ပြုလုပ်

မကွေး၊ မေ ၅၊ ၂၀၂၃။

မကွေးတိုင်းထဲက တော်လှန်ရေးနယ်မြေတခုမှာ မကွေးခရိုင် အမှတ်-၂ တပ်ရင်း တပ်ဖွဲ့တည်ထောင်တာ ၂ နှစ်ပြည့်အထိမ်းအမှတ်အဖြစ် အပတ်စဉ် – ၁ ကွန်မန်ဒိုသင်တန်းဆင်းပွဲနဲ့ ကတိသစ္စာဆိုပွဲကို ပြုလုပ်ခဲ့တယ်လို့ တပ်ရင်းမှူး ဗိုလ်စံရှားက ပြောပါတယ်။

မေလ ၅ ရက် ဒီကနေ့မနက် ၆နာရီက ကျင်းပခဲ့တာဖြစ်ပြီး၊ ကွန်မန်ဒိုသင်တန်းက ဧပြီလ ၃ ရက်နေ့ကတည်းက ပြီးသွားပေမယ့် နယ်မြေမတည်ငြိမ်တဲ့အတွက် အခုမှသာ ပူးပေါင်းကျင်းပခဲ့ရတာလို့ ဆိုပါတယ်။

“လေယာဉ်တွေဝဲနေတဲ့ကြားက ကျနော်တို့ရဲ့ အထိမ်းမှတ်နေ့လေးဖြစ်နေလို့ လုပ်ခဲ့တာ၊ သင်တန်းဆင်းပွဲမှာဆို ပထမဆုံး အမျိုးသမီးရဲဘော်တွေ ပါဝင်လာတယ်”လို့ ဗိုလ်စံရှားက ပြောပါတယ်။

အခမ်းအနားကို အချိန် ၂ နာရီကြာကျင်းပခဲ့ပြီး သင်တန်းဆင်းပွဲအပြင် တော်လှန်ရေးကတိသစ္စာဆိုပွဲလည်း ပြုလုပ်ခဲ့ကာ ရဲဘော်တွေကိုတော့ မုန့်ဟင်းခါးကျွေးမွေးဧည့်ခံခဲ့တယ်လို့ သိရပါတယ်။

ဒါ့အပြင် အရင်က တပ်ရင်းမှာ အမျိုးသမီးရဲဘော်မထားရှိပေမယ့် တိုက်ပွဲဝင်ဖို့ ပါဝင်ချင်တယ်ဆိုပြီး စိတ်ဓာတ်ပြင်းပြစွာ ဆက်သွယ်လာတဲ့အတွက် ကွန်မန်ဒိုသင်တန်းမှာ အမျိုးသမီး ၄ ဦးကို ပထမဆုံးထည့်သွင်း သင်တန်းပေးခဲ့တာဖြစ်တယ်လို့ သူကဆက်ပြောပါတယ်။

တပ်ရင်းမှာ အခုလက်ရှိအချိန်ထိ ရိုးရိုးစစ်သင်တန်း ၆ ခုပေးပြီးပြီဖြစ်ကာ ကွန်မန်ဒိုသင်တန်းကတော့ အခုမှ ပထမဆုံးအကြိမ် ပေးတာဖြစ်တယ်လို့လည်း သိရပါတယ်။

တပ်ဖွဲ့စတင်ဖွဲ့စည်းစဉ်က Local PDF အဖြစ်လှုပ်ရှားခဲ့ပေမယ့် ၂၀၂၂ ခုနှစ် နှစ်ကုန်ပိုင်းမှာတော့ မကွေးခရိုင် တပ်ရင်း-၂ အဖြစ် ပြောင်းလဲကာ စစ်အာဏာရှင်ကို ဆက်လက်တော်လှန်နေတာလည်း ဖြစ်ပါတယ်။

စာတည်း – လင်း

မကွေး၊ မေ ၅၊ ၂၀၂၃။

မကွေးတိုင်း၊ ဂန့်ဂေါခရိုင်၊ အမှတ် – ၁၃ တပ်ရင်း၊ The Youth Force (Saw & Kyaukhtu) တပ်ဖွဲ့ထဲက ရဲဘော်တဦး သေဆုံးခြင်း ရက် ၆၀ ပြည့်တဲ့ ယမန်နေ့ မေ ၄ ရက်နေ့ကကုသိုလ်ကောင်းမှု ပြုလုပ်ခဲ့တယ်လို့ သိရပါတယ်။

ပြီးခဲ့တဲ့မတ်လ ၆ ရက်မှာ ဆော-ကျောက်ထုလမ်း၊ ကြံတောရွာအနီး တိုက်ပွဲဖြစ်ပွားရာသို့စစ်ကူသွားတိုက်ခိုက်နေချိန် စစ်ကောင်စီတပ်ရဲ့ ချောင်းမြောင်းတိုက်ခိုက်တာ ခံရပြီး၊ ရဲဘော်တဦး သေဆုံးခဲ့တာလို့ The Youth Force တာဝန်ခံက မေ ၅ ရက်နေ့မှာ မြေလတ်အသံကို ပြောပါတယ်။

“တခြားရဲဘော်တွေလွတ်ဖို့ ခံပစ်ရင်းကတိုက်ပွဲမှာ ကျခဲ့တာပါ။ စစ်ကူသွားရင်းလမ်းမှာ စကစ တွေရဲ့ချောင်းပစ်တာကို ခံရတယ်။ ကျဆုံးရဲဘော်ရဲ့အလောင်းတော့မရလိုက်ဘူး။ စကစ တွေမီးရှို့သွားတယ်။” လို့ တပ်ဖွဲ့တာဝန်ခံက ပြောပါတယ်။

တိုက်ပွဲမှာသေဆုံးခဲ့တဲ့ရဲဘော်မှာ ဇင်ဖြိုးလွင် အသက် (၂၀) နှစ်ဆိုသူဖြစ်ပြီး ယောနယ်သားဦးဖြစ်သလို ယောနယ်ဒေသမှာပဲ စစ်ပညာသင်တန်း တက်ရောက်ခဲ့တယ်လို့ ဆိုပါတယ်။

“ရဲဘော်ဇင်ဖြိုးလွင်က အာဏာရှင်ကိုတော်လှန်ဖို့ ဒီအဖွဲ့ထဲရောက်လာတာပါ။ တပ်ခွဲမှာလည်းအားကိုးရတဲ့ ရဲဘော်တယောက်ပါ။ သူ့မှာ ဖုံးတောင်ကိုင်စရာမရှိပါဘူးဗျာ” လို့ The Youth Force တပ်ဖွဲ့တာဝန်ခံက ပြောပါတယ်။

ရဲဘော်ရဲ့အလောင်းကို စစ်ကောင်စီတပ်က မီးရှို့သွားလို့ The Youth Force (Saw & Kyaukhtu) အဖွဲ့အနေနဲ့ သက်ပျောက်ဆွမ်းသွပ်တာ၊ အမှတ်တရဂူဗိမာန်ပြုလုပ်တာ၊ ရက်လည်ဆွမ်းသွပ်တာတွေကို အရင်ကလည်း ပြုလုပ်ပေးခဲ့တယ်လို့ ဆိုပါတယ်။

ဒါအပြင် အမျိုးသားညီညွတ်ရေးအစိုးရ လူသားချင်းစာနာထောက်ထားရေးဌာနနဲ့ တပ်ရင်းတပ်ဖွဲ့က ထောက်ပံ့ငွေတချို့ကိုလည်း ကျန်ရစ်တဲ့မိသားစုထံ ထောက်ပံ့ပေးအပ်ခဲ့တယ်လို့ ထုတ်ပြန်ချက်အရ သိရပါတယ်။

ဂန့်ဂေါခရိုင်၊ အမှတ်-၁၃ တပ်ရင်းအနေနဲ့လည်း ကျန်ရဲဘော်များ လွတ်မြောက်စေရေးအတွက် ခုခံပစ်ခတ်ရင်း အသက်ပေးလှူခဲ့ရတဲ့ရဲဘော်ကိုဇင်ဖြိုးလွင်ကို အာဇာနည်သူရဲကောင်းအဖြစ် အလေးနီပြု ဦးညွတ်ရင်း ဂုဏ်ပြုခဲ့ရတာကို ဝမ်းနည်းကြောင်း သဝဏ်လွှာပေးပို့ရာမှာဖော်ပြပါရှိတယ်လို့ သိရပါတယ်။

စာတည်း – 007

မင်းလှ၊ ဧပြီ ၁၄၊ ၂၀၂၃။

ပဲခူးတိုင်း(အနောက်ခြမ်း)၊ သာယာဝတီခရိုင်၊ မင်းလှမြို့နယ်၊စိန်ကန့်လန့်ရွာအခြေစိုက်စစ်ကောင်စီ ခလရ ၁ တပ်ရဲ့အခုနှစ်တပ်သင်္ကြန်ကို တပ်တွင်းမှာသာ မဏ္ဍပ်ထိုးပြီး ပြုလုပ်နေတယ်လို့ မင်းလှမြို့ခံတွေဆီက သိရပါတယ်။

စစ်အာဏာမသိမ်းမီနှစ်တွေက ခလရ ၁ တပ်ဟာ တပ်အဝင်မုဒ်ဦးအရှေ့ မင်းလှ-စိန်ကန့်လန့်-မြို့ချောင်းရိုးမဖြတ်ကျော်လမ်းမှာ မဏ္ဍပ်ထိုးပြုလုပ်တာဖြစ်ပြီး ဒီနှစ်သင်္ကြန်ကိုတော့ တပ်တွင်းမှာသာ မဏ္ဍပ်ထိုးကာ အပြင်လူဝင်၊ထွက်ခွင့်ကိုလည်း ပိတ်ပင်ထားတယ်လို့ တပ်နဲ့နီးစပ်တဲ့မြို့ခံတဦးက မြေလတ်အသံကို ပြောပါတယ်။

“အဓိက က PDF ဗုံးကို ကြောက်တာပေါ့။ တပ်ထဲမှာက လူလည်း သိပ်မရှိတာရယ်။ နောက်ပြီး အရင်လို တပ်ပြင်ထွက် မဏ္ဍပ်ထိုးလည်း ဘယ်သူမှ မလာလောက်ဘူးဆိုတာ သိလို့နေမှာ။ တပ်ထဲကလူလည်း အပြင်မထွက်ခိုင်းဘူး။ အပြင်ကလူလည်း ဘယ်သူမှ အထဲမခေါ်ခိုင်းဘူးလို့။ ဒါတောင် သူတို့ သင်္ကြန်သာ လုပ်နေတာ ဒရုန်းကြောက်လို့အပေါ်ကို တကြည့်ကြည့်နဲ့ ကနေကြတာ” လို့ ပြောပါတယ်။

ခလရ ၁ တပ်ဟာ မင်းလှမြို့ပေါ်က စစ်ကောင်စီပြုလုပ်တဲ့ သင်္ကြန်မဏ္ဍပ်မှာလည်း လုံခြုံရေးအစောင့်တွေ ပို့ဆောင်ထားရတာဖြစ်ပြီး အင်အားမလုံလောက်တာကြောင့် တပ်သင်္ကြန်အတွက် လုံခြုံရေးပေးဖို့ လူမရှိလို့ အခုလိုတပ်တွင်းမှာသာ လုပ်ဆောင်နေရတာလို့ သူကဆက်ပြောပါတယ်။

ခလရ ၁ တပ်တွင်းသင်္ကြန်မဏ္ဍပ်ကိုတော့ တပ်တွင်းမူကြိုကျောင်းဘေး တပ်သက်သာဆိုင် အရှေ့မှာပြုလုပ်တာဖြစ်ပြီး တပ်ရင်းမှူးမိန်းမဖြစ်သူ ဒေါ်ဝင့်နှင်းဖြူက ဦးဆောင်ပြုလုပ်နေတာလို့ သိရပါတယ်။

ခလရ ၁ တပ်ဟာ တပ်မ ၆၆ လက်အောက်ခံ တပ်ရင်းတခုဖြစ်ပြီး ကရင်နီပြည်နယ်အတွင်း တိုက်ခိုက်ရေး ဝင်ရောက်နေရကာ ထိခိုက်သေဆုံးများပြားနေတဲ့ တပ်ရင်းဖြစ်သလို နောက်တန်းအင်အားလည်း လုံလောက်မှုမရှိတာကြောင့် စစ်ကောင်စီတပ်ဖွဲ့ဝင်တွေရဲ့မိန်းမတွေအပြင် သား၊သမီးတွေကိုပါ စစ်သင်တန်းပေးပြီး လုံခြုံရေးအတွက် လိုအပ်သလိုအသုံးပြုနေတယ်လို့ သိရပါတယ်။

ယင်းမာပင်၊ ဧပြီ ၁၄၊ ၂၀၂၃။

စစ်ကိုင်းတိုင်း၊ ယင်းမာပင်မြို့နယ်မှာ ဧပြီလ ၁၄ ရက် ဒီကနေ့သင်္ကြန်အကျနေ့မနက် ၉ နာရီလောက်မှာ တော်လှန်ရေးအင်အားစုအဖွဲ့ဝင်တွေက စစ်အာဏာရှင် ဆန့်ကျင်ရေးသပိတ်ပြုလုပ်ရင်း တော်လှန်သံချပ်တွေနဲ့ ဖျော်ဖြေခဲ့တယ်လို့ သိရပါတယ်။

“စစ်တပ်စီးပွား ဒို့ငြင်းဆန် တော်လှန်သင်္ကြန် ပြည်သူ့အသံ” စာတန်းနဲ့အတူ ယင်းမာပင် – ဆားလင်းကြီးရွာပေါင်းစုံသပိတ်စစ်ကြောင်းရဲ့ ၇၆၄ ရက်မြောက်နေ့အဖြစ် ပြုလုပ်ခဲ့ရာ မြို့နယ်တွင်းက သပိတ်အင်အားစုတွေက လာရောက်ပူးပေါင်းခဲ့တယ်”လို့ သပိတ်ကော်မတီဝင်တဦးက ပြောပါတယ်။

ဆန္ဒပြအဖွဲ့နဲ့အတူ ရွာပေါင်းစုံသံချပ်အဖွဲ့၊ ရွှေရေကြည်သံချပ်အဖွဲ့နဲ့ ကယ်တင်ရှင်မရှာ တို့ကျေးရွာ သံချပ်အဖွဲ့တို့က တော်လှန်သံချပ်တွေနဲ့ ဖျော်ဖြေပြီး၊ ယင်းမာပင်မြောက်ခြမ်းသပိတ်အင်အားစုက တော်လှန်သီချင်းနဲ့ ဖျော်ဖြေခဲ့တယ်လို့ သိရပါတယ်။

ပေါင်းတည်၊ ဧပြီ ၁၃၊ ၂၀၂၃။

ပြီးခဲ့တဲ့ရက်က ဆောက်လုပ်ဆဲကာလမှာ ဗုံးခွဲခံထားရတဲ့ ပဲခူးတိုင်း၊ ပေါင်းတည်မြို့ သင်္ကြန်မဏ္ဍပ်ကို ဧပြီလ ၁၃ ရက် ဒီညနေ ၃ နာရီမှာ လမ်းတွေပိတ်ကာ လုံခြုံရေးတင်းကျပ်စွာချထားပြီး သင်္ကြန်မဏ္ဍပ်ဖွင့်ပွဲပြုလုပ်ခဲ့တယ်လို့ သိရပါတယ်။

ပေါင်းတည်မြို့စျေး ၂ ရပ်ကွက်၊ ဘုရားကြီးလမ်းက သင်္ကြန်မဏ္ဍပ်မှာ ဧပြီလ ၉ ရက် မနက်ကဗုံးကွဲပြီးတဲ့နောက် ညနေပိုင်းကစတင်ကာ လမ်းထိပ်နှစ်ဘက်ကို ဘယ်ရီဂိတ်အပြည့်ချ လမ်းပိတ်ထားခဲ့တာဖြစ်ပါတယ်။

“လမ်းကဘယ်ရီဂိတ်တွေချထားတုန်းပဲ။ တခုပဲဖွင့်ပေးတာ၊ မဏ္ဍပ်ကိုသွားချင်ရင် ဘယ်ရီဂိတ်ကနေခြေလျင် သွားရတယ်။ ဆိုင်ကယ် စက်ဘီးမဝင်ရဘူး။ မဏ္ဍပ်မှာက ဘောမတွေပဲသွားတယ်။ သူတို့ကြည့်ရတာကြောက် နေပုံရတယ်။ လမ်းပေါ် ကလေးပဲရေကစားတာ။ တမြို့လုံး ဘယ်နေရာမှ ရေကစားမဏ္ဍပ် မရှိဘူး”လို့ မြို့ခံတဦးက ပြောပါတယ်။

မဏ္ဍပ်ကုန်ကျစရိတ်အတွက် ထွေအုပ်၊ ရဲနဲ့ အုပ်ချုပ်ရေးမှူးအဖွဲ့တွေက လောင်းကစားသမားတွေ၊ ကျွန်းသစ်ခိုးထုတ်သူတွေ၊ NonCDMတွေနဲ့ လုပ်ငန်းရှင်တွေထံ အတင်းအဓမ္မမဲလက်မှတ်ရောင်းပြီး ရံပုံငွေရှာထားတာဖြစ်တယ်လို့ သူက ဆက်ပြောပါတယ်။

ရပ်ကွက်အလိုက်အုပ်ချုပ်ရေးမှူးတွေကို သင်္ကြန်ယိမ်းမဖြစ်မနေထည့်သွင်းခိုင်းတဲ့အတွက် မြို့ပေါ်ရပ်ကွက်တခုမှာ ယိမ်းသမတဦးကို ကျပ် ၅ သောင်းပေးကာခေါ်ယူရတယ်လို့ အုပ်ချုပ်ရေးပိုင်းနဲ့နီးစပ်သူတဦးက ပြောပါတယ်။

ပြီးခဲ့တဲ့နှစ်က မဏ္ဍပ်ကို ရေကစားလာသူနည်းတဲ့အတွက် မဏ္ဍပ်တာဝန်ရှိသူတွေက လာရောက်ရေကစားသူတွေကို အရက်တိုက်ကာ ဆွဲဆောင်တာတွေလည်းလုပ်ခဲ့ပါသေးတယ်။

ပြီးခဲ့တဲ့နှစ် ဧပြီ ၁၆ ရက် သင်္ကြန်နောက်ဆုံးရက် အတက်နေ့မှာ ပေါင်းတည်သင်္ကြန်မဏ္ဍပ်အနီး ဗုံးပေါက်ကွဲခဲ့တဲ့အတွက် ရေကစားသူအမျိုးသမီးတဦးသေဆုံးခဲ့ပါသေးတယ်။

စာတည်း-လင်းဇေ

မုံရွာ၊ ဧပြီ ၁၃၊ ၂၀၂၃။

စစ်ကိုင်းတိုင်း၊ မုံရွာမြို့နယ်၊ ကံသာဦးရပ်ကွက်မှာ ပြုလုပ်တဲ့ စစ်ကောင်စီသင်္ကြန်ပွဲမှာ အနုပညာရှင်တွေ ဖိတ်ခေါ်ထားပြီး ဧပြီလ ၁၃ ရက် ဒီကနေ့မနက်ပိုင်းမှာ တပ်မိသားစု ယိမ်းအဖွဲ့တွေနဲ့ ဖွင့်ပွဲပြုလုပ်ခဲ့ပြီး ရန်အောင်၊ စိုးသူ၊ စိုးမြတ်နန္ဒာ၊ ခန့်စည်သူ၊ မေသဉ္ဇာဦးတို့ ဖွင့်ပွဲမှာ ဖျော်ဖြေကြတယ်လို့ ဒေသခံတွေက ပြောပါတယ်။

“ကန်သာယာ ပတ်ချာလည်မှာ လုံခြုံရေးတွေ ချထားတာ မနည်းဘူး။ သူတို့ဌာနဆိုင်ရာဝန်ထမ်းတွေကလွဲရင် ဘယ်သူမှ အဝင်မခံဘူး။ ပြောရရင် သူတို့လူတွေပဲ ရှိတာ။ ကျနော်တို့ ပြည်သူတွေ မရှိဘူး” လို့ မုံရွာဒေသခံတဦးက ပြောပါတယ်။

အရှေ့ကန်သာယာနဲ့ အနောက်ကန်သာယာကြားမှာ ဗဟိုမဏ္ဍပ်တခု၊ ဘေးလျှောက်လမ်းတွေမှာတော့ စတုဒီသာမဏ္ဍပ်နဲ့ လမ်းလျှောက်သင်္ကြန် ဆောက်လုပ်ထားပြီး ကန်သာယာတဝိုက်ကိုလည်း ပိတ်ဆို့ထားကာ မဏ္ဍပ်ထဲကို အပြင်လူအဝင်မခံဘူးလို့လည်း သိရပါတယ်။

အခုနှစ် မုံရွာသင်္ကြန်မှာ ရန်အောင်၊ မေသန်းနု၊၊ စိုးသူ၊ စိုးမြတ်နန္ဒာ၊ ခန့်စည်သူ၊ မေသဉ္ဇာဦး၊ ခရစ္စတီးနားတို့အပြင် တခြားအနုပညာရှင်တွေလည်း ရောက်ရှိနေကြပြီး မဏ္ဍပ်ရှေ့က ဝင်းယူနတီဟိုတယ်မှာ တည်းခိုနေကြတယ်လို့ သိရပါတယ်။

မုံရွာအခြေစိုက် ကာကွယ်ရေးတပ်ဖွဲ့တွေကတော့ စစ်ကောင်စီကျင်းပတဲ့ သင်္ကြန်ကိုမသွားကြဖို့ သတိပေးထားပြီး မနေ့က ညပိုင်းကလည်း မုံရွာမြို့ပေါ်မှာ ပေါက်ကွဲသံကြားရပြီး ဘယ်အဖွဲ့စည်းက ပြုလုပ်တယ်ဆိုတာတော့ စုံစမ်းနေဆဲပဲ ဖြစ်ပါတယ်။

မုံရွာမြို့က စစ်ကောင်စီတပ်ဖွဲ့ဝင်တွေနဲ့ သူတို့ရဲ့ မိသားစုတွေ သင်္ကြန်ကာလမှာ အခုလို သင်္ကြန်မဏ္ဍပ်ဆောက်ပြီး ရုပ်ရှင်သရုပ်ဆောင်တွေနဲ့အတူ ပျော်ပါးနိုင်ဖို့အတွက် မုံရွာမြို့မှာရှိတဲ့ စီးပွားရေးလုပ်ငန်းရှင်တွေက တဦးလျှင် ကျပ် ၃ သိန်းမှ ကျပ် ၅ သိန်းအထိ အလှူငွေထည့်ဝင်ခဲ့ရပါတယ်။

စာတည်း – လင်းဇေ

ယင်းမာပင်၊ ဧပြီ ၁၃၊ ၂၀၂၃။

စစ်ကိုင်းတိုင်း၊ ယင်းမာပင်မြို့နယ်ထဲက ကျေးရွာတရွာမှာ သင်္ကြန်အကြိုနေ့ အထိမ်းမှတ်အဖြစ် ရွာပေါင်းစုံသပိတ် လှုပ်ရှားမှု ကော်မတီဝင်တွေနဲ့ ဒေသခံပြည်သူတွေ ပူးပေါင်းပြီး စစ်အာဏာရှင်ကို ဆန့်ကျင်တဲ့ သပိတ်လှုပ်ရှားမှုတခု ပြုလုပ်ခဲ့ကြပါတယ်။

ဧပြီလ ၁‌၃ ရက်ဒီကနေ့ မနက် ၉ နာရီခွဲခန့်က ပြုလုပ်ခဲ့တာဖြစ်ပြီး “စစ်တပ်စီးပွားတို့ ငြင်းဆန်၊ တော်လှန်သင်္ကြန် ပြည်သူ့အသံ” ဆိုတဲ့ ဘန်နာတွေကိုင်စွဲပြီး ပြုလုပ်ခဲ့တာပါ။

ရွာပေါင်းစုံသပိတ်လှုပ်ရှားမှုကော်မတီရဲ့ ၇၆၃ ရက်မြောက် သပိတ်လှုပ်ရှားမှုဖြစ်ပြီး တော်လှန်ရေးကြွေးကြော်သံတွေ အော်ဟစ်ကာ ဆန္ဒပြခဲ့ကြတာလည်း ဖြစ်ပါတယ်။

ပြည်၊ ဧပြီ ၁၃၊ ၂၀၂၃။

ပဲခူးတိုင်းဒေသကြီး၊ ပြည်မြို့၊ ဗိုလ်ချုပ်ကျောက်ရုပ်အနီးမှာ စစ်ကောင်စီက သင်္ကြန်မဏ္ဍပ်ဖွင့်ပွဲကို ပြုလုပ်ရာမှာ မြို့တွင်းလမ်းတွေပိတ်ပြီး အစစ်အဆေးတင်းကျပ်စွာနဲ့ ပြုလုပ်ခဲ့တယ်လို့ သိရပါတယ်။

ဧပြီလ ၁၃ ရက်ဒီမနက် ၇ နာရီလောက်မှာ စစ်ကောင်စီလက်အောက်ခံ ဌာနဆိုင်ရာဝန်ထမ်းတွေနဲ့ သင်္ကြန်မဏ္ဍပ်ဖွင့်ပွဲကို ပြုလုပ်ခဲ့ရာ ဝန်ထမ်းအနည်းငယ်သာ တက်ရောက်ခဲ့ပြီး ပြည်သူတွေ တက်ရောက်သူမရှိခဲ့ဘူးလို့ ဒေသခံတဦးက ပြောပါတယ်။

“ဗိုလ်ချုပ်ကျောက်ရုပ် မြို့လယ်ခေါင်လမ်းဆုံမှာ သူတို့ ဗဟိုမဏ္ဍပ်လုပ်ပြီး ဖွင့်ပွဲလုပ်တာ။ လမ်းတွေက ပိတ်ထားတယ်။ အစစ်ဆေးလည်း များတယ်။ လူကတော့ သူတို့လူနည်းနည်းလောက်ပဲရှိတယ်။ အခြေနေကောင်းတုန်းကဆိုရင် ဘာပြောကောင်းမလဲ ဖွင့်ပွဲနေဆို စည်ကားနေတာ တိုးမပေါက်ပဲ။ သူတို့ကတော့ မဖြစ်ဖြစ်အောင်လုပ်မှာပဲ” လို့ ပြောပါတယ်။

သင်္ကြန်မဏ္ဍပ်ဖွင့်ပွဲလုပ်ဖို့အတွက် ဧပြီလ ၁၂ ရက် မနေ့ညပိုင်းကတည်းက မဏ္ဍပ်ဝန်းကျင်နေရာတွေမှာ စစ်ကောင်တပ်တွေနဲ့ ရဲတွေ လုံခြုံရေးအများအပြားချထားသလို ဒီနေ့မနက် ဖွင့်ပွဲမှာလည်း အရပ်ဝတ်၊ ယူနီဖောင်းဝတ်တွေနဲ့ လုံခြုံရေး အင်အား ၅၀ ထက်မနည်း ထားရှိကာ မဏ္ဍပ်လာသမျှယာဥ်တွေကို တားဆီးစစ်ဆေးတာတွေ လုပ်ခဲ့တယ်လို့ ဆိုပါတယ်။

သင်္ကြန်အကြိုနေ့ မနက်ပိုင်း ဒီမနက်မှာတော့ ပြည်မြို့အတွင်းမှာ ရေကစားသူမရှိသလောက်နည်းပါးပြီး ကလေးငယ်အချို့သာ အိမ်ရှေ့တွေမှာ ရေပက်ကစားတာတွေရှိတယ်လို့ သိရပါတယ်။

စစ်တပ်က အာဏာမသိမ်းခင်နှစ်တွေမှာ သင်္ကြန်အကြိုနေ့မတိုင်ခင်ကတည်းက ပြည်မြို့အတွင်း မြို့ပေါ်ရပ်ကွက်တွေမှာ သင်္ကြန်မဏ္ဍပ်တွေ အများအပြားနဲ့ ရပ်ကွက်အိမ်ရှေ့တွေမှာ ဒေသခံမိသားစုအလိုက် အုန်းလက်မဏ္ဍပ်တွေ ထိုးတာရှိခဲ့ပေမယ့် အာဏာသိမ်းပြီးနောက်ပိုင်းမှာတော့ မရှိသလောက် နည်းပါးနေတယ်လို့ သိရပါတယ်။

စာတည်း – လင်း

ကြို့ပင်ကောက်၊ ဧပြီ ၁၂၊ ၂၀၂၃။

ပဲခူးတိုင်း(အနောက်ခြမ်း)၊ ကြို့ပင်ကောက်မြို့မှာ ဧပြီလ ၁၁ ရက် မနေ့နေ့လယ် ၁၂ နာရီလောက်က စစ်ကောင်စီက ပြုလုပ်မယ့်ရွေးကောက်ပွဲကို ဆန့်ကျင်ရေး ပြောက်ကျားသပိတ်ပြုလုပ်ခဲ့တယ်လို့ သိရပါတယ်။

“ဖက်ဆစ်ရွေးကောက်ပွဲသပိတ်မှောက် ဖက်ဒရယ်လမ်းကို ရဲရဲလျှောက်” စာတန်းနဲ့အတူ သွေးမအေးဘူး၊ ဖက်ဒရယ်လမ်းကိုရဲရဲလျှောက်၊ စစ်**နိဂုံး ၂၀၂၃၊ တော်လှန်သင်္ကြန်ဆင်နွှဲကြ စာတန်းတွေကို ရေးဆွဲခဲ့ကြပါတယ်။

“ကျနော်တို့ကျောင်းသားအင်အားစုတွေအနေနဲ့ သွေးမအေးဘဲ ဆက်တော်လှန်နေပါမယ်ဗျ။ ပြည်သူလူထုအနေနဲ့ ဖက်ဆစ်ရွေးကောက်ပွဲကို အသိအမှတ်မပြုဘဲ ဆက်ပြီးသပိတ်မှောက်ပါဝင်ပေးဖို့ ပြောချင်ပါတယ်” လို့ ကြို့ပင်ကောက်မြို့နယ် ကျောင်းသားသမဂ္ဂအဖွဲ့ဝင်တဦးက ပြောပါတယ်။

အဲဒီလှုပ်ရှားမှုကို ကြို့ပင်ကောက်မြို့နယ်လုံးဆိုင်ရာ ကျောင်းသားသမဂ္ဂနဲ့ အထက ကြို့ပင်ကောက်ကျောင်းသားသမဂ္ဂတို့ ပူးပေါင်းလှုပ်ရှားခဲ့ကြတာလို့ သိရပါတယ်။

စာတည်း – 007