ညောင်လေးပင်

ညောင်လေးပင်၊ ဧပြီ ၁၇၊ ၂၀၂၅။

ပဲခူးတိုင်း၊ ညောင်လေးပင်မြို့ကလာတဲ့ ပျုစောထီးခေါင်းဆောင်အပါအဝင် မိသားစုဝင် ၄၀ ကျော်ကို မွန်ပြည်နယ်၊ ကျိုက်ထိုမြို့နယ်၊ ကင်မွန်းစခန်းကျေးရွာရှိ ကဒက်ချောင်းရေတံခွန်မှာ တော်လှန်ရေးအဖွဲ့တခုက ဖမ်းဆီးသွားတယ်လို့ ပဲခူးတိုင်းအခြေစိုက် ဒေသကာကွယ်ရေး အဖွဲ့ဝင်တွေဆီက သိရပါတယ်။

ဧပြီ ၁၅ ရက်နေ့လယ် ၂ နာရီခန့်မှာ ကဒက်ချောင်းရှိ ဝါဆိုမိုးစားသောက်ဆိုင်မှာရှိနေတဲ့ ပျူစောထီးခေါင်းဆောင် လှိုင်မင်း၊ ဇနီးဖြစ်သူ ယမင်းနဲ့ ပျုစောထီး ဒုခေါင်းဆောင် မဲကြီး အပါအဝင် အမျိုးသား၊ အမျိုးသမီး ၄၀ ကျော်ကို ဒေသအခြေစိုက်လက်နက်ကိုင်အဖွဲ့တခုက ဖမ်းဆီးသွားတာလို့ ဆိုပါတယ်။

“ကျနော့်အထင်ဆို အဲဒီမှာပျူ အားလုံး ၁၃ ယောက်လောက်ပါမယ်။ ယောကျ်ားလေးတွေ တော်တော်များများက ပျူတွေ။ အားလုံးတော့ ပျူတွေမဟုတ်ဘူး။ မိန်းကလေးတွေနဲ့ ကလေးတွေလည်းပါတယ်။”လို့ ပဲခူးတိုင်းအခြေစိုက် ဒေသကာကွယ်ရေးတပ်ဖွဲ့တခုမှ တပ်ဖွဲ့ဝင်တဦးက ပြောပါတယ်။

ဖမ်းဆီးခံရသူတွေကိုတော့ ဧပြီ ၁၇ ရက်အထိ ဖမ်းဆီးသွားတဲ့အဖွဲ့က ထိန်းသိမ်းထားပြီး ဆက်လက်စစ်ဆေးနေတယ်လို့သိရကြောင်း သူကပြောပါတယ်။

ဖမ်းဆီးခံရသူတွေထဲမှာ ပျူစောထီးအဖွဲ့ဝင်တွေရဲ့ မိသားစုဝင်တွေဖြစ်တဲ့ အသက် ၁၀ နှစ်အောက် ကလေးငယ် ၈ ဦးခန့်နဲ့ သက်ကြီးပိုင်းအမျိုးသမီးအချို့လည်းပါဝင်ပြီး သူတို့ကို ဘယ်လိုအရေးယူဆောင်ရွက်မယ်ဆိုတာကိုတော့ မသိရသေးဘူးလို့ ဆိုပါတယ်။

အဆိုပါ ဖမ်းဆီးထားမှုနဲ့ပတ်သက်ပြီး သက်ဆိုင်ရာအဖွဲ့တွေဘက်ကလည်း သတင်းထုတ်ပြန်တာမျိုး မရှိသေးပါဘူး။

စစ်ကောင်စီရဲ့ ဧပြီ ၁၆ ရက်ထုတ်ပြန်ကြေညာချက်မှာတော့ ကျိုက်ထီးရိုးဘုရားဖူးလာတဲ့ ပြည်သူ ၄၈ ဦးကို ကဒက်ချောင်းရှိ စားသောက်ဆိုင်တခုကနေ PDF အဖွဲ့က ခြေလျင်နဲ့ရောက်လာကာ လိုက်ထရပ်ကား ၂ စီးနဲ့ဖမ်းခေါ်သွားခဲ့တယ်လို့ဖော်ပြထားပြီး ဖမ်းဆီးခံရသူတွေက ဘယ်သူဘယ်ဝါတွေဖြစ်တယ်ဆိုတာကိုတော့ ဖော်ပြထားတာမျိုးမရှိပါဘူး။

စာတည်း – လင်း

ပဲခူး၊ ဇန်နဝါရီ ၂၉၊ ၂၀၂၅။

ပဲခူးတိုင်း၊ ရွှေကျင်နဲ့ညောင်လေးပင်မြို့နယ်တွေမှာ စစ်ကောင်စီတပ်ဖွဲ့ဝင်တွေဘက်က လေကြောင်းကနေ ဗုံးကြဲချတိုက်ခိုက်တာနဲ့ လက်နက်ကြီးပစ်ခတ်တိုက်ခိုက်တာတွေကြောင့် အမျိုးသမီး တဦးသေဆုံးပြီး ဘုန်းကြီးကျောင်းနဲ့နေအိမ်တွေ ပျက်စီးသွားတယ်လို့ ရွှေကျင်မြို့နယ်ပအဖ တာဝန်ရှိသူကပြောပါတယ်။

ဇန်နဝါရီ ၂၇ ရက်နေ့မနက် ၁၁ နာရီ မိနစ် ၄၀ ခန့်မှာ ရွှေကျင်မြို့နယ်၊ ညောင်ပင်ကြီးကျေးရွာကို စစ်ကောင်စီဘက်က ဂျက်တိုက်လေယာဥ် ၁ စီးနဲ့ ဗုံး ၂ လုံးကြဲချတိုက်ခိုက်ခဲ့သလို ပိန်းဇလုပ်အခြေစိုက် ခလရ ၂၆၄ တပ်နဲ့ ရေကြည်ချောင်းကျေးရွာမှာတပ်စွဲထားတဲ့ စစ်ကောင်စီတပ်ဖွဲ့ဝင်တွေကလည်း လက်နက်ကြီးတွေနဲ့ပစ်ခတ်ခဲ့တာကြောင့် အေးမြအောင်ဘုန်းကြီးကျောင်း၊ ကျောင်းသစ်ဘုန်းကြီးကျောင်း ၂ ကျောင်းနဲ့ နေအိမ် ၂ လုံးပျက်စီးခဲ့ပါတယ်။

ဇန်နဝါရီ ၂၈ ရက်နေ့ မနက် ၂ နာရီခန့်မှာလည်း ညောင်ပင်ကြီးကျေးရွာ ကျောင်းသစ်ဘုန်းကြီးကျောင်းဝင်းထဲကို စစ်ကောင်စီတပ်ဖွဲ့ဝင်တွေဘက်က ဂျက်တိုက်လေယာဥ် ၁ စီးနဲ့ ပေါင် ၅၀၀ ဗုံး ၂ လုံးထပ်မံကြဲချတိုက်ခိုက်ခဲ့ပြီး ကျောင်းဝင်းအတွင်း ကျန်ရှိအဆောက်အဦတွေနဲ့ ကျောင်းအနီး နေအိမ် ၁ လုံးထပ်မံပျက်စီးခဲ့ပါသေးတယ်။

ညောင်လေးပင်မြို့နယ်၊ ပျဉ်ရေကြီးကျေးရွာကိုလည်း ဇန်နဝါရီ ၂၈ ရက်နေ့ နေ့လည် ၁၂ နာရီ ၃၀ ခန့်မှာ စစ်ကောင်စီတပ်ဖွဲ့ဝင်တွေဘက်က ဒရုန်းနဲ့ ဗုံးသီး ၆ လုံးကြဲချတိုက်ခိုက်ခဲ့တာကြောင့် ရွာထဲက ဘုန်းကြီးကျောင်းပေါ်ကိုကျရောက်ပေါက်ကွဲခဲ့ကာ ကျောင်းဆောင် ၄ ဆောင် ပျက်စီးခဲ့သလို ဘုန်းကြီးကျောင်းနံဘေးမှာ နေထိုင်တဲ့ အသက် ၆၉ နှစ်အရွယ်ဒေါ်စန်းမြင့် နံကြားအောက် ဗုံးစမှန်ဒဏ်ရာရပြီးနေရာမှာတင်သေဆုံးခဲ့တယ်လို့ သိရပါတယ်။

စစ်ကောင်စီတပ်ဖွဲ့ဝင်တွေဟာ စစ်ရှုံးလာချိန်တွေမှာ ဘုန်းကြီးကျောင်းတွေအတွင်း PDF တွေခိုအောင်းနေတယ်ဆိုတဲ့ သတင်းကိုလွှင့်ပြီးမှ ဘာသာရေးအဆောက်အဦတွေကို တိုက်ခိုက်တာဟာ စစ်ရာဇဝတ်မှုတွေ ပေါ်ပေါ်တင်တင်ကျူးလွန်နေတာဖြစ်တယ်လို့ ဆိုပါတယ်။

“၂၅ ၊ ၂၆ လောက်တုန်းက သူတို့ကင်းပုန်းဝပ်နေတဲ့ ပုဇွန်မြောင်းကျေးရွာဘုန်းကြီးကျောင်းကို PDF ပူးပေါင်းတပ်တွေက ဝင်ရောက်တိုက်ခိုက်တဲ့အခါမှာ သူတို့ဘက်က အင်အား ၂၀ ကျော်ကျဆုံးသွားပြီးတော့ လက်နက်တွေလည်း ဆုံးရှုံးသွားတဲ့အခါမှာ စစ်တောင်းမြစ်ဝှမ်းမှာရှိတဲ့ တော်လှန်ရေးအင်အားစုတွေ ထိန်းချုပ်ထားတဲ့နယ်မြေထဲကို လေကြောင်းကတိုက်ခိုက်တာ၊ ဒရုန်းနဲ့ဗုံးကြဲတာပါ။ သူတို့ထိခိုက်နစ်နာပါတယ်လို့ စစ်ရှုံးလာတဲ့အခါတိုင်းမှာ ပြည်သူတွေကို ကျုးလွန်တိုက်ခိုက်တာပါ။”လို့ ရွှေကျင်မြို့နယ် ပအဖ တာဝန်ခံကပြောပါတယ်။

စစ်ကောင်စီတပ်ဖွဲ့ဝင်တွေဘက်က လေယာဥ်နဲ့ဗုံးကြဲတာ၊ လက်နက်ကြီးပစ်ခတ်တာနဲ့ ဒရုန်းနဲ့ဗုံးသီးချတာတွေကြောင့် ပျဉ်ရေကြီး၊ ညောင်ပင်ကြီး၊ ကုန်းတလကြီးကျေးရွာတွေအပါအဝင် ကျေးရွာ ၅ ရွာခန့်က သက်ကြီးရွယ်အို၊ ကလေးသူငယ်တွေနဲ့ လူဦးရေ ၅၀၀ ကျော်ခန့်ဟာ ဘေးလွတ်ရာကျေးရွာတွေကို ကြိုတင်ရွေ့ပြောင်းနေထိုင်နေကြပြီး ကျေးရွာကနေ မပြောင်းရွှေ့ဘဲ အခြေအနေစောင့်ကြည့်နေကြသူတချို့လည်း ရှိနေတယ်လို့ သိရပါတယ်။

ဇန်နဝါရီ ၂၇ ရက်နေ့ညပိုင်းကလည်း ကျောက်တံခါးမြို့နယ်၊ နတ်တလင်းကျေးရွာမှာ စစ်ကောင်စီတပ်ဖွဲ့ဝင်တွေဘက်က ပစ်ခတ်တဲ့ လက်နက်ကြီးကျရောက်ပေါက်ကွဲပြီး အမျိုးသမီး ၁ ဦးသေဆုံးကာ ကလေး ၁ ဦးဒဏ်ရာရခဲ့သေးတယ်လို့ သိရပါတယ်။

စာတည်း – ကိုချမ်း

ပဲခူး၊ မေ ၁၆၊ ၂၀၂၃။

ပဲခူးတိုင်းဒေသကြီး၊ ညောင်လေးပင်မြို့နယ်၊ အင်ဝိုင်းကျေးရွာအနီးရှိ ညောင်လေးပင်-မဒေါက်သွားလမ်းက ရေကြည်ချောင်းတံတား ပြုပြင်နေတဲ့ စစ်ကောင်စီအဖွဲ့ ဒရုန်းနဲ့ တိုက်ခိုက်ခံရလို့ ၃ ဦးဒဏ်ရာရတယ်လို့ သိရပါတယ်။

မေလ ၁၅ ရက် နေ့လည် ၁ နာရီခန့်မှာ စစ်ကောင်စီက လုံခြုံရေး ယူပေးပြီး တံတားပြင်နေတဲ့ အဖွဲ့ကို PDF က ဒရုန်းနဲ့ ဗုံးချတိုက်ခိုက်ခဲ့တာဖြစ်တယ်လို့ ဒေသခံတဦးက ပြောပါတယ်။

“ဒရုန်းဗုံးကျလို့ ထိခိုက်ဒဏ်ရာရသူတွေရှိတာက ဟုတ်ပါတယ်။ ဗုံးကျတလုံးပဲကျတာ။ လုံခြုံရေး ယူထားတဲ့ စကစ အဖွဲ့ဝင်ရော တံတားလုပ်သားတွေရော ထိခိုက်သွားတာဟုတ်တယ်။ ဒရုန်းဗုံးကျပြီးနောက်တော့ တံတားပြင်နေတဲ့အဖွဲ့တွေက ဆက်မလုပ်တော့ဘဲ နားထားတယ်လို့တော့ သိရတယ်”လို့ ပြောပါတယ်။

ဒရုန်းဗုံးကျလို့ ဦးမျိုးအောင် ၄၃ နှစ် အင်ဝိုင်းကျေးရွာနေသူ၊ ဦးကျော်စိုးမိုး ၅၄ နှစ် သောင်ကြီးကျေးရွာနေသူ အပါအဝင် ၃ ဦး မစိုးရိမ်ရထိခိုက်ဒဏ်ရာရခဲ့တယ်လို့ ဆိုပါတယ်။

ထိခိုက်ဒဏ်ရာရသွားသူတွေကိုတော့ စစ်ကောင်စီအဖွဲ့က ညောင်လေးပင်ပြည်သူ့ဆေးရုံကို တင်ပို့ထားတယ်လို့ သိရပါတယ်။

အဲ့ဒီ တံတားဟာ မေလ ၁ ရက်မှာ လက်နက်ကိုင်အဖွဲ့တစ်ခုက မိုင်းထောင်ဖောက်ခွဲခဲ့လို့ အလျားပေ ၆၀ လောက် ပြိုကျပျက်စီးသွားပြီး လမ်းသွားလမ်းလာတွေ အသုံးပြုလို့ မရတော့တာပါ။

ဒါ့အပြင် ​​ရေကြည်ချောင်းတံတားဟာ အလျားပေ ၁၂၀ ကျော်၊ အကျယ်ပေ ၂၄ ပေခန့်ရှိ သံကူကွန်ကရစ် တံတားအမျိုးအစားဖြစ်ကာ ပဲခူးရိုးမဘက်ကို စစ်ကောင်စီဘက်က စစ်ကြောင်းထိုးတဲ့အခါ သုံးသလို ဒေသခံတွေလည်း အသုံးပြုတဲ့ တံတားဖြစ်တယ်လို့ သိရပါတယ်။

ပဲခူး၊ ဖေဖော်ဝါရီ ၁၃၊ ၂၀၂၃။

ပဲခူးတိုင်းဒေသကြီး၊ ညောင်လေးပင်မြို့၊ ညောင်လေးပင်ဘူတာမှာ ဗုံးပေါက်ကွဲမှုဖြစ်ပြီး ခရီးသည် ၃ ဦးသေဆုံးကာ ၉ ဦးဒဏ်ရာရခဲ့တယ်လို့ သိရပါတယ်။

ဖေဖော်ဝါရီလ ၁၃ ရက်နေ့ နေ့လည် ၁၂ နာရီခန့်မှာက ဘူတာမှာ ခရီးသည်တွေ ရထားစောင့်နေချိန် ဗုံးပေါက်ကွဲမှု ဖြစ်ပေါ်ခဲ့တယ်လို့ ဒေသခံတဦးက ပြောပါတယ်။

“ရထားစောင့်နေတဲ့ ခရီးသည်တွေရှိနေတဲ့နားကနေ ဗုံးပေါက်တာပါ။ ထောင်ထားတာလား လာချသွားတာလားတော့ သေချာမသိရဘူး။ ဗုံးပေါက်လို့ ရထားစောင့်နေတဲ့ ခရီးသည်တွေ ထိခိုက်သေဆုံးတာတွေရှိတယ်” လို့ ပြောပါတယ်။

ဗုံးပေါက်မှုကြောင့် တောင်တွင်းကြီးမြို့၊ လက်တက်ကျေးရွာမှ ကိုသက်နိုင်ထွန်း ၃၁ နှစ်၊ မလဲ့လဲ့အေး ၃၆ နှစ်၊ မနွဲ့နွဲ့ဝင်း ၄၂ နှစ် ၃ ဦး သေဆုံးခဲ့တယ်လို့ သိရပါတယ်။

ဒါ့အပြင် အောင်ထွန်းလင်း ၂၉ နှစ်၊ ဒိုက်ဦးနေသူ၊ ဦးသိန်းဇော် ၃၅ နှစ် ညောင်လေးပင်နေသူ၊ တောင်တွင်းကြီးမှ မနုဝါ ၃၂ နှစ်၊ သက်ပိုင်ကျော် ၁၇ နှစ်၊ ဒေါ်ခင်မိုးဝင်း ၄၁ နှစ်၊ ဒေါသန်းဌေး ၅၆ နှစ်၊ သူဇာလင်း ၃၅ နှစ်နဲ့ ဒေါ်ခင်အေးမြင့် ၄၉ နှစ် ပြွန်တန်ဆာနေသူ၊ ပြည့်ဖူးခိုင် ၁၆ နှစ် ညောင်လေးပင်နေသူတို့မှာ ဒဏ်ရာတွေ ရရှိသွားတယ်လို့ သိရပါတယ်။

သေဆုံးထိခိုက်ဒဏ်ရာရသူတွေကိုတော့ ဒေသလူမှုကူညီရေးအသင်းတွေက ညောင်လေးပင်ဆေးရုံကို ခေါ်ဆောင်သွားပြီး ဆေးကုသမှုခံယူနေကြတယ်လို့ သိရပါတယ်။

ဗုံးပေါက်ကွဲမှု ဖြစ်ပွားပြီးနောက်ပိုင်း စစ်ကောင်စီတိုင်းမှူးဆင်းလာပြီး စစ်ကောင်စီအဖွဲ့တွေနဲ့ စစ်ဆေးတာတွေလုပ်သွားတယ်လို့ ဆိုပါတယ်။

အဲဒီဗုံးခွဲတိုက်ခိုက်တာကိုတော့ ဘယ်အဖွဲ့က ဘာ​ကြောင့်လုပ်တယ်ဆိုတာ မြေလတ်အသံက စုံစမ်းနေဆဲ ဖြစ်ပါတယ်။