ပခုက္ကူ

မကွေး၊ မေ ၂၅၊ ၂၀၂၆။

မကွေးတိုင်း၊ ပခုက္ကူမြို့အခြေစိုက် အမှတ် ၂၅၂ ခြေလျင်တပ်ရင်းက စစ်ကော်မရှင်တပ်သား ၂ ဦး Cobra One Pakokku တပ်ဖွဲ့ဆီ ဘက်ပြောင်းခိုလှုံလာတယ်လို့ မေ ၂၄ ရက်မှာ အဲ့ဒီအဖွဲ့က သတင်းထုတ်ပြန်ပါတယ်။

စစ်မှုထမ်းအပတ်စဥ် ၂၀ ဆင်းပြီးနောက် ခလရ ၂၅၂ မှာတာဝန်ထမ်းဆောင်နေကြတဲ့ တပ်သားကျော်ဇောထွေးနဲ့ တပ်သားဝင်းသန့်နိုင်တို့ဟာ မေ ၂၁ ရက်နဲ့ ၂၃ ရက်တို့မှာ Cobra One Pakoka ဆီ ချိတ်ဆက်ဘက်ပြောင်းလာခဲ့ကြတာလို့ ဆိုပါတယ်။

“ကျော်ဇောထွေးက ထိုင်းနိုင်ငံမှာအလုပ်သွားလုပ်ရင်း အထောက်ထားမပါလို့ ထိုင်းရဲကဖမ်းပြီး ထိုင်းနိုင်ငံထောင်ချပါတယ်။ လွတ်ရက်ရောက်တော့ စကစ လက်ထဲထိုးပေးလိုက်တာပါ။ တပ်သား (ဝင်းသန့်နိုင်) က မုံရွာမြို့ပေါ်မှာအဆွဲခံရတာပါ။ “လို့ Cobra One Pakokku ရဲ့တာ၀န်ခံ ဗိုလ်မြွေဟောက်က မြေလတ်အသံကိုပြောပါတယ်။

ဘက်ပြောင်းလာချိန် လက်နက်ခဲယမ်းတွေမပါလာတဲ့အတွက် ဆုငွေချီးမြှင့်တာမျိုးမရှိပေမယ့် သွားချင်တဲ့နေရာကို ပို့ဆောင်ပေးခဲ့တယ်လို့ အထက်ပါတာ၀န်ခံကဆိုပါတယ်။

အဲ့ဒီ ခလရ ၂၅၂ တပ်ရင်းထဲမှာ အင်အားမရှိတဲ့အတွက် ဒေသခံတွေကိုပေါ်တာဆွဲ‌၊ စစ်သင်တန်းပေးပြီးနောက် ရခိုင်ပြည်နယ်အပါ ရှေ့တန်းနေရာတွေကိုပို့ဆောင်နေတယ်လို့လည်း ဘက်ပြောင်းလာသူတွေက တဆင့် သိရတယ်။

စာတည်း – လင်း

ပခုက္ကူ၊ ဧပြီ ၂၉၊ ၂၀၂၆။

မကွေးတိုင်း၊ ပခုက္ကူမြို့နယ်၊ အင်ပင်ကျေးရွာအနီးမှာ စစ်ကြောင်းထဲကနေ ထွက်ပြေးလာတဲ့ စစ်ကော်မရှင်တပ်သား ၁ ဦးကို လက်နက်နဲ့အတူဖမ်းမိခဲ့တယ်လို့ ဒေါင်းညီနောင်ပြည်သူ့ကာကွယ်ရေးတပ်ဖွဲ့ဆီက သိရပါတယ်။

ဖမ်းမိသူဟာ ပခုက္ကူအခြေစိုက် တပ်မ ၁၀၁ တပ်က အသက် ၃၂ နှစ်အရွယ် ဓနု (ခ) အောင်ငြိမ်းချမ်း ဆိုသူဖြစ်ပြီး ဧပြီ ၂၂ ရက်မနက် ၇ နာရီခန့်မှာ မကျီးကန်ကျေးရွာကိုစစ်ကြောင်းထိုးပြီး အင်ပင်ရွာကို ပြန်လာချိန် ထွက်ပြေးလာစဥ်မှာ ဖမ်းမိခဲ့တာလို့ ဆိုပါတယ်။

“အင်ပင်အထိုင်ဂိတ်ကိုပြန်အဝင်မှာ ဒီကောင်က ဆေးကြောင်ကြောင်ပြီး ထွက်ပြေးလာတာ။ မြေပြင်ပြည်သူတွေက သတင်းပေးတာနဲ့ လိုက်လံရှာဖွေဖမ်းဆီးထားတာ။ ပြည်သူတွေက လှမ်းပြောတယ်။ စစ်သား ၁ ယောက်လက်နက်နဲ့ လျှောက်သွားနေတယ်ဆိုလို့ လိုက်ဖမ်းတာ။ သူကို အင်ပင်အရှေ့ဘက် မီတာ ၂၅၀ ခန့်တောထဲမိတာ။ သူ့ကိုမိတာလည်း ရုန်းရင်းဆန်ခတ်မဖြစ်ဘူး။ သူ့လူတွေထင်ပြီးလိုက်လာတာ”လို့ ဒေါင်းညီနောင်ပြည်သူ့ကာကွယ်ရေးတပ်ဖွဲ့တာဝန်ခံထံက သိရပါတယ်။

အဆိုပါတပ်သားဟာ စစ်မှုထမ်းအပတ်စဥ် ၁၇ ဆင်းပြီးနောက် အင်ပင်ရွာမှာတာဝန်ကျနေတာဖြစ်ပြီး
လက်ရှိမှာတော့ စစ်သုံးပန်းဥပဒေအရထိန်းသိမ်းထားကာ ဖမ်းမိချိန်မှာ MA 1 ၁ လက်၊ ကျည်ဘောက် ၂ ခုနဲ့ကျည် ၆၅ တောင့်ကိုပါ သိမ်းဆည်းရမိခဲ့တယ်လို့ သိရပါတယ်။

ကာကွယ်ရေးတပ်ဖွဲ့ဝင်တွေရဲ့စစ်ဆေးချက်အရ သူဟာ ပင်းတယမြို့ခံဖြစ်ပြီး ၂၀၂၅ စက်တင်ဘာလမှာ နေအိမ်မှာရှိနေချိန် ပေါ်တာဆွဲဖမ်းဆီးခံရပြီးနောက် ဗထူးစစ်သင်တန်းကျောင်းကို ပို့ဆောင်ခံလိုက်ရတယ်လို့ ဆိုပါတယ်။

သင်တန်း ၃ လခွဲတက်ရောက်ပြီးနောက် ပခုက္ကူ တပ်မ ၁၀၁ ကိုတာဝန်ကျချိန် ပုဂံ-ညောင်ဦးဘက် ရိက္ခာပို့ ၁ ကြိမ်သာ ရှေ့တန်းလိုက်ခဲ့ရပြီးနောက် ပခုက္ကူမြို့မီးသတ်ရုံး၊ စက်မှုဇုံဂိတ်တွေမှာ အစောင့်တာဝန်ကျခဲ့ကာ အဲ့ဒီကတဆင့် အင်ပင်ရွာတဝိုက်ကိုစစ်ကြောင်းထိုးရာမှာ လိုက်လာခဲ့သူဖြစ်လို့ သိရပါတယ်။

စာတည်း – လင်း

ပခုက္ကူ၊ ဧပြီ ၁၆၊ ၂၀၂၆။

မကွေးတိုင်း၊ ပခုက္ကူမြို့နယ်၊ မြောက်လူးကန်ကျေးရွာကို စစ်ကော်မရှင်တပ်တွေက မီးရှို့ဖျက်ဆီးခဲ့တာကြောင့် နေအိမ် ၆၀၀ ကျော်ပျက်စီးခဲ့ပြီး ဒေသခံတွေလည်း အကူညီလိုအပ်နေတယ်လို့ ကာကွယ်ရေးတပ်ဖွဲ့ဝင်တဦးဆီက သိရပါတယ်။

ဧပြီ ၁၂ ရက်မနက် ၈ နာရီမှာ မြောက်လူးကန်ရွာဘုန်းကြီးကျောင်းတွင်းတပ်စွဲထားတဲ့ စစ်ကော်မရှင်တပ်ဖွဲ့ဝင်တွေက မီးရှို့ခဲ့တာကြောင့် နေအိမ် ၆၂၅ လုံး၊ စာသင်ကျောင်းအပါအဝင် လယ်ယာသုံး စက်ယန္တယားတွေလည်း မီးလောင်ပျက်စီးခဲ့ကာ ၄ ရက်ကြာထိ လာရောက်ကူညီသူတွေမရှိသေးဘူးလို့ ဆိုပါတယ်။

“ဘာမှ မလာသေးဘူး။ NUG ဘက်ကလည်း အခုအချိန်ထိမလာသေးဘူး။ ရွာခံတွေဆုံးရှုံးသွားတာက များပါတယ်။ ပဲခွဲစက်တွေ၊ မြေပဲခွဲစက်တွေ မီးထဲပါသွားတယ်။ တန်ဖိုးကြီး ရွှေငွေဆုံးရှုံးတာမရှိပေမယ့် အိမ်၊ အိုးခွက်ပန်ကန်တွေကအစ ဘာမှမရှိကြတော့တာ”လို့ ကာကွယ်ရေးအဖွဲ့ဝင်တဦးက ပြောပါတယ်။

လတ်တလောမှာ အိမ်ခြေ ၅၀ ဝန်းကျင်သာကျန်ခဲ့ပြီး ဘုန်းကြီးကျောင်းမှာ စစ်ကော်မရှင်အင်အား ၇၀ လောက်နဲ့ရှိနေသေးတာကြောင့် ယာယီတဲတွေတောင် ပြန်ဆောက်ပြီးနေဖို့မဖြစ်နိုင်သေးဘူးလို့ သူကဆက်ပြောပါတယ်။

မြောက်လူးကန်ကျေးရွာဟာ သွပ်မိုးထရံကာ၊ ပျဥ်ခင်းနေအိမ်နဲ့ ထရံကာဖက်မိုးပျဥ်ခင်းနေအိမ်များပြီး အုတ်တိုက်အိမ်တွေနည်းပါးတာကြောင့် တရွာလုံးနီးပါး မီးလောင်ပျက်စီးခဲ့ရတာလို့ ဆိုပါတယ်။

အဲ့ဒီရွာဟာ ပခုက္ကူမြို့နဲ့ ၅ မိုင်ခန့်အကွာ ပခုက္ကူလေယာဉ်ကွင်းနဲ့ ၁ မိုင်ခန့်အကွာမှာတည်ရှိပြီး ၂၀၂၄ ဇူလိုင်ကစတင်ကာ စစ်ကော်မရှင်တပ်သားတွေက လာရောက်တပ်စွဲနေတာကြောင့် ရွာခံ ၂,၀၀၀ ခန့် စစ်ရှောင်ထွက်ပြေးနေကြရတာလို့ သိရပါတယ်။

စာတည်း – လင်း

ပခုက္ကူ၊ မတ် ၂၅၊ ၂၀၂၆။

မကွေးတိုင်း၊ ပခုက္ကူအခြေစိုက် Black God အဖွဲ့ဝင် ၁ ဦး စစ်ကော်မရှင်တပ်ဆီ လက်နက်နဲ့အတူ ဘက်ပြောင်းသွားတယ်လို့ အညာမြေတပ်ပေါင်းစုတာဝန်ရှိသူဆီက သိရပါတယ်။

ဘက်ပြောင်းသွားသူဟာ အသက် ၂၁ နှစ်အရွယ် ဖြူဖွေး (ခ) ကောင်းခန့်ဆိုသူဖြစ်ပြီး မတ်လ ၂၄ ရက် နေ့လယ် ၂ နာရီခန့်မှာ တာဝန်ကျရာနေရာကနေ ကမ္မမြို့ကိုသွားမယ်ဆိုပြီး ထွက်သွားရာမှ စစ်ကော်မရှင်တပ်ဆီ ဘက်ပြောင်းသွားတာလို့ဆိုပါတယ်။

“သူက ရှေ့တန်းမှာတာဝန်ကျနေတာမှ ရှေ့တန်းကခဏနားတဲ့နေ့ခင်း ၂ နာရီလောက်မှာ ကမ္မကိုသွားစရာရှိတယ်ဆိုပြီး ဒေသခံ ၁ ယောက်ကိုလိုက်ပို့ခိုင်းတယ်။ ကွန်မန်ဒါကိုလည်း စျေးဝယ်သွားစရာရှိတယ်ပြောပြီးသွားတော့ ‘ သွားလိုက် ပြန်လာပေါ့’ ဆိုပြီး လွှတ်လိုက်တာ။ အချိန်တန်လို့ပြန်မလာမှစုံစမ်းတော့ ** ဘက်ဝင်သွားတာ သိလိုက်ကြတာ”လို့ အညာမြေတပ်ပေါင်းတာဝန်ရှိသူက ပြောပါတယ်။

ဖြူဖွေး (ခ) ကောင်းခန့်ဟာ ကမ္မမြို့ကတဆင့် ညောင်ဂျစ်ပင်ရွာ ပျူစောထီးစခန်းကိုသွားတယ်လို့သိရပြီး သူနဲ့အတူ MA 1 သေနတ် ၁ လက်၊ ကျည်ဘောက် ၃ ခုကို ယူဆောင်သွားတယ်လို့ ဆိုပါတယ်။

သူဟာ ၂၀၂၂ ခုနှစ်ကတည်းက Black God တပ်ဖွဲ့ဆီ ဝင်ရောက်လာသူဖြစ်တယ်လို့ ဆိုပါတယ်။

Black God အဖွဲ့ဟာ LPDF အဖွဲ့ ၁ ခုဖြစ်ကာ အညာမြေတပ်ပေါင်းစုအဖွဲ့တွေနဲ့ မဟာမိတ်ဆက်ဆံရေးရှိပြီး စစ်ကော်မရှင်ကို ပူးပေါင်းတိုက်ခိုက်နေတဲ့အဖွဲ့ဖြစ်တယ်လို့ သိရပါတယ်။

အဆိုပါကိစ္စနဲ့ပတ်သက်ပြီး သက်ဆိုင်ရာတပ်ဖွဲ့တာဝန်ရှိသူဆီ မြေလတ်အသံက ဆက်သွယ်မေးမြန်းထားပေမယ့် ပြန်လည်ဖြေကြားမျိုးမရှိသေးပါဘူး။

၂၀၂၆ ဇန်နဝါရီ ၁ ရက်ကနေ မတ်လ ၂၅ ရက်အထိ ပခုက္ကူအခြေစိုက် တော်လှန်ရေးအဖွဲ့တွေက တပ်ဖွဲ့ဝင် ၁၅ ဦးခန့် စစ်ကော်မရှင်ဘက်ကို ဘက်ပြောင်းသွားတာကို ကြားသိထားရတယ်လို့ အညာမြေတပ်ပေါင်းစု ဆီက သိရပါတယ်။

စာတည်း – လင်း

ပခုက္ကူ၊ မတ် ၃၊ ၂၀၂၆။

မကွေးတိုင်း၊ ပခုက္ကူမြို့နယ်၊ မြောက်လူးကန်ကျေးရွာမှာအထိုင်ချပြီး ပြည်သူနေအိမ်တွေကို ဝင်ရောက်ကာ လက်နက်ပြလုယက်နေတဲ့ရဲတပ်သားကို ဖမ်းဆီးထားတယ်လို့ ဒေါင်းညီနောင် ပြည်သူကာကွယ်ရေးအဖွဲ့တာဝန်ရှိသူတွေဆီက သိရပါတယ်။

ဖမ်းဆီးရမိထားတဲ့ ရဲတပ်သားဟာ ပခုက္ကူမြို့နယ်ရဲတပ်ဖွဲ့မှ ရဲတပ်သား ကော့သောင်းသားလေး (ခ) သူရအောင်ဆိုသူဖြစ်ပြီး မတ်လ ၁ ရက် မနက် ၁ နာရီခန့်မှာ ရွာထဲကနေအိမ် ၁ အိမ်ကိုဝင်ရောက်ပြီး သေနတ်ပြလုယက်နေရာက အိမ်ရှင်တွေရဲ့အော်ဟစ်မှုကြောင့် ထွက်ပြေးချိန်မှာ ရွာအရှေ့တောင်ပိုင်းမှာ ပစ်ခတ်ဖမ်းဆီးခဲ့တာ လို့ ဆိုပါတယ်။

“သူတို့က ရွာဘုန်းကြီးကျောင်းမှာ တပ်စွဲထားတာ။ ရွာထဲမှာကျန်နေတဲ့ပြည်သူတွေရှိသေးတယ်။ နေတဲ့ပြည်သူနေအိမ်တွေကို ဒီကောင်တယောက်တည်း ညညထွက်ပြီး သေနတ်ထောက်ပြီးဓားပြတိုက်တယ်။ ရွှေတွေ့ရွှေယူတယ်။ ဖုန်းတွေ့ဖုန်းယူတယ်။ အကြမ်းဖက်တာတွေလုပ်တာပေါ့။ သတင်းရလို့သွားစောင့်တဲ့နေ့မှာ ပြည်သူကိုဓားပြဝင်တိုက်တာမှာ ပြည်သူကထအော်တော့ ပြည်သူကိုသေနတ်နဲ့ပစ်ပြီးတော့ ထွက်ပြေးလာတဲ့အချိန်မှာ လိုက်လံပစ်ပြီးဖမ်းခဲ့တာ”လို့ ဒေါင်းညီနောင်ပြည်သူကာကွယ်ရေးအဖွဲ့တာဝန်ခံ ဦးကုလားကပြောပါတယ်။

အဆိုပါရဲတပ်သားကိုဖမ်းမိချိန်မှာ G3 သေနတ် ၁ လက်၊ ကျည် ၂၇၈ တောင့်၊ 9 mm ပစ္စတိုကျည် ၂၂ တောင့်၊ လက်ပစ်ဗုံး ၁ လုံးနဲ့ ဖုန်းတို့ကို သိမ်းဆည်းရမိခဲ့တယ်လို့ ဆိုပါတယ်။

ရဲတပ်သားက ပစ်ခတ်ခဲ့တဲ့ကျည်ထိမှန်လို့ အသက် ၂၈ နှစ်အရွယ် အိမ်ရှင်အမျိုးသမီးမှာ ခြေထောက်ကျည်ထိဒဏ်ရာရပြီး ဆေးကုသမှုခံယူနေရတယ်လို့လည်း သိရပါတယ်။

ရွာအနောက်ဘက်ရှိ စစ်ကော်မရှင်တပ်ဖွဲ့ဝင်တွေအထိုင်ချထားတဲ့ ဘုန်းကြီးကျောင်းနဲ့ အခုဖမ်းဆီးခဲ့တဲ့နေရာဟာ မီတာ ၃၅၀ ခန့်ကွာဝေးပြီး ဖမ်းဆီးပြီးနောက် အမြန်ဆုတ်ခွာလာရတယ်လို့ ဆိုပါတယ်။

လတ်တလောစစ်ဆေးချက်အရ အဆိုပါရဲတပ်သားမှာ ကျေးရွာထဲကနေ သေနတ်ပြပြီး ဓားပြတိုက် လုယက်မှုကျူးလွန်ထားတာ ၈ ကြိမ်ရှိပြီး ဖုန်း ၈ လုံး၊ ငွေသား ကျပ် သုံးသောင်း၊ ရွှေလက်စွပ် ၁ ကွင်း၊ ဆွဲကြိုး ၁ ကုံးသာ ရရှိကြောင်းထွက်ဆိုထားပြီး စစ်ဆေးမှုတွေဆက်လုပ်နေတယ်လို့ ဆိုပါတယ်။

လတ်တလောမှာတော့ အချုပ်နဲ့ထိန်းသိမ်းထားကာ စစ်သုံ့ပန်းဥပဒေအရ အရေးယူသွားမှာဖြစ်သလို ကျူးလွန်ထားတဲ့ပြစ်မှုအလိုက် ထပ်မံအရေးယူဖို့လည်းရှိနေတယ်လို့ သိရပါတယ်။

စာတည်း – လင်း

■ မင်းတုန်းမှာလည်း စစ်ကော်မရှင်တပ်က စစ်ကြောင်းထိုးပြီး နေအိမ်တွေကိုမီးရှို့

ဒိန်းဂျား၊ အောင်စိုး

မြစ်ခြေ၊ ဇန်နဝါရီ ၁၄၊ ၂၀၂၆။

မကွေးတိုင်း၊ ပခုက္ကူနဲ့ မင်းတုန်းမြို့နယ်တွေမှာ စစ်ကော်မရှင်တပ်က လေကြောင်းကနေဗုံးကြဲတိုက်ခိုက်တာနဲ့ မြေပြင်စစ်ကြောင်းထိုးမီးရှို့တာတွေ လုပ်ဆောင်ခဲ့တယ်လို့ ဒေသခံတွေနဲ့ ဒေသကာကွယ်ရေးတပ်ဖွဲ့တွေထံက သိရပါတယ်။

မြစ်ခြေမြို့နယ်၊ သရက်တောရွာကို စစ်ကော်မရှင်တပ် တိုက်လေယာဥ်နဲ့ ဗုံးကြဲခဲ့တာကြောင့် အမျိုးသမီး ၁ ဦးသေဆုံးပြီး နေအိမ်ပျက်စီးမှုတွေရှိခဲ့တယ်လို့ မြစ်ခြေမြို့ခံတဦးက ပြောပါတယ်။

ဇန်နဝါရီ ၁၃ ရက် ယမန်နေ့ ညနေ ၃ နာရီခွဲဝန်းကျင်မှာ သရက်တောရွာအနီးယာခင်းတွေထဲက တဲအိမ်ပေါ်ကို ဗုံးကြဲချခဲ့တဲ့အပြင် စက်လတ်တွေနဲ့ပါပစ်ခတ်သွားခဲ့တာကြောင့် အသက် ၄၀ နှစ်အရွယ်အမျိုးသမီး ၁ ဦးသေဆုံးပြီး ၎င်းရဲ့ခင်ပွန်းဖြစ်သူ အသက် ၅၀ အရွယ် အမျိုးသား ၁ ဦးဒဏ်ရာရခဲ့တယ်လို့ ဆိုပါတယ်။

“သူ့အမျိုးသားကတော့ ထိခိုက်ဒဏ်ရာ နည်းနည်းပဲရတယ်၊ စိုးရိမ်ရတဲ့အထဲ မပါဘူး။ အခုကြဲသွားတဲ့နေရာက အိမ်ဆက်တော့ဝေးတယ်။ ယာခင်းပြင်ထဲမှာ သူတို့တဲထိုးတဲ့နေရာကိုကြဲသွားတာ” လို့ မြစ်ခြေမြို့ခံတဦးက မြေလတ်အသံကို ပြောပါတယ်။

သရက်တောရွာဟာ အိမ်ခြေ ၆၀၀၊ အိမ်ထောင်စု ၆၀၀ နဲ့ လူဦးရေ ၁,၀၀၀ ကျော်နေထိုင်တဲ့ ကျေးရွာကြီးဖြစ်ပြီး လတ်တလောမှာ ကျေးရွာတဝိုက်တိုက်ပွဲတွေဖြစ်ပွားတာမရှိဘူးလို့ ဒေသခံတွေက ပြောပါတယ်။

ဒါ့အပြင် ဇန်နဝါရီ ၁၃ ရက် ယမန်နေ့ မနက် ၁၁ နာရီမှာ အင်အား ၂၅၀ကျော်ပါ စစ်ကော်မရှင်တပ်ဖွဲ့တွေက မင်းတုန်းမြို့နယ်၊ ပဇင်းဒါးကျေးရွာနဲ့ သဖန်းကိုင်းကျေးရွာတွေကို စစ်ကြောင်းထိုးဝင်ရောက်ပြီး လူနေအိမ်တွေကို မီးရှို့ခဲ့တယ်လို့ သရက်ခရိုင်တပ်ရင်း ၄ ထံက သိရပါတယ်။

” ရွာသားတွေက စစ်ကြောင်းဝင်လာချိန် ထွက်ပြေးချိန်မရလိုက်ကြဘူး။ လက်ရှိသိထားရတာက ပဇင်းဒါးမှာ ***တွေက ရှိနေသေးတယ်လို့ယူဆတယ်။ ရွာသူရွာသားတွေ က အဖမ်းခံထားရဆဲလားဆိုတာ မသိရသေးပေမယ့် အိမ်က ၁၆ လုံးမီးရှို့ခံရတယ်။ သဖန်းကိုင်းက ၃လုံးမီးရှို့ခံရတယ်” လို့ သရက်ခရိုင်တပ်ရင်း ၄ တာဝန်ရှိသူတဦးက ပြောပါတယ်။

အိမ်ခြေ ၂၀၀ နီးပါးစီရှိ ပဇင်းဒါးနဲ့ သဖန်းကိုင်းကျေးရွာမှာ ၁ ဖာလုံခန့်သာကွာဝေးကြပြီး ကျေးရွာတွေကို ဝင်ရောက်မီးရှို့နေတဲ့ စစ်ကြောင်းဟာ ဇန်နဝါရီ ၁၂ ရက်က သရက်-မင်းတုန်းကားလမ်းပိုင်းမှာ သရက်ခရိုင်တပ်ရင်း ၄ တိုက်ခိုက်ခဲ့တဲ့ စစ်ကြောင်းဖြစ်တယ်လို့ ဆိုပါတယ်။

အဲ့ဒီစစ်ကြောင်းဟာ ညနေ ၆ နာရီကျော်မှာ မင်းတုန်းနယ်ကတဆင့် သရက်မြို့နယ်၊ အောက်မမြင့်ရွာကို ဝင်ရောက်ခဲ့ကာ ဇန်နဝါရီ ၁၄ ရက်ဒီကနေ့ မှာတော့ ပုဏ္ဏားကျေးရွာကို စစ်ကြောင်းထိုးဝင်ရောက်နေတယ်လို့ သိရပါတယ်။

အာဏာသိမ်းစစ်တပ်ဟာ သရက်ခရိုင်ရွေးကောက်ပွဲအပိုင်း ၃ ပြုလုပ်နိုင်ဖို့ ဇန်နဝါရီ ၉ ရက်ကစတင်ပြီး သရက်-မင်းတုန်းလမ်းပိုင်းနဲ့ မင်းတုန်းမြို့နယ်တွေကို စစ်အင်အား ၂၅၀ ကျော်နဲ့ စစ်ကြောင်းထိုး လုံခြုံရေးယူတာတွေလုပ်ဆောင်နေတာဖြစ်တယ်လို့ သိရပါတယ်။