စစ်ကိုင်း

စစ်ကိုင်း၊ မေ ၈၊ ၂၀၂၃။

စစ်ကိုင်းတိုင်း၊ အင်းတော်မြို့နယ်၊ အောင်းကုန်နဲ့ နန့်သာကျေးရွာ ၂ ရွာမှာ စစ်ကောင်စီတပ်က ၂ လနီးပါးကြာ တပ်စွဲနေတာကြောင့် ဒေသခံတောင်သူတွေဟာ စိုက်ပျိုးထားတဲ့သီးနှံတွေကို မရိတ်သိမ်းရဘဲ အခက်ကြုံနေရတယ်လို့ ဒေသခံတွေ ကပြောပါတယ်။

စစ်ကောင်စီတပ်သားတွေဟာ ပြီးခဲ့တဲ့မတ်လ ၂၀ ရက်နေ့ကစလို့ အောင်းကုန်းရွာမှာ လာရောက်တပ်စွဲပြီး ရွာထဲကပြည်သူတွေရဲ့ ဆန်၊ စပါးတွေကို ခိုးယူစားသောက်ကာ အခု မေလ ၈ ရက်အထိ မပြန်ဘဲတပ်စွဲနေသေးတာကြောင့် ကျေးရွာ ၅ ရွာက ဒေသခံ ၆၅၀၀ ဟာ ထွက်ပြေးတိမ်းရှောင်ခဲ့ရတာ ဖြစ်ပါတယ်။

တပ်မ (၇၇) လက်အောက်ခံ တပ်ရင်းတခုက အင်အား ၁၀၀ ကျော်နဲ့တပ်စွဲနေတာကြောင့် ထွက်ပြေးတိမ်းရှောင်နေရတဲ့ အနီးပတ်ဝန်းကျင် ကျေးရွာ ၅ ရွာက ဒေသခံတောင်သူတွေဟာလည်း ကောက်ပဲသီးနှံရိတ်သိမ်းချိန် ရောက်လာနေပြီဖြစ်ပေမယ့် စိုက်ပျိုးထားတဲ့သီးနှံတွေကို မရိတ်သိမ်းရဲဘဲ အခက်ကြုံနေရတယ်လို့ Indaw Revolution-IR မှ တာဝန်ခံက ပြောပါတယ်။

“ကျနော်တို့ဒေသမှာက စပါးနဲ့ပဲ ၂ မျိုးစိုက်တာပါ။ ပဲကကျတော့ ဆီထွက်တဲ့မြေပဲပေါ့။ အခုက ပဲမကောက်နိုင်သေးတာ ဧကတော်တော်များမယ်ဗျ။ ကျနော်တို့မှာက တရွာလုံးနီးပါးစိုက်ကြတာဆိုတော့ ဧကတွေကို ခန့်မှန်းလို့မရဘူးဗျ။ စကစတွေကတော့ ဒေသခံတွေ ရွာကိုဝင်မယ်ဆိုရင် မှတ်ပုံတင်၊ နာမည်တွေကိုပေးပြီး စစ်ဆေးခံရပြီးမှ ဝင်ရမယ်လို့ပြောထားပေမယ့် အခုချိန်ထိ တယောက်မှရွာကိုမဝင်ကြဘူး” လို့ သူက ရှင်းပြပါတယ်။

ပဲသီးနှံမသိမ်းရဘဲ ထွက်ပြေးတိမ်းရှောင်နေရတဲ့ ကျေးရွာ ၅ ရွာမှာ အောင်းကုန်၊ နန့်သာ၊ အင်းပင်၊ ရွာသာရွာ၊ သုံးတော်စတဲ့ကျေးရွာက ဒေသခံ စုစုပေါင်းဦးရေ ၆၅၀၀ ဖြစ်ပြီး၊ လက်ရှိမှာ အဲ့ဒီဒေသခံတွေဟာ ဘေးလွတ်ရာကျေးရွာတွေမှာ စစ်ရှောင်နေကြရတာ ဖြစ်ပါတယ်။

ပြီးခဲ့တဲ့ ၂၀၂၂ ခုနှစ်၊ အောက်တိုဘာလ ၁၉ ရက်မှာလည်း အိမ်ခြေ ၄၀၀ ရှိတဲ့ အောင်းကုန်ရွာကို အင်အား ၆၀ ကျော်ပါတဲ့ စစ်ကြောင်းတခုက ဝင်ရောက်မီးရှို့ဖျက်စီးခဲ့တာကြောင့် လူနေအိမ် ၂၀ လုံး ပြာကျပျက်စီးသွားခဲ့ရတယ်လို့ သိရပါတယ်။

ပုံစာ -၂၀၂၂ ခုနှစ်၊ အောက်တိုဘာလတွင် အောင်းကုန်ရွာကို စစ်ကောင်စီကမီးရှို့ဖျက်ဆီးခဲ့စဥ်။

စာတည်း – လင်းဇေ

စစ်ကိုင်း၊ မေ ၈၊ ၂၀၂၃။

စစ်ကိုင်းတိုင်း၊ မုံရွာမြို့နယ်၊ မုံရွာ-မန္တလေး ကားလမ်းမကြီးအပေါ် ဖြတ်သန်းသွာလာမှုကို မေလ ၈ ရက်ဒီမနက် ၁၀ နာရီကျော်ကစလို့ ရက် အကန့်အသတ်မရှိ ပိတ်ပင်သွားမယ်လို့ People’s knight Defense Force Myinmuမှ တာဝန်ခံ ဗိုလ်အေးချမ်းက ပြောပါတယ်။

အဆိုပါလမ်းမပေါ်မှာ စစ်ကောင်စီစစ်ကြောင်း တွေရှိနေတာကြောင့် တိုက်ပွဲအချိန်မရွေးဖြစ်လာနိုင်တဲ့အတွက် အခုလိုကန့်သတ်ထားရတာဖြစ်တယ်လို့ သူက ဆိုပါတယ်။

“မနေ့ကဆိုရင် လမ်းမဘေးနားက လက်တုတ်တောရွာ မီးရှို့ခံရတယ်။ အကြောင်းမဲ့ သက်သက်ရှို့သွားတာ။ ပြီးတော့ အဲ့ကောင်တွေက ဒီနေ့မှာ ဂွေးပင်တောရွာထဲမှာ တပ်စွဲထားတယ်။ အင်အားတော်တော် များတယ်။ တိုက်ပွဲက အချိန်မရွေး ဖြစ်လာနိုင်ပါတယ်။ အဲဒါကြောင့် လမ်းသွားဒေသခံတွေအတွက် အန္တရာယ်မဖြစ်အောင် လမ်းကိုပိတ်ရတာပါ”လို့ သူက ဆက်ပြောပါတယ်။

ဒါ့အပြင် ဒီကန့်သတ်မှုမှာ နောက်ထပ်ကြေညာချက် မထုတ်ပြန်တဲ့အထိ အကျုံးဝင်မှာဖြစ်တာကြောင့် ဒီအတောအတွင်းလိုက်နာခြင်းမရှိဘဲ သွားလာနေပါက ထိခိုက်မှုတစုံတရာဖြစ်ပေါ်ခဲ့ရင် မိမိတို့အဖွဲ့အနေနဲ့ တာဝန်ယူဖြေရှင်းသွားမှာမဟုတ်ကြောင်း ဗိုလ်အေးချမ်းက ဆိုပါတယ်။

အရေးပေါ်အခြေအနေနဲ့သွားလာရမည်ဆိုပါကလည်း နေ့ခင်းဆိုရင်ကားတွေကို တံခါးတွေဖွင့်သွားကြဖို့၊ ညအချိန်ဆိုရင်လည်း ကားအတွင်းမီးဖွင့်မောင်းပေးကြဖို့ကို ပြည်သူတွေက လိုက်နာပြီး တော်လှန်ရေးကို ကူညီပေးပါရန် မေတ္တာရပ်ခံအပ်ပါတယ်လို့ သူကဆိုပါတယ်။

ပြီးခဲ့တဲ့ဇန်နဝါရီလအတွင်းမှာ အခုလိုအရေးပေါ်ထုတ်ပြန်ချက်တခုကို ပြည်သူတွေအနေနဲ့ လိုက်နာမှုအားနည်းကြတာကြောင့် တိုက်ပွဲဖော်ဆောင်တဲ့အချိန်မှာ ဒေသခံ ပြည်သူတွေကို ရှောင်ရှားနေရလို့ PDFရဲဘော်တွေ ထိခိုက်မှုတွေရှိခဲ့ကြတယ်လို့ သိရပါတယ်။

စာတည်း – လင်းဇေ

စစ်ကိုင်း၊ မေ ၈၊ ၂၀၂၃။

စစ်ကိုင်းတိုင်း၊ ဝက်လက်မြို့နယ်၊ ရှိမ်းမကား ဗျူဟာကုန်းရဲစခန်းကနေ ရိက္ခာဆင်းဝယ်တဲ့ ရဲ၊ စစ်သားနဲ့ ပျူစောထီးတွေ ရှိမ်းမကားရွာထဲမှာ အဝေးထိန်းမိုင်းနဲ့တိုက်ခိုက်ခံရပြီး ၄ ဦးသေဆုံးခဲ့တယ်လို့ ကျားသစ်နက်ပျောက်ကြားအဖွဲ့ဆီက သိရပါတယ်။

မေလ ၇ ရက်မနေ့ကညနေ ၄ နာရီလောက်က ဖောက်ခွဲတိုက်ခိုက်ခဲ့ရာမှာ ရဲ ၁ ဦး၊ ပျူစောထီး ၁ ဦးနဲ့ စစ်သား ၂ ဦးသေဆုံးခဲ့တယ်လို့ ကျားသစ်နက်ပြောက်ကျားတပ်ဖွဲ့မှ တာဝန်ခံ နဂါးလေးက ပြောပါတယ်။

“မိုင်းဆွဲဖောက်ခွဲခံရအပြီး နာရီဝက်အကြာမှာ ရှိမ်းမကားဗျူဟာကုန်းက (စစ်ကောင်စီအဖွဲ့တွေ) နောက်ထပ်ရောက်လာပြီး လက်နက်ငယ်တွေနဲ့ ရမ်းသမ်းပစ်ခတ်တယ်၊‌ ဖောက်ခွဲခံရပြီး သေဆုံးတဲ့ အလောင်းတွေကို ပခုံး‌ပေါ်ထမ်းပြီး စခန်းထဲကို ပြန်သွားတယ်” လို့ ပြောပါတယ်။

ဒီသေဆုံးမှုနဲ့ ပတ်သက်ပြီး မြေလတ်အသံက သီးခြားအတည်မပြုနိုင်သေးပါဘူး။

အဲ့ဒီစခန်းမှာ မတ္တရာဘက်ကလာတဲ့ စစ်သားတွေက တပ်စွဲနေထိုင်နေတာဖြစ်ပြီး၊ ပြီးခဲ့တဲ့ မေလ ၆ ရက်မှာလည်း ရွာခံပြည်သူအချို့ကို စစ်ဗိုလ်တဦးက ရိုက်နှိက်တာတွေ လုပ်ခဲ့သေးတယ်လို့ ဆိုပါတယ်။

“ကျေးရွာထဲမှာ ပြည်သူတွေထိုင်နေတာကို ဗျူဟာကုန်းက စစ်ဗိုလ်ကနေ အရက်အလွန်အကျွံ့ မူးအောင်သောက်ပြီး ရိုက်နှက်တယ်၊ သေနတ်တွေနဲ့လည်း ထုသွားတယ်၊ ပြည်သူတဦးလည်း ဖမ်းပြီးပြန်တော့လွှတ်တယ်” လို့ ပြောပါတယ်။

ပြီးခဲ့တဲ့ ဧပြီလ ၁၀ ရက်ကလည်း စဉ့်ကူးမြို့နယ်၊ ကြက်တူရွေးရွာမှာတပ်စွဲထားတဲ့ စစ်အုပ်စုက ပြည်သူ‌ပိုင်ကောက်ပဲသီးနှံတွေကို အဓမ္မယူဆောင်သွားပြီးအပြန် ရွာသာယာရွာအနားမှာ ကျားသစ်နက် ပြောက်ကျားအဖွဲ့က လက်နက်ကြီးတွေနဲ့ ပစ်ခတ်ခဲ့တယ်လို့ သိရပါတယ်။

စာတည်း – လင်း

စစ်ကိုင်း၊ မေ ၈၊ ၂၀၂၃။

စစ်ကိုင်းတိုင်း၊ ယင်းမာပင်နဲ့ ဆားလင်းကြီးမြို့နယ်ထဲမှာရှိတဲ့ သပိတ်စစ်ကြောင်းတွေစုပေါင်းပြီး တရုတ်နိုင်ငံတော်အလံကိုမီးရှို့ကာ တရုတ်အစိုးရကို ဆန့်ကျင်ကန့်ကွက်ကြောင်း ဆန္ဒပြခဲ့ကြတယ်လို့ သိရပါတယ်။

မေလ ၈ ရက် ဒီကနေ့မနက် ၈ နာရီခွဲက “သို့ တရုတ်အစိုးရ ဖက်ဆစ်တပ်နဲ့ပေါင်းပြီး မြန်မာပြည်သူတွေကိုသတ်နေတာ ချက်ချင်းရပ်” စာသားပါ ဘန်နာတွေကိုင်စွဲပြီး ဆန္ဒပြခဲ့ကြတာလို့ ဆိုပါတယ်။

ယင်းမာပင်-ဆားလင်းကြီးရွာပေါင်းစုံသပိတ်၊ လက်ပံတောင်းဒေသသပိတ်၊ အညာပစ်တိုင်းထောင်လေးများ သပိတ်၊ ယင်းမာပင်မြောက်ခြမ်းကျေးရွာများ သပိတ်၊ နောက်ပြန်မလှည့်ကြေး ဒီတော်လှန်ရေးသပိတ်၊ အောင်လံလွှင့်မည် ရွှေရေကြည်သပိတ်၊ ကယ်တင်ရှင်မရှာတို့ကျေးရွာသပိတ်၊ ရွှေနွယ်သွေးသပိတ်၊ ရွှေဥက္ကံသပိတ် စတဲ့သပိတ်စစ်ကြောင်းတို့ ပူးပေါင်းကာ အတူချီတက်ဆန္ဒပြခဲ့ကြတာလည်း ဖြစ်ပါတယ်။

စာတည်း – 007

စစ်ကိုင်း၊ မေ ၈၊ ၂၀၂၃။

စစ်ကိုင်းတိုင်း၊ ဆားလင်းကြီးမြို့နယ်မှာ နေအိမ်တွေမီးရှို့ခံရတဲ့ကျေးရွာတွေက လူကြီးနဲ့ကလေး ၂၅၀ ဦးကို မေ ၇ ရက်မှာ မွေးနေ့ရှင် လင်းခွန်းက သူရဲ့ ၂၂ နှစ်ပြည့်မွေးနေ့အလှူအဖြစ် ကြာဇံချက်အာဟာရဒါနအလှူကို ကျွေးမွေးလှူဒါန်းခဲ့ပါတယ်။

ဒီမွေးနေ့အလှူကျွေးမွေးခြင်းကိစ္စတွေကို အညာပစ်တိုင်းထောင်လေးများအဖွဲ့က ကူညီပေးခဲ့တာဖြစ်တယ်လို့ အဖွဲ့ဝင်တဦးဖြစ်တဲ့ မဖူးပွင့်ဝေက မြေလတ်အသံကိုပြောပါတယ်။

စာတည်း-လင်းဇေ

မုံရွာ၊ မေ ၇၊ ၂၀၂၃။

စစ်ကိုင်းတိုင်း၊ မုံရွာမြို့လယ်ကနာရီစင်မှာ မေလ ၇ ရက်ဒီနေ့မနက် ၇ နာရီက စစ်အာဏာရှင်ဆန့်ကျင်ရေးစာတန်းပါ ဘန်နာကို မုံရွာလူငယ်အစည်းအရုံးမှ အဖွဲ့ဝင်လူငယ်တွေက စစ်အာဏာရှင်ဆန့်ကျင်ရေးလှုပ်ရှားမှုအဖြစ် ချိတ်ဆွဲခဲ့တယ်လို့ သိရပါတယ်။

“အခုချိန်ထိ သူတို့က လုံးဝအုပ်ချုပ်လို့မရပါဘူး။ ဒါကိုပြသလိုတာရယ်၊ သူတို့(စစ်တပ်)တွေ မခံမရပ်နိုင် ဖြစ်အောင် “အုပ်ချုပ်လို့တော့မရဘူး၊ ဒုတ်စုပ်လို့တော့ရမယ်”စာသားကို ကင်းပုန်းတွေရှိတဲ့ကြားက မြို့လယ်ခေါင်မှာ ချိတ်ဆွဲခဲ့တာပါ”လို့ မုံရွာလူငယ်အစည်းအရုံးဝင်တဦးက ပြောပါတယ်။

ဒါ့အပြင် စာတန်းချိတ်ဆွဲအပြီးမှာ အဲဒီနာရီစင်နာရီရှေ့မှာပဲ ကားတာယာကွင်းကို မီးရိူ့ဆန္ဒပြခဲ့ကြတယ်လို့ သိရပါတယ်။

မြင်းမူ၊ မေ ၇၊ ၂၀၂၃။

စစ်ကိုင်းတိုင်း၊ မြင်းမူမြို့နယ်၊ လက်ထုတ္တောရွာကို စစ်ကောင်စီတပ်သားတွေက မေလ ၆ ရက်မနေ့ကမနက် ၉ နာရီလောက်မှာ ဝင်ရောက်မီးရှို့ခဲ့ရာ နေအိမ် ၆၀၀ လောက် မီးလောင်ပျက်ဆီးခဲ့ပါတယ်။

အင်အား ၁၀၀ နီးပါးပါတဲ့ အဲ့ဒီစစ်ကြောင်းဟာ မေလ ၅ ရက်က မြင်းမူမြို့နယ်၊ ဂွေးပင်တောရွာနဲ့ ဘိုးမင်းကြီးကင်းကျေးရွာအကြားမှာ မိုင်းဆွဲခံခဲ့ရကာ၊ အဲ့ဒီကတဆင့် ချောင်းဦးမြို့နယ်၊ နတ်ရေကန်ရွာမှာ ဝင်ရောက်တပ်စွဲပြီး မနေ့ကမနက်ပိုင်းကျမှ လက်ထုတ္တောရွာထဲကို ဝင်ရောက်မီးရှို့ခဲ့တာလည်း ဖြစ်ပါတယ်။

“သူတို့စစ်ကြောင်း မိုင်းဆွဲခံရတဲ့နေရာ မုံရွာ − မန္တလေးကားလမ်းမဘေးတလျှောက်မှာရှိတဲ့ ရွာတွေကို လိုက်စစ်တယ်။ အဲဒီထဲမှာမှ လက်ထုတ္တောရွာကို သူတို့မသင်္ကာလို့ဆိုပြီး ဝင်ပြီမီးရှို့တယ်။ ပထမတကြိမ် မြောက်ပိုင်းကိုမီးရှို့တယ်။ မီးရှို့ပြီးတော့ပြန်ထွက်တဲ့အချိန်မှာ ရွာနဲ့မလှမ်းမကမ်းလောက်မှာ ထပ်ပြီမိုင်းမိတယ်။ မိုင်းမိတော့ အဲဒီရွာထဲကိုပြန်ဝင်လာပြီး ဒုတိယအကြိမ် မီးထပ်ရှို့တယ်”လို့ မြောင်မြို့နယ် ပြည်သူ့ကာကွယ်ရေးနှင့် လုံခြုံရေးအဖွဲ့ – CDSOM မှ ကိုနွေဦး က ပြောပါတယ်။

အိမ်ခြေ ၇၀၀ နီးပါးရှိတဲ့ လက်ထုတ္တောရွာဟာ အခုလိုမီးရှို့ခံရတာ ပထမအကြိမ်ဖြစ်ပါတယ်။ အဲံဒီစစ်ကောင်စီစစ်ကြောင်းဟာ ကျေးရွာမီးရှို့ပြီးနောက် မေလ ၅ ရက်မနက် ၁၀ နာရီလောက်မှာ နတ်ရေကန်ကျေးရွာထဲကို ပြန်လည်ဝင်ရောက်သွားတယ်လို့ သိရပါတယ်။

ဒါ့အပြင် လက်ထုတ္တောကျေးရွာထဲကိုဝင်ရောက်လာချိန် လက်နက်တွေပစ်ခတ်ခဲ့လို့ ဒေသခံ ၂ ဦး လက်နက်ထိမှန်ခဲ့သလို နောက်ထပ်ရွာသား ၂ ဦးလည်း မီးလောင်သေဆုံးခဲ့တယ်လို့ မြင်းမူမြို့နယ် သတင်းမှန်ပြန်ကြားရေးက ထုတ်ပြန်ထားပြီး၊ သူတို့နဲ့ပက်သက်တဲ့ အသေးစိတ်အချက်အလက်တွေ ကိုတော့ မြေလတ်အသံက ဆက်လက်စုံစမ်းနေဆဲပါ။

စာတည်း – လင်း