ပကဖ

မကွေး၊ ဇွန် ၃၊ ၂၀၂၃။

မကွေးတိုင်း၊ ရေစကြိုမြို့ အခြေစိုက် ခလရ ၂၅၈ က ထွက်လာတဲ့စစ်သားတွေကို ဇွန်လ ၁ ရက် မနက် ၈ နာရီခွဲလောက်မှာ ဒေသခံ PDF ကတိုက်ခိုက်ခဲ့လို့ စစ်ကောင်စီဘက်က ထိခိုက်သေဆုံးသူတွေရှိတယ်လို့ Urban Underground Revolution Force – YSO ကသတင်းထုတ်ပြန်ပါတယ်။

ရေစကြိုမြို့နယ်၊ ပခုက္ကူ – ရေစကြို လမ်းမကြီးအတိုင်း တောင်အိုတာတိုင် စစ်ဆေးရေးဂိတ်ကို အင်အားဖြည့်ဖို့ စစ်သား ၄၀ လောက်နဲ့ထွက်လာချိန် ကံသစ်ရွာနဲ့ ကြီးကန်ရွာကြားကနေ မိုင်း ၁၈ လုံးခွဲကာ တိုက်ခိုက်ခဲ့တာလို့ ဆိုပါတယ်။

“စစ်သားတွေက စထွက်လာတုန်းကဖောကား ၂ စီးနဲ့လာတာ၊ ကံသစ်ရွာ ကွက်သစ်နားရောက်တော့ကား ၂ စီးနဲ့ ရဲဘော်တချို့ထားခဲ့ပြီး အင်အား ၃၀ လောက်နဲ့ခြေလျင်ဆင်းပြီး ကျနော်တို့ထောင်ထားတဲ့ မိုင်းတွေကိုရှာကြတာဗျ။ အဲဒီမှာမိုင်းကိုတူးဖော်နေပြီး ဘက်ထရီအိုးဖြုတ်မယ်အလုပ်မှာ ဆွဲချလိုက်တာပါ” လို့ YSO ရဲ့ သတင်းပြန်ကြားတာဝန်ခံက ပြောပါတယ်။

မိုင်းဆွဲလိုက်တဲ့အတွက် စစ်သား ၆ ဦးနေရာမှာသေဆုံးပြီး ၈ ဦးထက်မနည်း ဒဏ်ရာရသွားတာကို မျက်မြင်တွေ့လိုက်ရတယ်လို့ သူကဆက်ပြောပါတယ်။

တိုက်ခိုက်မှုအပြီး ဖောကား ၂ စီးထဲက ၁ စီးဟာ သေဆုံးဒဏ်ရာရတဲ့ စစ်သားတွေကိုတင်ကာ ခလရ ၂၅၈ ဘက်ကို ပြန်လှည့်သွားပြီး ကျန် ၁ စီးကတော့ တောင်အိုတာတိုင်ဂိတ်ဘက် ဆက်ထွက်သွားတယ်လို့ ဆိုပါတယ်။

အဲဒီတိုက်ခိုက်မှုကို Urban Underground Revolution Force – YSO နဲ့ ရေစကြို ပကဖတို့တိုက်ခိုက်ခဲ့တာဖြစ်ပြီး PDF ရဲဘော်တွေ အန္တရာယ်ကင်းခဲ့တယ်လို့ သိရပါတယ်။

တိုက်ခိုက်မှုအတွင်း စစ်ကောင်စီတပ်သား သေဆုံးဒဏ်ရာရမှုကိုတော့ မြေလတ်အသံအနေနဲ့ သီးခြားအတည်ပြုနိုင်ခြင်းမရှိသေးပါဘူး။

စစ်ကောင်စီတပ်ဟာ ဇွန်လ ၂ ရက် မနေ့ညနေပိုင်းမှာတော့ ရေစကြိုနယ်ထဲက ရွာသာရွာ၊ ကိုင်းမကြီးရွာ၊ ကျောက်လှေကားရွာ စတဲ့ကျေးရွာတွေမှာ စစ်သားတွေ လာရောက်ချထားတယ်လို့ ဆိုပါတယ်။

Urban Underground Revolution Force – YSO နဲ့ မဟာမိတ်တွေဟာ မေလ၂၃ ရက်နဲ့ ၂၄ ရက်ကလည်း ရေစကြိုမြို့နယ်၊ ကျောက်လှေခါးကျေးရွာ အနီးက စစ်ကောင်စီ စစ်‌ဆေးရေးဂိတ်ကို ဒရုန်းနဲ့ ဗုံးသီးချကာ တိုက်ခိုက်ခဲ့ကြပါသေးတယ်။

ပြီးခဲ့တဲ့ မေလ ၂၆ ရက်ကနေ ၂၉ ရက်အတွင်းကတော့ စစ်ကောင်စီတပ်ဟာ ရေစကြိုမြို့နယ်၊ ရေလယ်ကျွန်း ဒေသရှိကျေးရွာ ၂၅ ရွာက နေအိမ် ၆၅၆ လုံးကို မီးရှို့ဖျက်ဆီးခဲ့ကြပါသေးတယ်။

စာတည်း – 007

စစ်ကိုင်း၊ မေ ၂၆၊ ၂၀၂၃။

စစ်ကိုင်းတိုင်း၊ ရွှေဘိုခရိုင်၊ ဝက်လက်မြို့နယ်၊ ပင်းဇင်းကျေးရွာက နေအိမ် ၁၃ လုံးကို စစ်ကောင်စီတပ်ဖွဲ့က မေလ ၂၆ ရက်ဒီနေ့မနက် ၉ နာရီလောက်မှာ ဝင်ရောက်မီးရှို့ခဲ့တယ်လို့ ဒေသခံတွေဆီက သိရပါတယ်။

အင်အား ၇၀ နီးပါးရှိတဲ့ စစ်ကောင်စီစစ်ကြောင်းဟာ ပင်းဇင်းကျေးရွာနဲ့ မကျီးတုံးကျေးရွာကြားမှာရှိတဲ့ နဒီမြန်မာ ဆန်စက်အနောက်ဘက်ကို ဒီမနက် ၈ နာရီလောက်မှာ စစ်ကြောင်းထိုးလာချိန် ဒေသကာကွယ်ရေး ပူးပေါင်းတပ်ဖွဲ့တွေနဲ့ ပစ်ခတ်တိုက်ခိုက်မှုဖြစ်ခဲ့ရာ အဲ့ဒီနောက်မှ နေအိမ်တွေကို မီးရှို့ခဲ့တာလည်း ဖြစ်ပါတယ်။

“မိုင်းဆွဲတိုက်ခိုက်တဲ့အချိန် စစ်ကောင်စီဘက်က ၇ ယောက်လောက် ဒဏ်ရာရသွားတယ်လို့ ကြားတယ်။ ထိတွေ့ပစ်ခတ်မှုမှာတော့ ၃ ယောက်သေသွားတယ်။ သူတို့လဲ ကျသွားတာကို ကျနော်တို့ လှမ်းမြင်နေရတယ်။ ကျနော်တို့ဘက်ကတော့ ထိခိုက်ကျဆုံးတာတွေမရှိပါဘူး။ သူတို့က ပင်းဇင်းရွာထဲမှာလည်း အကြာကြီးမနေဘူး မီးရှို့ပြီးတာနဲ့ ပြန်ထွက်တာပဲ။ ပင်းဇင်းရွာက အခုအကြိမ်နဲ့ဆို မီးရှို့ခံရတာ ၃ ကြိမ်ရှိပါပြီ” လို့ ဝက်လက် ပကဖ အင်အားစု တပ်ဖွဲ့ဝင်တဦးက ဆိုပါတယ်။

အဲ့ဒီစစ်ကောင်စီတပ်တွေဟာ ရွာကိုမီးရှို့ပြီး မနက် ၁၀ နာရီလောက်က ရွာကနေ ပြန်လည် ထွက်ခွာသွားချိန်မှာလည်း ကာကွယ်ရေးတပ်ဖွဲ့တွေနဲ့ ပင်းဇင်းရွာပြင်မှာ ထိတွေ့ပစ်ခတ်မှု မိနစ် ၂၀ လောက် ထပ်မံဖြစ်ပွားခဲ့ပြီးနောက် အဲဒီကနေတဆင့် လှတောကျေးရွာဘက်ကို ထွက်သွားတယ်လို့ ဆိုပါတယ်။

လက်ရှိအချိန်ထိ ပင်းဇင်းကျေးရွာထဲကို ဒေသခံတချို့သာ ပြန်လည်ဝင်နေရောက်နေထိုင်ပြီး တချို့ကတော့ တောထဲမှာ ပုန်းရှောင်နေဆဲဖြစ်တယ်လို့ သိရပါတယ်။

ပင်းဇင်းကျေးရွာကို မီးရှို့သွားတဲ့ စစ်ကောင်စီစစ်ကြောင်းဟာ ပြီးခဲ့တဲ့ မေလ ၂၃ ရက်က လှတောကျေးရွာဘက်ကို ဆိုင်ကယ်မောင်းနှင်းလာတဲ့ အမျိုးသား ၂ ဦးကို ဖမ်းဆီးသတ်ဖြတ်ခဲ့သလို လှတောရွာသား ၁၅ ဦးကိုလည်း ဖမ်းဆီးခေါ်ဆောင်သွားခဲ့ပါသေးတယ်။

စာတည်း – လင်း

မကွေး၊ မေ ၂၆၊ ၂၀၂၃။

မကွေးတိုင်း၊ ရေစကြိုအခြေစိုက် ခလရ ၂၅၆ ကထွက်လာတဲ့ စစ်ကောင်စီကားတွေကို မေလ ၂၅ ရက် မနေ့ကတရက်တည်းမှာ ၃ ကြိမ် တိုက်ခိုက်ခဲ့ရာ ထိခိုက်သေဆုံးသူတွေရှိခဲ့တယ်လို့ ရေစကြိုပကဖက သတင်းထုတ်ပြန်ထားပါတယ်။

စစ်သားအင်အား ၆၀ လောက် တင်လာတဲ့ ဖောကား ၂ စီးကို မနက် ၁၀ နာရီ ၁၅ မိနစ်နဲ့ ညနေ ၂ နာရီခွဲလောက်မှာ တိုက်ခိုက်ခဲ့ပြီး၊ စစ်ကူလိုက်လာတဲ့ နောက်ထပ်ဖောကားတစီးကိုတော့ မနက် ၁၀ နာရီခွဲလောက်မှာ တိုက်ခိုက်ခဲ့တာလို့ ရေစကြိုပကဖမှ ရဲဘော်ဝေကြီးက ပြောပါတယ်။

“ဖောကား ၂ စီးက တပ်ထဲကထွက်လာတာကို ပထမတကြိမ်က အောင်မိုး လမ်းဆုံနားကနေ မိုင်းဆွဲလိုက်တာ၊ ၁၅ မိနစ်လောက်ကြာတော့ ခလရ ၂၅၆ တပ်ထဲကနေ စစ်ကူတစီးထွက်လာလို့ မြေဖြူရွာနဲ့ ရွာငယ်ရွာကြားကနေ ပဒေသာမိုင်းနဲ့ထပ်ဆွဲတာ၊ ၂ ကြိမ်ပေါင်း ၃ ဦးလောက် ဒဏ်ရာရပြီး(၃ ကြိမ်ပေါင်း) ၈ ဦးလောက် ထိခိုက်ဒဏ်ရာရသွားတာလို့ ပြောပါတယ်”လို့ ဆိုပါတယ်။

အဲဒီကား ၂ စီးဟာ ရှေ့ဆက်မတိုးဘဲ သေဆုံးစစ်သားနဲ့ ဒဏ်ရာရသူတွေကိုတင်ကာ တပ်ထဲကို ပြန်မောင်းချိန် ညနေ ၂ နာရီခွဲလောက်မှာ ရေစကြိုမြို့အဝင် ငါးမွေးမြူရေးကန်အနီးကနေ ထပ်မံမိုင်းဆွဲခဲ့တာလည်း ဖြစ်ပါတယ်။

စစ်ကောင်စီဘက်က ထိခိုက်သေဆုံးတာနဲ့ပတ်သက်ပြီး မြေလတ်အသံက သီးခြားအတည်ပြုချက် မရရှိပါဘူး။

အဲဒီတိုက်ခိုက်မှုမှာ ပဒေသာမိုင်းတွေအသုံးပြုခဲ့ပြီး ပထမအကြိမ်မှာ ၈ လုံးတွဲ၊ ဒုတိယအကြိမ် ၁၅ လုံးနဲ့ တတိယအကြိမ်မှာ ၆ လုံးတွဲ ဖောက်ခွဲခဲ့တာလို့ ဆိုပါတယ်။

ပြီးခဲ့တဲ့မေလ ၂၄ ရက် ည ၁၀ နာရီလောက်ကလည်း ရေစကြိုမြို့နယ်၊ ဟင်္သာရွာကနေ ရပ်သာရွာကို ကင်းလှည့်ဖို့သွားတဲ့ စစ်သား ၅ ဦးကို မိုင်းဆွဲတိုက်ခိုက်ခဲ့သေးတယ်လို့ ရေစကြို ပကဖဆီက သိရပါတယ်။

စာတည်း – လင်း

စစ်ကိုင်း၊ မေ ၁၅၊ ၂၀၂၃။

စစ်ကိုင်းတိုင်း၊ ကနီမြို့နယ်၊ မင်းမရွာအနီးမှာ စစ်ကောင်စီတပ်နဲ့ နယ်မြေခံကာကွယ်ရေးအဖွဲ့တွေ တိုက်ပွဲဖြစ်ခဲ့တာကြောင့် ရဲဘော်တဦးသေဆုံးခဲ့တဲ့အပြင် စစ်ကောင်စီဘက်က လေကြောင်းနဲ့လည်း ပစ်ခတ်ခဲ့တယ်လို့ သိရပါတယ်။

မေလ ၁၄ ရက် မနေ့မနက်က အင်အား ၁၂၀ ကျော်ပါတဲ့စစ်ကြောင်းနဲ့ တိုက်ပွဲဖြစ်ခဲ့ပြီး နေ့လယ် ၁ နာရီခွဲဝန်းကျင်မှာ မင်းမရွာ၊ သမင်ခြံရွာနဲ့ သင့်ဝင်ရွာကြား‌တွေကို ဂျက်ဖိုက်တာ ၃ ခေါက် အဝေးကနေ ပစ်သွားခဲ့တာလို့ ဆိုပါတယ်။

“ကျသွားတဲ့ရဲဘော်က စစ်ကောင်စီတပ်ချထားတဲ့ ရွာနားက တာဝါတိုင်ပေါ်ကို ကင်းတက်ထောက်တာ။ အဲ့ချိန် စစ်ကောင်စီက သေနတ်နဲ့ ပစ်လိုက်တာ။ လေယာဉ်ကလည်း မိုးရွာကြီးထဲမှာ လာပစ်တာဆိုတော့ ပစ်သွားမှန်းတောင် မသိကြဘူး။ တကယ်တော့ လေယာဉ်နဲ့ လာပစ်သွားတယ်။ အဝေးထိန်းပြီးတော့ ပစ်တဲ့အနေထား”လို့ တပ်ဖွဲ့နဲ့နီးစပ်သူတဦးက ပြောပါတယ်။

ဒီတိုက်ခိုက်မှုကြောင့် ပြည်သူထိခိုက်သေဆုံးမှု ရှိ၊ မရှိကိုတော့ အတည်မပြုနိုင်သေးဘူးလို့လည်း ဆိုပါတယ်။

တိုက်ပွဲအတွင်းမှာလည်း ရဲဘော်တဦးသေဆုံးကာ ၆ ဦးဒဏ်ရာရရှိခဲ့ပြီး ရဲဘော်တွေရဲ့ တပ်ဖွဲ့နဲ့ အချက်လက်တွေကတော့ လုံခြုံရေးကြောင့် မထုတ်ပြန်သေးပါဘူး။

စစ်ကြောင်းဟာ မေလ ၁၅ ရက် အခုလက်ရှိအချိန်ထိ မင်းမရွာထဲမှာပဲ တပ်စွဲထားပြီး၊ မေလ ၁၂ရက် ညကတည်းက ကနီမြို့နယ်ထဲကို ဝင်ရောက်နေတာဖြစ်တဲ့အတွက် ပြည်သူ ၁သောင်း၃ထောင်ကျော်လည်း မိုးရေထဲမှာ ထွက်ပြေးတိမ်းရှောင်ခဲ့ရပါသေးတယ်။

စာတည်း – လင်း