ပေါင်းတည်၊ စက်တင်ဘာ ၁၃၊ ၂၀၂၅။

ပဲခူးတိုင်း၊ ပေါင်းတည်မြို့နယ်၊ ပန်းသင်းပင်ကျေးရွာမှာ ပျူစောထီး ၁ ဦး လယ်ခင်းထဲအသွားပစ်သတ်ခံရပြီး သေဆုံးသွားတယ်လို့ ၃၆၀၁ တပ်ရင်း စစ်ထောက်လှမ်းရေးနဲ့ သတင်းပြန်ကြားတာဝန်ခံ Shadow ဆီက သိရပါတယ်။

ပစ်သတ်ခံရသူက ပျူစောထီးအဖွဲ့ဝင်ဖြစ်သူ ပန်းသင်ပင်ကျေးရွာက အသက် ၃၄ အရွယ်အေးမင်းထွန်းဖြစ်ပြီး စက်တင်ဘာ ၁၁ ရက်မနက် ၇ နာရီခန့်မှာ သူနေအိမ်ကနေ ကျေးရွာအနီးရှိ လယ်ခင်းထဲကိုအလာ ရွာအပြင်နားလောက်မှာ ပစ်ခတ်ခဲ့တာလို့ဆိုပါတယ်။

“သူကခေါင်းဆောင်တော့မဟုတ်ဘူး အဖွဲ့ဝင်။ ရွာကနေ သူခြေကျင်ဘဲထွက်လာတာ သူယာထဲကို။ ၃ ချက်ပစ်ခတ်ခဲ့တာ။ ဝမ်းဗိုက်ရယ်၊ ဆီးခုံရယ်၊ ပေါင်ရယ်ထိပြီးသေတာ”လို့ ၃၆၀၁ တပ်ရင်း စစ်ထောက်လှမ်းရေးနှင့်သတင်းပြန်ကြားတာဝန်ခံ Shadow ကပြောပါတယ်။

ပစ်ခတ်ခံရပြီးသေဆုံးသွားတဲ့ အေးမင်းထွန်းရဲ့အလောင်းကိုတော့ ကျေးရွာထဲတပ်စွဲထားတဲ့ စစ်ကော်မရှင်အဖွဲ့က လာကောက်သွားကာ အလောင်းကောက်ချိန် ဘေးပတ်ဝန်းကျင်ကို လက်နက်ငယ်တွေနဲ့ ရမ်းသမ်းပစ်ခတ်တာမျိုးတွေရှိတယ်လို့ ဆိုပါတယ်။

အေးမင်းထွန်းဟာ ကျေးရွာအတွင်းက စစ်ကော်မရှင်တပ်သား၊ ပျူစောထီးအဖွဲ့တွေနဲ့ပေါင်းပြီး အနားနီးပါးရွာတွေက ပြည်သူတွေထံကနေ စားသောက်ကုန်၊ လုပ်ငန်းသုံးပစ္စည်းတွေနဲ့ တန်ဖိုးရှိပစ္စည်းတွေ လုယူရာမှာပါဝင်သူဖြစ်သလို စစ်ကော်မရှင်တပ်သားတွေအလိုကျ လုပ်ကိုင်ပေးနေသူတဦးဖြစ်တာကြောင့်ပစ်ခတ်ခဲ့တာလို့ ဆိုပါတယ်။

အဆိုပါပစ်ခတ်မှုကိုတော့ ပြည်သူ့ကာကွယ်ရေးတပ်မတော် ဗျူဟာ(၂၁)ကွပ်ကဲမှုအောက်ရှိ ၃၆၀၁ တပ်ရင်း တပ်ခွဲ(၂)မှ အဖွဲ့ဝင်တွေက ပစ်ခတ်ခဲ့တာလို့ သိရပါတယ်။

ပြီးခဲ့တဲ့ စက်တင်ဘာ ၇ ရက်ကလည်း အုတ်ဖိုမြို့နယ်၊ စစ်တောကျေးရွာမှာ ဘေးတွဲဆိုင်ကယ်နဲ့လာတဲ့ ရာအိမ်မှူး ဦးသန်းစိုးဆိုသူ ပစ်သတ်ခံရလို့ သေဆုံးသွားတယ်လို့ သိရပါတယ်။

စာတည်း – လင်း

လက်ပံတန်း၊ စက်တင်ဘာ ၁၀၊ ၂၀၂၅။

ပဲခူးတိုင်း၊ လက်ပံတန်းမြို့နယ်၊ သစ်ဟောင်းပြင်ကျေးရွာမှာ ဒရုန်းနဲ့ဗုံးချတိုက်ခိုက်ခံရပြီး အမျိုးသမီး ၂ ဦးသေဆုံးကာ ၂ ဦးဒဏ်ရာရခဲ့တယ်လို့ ရွှေတန်းမြေပြည်သူ့ကာကွယ်ရေးအဖွဲ့ တာဝန်ရှိသူတွေဆီက သိရပါတယ်။

စက်တင်ဘာ ၉ ရက်နေ့လယ် ၁၂ နာရီခန့်မှာ လက်ပံတန်းမြို့ပျူစောထီးအဖွဲ့တွေက သစ်ဟောင်းပြင်ကျေးရွာအနီး တမိုင်ကျော်လောက်ကနေကျေးရွာထဲကို ဒရုန်းနဲ့ဗုံးသီး ၂ လုံးလာကြဲချသွားတယ်လို့ ဆိုပါတယ်။

“အိမ်မှာနေရင်းနဲ့ကိုထိတာ။ ရွာထဲအိမ်တွေမှာရှိနေတာ။ ဗုံးတွေကပြင်းတယ်။ အိမ်တွေပေါ်ကျတာနဲ့ ပွင့်ကျလန်ထွက်ကုန်တာ။ အိမ် ၂ အိမ်ပျက်ပြီး အမျိုးသမီး ၂ ဦးသေပြီး ၂ ဦးဒဏ်ရာရသွားတာ။ မိသားစုဝင်တွေပဲ”လို့ ရွှေတန်းမြေပြည်သူ့ကာကွယ်ရေးအဖွဲ့တာဝန်ခံက ပြောပါတယ်။

စစ်ကော်မရှင်တပ်က မြို့နယ်အလိုက် ပျူစောထီးအဖွဲ့တွေဆီ ဒရုန်းတွေပေးထားတာရှိနေပြီး ပျူစောထီးအဖွဲ့တွေက ရရှိထားတဲ့ ဒရုန်းတွေကို စမ်းသပ်မောင်းနှင်ပြီး ကြုံတဲ့နေရာကို ဗုံးလိုက်ကြဲနေတာလို့ အထက်ပါတာဝန်ရှိသူက ပြောပါတယ်။

ဗုံးကျပေါက်ကွဲလို့ အသက် ၆၀ ဝန်းကျင်အရွယ်ရှိ ဒေါ်ခင်လှိုင်၊ အသက် ၅၀ ဝန်းကျင်ရှိ ဒေါ်စန်းဌေးတို့ နေရာတင်သေဆုံးပြီး အသက် ၉ နှစ်အရွယ် မယွန်းဝတီနဲ့ အသက် ၄၅ နှစ်အရွယ် မညိုမီလှိုင်တို့ ပြင်းထန်ဒဏ်ရာရခဲ့တယ်လို့ ဆိုပါတယ်။

ဒါအပြင်နေအိမ် ၂ လုံးမီးလောင်ပျက်စီးသွားပြီး ဒဏ်ရာရသူ ၂ ဦးကိုတော့ နီးစပ်ရာဆေးရုံပို့ထားရကာ သေဆုံးသွားသူတွေကိုတော့ နေ့ချင်းသင်္ဂြိုဟ်လိုက်ပြီလို့ သိရပါတယ်။

ဒရုန်းဗုံးချခံရတာကြောင့် အိမ်ခြေ ၂၀၀ ခန့်ရှိတဲ့ သစ်ဟောင်းပြင်ကျေးရွာက ဒေသခံအများစုဟာ ဘေးလွတ်ရာကိုတိမ်းရှောင်သွားကြရပြီး လူနည်းစုလောက်က ရွာမှာဆက်ရှိနေပါတယ်။

စက်တင်ဘာ ၄ ရက်ကလည်း လက်ပံတန်းမြို့နယ်၊ သရက်ချောင်းရွာမှာ စစ်ရှောင်ရာကနေ နေအိမ်ခေတ္တပြန်နေနေတဲ့အမျိုးသား ဒရုန်းဗုံးထိမှန်လို့ သေဆုံးသွားတယ်လို့ သိရပါတယ်။

စာတည်း – လင်း

ပစ်ခတ်တဲ့အဖွဲ့ပြန်ဆုတ်တဲ့လမ်းကို စစ်တပ်ကဗုံးချတိုက်ခိုက်လို့ သားအမိ ၂ ဦးသေဆုံး

ကြို့ပင်ကောက်၊ ဩဂုတ် ၂၉၊ ၂၀၂၅။

ပဲခူးတိုင်း၊ ကြို့ပင်ကောက်မြို့နယ်၊ ကြည်စုကျေးရွာနေသူ ပျူစောထီးတဦးပစ်သတ်ခံရပြီးနောက် ပစ်ခတ်တဲ့အဖွဲ့ပြန်ဆုတ်ရာလမ်းပိုင်းကို စစ်ကော်မရှင်တပ်က ဒရုန်းနဲ့ဗုံးချတိုက်ခိုက်ရာ ဒေသခံ သားအမိ ၂ ဦးသေဆုံးခဲ့တယ်လို့ သာယာဝတီခရိုင် တပ်ရင်း ၃၈၀၁၊ တပ်ခွဲ ၅၊ ကြို့ပင်ကောက် Hero ပြောက်ကျားတပ်ဖွဲ့က တပ်ခွဲမှူး ကိုမိုးသီးဆီက သိရပါတယ်။

ဩဂုတ် ၂၈ ရက်နေ့လယ် ၁၂ နာရီခွဲမှာ ကြည်စုရွာထိပ်နေ အသက် ၅၀ အရွယ် ပျူစောထီးကိုဘိုကြီး ဆိုသူကို နေအိမ်အတွင်းပစ်ခတ်ခဲ့တယ်လို့ ကြို့ပင်ကောက် Hero ပြောက်ကျားတပ်ဖွဲ့က တပ်ခွဲမှူး မိုးသီးကပြောပါတယ်။

“သူအိမ်က ရွာအဝင် ၅ အိမ်အကျော်မှာရှိတယ်။ အောက်တိုက်ခံထဲမှာရှိနေချိန်မှာ ဝင်ရောက်ရှင်းလင်းခဲ့တယ်။ အတိုနဲ့ ၂ ချက်ပစ်ခတ်ခဲ့တယ်”လို့ သူကပြောပါတယ်။

ပစ်ခတ်ခံရလို့ ကိုဘိုကြီးမှာ ရင်ဘတ်ကျည်ထိဒဏ်ရာနဲ့ နေရာတင်သေဆုံးပြီးနောက် လက်ပစ်ဗုံး ၁ လုံးသိမ်းဆည်းခဲ့တယ်လို့ တပ်ခွဲမှူးမိုးသီးက ပြောပါတယ်။

ကိုဘိုကြီးဟာ သူနေထိုင်တဲ့ကျေးရွာမှာ စစ်မှုထမ်းကြေးဆိုပြီး တအိမ်ထောင် ကျပ် ၆၀,၀၀၀ နှုန်း လစဥ် ကောက်ယူနေသူဖြစ်ပြီး တော်လှန်ရေးအဖွဲ့ဝင်တွေနဲ့ ထောက်ပို့ပြည်သူတွေကို စစ်ကော်မရှင်တပ်က ဖမ်းဆီးနိုင်အောင် သတင်းပေးနေသူဖြစ်တာကြောင့် ခုလိုပစ်ခတ်ခဲ့တာလို့ သိရပါတယ်။

ကိုဘိုကြီးကို ပစ်ခတ်ပြီးနောက် ဒေသကာကွယ်ရေးတပ်တွေပြန်ဆုတ်ခွာချိန် နေ့လယ် ၁ နာရီခွဲမှာ စစ်ကော်မရှင်တပ်က ကြည်စုရွာကို စစ်ကြောင်းထိုးအလောင်းလာကောက်ခဲ့တယ်လို့ ဆိုပါတယ်။

အဲ့ဒီနောက် စစ်ကော်မရှင်တပ်က ဒေသကာကွယ်ရေးအဖွဲ့ဝင်တွေ ပြန်ဆုတ်သွားတဲ့လမ်းပိုင်းကို ဒရုန်းနဲ့ ဗုံးသီးချတိုက်ခိုက်ခဲ့တာကြောင့် ကြည်စုရွာနဲ့ ၂ မိုင်ခန့်အကွာ အုတ်ဖိုမြို့နယ်၊ ဒေါင်ကြီးကျေးရွာ (ခ) ဒေါင်းစပါးကွင်း ကျေးရွာဘက်ကို ဗုံးသီး ၂ လုံးကျရောက်ပေါက်ကွဲခဲ့တယ်လို့ ဆိုပါတယ်။

“ဒရုန်းနဲ့ဗုံးချတာက ကျနော်တို့ ပျူစောထီးရှင်းတယ်ပေါ့နော်။ ပြီးတော့ နောက်ကြောင်းပြန်ဆုတ်လာတော့ ဒရုန်းဗုံးနှစ်လုံးကြဲတယ်။ နောက်ပိတ်ဆုံးအလုံးကျမှ သားအမိနှစ်ယောက်က နေရာတင်ပွဲချင်းပြီးသေသွားတာ။ ဗုံးကျလို့ သူတို့သားအမိက ကြောက်လန့်ပြီး စက်ဘီးဆွဲထုတ်ပြေးရာကနေ ထိတာ”လို့ တပ်ရင်းမှူးမိုးသီးက ဆက်ပြောပါတယ်။

ဒရုန်းဗုံးထိမှန်လို့ ဒေါင်းကြီးကျေးရွာနေ အသက် ၃၄ နှစ်အရွယ် မဇင်မာသင်းနဲ့ သမီးဖြစ်သူ အသက် ၆ နှစ်အရွယ် မယွန်းမီတို့ နေရာတင်သေဆုံးခဲ့တယ်လို့ ဆိုပါတယ်။

စစ်ကော်မရှင်စစ်ကြောင်းကတော့ အလောင်းလာကောက်ပြီး ဒရုန်းဗုံးချပြီးနောက် ကြို့ပင်ကောက်ဘက်ကို ပြန်ဆုတ်ခွာသွားတယ်လို့ သိရပါတယ်။

ဇွန် ၂၀ ရက်နေ့ကလည်း ကြို့ပင်ကောက်မြို့နယ်၊ မှန်ပင်ထူးကျေးရွာမှာ စစ်တပ်သတင်းပေးဆိုသူ ကိုမိုးကို ဒေသကာကွယ်ရေးအဖွဲ့ဝင်တွေက ဖမ်းဆီးသတ်ခဲ့တဲ့ဖြစ်စဥ်ရှိခဲ့ပါသေးတယ်။

ပုံစာ – ပစ်ခတ်ခံရသည့် ပျူစောထီးကိုဘိုကြီးနှင့် စစ်ကော်မရှင်တပ် ဒရုန်းဗုံးကြဲခဲ့သည့် ဒေါင်းစပါးကွင်းရွာ။

စာတည်း – လင်း

ပခုက္ကူ၊ ဇူလိုင် ၂၉၊ ၂၀၂၅။

မကွေးတိုင်း၊ ပေါက်မြို့နယ်တောင်းပိုင်းရှိ ပျူစောထီးအင်အားကောင်းတဲ့ ပင်တောင်ရွာက ပျူစောထီး တပ်ဖွဲ့ဝင် ၂ ဦးကို ဖမ်းဆီးခဲ့တယ်လို့ ပခုက္ကူခရိုင်အခြေစိုက် Rocket Fighter ပြည်သူ့ကာကွယ်ရေး တပ်ဖွဲ့က ပြောပါတယ်။

ဖမ်းဆီးခံရသူတွေဟာ အသက် ၁၈ ဝန်းကျင် ထွန်းဇော်မင်းနဲ့ ကျော်သူဝင်းတို့ ဖြစ်ပြီး ပျူစောထီးအင်အားရာချီရှိတဲ့ ပင်တောင်ရွာကနေ ပခုက္ကူမြို့နယ်အတွင်းကို ရိက္ခာသယ်ဖို့ထွက်လာချိန် ပခုက္ကူမြို့နယ် တနေရာမှာ ဇူလိုင် ၁၇ ရက် မနက် ၁၀ နာရီလောက်က ဖမ်းမိခဲ့တာလို့ ဆိုပါတယ်။

“ အဲ့ဒီရွာက ပျူစောထီးအင်အားက များတယ်၊ သူတို့ကို ကျနော်တို့ ရိက္ခာဖြတ်‌တောက်ထားတယ်၊ သူတို့ ရွာမှာ အခက်အခဲတွေ့နေတာတော့ အမှန်ပဲ၊ ရှေ့လျှောက်လည်း ဒီလိုမျိုး ရိက္ခာဖြတ်တောက် တာတွေ လုပ်နေမှာပါ” လို့ Rocket Fighter ပြည်သူ့ကာကွယ်ရေးတပ်တာဝန်ခံက ပြောပါတယ်။

ဖမ်းမိထားသူ ၂ ဦးကို စစ်ဆေးမေးမြန်းတာတွေလုပ်ဆောင်နေပြီး တရားဥပဒေအတိုင်း ဆက်လက်လုပ်ဆောင်သွားမယ်လို့ သူက ဆက်ပြောပါတယ်။

အိမ်ခြေ ၅၀၀ ကျော်ရှိတဲ့ ပင်တောင်ရွာမှာ ပျူစောထီး အင်အား ၁၀၀ ဝန်းကျင်လောက်ရှိပြီး ပျူစောထီးတွေကြောင့် ကျန်ဒေသခံတွေဟာ နေရပ်စွန့်ခွာ ထွက်ပြေးနေရတယ်လို့ သိရပါတယ်။

ဖမ်းဆီးမှုကို နယ်မြေခံ Freedom Fighter အဖွဲ့က ဦးဆောင်ပြီးတော့ Rocket Fighter နဲ့ နယ်မြေခံမဟာမိတ်အဖွဲ့တွေ ပူးပေါင်းလုပ်ဆောင်ခဲ့တာဖြစ်ပါတယ်။

စာတည်း – ဟိန်းစံ

မြိုင် ၊ ဇူလိုင် ၂၇၊ ၂၀၂၅ ။

မကွေးတိုင်း၊ မြိုင်မြို့နယ်အတွင်း စစ်ကောင်စီတပ်နဲ့ပျူစောထီးတပ်ဖွဲ့တွေအထိုင်ချတပ်စွဲထားတဲ့ သရက်ကန်ကျေးရွာကနေ ရိက္ခာရှာထွက်လာတဲ့ အမျိုးသမီးနဲ့ကလေးတွေကို လွတ်မြောက်ဒေသကို ကူညီပို့ဆောင်ပေးခဲ့တယ်လို့ TYK ပြောက်ကျားတပ်ဖွဲ့ ဆီက သိရပါတယ်။

ဇူလိုင် ၂၆ ရက်မှာ သရက်ကန်ကျေးရွာရှိ စစ်ကောင်စီနဲ့ပျူစောထီးတွေက ရိက္ခာထွက်ရှာခိုင်းတဲ့ သက်ကြီးအမျိုးသမီး ၂ ဦး၊ အမျိုးသား ၁ ဦးနဲ့ ကလေး ၂ ဦးကို သရက်ကန်ရွာရဲ့ မီတာ ၅၀၀ ခန့်အကွာမှာ တွေ့ရှိခဲ့ပြီး အမျိုးသမီး ၁ ဦးမှာ မိုင်းထိဒဏ်ရာရရှိထားတယ်လို့ ဆိုပါတယ်။

“ ကျနော်တို့ မဟာမိတ်တွေနဲ့ စုပေါင်းပြီး ကယ်ထုတ်ခဲ့တာ၊ လက်နက်ကိုင်**တွေက ကျနော်တို့ရှိမှန်းသိတော့ မလိုက်ရဲကြဘူး၊ ရွာထဲမှာပဲ ကျန်ခဲ့ကြတာ၊ ဒဏ်ရာရတဲ့သူတွေကို ဆေးကုသပေးပြီး လွတ်မြောက်နယ်မြေတနေရာကို ပို့ဆောင်လိုက်ပါတယ်” လို့ TYK ပြောက်ကျားတပ်ဖွဲ့ဝင် စောကြီးက မြေလတ်အသံကို ပြောပါတယ်။

PDF တွေ ကယ်ဆယ်ပေးခဲ့တဲ့ အရပ်သားတွေဟာ သရက်ကန်ကျေးရွာမှာနေထိုင်တဲ့ အသက် ၅၈ နှစ် ဒေါ်အေး၊ အသက် ၆၀ နှစ် ဒေါ်ငြိမ်း၊ အသက် ၃၀ ကျော် ကိုဆန်းလင်းနဲ့ ၁၀ နှစ် ဝန်းကျင်ကလေး ၂ ဦး ဖြစ်ပြီး အဲ့ဒီထဲက ဒေါ်အေးမှာ သရက်ကန်ရွာကနေထွက်ခွာလာစဥ် မိုင်းထိဒဏ်ရာရခဲ့တာဖြစ်ပြီး TYK ပြောက်ကျားတပ်ဖွဲ့၊ ဒေါင်းမာန်အဖွဲ့၊ မြိုင်ပကဖ တပ်ခွဲ ၁ တပ်ခွဲ ၄ စင်္ကြာဒေသ ကာကွယ်ရေးအဖွဲ့နဲ့ အညာမြေတပ်ပေါင်းစုတို့က ပူးပေါင်းကယ်ဆယ်ပေးခဲ့တာဖြစ်တယ်လို့ သိရပါတယ်။

သရက်ကန်ကျေးရွာဟာ အိမ်ခြေ ၅၀၀ ကျော်ရှိ ပျူစောထီးအင်အားတောင့်တင်းတဲ့ ကျေးရွာဖြစ်ပြီး ပခုက္ကူတပ်မ ၁၀၁ က စစ်သားတွေနဲ့ ပျူစောထီး အင်အား ၁၀၀ ကျော် တပ်စွဲနေထိုင်‌နေကာ အဲ့ဒီရွာက တော်လှန်ရေးတပ်ဖွဲ့ဝင်တွေ ကယ်ထုတ်ပေးခဲ့တဲ့ ပြည်သူ ၆၀ ကျော် ရှိပြီလို့ သိရပါတယ်။

စာတည်း – ဟိန်းစံ

ပွင့်ဖြူ၊ ဇူလိုင် ၁၄၊ ၂၀၂၅။

မကွေးတိုင်း၊ ပွင့်ဖြူမြို့နယ်၊ ညောင်ပင်စောင့်ကျေးရွာက လူငယ် ၂ ဦးကို ပျူစောထီးတွေက နေအိမ်တွေထဲထိဝင်ဖမ်းပြီး စစ်မှုထမ်းပို့လိုက်တယ်လို့ ဒေသခံတွေဆီက သိရပါတယ်။

ဖမ်ဆီးခံရသူတွေက အသက် ၂၂ နှစ်အရွယ် မောင်သက်ကိုကိုနဲ့ အသက် ၂၅ နှစ်အရွယ် မောင်ထက်ဝေလင်းတို့ဖြစ်ပြီး ဇူလိုင် ၉ ရက် ည ၈ နာရီ ၄၀ မိနစ်ခန့်မှာ ကျောင်းကုန်းကြီး ကျေးရွာက ပျူစောထီးရွှေထွန်းနဲ့ ကျော်ထက်ဘို တို့ဦးဆောင်တဲ့ အင်အား ၁၅ ဦးအဖွဲ့က ကားနဲ့ ရောက်လာပြီး နေအိမ်တွေထဲထိ ဝင်ရောက်ဖမ်းသွားတယ်လို့ ဆိုပါတယ်။

“အဲနေ့က ဥပုသ်နေ့ဆိုတော့ လပြည့်နေကြီး တနေကုန်ဥပုသ်စောင့်ပြီး အိမ်မှာအိပ်နေကြတာ။ တံခါးတွေကို ချိုးဖျက်ဝင်ပြီးတော့ ကလေးတွေကို သေနတ်ထောက်ပြီးခေါ်သွားတာ။ “လို့ ဒေသခံတဦးက ပြောပါတယ်။

အဆိုပါ လူငယ် ၂ ဦးကို ညတွင်းချင်း ကျောင်းကုန်းကြီးရွာ ပျုစောထီးစခန်းကို ဖမ်းသွားပြီးနောက် ဇူလိုင် ၁၀ ရက်မှာ ပွင့်ဖြူအခြေစိုက်ဝါစိုက်ပျိုးရေးတပ်ကို ပို့လိုက်တယ်လို့ ဆိုပါတယ်။

လူငယ်တွေဖမ်းဆီးခံရတာနဲ့ပတ်သက်ပြီး မိသားစုဝင်တွေကဝါစိုက်ပျိုးရေးတပ်ကို လိုက်သွားပြီး ငွေနဲ့ပြန်ရွေးယူဖို့ သွားရောက်ခဲ့ပေမယ့် အတွေ့မခံတဲ့အတွက်ပြန်လာရတယ်လို့ အထက်ပါ ဒေသခံကပြောပါတယ်။

အဲဒီနောက် ဇူလိုင် ၁၁ ရက်မှာ မကွေးတိုင်းထဲက စစ်အခြေခံလေ့ကျင့်ရေးကျောင်းတခုကို စစ်မှုထမ်းအပတ်စဥ် ၁၅ အတွက် ပို့ဆောင်လိုက်တယ်လို့သာသိရပြီး ဒီကနေ့အထိ အဆက်အသွယ်မရ ဖြစ်နေတယ်လို့ သိရပါတယ်။

ပြီးခဲ့တဲ့ဇွန် ၁၀ ရက်နဲ့ ၁၁ ရက်မှာလည်း ပွင့်ဖြူမြို့နယ်၊ ကျွဲခြံကျေးရွာနဲ့ ကျောက်ပုံကျေးရွာတွေက အမျိုးသား ၆ ဦးဖမ်းဆီးခံရပြီးနောက် ၂ ဦးက ပြည်သူစစ်မှုထမ်းအပတ်စဥ် ၁၄ တက်ရောက်ဖို့ စစ်သင်တန်းပို့ခံလိုက်ရတယ်လို့ သိရပါတယ်။

စာတည်း – လင်း

မြေလတ်အသံ၊ ဇွန် ၂၃၊ ၂၀၂၅။

ပဲခူးတိုင်း၊ ဇီးကုန်းမြို့နယ်၊ ရွှေဖလားကျေးရွာက ပျူစောထီး ၁ ဦးကို ပစ်ခတ်ရာသေဆုံးခဲ့တယ်လို့ ဇွန် ၂၂ ရက်မှာ သာယာဝတီခရိုင် တပ်ရင်း (၁)၊ တပ်ခွဲ (၂) Phoenix DF ကထုတ်ပြန်ပါတယ်။

ပစ်ခတ်ခံရသူဟာ ပျူစောထီး ကုလား(ခ)ဘသန်းဖြစ်ပြီး ဇွန် ၂၀ ရက်ည ၇ နာရီကျော်က ၎င်းနေအိမ်အတွင်းမှာ ပစ်ခတ်ခဲ့တာလို့ဆိုပါတယ်။

“ပြန်လည်ခုခံတာမျိုးတော့မရှိဘူး။ သူ့ကို ၅ ချက်ပစ်ခဲ့တယ်လို့ပြောပါတယ်။ ပစ်ခတ်ချိန် သူ့မိန်းမက ထွက်ပြေးသွားတယ်လို့သိရပါတယ်။ သူအပစ်ခံရပြီး စကစတွေရောက်ရှိလာတယ်လို့သိရပါတယ်”လို့ သာယာဝတီခရိုင် တပ်ရင်း (၁)၊ တပ် ခွဲ(၂) Phoenix DF မှတာဝန်ရှိသူတဦးကပြောပါတယ်။

ပစ်ခတ်ရှင်းလင်းချိန် သူ့ရဲ့ဇနီးဖြစ်သူ ထွက်ပြေးလွတ်မြောက်ခဲ့ရာ ၎င်းနေအိမ်အတွင်းကလက်ကိုင်ဖုန်း ၃ လုံးနဲ့ လက်ပတ်နာရီ ၁ လုံးကိုသိမ်းဆည်းခဲ့တယ်လို့ ဆိုပါတယ်။

“အဲ့ဒီလူ(ဘသန်း)မှာက ပစ္စတို ၁ လက်ရှိတယ်။ လက်ပစ်သီး ၂ လုံးရှိတယ်။ ရှာမတွေ့လို့ မရလိုက်ဘူး။ ကျနော်တို့ထင်တာက သူ့မိန်းမယူပြီးပြေးတယ်လို့ထင်တယ်”လို့ အထက်ပါ တာဝန်ရှိသူကဆိုပါတယ်။

ကုလား(ခ)ဘသန်းဟာ ပစ္စတိုခါးမှာထိုးပြီး ရပ်ရွာထဲမှာ အဓမ္မစစ်မှုထမ်းကြေးပေးတောင်းခံတာ၊ ရွာခံ လူငယ်တဦးကိုလည်း စစ်မှုထမ်းအဓမ္မထည့်ပေးလိုက်တာ၊ PDF တွေကိုလည်း သူ့ အနေနဲ့ ဂရုမစိုက်ကြောင်းကြွေးကြော်တာကြောင့် အခုလိုပစ်ခတ်ခဲ့ရတာလို့ သူကဆက် ပြောပါတယ်။

အလားတူပြီးခဲ့တဲ့ဇွန် ၂၀ ရက်ကလည်း ကြို့ပင်ကောက်မြို့နယ်၊ မှန်ပင်ထူးကျေးရွာမှ စစ်ကောင်စီ တပ်သတင်းပေးဆိုသူ ကိုမိုးကို Black Dragon (GBK-PDF)က ပစ်ခတ်ရှင်းခဲ့တယ်လို့ သိရပါတယ်။

စာတည်း – လင်း