ဗုံး

စလင်း၊ အောက်တိုဘာ ၂၈၊ ၂၀၂၅။

မကွေးတိုင်း၊ မင်းဘူးခရိုင်၊ စလင်းမြို့ပေါ် မှာ ဒရုန်းနဲ့ဗုံးချခံရပြီး လူနေအိမ်နဲ့စာသင်ကျောင်းအဆောက်အဦတချို့ ထိခိုက်ပျက်စီးမှုရှိတယ်လို့ မြို့ခံတွေထံက သိရပါတယ်။

အောက်တိုဘာ ၂၇ ရက် ယမန်နေ့ နေ့လယ် ၂ နာရီခန့်မှာ ပေါင်းနားရပ်ကွက်၊ ပြန်ဆက်ရုံးအနီး နေအိမ်ပေါ်ကို ဒရုန်းဗုံးသီး ၂ လုံး၊ အောက်တိုဘာ ၂၈ ရက် ဒီကနေ့မနက် ၇ နာရီခန့်မှာ မြင်တင်ရပ်ကွက်ရှိ စလင်းအထက ၁ ကျောင်းဝင်းအတွင်းကို ဒရုန်းဗုံးသီး ၅ လုံးကျရောက်ပေါက်ကွဲခဲ့တာတယ်လို့ ဆိုပါတယ်။

” ဘာကြောင့်ချမှန်းမသိဘူး ဒရုန်းနဲ့လာချတာ။ ဗုံးကပေါက်တယ် လူမထိတာ။ အိမ်ကတော့ ၁ လုံးပျက်စီးတယ်။ ဒီမနက်လည်း ကျောင်းထဲကို ၅ လုံးလောက်ကျတယ်။ ကျောင်းကဖွင့်တယ်။ ကလေးတွေမရောက်တဲ့အချိန်ကျတာ “ လို့ စလင်းမြို့ခံတဦးက မြေလတ်အသံကို ပြောပါတယ်။

ဒရုန်းဗုံးတွေကျရောက်ပေါက်ကွဲတာကြောင့် လူနေအိမ် ၁ လုံး၊ စာသင်ဆောင်တချို့အုတ်နံရံနဲ့ အမိုးတွေထိခိုက်ပျက်စီးမှုရှိခဲ့တယ်လို့ မြို့ခံတွေထံကသိရပါတယ်။

စစ်ကော်မရှင်ကို ထောက်ခံရေးသားနေတဲ့ တယ်လီဂရမ်ချန်နယ်တွေမှာ စလင်းမြို့ပေါ်လူနေရပ်ကွက်တွေအတွင်း PDF တွေက ရှော့တိုက်ဒုံးနဲ့ပစ်ခတ်လို့ နေအိမ်တွေထိခိုက်ပျက်စီးခဲ့တယ်လို့ စွပ်စွဲဖော်ပြထားပါတယ်။

ဒီကနေ့မနက်ပိုင်း စာသင်ကျောင်းအတွင်း ဒရုန်းဗုံးသီးတွေကျရောက်ပေါက်ကွဲပြီးနောက် ကျောင်းကို ယာယီပိတ်ထားရတယ်လို့ သိရပါတယ်။

စစ်ကော်မရှင်တပ်ဖွဲ့က စလင်းမြို့မရဲစခန်း၊ မြို့တောင်ဘက်ရှိဘောလုံးကွင်းအနီး၊ ကံပြားရွာအထွက် စလင်း-စေတုတ္တရာလမ်းပိုင်း ကန်လယ်အနီး၊ ဆင်ဖြူကျွန်းမြို့ဘက်အထွက် စက်သုံးဆီဆိုင်တွေအနီးမှာ တပ်စွဲထားပြီး ၂၀၂၄ ဩဂုတ်လအတွင်းမှာ စလင်းမြို့မရဲစခန်းဒရုန်းဗုံးချတိုက်ခိုက်ခံရလို့ ရဲစခန်းမှူးအပါ ရဲ ၅ ဦးဒဏ်ရာရခဲ့တယ်လို့ သိရပါတယ်။

စာတည်း – ဟိန်းစံ

မကွေး၊ ဧပြီ ၄၊ ၂၀၂၃။

မကွေးတိုင်းဒေသကြီး၊ ပခုက္ကူမြို့၊ အမှတ်(၃)ရပ်ကွက်၊ အောင်သပြေကွက်သစ် ၁ လမ်းမှာ ဗုံးလုပ်ရင်း မတော်တဆဖြစ်လို့ သားအဖ ၂ ဦး သေဆုံးသွားတယ်လို့ သိရပါတယ်။

ဧပြီလ ၃ ရက်နေ့ ည ၉ နာရီကျော်ခန့်မှာ အာကြီးကွမ်းယာဆိုင်နေအိမ် နောက်ဖေးမှာ ပေါက်ကွဲမှုဖြစ်ခဲ့ပြီး သားအဖ ၂ ဦးသေဆုံးသွားတယ်လို့ ဒေသခံတဦးက ပြောပါတယ်။

“သိရသလောက်က သူတို့ကကွမ်းယာရောင်းတယ်။ မနေ့ညကတော့ သူတို့ သားအဖ ၂ ယောက်က အိမ်နောက်ဖေးမှာ ဗုံးဆင်နေရင်းကနေ မတော်တဆဖြစ်ပြီး ပေါက်ကွဲမှုဖြစ်တာ။ သူတို့အလုပ်ကတော့ ကွမ်းယာရောင်းတာပဲ။ ဒါပေမယ့် နောက်ကွယ်မှာ ဘာတွေလုပ်လဲဆိုတာတော့ မသိရဘူး” လို့ ပြောပါတယ်။

ဗုံးပေါက်ကွဲတာကြောင့် ရာဇာဖြိုး (ခ) အာကြီး ၃၇ နှစ်နဲ့သားဖြစ်သူ ကျော်ဇင်ထွဋ် ၁၄ နှစ်တို့မှာ ပေါက်ကွဲစတွေ ထိမှန်ပြီး နေရာမှာဘဲ သေဆုံးသွားတယ်လို့ ဆိုပါတယ်။

ပေါက်ကွဲမှုဖြစ်ပြီးနောက်မှာ စစ်ကောင်စီတပ်ဖွဲ့တွေ ရောက်လာပြီး စစ်ဆေးမှုပြုလုပ်ကာ အလောင်းတွေကို ပခုက္ကူဆေးရုံကို သယ်သွားတယ်လို့ သိရပါတယ်။

ဒါ့အပြင် စစ်ကောင်စီအဖွဲ့ဝင်တွေဟာ ကိုရာဇာဖြိုးရဲ့မိသားစုဝင် ၂ ယောက်ကိုပါ ပခုက္ကူ ရဲစခန်းဘက်ကို ဖမ်းခေါ်သွားပါတယ်။

ပခုက္ကူမြို့မှာ ယခုလို ဗုံးလုပ်ရင်းမတော်တဆမှုကြောင့် လူသေဆုံးမှုဟာ ပထမဆုံးအကြိမ် ဖြစ်တယ်လို့ သိရပါတယ်။

စာတည်း – 007

ပဲခူး၊ ဇန်နဝါရီ ၂၇၊ ၂၀၂၃။

ပဲခူးတိုင်း၊ ဖြူးမြို့နယ်၊ ကညွတ်ကွင်းဒေသ၊ ရွာမကြီးရွာအနောက်ဖက်က လမင်းသာတံတားနားမှာ မိုင်းတလုံးကွဲပြီး နွားကျောင်းနေတဲ့ အမျိုးသားတဦးကိုထိမှန်ခဲ့တာကြောင့် အခြေနေကစိုးရိမ်ရတယ်လို့ သိရပါတယ်။

ဇန်နဝါရီလ ၂၆ ရက်မနေ့ကနေ့လယ် ၂ နာရီခွဲလောက်မှာ စစ်ကောင်စီစစ်ကားတွေက အဆိုပါလမ်းကဖြတ်သွားပြီး မကြာခင်မှာ မိုင်းကွဲခဲ့တာဖြစ်တယ်လို့ ဒေသခံအမျိုးသားတဦးက ပြောပါတယ်။

“သူက နွားကျောင်းရင်းတံတားအနီးမှာ ကီးပတ်ဖုန်းကိုတွေ့လို့ ကောက်ယူချိန်မိုင်းကွဲတာပါ၊ စိုးရိမ်ရတဲ့ အခြေအနေပါ၊ ဖုန်းကိုအရောင်ပြပြီး အောက်မှာမိုင်းထောင်ထားတာ၊ ဒီဒေသမှာက စစ်**တွေပဲလှုပ်ရှားလာတာပါ၊ ကျနော်တို့ဘက်ကလူတွေက ပြည်သူဒုက္ခဖြစ်စေတဲ့လုပ်ရပ်တွေကို မလုပ်ပါဘူး”လို့ ပြောပါတယ်။

မိုင်းထိမှန်လို့ အသက် ၃၅ နှစ်အရွယ် ရွာမကြီးရွာသား ကိုပေါက်ခေါဆိုသူ ရင်ဘတ်နဲ့ မျက်လုံးကို မိုင်းထိမှန်ကာ တောင်ငူဆေးရုံကို အရေးပေါ်တင်ထားရပြီး၊ သူတို့အိမ်ကစီးပွားရေးမပြေလည်တဲ့အတွက် ရွာထဲကို အလှူငွေကောက်ပြီး ဆေးရုံပို့ပေးထားရတာဖြစ်တယ်လို့ ဆိုပါတယ်။

နယ်ခံတွေကတော့ အဆိုပါမိုင်းဟာ စစ်ကောင်စီဘက်ကထောင်ခဲ့တဲ့ မိုင်းဖြစ်တယ်လို့ ပြောဆိုနေကြပြီး မြေလတ်အသံအနေနဲ့တော့ ဘယ်အဖွဲ့စည်းကထောင်ခဲ့တဲ့ မိုင်းဖြစ်တယ်ဆိုတာ စုံစမ်းနေဆဲဖြစ်ပါတယ်။

ပြီးခဲ့တဲ့ ၂၀၂၂ ခုနှစ်ထဲမှာလည်း ရွာမကြီးရွာရဲ့တရွာကျော်က သစ်ပတ်တံတားအနီးမှာ အသက် ၅၆ နှစ်အရွယ် ဒေါ်စန်းမြင့်ဆိုသူဟာ လယ်တောထဲထမင်းသွားပို့ချိန် စစ်ကောင်စီဘက်က ထောင်ထားတဲ့မိုင်းကို နင်းမိပြီး အူပွင့်သေဆုံးခဲ့တဲ့ဖြစ်ရပ်လည်း ရှိခဲ့ပါသေးတယ်။

ပဲခူး၊ ဇွန် ၉၊ ၂၀၂၂။

မကွေးတိုင်း၊ သရက်ခရိုင်၊ အောင်လံမြို့နယ်၊ အမှတ် ၂ အခြေခံပညာအထက်တန်းကျောင်း (အထက-၂) ကျောင်းဝန်းအတွင်းမှာ ဇွန်လ ၉ ရက် ဒီကနေ့မနက်ပိုင်းက မပေါက်ကွဲသေးတဲ့ ဗုံးတလုံးတွေ့ရှိခဲ့တယ်လို့ ဒေသခံတွေဆီက သိရပါတယ်။

အောင်လံမြို့၊ ဘိုကုန်းရပ်ကွက်မှာရှိတဲ့ အ.ထ.က ၂ စာသင်ကျောင်းမှာ မနက် ၁၀ နာရီလောက်က မပေါက်ကွဲသေးတဲ့ဗုံးကိုတွေ့ရှိခဲ့ပြီး၊ မြို့နယ်စစ်ကောင်စီက ဖုံးဖိထားခဲ့လို့ စာသင်ကျောင်းရှေ့မှာ လူစုလူဝေး ဖြစ်ပေါ်ခဲ့တယ်လို့ ဆိုပါတယ်။

“စာသင်ကျောင်းထဲ ဗုံးတွေ့တယ်ဆိုတာ ရပ်ကွက်က လူတွေကတဆင့်တဆင့်ကြားပြီး သူတို့ကလေးတွေရှိတော့စိတ်ပူပြီး ကျောင်းရှေ့ကိုသွားကြတာ။ ကျောင်းရှေ့ရောက်တော့ ဗုံးမဟုတ်ဘူ ဘာညာနဲ့ စစ်ကောင်စီကလူတွေနဲ့ ကျောင်းကလူတွေပြောတာ။ ရပ်ကွက်ကတော့ မကျေနပ်ဘူး။ ကျောင်းရှေ့မှာရုတ် ရုတ်သဲသဲတွေတော့ဖြစ်သွားသေးတယ်” လို့ မြို့ခံတဦးက မြေလတ်အသံကို ပြောပါတယ်။

အဲ့ဒီလိုဖြစ်ပွားပြီးတဲ့နောက် ဒီကနေ့နေ့လည်ပိုင်းမှာတော့ ကျောင်းသားမိဘတွေက ကျောင်းကိုမလွှတ်တော့လို့ ကျောင်းတက်ရောက်သူ မရှိသလောက် နည်းပါးသွားတယ်လို့ သူကဆက်ပြောပါတယ်။

အောင်လံမြို့မှာ အထက်တန်းကျောင်း ၃ ကျောင်းအပါအဝင် အခြေခံပညာကျောင်းအများအပြားရှိတာဖြစ်ပြီးတော့ ကျောင်းစဖွင့်တဲ့ ဇွန်လပထမအပတ် ၂ ရက် ၃ ရက်သာ စစ်ကောင်စီက အထက် တန်းကျောင်းတွေကို လုံခြုံရေးစောင့်ပေးပြီး ဒုတိယအပတ်ကစလို့ စာသင်ကျောင်းတွေမှာ လုံခြုံရေး စောင့်ပေးတာမျိုးမရှိတော့ဘူးလို့ ဒေသခံတွေက ပြောပါတယ်။