မြေလတ်အသံ၊ နိုဝင်ဘာ ၁၈၊ ၂၀၂၅။
မြေလတ်ဒေသကသတင်းတွေကို တင်ဆက်ပေးနေတဲ့ မြေလတ်အသံသတင်းဌာနရဲ့ တနေ့တာသတင်း စတဲ့သတင်းတွေကို တင်ဆက်ထားပါတယ်။
စတဲ့သတင်းတွေကို တင်ဆက်ထားပါတယ်။
ချောက်၊ နိုဝင်ဘာ ၁၈၊ ၂၀၂၅။
မကွေးတိုင်း၊ ချောက်မြို့ကထွက်လာတဲ့ စစ်ကော်မရှင်ကားတွေကိုတိုက်ခိုက်ရင်း အာဠာဝက မြို့ပြပြောက်ကျားတပ်ဖွဲ့မှ စခန်းမှူးကျဆုံးခဲ့တယ်လို့ အဲ့ဒီတပ်ဖွဲ့ဆီက သိရပါတယ်။
နိုဝင်ဘာ ၁၇ ရက် နေ့လယ် ၁၁ နာရီခွဲလောက်မှာ ချောက်မြို့နယ် တနေရာမှာ စစ်ကော်မရှင် ကားတွေကိုတိုက်ခိုက်ရာက အပြန်အလှန်ပစ်ခတ်မှုဖြစ်ပြီး စခန်းမှူးအသက် ၁၉ နှစ်အရွယ် အောင်ဇင်မျိုး (ခ) ဥသြမှာ အဆုတ်ကို ကျည်ထိမှန်ပြီး နေရာမှာပဲ သေဆုံးခဲ့တာလို့ ဆိုပါတယ်။
“ချောက်မြို့က ထွက်လာတဲ့ ယာဉ်တန်းကို ချောက်မြို့နယ် တနေရာမှာ တိုက်ခိုက်တာ၊ ကား ၂ စီးကို ကြားဖြတ်တိုက်ခိုက်ရင်း သူပစ် ကိုယ်ပစ်အပြန်အလှန်ပစ်ခတ်ရင်း ထိမှန်တာ၊ အဆုတ်ကို ထိမှန်တာ၊ အလောင်းကို ပြန်ရခဲ့ပါတယ်၊” လို့ အာဠာဝက မြို့ပြပြောက်ကျားတပ်ဖွဲ့ တာဝန်ရှိသူတဦးက ပြောပါတယ်။
ထိတွေ့တိုက်ခိုက်မှုဖြစ်ပွားချိန် မိနစ် ၃၀ ခန့်ကြာခဲ့ပြီး စစ်ကော်မရှင်တပ်ဖွဲ့ဝင်တွေဘက်က ၅ ဦးသေဆုံးမှုရှိကာ တိုက်ခိုက်မှုဖြစ်ပြီးနောက် ၁ နာရီခန့်အကြာမှာ စစ်ကော်မရှင်ကားတွေက ချောက်မြို့ဘက်ကို ဆက်သွားခဲ့ကြပြီး အဲ့ဒီနောက်မှ အလောင်းကိုကောက်ယူခဲ့ရတယ်လို့ တာဝန်ရှိသူတဦးက ပြောပါတယ်။
အောင်ဇင်မျိုး (ခ) ဥသြရဲ့ ဈာပနအခမ်းအနားကို နိုဝင်ဘာ ၁၇ ရက် မနေ့ကညနေ ၃ နာရီခွဲလောက်က မကွေးခရိုင်အတွင်း တပ်ရင်းအခြေစိုက်ရာနေရာမှာ ပြုလုပ်ခဲ့ပြီး တပ်ဖွဲ့ဝင် ၃၀ ဦးဝန်းကျင်တက်ရောက်ခဲ့ကြတယ်လို့ သိရပါတယ်။
အောင်ဇင်မျိုးဟာ ၂၀၂၅ ခုနှစ် ၅ လပိုင်းမှာ အာဠာဝကမြို့ပြပြောက်ကျားတပ်ဖွဲ့ကိုစတင်ဝင်ရောက်ခဲ့တာဖြစ်ပြီး လက်ရှိမှာ စခန်းမှူးအဖြစ်တာဝန်ထမ်းဆောင်နေတာ ၂ လကြာပြီး မြန်မာလူမျိုးဖြစ်တယ်လို့ တာဝန်ရှိသူတဦးက ပြောပါတယ်။
၂၀၂၃ ဇွန်လမှာစတင်တည်ထောင်ခဲ့တဲ့ အာဠာဝက မြို့ပြပြောက်ကျားတပ်ဖွဲ့ဟာ ချောက်မြို့နယ်အခြေစိုက်ကာ စစ်ကော်မရှင်တပ်တွေကိုတော်လှန်တိုက်ခိုက်နေတာဖြစ်ပြီး တပ်ဖွဲ့တည်ထောင်ချိန်ကနေ လက်ရှိအချိန်ထိ တပ်ဖွဲ့ဝင် ၆ ဦးကျဆုံးခဲ့တာပါ။
စာတည်း – လင်း
မြေလတ်အသံ၊ နိုဝင်ဘာ ၁၈၊ ၂၀၂၅။
မကွေးတိုင်း၊ နတ်မောက်မြို့နယ်က ရွာတရွာကို စစ်ကော်မရှင်တပ်က နိုဝင်ဘာ ၁၇ ရက်မနက် ၈ နာရီကျော်မှာ လေယာဥ်နဲ့ ဗုံးကြဲတိုက်ခိုက်ခဲ့တာကြောင့် ဒေသခံ ၃ ဦးသေဆုံးခဲ့တယ်လို့ ဒေသခံတော်လှန်ရေးတပ်ဖွဲ့တခုဆီက သိရပါတယ်။
နတ်မောက်မြို့နယ်၊ အနောက်ဘက်ခြမ်းရှိ ကြက်သောက်တွင်းကျေးရွာကို တိုက်ပွဲဖြစ်တာမရှိဘဲ တိုက်ခိုက်ရေးလေယာဥ် ၁ စီးနဲ့ ဗုံးသီး ၂ လုံးကြဲချခဲ့တာလို့ဆိုပါတယ်။
“ဗုံးကရွာထဲကိုကျတာ။ နေအိမ်တွေပျက်စီးသွားတယ်။ ၃ယောက်က ပွဲချင်းပြီးကိုသေတာ၊ ၁၀ ယောက်လောက်ကတော့ ဒဏ်ရာရတယ်။ အဲ့ရွာအနီးနားတွေမှာ ဘာတိုက်ပွဲမှကိုမရှိတာ။ သပ်သပ်ကိုလာကြဲတာနေမှာ” လို့ နတ်မောက်ဒေသခံတော်လှန်ရေးတပ်ဖွဲ့ဝင်တဦးကပြောပါတယ်။
သေဆုံးသူ ၃ ဦးဟာ ကြက်သောက်တွင်းရွာမှ ကိုစိုးတင့် ၅၇ နှစ်၊ မမျိုးသီတာ ၃၇ နှစ်၊ ကိုဌေးလှိုင် ၃၂ နှစ်တို့ဖြစ်ပြီး ဒဏ်ရာရရှိသူ ၁၀ ဦးထဲက ဒဏ်ရာပြင်းထန်စွာရရှိခဲ့သူ ၃ ဦးကတော့ ကိုမြင့်ကို ၃၃ နှစ်၊ ကိုတက်တိုး ၄၈ နှစ်၊ မသီတာအေး ၂၂ နှစ်တို့ဖြစ်ပါတယ်။
သေဆုံးသူတွေရဲ့ရုပ်အလောင်းတွေကိုတော့ နိုဝင်ဘာ ၁၇ ရက်နေ့လယ် ၃ နာရီကျော်မှာ မြေမြုပ်သင်္ဂြိုဟ်ခဲ့ပြီး ဒဏ်ရာရရှိသူတွေကို နီးစပ်ရာဆေးခန်းတွေမှာ ဆေးကုသမှုခံယူနိုင်ဖို့ ပို့ဆောင်ခဲ့ကြတယ်လို့ အထက်ပါတပ်ဖွဲ့ဝင်ကပြောပါတယ်။
ပြီးခဲ့တဲ့အောက်တိုဘာ ၁၃ ရက်ကလည်း နတ်မောက်မြို့နယ်၊ အရှေ့ခြမ်းရှိ စမ်းကုန်းကျေးရွာအနီး ပတ်ဝန်းကျင်ကို စစ်ကော်မရှင်တပ်က ဗုံးကြဲတိုက်ခိုက်ခဲ့ပါသေးတယ်။
စာတည်း – လင်း
မြေလတ်အသံ၊ နိုဝင်ဘာ ၁၇၊ ၂၀၂၅။
မြေလတ်ဒေသကသတင်းတွေကို တင်ဆက်ပေးနေတဲ့ မြေလတ်အသံသတင်းဌာနရဲ့ တနေ့တာသတင်း စတဲ့သတင်းတွေကို တင်ဆက်ထားပါတယ်။
စတဲ့သတင်းတွေကို တင်ဆက်ထားပါတယ်။
ရေစကြို၊ နိုဝင်ဘာ ၁၇၊ ၂၀၂၅။
မကွေးတိုင်း၊ ရေစကြိုမြို့နယ်ပြည်သူ့ကာကွယ်ရေးတပ်ဖွဲ့ဆီကို ခလရ ၂၅၆ တပ်က တပ်သား ၁ ဦး နိုဝင်ဘာ ၁၅ ရက်မှာ ဘက်ပြောင်းခိုလှုံလာခဲ့တယ်လို့ အဲ့ဒီအဖွဲ့ဆီက သိရပါတယ်။
ဘက်ပြောင်းခိုလှုံလာသူဟာ ရေစကြိုမြို့နယ်၊ ခလရ ၂၅၆ တပ်က တပ်သားဟိန်းထက်လင်းဖြစ်ပြီး တပ်လုံခြုံရေးဂိတ်မှာတာဝန်ကျနေချိန်မှာ လက်နက်တွေယူပြီးထွက်ပြေးလာခဲ့တာလို့ ဆိုပါတယ်။
“သူတာဝန်ကျနေတဲ့အချိန်မှာ ခိုလှုံလာတာဖြစ်တယ်၊ သူကိုင်ဆောင်ထားတဲ့ MA 1 ၁ လက်ပါတယ်၊ ဘေးကလည်း လစ်တာနဲ့ သူနဲ့အတူတာဝန်ကျနေတဲ့ တပ်ကြပ်ကြီး ၁ ဦးရဲ့ MA 3 ၁ လက်နဲ့ အားလုံးပေါင်း ၂ လက်ယူဆောင်ပြီး ဘက်ပြောင်းခိုလှုံလာတာ”လို့ပြည်သူ့ကာကွယ်ရေးတပ်ဖွဲ့-ရေစကြိုမြို့နယ် သတင်းနဲ့ပြန်ကြားရေးတာဝန်ခံက ပြောပါတယ်။
တပ်သားဟိန်းထက်လင်းဟာ စစ်ကော်မရှင်တပ်ထဲကိုဝင်ရောက်ခဲ့တာ ၁ နှစ်ကျော်ရှိပြီး တပ်အတွင်းအနိုင်ကျင့်မှုတွေကြောင့် ခုလိုဘက်ပြောင်းခိုလှုံလာတာလို့ ဆိုပါတယ်။
“သူဘက်ပြောင်းခိုလှုံလာတဲ့ အကြောင်းကတော့ ကြီးနိုင်ငယ်ညှဥ်း ကြိမ်ဖန်များစွာခံရတဲ့ အချိန်မှာ တပ်ထဲမှာ မနေချင်တော့တဲ့အတွက် ဘက်ပြောင်းခိုလှုံလာတာလို့ ပြောတယ်။ ကျနော်တို့နဲ့ ဖုန်းအချိတ်အဆက်လုပ်ပြီးတော့ လွှတ်မြောက်တဲ့တနေရာကို ချိန်းဆိုပြီးတော့ သူလာတယ်။ သူလာတဲ့နေရာကို ကျနော်တို့သွားခေါ်တာ”လို့ ရေစကြိုမြို့နယ်ပြည်သူ့ကာကွယ်ရေးသတင်းနဲ့ ပြန်ကြားရေးတာဝန်ခံက ပြောပါတယ်။
သေနတ်၂ လက်ယူဆောင်လာတာကြောင့် တပ်သားဟိန်းထက်လင်းကို ရေစကြို ပကဖ က ဆုကြေးငွေ ကျပ်သိန်း၅၀ ချီးမြှင့်ထားပြီး လုံခြုံတဲ့နေရာကို ပို့ဆောင်ပေးထားတယ်လို့လည်းဆိုပါတယ်။
၂၀၂၁၊ စစ်အာဏာသိမ်းချိန်ကနေ ၂၀၂၅၊ နိုဝင်ဘာ ၁၇ ရက်အထိ ရေစကြိုပကဖဆီကို ဘက်ပြောင်းခိုလှုံလာတဲ့ စစ်ကော်မရှင်တပ်သား ၃၀ ဦးထက်မနည်းရှိပြီလို့ သိရပါတယ်။
စာတည်း – လင်း
ကံမ၊ နိုဝင်ဘာ ၁၇၊ ၂၀၂၅။
မကွေးတိုင်း၊ ကံမမြို့နယ်၊ ကျောက်စောင်းကျေးရွာက သက်ကြီးပိုင်းအမျိုးသား ၁ ဦး နိုဝင်ဘာ ၁၅ ရက်ညနေ ၅ နာရီခန့်မှာ အသတ်ခံခဲ့ရတယ်လို့ အသတ်ခံရသူနဲ့ဆွေမျိုးတော်စပ်သူဆီက သိရပါတယ်။
အသတ်ခံရသူဟာ အသက် ၇၁ နှစ်အရွယ်ရှိ ဦးကိုငယ်ဆိုသူဖြစ်ပြီး နို၀င်ဘာ ၁၅ ရက်ညနေပိုင်းမှာ လက်နက်ကိုင် လူ ၆ ဦးက သူ့နေအိမ်ကနေဖမ်းခေါ်သွားပြီး ရွာလယ်လမ်းပေါ်မှာပစ်သတ်ခဲ့တာလို့ ဆိုပါတယ်။
“PDF အမှတ်တံဆိပ်နဲ့ လူ ၆ ဦးအိမ်ကိုလာတယ်။ အိမ်ကမိသားစုတွေထံက ဖုန်း ၄ လုံးသိမ်းတယ်။ ပြီးတော့ ဘဘ ဦးကိုငယ်ကို ဆိုင်ကယ်နဲ့ညှပ်ခေါ်သွားပြီးမှ ရွာလယ်မှာဘဲ မျက်နှာကို တည်ပြီး ပစ်သတ်ခံရတယ်။ အချို့ကြားတာက သေနတ်သံနှစ်ချက်လို့ပြောတယ်”လို့ ဦးဘိုငယ်ရဲ့ တူဖြစ်သူ ကိုမြတ်အောင်က ပြောပါတယ်။
သေနတ်သံကြားပြီးနောက်ပိုင်း နာရီပိုင်းအကြာရွာခံတွေက သွားရောက်ထွက်ကြည့်ရာမှာ ဦးကိုငယ်မှာ မျက်နှာပွင့်ထွက်ဒဏ်ရာနဲ့ သေဆုံးနေတာကြောင့် ရွာခံတွေက အလောင်းကိုမကောက်ယူရဲဘဲ စောင်နဲ့အုပ်ထားခဲ့ရပြီး နိုဝင်ဘာ ၁၆ ရက် မနက် ၆ နာရီခန့်မှာ အလောင်းကို ဆွေမျိုးတွေနဲ့ ရွာခံတွေကကောက်ယူပြီး သင်္ဂြိုဟ်လိုက်ရတယ်လို့ သိရပါတယ်။
သေဆုံးသူ ဦးကိုငယ်က NLD အစိုးရလက်ထက်က ရွာ ရပ်မိရပ်ဖသဘောမျိုး ကျေးရွာလုပ်ငန်းတွေ ကူညီဆောင်ရွက်ပေးတာမျိုးရှိခဲ့ပြီး နောက်ပိုင်းမှာ သူပိုင်လယ်ယာစိုက်ခင်းလုပ်ငန်းတွေကိုသာ လုပ်ကိုင်နေသူဖြစ်တာလို့ ကိုမြတ်အောင်ဆီက သိရပါတယ်။
အဆိုပါပစ်ခတ်မှုနဲ့ပတ်သက်ပြီး ကံမနယ်မြေမှာစစ်ရေးလှုပ်ရှားနေတဲ့ သရက်ခရိုင်တပ်ရင်း ၄ ဆီ ဆက်သွယ်မေးမြန်းထားကာ ဒီဖြစ်စဥ်ကိုသူတို့အနေနဲ့မသိရှိဘဲ စစ်ရေးရှုပ်ထွေးနေတဲ့အတွက် သတင်းအတည်ပြုဖို့ခက်တယ်ဆိုကာ အကြောင်းပြန်လာတယ်လို့ ကိုမြတ်အောင်က ဆက်ပြောပါတယ်။
ဒီဖြစ်စဥ်နဲ့ပတ်သက်ပြီး ကံမနယ်မြေအတွင်းလှုပ်ရှားမှုရှိတဲ့ ဒေသခံကာကွယ်ရေးတပ်ဖွဲ့ဝင်တဦးကို မြေလတ်အသံက မေးမြန်းရာမှာတော့ ကံမမြို့နယ်ပကဖ၊ သရက်ခရိုင်တပ်ရင်း ၄ အပါအဝင် ဒေသကာကွယ်ရေးအဖွဲ့အများစုလှုပ်ရှားမှုတွေရှိတာကြောင့် ဘယ်အဖွဲ့အစည်းကပစ်ခတ်တယ်ဆိုတာ သီးခြားမသိရှိရသေးဘူးလို့ ဆိုပါတယ်။
ဒါ့အပြင် ဒီဖြစ်စဥ်နဲ့ပတ်သက်ပြီး ဒေသခံကာကွယ်ရေးတပ်ဖွဲ့တွေဘက်ကလည်း တစုံတရာထုတ်ပြန်လာတာ မရှိသေးပါဘူး။
နိုဝင်ဘာ ၆ ရက်ကလည်း သရက်မြို့နယ်၊ ပါးပွတ်ကျေးရွာအနီး သရက်-ကံမလမ်းပေါ်မှာ သရက်မြို့နေ ဦးခင်မောင်မြင့်နဲ့ ဦးကျော်လွင်တို့ ၂ ဦးလိုက်ပါလာတဲ့ကားကို လက်နက်ကိုင်အဖွဲ့တခုက မိုင်းဆွဲပြီးနောက် လိုက်ပါလာသူ ၂ ဦးကိုပစ်သတ်မီးရှို့ကာ ပါလာတဲ့ပိုက်ဆံတွေကိုပါ ယူဆောင်သွားတယ်လို့ သိရပါတယ်။
စာတည်း – လင်း
မြေလတ်အသံ၊ နိုဝင်ဘာ ၁၆၊ ၂၀၂၅။
မြေလတ်ဒေသကသတင်းတွေကို တင်ဆက်ပေးနေတဲ့ မြေလတ်အသံသတင်းဌာနရဲ့ တနေ့တာသတင်း စတဲ့သတင်းတွေကို တင်ဆက်ထားပါတယ်။
စတဲ့သတင်းတွေကို တင်ဆက်ထားပါတယ်။
မြေလတ်အသံ၊ နိုဝင်ဘာ ၁၅၊ ၂၀၂၅။
မြေလတ်ဒေသကသတင်းတွေကို တင်ဆက်ပေးနေတဲ့ မြေလတ်အသံသတင်းဌာနရဲ့ တနေ့တာသတင်း စတဲ့သတင်းတွေကို တင်ဆက်ထားပါတယ်။
စတဲ့သတင်းတွေကို တင်ဆက်ထားပါတယ်။
မြေလတ်အသံ၊ နိုဝင်ဘာ ၁၄၊ ၂၀၂၅။
မြေလတ်ဒေသကသတင်းတွေကို တင်ဆက်ပေးနေတဲ့ မြေလတ်အသံသတင်းဌာနရဲ့ တနေ့တာသတင်း စတဲ့သတင်းတွေကို တင်ဆက်ထားပါတယ်။
စတဲ့သတင်းတွေကို တင်ဆက်ထားပါတယ်။
ပွင့်ဖြူ၊ နိုဝင်ဘာ ၁၄၊ ၂၀၂၅။
မကွေးတိုင်း၊ မင်းဘူးခရိုင်၊ ပွင့်ဖြူနဲ့စကုမြို့နယ်တွေမှာ စစ်ကော်မရှင်တပ်ဖွဲ့ဝင်တွေက ပေါ်တာဆွဲဖမ်းဆီးတာတွေ ဆက်တိုက်လုပ်ဆောင်နေပြီး လူငယ် ၂၀ ကျော်ဖမ်းဆီးခံထားရတယ်လို့ ဒေသခံတွေဆီက သိရပါတယ်။
စကုမြို့နယ် လယ်ကိုင်းကျေးရွာလမ်းဆုံနဲ့ လယ်ကိုင်း-ကျောင်းတော်ရာအကြားလမ်းပိုင်းမှာ စစ်ကော်မရှင်ပူးပေါင်းတပ်တွေက ခရီးသွားကားတွေနဲ့ အနီးဝန်းကျင်ကျေးရွာတွေက လူငယ်တွေကို နိုဝင်ဘာလဒုတိယပတ်အတွင်း နေ့စဥ်ပေါ်တာဆွဲဖမ်းဆီးနေတာလို့ ဆိုပါတယ်။
” မနေ့ကလယ်ကိုင်းကနေ ကျောင်းတော်ရာသွားတဲ့နေရာမှာ (ခရီးသွားကားကို) ဆွဲတယ်။ ပါသွားတာက လူငယ် ၂ ဦးပါသွားတယ်။ ကားအမည်တော့ မသိလိုက်ဘူး ရိုးရိုးအရပ်ကားပါ။ အသက်အရွယ် ၁၈ နှစ်နဲ့ ၂၁ နှစ် အရွယ်တွေပါ၊ မနေ့ကမနက် ၁၀ နာရီလောက်မှာဆွဲတာ၊ နေ့တိုင်းလိုလိုဆွဲနေတာ” လို့ ပွင့်ဖြူမြို့ခံတဦးက မြေလတ်အသံကို ပြောပါတယ်။
အလားတူ ပွင့်ဖြူနဲ့ စလင်းမြို့အကြားက ရှောက်တောရွာအနီး မင်းဘူး – ပွင့်ဖြူ – စလင်းလမ်းပိုင်းမှာရှိတဲ့ မုန်းချောင်းတံတားထိပ်က စစ်ကော်မရှင်တပ်၊ ရဲနဲ့ ပျူစောထီးပူးပေါင်းတပ်ဖွဲ့တွေကလည်း ခရီးသွားကားတွေမှာပါလာတဲ့ လူငယ်တွေနဲ့ ဒေသခံလူငယ်တွေကို ပေါ်တာဆွဲဖမ်းဆီးနေတယ်လို့ သိရပါတယ်။
စစ်ကော်မရှင်တပ်ရဲ့ပေါ်တာဆွဲဖမ်းဆီးမှုတွေကြောင့် စကုမြို့နယ်ကျောင်းတော်ရာနဲ့ဝဲဒေါင့်ကျေးရွာတွေက အသက် ၁၈ ကနေ ၂၂ နှစ်ကြား လူငယ်အမျိုးသား ၁၅ ဦး၊ ပွင့်ဖြူမြို့နယ်မှာ အသက် ၂၅ ကနေ ၃၀ နှစ်အကြားရှိ လူငယ်မျိုးသားတွေဖြစ်တဲ့ အင်းနက်ရွာခံ ၁ ဦး၊ မုန်းဇလဲရွာခံ ၁ ဦး၊ တောင်အင်းရွာခံ ၁ ဦး၊ ရွာသစ်ရွာ ခံ ၁ ဦး၊ ခင်တဲရွာခံ ၁ ဦး၊ သူဌေးကုန်းရွာခံ ၃ ဦး စုစုပေါင်း ၈ ဦးအထိ ဖမ်းဆီးခံထားရတယ်လို့ သိရပါတယ်။
ဒါ့အပြင် ခရီးသွားကားတွေပေါ်ကလူငယ်တွေလည်း ဖမ်းဆီးခံထားရကာ အဲ့ဒီဖမ်းဆီးခံရမှုတွေကတော့ ခရီးသွားတွေဖြစ်တာကြောင့် ဖမ်းဆီးခံရသူတွေရဲ့ အခြေအနေတွေကို မသိရဘူးလို့ ဆိုပါတယ်။
နောက်ထပ် စကုမြို့ခံတဦးကတော့ ” စကုမြို့ နဲ့ ပွင့်ဖြူဘက်တွေမှာ အခု ၃ ရက်အတွင်း အဓမ္မစစ်မှုထမ်း တော်တော်ဆွဲခံရပါတယ်။ Honda Fit အနက်ရောင် YGN 1K/1815 နဲ့ ပတ်ဆွဲနေတာပါ” လို့ ပြောပါတယ်။
လက်ရှိမှာ ပေါ်တာဆွဲဖမ်းဆီးသွားသူတွေကို မင်းဘူးမြို့အခြေစိုက်စစ်ကော်မရှင်တပ်ရင်းတွေဆီ ပို့ဆောင်ထားပြီး အဲ့ဒီကတဆင့် မကွေးမြို့ အမှတ် ၃ စစ်သားစုဆောင်းရေးတပ်ကို ပို့ဆောင်လေ့ရှိတယ်လို့ သိရပါတယ်။
နိုဝင်ဘာလပထမပတ်အတွင်း မကွေးတိုင်းအပါမြို့ကြီးအများအပြားမှာ စစ်ကော်မရှင်ဦးဆောင်ပြီး တန်ဆောင်တိုင်ပွဲတွေပြုလုပ်ခဲ့ရာ အဲ့ဒီကာလတွေမှာ ပေါ် တာဆွဲဖမ်းဆီးတာတွေ ယာယီရပ်နားခဲ့ပြီးတဲ့နောက် ဒုတိယအပတ်ကစတင်ကာ မကွေးတိုင်းက မြို့နယ်တွေမှာ အခုလို ဖမ်းဆီးမှုတွေပြန်လည်မြင့်တက်လာတာလည်း ဖြစ်ပါတယ်။
စာတည်း – ဟိန်းစံ