မိုးကုတ်၊ မတ်၂၆၊ ၂၀၂၆။

မန္တလေးတိုင်း၊ မိုးကုတ်နဲ့ ရှမ်းပြည်နယ်၊ မိုးမိတ်မြို့နယ်တွေကနေ တပ်အားလုံးဆုတ်ခွာလိုက်ပြီလို့ မြေပြင်တော်လှန်ရေးတပ်ဖွဲ့ဝင်တွေထံက သိရပါတယ်။

မိုးကုတ်နဲ့မိုးမိတ်မြို့တွေကို ပြီးခဲ့တဲ့နိုဝင်ဘာလကုန်ပိုင်းမှာ စစ်ကော်မရှင်တပ်ထံပြန်ပေးလိုက်ရပေမယ့် မြို့နဲ့အနီးတဝိုက်နယ်မြေတွေမှာ တော်လှန်ရေးတပ်တွေက ဆက်လက်တပ်စွဲထားတာဖြစ်ပြီး အခု ၄ လ နီးပါးအကြာ မတ်လ ၂၂ ရက်ကစတင်ကာ အဲ့ဒီတပ်တွေအကုန်ဆုတ်ခွာပေးလိုက်ရတာလို့ ဆိုပါတယ်။

” ၄ လနီးပါးအကြာ တောင့်ခံပြီးကြိုးစားခဲ့ကြပေမယ့် ဒီအခြေအနေက ကြားထဲမှာပိတ်မိပြီး လက်နက်၊ ခဲယမ်းထောက်ပံ့မှုတွေက အဆင်မပြေသလို ထောက်ပို့လမ်းကြောင်းတချို့ပိတ်တာတွေကြောင့်မို့ ပြန်ဆုတ်ခွာလိုက်ရတာပါ”လို့ မိုးကုတ်ဒေသမှာတိုက်ပွဲဖော်နေတဲ့ တော်လှန်ရေးတပ်ဖွဲ့ဝင်တဦးက မြေလတ်အသံကို ပြောပါတယ်။

သပိတ်ကျင်းမြို့နယ်ကို ထိုးစစ်ဆင်နေတဲ့စစ်ကော်မရှင်တပ်က တွင်းငယ်ရွာကနေတဆင့် မိုးကုတ်၊မိုးမိတ်မှာ ရှိနေတဲ့တပ်တွေနဲ့ ချိတ်ဆက်နိုင်ဖို့ ဆက်လက်စစ်ကြောင်းထိုးနေတာကြောင့် တော်လှန်ရေးတပ်တွေ ပိတ်မိမှာစိုးရိမ်ရတဲ့အတွက် ပြန်လည်ဆုတ်ခွာနေကြတာလို့ သိရပါတယ်။

မိုးကုတ်နဲ့ မိုးမိတ်ကို စစ်တပ်ပြန်လည်ဝင်ရောက်တပ်စွဲခဲ့တဲ့ ၄ လတာအတွင်း မိုးကုတ်မြို့အနောက်ခြမ်းမှာ နေ့စဉ်နီးပါးတိုက်ပွဲတွေဖြစ်ခဲ့ပြီး တိုက်ပွဲတွေအတွင်း စစ်ကော်မရှင်တပ်သုံ့ပန်းတချို့ ဖမ်းဆီးရမိတာတွေလည်းရှိတယ်လို့ တော်လှန်ရေးတပ်တွေဆီက သိရပါတယ်။

လက်ရှိမှာ သပိတ်ကျင်းမြို့နယ်၊ တွင်းငယ်ကထွက်လာတဲ့ စစ်ကော်မရှင်စစ်ကြောင်းက သစ်ဆိမ့်ကုန်းရွာ အထိရောက်ရှိလာပြီး မိုးမိတ်ကဆင်းလာတဲ့ စစ်ကြောင်းဟာလည်း ဘော်ဒေ‌‌ရွာဘက်ကို ရောက်ရှိနေကာ စစ်ကြောင်း ၂ ခုချိတ်ဆက်ဖို့ ၁၅ ကီလိုမီတာခန့်သာ လိုတော့တယ်လို့ သိရပါတယ်။

ဒီစစ်ကြောင်းတွေကြောင့် မိုးကုတ်- မိုးမိတ်စစ်ဆင်ရေး စစ်ဦးစီးအဖွဲ့က တပ်တွေဆုတ်ခွာဖို့ မတ်လတတိယအပတ်က အမိန့်ထုတ်ပြန်ခဲ့ပြီး တော်လှန်ရေးတပ်တွေ ဆုတ်ခွာနေတာလို့ သိရပါတယ်။

သတင်း – MG

ကသာ၊ ဒီဇင်ဘာ၃၀၊ ၂၀၂၅။

စစ်ကိုင်းတိုင်း၊ ကသာမြို့မှာ မြို့သိမ်းတိုက်ပွဲ ဆက်လက်ပြင်းထန်နေပြီး တော်လှန်ရေးတပ်တွေက နေရာတချို့ကိုသိမ်းယူထားကာ စစ်သုံ့ပန်းတွေလည်းဖမ်းဆီးရရှိထားတယ်လို့ တော်လှန်ရေးတပ်တွေဆီက သိရပါတယ်။

ဒီဇင်ဘာ ၂‌‌၈ ရက်နေ့ညပိုင်းက စတင်ကာ ကသာမြို့အနီးမှာ တိုက်ပွဲဖြစ်ခဲ့ပြီး မြို့အဝင်က ပတ္တမြားကုန်းအပါအဝင် စစ်တပ်ကာကင်း တချို့ကို သိမ်းယူထားနိုင်တယ်လို့ သိရပါတယ်။

“မနေ့က ညနေ ၃နာရီမှာ မြို့ထဲက နေရာတချို့ကို ဝင်နိုင်သွားပြီ”လို့ တော်လှန်ရေးတပ်ဖွဲ့ဝင်တဦးဆီက သိရပါတယ်။

စစ်တပ်ကာကင်းတွေကို သိမ်းယူထားပြီး စစ်သုံ့ပန်းတွေ ဖမ်းဆီးရမိတာတွေလည်းရှိတယ်လို့ သိရပါတယ်။

စစ်ကော်မရှင်တပ်ကလည်း မနေ့ည ၉ နာရီကျော်ကစတင်ကာ မြို့အပြင် ကျေးရွာတွေဘက်ကို လေကြောင်းတိုက်ခိုက်မှု အကြိမ် ၂၀ ကျော်ပြုလုပ်ထားတယ်လို့ သိရပါတယ်။

ဒီနေ့ မနက်မှာတော့ ပစ်ခတ်သံတချို့ကြားရပြီး မနေ့ကလောက်တိုက်ပွဲပြင်းထန်သံမကြားရဘူးလို့ မြို့ခံတဦးက ပြောပါတယ်။

စစ်တပ်က ပြည်သူတွေကို မြို့အဝင်အထွက် ပိတ်ထားပြီး မြို့အဝင်နားက ခလရ ၃၀၉ တပ်ကနေ ခုခံနေဆဲဖြစ်တယ်လို့ သိရပါတယ်။

မြို့ခံတွေရှောင်တိမ်းဖို့ကြိုးစားပေမယ့် လမ်းပိတ်နေတာမို့ ပြည်သူအများစု ပိတ်မိနေတယ်လို့လည်း သိရပါတယ်။

သတင်း – မြတ်

တိုက်ခိုက်မှုတွေအတွင်း စစ်ကော်မရှင်တပ်ဖွဲ့ဝင် ၇ ဦးနဲ့ လက်နက်ခဲယမ်းတွေသိမ်းဆည်း

ကောလင်း၊ ဒီဇင်ဘာ ၂၂၊ ၂၀၂၅။

စစ်ကိုင်းတိုင်း၊ ကောလင်းမြို့နယ်အရှေ့ခြမ်းရှိ သစ်ဖုလတောင် စစ်ကော်မရှင်တပ်စခန်းကို တော်လှန်ရေးတပ်တွေသိမ်းပိုက်ခဲ့ပြီး စစ်ကူလာတဲ့စစ်ကြောင်းကိုဖြတ်တိုက်ရာ စစ်သား ၃ ဦး သေဆုံးပြီး ၇ ဦး အရှင်ဖမ်းမိခဲ့တယ်လို့ တော်လှန်ရေးတပ်တွေဆီကနေ သိရပါတယ်။

ဒီဇင်ဘာ ၁၈ ရက်ညပိုင်းကတည်းက သစ်ဖုလစခန်းကို တော်လှန်ရေးတပ်တွေသွားရောက် တိုက်ခိုက်ခဲ့ပြီး ဒီဇင်ဘာ ၁၉ ရက်မှာ စစ်ကော်မရှင်တပ်တွေစခန်းစွန့်ထွက်ပြေးသွားပြီးနောက်ဒီဇင်ဘာ ၂၀ ရက်မှာ သိမ်းပိုက်နိုင်ခဲ့တယ်လို့ တော်လှန်ရေးတပ်ဖွဲ့ဝင်တဦးက ပြောပါတယ်။

ဒါ့အပြင် ၁၉ ရက်ညမှာလည်း ဝန်းသိုမြို့ ခမရ ၁၂၀ ကနေ စစ်ကူထွက်လာတဲ့စစ်ကြောင်းက ဝန်းသိုမြို့နယ်၊ အာမခံရွာကိုမီးဝင်ရှို့ပြီးနောက် ညောင်ပင်သာရွာကိုဝင်ခဲ့ကာ ဒီဇင်ဘာ ၂၀ ရက် မနက်ပိုင်းမှာအဲ့ဒီရွာမှာထပ်မံတိုက်ပွဲဖြစ်ခဲ့ပါသေးတယ်။

ဒီတိုက်ခိုက်မှုအတွင်း စစ်ကော်မရှင်တပ်ဖွဲ့ဝင် ၃ ဦးသေဆုံးပြီး ၇ ဦးကိုအရှင်ဖမ်းမိကာ သေနတ် ၁၀ လက်နဲ့ စစ်အသုံးအဆောင်တချို့ကိုလည်း သိမ်းယူနိုင်ခဲ့တယ်လို့ အဲဒီတော်လှန်ရေးတပ်ဖွဲ့ဝင်က ပြောပါတယ်။

“ညဘက်ကို ဝင်အောင်းတာ။အဲ့ဒီမှာ စစ်တပ်က တော်တော်ထိတယ်။အရှင်ဖမ်းမိတာတွေ ရော၊ အသေတွေရော ရတယ်”လို့ တော်လှန်ရေးတပ်ဖွဲ့ဝင်က ဆက်ပြောပါတယ်။

ဒီဇင်ဘာ ၂၂ ရက် ဒီနေ့မနက်မှာတော့ တော်လှန်ရေးတပ်တွေက သစ်ဖုလစခန်းကို နယ်မြေရှင်းလင်းရေးပြုလုပ်ချိန်မှာလည်း နောက်ထပ်အလောင်းတွေထပ်မံတွေ့ခဲ့ရတယ်လို့ သိရပါတယ်။

“သူတို့က(စကမ)က သစ်ဖုလက လူတွေနဲ့လည်း အဆက်အသွယ်ပျက်ကုန်တယ်ထင်ပါတယ်။ သူတို့လည်းရွာထဲက နေထွက်ပြေးတယ်။ သစ်ဖုလကပြေးတဲ့သူတွေလည်း ဘယ်ရောက်ကုန်လဲမသိသေးဘူး”လို့ တော်လှန်ရေးတပ်ဖွဲ့ဝင်တဦးက ပြောပါတယ်။

ဒ့ါအပြင် ဒီကနေ့အထိ ဝန်းသိုမြို့နယ်နဲ့ ကောလင်းမြို့နယ်အစပ်မှာလည်း တိုက်ပွဲတွေဆက်ဖြစ်နေပြီး မနေ့ညနေပိုင်းက ဝန်းသို ခမရ ၁၁၁ နဲ့ ၁၂၀ ကို ရဟတ်ယာဉ်နဲ့ အင်အား၊ ရိက္ခာတွေဖြည့်ထားတယ်လို့လည်း သိရပါတယ်။

သတင်း – မြတ်

မြေလတ်အသံ၊ နိုဝင်ဘာ ၂၉၊ ၂၀၂၅။

စစ်ကိုင်းတိုင်း၊ ခင်ဦးမြို့နယ်တိုက်ပွဲအတွင်း သေဆုံးခဲ့တဲ့ စစ်ကော်မရှင်တပ်ဖွဲ့ဝင်တွေရဲ့ ရုပ်အလောင်းတွေကို နိုဝင်ဘာ ၂၈ ရက်မနက် ၁၀ နာရီကစပြီး မီးသင်္ဂြိုဟ်ပေးခဲ့တယ်လို့ ခင်ဦးမြို့နယ်ပြည်သူ့ကာကွယ်ရေးအဖွဲ့ဆီက သိရပါတယ်။

မုံလှရွာ နဲ့ ပျဥ်ထောင်ရွာကြားရှိ လယ်ကွင်းတွေမှာသေဆုံးနေတဲ့ နည်းဗျူဟာ ၃၃၂ နဲ့ ခမရ-၁၁၁ တို့မှ စစ်ကော်မရှင်တပ်ဖွဲ့ဝင် ရုပ်အလောင်း ၄၀ ခန့်ကို တော်လှန်ရေးပူးပေါင်းတပ်ဖွဲ့တွေက ဒီဇယ်၊ ဓာတ်ဆီဗူးတွေ၊ တာယာကွင်းတွေ၊ မီးစာတုတ်တွေကို အသင့်ယူဆောင်ပြီး သင်္ဂြိုဟ်ခဲ့တာလို့ ဆိုပါ တယ်။

“မနေ့က ၁၀ နာရီ ၁၁ နာရီကစပြီး မီးသင်္ဂြိုဟ်တာ။ အဲ့ဒါ(အလောင်းတွေ)ချည်းကို ညနေ ထိတောင် မပြီးဘူး။ အနံ့တွေက အရမ်းဆိုးဝါးပြီးတော့ ကပ်ဖို့ရာမလွယ်ဘူးပေါ့။ အဲ့ဒါကြောင့် အကုန်လုံး မရှို့နိုင်ခဲ့ဘူး။ ပြီးတော့ သူတို့ရဲ့(စကမ) DeathBody တွေမှာ ကျည်တွေရှိတော့ ကျည်တွေပေါက်တာ။ အဲ့ဒါတွေကိုကျနော်တို့က တိမ်းပေးနေရတာ”လို့ ခင်ဦးမြို့နယ်ပကဖမှတာဝန်ရှိသူတဦးက ပြောပါတယ်။

အဆိုပါရုပ်အလောင်းတွေအကုန်လုံးဟာ ပြီးခဲ့တဲ့ နိုဝင်ဘာ ၂၃ ရက်က ပျဥ်ထောင်ကျေးရွာ ပတ်ဝန်းကျင်မှာ ဖြစ်ပွားခဲ့တဲ့တိုက်ပွဲအတွင်းသေဆုံးခဲ့တာဖြစ်ပြီး ၅ ရက်အကြာ နိုဝင်ဘာ ၂၈ ရက် မီးရှို့ရာမှာ အခက်အခဲတွေရှိခဲ့တာကြောင့် အလောင်းတဝက်ခန့်သာ ပြီးစီးခဲ့တယ်လို့ သူကဆက်ပြောပါတယ်။

“ဓာတ်ဆီ ၄၊ ၅ ဂါလံလောက်ယူသွားတာ။ မလောက်ဘူးဖြစ်နေတယ်။ ကုန်သွားတာ။ တာယာကွင်းတွေ ယူသွားတာလည်းမလောက်ဘူး။ ရှို့တာကတဝက်လောက်မပြီးဘူး။ တော်တော်များများ ကျန်သေးတယ်။ တချို့နေရာတွေကရေပြင်တွေဆိုတော့ ကိုင်တွယ်ဖို့ရာ လက်အိတ်တွေ၊ နှာခေါင်းပိတ်တွေယူသွားတယ်။တော်တော်လည်း အဆင်မပြေဘူး။ ရက်ကကြာနေပြီဆိုတော့” လို့ အထက်ပါတာဝန်ရှိသူက ဆိုပါတယ်။

အဲ့ဒီတိုက်ခိုက်မှုအတွင်း စစ်ကော်မရှင်တပ်တွေဆီကနေ ငါးကြင်းမှီး ၁ လက်၊ MA-1 ၁၀ လက်၊ MA-2 ၃ လက်၊ BA-100/ 60 mm ကွန်မန်ဒို စိန်ပြောင်း ၁ လက်၊ MA-3 ၃ လက်၊ MA-4 ၁ လက်၊ G-3 ၄ လက်၊ MAS Sniper ၁ လက်၊ MA-1 ၅ လက်နဲ့ ဆက်စပ်ကျည်နဲ့ ပစ္စည်းတွေသိမ်းဆည်းရရှိခဲ့တယ်လို့ ခင်ဦးပကဖ ဆီက သိရပါတယ်။

တိုက်ခိုက်ခံရတဲ့ အင်အား ၁၈၀ ခန့်ပါ အဆိုပါစစ်ကြောင်းဟာ တိုက်ပွဲဖြစ်ပြီး မုံလှကျေးရွာကို ဆုတ်ပြေးခဲ့ပြီးနောက် အဲဒီရွာကနေတဆင့် နိုဝင်ဘာ ၂၇ ရက်ညမှာ မုံလှ-ပင်စိမ်းကင်း -ကျီစု-အောင်သာယာ-ကာဘိုးကားလမ်းအတိုင်း ကန့်ဘလူဘက်ကို ဆုတ်ခွာသွားခဲ့တယ်လို့သိရပါတယ်။

စာတည်း – လင်း

တန့်ဆည်၊ နိုဝင်ဘာ ၂၉၊ ၂၀၂၅။

စစ်ကိုင်းတိုင်း၊ တန့်ဆည်မြို့နယ်၊ မူးတိမ်ရွာက စစ်ကော်မရှင်တပ်နဲ့ပျူစောထီးပူးပေါင်းစခန်းကို သိမ်းပိုက်မီးရှို့ခဲ့ရာထိခိုက်သေဆုံးသူများခဲ့တယ်လို့ ပြည်သူ့လွတ်မြောက်ရေးတပ်မတော် – PLA တာဝန်ရှိသူတွေဆီက သိရပါတယ်။

နိုဝင်ဘာ ၂၈ ရက်မနက် ၄ နာရီခန့်မှာ အင်အား ၁၀၀ ခန့်ရှိနေတဲ့ အဆိုပါစခန်းကို ဝင်ရောက် တိုက်ခိုက်ပြီး မနက် ၈ နာရီကျော်မှာ စခန်းသိမ်းမီးရှို့နိုင်ခဲ့တယ်လို့ ဆိုပါတယ်။

“ဘေးနားကပ်လျက်ကပျုရွာတွေက စစ်ကူလာပေးတာရှိတယ်။ ဖြတ်တောက်ရေး ကောင်းကောင်းလုပ်နိုင်ခဲ့တော့ ပျူရွာတွေက စစ်ကူလာတဲ့အဖွဲ့တွေက လာမပေါင်းနိုင်ဘူး ဖြစ်သွားတယ်။ တပ်တွေလန့်ပြီးထွက်ပြေးသွားတယ်။ နောက်ကျ စခန်းကိုသိမ်းပြီးတော့ စခန်းမှာရှိတဲ့ ပစ္စည်းတွေသိမ်းပြီးတော့ မီးရှို့ဖျက်ဆီးခဲ့တာ”လို့ PLA ပြန်ကြားရေးတာဝန်ရှိသူကပြောပါတယ်။

အဆိုပါ တိုက်ပွဲမှာ စစ်ကော်မရှင်တပ်နဲ့ပျူစောထီး စုစုပေါင်း ၂၀ ခန့်သေဆုံးခဲ့ပြီး သေနတ် ၅ လက်၊ ကျည်အချို့နဲ့ ဆက်စပ်ပစ္စည်းတွေကို သိမ်းဆည်းနိုင်ခဲ့တယ်လို့ သိရပါတယ်။

ကာကွယ်ရေးပူးပေါင်းတပ်တွေဘက်ကလည်း ထိခိုက်သူအချို့ရှိခဲ့ပြီး စခန်းသိမ်းပြီးနောက် ပစ္စည်းတွေ သိမ်းဆည်းနေချိန် စစ်ကော်မရှင်ဘက်က Y 12 နဲ့ဗုံး ၄ လုံးကြဲချခဲ့သလို ကန့်ဘလူအခြေစိုက် ၆၀၀၆ တပ်ကလည်း လက်နက်ကြီးနဲ့ပစ်ခတ်တာတွေရှိခဲ့သေးတယ်လို့ ဆိုပါတယ်။

မူးတိမ်ရွာရဲ့ တမိုင်ကျော်မှာ မူးဂွ၊ မူးကျင်း၊ ကျွန်းလယ်စတဲ့ ပြည်သူ့စစ်အများစု နေထိုင်တဲ့ ကျေးရွာတွေရှိတယ်လို့ ပေါ်ဦးစစ်ကြောင်းတာဝန်ရှိသူဆီက သိရပါတယ်။

မူးတိမ်ရွာမှာ ပျူစောထီးအများစုနေထိုင်ကြပြီး တိုက်ခိုက်ခံရပြီးနောက် မူးတိမ်ရွာတဖက်ကမ်းရှိ ကန့်ဘလူမြို့နယ်၊ မှော်တော်ရွာဘက်ကို ထွက်ပြေးသွားကြကာ စစ်ကော်မရှင်တပ်နဲ့ ပျူစောထီးတွေကတော့ ရွာကိုပြန်ကပ်ဖို့ပြင်ဆင်နေကြတယ်လို့ ဆိုပါတယ်။

ဒီတိုက်ခိုက်မှုကို ပြည်သူ့လွတ်မြောက်ရေးတပ်မတော် – PLA၊ ပေါ်ဦးစစ်ကြောင်း၊ တန့်ဆည်မြို့နယ်-ပကဖ၊ ရွှေဘိုခရိုင် အမှတ် -၂၅ တပ်ရင်း၊ ဓူဝံရေဦးမြို့နယ်အဖွဲ့၊ ဝံသပါလရေဦးမြို့နယ်အဖွဲ့၊ Drone force Taze အဖွဲ့တို့က ပူးပေါင်းတိုက်ခိုက်ခဲ့တာလို့ သိရပါတယ်။

နိုဝင်ဘာ ၂၄ ရက်ကလည်း တန့်ဆည်မြို့နယ်၊ ကံထူးမကျေးရွာက တိုက်နယ်ဆေးရုံကို စစ်ကော်မရှင်တပ်ဘက်က လေကြောင်းကနေ ဗုံးကြဲခဲ့ရာ ၇ ဦးသေဆုံးပြီး ၃ ဦးဒဏ်ရာရခဲ့တယ်လို့ သိရပါတယ်။

စာတည်း – လင်း