေအိမ်တွေကိုမီးရှို့ကာ၊ ပစ္စည်းတွေလုယူသွားတာလို့ ဒေသခံတဦးက မြေလတ်အသံကို ပြောပါတယ်။

“သူတို့က လာကတည်းကိုက ကားပေါ်ကနေ လမ်းဘေးဝဲ၊ယာကို ပစ်ခတ်ပြီးလာကြတော့ ရွာသားတွေက ပြေးကြတာ။ အဲ့တော့မှ သူတို့က အိမ်တွေတက်မွှေ၊ မီးရှို့တာတွေလုပ်တာ။ ပြီးတော့ ဝမ်ပေါင်ကုမ္ပဏီထဲ ဝင်တယ်။ ကြေးနီသယ်ကားတွေကို လုံခြုံရေးယူပေးပြီး နမခဘက် ပြန်လှည့်သွားကြတာ။ ဒေသခံတွေဆီက ယူသွားတဲ့ပစ္စည်းတွေကိုတော့ နောက်ထပ်ကားတွေနဲ့ သယ်သွားတယ်”လို့ ပြောပါတယ်။

အဲ့ဒီစစ်ကောင်စီတပ်တွေဟာ ဒုန်းတောကျေးရွာမှ နေအိမ်တလုံးနဲ့ ရေတင်စက်ကို မီးရှို့ခဲ့သလို ဂုဏ်တောကျေးရွာက ကွမ်းခြံတဲနဲ့ ရေတင်စက်တွေကိုလည်း ထပ်မံမီးရှို့ခဲ့တယ်လို့ ဆိုပါတယ်။

ဒါ့အပြင် နေအိမ်တွေကို မွှေနှောက်ရှာဖွေပြီး တန်ဖိုးရှိပစ္စည်းတွေအပါအဝင် ဆန်အိတ်၊ ဆီပုံး၊ မွေ့ယာ၊ water cooler ၊ air cooler ၊ ပန်ကာစတဲ့ပစ္စည်းတွေကိုပါ ယူဆောင်သွားတယ်လို့ သိရပါတယ်။

စစ်ကောင်စီတပ်က သေနတ်ပစ်ဖောက်ဝင်ရောက်လာလို့ အနီးဝန်းကျင်က ကျေးရွာတွေဖြစ်တဲ့ အုံတုံပင်၊ ကျေးစာကျ၊ ဘိန်းနွယ်ချောင်၊ ဂုဏ်တော၊ ဒုန်းတော၊ ကံကုန်း ကျေးရွာတွေက ဒေသခံအများအပြားဟာ ဘေးလွတ်ရာကို ထွက်ပြေးတိမ်းရှောင်ကြရတယ်လို့ ဆိုပါတယ်။

မုံရွာ(နမခ)ကနေ ဝမ်ပေါင်ကုမ္မဏီအတွက် ကြေးသယ်လမ်းကြောင်း လုံခြုံရေးယူပေးတဲ့ စစ်ကောင်စီတပ် ဟာ တလမှာ ၁ ကြိမ်ကနေ ၃ ကြိမ်အထိ စစ်ကြောင်းဝင်လေ့ရှိပြီး စစ်ကြောင်းဝင်တိုင်း ဒေသခံတွေရဲ့ နေအိမ်နဲ့ပစ္စည်းတွေကို ဖျက်စီး၊ ခိုးယူတာတွေလုပ်ဆောင်တယ်လို့ ဒေသခံတွေကပြောပါတယ်။

စာတည်း-ရင်ငြိမ်း

ခင်ဦး၊ ဧပြီ ၂၇၊ ၂၀၂၃။

စစ်ကိုင်းတိုင်း၊ ရွှေဘိုခရိုင်၊ ခင်ဦးမြို့နယ်၊ မြို့သစ်ကျေးရွာကို စစ်ကောင်စီတပ်သားတွေက ၂ ရက်ဆက်တိုက် မီးရှို့ဖျက်ဆီးခဲ့တယ်လို့ သိရပါတယ်။

တပ်သားအင်အား ၁၀၀ ဝန်းကျင်ပါတဲ့ စစ်ကြောင်းက ဧပြီလ ၂၆ ရက်မနေ့ကညနေ ၆ နာရီလောက်မှာ မြို့သစ်ရွာကို ဝင်ရောက်လာပြီး ပထမအကြိမ် မီးရှို့ဖျက်ဆီးပြီးနောက် တပ်စွဲနေထိုင်ကာ ဧပြီလ ၂၇ ရက်ဒီမနက် ၇ နာရီလောက်မှာ ဒုတိယအကြိမ် ထပ်မံမီးရှို့ခဲ့တာလို့ Khin U Local Guerrilla Force ရဲ့တာဝန်ခံ ဂျက်စတင်က ပြောပါတယ်။

“အိမ်ခြေက ၉၀ ကျော် ၁၀၀ နီးပါးလောက် မီးရှို့ခံလိုက်ရတယ်။ ၂ ရက်ဆိုတော့လေ။ နောက်ပြီး သူတို့ရွာထဲကနေ ပြန်ထွက်ချိန် ကျနော်တို့ ဒရုန်းနဲ့ကြည့်တဲ့အထဲမှာ ပြည်သူလို့ထင်ရတဲ့ အရပ်သား ပြည်သူ ၁ ယောက် ၂ ယောက် ဖမ်းဆီးခံသွားရတယ်လို့လည်း သိရတယ်။ သူတို့စစ်ကြောင်းထိုးလာတဲ့အချိန် မရှောင်လိုက်နိုင်လို့ အဖမ်းခံရတယ် ထင်တယ်” လို့ ပြောပါတယ်။

အဖမ်းခံရသူတွေဟာ ဘယ်သူဘယ်ဝါဆိုတာ မသိရသေးဘဲ ဒီမနက် ၉ နာရီလောက်က စစ်ကောင်စီတပ်သားတွေ ရွာကပြန်ထွက်သွားချိန်မှာ သူတို့နဲ့အတူ ရေဦးမြို့ဘက်ကို ခေါ်သွားတယ်လို့ ဆိုပါတယ်။

အိမ်ခြေ ၆၀၀ နီးပါးရှိတဲ့ မြို့သစ်ကျေးရွာဟာ အခုလိုမီးရှို့ဖျက်ဆီးခံရတာ ဒုတိယအကြိမ်ဖြစ်ပြီး ၂၀၂၂ ခုနှစ်၊ ဖေဖော်ဝါရီလ ၁၇ ရက်ကလည်း အဲ့ဒီကျေးရွာအနီးမှာ ဒေသခံကာကွယ်ရေးတပ်တွေနဲ့ စစ်ကောင်စီတပ်တို့ တိုက်ပွဲဖြစ်ပြီးနောက် ရွာကိုမီးဝင်ရှို့ခဲ့တာလို့ သိရပါတယ်။

လက်ရှိမှာ မြို့သစ်ကျေးရွာအပါအဝင် ခင်ဦးနယ်ထဲက ကံကြီးကုန်း၊ ရွှေယမင်း၊ သာဂရ၊ မြင်းဒေါင်းနဲ့ မြကန် စတဲ့ ကျေးရွာတွေက ဒေသခံပြည်သူ ၃၀၀၀ ကျော်လည်း ရွာကနေထွက်ပြေး တိမ်းရှောင်နေရတယ်လို့ ခင်ဦးမြို့နယ် သတင်းမှန်ပြန်ကြားရေးက ထုတ်ပြန်ရေးသားထားပါတယ်။

စာတည်း – လင်း

မြိုင်၊ ဧပြီ ၂၄၊ ၂၀၂၃။

မကွေးတိုင်း၊ မြိုင်မြို့နယ်၊ ညောင်တွင်း (အနောက်ရွာ)က နေအိမ် ၃၂ လုံးကို စစ်ကောင်စီတပ်က ဧပြီလ ၂၄ ရက် ဒီနေ့မနက် ၇ နာရီလောက်မှာ မီးရှို့သွားတယ်လို့ ဒေသခံတွေဆီက သိရပါတယ်။

အင်အား ၇၀ နီးပါးရှိတဲ့ စစ်သားနဲ့ပျုစောထီးတပ်ဖွဲ့ဟာ မြိုင်မြို့နယ်တောင်ပိုင်းရှိ ပန်းတိုင်တောင်ရွာကနေ ဧပြီလ ၂၃ ရက် မနေ့ညနေ ၄ နာရီလောက်က ထွက်လာပြီး အဲဒီရွာနဲ့ ၉ မိုင်းလောက်ဝေးတဲ့ ညောင်တွင်းရွာထဲကို လက်နက်တွေ ပစ်ဖောက်ဝင်ရောက်ကာ တညအိပ်စခန်းချခဲ့ပြီးတဲ့နောက် ဒီမနက်မှ မီးရှို့ဖျက်ဆီးခဲ့တာလည်း ဖြစ်ပါတယ်။

“မနေ့ကတည်းက ပန်းတိုင်တောင်ရွာကနေ ထွက်လာချိန် သေနတ်တွေ ပစ်ဖောက်လို့ အဲဒီရွာက စစ်ရှောင်တဦး ဆုံးသွားတယ်လို့ကြားတယ်။ ညောင်တွင်းရွာကိုတော့ ဒီနေ့မနက်မှ မီးရှို့သွားတယ်။ ရွာသားတွေတော့ ရွာထဲပြန်မဝင်ကြသေးဘူး။ ဖမ်းဆီးခံရတဲ့ ပြည်သူတွေလည်း မရှိပါဘူး” လို့ မြိုင်ဒေသခံတဦးက ပြောပါတယ်။

အဲ့ဒီစစ်ကောင်စီတပ်ဖွဲ့တွေဟာ ညောင်တွင်းရွာကို မီးရှို့ပြီးနောက် အဲဒီရွာနဲ့ ၄ မိုင်ခန့်ဝေးတဲ့ သမင်အုပ်ရွာထဲကို မနက် ၈ နာရီလောက်မှာ ပြန်လည်ဝင်ရောက်သွားတယ်လို့ ဆိုပါတယ်။

အိမ်ခြေ ၄၀၀ နီးပါးရှိတဲ့ ညောင်တွင်းအနောက်ရွာဟာ အခုလိုမီးရှို့ခံရတာ ဒုတိယအကြိမ်ဖြစ်ပြီး၊ ပြီးခဲ့တဲ့ ၂၀၂၂ ခုနှစ်၊ စက်တင်ဘာလအတွင်းမှာလည်း ရွာက နေအိမ် ၅၁ လုံးကို စစ်ကောင်စီက မီးရှို့ဖျက်ဆီးခဲ့ပါသေးတယ်။

ပုံစာ – ၂၀၂၂ ခုနှစ်၊ စက်တင်ဘာလအတွင်း ညောင်တွင်းအနောက်ရွာကို စစ်တပ်က မီးရှို့ဖျက်ဆီးခဲ့စဥ်။ (ပုံဟောင်း)

စာတည်း – လင်း

မြိုင်၊ ဧပြီ ၁၀၊ ၂၀၂၃။

မကွေးတိုင်း၊ မြိုင်မြို့နယ်၊ ညောင်အုပ်ရွာကို စစ်ကောင်စီတပ်သားတွေက ဧပြီလ ၉ ရက်မှာ မီးရှို့ဖျက်စီးခဲ့ပြီး၊ စိတ်ကျန်းမာရေးချို့တဲ့သူ တဦးကိုလည်း သေနတ်နဲ့ပစ်သတ်ခဲ့တယ်လို့ သိရပါတယ်။

မုံရွာအခြေစိုက် အနောက်မြောက်တိုင်းစစ်ဌာနချုပ်က စစ်သားအင်အား ၄၀ ကျော်ဟာ မနေ့ည ၇ နာရီလောက်မှာ ညောင်အုပ်ရွာကိုဝင်ရောက် မီးရှို့ခဲ့ပြီးနောက် အဲ့ဒီရွာကိုရောက်နေတဲ့ သဲကြီးရွာက စိတ်ကျန်းမာရေးချို့တဲ့သူ အသက် ၃၉ နှစ်အရွယ် ကိုအောင်ဇော်လင်းကိုပါ သေနတ်နဲ့ပစ်သတ်ခဲ့တာလို့ Pnlhoenix Ranger PDFရဲ့ တပ်ဖွဲ့ဝင်တဦးက ပြောပါတယ်။

“ဘာတိုက်ပွဲမှမရှိပဲ တမင်သက်သက်လာပြီး မီးရှို့သွားတာ။ အိမ်ခြေတရာလောက်ရှိတာကို ၃ ပုံ ၁ ပုံလောက်ပါသွားတယ်။ ပထမဆုံးမီးရှို့ခံရတာပဲ။ သဲကြီးရွာက စိတ်မနှံ့တဲ့ အကိုတယောက်ကိုလည်း ညောင်အုပ်ရွာမှာပဲ ဦးခေါင်းတေ့ပစ်သွားတာ”လို့ ပြောပါတယ်။

အဲ့ဒီစစ်ကောင်စီတပ်သားတွေကို ရဟက်ယာဥ် ၄ စီးနဲ့ ညောင်အုပ်ရွာအနီးမှာ လာချခဲ့တာဖြစ်ပြီး၊ ရွာကိုမီးရှီု့ပြီးချိန် ည ၁၂ နာရီလောက်မှာတော့ ရဟက်ယာဥ်တွေနဲ့ပဲ ပြန်ခေါ်သွားတယ်လို့ Pnlhoenix Ranger PDFရဲ့ တပ်ဖွဲ့ဝင်တဦးက ပြောပါတယ်။

ခုလိုမီးရှို့လို့ ညောင်အုပ်ရွာက နေအိမ် ၂၉ လုံးမီးလောင်ပျက်စီးပြီး၊ လက်ရှိမှာ ဒေသခံ ၁၅၀ လောက်က နွားလှည်းတွေပေါ်မှာ ယာယီအမိုးမိုးကာ နေထိုင်နေကြသလို အချို့ကလည်း ကျေးရွာစာသင်ကျောင်းထဲမှာ နေထိုင်နေရတယ်လို့ ဆိုပါတယ်။

ပြီးခဲ့တဲ့ဧပြီလ ၈ ရက်ကလည်း မြိုင်မြို့နယ်တောင်ပိုင်း၊ အိုင်းမ(အနောက်)ရွာကို စစ်တပ်ကမီးရှို့ခဲ့လို့ နေအိမ် ၁၈ လုံးမီးလောင်ပျက်စီးခဲ့ရပါသေးတယ်။

ပုလဲ၊ ဧပြီ ၈၊ ၂၀၂၃။

စစ်ကိုင်းတိုင်း၊ ပုလဲမြို့နယ်ထဲက ချောင်းနားတောတိုက်က စစ်ရှောင်စခန်းနဲ့ နောကန်ရွာကို စစ်ကောင်စီတပ်ဖွဲ့တွေက ဧပြီလ ပထမပတ်အတွင်းမှာ မီးရှို့ခဲ့တာကြောင့် လူနေအိမ်ခြေ ၁၀၀ ကျော် မီးလောင်ပြီး အသက်ကြီး အမျိုးသမီးတစ်ဦး မီးလောင်သေဆုံးခဲ့ပါတယ်။

မှော်ဘီမြို့နယ်၊ ဖူးကြီးအခြေစိုက် ခမရ ၇၀၄ က စစ်သားတွေဟာ ပုလဲမြို့နယ်၊ ကန်ဒေါင့်ရွာမှာ တပ်စွဲထားပြီး ဧပြီလ ၂ ရက်မှာ ပုလဲမြို့နယ်၊ နှောကန်ကျေးရွာက အိမ်ခြေ ၁၁၄ လုံးကို မီးရှို့ခဲ့သလို ဧပြီလ ၆ ရက်မှာလည်း ပုလဲမြို့နယ်ထဲက ချောင်းနားတောတိုက်မှာရှိတဲ့ စစ်ရှောင်တဲ ၅ လုံးကိုလည်း မီးရှို့ခဲ့တယ်လို့ ပုလဲမြို့နယ် (ပကဖ) မှ သတင်းနဲ့ထောက်လှမ်းရေးတပ်တာဝန်ခံ ကိုလွင်ကြီးက ဆိုပါတယ်။

နှောကန်ကျေးရွာကို စစ်ကောင်စီတပ်ဖွဲ့တွေ ဝင်ရောက်မီးရှို့တဲ့အချိန် လေဖြတ်လို့ ထွက်မပြေးနိုင်ဘဲ အိမ်ထဲမှာကျန်ခဲ့တဲ့ အသက် ၆၀ အရွယ်အမျိုးသမီးတဦးကတော့ မီးလောင်သေဆုံးခဲ့ပါတယ်။

မီးရှို့ခံလိုက်ရတဲ့ နှောကန်ကျေးရွာမှာ ဒေသခံ ၅၇၆ ဦး အိုးအိမ်မဲ့ဖြစ်ပြီး၊ လျှပ်စစ်မီတာဘောက် ၅၂ လုံး ဆုံးရှုံးကာ၊ ဓာတ်မီးတိုင် ၃ တိုင်လည်း ပျက်စီးခဲ့တယ်လို့ ပုလဲမြို့နယ်ပြည်သူ့ကာကွယ်ရေးတပ်ဖွဲ့က ထုတ်ပြန်ပါတယ်။

“စစ်ကြောင်းမှာ စစ်ယူနီဖောင်းဝတ် အမျိုးသမီးစစ်သည် ၂ ဦးလောက်ပါလာတာ သေချာမြင်လိုက်ရတယ်။ နှောကန်ရွာကို မီးရှို့တာလည်း သူတို့စစ်ကြောင်းပဲ။ ချောင်းနားတောတိုက်ထဲက စစ်ရှောင်တဲကိုလည်း သူတို့ပဲ မီးရှို့ရင်း ရမ်းသမ်းပစ်လို့ အမျိုးသမီး ၃ ဦးဒဏ်ရာရခဲ့သေးတယ်” လို့ ကိုလွင်ကြီးက ဆက်ပြောပါတယ်။

ချောင်းနားတောတိုက်ထဲက စစ်ရှောင်တဲ ၅ လုံးကို မီးဝင်ရှို့ခဲ့တဲ့အချိန်မှာလည်း စစ်ကောင်စီတပ်ဖွဲ့တွေ ရမ်းသမ်းပစ်ခတ်တာကြောင့် အသက် ၄၀ အရွယ် အမျိုးသမီးတဦး၊ အသက် ၂၀ အရွယ် အမျိုးသားတဦးနဲ့ အသက် ၈ နှစ်အရွယ် ကလေးငယ်တဦး ကျည်ထိမှန်ကာ ဒဏ်ရာရခဲ့တယ်လို့ သူကဆက်ပြောပါတယ်။

လက်ရှိမှာ မီးရှို့ခံလိုက်ရတဲ့ နှောကန်ကျေးရွာနဲ့ ချောင်းနားတောတိုက်မှ စစ်ကောင်စီတပ်တွေ ပြန်လည် ထွက်ခွာသွားပြီးဖြစ်တာကြောင့် ဒေသခံတွေအနေနဲ့ ကျေးရွာထဲသို့ ပြန်လာကြပြီး မီးလောင်ခံထားရတာတွေကို ရှင်းလင်းရေးတွေ လုပ်နေကြရတယ်လို့ သိရပါတယ်။