မြေလတ်အသံ၊ အောက်တိုဘာ ၁၅၊ ၂၀၂၅။

မန္တလေးတိုင်း၊ သပိတ်ကျင်းမြို့နယ်၊ မိုးကုတ်-မန္တလေးကားလမ်းပိုင်းပေါ်က ဖော့တော့ကျေးရွာ လမ်းဆုံကို စစ်ကော်မရှင်တပ်က အောက်တိုဘာ ၁၄ ရက်မနက်ပိုင်းမှာ ပြန်လည်ထိန်းချုပ်ခဲ့တယ်လို့ တော်လှန်ရေးတပ်ဖွဲ့ဝင်တဦးက ပြောပါတယ်။

စစ်ကော်မရှင်တပ်က သပိတ်ကျင်းမြို့ကို ပြန်ထိန်းချုပ်ပြီးနောက် မိုးကုတ်-မန္တလေးကားလမ်းမကို ထိန်းချုပ်နိုင်ဖို့အတွက် အင်အား ၂၀၀ ကျော်နဲ့ ထိုးစစ်ဆင် တိုက်ခိုက်ခဲ့ရာ ၂ လကျော်အကြာ အောက်တိုဘာ ၁၄ ရက်မှာ ဖော့တော့လမ်းဆုံကိုထိန်းချုပ်ခဲ့တာလို့ ဆိုပါတယ်။

“မနေ့က မနက်အစောပိုင်းပဲထိန်းချုပ်လိုက်တာ။ သူတို့က(စကမ)သာလွန်အင်အား၊ လေကြောင်း၊ လက်နက်ကြီးတွေကို တောက်လျှောက်သုံးတာ။ ကိုယ့်ဘက်က လက်နက် အင်အားမမျှတော့ ဆုတ်ပေးလိုက်ရတာ”လို့ မြေပြင်အခြေအနေကိုသိရှိတဲ့ တော်လှန်ရေးတပ်ဖွဲ့ဝင်တဦးကပြောပါ တယ်။

လက်ရှိအဆိုပါလမ်းဆုံမှာ စစ်ကော်မရှင်တပ်သား ခန့်မှန်းခြေ ၅၀ ကျော်က အထိုင်ချတပ်စွဲထားပြီး အဲ့ဒီလမ်းဆုံကနေ သပိတ်ကျင်းမြို့အထိ လမ်းမတလျှောက်ကို ထိန်းချုပ်ထားတယ်လို့ ဆိုပါတယ်။

ဖော့တော့ကျေးရွာလမ်းဆုံဟာ မန္တလေး-စဉ့်ကူး-မိုးကုတ်နဲ့ မန္တလေး-စဉ့်ကူး- သပိတ်ကျင်း-ထီးချိုင့်ကားလမ်းမပေါ်မှာရှိပြီး စစ်ကော်မရှင်တပ်နဲ့ တော်လှန်ရေးတပ်ဖွဲ့တွေအကြား စစ်ရေးအရ အဓိကအချက်အချာကျတဲ့ လမ်းဆုံတခုဖြစ်တယ်လို့လည်း အထက်ပါတပ်ဖွဲ့ဝင်ကပြောပါတယ်။

စစ်ကော်မရှင်တပ်ဟာ သပိတ်ကျင်းမြို့ကို ပြီးခဲ့တဲ့ဇူလိုင် ၂၂ ရက်က အလုံးစုံ ပြန်လည်ထိန်းချုပ်နိုင်ခဲ့ပြီးနောက် မိုးကုတ်-မန္တလေးကားလမ်းမတလျောက်ကို အလုံးစုံပြန်ထိန်းချုပ်နိုင်ရေးအတွက် နေ့စဥ်နီးပါး ထိုးစစ်ဆင်တိုက်ခိုက်နေပြီး တိုက်ပွဲနဲ့သက်ဆိုင်မှုမရှိတဲ့ ကျေးရွာတွေကိုလည်း လေကြောင်းကနေ ဗုံးကြဲတိုက်ခိုက်တယ်လို့ ဒေသခံတွေဆီကသိရပါတယ်။

လက်ရှိမှာတော့ ဖော့တော့၊ ဝါးဖြူတောင်၊ ညောင်ပင်သာ၊ ပိုးဇာ၊ ဇရပ်ကွင်း၊ သင်ပေါင်းချောင်း၊ မြိုင်သာယာ၊ ရွှေမွှေးချောင်း၊ ရေပူလယ်တီစတဲ့ကျေးရွာ ၉ ရွာက ဒေသခံသောင်းချီဟာ ဘေးလွတ်ရာနေရာတွေကို တိမ်းရှောင်နေကြရတယ်လို့ အထက်ပါတော်လှန်ရေးတပ်ဖွဲ့ဝင်က ပြောပါတယ်။

စာတည်း – လင်း

တိုက်ပွဲတွင်းသေဆုံးစစ်သားအလောင်း ၄ လောင်းကို ဂိတ်အနီးသင်္ဂြိုဟ်ပေးခဲ့

ပွင့်ဖြူ၊ အောက်တိုဘာ ၈၊ ၂၀၂၅။

မကွေးတိုင်း၊ မင်းဘူးခရိုင်၊ ပွင့်ဖြူမြို့နယ်၊ ပုသိမ်-မုံရွာလမ်းပိုင်းက မဲဇလီဆည်‌တော်ကြိုးတံတားရှိ စစ်ကော်မရှင်စစ်ဆေးရေးဂိတ်ကို ဝင်ရောက်တိုက်ခိုက်ရာ ၄ ဦးသေဆုံးပြီး လက်နက်ခဲယမ်းတွေလည်း သိမ်းဆည်းနိုင်ခဲ့တယ်လို့ မင်းဘူးခရိုင် အမှတ် ၇ တပ်ရင်းဆီက သိရပါတယ်။

မဲဇလီဆည်‌တော်ဂိတ်မှာ ပွင့်ဖြူအခြေစိုက် ဝါစိုက်ပျိုးရေးတပ်မှ စစ်ကော်မရှင်တပ်ဖွဲ့ဝင် ၁၀ ဦးဝန်းကျင်ရှိနေချိန် အောက်တိုဘာ ၄ ရက် ညနေ ၅ နာရီ ၈ မိနစ်ကနေ ၆ နာရီ ၃၈ မိနစ်အထိ ၁ နာရီခွဲအကြာ ဝင်ရောက်တိုက်ခိုက်ခဲ့ကြတာလို့ ဆိုပါတယ်။

“မဲဇလီဆည်‌တော်ကြိုးတံတားရဲ့ တောင်ဘက်မှာရှိတဲ့ မဲဇလီဆည်တော်ဂိတ်ကို တိုက်ခိုက်သိမ်းပိုက်ခဲ့တာပါ၊ ဂိတ်တဂိတ်လုံးကို ကျနော်တို့ သိမ်းပိုက်နိုင်ခဲ့တယ်လို့ ပြောလို့ရပါတယ်၊ တိုက်ပွဲဖြစ်ပွားနေတဲ့အချိန် စစ်ကော်မရှင်ဘက်က စစ်ကူတာ‌တွေ၊ လေကြောင်းပစ်ကူတာတွေ မရှိပါဘူး၊ ရန်သူဘက်က အလောင်း ၄ လောင်း လက်နက်ခဲယမ်းနဲ့ဆက်စပ်ပစ္စည်းတွေ သိမ်းဆည်းရမိတယ်၊” လို့ မင်းဘူးခရိုင် အမှတ် ၇ တပ်ရင်း သတင်းနဲ့ပြန်ကြားရေးတာဝန်ခံ ကိုအောင်ဘက ပြောပါတယ်။

အဲ့ဒီဂိတ်မှာရှိတဲ့ စစ်ကော်မရှင်တပ်ဖွဲ့ဝင်တွေဟာ သစ်၊ ဝါးသမားတွေဆီက ပိုက်ဆံကောက်ပြီး ခရီးသွားနဲ့ ဈေးသည်တွေဆီကလည်း ပိုက်ဆံကောက်တာတွေလုပ်တယ်လို့ သိရပါတယ်။

ဒီတိုက်ခိုက်မှုကို မင်းဘူးခရိုင် အမှတ် ၇ တပ်ရင်း၊ မင်းဘူးခရိုင် ပကဖ ပွင့်ဖြူမြို့နယ် ပကဖ တို့က ပူးပေါင်းတိုက်ခိုက်ခဲ့တာဖြစ်ပြီး မင်းဘူးခရိုင် အမှတ် ၄ တပ်ရင်းက လက်နက်ကြီးပစ်ကူပေးခဲ့တာဖြစ်ပြီး တိုက်ပွဲတွင်းသေဆုံးတဲ့ စစ်ကော်မရှင်တပ်ဖွဲ့ဝင် ၄ ဦးကို အဲ့ဒီနေရာမှာပဲ သင်္ဂြိုဟ်ပေးခဲ့တယ်လို့ ကိုအောင်ဘ က ပြောပါတယ်။

ဒါ့အပြင် တိုက်ပွဲတွင်း G3 ၃ လက်၊ အူစီ ၃ လက်၊ ကျည်ဆံ ၁,၈၀၀ တောင့်၊ လက်ပစ်ဗုံးနဲ့ ကျည်ဘောက်တွေအပါအ၀င် လက်နက်နဲ့ ဆက်စပ်ပစ္စည်းတွေကို သိမ်းဆည်းနိုင်ခဲ့တယ်လို့ သိရပါတယ်။

တိုက်ခိုက်ခံရပြီးနောက် စစ်ကော်မရှင်ဘက်က အောက်တိုဘာ ၇ ရက် နေ့လယ် ၁၁ နာရီဝန်းကျင်မှာ အဆိုပါဂိတ်စခန်းအနီးကို မကွေးလေတပ်ကလာတဲ့ ဂျက်ဖိုက်တာပေါ်က ဗုံး ၅ လုံးနဲ့ ၁ ကြိမ်၊ နေ့လယ် ၁ နာရီဝန်းကျင်မှာ ဗုံး ၃ လုံးနဲ့ ၁ ကြိမ်ကြဲချတိုက်ခိုက်ခဲ့တယ်လို့ သိရပါတယ်။

စာတည်း – လင်း

တိုက်ပွဲတွင်း စစ်ကော်မရှင်တပ်ဖွဲ့ဝင် ၃ ဦးသေဆုံးပြီး လက်နက်ခဲယမ်းတွေလည်းသိမ်းဆည်း

မော်လိုက်၊ ဩဂုတ် ၂၀၊ ၂၀၂၅။

စစ်ကိုင်းတိုင်း၊ မော်လိုက်မြို့နယ်၊ ထော်သာရွာက စစ်ကော်မရှင်တပ်ဖွဲ့ဝင်တွေနဲ့ ပျူစောထီးတွေအထိုင်ချထားတဲ့ ပျူစောထီးစခန်းကို တော်လှန်ရေးတပ်တွေက တိုက်ခိုက်သိမ်းပိုက်ခဲ့ပြီးနောက် ပျူစောထီးတွေနဲ့ မိသားစုဝင် ၁၉၀ ဦးကိုဖမ်းဆီးခဲ့တယ်လို့ အမှတ် ၁ စစ်ဒေသက သြဂုတ် ၂၀ ရက် ဒီကနေ့မှာ ထုတ်ပြန်လာပါတယ်။

အဲ့ဒီစခန်းကို ဩဂုတ် ၁၅ ရက်မှာ မော်လိုက်ခရိုင်တပ်ရင်း (၂၊ ၄) နဲ့ ဖောင်းပြင်မြို့နယ် ပကဖ ပူးပေါင်းအဖွဲ့တို့က တိုက်ခိုက်သိမ်းပိုက်ခဲ့တာဖြစ်ပြီး တိုက်ပွဲတွေအတွင်း စစ်ကော်မရှင်တပ်ဖွဲ့ဝင် ၃ ဦးရဲ့ အလောင်းကို ရရှိပြီး ၉ ဦး ထိခိုက်ဒဏ်ရာရခဲ့တယ်လို့ ဆိုပါတယ်။

ဒါ့အပြင် အဲ့ဒီစခန်းကို ဦးဆောင်ထားတဲ့ ပျူစောထီးခေါင်းဆာင် အဲပန် အပါအဝင် ပျူစောထီးတွေရဲ့ မိသားစုဝင်စုစုပေါင်း ၁၉၀ ဦးကို ဖမ်းဆီးရမိပြီး ပျူစောထီးအဖွဲ့ဝင် ၂၀ ခန့်ကတော့ ထွက်ပြေးလွတ်မြောက်ခဲ့တယ်လို့ ထုတ်ပြန်ချက်မှာ ဖော်ပြပါတယ်။

ထော်သာရွာစခန်း သိမ်းပိုက်နေချိန် ချင်းတွင်းမြစ်ကြောင်းအတိုင်း စုန်ဆင်းလာသော ဖလက်ခွံတွေပေါ်က စစ်ကော်မရှင်တပ်ဖွဲ့ဝင် အင်အား ၁၃၀ ခန့်နဲ့ တောင်းအင်ရွာက စစ်ကော်မရှင်တပ်အင်အား ၅၀ ခန့်ကလည်း စစ်ကူပေးဖို့ အင်းတပေါင်းရွာကိုထိုးစစ်ဆင်ခဲ့ပေမယ့် ထော်သာရွာကို သိမ်းပိုက်ခဲ့နိုင်ခဲ့တယ်လို့ ဆိုပါတယ်။

ဒါ့အပြင် ထော်သာရွာစခန်းသိမ်းတိုက်ပွဲအတွင်း ၆၀ မမ ပြောင်း၊ RPG အပါ လက်နက် ၂၃ လက်၊ ခဲယမ်းအချို့နဲ့ ငွေကျပ်သိန်း ၁၅၀ ကျော် သိမ်းဆည်းနိုင်ခဲ့တယ်လို့ သိရပါတယ်။

သတင်း – ဒိန်းဂျား၊

တိုက်ပွဲတွင်း စစ်ကောင်စီတပ်ဖွဲ့ဝင် ၃ ဦးဖမ်းမိပြီး လက်နက်ခဲယမ်းတွေလည်း သိမ်းဆည်း

ပေါက်ခေါင်း၊ ဩဂုတ် ၁၈၊ ၂၀၂၅။

ပဲခူးတိုင်း၊ ပေါက်ခေါင်းမြို့နယ်၊ ပဲခူးရိုးမအဝေးပြေးလမ်းဘေးက ဘော်ဒါစခန်းကို တိုက်ခိုက် သိမ်းပိုက်ချိန် စစ်ကောင်စီတပ်ဖွဲ့ဝင် ၅ ဦးသေဆုံးကာ ၃ ဦးအရှင်ဖမ်းမိထားတယ်လို့ ပြည်ခရိုင် ၃၆၀၂ တပ်ရင်း သတင်းနဲ့ပြန်ကြားရေးတာဝန်ခံဆီက သိရပါတယ်။

ဩဂုတ် ၁၅ ရက် မနက် ၅ နာရီကျော်မှာ အင်အား ၄၀ ခန့်ရှိနေတဲ့ စစ်ကောင်စီစခန်းကို သွားရောက်တိုက်ခိုက်ခဲ့ရာ အပြန်အလှန်ပစ်ခတ်မှု ၁ နာရီကျော်အကြာမှာ စခန်းကိုသိမ်းယူနိုင်ခဲ့တယ်လို့ ဆိုပါတယ်။

“တိုက်ပွဲဖြစ်ပြီးတော့ ပြေးတဲ့သူတွေပြေးကြတယ်။ ခုခံတိုက်တဲ့သူတွေက သေတယ်။ သေဆုံးဒဏ်ရာရ အတည်ပြုတာက မြေပြင်မှာသွားခဲ့တဲ့ ရဲဘော်တွေရဲ့မျက်မြင်နဲ့ဒေသခံတွေရဲ့ အတည်ပြုချက်တွေအရ သတင်းထုတ်ပြန်တာဖြစ်ပါတယ်”လို့ ပြည်ခရိုင် ၃၆၀၂ တပ်ရင်း သတင်းနဲ့ပြန်ကြားရေးတာဝန်ခံကပြောပါတယ်။

တိုက်ပွဲအတွင်းမှာ စစ်ကောင်စီတပ်ဖွဲ့ဝင် ၅ ဦးသေဆုံးပြီး ၃ ဦးကိုအရှင်ဖမ်းမိခဲ့ကာ ဖမ်းဆီးရမိ စစ်ကောင်စီတပ်သား ၃ ဦးနဲ့ပတ်သက်တဲ့အချက်အလက်တွေကိုတော့ လတ်တလော ထုတ်ဖော်ပြောကြားလို့မရသေးဘူးလို့ဆိုပါတယ်။

တိုက်ပွဲမှာ စစ်ကောင်စီတပ်သားတွေကိုင်ဆောင်တဲ့ MA3 ၂ လက်၊ MA11 ၁ လက်၊ အူစီ ၁ လက်၊ ပစ္စတို ၁ လက်၊ ကျည်မျိုးစုံ ၂၇၆ တောင့်၊ ရှေ့ထွက်မိုင်း ၁ လုံး၊ ကျည်ဘောက် ၁၃ ဘောက်၊ စကားပြောစက် ၁ လုံး၊ မိုဘိုင်းလ်ဖုန်း ၄ လုံး၊ ဆက်သွယ်ရေးအထိုင်စက် ၁ လုံး တို့ကိုလည်း သိမ်းဆည်း ရမိခဲ့ပြီး စစ်ကောင်စီတပ်သားတွေနေထိုင်တဲ့အဆောက်အဦတွေကိုတော့ မီးရှို့ဖျက်ဆီးခဲ့တယ်လို့ ဆိုပါတယ်။

တိုက်ခိုက်မှုကိုတော့ ဗျူဟာ (၂၁) ကွပ်ကဲမှုအောက်ရှိ ပြည်ခရိုင်အမှတ် (၁) ၃၆၀၁ တပ်ရင်း၊ ပြည်ခရိုင်အမှတ် (၂) ၃၆၀၂ တပ်ရင်း နဲ့ တောင်ငူခရိုင်အမှတ် (၁) ၃၅၀၁ တပ်ရင်းတို့က ပူးပေါင်းတိုက်ခိုက်ခဲ့တာလို့ သိရပါတယ်။

တိုက်ပွဲဖြစ်ပြီးနောက် ည ၉ နာရီခန့်မှာ စစ်ကောင်စီဘက်က ကြိမ်ချောင်းကျေးရွာကို ပါရာမိုတာနဲ့ဗုံး ၄ လုံးကြဲချခဲ့ရာ အသက် ၁၃ နှစ်အရွယ်မိန်းကလေးငယ် ၁ ဦးအပါအဝင် ၆ ဦးသေဆုံးကာ ၁၁ ဦးဒဏ်ရာရခဲ့တယ်လို့ သိရပြီး သေဆုံးထိခိုက်သူတွေရဲ့ အချက်အလက်ကို လိုင်းအခက်အခဲကြောင့် ဘယ်သူဘယ်ဝါဆိုတာ အတည်မပြုနိုင်သေးဘူးလို့ ဆိုပါတယ်။

ဒါ့အပြင် ဩဂုတ် ၁၆ ရက် ညနေ ၆ နာရီကျော်ကလည်း ဂျင်းစိမ်းရွာက ခရစ်ယာန်ဘုရားကျောင်းကို စစ်ကောင်စီတပ်က ဂျိုင်ရိုကော်ပရာ နဲ့ ဗုံး ၂ လုံးကြဲခဲ့တဲ့အတွက် ဘုရားကျောင်းပျက်စီးခဲ့ပါသေးတယ်။

အဲ့ဒီနောက် ဩဂုတ် ၁၇ ရက်မှာ ဘော်ဒါကျေးရွာကို စစ်ကောင်စီစစ်ကြောင်းဝင်လာပြီး ကျေးရွာနေအိမ်တွေကို မီးရှို့ပြီးနောက်တပ်စွဲထားတယ်လို့ သိရပါတယ်။

စာတည်း – လင်း