မင်းလှ၊ အောက်တိုဘာ ၈၊ ၂၀၂၅။

ပဲခူးတိုင်း၊ မင်းလှမြို့နယ်၊ ဆင်တဲကုန်းအုပ်စု၊ ဆင်တဲကုန်းကျေးရွာမှာ စစ်ကော်မရှင်တပ်က ထုတ်ပြန်ထားတဲ့ မဲစာရင်းတွေကို မီးရှို့ဖျက်ဆီးခဲ့တယ်လို့ သာယာဝတီခရိုင် တပ်ရင်း ၃၈၀၂ တပ်ခွဲ ၂ က အောက်တိုဘာ ၇ ရက်မှာ သတင်းထုတ်ပြန်ပါတယ်။

အောက်တိုဘာ ၆ ရက်ည ၁၁ နာရီမိနစ် ၃၀ ခန့်မှာ ဆင်တဲကုန်းရွာရှိ လူငယ်အားမာန် စာကြည့်တိုက်မှာ ကပ်ထားတဲ့ မဲစာရင်းစာရွက်တွေကို မီးရှို့ခဲ့တာလို့ဆိုပါတယ်။

“တော်လှန်ရေးသမားတွေအနေနဲ့ကတော့ အတုအယောင်ရွေးကောက်ပွဲလုပ်နေတဲ့ အရာမှန်သမျှကို ဖျက်ဆီးမှာဘဲ။ ဒါကတော်လှန်ရေးသမားတွေရဲ့ ရည်ရွယ်ချက်ဘဲ။ မည်သည့်နေရာမှာမဆို စစ်တပ်ဒေါက်တိုင်မှန်သမျှရယ်၊ စစ်တပ်က လုပ်တာမှန်သမျှ ဖျက်ဆီးသွားမှာဖြစ်တယ်။ တွန်းလှန်ပြီးတော့လုပ်သွားမှာ”လို့ သာယာဝတီခရိုင် တပ်ရင်း ၃၈၀၂ တပ်ခွဲ ၂ တာဝန်ရှိသူတဦးက ပြောပါတယ်။

မီးရှို့ဖျက်ဆီးလိုက်လို့ မဲစာရင်း ၅၆ ရွက်လုံး မီးလောင်ပျက်စီးသွားပြီး ကျေးရွာစာကြည့်တိုက်ကတော့ မီးလောင်တာမရှိဘူးလို့ဆိုပါတယ်။

ဖျက်ဆီးခံရပြီးနောက် အောက်တိုဘာ ၇ ရက်နေ့လယ် ၁ နာရီလောက်မှာ စစ်ကော်မရှင်တပ်ဖွဲ့ဝင် တွေနဲ့ပျူစောထီးတွေက မီးရှို့ခံရတဲ့နေရာကို လာရောက်စစ်ဆေးမှုပြုလုပ်သွားတယ်လို့ သိရပါတယ်။

အဆိုပါ မဲစာရင်းတွေကို စက်တင်ဘာ ၃၀ ကစတင်ကပ်ထားတာဖြစ်ကာ အောက်တိုဘာ ၁၃ ရက်နေ့အထိ ကပ်ထားမှာဖြစ်တယ်လို့ ဆိုပါတယ်။

ဒီဖျက်ဆီးမှုတွေကို ၃၈ဝ၂ တပ်ခွဲ ၂ မြေအောက်ပြောက်ကျား တပ်ဖွဲ့မှ ရဲဘော်များက လုပ်ဆောင်ခဲ့တာဖြစ်ပြီး ပြည်သူများအနေဖြင့်လည်း စစ်ကော်မရှင်တပ်ဖွဲ့ဝင်တွေအနီး သွားလာနေထိုင် မပြုလုပ်ကြဖို့ သတိထားသွားလာနေထိုင်ကြရန် သတိပေးထုတ်ပြန်ထားပါတယ်။

၂၀၂၅၊ ဒီဇင်ဘာ ၂၈ မှာ ပြုလုပ်မယ့်ရွေးကောက်ပွဲအပိုင်း ၁ မှာ မြို့နယ်ပေါင်း ၁၀၂ မြို့နယ်ကျင်းပပြုလုပ်မှာဖြစ်ပြီး အဲ့ဒီအထဲမှာ ပဲခူးတိုင်းဒေသကြီးထဲက ၈ မြို့နယ်ပါဝင်ကာ မင်းလှမြို့နယ်ကတော့ အပိုင်း ၁ ကျင်းပပြုလုပ်မယ့်အချိန်မှာ မပါသေးဘူးလို့ ဩဂုတ် ၂၁ ရက်မှာ စစ်ကော်မရှင်တပ်ရဲ့ ရွေးကောက်ပွဲကော်မရှင် ထုတ်ပြန်ချက်အရသိရပါတယ်။

စာတည်း – လင်း

မြင်းမူ၊ စက်တင်ဘာ ၁၇၊ ၂၀၂၅။

စစ်ကိုင်းတိုင်း၊ မြင်းမူမြို့နယ်၊ ပဲကူကျေးရွာက ရပ်ကျေးပကဖစခန်းတခုကို စစ်ကော်မရှင်တပ်တွေက မီးရှို့ဖျက်ဆီးပြီးနောက် လက်နက်ခဲယမ်းတွေနဲ့ ဆက်စပ်ပစ္စည်းတချို့ကို သိမ်းဆည်းသွားတယ်လို့ မြင်းမူမြို့နယ်ပြည်သူ့ကာကွယ်ရေးအဖွဲ့ဆီက သိရပါတယ်။

စက်တင်ဘာ ၁၅ ရက် နေ့လယ် ၂ နာရီခန့်မှာ မြင်းမူမြို့ဘက်ကနေ အင်အား ၁၀၀ ကျော်နဲ့ စစ်ကြောင်းထိုးလာတဲ့ စစ်ကော်မရှင်တပ်နဲ့ပျူစောထီးအဖွဲ့ဟာ ပဲကူကျေးရွာအပြင်ဘက်ရှိ အထက်ပါ ကျေးရွာပကဖ စခန်းကို ဝင်ရောက်စီးနင်းခဲ့တာလို့ ဆိုပါတယ်။

“သူတို့ဆီမှာလည်း သတင်းပေးပါတယ်။ စခန်းဝင်စီးပြီး မီးရှို့သွားတာ။ တိုက်ပွဲကတော့ ပဲကူးရွာထဲတော့ မဖြစ်ဘူး၊ အပြင်ဘက် ထိတွေ့မှုပုံစံနည်းနည်းတော့ရှိခဲ့တယ်။ ကိုယ့်ဘက်ကတော့ ထိခိုက်မရှိဘူး။ သူတို့ဘက်ကထိခိုက်ရှိ မရှိတော့မသိဘူး။ ညပိုင်းမှာရွာကနေ ပြန်ထွက်သွားတယ်”လို့ မြင်းမူမြို့နယ် ပကဖ တာဝန်ရှိသူတဦးကပြောပါတယ်။

တိုက်ပွဲဖြစ်ချိန် စခန်းရှိတပ်ဖွဲ့ဝင်တွေဆုတ်ခွာသွားတာကြောင့် ထိခိုက်သေဆုံးမှုတွေမရှိခဲ့ဘဲ စစ်ကော်မရှင်စစ်ကြောင်းဟာ စခန်းတဲတွေကို မီးရှို့သွားပြီးနောက် လက်လုပ် ၉ လက်၊ ခဲယမ်းအနည်းငယ်၊ ရိက္ခာတွေ၊ တဲအဆောက်အဦ ၃ လုံး၊ ဆိုင်ကယ် ၂ စီး သိမ်းဆည်းခံလိုက်ရတယ်လို့ ဆိုပါတယ်။

စစ်ကော်မရှင်ဘက်က စစ်ကြောင်းထိုးလာတာကြောင့် ပဲကူ၊ ရုံခါး၊ ညောင်ပင်ကန်ကျေးရွာတွေက ဒေသခံ ၂,၀၀၀ ခန့်ဟာ စက်တင်ဘာ ၁၅ ရက်ကတည်းက ထွက်ပြေးခဲ့ရပြီး စစ်ကြောင်းပြန်သွားပြီးနောက် ကျေးရွာကို ပြန်ရောက်လာကြပြီလို့ ဆိုပါတယ်။

စစ်ကော်မရှင်ဝါဒဖြန့်တယ်လီဂရန်ချန်နယ်တွေမှာလည်း ပဲကူးရွာအနီး ပကဖစခန်းတခုကိုသိမ်းပြီး လက်နက်ခဲယမ်းတွေလည်း သိမ်းဆည်းရမိတယ်လို့ ပုံနဲ့တကွဖော်ပြထားကာ ပုံပါပစ္စည်းတွေဟာလည်း ရပ်ကျေးပကဖစခန်းက ဟုတ်မှန်ကြောင်း မြင်းမူမြို့နယ် ပကဖ တာဝန်ရှိသူတဦးက အတည်ပြုပါတယ်။

စစ်ကြောင်းကတော့ စခန်းကိုမီးရှိ့ဖျက်ဆီးတဲ့နေ့မှာပဲ မြင်းမူဘက်ကို ပြန်ဆုတ်သွားပြီး စက်တင်ဘာ ၁၇ ရက် ဒီကနေ့အထိ ထပ်မံစစ်ကြောင်းထိုးတာမျိုးမရှိသေးဘူးလို့ သိရပါတယ်။

ပြီးခဲ့တဲ့ မတ်လ ၂၂ ရက်ကလည်း စစ်ကော်မရှင်စစ်ကြောင်းဟာ မြင်းမူမြို့နယ်၊ ခြေတော်ရာကျေးရွာကို ဝင်ရောက်မီးရှို့ခဲ့တာကြောင့် နေအိမ် ၆ လုံးမီးလောင်ပျက်စီးခဲ့ပါသေးတယ်။

စာတည်း – လင်း

စစ်ကိုင်း၊ ဇွန် ၁၇၊ ၂၀၂၃။

စစ်ကိုင်းတိုင်း၊ စစ်ကိုင်းမြို့နယ်၊ ကျီကုန်းရွာက နေအိမ်တွေကို စစ်ကောင်စီတပ်က ဇွန်လ ၁၇ ရက် ဒီနေ့ မနက် ၇ နာရီခွဲလောက်မှာ ဝင်ရောက်မီးရှို့သွားတယ်လို့ ဒေသခံတွေဆီက သိရပါတယ်။

အင်အား ၁၀၀ နီးပါးရှိ စစ်ကောင်စီစစ်ကြောင်းဟာ ပေါက်မရွာကနေတဆင့် ကျီကုန်းရွာထဲကို သေနတ်ပစ်ဖောက် ဝင်ရောက်လာပြီး လူနေအိမ် ၉ လုံးကို မီးရှို့ဖျက်ဆီးသွားတာလို့ ဆိုပါတယ်။

ကျီကုန်းရွာကို မီးဝင်ရှို့ပြီး မနက် ၁၀ နာရီလောက်မှာ တမိုင်လောက်ဝေးတဲ့ကန်တော်ရိုးရွာထဲကို ထပ်ဝင်ပြီး မီးရှို့တယ်။ သူတို့ကန်တော်ရိုးဘက် ထွက်သွားတော့မှ ရွာထဲကို ပြန်ဝင်လာပြီး မီးငြှိမ်းရတာ” လို့ Local PDF တပ်ဖွဲ့က အမေ့သား (စစ်ကိုင်း)ခေါင်းဆောင် ကိုဘိုလေး က ပြောပါတယ်။

ဒါ့အပြင် အဲ့ဒီစစ်ကြောင်းက ဓားစာခံအဖြစ်ဖမ်းဆီးလာတဲ့ အသက် ၃၅ နှစ်ဝန်းကျင်အရွယ် အမျိုးသားတဦးကိုလည်း ကျီကုန်းရွာအတွင်းမှာ လည်လှီးသတ်သွားတယ်လို့ ဆိုပါတယ်။

“သူတို့ (စစ်ကောင်စီ) လမ်းပြဓားစားခံအဖြစ်ဖမ်းလာတဲ့သူကိုလည်း သတ်သွားတယ်။ ဘယ်သူဘယ်ဝါလဲ ဆိုတာတော့ ကျနော်တို့ စုံစမ်းနေတုန်းပါ” လို့ သူကဆက်ပြောပါတယ်။

လက်ရှိမှာ အဲ့ဒီစစ်ကောင်စီစစ်ကြောင်းဟာ ကန်တော်ရွာအတွင်းဝင်ရောက်နေဆဲဖြစ်လို့ ဒေသခံတွေလည်း နီးစပ်ရာကိုထွက်ပြေးတိမ်းရှောင်နေရကာ ကန်တော်ရွာ မီးရှို့ခံရမှုအရေအတွက် များနိုင်တယ်လို့ သိရပါတယ်။

စစ်ကောင်စီတပ်ဟာ စစ်ကိုင်းမြို့နယ်၊ ဆားတောင်တိုက်နယ်အတွင်းက ကျေးရွာတွေကို ဇွန်လ ၁၃ ရက်နေ့ကစတင်လို့ ဝင်ရောက်မီးရှို့နေတာဖြစ်ပြီး သာဇင်ရွာက နေအိမ် ၇၀၀ ကျော် မီးလောင်ပျက်စီးခဲ့ကာ အခြားကျေးရွာ ၃ ရွာထက်မနည်းကိုလည်း ဆက်လက်မီးရှို့ခဲ့တယ်လို့ သိရတယ်။

စာတည်း − ရင်ငြိမ်း

စဉ့်ကူး၊ မေ ၂၊ ၂၀၂၃။

မန္တလေးတိုင်း၊ စဉ့်ကူးမြို့နယ်၊ ကြက်တူရွေးကျေးရွာက စစ်ကောင်စီလက်အောက်ခံ ပျူစောထီးခေါင်းဆောင်နေအိမ် ဧပြီလ ၃၀ ရက် နေ့လည်ပိုင်းအချိန်မှာ မီးရှို့ခံခဲ့ရတယ်လို့ဒေသခံတွေဆီက သိရပါတယ်။

အသက် ၅၀ နှစ်အရွယ် ပျူစောထီးခေါင်းဆောင် ဦးငမော်(ခ)သဲမော်ဟာ စဉ့်ကူးနယ်ထဲက စစ်ကောင်စီတပ်အတွင်းမှာ သွားရောက်ရှောင်တိမ်းနေတာဖြစ်ပြီး သူ့ရဲ့နေအိမ် မီးရှို့ခံရတာဖြစ်တယ်လို့ ဆိုပါတယ်။

“ငမော်က ဒလန်လုပ်နေတာကြာပြီ။ သူ့ကို ပကဖတွေက ဖမ်းဖို့လိုက်နေလို့ စစ်တပ်ထဲမှာ နေနေတယ်။ သူ့ အိမ်ကို ပကဖဘက်က မီးလာရှို့တာ၊ ဘေးကအိမ် ၂ လုံးပါ လောင်သွားတယ်” လို့ ရွာခံတဦးက မြေလတ်အသံကို ပြောပါတယ်။

အဲ့ဒီပျူစောထီးနေအိမ် မီးလောင်မှုကနေတဆင့် အနီးအနားက ဒေသခံတွေဖြစ်တဲ့ ဒေါ်သောင်းကြည်နဲ့ ဒေါ် မဌေး တို့ရဲ့ နေအိမ် ၂ လုံးပါ မီးလောင်ကျွမ်းခဲ့တယ်လို့ အဲ့ဒီရွာခံကဆက်ပြောပါတယ်။

အဲ့ဒီဖြစ်စဥ်နဲ့ပတ်သက်လို့ စဉ့်ကူးမြို့နယ် ပြည်သူ့ကာကွယ်ရေးတပ်ဖွဲ့(ပကဖ)မှ တာဝန်ရှိသူတဦးက ဦးငမော်ရဲ့နေအိမ်ကို တပ်ဖွဲ့ဝင် ၃ ဦးက မီးရှို့ခဲ့တာဟုတ်မှန်ပေမယ့် ပြည်သူတွေရဲ့နေအိမ်တွေကို မီးကူးစက်လောင်ကျွမ်းခဲ့တာ မရှိခဲ့ဘူးလို့ ပြောပါတယ်။

“ရဲဘော် ၃ ယောက်က စိတ်မထိန်းနိုင်လို့ မီးရှို့ခဲ့တာဆိုပြီးတော့ ဝန်ခံကြတယ်။ မီးရှို့ခဲ့လို့လည်း ပျူခေါင်းဆောင်တယောက်ရဲ့အိမ်ပဲ လောင်ကျွမ်းခဲ့တယ်။ အနီးအနားကအိမ်တွေ မလောင်ခဲ့ဘူး။ ကျနော်တို့ တပ်ဖွဲ့ဝင်တွေနဲ့ ရွာသားတွေပေါင်းပြီးတော့ မီးငြှိမ်းပေးခဲ့တာ” လို့ ဆိုပါတယ်။

လက်ရှိမှာ ပျူစောထီးခေါင်းဆောင် ဦးငမော် အနေနဲ့ သူ့ရဲ့မိသားစုတွေနဲ့အတူ စစ်ကောင်စီတပ်တခုမှာ ဝင်ရောက်ခိုလှုံနေတယ်လို့ သိရပါတယ်။

စာတည်း – ရင်ငြိမ်း

စစ်ကိုင်း၊ မတ် ၂၈၊ ၂၀၂၃။

စစ်ကိုင်းတိုင်း၊ မင်းကင်းမြို့နယ်ထဲက ချင်းတွင်းမြစ်ကြောင်းမှာရှိတဲ့ တရားမဝင် ရွှေမျှောဖောင်တွေကို စစ်ကောင်စီဘက်က မီးရှို့ဖျက်ဆီးပြီး အလုပ်သမား ၇ ဦးကိုလည်း သတ်သွားခဲ့တယ်လို့ သိရပါတယ်။

မတ်လ ၉ ရက်နေ့က ကဗျစ်၊ ဖရုံကာ၊ ရှမ်းတော့ စတဲ့ကျေးရွာတွေနားမှာရှိတဲ့ ရွှေမျှောဖောင်တွေနဲ့ လူနေတဲတွေကို မီးရှို့ခဲ့ပြီး ရွှေမျှောဖောင် ၅၃ ဖောင်နဲ့ ဆက်စပ်ပစ္စည်းတွေ ဖျက်ဆီးခံလိုက်ရကာ သိန်းထောင်ချီ မီးထဲပါသွားခဲ့တယ်လို့ ဆိုပါတယ်။

“ရွှေတွေနဲ့ တန်ဖိုးကြီးပစ္စည်းတွေတော့ စစ်ကောင်စီဘက်က ယူသွားတယ်။ ပြီးတော့ မျှောထဲမှာ ကျန်ခဲ့တဲ့ အလုပ်သမား ၅ ယောက် ရွာသား ၂ ယောက် အသတ်ခံရတယ်။ ပစ်သတ်ပြီး သဲသောင်ပြင်မှာ မြှုပ်ခဲ့တာ။ ခုပြန်ဖော်ပြီး ဘယ်သူတွေဆိုတာ စစ်ဆေးနေကြတယ်” လို့ မင်းကင်းမြို့နယ် ပကဖတာဝန်ခံက ပြောပါတယ်။

စစ်ကောင်စီတပ်ရဲ့ သတ်ဖြတ်ခြင်းခံထားရတဲ့ ပြည်သူ ၇ ဦးမှာ ၂ ဦးကတော့ ကဗျစ်ရွာသားတွေဖြစ်တယ်လို့ သိထားရပြီး ရွှေမျှောလုပ်ကွက်မှာ နယ်ပေါင်းစုံကလူတွေ လာရောက်လုပ်ကိုင်တဲ့အတွက် ဘယ်သူဘယ်ဝါဆိုတာ သိရဖို့ ကြန့်ကြာနေတယ်လို့ ဆိုပါတယ်။

စစ်ကောင်စီဘက်က ချန်နယ်တွေမှာတော့ ရွှေမျှောလုပ်ကွက်တွေမှာ PDF တွေဝင်ရောက်လုပ်ကိုင်တာတွေရှိတဲ့အတွက် ခုလိုဖျက်ဆီးတာဖြစ်တယ်လို့ ထုတ်ပြန်ထားပေမယ့် ကာကွယ်ရေးအဖွဲ့တွေကတော့ သူတို့နဲ့ဆက်နွယ်မှုမရှိဘဲ တပ်ရင်းတပ်ဖွဲ့ ထိန်းချုပ်နယ်မြေထဲမှာရှိလို့ ခုလို ဖျက်ဆီးခံရတာဖြစ်တယ်လို့ ဆိုပါတယ်။

စစ်ကောင်စီဝါဒဖြန့် တယ်လီဂရမ်တွေမှာတော့ ရွှေမျှောဖောင်တွေနဲ့ ဆက်စပ်ပစ္စည်းတွေကာလတန်ဖိုး ၁၁,၀၅၃,၄၄၀,၀၀၀ ကျပ် (သိန်းပေါင်း တစ်သိန်းတစ်သောင်းကျော်) သိမ်းဆည်းရမိခဲ့တယ်လို့ ဖော်ပြထားပါတယ်။

အဆိုပါ စစ်ကောင်စီစစ်ကြောင်းဟာ အင်အား ၁၀၀ ဝန်းကျင်နဲ့ ဖေဖော်ဝါရီလကတည်းက မင်းကင်းမြို့နယ်ထဲကို စစ်ကြောင်းထိုးနေတာဖြစ်ပြီး မတ်လ ၂၄ ရက်ကမှ မင်းကင်းကနေ ကလေးမြို့ ဒကစထဲကို ပြန်ဆုတ်ခွာသွားတာ ဖြစ်တယ်လို့ သိရပါတယ်။

မတ်လ ၁၄ ရက်နေ့ကလည်း ရွှေမျှောတွေကို ဖျက်ဆီးနေလို့ နယ်မြေခံကာကွယ်ရေးတပ်ရင်းတွေနဲ့ မြို့နယ်ပကဖအဖွဲ့ ပူးပေါင်းကာ သွားရောက်တိုက်ခိုက်ခဲ့ပြီး စစ်ကောင်စီဘက်က ၃ ဦးသေဆုံးခဲ့တယ်လို့ သိရပါတယ်။

စာတည်း – ဇို

မုံရွာ၊ မတ် ၁၆၊ ၂၀၂၃။

စစ်ကိုင်းတိုင်း၊ မုံရွာမြို့နယ်ထဲက ထနောင်းတောရွာကို မတ်လ ၁၅ ရက် မနေ့ကမနက် ၅ နာရီလောက်က စစ်ကောင်စီတပ်သားတွေ မီးဝင်ရှို့လို့ အိမ်ခြေ ၆၀ ကျော် မီးလောင်ခဲ့တဲ့အပြင် သက်ကြီးပိုင်း အဖိုး ၂ ဦးနဲ့ အဖွား ၁ ဦး သေဆုံးခဲ့ပါတယ်။

အိမ်ခြေ ၂၅၀ ကျော်ရှိတဲ့ အဲ့ဒီရွာကို အင်အား ၃၀ နီးပါးရှိတဲ့ စစ်ကောင်စီတပ်သားတွေ ရုတ်တရက် သေနတ်တွေ ပစ်ဖောက် ရောက်လာခဲ့လို့ ဒေသခံတွေ ချက်ချင်းထွက်ပြေးခဲ့ရတယ်လို့ ဒေသခံတဦးက ဆိုပါတယ်။

“ရွာအရှေ့ကနေ သေနတ်ဖောက်ပီး ဝင်လာကြတာ။ ဘာပစ္စည်းမှကို မသယ်လာနိုင်ခဲ့ဘူး။ အမတယောက်ဆိုရင်လည်း ကလေးတယောက်က စစ်သားတွေဝင်လာပြီပြောမှ ချက်ချင်း ထွက်ပြေးရတာဆိုတော့ ဘာတခုမှပါမလာဘူး” လို့ ဆိုပါတယ်။

အဲ့ဒီနောက် စစ်ကောင်စီတပ်သားတွေက ရွာထဲမှာရှိတဲ့ နေအိမ်တွေကို မီးရှို့ခဲ့တာကြောင့် အိမ်ခြေ ၆၀ ကျော် မီးလောင်ဆုံးရှုံးခဲ့သလို အသက် ၈၀ အရွယ် အဖွားတဦးနဲ့ ၆၀ ကျော် အရွယ် အဘိုး ၂ ဦး သေဆုံးခဲ့တယ်လို့ ဆိုပါတယ်။

“တဦးက မီးထဲပါသွားတာ။ နှစ်ဦးက အိမ်သာထဲကိုထည့်ပြီး မီးရှို့သွားတယ်” လို့ ဒေသခံတဦးက ပြောပါတယ်။

နေအိမ်တွေ မီးရှို့ခံလိုက်ရတဲ့ ဒေသခံတွေဟာ နီးစပ်ရာကျေးရွာတွေမှာပဲ ထွက်းပြေးခိုလုံခဲ့ရပြီး ရွာထဲပြန်မဝင်ရဲခဲ့ကြဘူးလို့ ဆိုပါတယ်။ အဲ့ဒီအပြင် မီးရှို့ပြီးထွက်သွားတဲ့ စစ်သားတွေက ညောင်ပင်စောက်တာဝါတိုင်ဘက်ကနေ သေနတ်တွေနဲ့ ရမ်းသမ်းပစ်ခတ်ခဲ့သေးတယ်လို့ ပြောပါတယ်။

၂၀၂၂ ခုနှစ် စက်တင်ဘာလ ၂၇ ရက်ကလည်း စစ်ကောင်စီတပ်သားတွေဟာ ထနောင်းတောမြောက်ရွာ နေအိမ် ၄ လုံး ထနောင်းတောတောင်ရွာ နေအိမ် ၃ အိမ်ကိုလည်း မီးရှို့ ဖျက်ဆီးခဲ့သေးတယ်လို့ သိရပါတယ်။