ပဲခူး၊ ဧပြီ ၂၊ ၂၀၂၃။

ပဲခူးတိုင်း(အနောက်ခြမ်း)၊ သာယာဝတီခရိုင်၊ မင်းလှမြို့နယ်၊ စိန်ကန့်လန့်ရွာအခြေစိုက် ခလရ ၁ တပ်ရင်း က အချုပ်သား ၁ ဦးနဲ့ ကင်းသမား ၂ ဦး မတ်လ ၂၃ ရက် မနက်အစောပိုင်းက ထွက်ပြေးသွားလို့ အဲ့ဒီနေ့ တာဝန်ကျအရာရှိနဲ့ ဗဟိုကင်းတာဝန်ကျကင်းတွဲက စစ်ကောင်စီတပ်ဖွဲ့ဝင် ၂ ဦး ဖမ်းဆီးခံထားရတယ်လို့ သိရပါတယ်။

ဖမ်းဆီးခံရသူတွေဟာ အခင်းဖြစ်ပွားတဲ့နေ့က ဗဟိုကင်းတာဝန်ကျကင်းမှူး တပ်ကြပ်ကြီး ရဲလှိုင်ဝင်း၊ ဒု-ကင်းမှူး ဒုတပ်ကြပ် ဇော်လတ်နဲ့ တာဝန်မှူးအရာရှိ သန့်ဇင်တို့ဖြစ်ပြီး သူတို့ကို ကင်းတာဝန်ပေါ့လျော့မှုနဲ့ အဲ့ဒီနေ့မနက်ပိုင်းမှာဘဲ ဖမ်းဆီးထားခဲ့တာလို့ တပ်တွင်းသတင်းရင်းမြစ်တဦးက မြေလတ်အသံကို ပြောပါတယ်။

“ဖြစ်တာကသူတို့ ကင်းချိန်မှာဖြစ်တာတော့မဟုတ်ဘူး။ ကင်းမှူးနဲ့ဒုကင်းမှူးက ညဦးပိုင်းစောင့်ရတာ။ ထွက်ပြေးတာက အချုပ်သားနဲ့သူတို့အောက်က ကင်းကျတဲ့သူတွေထွက်ပြေးတာဆိုတော့ တာဝန်ပေါ့လျော့တယ်ဆိုပြီး သူတို့ကိုဖမ်းထားတာ” လို့ ပြောပါတယ်။

ဖမ်းဆီးထားတဲ့စစ်ကောင်စီတပ်ဖွဲ့ဝင် ၃ ဦးကို ထွက်ပြေးနေသူတွေနဲ့ ဆုံးရှုံးသွားတဲ့လက်နက်ခဲယမ်းတွေ ပြန်လည်မရရှိရင် သေဒဏ်ပေးမယ်လို့လည်း ခြိမ်းခြောက်ထားတယ်လို့ သူကပြောပါတယ်။

လက်နက်၊ခဲယမ်းတွေနဲ့အတူထွက်ပြေးနေတဲ့ စစ်ကောင်စီတပ်သားတွေထဲက ၂ ဦးဟာ လက်ရှိအထိ ထွက်ပြေးလွတ်မြောက်နေဆဲဖြစ်ပြီး ၎င်းတို့နဲ့အတူ သေနတ် ၃ လက်၊ ကျည်ဆံ ၂၀၀၀၊ လက်ပစ်ဗုံး ၂၀ လုံးကိုပါ သယ်ဆောင်ထွက်ပြေးနေတာလို့ ဆိုပါတယ်။

ထွက်ပြေးသွားတဲ့ စစ်ကောင်စီတပ်သား ၃ ဦးထဲက တပ်သား ဖိုးလပြည့်ဆိုသူကို မတ်လ ၂၄ ရက်နေ့မှာပဲ ပဲခူးရိုးမအတွင်းက ရှားတောပြန့်နဲ့ပျဉ်းကတိုးခင်းကျေးရွာအနီးမှာ ပြန်လည်ဖမ်းဆီးခံခဲ့ရပြီး သူ့ကို ခလရ ၁ စစ်ကောင်စီတပ်အရာရှိတွေက သတ်ဖြတ်လိုက်ပြီလို့လည်း တပ်တွင်းသတင်းရင်းမြစ်တွေက ပြောပါတယ်။

မင်းလှ၊ မတ် ၂၃၊ ၂၀၂၃။

ပဲခူးတိုင်း(အနောက်ခြမ်း)၊ သာယာဝတီခရိုင်၊ မင်းလှမြို့နယ်၊ စိန်ကန့်လန့်ရွာအခြေစိုက် ခလရ ၁ တပ်က အချုပ်သား ၁ ဦးနဲ့ စစ်ကောင်စီတပ်သား ၂ ဦး မတ်လ ၂၃ ရက် ဒီနေ့မနက် ၃ နာရီလောက်မှာ လက်နက်တွေယူပြီး ထွက်ပြေးသွားတယ်လို့ သိရပါတယ်။

ထွက်ပြေးသွားသူတွေဟာ ခလရ ၁ ဗဟိုကင်းတပ်တွင်းအချုပ်မှာ ဖမ်းခံထားရတဲ့ စစ်ကောင်စီတပ်ဖွဲ့ဝင်အချုပ်သား ၁ ဦးနဲ့ တပ်ဗဟိုကင်းအချုပ်စောင့် တပ်သား ၂ ဦးဖြစ်ပြီး သေနတ် ၃ လက်ယူပြီး ထွက်ပြေးနေတာလို့ တပ်တွင်းသတင်းရင်းမြစ်တဦးက မြေလတ်အသံကို ပြောပါတယ်။

“အချုပ်စောင့်တဲ့ဗဟိုကင်း ကင်းသမား ၂ ယောက်ရယ်၊ အချုပ်သားတယောက်ရယ် မနက် ၃ နာရီလောက်ကြီး ထွက်ပြေးသွားတာ။ ခလရ ၁ က တောအစပ်မှာဆိုတော့ပြေးလို့လွယ်တယ်။ သေနတ်တလက်စီ ပါသွားတယ်” လို့ ပြောပါတယ်။

လက်ရှိမှာ သေနတ်တွေယူဆောင်ထွက်ပြေးသွားတဲ့ စစ်ကောင်စီတပ်သားတွေကို ခလရ ၁ နောက်တန်း စစ်ကောင်စီတပ်ဖွဲ့ဝင်တွေက တောနင်းရှာဖွေနေပြီး တွေ့တဲ့နေရာ ပစ်သတ်ဖို့ ညွှန်ကြားထားတယ်လို့လည်း ဆိုပါတယ်။

“သူတို့သေနတ်တွေကို နိုင်သလောက်သယ်ဖို့လုပ်နေတာလို့ သိရတယ်။ လက်နက်တိုက်ဖောက်နေတာကို ဟိုတလောက မုဒိန်းမှုနဲ့အချုပ်ကျနေတဲ့ ထွန်းနိုင်ကတွေ့လို့ အော်လိုက်လို့တယောက်တလက်စီပဲ ပါသွားတာ။ ခုတပ်ထဲမှာလည်း ဆူညံပွက်လောရိုက်နေတာ။ သူတို့ကို စစ်ကြောင်းထိုး တောနင်းရှာနေတယ်။ ပစ်မိန့်လည်း ပေးထားတယ်။ လူတွေအရှင်မမိရင်နေ သေနတ်တွေပြန်ရအောင် ရှာရမယ်ဆိုပြီး အမိန့်ထုတ်ထားတယ်” လို့ သူကဆက်ပြောပါတယ်။

စစ်ကောင်စီတပ်သားတွေကို ချုပ်နှောင်ထားတဲ့ တပ်တွင်းအချုပ် ဗဟိုကင်းဟာ တပ်ရင်းတခုလုံးရဲ့ လက်နက်၊ ခဲယမ်းတွေကို သိမ်းဆည်းထားရှိတဲ့ လက်နက်တိုက်လည်း ဖြစ်တယ်လို့ သိရပါတယ်။

လက်ရှိအချိန်ထိ ထွက်ပြေးသွားသူတွေကို အောက်ခြေမှာ တောနင်းရှာဖွေနေဆဲဖြစ်ပြီး ဖြစ်စဉ်ဖြစ်ပွားမှုကို ခလရ ၁ နောက်တန်းအရာရှိတွေက တပ်မ ၆၆ နဲ့ ဒကစ(ပြည်)ဌာနချုပ်တွေကို တင်ပြတာမျိုးမရှိသေးဘဲ ကြိတ်ပြီးရှာဖွေနေတယ်လို့ ဆိုပါတယ်။

မင်းလှအခြေစိုက် ခလရ ၁ တပ်ဟာ တပ်မ ၆၆ လက်အောက်ခံ တပ်ရင်းတခုဖြစ်ပြီး ကရင်နီပြည်နယ်အတွင်း စစ်ဆင်ရေးဝင်ရောက်နေတဲ့တပ်ဖြစ်ကာ၊ ရှေ့တန်းစစ်ဆင်ရေးမှာလည်း ထိခိုက်ကျဆုံး များနေသလို နောက်တန်းမှာလည်း အုပ်ချုပ်မှုလျော့နည်းဖြစ်စဉ် အမှုအခင်းတွေ ဆက်တိုက်ဖြစ်ပွားနေကာ အခုမတ်လအတွင်းမှာပဲ ခလရ ၁ က စစ်ကောင်စီတပ်သား ထွန်းနိုင်ဟာ စိန်ကန့်လန့်ရွာနေ အငြိမ်းစားဗိုလ်ကြီး မျိုးမြင့်ရဲ့သမီးဖြစ်သူ စိတ်ဝေဒနာသည်ကို အကြိမ်ကြိမ်အဓ္ဓမပြုကျင့်မှု ဖြစ်ပွားခဲ့သေးတယ်လို့ တပ်တွင်းသတင်းရင်းမြစ်တွေဆီက သိရပါတယ်။

ပဲခူး၊ မတ် ၁၃၊ ၂၀၂၃။

ပဲခူးတိုင်း(အနောက်ခြမ်း)၊ သာယာဝတီခရိုင်၊ မင်းလှမြို့နယ်ထဲမှာ မတ်လ ၁၃ ရက် ဒီနေ့မနက်အစောပိုင်း ၂ နာရီလောက်က မိုးသက်လေပြင်းတိုက်ခတ်ခဲ့တာကြောင့် လူနေအိမ်တွေထိခိုက်ပျက်စီးခဲ့တယ်လို့ သိရပါတယ်။

လေပြင်းတိုက်ခတ်တာကြောင့် မင်းလှမြို့နယ်၊ စိန်ကန့်လန့်ရွာက လူနေအိမ် ၁ လုံးပြိုကျပျက်စီးခဲ့ပြီး၊ နေအိမ် ၂၅ လုံးခန့်အမိုးလန်ပျက်စီးကာ ရန်ကုန်-ပြည်ကားလမ်းမပေါ်က ကိုင်းပြင်ကြီးရွာ မူလတန်းလွန်ကျောင်းမှာလည်း အမိုးလန်ခဲ့တယ်လို့ ဒေသခံတဦးက မြေလတ်အသံကို ပြောပါတယ်။

“မိုးရောလေရောတိုက်တာဗျ။ လေကလည်းပြင်းသလို မိုးကလည်းကြီးတယ်။ ညပိုင်းဖြစ်နေတော့ မနက်ရောက်မှ အပျက်အစီးတွေမြင်ပြီးမှအမိုးလန်တာကိုသိရတာ။ ပြည်လမ်းပေါ်က ကိုင်းပြင်ကြီးရွာ မူလွန်ကျောင်းမှာလည်း လေပြင်းကြောင့် သွပ်အချပ် ၃၀ လောက်ပျက်စီးခဲ့တယ်” လို့ ပြောပါတယ်။

ကိုင်းပြင်ကြီးရွာအနီး ရန်ကုန်-ပြည်ကားလမ်းမပေါ်မှာလည်း လေပြင်းတိုက်ခတ်မှုကြောင့် သစ်ပင်တွေကျိုးကျနေလို့ လမ်းပိတ်ဆို့မှုတွေဖြစ်ပေါ်ခဲ့သေးတယ်လို့ သူကဆက်ပြောပါတယ်။

ပြင်ပမိုးလေဝသပညာရှင်အချို့ရဲ့ခန့်မှန်းချက်မှာလည်း မြန်မာနိုင်ငံမြေလတ်ဒေသ စစ်ကိုင်း၊ မန္တလေး၊ ပဲခူးနဲ့ မကွေးတိုင်းအပါအဝင်ဒေသအများစုမှာ မတ်လ ၁၃ ရက်ကစတင်လို့ အချိန်အခါမဟုတ် မိုးသက်လေပြင်းကျရောက်တာတွေဖြစ်ပေါ်လာနိုင်တယ်လို့ ခန့်မှန်းထုတ်ပြန်ထားပါတယ်။

ကရင်ပြည်နယ်နဲ့မွန်ပြည်နယ်ကမြို့နယ်အချို့မှာလည်း မနေ့ညပိုင်းနဲ့ ဒီမနက်ပိုင်းမှာ မိုးကြီးပြီးလေပြင်းတိုက်ခဲ့မှုတွေ ဖြစ်ပေါ်ခဲ့တယ်လို့ သိရပါတယ်။

ပြီးခဲ့တဲ့ဖေဖေါ်ဝါရီလ ၁၆ ရက်ကလည်း ပဲခူးတိုင်းအနောက်ခြမ်းက နတ်တလင်း၊ ကြို့ပင်ကောက်၊ မင်းလှမြို့နယ်တွေမှာ မိုးရွာသွန်းခဲ့ပြီး မိုးညိုမြို့နယ်မှာတော့ နေအိမ် ၂၀ ကျော်အမိုးလန်ပျက်စီးခဲ့ပါသေးတယ်။

စာတည်း- ရင်ငြိမ်း

မင်းလှ၊ မတ် ၃၊ ၂၀၂၃။

ပဲခူးတိုင်း(အနောက်ခြမ်း)၊ သာယာဝတီခရိုင်၊ မင်းလှမြို့နယ်အတွင်းက ပဲခူးရိုးမပေါ်ကို စစ်ကြောင်းထိုးဖို့ စစ်ကား ၁၀ စီးကျော်နဲ့ အင်အားအများအပြား တင်ဆောင်ပြီး မတ်လ ၃ ရက် ဒီကနေ့မနက်ပိုင်းမှာ ထပ်တက်သွားတယ်လို့ သိရပါတယ်။

ပဲခူးရိုးပေါ်က PDF တွေ ခိုအောင်းနိုင်တဲ့နေရာတွေကို စစ်ကြောင်းထိုးဖို့ သွားရောက်တာ ဖြစ်ပြီး မတ်လ ၂ ရက် မနေ့က မနက်အစောပိုင်းကလည်း စစ်ကား ၃ စီးနဲ့ သွားရောက်တာမှာ ပဲခူးရိုး၊ ခါချဉ်တောင်အတက်မှာ ကားမှောက်ခဲ့လို့ ဗိုလ်မှူးအဆင့်အပါအဝင် စစ်သား ၅ ဦးကျော် သေဆုံး၊ ဒဏ်ရာရခဲ့တာကြောင့် နောက်ကြောင်းပြန်ဆုတ်လာခဲ့ရပါတယ်။

“မနေ့က ကားမှောက်လို့သေတဲ့ စကစ ဗိုလ်မှူးက ဒီမင်းလှ၊ သရက်တပင်တာဆုံမှာ KTV မယ်တွေနဲ့ အတူနေပျော်ပါးပြီး မနက် ၄ နာရီလောက်ကြီး ထသွားတာ။ ကားပေါ်မှာလည်း ဘီယာ၊ အရက်တွေအကုန် တင်သွားတာ။ အဲ့ဒီပဲခူးရိုးက ကရင်မောင်နှမဆိုတာ ရှိတယ်။ နတ်ကြီးတယ်။ အမှားမခံဘူး။ အဲ့ဒီနေရာက အရင်ကတည်းက ကားခဏခဏမှောက်လို့ အသေအပျောက် များတဲ့နေရာ။ ဒီနေ့မနက်လည်း ထပ်တက်သွားပြန်ပြီ” လို့ မင်းလှမြို့ခံ တဦးက မြေလတ်အသံကို ပြောပါတယ်။

စစ်ကောင်စီတပ်တွေ ပဲခူးရိုးပေါ်တက်ရောက် စစ်ကြောင်းထိုးဖို့ ရောက်ရှိနေလို့ ဒေသခံပြည်သူတွေအနေနဲ့ ရိုးမအတွင်းကို သတိထားသွားလာကြဖို့ သာယာ၀တီခရိုင် PDF တာဝန်ရှိသူတဦးက ပြောပါတယ်။

“ဒီမနက် ထပ်တက်လာတယ်ဆိုတာ ကျနော်တို့လည်း သတင်းရထားတယ်။ လောလောဆယ် ရိုးပေါ်ကို ရှေ့ပြေးအနေနဲ့ စစ်ကား ၄ စီး‌ ရောက်နေတာ တွေ့တယ်။ ကျန်တဲ့ကားတွေတော့ ဘယ်မှာထားခဲ့ပြီး စောင့်နေလည်း မသိဘူး။” လို့ သူက ပြောပါတယ်။

ပဲခူးရိုးပေါ်ကို စစ်ကြောင်းထိုးနေတဲ့ စစ်ကောင်စီတပ်တွေဟာ ပဲခူးအနောက်ခြမ်းကို အခြေပြုထားတဲ့ တပ်မ ၆၆ လက်အောက်ခံတပ်ရင်းတွေရဲ့ နောက်ချန်အင်အားတွေကို စုဖွဲ့ထားတာဖြစ်ပြီး မင်းလှမြို့နယ် စိန်ကန့်လန့်ရွာအခြေစိုက် ခလရ ၁ မှာ စစ်အင်အား ၂၀၀ ကျော် စုဖွဲ့အင်အား ဖြည့်တင်းထားတယ်လို့ သိရပါတယ်။

မင်းလှ၊ မတ် ၂၊ ၂၀၂၃။

ပဲခူးတိုင်းဒေသကြီး၊ မင်းလှမြို့နယ်၊ စိန်ကန့်လန့်ကျေးရွာနဲ့ မြို့ချောင်းကျေးရွာကြားမှာ PDF တွေကို စစ်ကြောင်းထိုးဖို့လာတဲ့ စစ်ကောင်စီကား မှောက်လို့ ဗိုလ်မှူးအပါ ၅ ဦး သေဆုံးပြီး ဒဏ်ရာရသူတွေလည်း ရှိတယ်လို့ သိရပါတယ်။

ယနေ့မနက် ၄ နာရီခန့်မှာ မင်းလှဘက်ကနေ ကား ၃ စီး အင်အား ၆၀ ကျော်ပါတဲ့ စစ်ကြောင်းဟာ ပဲခူးရိုးမထဲကို လာချိန် ခါချဥ်တောင်လမ်း ရေတွင်းကုန်းအဆင်းအရောက်မှာ စစ်ကားတစ်စီးဟာ လမ်းဘေးချောက်ထဲကို အရှိန်လွန်ပြီး ထိုးကျတိမ်းမှောက်သွားတယ်လို့ သာယာဝတီဂဠုန်တပ်ဖွဲ့ စစ်ရေးတာဝန်ခံ ကိုတံခွန်က ပြောပါတယ်။

“ခုလာတဲ့ အဖွဲ့တွေက မင်းလှက ခလရ ၁၊ သာယာဝတီ ခလရ ၃၅၊ အုတ်ဖိုက ခလရ ၆ က အဖွဲ့တွေ။ သူတို့ တပ်ရင်း ၃ ရင်းပေါင်းပြီး ပဲခူးရိုးမကို PDF တွေ ရှိတဲ့နေရာကို စစ်ကြောင်းထိုးဖို့ တက်လာတာ။ တောင်တွေပေါ် ပတ်တက်နေချိန် သူတို့ဟာ သူတို့မှောက်တာ။ ထိခိုက်သေဆုံးတာတွေ များတယ်” လို့ ပြောပါတယ်။

စစ်ကောင်စီကားမှောက်လို့ ၅ ဦး သေဆုံးပြီး အများအပြား ဒဏ်ရာရသွားတယ်လို့ ဆိုပါတယ်။

ကားမှောက်တဲ့နေရာမှာ စစ်ကောင်စီကား ၂ စီး ရှိနေပြီး သေဆုံးအလောင်းတွေနဲ့ ဒဏ်ရာရသူတွေကို သယ်ယူတာတွေ လုပ်ခဲ့လို့ လမ်းပိတ်ထားတာတွေလည်း ရှိနေတယ်လို့ သိရပါတယ်။

စစ်ကောင်စီတပ်ဟာ ပဲခူးရိုးမထဲကို စစ်ကြောင်းထိုးဖို့ စိန်ကန့်လန့်ရွာထဲက စစ်ကောင်စီတပ်ထဲမှာ အင်အား ၂၀၀ ကျော် ရှိနေပြီး အင်အားဖြည့်နေကြတယ်လို့ သိရပါတယ်။

လက်ရှိမှာ သေဆုံးသူ ဗိုလ်မှူးလောင်းနဲ့ ပြင်းထန်ဒဏ်ရာရသူ စစ်သား၂ ဦးကို ကုတင် ၁၀၀ စစ်ဆေးရုံကို ပို့ဆောင်ထားတယ်လို့ သိရပါတယ်။

စာတည်း – 007

ပဲခူး၊ ဇွန် ၂၂၊ ၂၀၂၂။

ပဲခူးတိုင်း(အနောက်ခြမ်း)၊ မင်းလှမြို့နယ်၊ စိန်ကန့်လန့်ရွာအခြေစိုက် အမှတ် ၁ ခြေလျင်တပ်ရင်း (ခလရ ၁) စစ်ကောင်စီတပ်မှာ တပ်အင်အားမရှိလို့ စစ်မှုထမ်းဟောင်း အသက်ကြီးရွယ်အိုတွေကို ခေါ်ယူအလုပ်ပေးပြီး ကင်းစောင့်ခိုင်းနေတယ်လို့ အဲ့ဒီတပ်နဲ့နီးစပ်တဲ့ဒေသခံတွေဆီက သိရပါတယ်။

စစ်မှုထမ်းဟောင်းတွေကို ပြန်လည်ခေါ်ယူရမှာ သေနတ်ပစ်ခတ်နိုင်ရေးကို အဓိကထားခေါ်ယူနေကာ ခြေထောက်တဖက်ပြတ်နေသူတွေလည်း ပါဝင်တယ်လို့ ဆိုပါတယ်။

“သေနတ်ကို မ နိုင်ပြီးပစ်နိုင်သေးရင်ပြီးရောဆိုတာမျိုးခေါ်တာထင်တယ်။ အဘိုးကြီးတွေရော၊ ခြေတဖက်ပြတ်တွေရောပါတယ်။ သူတို့ကို လစာပေးထားတယ်လို့လည်း သိရတယ်။ ဘယ်လောက်ပေးလည်းတော့မသိဘူး” လို့ ခလရ ၁ နဲ့ နီးစပ်သူတဦးက မြေလတ်အသံကို ပြောပါတယ်။

ဒါ့အပြင် သူတို့စစ်ကောင်စီတပ်ဖွဲ့ဝင်တွေရဲ့ တပ်တွင်းနေထိုင်တဲ့ အရွယ်ရောက်ပြီးသူ မိသားစုဝင်သားသမီးတွေကိုပါ စစ်သင်တန်းပေးကာ တက်ရောက်ခိုင်းနေတယ်လို့ သိရပါတယ်။

“ခလေးသေးသေးတွေလောက်ဘဲ မတက်ခိုင်းတာ၊ သေနတ် မ(သယ်)နိုင်တဲ့အရွယ်မျိုးလောက်ကနေစပြီး စစ်သင်တန်းတက်ခိုင်းတယ်။ ခလေးတွေကို​တော့ ကင်းစောင့်ခိုင်းတာမျိုးတော့ မတွေ့ဘူး။ စစ်သင်တန်းဘဲ သက်သက်တက်ခိုင်းတာမျိုးဖြစ်မယ်” လို့ သူက ဆက်လက်ပြောပါတယ်။

ခလရ ၁ တပ်ဟာ အင်းမအခြေစိုက် အမှတ် ၆၆ ခြေမြန်တပ်မဌာနချုပ် (တမခ ၆၆) လက်အောက်ခံ တပ်ရင်းတခုဖြစ်ပြီး လက်ရှိမှာ ခလရ ၁ တပ်အပါအဝင် တပ်မ ၆၆ တပ်မတခုလုံး ကရင်နီပြည်အတွင်းမှာ ကရင်နီတပ်ဖွဲ့တွေနဲ့ တိုက်ခိုက်နေရတာ ဖြစ်ပါတယ်။

ပြီးခဲ့တဲ့ ဒီဇင်ဘာလ ၃၁ ရက်နေ့ ကရင်နီတိုက်ပွဲမှာဘဲ ခလရ ၁ တပ်ရင်းမှူး ဒု-ဗိုလ်မှူးကြီး ကျော်ဇေယျအပါအဝင် စစ်ကောင်စီတပ်ဖွဲ့ဝင် ၁၀ ဦးကျော် တိုက်ပွဲအတွင်းသေဆုံးခဲ့ပြီးတော့ နောက်ပိုင်းတိုက် ပွဲတွေမှာလည်း ထိခိုက်သေဆုံးမှုများပြားခဲ့တယ်လို့ တပ်နဲ့နီးစပ်တဲ့သတင်းရင်းမြစ်တွေဆီကသိရပါတယ်။

ခလရ ၁ က စစ်ကောင်စီတပ်သားတွေအပြင် တပ်မ ၆၆ လက်အောက်ခံတပ်သားတွေလည်း ကရင်နီတပ်တွေဆီကို CDM ပြုလုပ်ဘက်ပြောင်းသွားတာ အများအပြားရှိနေတယ်လို့ ကရင်နီတပ်ဖွဲ့တွေရဲ့ထုတ်ပြန်ချက်တွေအရသိရပါတယ်။

ပဲခူး(အနောက်ခြမ်း)ဒေသတွေဖြစ်တဲ့ ပြည်ခရိုင်နဲ့ သာယာဝတီခရိုင်တွေမှာလည်း PDF တပ်ရင်းတွေ ဖွဲ့စည်းပြီး စစ်ကောင်စီရဲ့စစ်ရေးပစ်မှတ်နဲ့ အုပ်ချုပ်ရေးပစ်မှတ်တွေကို တိုက်ခိုက်မှုများလာတာကြောင့် စစ်ကောင်စီဘက်က နောက်ချန်အင်အားနည်းပါးတဲ့ တပ်ရင်းတွေမှာ အခုလိုပြင်ဆင်လာတာမျိုးဖြစ်တယ်လို့ CDM တပ်မတော်သားဟောင်းတဦးက သုံးသပ်ပြောဆိုပါတယ်။