စစ်ကော်မရှင်ကား

■ ကားပျက်စီးပြီး လက်နက်နဲ့ကျည်တွေကို PDF သိမ်းဆည်း

ညောင်ဦး၊ ဖေဖော်ဝါရီ ၂၈၊ ၂၀၂၆။

မန္တလေးတိုင်း၊ ညောင်ဦးမြို့နယ်၊ ဝါးခင်းကြီးကျေးရွာအနီး ညောင်ဦး-ကျောက်ပန်းတောင်းလမ်းပိုင်းမှာ စစ်ကော်မရှင်ကားပစ်ခံရပြီး ၄ ဦးသေဆုံးကာ လက်နက်ခဲယမ်းတွေကိုလည်း သိမ်းဆည်းခဲ့တယ်လို့ Pakokku Special Task Force သတင်းနဲ့ပြန်ကြားရေးတာဝန်ခံဆီက သိရပါတယ်။

ဖေဖော်ဝါရီ ၂၇ ရက်မနက် ၇ နာရီခွဲမှာ ညောင်ဦးဘက်ကနေ ကျောက်ပန်းတောင်းဘက်ကို ခမရ ၄၁၅ က အင်အား ၅ ဦးလိုက်ပါလာတဲ့ စစ်ကား ၁ စီးကို ကြားဖြတ်တိုက်ခိုက်ခဲ့တယ်လို့ ဆိုပါတယ်။

“ပစ်ခတ်မှုက မိနစ် ၂၀ လောက်ဖြစ်တယ်။ ပစ်ခတ်မှုဖြစ်ပြီးတော့ ၁ ယောက်ကတော့လွတ်သွားတယ်။ ရဲဘော်တွေကတော့ အထိအခိုက်မရှိဘူး။ ကားကတော့စုတ်ပြတ်သတ်သွားတယ်။ လမ်းဘေးကွင်းပြင်ထဲ ထိုးကျသွားတာ။ ကားပေါ်မှာသေတာ ၂ ယောက်။ ခေါင်းခန်းထဲမှာ ၁ ယောက်၊ အပြင်မှာ ကျပြီးတော့ ညောင်ပင်နားသေတာ ၁ ယောက်ရယ် ကွင်းပြင်ထဲမှာသေတာ ၁ ယောက်”လို့ Pakokku Special Task Force သတင်းနဲ့ပြန်ကြားရေးတာဝန်ခံ ရဲဘော်မှိုင်းက ပြောပါတယ်။

ပစ်ခတ်မှုအတွင်း စစ်ကော်မရှင်တပ်ဖွဲ့ဝင် ၄ ဦးသေဆုံးခဲ့ပြီး ကားပေါ်က MA 3 သေနတ် ၂ လတ်၊ ကာဘိုင် ၂ လက် နဲ့ ကျည်တွေသိမ်းဆည်းခဲ့ကာ ကားကိုတော့ ပြန်အသုံးပြုလို့မရတော့တာကြောင့် အလောင်းတွေနဲ့အတူ ပစ်ထားခဲ့တယ်လို့ သိရပါတယ်။

ပစ်ခတ်မှုဖြစ်ပြီးနောက် စစ်ကော်မရှင်အဖွဲ့တွေရောက်လာပြီး အနီးဝန်းကျင်ကိုပစ်ခတ်ပြီး အလောင်းတွေကို ကောက်သွားတယ်လို့ဆိုပါတယ်။

အဆိုပါပစ်ခတ်မှုကိုတော့ Pakokku Special Task Force (ပခုက္ကူမြို့နယ်ပြည်သူ့ကာကွယ်ရေးတပ်ဖွဲ့ ပကဖ)၊ Bagan Nyaung Oo Special Task Force အဖွဲ့နဲ့ မကွေးတိုင်းပကဖ အမှတ် ၄ အထူး လှုပ်ရှားစစ်ကြောင်းတို့က ပူးပေါင်းတိုက်ခိုက်ခဲ့တာလို့ သိရပါတယ်။

ဇန်နဝါရီ ၃ ရက်ကလည်း ညောင်ဦးမြို့နယ်၊ လက်ဝဲကျေးရွာနဲ့ မကျည်းတန်းကျေးရွာကြားမှာ စစ်ကော်မရှင်စစ်ကြောင်းကြားဖြတ်တိုက်ခိုက်ခံရပြီး ၇ ဦးသေဆုံးကာ ၅ ဦးဒဏ်ရာရခဲ့သေးတယ်လို့ သိရပါတယ်။

စာတည်း – လင်း

ချောက်၊ နိုဝင်ဘာ ၁၈၊ ၂၀၂၅။

မကွေးတိုင်း၊ ချောက်မြို့ကထွက်လာတဲ့ စစ်ကော်မရှင်ကားတွေကိုတိုက်ခိုက်ရင်း အာဠာဝက မြို့ပြပြောက်ကျားတပ်ဖွဲ့မှ စခန်းမှူးကျဆုံးခဲ့တယ်လို့ အဲ့ဒီတပ်ဖွဲ့ဆီက သိရပါတယ်။

နိုဝင်ဘာ ၁၇ ရက် နေ့လယ် ၁၁ နာရီခွဲလောက်မှာ ချောက်မြို့နယ် တနေရာမှာ စစ်ကော်မရှင် ကားတွေကိုတိုက်ခိုက်ရာက အပြန်အလှန်ပစ်ခတ်မှုဖြစ်ပြီး စခန်းမှူးအသက် ၁၉ နှစ်အရွယ် အောင်ဇင်မျိုး (ခ) ဥသြမှာ အဆုတ်ကို ကျည်ထိမှန်ပြီး နေရာမှာပဲ သေဆုံးခဲ့တာလို့ ဆိုပါတယ်။

“ချောက်မြို့က ထွက်လာတဲ့ ယာဉ်တန်းကို ချောက်မြို့နယ် တနေရာမှာ တိုက်ခိုက်တာ၊ ကား ၂ စီးကို ကြားဖြတ်တိုက်ခိုက်ရင်း သူပစ် ကိုယ်ပစ်အပြန်အလှန်ပစ်ခတ်ရင်း ထိမှန်တာ၊ အဆုတ်ကို ထိမှန်တာ၊ အလောင်းကို ပြန်ရခဲ့ပါတယ်၊” လို့ အာဠာဝက မြို့ပြပြောက်ကျားတပ်ဖွဲ့ တာဝန်ရှိသူတဦးက ပြောပါတယ်။

ထိတွေ့တိုက်ခိုက်မှုဖြစ်ပွားချိန် မိနစ် ၃၀ ခန့်ကြာခဲ့ပြီး စစ်ကော်မရှင်တပ်ဖွဲ့ဝင်တွေဘက်က ၅ ဦးသေဆုံးမှုရှိကာ တိုက်ခိုက်မှုဖြစ်ပြီးနောက် ၁ နာရီခန့်အကြာမှာ စစ်ကော်မရှင်ကားတွေက ချောက်မြို့ဘက်ကို ဆက်သွားခဲ့ကြပြီး အဲ့ဒီနောက်မှ အလောင်းကိုကောက်ယူခဲ့ရတယ်လို့ တာဝန်ရှိသူတဦးက ပြောပါတယ်။

အောင်ဇင်မျိုး (ခ) ဥသြရဲ့ ဈာပနအခမ်းအနားကို နိုဝင်ဘာ ၁၇ ရက် မနေ့ကညနေ ၃ နာရီခွဲလောက်က မကွေးခရိုင်အတွင်း တပ်ရင်းအခြေစိုက်ရာနေရာမှာ ပြုလုပ်ခဲ့ပြီး တပ်ဖွဲ့ဝင် ၃၀ ဦးဝန်းကျင်တက်ရောက်ခဲ့ကြတယ်လို့ သိရပါတယ်။

အောင်ဇင်မျိုးဟာ ၂၀၂၅ ခုနှစ် ၅ လပိုင်းမှာ အာဠာဝကမြို့ပြပြောက်ကျားတပ်ဖွဲ့ကိုစတင်ဝင်ရောက်ခဲ့တာဖြစ်ပြီး လက်ရှိမှာ စခန်းမှူးအဖြစ်တာဝန်ထမ်းဆောင်နေတာ ၂ လကြာပြီး မြန်မာလူမျိုးဖြစ်တယ်လို့ တာဝန်ရှိသူတဦးက ပြောပါတယ်။

၂၀၂၃ ဇွန်လမှာစတင်တည်ထောင်ခဲ့တဲ့ အာဠာဝက မြို့ပြပြောက်ကျားတပ်ဖွဲ့ဟာ ချောက်မြို့နယ်အခြေစိုက်ကာ စစ်ကော်မရှင်တပ်တွေကိုတော်လှန်တိုက်ခိုက်နေတာဖြစ်ပြီး တပ်ဖွဲ့တည်ထောင်ချိန်ကနေ လက်ရှိအချိန်ထိ တပ်ဖွဲ့ဝင် ၆ ဦးကျဆုံးခဲ့တာပါ။

စာတည်း – လင်း

မြင်းခြံ၊ အောက်တိုဘာ ၂၄၊ ၂၀၂၅။

မန္တလေးတိုင်း၊ မြင်းခြံမြို့ကနေ စစ်ကော်မရှင်တပ်ဖွဲ့ဝင်တွေလိုက်ပါလာတဲ့ ကားတွေကို ဒေသခံတော်လှန်ရေးတပ်တွေက ကြားဖြတ်တိုက်ခိုက်ပြီး လက်နက်တွေသိမ်းဆည်းခဲ့တယ်လို့ မြင်းခြံခရိုင်၊ တပ်ရင်း ၇ Zero ပြောက်ကျားတပ်မဟာ ဆီကသိရပါတယ်။

အောက်တိုဘာ ၂၁ ရက်မနက်ပိုင်းက စစ်ကော်မရှင်တပ်တွေလိုက်ပါလာတဲ့ Double Cab ကား ၃ စီးကို မြင်းခြံ-နွားထိုးကြီးလမ်းပိုင်းတနေရာမှာ တိုက်ခိုက်ခဲ့ရာ ၃ စီးစလုံးကို ထိမှန်ခဲ့ကာ တိုက်ခိုက်နေချိန်မှာပဲ ကား ၁ စီးကိုထားပြီး ကျန် ၂ စီးနဲ့ထွက်ပြေးသွားကြတယ်လို့ ဆိုပါတယ်။

“နောက်ဆုံးမှာကျန်တဲ့ Jammer တင်တဲ့ Double Cab ကား ၁ စီးက မောင်းလို့ခက်ခဲတာတကြောင်း ရန်သူက ဘယ်ညာအရှေ့အနောက်မှာရှိနေတာကတကြောင်း ဒီစစ်ဆင်ရေးကို မိနစ် ၂၀ လောက်နဲ့ ဖော်ဆောင်ပြီး အမြန်ခွာစစ်ဆင်ခဲ့ရတာကြောင့် ကားတွေလည်းမသယ်နိုင်ဘူး၊ ကျန်နေခဲ့တဲ့ Double Cab နဲ့ Jammer ကားကို လက်ပစ်ဗုံးနဲ့ခွဲပြီးတော့ ကျနော်တို့ ခွာစစ်ဆင်ပြီးတော့ ဆုတ်ခဲ့ရတယ်” လို့ Zero ပြောက်ကျားတပ်မဟာ တပ်ရင်း ၇ မြင်းခြံခရိုင် တပ်ရင်းမှူး ဗိုလ်သက်ကြီးက ပြောပါတယ်။

တိုက်ခိုက်ပြီးနောက် MA1 ၁ လက်၊ MA3 ၁ လက်နဲ့ G3 ၁ လက်တို့ကို သိမ်းဆည်းရခဲ့ပြီး ကျန်ခဲ့တဲ့ ကားပေါ်မှာလည်း သေဆုံးစစ်သားအလောင်း ၁ လောင်းကို မျက်မြင်တွေ့ခဲ့ရတယ်လို့ ဆိုပါတယ်။

ဒီတိုက်ခိုက်မှုကို Zero ပြောက်ကျားတပ်မဟာ တပ်ရင်း ၇ မြင်းခြံခရိုင် နဲ့ မြင်းခြံခရိုင် အမှတ်(၈) တပ်ရင်း တို့ကပူးပေါင်းလုပ်ဆောင်ခဲ့တာပါ။

ပြီးခဲ့တဲ့ ဇူလိုင် ၃ ရက်ကလည်း မြို့သာကနေ ငါန်းဇွန်ဘက်ကို ရိက္ခာပို့တဲ့ စစ်ကြောင်းကို မြို့သာနဲ့ ငါန်းဇွန်ကြားမှာ Zero ပြောက်ကျားတပ်မဟာက ကြားဖြတ်တိုက်ခိုက်ခဲ့ပါသေးတယ်။

စာတည်း – လင်း