ဒေသခံ

အင်းတော်၊ ဧပြီ ၂၆၊ ၂၀၂၃။

စစ်ကိုင်းတိုင်း၊ အင်းတော်မြို့နယ်၊ မံဟဲရွာကနေ စစ်ကောင်စီတပ်တွေဖမ်းသွားတဲ့ ဒေသခံရွာသား ၅ ဦးကို တလအကြာမှာ သေဆုံးလျက်ပြန်တွေ့ခဲ့တယ်လို့ သိရပါတယ်။

သူတို့ ၅ ဦးကို ဧပြီလ ၂၅ ရက်မနေ့ကနေ့လယ်ပိုင်းက မံဟဲရွာနဲ့ ၈ မိုင်ခန့်အကွာ မော်လူးမြို့တောင်ဘက် တောထဲမှာ အပိုင်းပိုင်းခုတ်ဖြတ်ပြီး မီးရှို့ခံထားရတဲ့အနေအထားနဲ့ ပြန်တွေ့ခဲ့တာလို့ Indaw Revolution-IR တာဝန်ရှိသူက ပြောပါတယ်။

“သူတို့ဖမ်းဆီးခံရပြီး ပျောက်နေတာတနယ်လုံးနီးပါး သိကြတယ်။ မနေ့ကကျတော့ တောထဲသွားတဲ့ ပြည်သူတဦးက တွေ့ပြီး အကြောင်းကြားလို့ မိသားစုဝင်တွေက သွားကြည့်ကြတာ။ ဟိုရောက်တော့ ကြွင်းကျန်ရစ်တဲ့ပစ္စည်းတွေ တွေ့ရလို့ သူတို့ဆိုတာအတည်ပြုလို့ရခဲ့တာ။ ကျန်ရှိတဲ့ အပိုင်းအစတွေကိုတော့ မိသားစုဝင်တွေက ပြန်သယ်လာပြီး”လို့ ပြောပါတယ်။

ဒေသခံတွေဘက်က ပေးပို့လာတဲ့ ပုံတွေထဲမှာတော့ အသတ်ခံထားရသူအချို့မှာ ခြေ၊ လက်တွေပြတ်ပြီး ကိုယ်ခန္ခာတခုလုံးမှာလည်း မီးလောင်ကျွမ်းထားတာကို တွေ့ရပါတယ်။

အသက် ၂၅ နှစ်အရွယ် ကိုညီညီနဲ့ ကိုလောရှုပ်၊ ၃၈ နှစ်အရွယ် ကိုအောင်မင်းသိုက်နဲ့ ကိုနေလင်းထွန်း၊ ၄၈ နှစ်အရွယ် ကိုဖိုးရှမ်းတို့ဖြစ်ပြီး၊ သူတို့ကို ပြီးခဲ့တဲ့ မတ်လ ၂၄ ရက်မှာ ရွာကိုစစ်ကြောင်းထိုး ဝင်ရောက်လာတဲ့ စစ်ကောင်စီတပ်သားတွေက ဖမ်းသွားခဲ့တာပါ။

ဖမ်းဆီးသတ်ဖြတ်ခံရသူတွေဟာ နိုင်ငံရေးနဲ့ပတ်သက်သူတွေမဟုတ်ဘဲ သာမန်ရွာသားတွေသာ ဖြစ်သလို၊ စစ်အုပ်စုက ရွာကိုဝင်ချိန်မှာ အမျိုးသား၊ အမျိုးသမီးအပါ လူ ၂၀ လောက်ဖမ်းဆီးခဲ့ပေမယ့် ရွာက ပြန်ထွက်ချိန်ကျမှာတော့ အထက်ပါအမျိုးသား ၅ ဦးကိုသာ လူသားဒိုင်းအဖြစ် ဖမ်းဆီးသွားခဲ့တာလို့ ဒေသခံတွေက ပြောပါတယ်။

သူတို့ရဲ့ နာရေးကို ကျန်ရှိနေတဲ့ မိသားစုဝင်တွေက ဒေသဓလေ့ထုံးစံအတိုင်း ပြုလုပ်ဖို့စီစဥ်နေကြတယ်လို့ သိရပါတယ်။

ပြီးခဲ့တဲ့မတ်လအတွင်းမှာလည်း အင်းတော်မြို့နယ်ထဲမှာ မြို့နယ် ပကဖ အဖွဲ့ဝင် ၂ ဦးအဖမ်းခံရပြီးနောက် CDM ဆရာမ ၃ ဦးအပါအဝင် ဒေသခံ ၂၀ ကျော်ကိုလည်း PDF ထောက်ပံသူတွေလို့ဆိုကာ စစ်ကောင်စီတပ်သားတွေက ဖမ်းဆီးခဲ့ပါသေးတယ်။

စာတည်း – လင်း

ရွှေဘို၊ ဧပြီ ၂၅၊ ၂၀၂၃။

စစ်ကိုင်းတိုင်း၊ ရွှေဘိုမြို့၊ အမှတ် ၅ ရပ်ကွက်က အမျိုးသား ၆ ဦးအပါအဝင် ဒေသခံ ၁၆ ဦးကို ဧပြီလ ၂၂ ရက်နေ့မှာ စစ်ကောင်စီတပ်ကရိုက်နှက်ဖမ်းဆီးသွားတယ်လို့ သိရပါတယ်။

ဧပြီလ ၂၂ ရက်နေ့ မနက်ပိုင်းက စည်ပင်သာယာရေးရုံးထဲမှာတပ်စွဲထားတဲ့စစ်အုပ်စု ဗုံးပစ်တိုက်ခိုက်ခံရပြီးတဲ့နောက် စည်ပင်ရုံးအနီးဈေးရောင်းနေတဲ့ ဈေးသည်တွေအပါအဝင် အရပ်သား ၁၆ ဦး ကို စစ်ကောင်စီတပ်က ဖမ်းဆီးသွားခဲ့တာလို့ Shwdbo District Battalion 23 တာဝန်ခံက မြေလတ်အသံကို ပြောပါတယ်။

“ဗုံးသွားပစ်တာကကျနော်တို့အဖွဲ့ပါ။အဲ့ဒီတိုက်ခိုက်မှုမှာထိခိုက်သေဆုံးတွေရှိတယ်။အဲတာကြောင့် စကစတွေကကားတစီးနဲ့ ချက်ချင်းရောက်လာပြီးတော့ရုံးနားမှာ အလုပ်လုပ်နေတဲ့အရပ်သားတွေကို ရိုက်နှက်ပြီးတော့ ဖမ်းခေါ်သွားတာ။ တချို့ဆိုရင် ရိုက်နှက်ခံရတာများလို့ PDFဆိုပြီးဝန်ခံခိုင်းတာ ဝန်ခံရတယ်တဲ့။ ကျနော်တို့အဖွဲ့ကတဦးတယောက်မှ အဖမ်းမခံခဲ့ရပါ” လို့ ဆိုပါတယ်။

ဖမ်းဆီးခံရသူတွေဟာ အမှတ် ၅ ရပ်ကွက်က အမျိုးသား ၆ ဦး၊ နေရပ်နဲ့ အမည်တွေကိုမသိရသေးတဲ့ အမျိုး သမီး ၃ ဦး နဲ့ အမျိုးသား ၇ ဦး တို့ဖြစ်တယ်လို့ ရွှေဘိုအခြေစိုက် PDF တပ်ဖွဲ့တွေနဲ့နီးစပ်သူ တဦးက ပြောပါတယ်။

“အဖမ်းခံရတာကတော့ အတည်ပြုလို့ရတယ်။ ဘယ်သူတွေဆိုတာကိုတော့ ကျနော်တို့ လည်း PDF အဖွဲ့တွေကို လိုက်မေးနေတာ တိတိကျကျ မသိကြဘူးဖြစ်နေတယ်။ဒီ ၁၆ ယောက်က စည်ပင်ရုံးတိုက် ခိုက်ခံရတာနဲ့ပတ်သက်လို့အဖမ်းခံရတာလို့သိရတယ်” လို့ ဆိုပါတယ်။

စစ်တပ်ထောက်ခံတဲ့တယ်လီဂရမ်ချန်နယ်တွေမှာတော့ ရွှေဘိုမြို့နယ်၊ စည်ပင်ရုံးကို ဖောက်ခွဲတိုက်ခိုက်ခဲ့ သူ ၄ ဦးနဲ့ အားပေးထောက်ပံ့သူ ၁၂ ဦးကို ဖမ်းဆီးရမိထားပြီး အကြမ်းဖက်တိုက်ဖျက်ရေး ဥပဒေတွေနဲ့ အမှုဖွင့်ထားတယ်လို့ ဖော်ပြထားပါတယ်။

ဧပြီလ ၄ ရက်နေ့မှာလည်း ရွှေဘိုမြို့နယ်၊ချီပါရွာက လမ်းသွားလမ်းလာ ဆိုင်ကယ်စီးနင်းသူ အမျိုးသား ၂ ဦးကို စစ်ကောင်စီတပ်က လက်ပြန်ကြိုးတုတ်ဖမ်းဆီးပြီးနောက် သတ်ဖြတ်ခဲ့သေးတယ်လို့ သိရပါတယ်။

စာတည်း – ရင်ငြိမ်း

စစ်ကိုင်း၊ ဧပြီ ၁၇၊ ၂၀၂၃။

စစ်ကိုင်းတိုင်း၊ တန့်ဆည်မြို့မှာ ဧပြီလ ၁၇ ရက် (မြန်မာနှစ်ဆန်း ၁ ရက်)ဒီနေ့မနက်ပိုင်းမှာ တော်လှန်ရေးအင်အားစုဝင်တွေနဲ့ ဒေသခံတွေပူးပေါင်းပြီး စစ်အာဏာရှင်ကိုဆန့်ကျင်ဆန္ဒပြခဲ့တယ်လို့ သိရပါတယ်။

“နှစ်ဆန်း ၁ ရက် Gunနှင့်တက် စစ်ခွေးခေါင်းတွေအကုန်ပြတ်” စာတန်းကိုကိုင်ဆောင်ကာ တန့်ဆည်ပင်မသပိတ်စစ်ကြောင်းနဲ့ အမျိုးသမီးမဟာမိတ်အင်အားစု – WAB အဖွဲ့ဝင်တွေဟာဒေသခံတွေနဲ့အတူ ဆန္ဒပြခဲ့ကြတာလို့သိရပါတယ်။

ပုလဲ၊ ဧပြီ ၄၊ ၂၀၂၃။

စစ်ကိုင်းတိုင်း၊ ပုလဲမြို့နယ်မှာ စစ်ကောင်စီနဲ့ပျူတပ်သားတွေက စစ်ကြောင်းထိုးကာ ကျေးရွာတွေကို မီးရှို့ဖျက်ဆီးနေတာကြောင့် ဒေသခံပြည်သူ ၁ သောင်းကျော် ဘေးလွတ်ရာကိုထွက်ပြေးတိမ်းရှောင်နေကြရတယ်လို့ သိရပါတယ်။

အင်အား ၁၀၀ ကျော်ရှိတဲ့ အဲ့ဒီစစ်ကြောင်းဟာ ဧပြီလ ၂ ရက်နေ့မှာ နှောကန်ကျေးရွာကို မီးရှို့ဖျက်ဆီးခဲ့တာကြောင့် လူနေအိမ် ၁၂၀ လုံး ပြာကျပျက်စီးခဲ့တဲ့အပြင် နေအိမ်ထဲပိတ်မိကျန်ခဲ့တဲ့ အသက် ၇၈ နှစ်အရွယ် အဘွားတဦးလည်းမီးလောင်သေဆုံးခဲ့တယ်လို့ ပုလဲမြို့နယ်ပြည်သူ့အုပ်ချုပ်ရေးအဖွဲ့ရဲ့ ပြောရေးဆိုခွင့်ရှိသူက မြေလတ်အသံကို ပြောပါတယ်။

“မီးလောင်သေဆုံးတဲ့အဘွားက ဒုက္ခိတ လို့သိရတယ်။ ပြီးတော့ အဘိုးတယောက်လည်း မီးလောင်ဒဏ်ရာရခဲ့တယ်။ နှောကန်ရွာက တောင်သူလယ်သမားရွာဗျ။ ထွန်စက်တွေ၊ လယ်ယာသုံးပစ္စည်းတွေက အကုန်လုံးပြာတွေပဲ တွေ့ခဲ့ရတယ်။ စကစတွေက ရွာမီးမရှို့ခင် ရွာကလူတွေကို ထွက်မပြေးရင် လူတွေကိုပါ မီးရှို့လိုက်မယ်ပါပြောတာ” လို့ ပြောပါတယ်။

အခုလို နှောကန်ကျေးရွာ မီးရှို့ခံရတာကြောင့် အနီးအနားကရွာတွေဖြစ်ကြတဲ့ ငှက်ပျောတော၊ အင်းကန်၊ ကျေးနင်း၊ဆင်ရှင်၊ ကျောက်ဖျာကန်၊ မင်းတိုင်ပင်၊ သပြေကန် အပါအဝင် ကျေးရွာ ၁၀ ရွာက ဒေသခံ ၁၅၀၀၀ ခန့်ဟာ ဧပြီလ ၄ ရက် ဒီကနေ့အထိ အချိန်ထိ ထွက်ပြေးတိမ်းရှောင်နေကြရဆဲ ဖြစ်တယ်လို့ ဆိုပါတယ်။

“စကစတွေက မင်းတိုင်ပင်ရွာမှာ စခန်းချထားတယ်။ အဲဒီနေရာကပဲ အနီးတဝိုက်က ရွာတွေကို စစ်ကြောင်းဝင်ထိုးနေတာ။ ဒေသခံတွေကတော့ တော်တော်လည်း အကူအညီတွေ လိုအပ်နေပါတယ်။ ရွာကပြေးလာရတာက အဝတ်တထည်တည်းနဲ့ပြေးလာရတာလေ” လို့ သူကဆက်ပြောပါတယ်။

စစ်ကောင်စီတပ်က ကျေးရွာတွေကို ဝင်ရောက်မီးရှို့နေတာဟာ ဧပြီလ ၂ ရက်နေ့မှာ ဖြစ်ပွားခဲ့တဲ့ နှောကန်ကျေးရွာအနီးတိုက်ပွဲမှာ စစ်ကောင်စီတပ်ဘက်က အကျအရှုံးများခဲ့ပြီးတဲ့နောက် အခုလိုမီးတင်ရှို့နေတာလို့ ဆိုပါတယ်။

ဧပြီလ ၂ ရက်နေ့က မင်းတိုင်ပင်ရွာနဲ့ နှောကန်ရွာအကြားမှာ PDF တွေကို ဆိုင်ကယ်စီးပြီး သေနတ်နဲ့လိုက်ပစ်တဲ့ စစ်ကောင်စီတပ် ဗိုလ်ကြီးနဲ့တပ်သား ပစ်ခတ်ခံရလို့ သေဆုံးခဲ့ပြီး သေနတ် ၂ လက်လည်း PDF တွေဘက်က ရရှိခဲ့တဲ့အပြင် စစ်ကောင်စီစစ်ကြောင်း မိုင်းဆွဲတိုက်ခိုက်ခံရမှုတွေမှာလည်း ထိခိုက်သေဆုံးမှုတွေ များပြားနေတယ်လို့ သိရပါတယ်။

ပုံစာ – မီးရှို့ခံရတဲ့ နေအိမ်တွေနဲ့ စစ်ရှောင်ဒေသခံများ။

စာတည်း – ရင်ငြိမ်း

စစ်ကိုင်း၊ ဧပြီ ၁၊ ၂၀၂၃။

စစ်ကိုင်းတိုင်း၊ စစ်ကိုင်းမြို့နယ်၊ မောင်းထောင်ကျေးရွာက ဒေသခံအမျိုးသား ၆ ဦးကို စစ်ကောင်စီတပ်သားတွေက မတ်လ ၃၀ ရက်နေ့လည်ပိုင်းအချိန်မှာ ဖမ်းဆီးပြီး အဲဒီထဲက ၄ ဦးကို သတ်ကာ မူးမြစ်ထဲ စွန့်ပစ်ထားခဲ့တယ်လို့ သိရပါတယ်။

အသတ်ခံရသူတွေဟာ ဦးကျော်သူထွန်း ၃၈ နှစ် ၊ သားဖြစ်သူ အိုအီး ၁၄ နှစ်၊ ညီအစ်ကိုနှစ်ဦးဖြစ်တဲ့ တုံတုံချစ် ၁၅ နှစ်၊ ကိုချစ်စူး ၂၀ နှစ်တို့ဖြစ်ကြပြီး၊ လုံခြုံရေးအရအမည်မဖော်လိုတဲ့နောက်ထပ် ဒေသခံအမျိုးသား ၂ ဦးကိုတော့ ဖမ်းဆီးပြီးနောက် ပြန်လွှတ်ပေးခဲ့တယ်လို့ ဒေသခံတဦးက ပြောပါတယ်။

“မနေ့က အလောင်းတွေ့တာကတော့ ဦးကျော်သူရဲ့ သားဖနှစ်ယောက်ကိုပါ။ ညီအစ်ကိုနှစ်ယောက်ရဲ့ အလောင်းတွေကိုတော့ ရှာဖွေနေဆဲပါ။ သားဖနှစ်ယောက်ရဲ့အလောင်းကိုတော့ ညောင်ပင်ဝန်းတံတားအောက်မှာ တွေ့ခဲ့တာ။ ၂ယောက်ကတော့ လွတ်တာ အတည်ပြုလို့ရပါတယ်” လို့ ပြောပါတယ်။

ဒေသခံ ၄ ဦး ကို သတ်သွားခဲ့တဲ့ စစ်ကောင်စီတပ်သားတွေဟာ ညောင်ပင်ဝန်းရဲစခန်းကိုရောက်ရှိနေတဲ့ တပ်မ ၃၃ လက်အောက်ခံတပ်သားတွေဖြစ်ပြီး မောင်းထောင်ကျေးရွာကို အင်အား ၄၀ ကျော်နဲ့ ဝင်ရောက်စစ်ကြောင်းထိုးပြီးနောက် ရဲစခန်းကိုအပြန်မှာ ဖမ်းခေါ်သွားပြီး အခုလို သတ်ဖြတ်ခဲ့တာလို့ ဆိုပါတယ်။

“စကစတွေက အရပ်သားတွေကို ဖမ်းတဲ့နေ့ ၂ ယောက်သတ်တယ်။ မနေ့က ၂ ယောက် သတ်တယ်။ သတ်ပြီးတော့ မူးမြစ်ထဲပစ်ချခဲ့ကြတာ” လို့ Knight Commanders PDFမှတာဝန်ခံ ဘယ်သန်ကြီးက ပြောပါတယ်။

ပြီးခဲ့တဲ့ မတ်လ ၅ ရက်နေ့ကလည်း အင်အား ၁၀၀ ကျော်ပါတဲ့ တပ်မ ၃၃ စစ်ကြောင်းတခုဟာ မြင်းမူနယ်၊ လက္ကပင်ကျေးရွာကို ဝင်ရောက်ပြီး ပြည်ကြီးတံခွန်ဆရာတော် ဦးအဂ္ဂ၊ PDFရဲဘော် ၅ ဦး၊ ရွာခံအမျိုးသား ၄ ဦးတို့ကို ဖမ်းဆီးပြီးနောက် အဲဒီထဲက PDF ရဲဘော် ၅ ဦးကို သတ်ဖြတ်ပြီး အလောင်းတွေကို မြစ်ထဲမျောခဲ့ကြတယ်လို့ သိရပါတယ်။

စာတည်း – ရင်ငြိမ်း