ဗုံးကြဲ

မြေလတ်အသံ၊ ဇန်နဝါရီ ၈၊၂၀၂၆။

စစ်ကိုင်းနဲ့မကွေးတိုင်းက မြို့နယ် ၃ ခုမှာ လေယာဥ်နဲ့ဗုံးကြဲတိုက်ခိုက်ခံရလို့ စစ်ဘေးရှောင်ဒေသခံ ၅ ဦး သေဆုံးခဲ့တယ်လို့ ဒေသခံတွေထံက သိရပါတယ်။

ဇန်နဝါရီ ၇ ရက် ယမန်နေ့ နေ့လယ် ၂ နာရီကျော်မှာ ရွှေဘိုမြို့နယ်အနောက်ခြမ်း ရွာဆိုးရွာနဲ့ မြို့လှရွာအကြားရှိ စစ်ဘေးရှောင်တွေနေထိုင်ရာ တဲဆောင်တွေကို တိုက်ခိုက်ရေးလေယာဥ် ၂ စီးနဲ့ ဗုံးကြဲတိုက်ခိုက်ခဲ့တာပါ။

“ဗုံးကြဲတာက စစ်ရှောင်တွေရဲ့တဲတိုက်တွေကို တည့်တည့်ကျတာပါ။ သေဆုံးသူက ၄ ယောက်လို့ အတည်ပြုပါတယ်။ ဖိုက်တာနဲ့ ၂ကြိမ်တောင် ကြဲသွားတာ။ ဘာတိုက်ပွဲမှကို မရှိတာဗျ။ တဲက အလုံး ၁၀ လောက် မီးလောင်ကျွမ်းသွားတယ်”လို့ ရွှေဘိုဒေသခံအမျိုးသားတဦးက မြေလတ်အသံကို ပြောပါတယ်။

ဗုံးကြဲခံရမှုကြောင့် စစ်ရှောင်တဲတိုက်တွေမှာနေထိုင်နေတဲ့ စဉ့်ကူးနဲ့သပိတ်ကျင်းမြို့နယ်တွေကနေ စစ်ရှောင်လာရောက်သူ အသက် ၃၀ ဝန်းကျင် အမျိုးသမီး၂ ဦးနဲ့ အသက် ၄၀ ကျော် အမျိုးသား ၂ ဦး သေဆုံးခဲ့တယ်လို့ သိရပါတယ်။

အလားတူ မကွေးတိုင်း၊ မြိုင်မြို့နယ်၊ ကြက်မောက်ကျေးရွာတွေကို စစ်ကော်မရှင်တပ်က လေ​ယာဥ်တွေနဲ့ ဗုံးကြဲတိုက်ခိုက်ခဲ့လို့ အသက်မပြည်သေးတဲ့ အမျိုးသမီး ၁ဦးသေဆုံးပြီး ၆ ဦးဒဏ်ရာရရှိခဲ့တယ်လို့ သိရပါတယ်။

ဇန်နဝါရီ ၆ ရက် ည ၉ နာရီကျော်မှာ ကြက်မောက်ကျေးရွာကို တိုက်လေယာဥ်နဲ့ ဗုံး ၁ လုံးကြဲချခဲ့တာဖြစ်ပြီး ကျေးရွာတွင်း နေအိမ်တွေပေါ်ကျရောက်ပေါက်ကွဲကာ အသက် ၁၆ နှစ်အရွယ် မိန်းကလေး ၁ ဦးသေဆုံးခဲ့တာလို့ မြိုင်ဒေသခံတဦးက ပြောပါတယ်။

အလားတူ ဇန်နဝါရီ ၇ ရက်ညနေ ၆ နာရီကျော်မှာ ဂန့်ဂေါမြို့နယ်၊ မြင်းဇာကျေးရွာဘုန်းကြီးကျောင်းကို တိုက်ခိုက်ရေးလေယာဥ်နဲ့ ဗုံး၂ လုံးကြဲချခဲ့လို့ သံဃာ ၂ ပါး ဒဏ်ရာရရှိခဲ့တယ်လို့ ဂန့်ဂေါဒေသခံတဦးထံက သိရပါတယ်။

“(မြင်းဇာရွာ) ဗုံးကြဲတာက ရွာထဲတော့ အခုက ပထမဦးဆုံးအကြိမ်ပါ။ ရွာနားတွေတော့ အရင်နှစ်တွေက ၁ ကြိမ် ရှိခဲ့ဖူးပါတယ်။ တော်လှန်ရေးအင်အားစုတွေ ခိုလှုံနိုင်တယ်လို့ ယူဆပုံရတယ်။ တကယ်က အဲ့ရွာမှာ မနေဘူး။ မရှိဘူး။ ဒဏ်ရာရတဲ့ ဘုန်းကြီး ၁ ပါးနဲ့ ကိုရင် ၁ ပါးတော့ မစိုးရိမ်ရ” လို့ ဂန့်ဂေါဒေသခံအမျိုး သားတဦးက ပြောပါတယ်။

ဗုံးကြဲတိုက်ခိုက်မှုအတွင်း ဘုန်းကြီးကျောင်းဝန်းအတွင်းရှိ ကျောင်းဆောင်တချို့၊ မီးစက်ရုံ၊ ရေအိုးစင်တို့ မီးလောင်ပျက်စီးခဲ့တယ်လို့ သိရပါတယ်။

မြေလတ်အသံ၊ ဇန်နဝါရီ ၆၊ ၂၀၂၅။

စစ်ကိုင်းတိုင်းနဲ့ မကွေးတိုင်းအတွင်းက မြို့နယ် ၄ ခုကို ဇန်နဝါရီပထမပတ်အတွင်း စစ်ကော်မရှင်တပ်က လေကြောင်းကနေ ဗုံးကြဲတိုက်ခိုက်ခဲ့တာကြောင့် သံဃာ ၁ ပါးအပါအဝင် ၅ ဦးသေဆုံးပြီး ထိခိုက်ပျက်စီးမှုတွေရှိခဲ့တယ်လို့ ဒေသခံတွေဆီက သိရပါတယ်။

စစ်ကိုင်းတိုင်းအတွင်းက ခင်ဦးမြို့နယ်၊ မြောင်မြို့နယ်နဲ့ မကွေးတိုင်းအတွင်းက ဂန့်ဂေါမြို့နယ်၊ ဆောမြို့နယ်တို့ကို ဇန်နဝါရီ ၄ ရက်ကနေ ၆ ရက်အထိ ဗုံးကြဲတိုက်ခိုက်ခဲ့တာပါ။

မကွေးတိုင်းထဲက ဂန့်ဂေါမြို့နယ်နဲ့ ဆောမြို့နယ်၊ ကျောက်ထုမြို့ မြောက်ဘက်တို့ကို စစ်ကော်မရှင်တပ်က ၃ ရက်ဆက်တိုက် ဗုံးကြဲ တိုက်ခိုက်ခဲ့တာကြောင့် သံဃာ ၁ ပါးပျံလွန်တော်မှုပြီး စပါးတင်း ၆၀၀ ကျော်ပျက်စီးခဲ့တယ်လို့ ဒေသခံတွေက ပြောပါတယ်။

တိုက်ပွဲဖြစ်တာမရှိဘဲ ဇန်နဝါရီ ၄ ရက်မနက် ၉ နာရီကျော်မှာ ဂန့်ဂေါမြို့နယ်၊ တောင်ခင်ရန်းရွာ ဘုန်းကြီးကျောင်းဝန်းထဲကို တိုက်ခိုက်ရေးလေယာဥ် ၁ စီးနဲ့ ဗုံးကြဲတိုက်ခိုက်ခဲ့ရာ သံဃာ ၁ ပါး ပျံလွန်တော်မူခဲ့တယ်လို့ ဆိုပါတယ်။

“တောင်ခင်ရန်းရွာ ဘုန်းကြီးကျောင်း ပုန်းခိုကျင်းထဲမှာ ဝင်ပုန်းနေတဲ့ ကိုရင်ကြီး ၁ ပါး နှလုံးရပ်ကာ ပျံတော်မူသွားတာပါ။ ကျောင်းဆောင်တွေလည်း ပျက်စီးခဲ့တယ်” လို့ ဂန့်ဂေါဒေသခံ အမျိုးသားတဦးကပြောပါတယ်။

ဇန်နဝါရီ ၅ ရက်မနက် ၁ နာရီကျော်မှာ အထက်ပါတောင်ခင်ရန်းရွာကိုပဲ တပ်မံဗုံးကြဲတိုက်ခိုက်ခဲ့တာကြောင့် လူနေအိမ်တွေနဲ့ စပါးတိုက် ၂ လုံးပျက်စီးခဲ့တယ်လို့ ဆိုပါတယ်။

ဒါ့အပြင် ဇန်နဝါရီ ၆ ရက် ဒီမနက်ပိုင်းမှာလည်း ဆောမြို့နယ်၊ ကျောက်ထုမြို့မြောက်ဘက်ရှိ ရွာတွေဘက်ကို ထောက်ပို့လေယာဥ် Y-12 နဲ့ ဗုံးအလုံးရေဆယ်ချီ ကြဲချတိုက်ခိုက်ခဲ့ပြီး ဒီတိုက်ခိုက်မှုအတွင်း လူအထိခိုက်မရှိခဲ့ဘူးလို့ ဂန့်ဂေါဒေသခံအမျိုးသားတဦးက ပြောပါတယ်။

စစ်ကော်မရှင်တပ်က ယောဒေသကို နေ့စဥ်ဆိုသလို လေယာဥ်တွေနဲ့ ဗုံကြဲတိုက်ခိုက်နေတာကြောင့် ဒေသခံပြည်သူတွေအနေနဲ့ ဗုံးခိုကျင်းတွေကို တူးဖော်ထားပြီး လေကြောင်းအန္တရာယ်သတိပေးထားချက်တွေကို အထူးဂရုပြုလိုက်နာကြဖို့ ဒေသခံတော်လှန်ရေးအဖွဲ့တွေက သတိပေးထားတယ်လို့ ဒေသခံတွေဆီက သိရပါတယ်။

စစ်ကိုင်းတိုင်း၊ ခင်ဦးမြို့နယ်၊ ကုန်းကြီးကျေးရွာအပြင်ဘက် စစ်ရှောင်တွေနေတဲ့နေရာကိုလည်း ဇန်နဝါရီ ၅ ရက်ည ၈ နာရီကျော်မှာ ဂျက်ဖိုက်တာနဲ့ ဗုံး ၁ လုံးကြဲခဲ့တာကြောင့် အသက် ၃၀ အရွယ်နို့တိုက်မိခင် ၁ ဦးနဲ့ အမျိုးသား ၂ ဦးသေဆုံးခဲ့တယ်လို့ ခင်ဦးမြို့နယ်ပကတာဝန်ခံက ပြောပါတယ်။

“လမ်းဘေးတွေမှာ စစ်ရှောင်နေရင်း စျေးဆိုင်ရောင်းနေတဲ့တဲပေါ်ကို ကျတာ။ စစ်ရှောင်ယာယီတဲ။ မိုးကာတွေနဲ့နေတဲ့တဲ။ မိသားစု ၃ ဦးက ပျက်စီး(သေတယ်)။ ဒဏ်ရာရများတယ်။ “လို့ ခင်ဦးမြို့နယ် ပကဖတာဝန်ခံက ပြောပါတယ်။

တဆက်တည်းမှာပဲ တဲအနီးဝန်းကျင်နေ အခြားစစ်ဘေးရှောင် ကလေးငယ် ၁ ဦးအပါအဝင် ၁၀ ဦးထက်မနည်းထိခိုက်ဒဏ်ရာရပြီး ညတွင်းချင်းနီးစပ်ရာ ဆေးပေးခန်းတွေကိုရွှေ့ပြောင်းပြီး ဆေးကုသပေးနေရတယ်လို့ ဆိုပါတယ်။

ကုန်းကြီးကျေးရွာဝန်းကျင်မှာ စစ်ဘေးရှောင်နေသူ ၂၀၀ ခန့်ရှိပြီး ထိခိုက်သေဆုံးသူတွေကတော့ မတ္တရာနဲ့ စဉ့်ကူးမြို့နယ်ဘက်ကနေ စစ်လာရှောင်နေသူတွေဖြစ်ကာ ဗုံးကြဲပြီးနောက် ဒေသခံရော စစ်ရှောင်တွေပါ ဘေးလွတ်ရာကို တိမ်းရှောင်နေကြရတယ်လို့ သိရပါတယ်။

အလားတူ မြောင်မြို့နယ်၊ နဘတ်ရွာကိုလည်း ဇန်နဝါရီ ၅ ရက်နေ့လယ် ၁၂ နာရီဝန်းကျင်မှာ ပါရာမော်တာနဲ့ ဗုံးကြဲခဲ့တာကြောင့် အသက် ၃၀ အရွယ်အမျိုးသမီး ၁ ဦးနဲ့ အသက် ၆၀ အရွယ် အမျိုးသား ၁ ဦးသေဆုံးခဲ့တယ်လို့ မြောင်မြို့ခံတွေဆီက သိရပါတယ်။

“တိုက်ပွဲရှိလို့ ကြဲတာမဟုတ်ဘူး၊ ဒီအတိုင်းသက်သက်မဲ့ လာကြဲတာ၊ ၂ ဦးသေသွားတယ်၊ ပါရာမော်တာနဲ့ ၂ လုံးကြဲချတာ၊ ၁ လုံးက မကွဲဘူး၊ နဘတ်ရွာကို ကြဲချတာ၊ မုံရွာ နမခ ကနေ ၃ စီးလာတာ၊ ၁ စီးက ကြဲချတာ၊ အမျိုးသမီး ၁ ဦးသေတယ်၊ အသက်ကြီးပိုင်း အမျိုးသား ၁ ဦးသေတယ်။” လို့ မြောင်မြို့ခံတဦးက ပြောပါတယ်။

အိမ်ခြေ ၄,၀၀၀ နဲ့ လူဦးရေ ၁၂,၀၀၀ ကျော်ရှိတဲ့ နဘတ်ရွာဒေသခံတွေကတော့ လေကြောင်းတိုက်ခိုက်ခံရပြီးနောက် တောထဲကိုထွက်ပြေးတိမ်းရှောင်နေကြတယ်လို့ ဆိုပါတယ်။

၂၀၂၁ စစ်အာဏာသိမ်းချိန်ကနေ ၂၀၂၆ ဇန်နဝါရီ ၅ ရက်အထိ စစ်ကော်မရှင်နဲ့ ၎င်းတို့ရဲ့လက်အောက်ခံအဖွဲ့အစည်းတွေကြောင့် သေဆုံးခဲ့တဲ့ဒေသခံစုစုပေါင်း ၇,၆၄၆ ဦးရှိပြီလို့ နိုင်ငံရေးအကျဥ်းသားများကူညီစောင့်ရှောက်ရေးအသင်း – AAPP ရဲ့အစီရင်ခံစာရ သိရပါတယ်။

မြေလတ်အသံ၊ ဇန်နဝါရီ ၃၊ ၂၀၂၅။

စစ်ကိုင်းတိုင်း၊ ဝက်လက်မြို့နယ်ကရွာတွေကို စစ်ကော်မရှင်တပ်က ၁ လအတွင်း လေကြောင်းကနေ ဗုံးကြဲတိုက်ခိုက်ခဲ့ရာ ကလေးတွေအပါအဝင် အမျိုးသမီး၊ အမျိုးသား ၂၆ ဦး သေဆုံးခဲ့ပြီး ၄၀ ကျော်ဒဏ်ရာရရှိခဲ့တယ်လို့ ဒေသတွင်းအခြေအနေတွေကိုဖော်ပြနေတဲ့ Wetlet Informational Network က ဇန်နဝါရီ ၁ ရက်မှာ ထုတ်ပြန်ထားပါတယ်။

ဒီစာရင်းဟာ ဒီဇင်ဘာ ၂ ရက်ကနေ ၃၁ ရက်အထိ ကျေးရွာ ၁၄ ရွာထက်မနည်းကို စစ်ကော်မရှင်တပ်က ဗုံးကြဲတိုက်ခိုက်ခဲ့ရာမှာ သေဆုံး၊ ဒဏ်ရာရသူအရေအတွက်ကို စုစည်းထားတာလို့ ဆိုပါတယ်။

ဒီဗုံးကြဲတိုက်ခိုက်မှုအတွင်း သေဆုံးသူ ၂၆ ဦးမှာ နတ်မှော်ဦးရွာက ၅ ဦး၊ ထုံးကြီးရွာက ၄ ဦး၊ ဆည်တောရွာက ၅ ဦး၊ ငါးပတ်ချောင်းရွာမှ ၇ ဦး၊ လိင်ပင်ရွာက ၃ ဦး၊ သစ်ဆိမ့်ရွာက ၂ ဦး တို့ဖြစ်ကြပါတယ်။

“စ**တွေဖက်က ဝက်လက်နယ်ကို PDF တွေမထိန်းချုပ်နိုင်ဖို့နဲ့ သူတို့ထိန်းချုပ်နိုင်ဖို့အတွက် အခုလိုဗုံးကြဲတာ လို့ယူဆပါတယ်။ ကြဲတာက တိုက်ပွဲမရှိတဲ့နေရာတွေပဲ အကြဲခံရတာ။ ပြည်သူတွေအနေနဲ့ ဗုံးခိုကျင်းတွေတူးဖို့နဲ့ လေကြောင်းသတိ အမြဲမပြတ်ရှိနေဖို့လိုတယ်”လို့ ဝက်လက်ဒေသခံ တော်လှန်ရေးတပ်ဖွဲ့ဝင်တဦးက ပြောပါတယ်။

သေဆုံးသူတွေဟာ အမျိုးသမီး ၁၅ ဦးနဲ့ အမျိုးသား ၁၁ ဦးဖြစ်ပြီး အဲဒီထဲမှာ အသက် ၂ နှစ်နဲ့ ၄ နှစ်ကလေးငယ် ၃ ဦး၊ အသက် ၈၀ အရွယ်အမျိုးသား ၁ ဦးနဲ့ ၇၀ အရွယ်အမျိုးသမီး ၁ ဦးတို့ ပါဝင်ကြပါတယ်။

စစ်ကော်မရှင်တပ်က လေကြောင်းတိုက်ခိုက်တာနဲ့ မြေပြင်ကနေပါစစ်ကြောင်းထိုးနေတာကြောင့် ဒေသခံတွေလည်း ဘေးလွတ်ရာကို ထွက်ပြေးတိမ်းရှောင်နေကြရပါတယ်။

လက်ရှိအချိန်ထိ ဝက်လက်မြို့နယ်ကို ဝင်ရောက်နေတဲ့စစ်ကြောင်းကြောင့် ထုံးဘို၊ ရှားကွဲ၊ ရေဂမိုး၊ ရွာသစ်၊ လှေပို့ဆိပ်၊ သစ်ဆိပ့်၊ ကူကြီး၊ ငါးပတ်ချောင်း၊ သရက်ပင်ရွာ၊ ရေလည်မော်၊ မှော်ဦး၊ ကမ်းဖြူ၊ ရွာသာ၊ မင်းရွာတောင်၊ အင်ဒေါင်း၊ ရှိမ်းမကား၊ ငါးရယ်၊ ဆည်တော၊ ငါးတိုက်တောင်စတဲ့ ကျေးရွာတွေက ဒေသခံတွေထွက်ပြေးတိမ်းရှောင်နေကြရတယ်လို့ သိရပါတယ်။

စာတည်း – လင်း

မြေလတ်အသံ၊ ဇန်နဝါရီ ၃၊ ၂၀၂၅။

စစ်ကိုင်းတိုင်း၊ ကန့်ဘလူမြို့နယ်၊ မဲသည်ကျေးရွာနဲ့ မုံရွာမြို့နယ်၊ ညောင်ပင်ကျေးရွာမှာ စစ်ကော်မရှင်တပ်က လေကြောင်းကနေ ဗုံးကြဲတိုက်ခိုက်ခဲ့တာကြောင့် ကလေး ၃ ဦးအပါ ၅ ဦးသေဆုံးခဲ့တယ်လို့ ကျေးရွာနဲ့ နီးစပ်သူတွေနဲ့ မုံရွာမြို့နယ်ပကဖတာဝန်ရှိသူတွေထံက သိရပါတယ်။

ဇန်နဝါရီ ၂ ရက်ည ၁၀ နာရီခန့်မှာ စစ်ကော်မရှင်ဘက်က ဂျက်ဖိုက်တာ ၁ စီးနဲ့ ကျေးရွာထဲကို ပေါင် ၃၀၀ ဗုံး ၁ လုံးကြဲချခဲ့တာလို့ ဆိုပါတယ်။

“ဘာမှမဟုတ်ဘဲနဲ့ တိုက်ပွဲဖြစ်ချင်းမရှိဘဲ လာချသွားတာ။ ဗုံးက ရွာလယ်ခေါင်အိမ်ပေါ်တည့်တည့်ကျတာ အိမ်ကိုရှာမရတော့ဘူး။ သေဆုံးတာ မိသားစု ၃ ဦးပါတယ်။”လို့ ကျေးရွာနဲ့နီးစပ်သူတဦးက ပြောပါတယ်။

ဗုံးပေါက်ကွဲမှုကြောင့် အသက် ၃၅ ဝန်းကျင် ကိုမင်းဌေး၊ ဇနီးဖြစ်သူ မဖြူသီနဲ့ သားဖြစ်သူ အသက် ၇ နှစ်ဝန်းကျင် မောင်ပိုင်ဇေတို့ နေရာတင်သေဆုံးခဲ့တယ်လို့ ဆိုပါတယ်။

ဒါ့အပြင် အနီးဝန်းကျင်နေအိမ်တွေက အသက် ၁၈ နှစ်ကနေ ၅၀ ကြားရှိ ကိုအောင်မင်းထွန်း၊ မနီလာဝင်း၊ ကိုကျော်ဇောဦး၊ ကိုမျိုးကျော်၊ မယမင်းသူ၊ ဦးမြဌေးနဲ့ ကိုဖိုးဇော်တို့ထိခိုက်ဒဏ်ရာရပြီး နေအိမ် ၇ လုံးပျက်စီးကာ နွားနဲ့ကျွဲ ၇ ကောင်သေဆုံးတယ်လို့ ကျေးရွာနဲ့နီးစပ်သူတဦးက ပြောပါတယ်။

အိမ်ခြေ ၃၀၀ ကျော် လူဦးရေ ၁,၀၀၀ ကျော်ရှိတဲ့ မဲသည်ကျေးရွာက ဒေသခံတွေဟာ နောက်ထပ်လေကြောင်းကနေ ဗုံးလာကြဲမှစိုးရိမ်ပြီး ဘေးလွတ်ရာကို ထွက်ပြေးတိမ်းရှောင်နေကြတယ်လို့ ဆိုပါတယ်။

ဇန်နဝါရီ ၂ ရက် ညနေ ၄ နာရီခန့်မှာလည်း စစ်ကိုင်းတိုင်း၊ မုံရွာမြို့နယ်၊ ညောင်ပင်ကျေးရွာမှာ နမခက တက်လာလာတဲ့ စက်တပ်လေထီး ၁ စီးက ကျေးရွာထဲကို ဗုံး ၂ လုံးကြဲချခဲ့ရာ ရွာခံအများစုရေချိုးလေ့ရှိတဲ့ ရေတွင်းနား ကျရောက်ပေါက်ကွဲခဲ့တယ်လို့ မုံရွာမြို့နယ်ပကဖတာဝန်ရှိသူတွေက ပြောပါတယ်။

“ရွာမှာက ရေရှားတာကျတော့ အဲ့ရေတွင်းနားမှာစုပြီး ရေချိုးနေကြတာ။ ဗုံးက ၂ လုံးလာကြဲတယ်။ ဂျိုင်ရိုကော်ပတာနဲ့။ ဗုံးတွေက ရေတွင်းနားကျကွဲတာ။”လို့ ပကဖတာဝန်ရှိသူက ပြောပါတယ်။

ဗုံးကျပေါက်ကွဲလို့ အသက် ၁၁ နှစ်အရွယ် ယောက်ျားလေး ၂ ဦးသေဆုံးကာ အမျိုးသမီး ၄ ဦး (အသက်နာမည်စုံစမ်းဆဲ)တို့ ဒဏ်ရာရခဲ့တယ်လို့ မုံရွာမြို့နယ်ပကဖ တာဝန်ရှိသူတွေထံကသိရပါတယ်။

ပြီးခဲ့တဲ့ စက်တင်ဘာ ၂၂ ရက်ကလည်း ကန့်ဘလူမြို့နယ်၊ ကျီစုကျေးရွာမှာ စစ်ရှောင်တွေနေတဲ့နေရာ ဗုံးကြဲခံရလို့ အမျိုးသမီးကြီး ၁ ဦးသေဆုံးပြီး ၁၇ ဦးဒဏ်ရာရတယ်လို့ သိရပါတယ်။

စာတည်း – လင်း

ဝက်လက်၊ ဒီဇင်ဘာ ၃၁၊ ၂၀၂၅။

စစ်ကိုင်းတိုင်း၊ ဝက်လက်မြို့နယ်ကို စစ်ကော်မရှင်တပ်က စစ်ကြောင်းထိုးတဲ့အပြင် လေကြောင်းကနေပါ ဗုံးကြဲတိုက်ခိုက်ခဲ့တာကြောင့် အမျိုးသား ၂ ဦးသေဆုံးပြီး ဒေသခံ ၁ သောင်းကျော် စစ်ဘေးရှောင်နေရတယ်လို့ ဝက်လက်မြို့နယ်ပကဖဆီက သိရပါတယ်။

ဒီဇင်ဘာ ၃၀ ရက်မနက် ၇ နာရီဝန်းကျင်ကစပြီး ရွှေဘိုမြို့ကနေထွက်လာတဲ့ အင်အား ၁၅၀ ခန့်ပါ စစ်ကြောင်းဟာ ကျေးရွာတွေကိုစစ်ကြောင်းထိုးနေပြီးနောက် မနက် ၁၁ နာရီ ၄၅ မိနစ်ခန့်မှာ သစ်ဆိမ့်ကျေးရွာကို ဂျက်ဖိုက်တာနဲ့ ဗုံး ၂ လုံးကြဲချသွားတယ်လို့ဆိုပါတယ်။

“ရွာအနောက်ဘက်တောစပ်ကို ကြဲတာ။ သစ်ပင်လေးတွေခုတ်ထွင်ရှင်းလင်းနေတဲ့ တောင်သူတွေက မီးရှို့နေချိန် ဝုန်းကနဲ့ပစ်ချလိုက်တာ။ ၂ ဦးကတော့ နေရာမှာတင်ပွဲချင်းပြီးပဲ။ သူတို့ရှိတဲ့နေရာ အနီးဆုံးကျတော့ ၁ ယောက်ဆိုရုပ်ပျက်သွားတယ်”လို့ ဝက်လက်မြို့နယ်ပကဖ ပြန်ကြားရေး တာဝန်ရှိသူကပြောပါတယ်။

ဗုံးကြဲခံရလို့ အသက် ၅၀ ဝန်းကျင်အရွယ် အမျိုးသား ၂ ဦးနေရာမှာတင်သေဆုံးပြီး အသက် ၄၀ ဝန်းကျင်အရွယ် အမျိုးသား ၂ ဦးနဲ့ အမျိုးသမီး ၁ ဦးဒဏ်ရာရသွားတယ်လို့ ဆိုပါတယ်။

ရွှေဘိုကထွက်လာတဲ့ စစ်ကြောင်းဟာ သစ်ဆိမ့်ရွာနဲ့ ၂ မိုင်အကွာ ရေကမိုးကျေးရွာကို ညနေပိုင်းမှာ ရောက်ရှိနေပြီး ဒီဇင်ဘာ ၃၁ ရက်မနက်ပိုင်းအထိ အဲ့ဒီရွာမှာပဲရှိနေသေးတယ်လို့ ဝက်လက်မြို့နယ်ပကဖ ပြန်ကြားရေးတာဝန်ရှိသူက ပြောပါတယ်။

ခုလို စစ်ကော်မရှင်တပ်က စစ်ကြောင်းထိုးတာအပြင် လေကြောင်းကနေ ပစ်ခတ်တာကြောင့် ရေကမိုး၊ သစ်ဆိမ့်၊ ထုံးဘို၊ ရှပ်ပွဲ၊ ရွာသစ်၊ လှေပွဲဆိပ်၊ သစ်ဆိမ့်ကြီး၊ ကူကြီးကျေးရွာက ဒေသခံတွေနဲ့ မတ္တရာမြို့နယ်ကတိမ်းရှောင်လာသူတွေအပါအဝင် လူဦးရေ ၁ သောင်းကျော် စစ်ဘေးရှောင်နေရ တယ်လို့ ဆိုပါတယ်။

ဒီဇင်ဘာ ၂၉ ရက်ကလည်း ဝက်လက်မြို့နယ်၊ လိန်ပင်ကျေးရွာကို စစ်ကော်မရှင်ဘက်က ဗုံးကြဲလို့ အမျိုးသမီး ၂ ဦးသေဆုံးပြီး ၄ ဦးဒဏ်ရာရခဲ့သေးတယ်လို့ သိရပါတယ်။

စာတည်း – လင်း