စစ်ကိုင်း၊ မတ် ၄၊ ၂၀၂၅။

စစ်ကိုင်းတိုင်း၊ စစ်ကိုင်းမြို့နယ်၊ ညောင်ကုန်းကျေးရွာမှာ စစ်ကောင်စီတပ်ဖွဲ့ဝင်တွေပစ်တဲ့ လက်နက်ကြီးကျည်ထိပြီး အမျိုးသား ၃ ဦးဒဏ်ရာရတယ်လို့ ဒေသကာကွယ်ရေးအဖွဲ့ဝင်တွေဆီက သိရပါတယ်။

မတ် ၃ ရက်မနက် ၆ နာရီကျော်မှာ တဲကြီးကျေးရွာ၊ ငါးထပ်ကြီးဘုရားထဲမှာ အထိုင်ချတပ်စွဲထားတဲ့ စစ်ကောင်စီတပ်ဖွဲ့ဝင်တွေက ညောင်ကုန်းကျေးရွာဘက်ကို လက်နက်ကြီးတွေနဲ့ပစ်ခတ်ခဲ့ရာ ၁ လုံးက ဒေသခံနေအိမ်ပေါ်ကျရောက်ပေါက်ကွဲခဲ့တယ်လို့ ဆိုပါတယ်။

“လက်နက်ကြီးက ရမ်းထုတာပါ။ ငါးထပ်ကြီးထဲက ၈၁ တွေနဲ့ပစ်တာ။ ထိတာက ၃ ယောက်။ ရဲဘော် ၁ ယောက်ပါတယ်။ ပြည်သူ ၂ ဦးပါတယ်။ “လို့ ဒေသကာကွယ်ရေးရဲဘော်တဦးကပြောပါတယ်။

လက်နက်ကြီးထိမှန်လို့ အသက် ၇၄ နှစ်အရွယ် အမျိုးသားရဲ့မျက်နှာနဲ့ ၃၉ နှစ် အရွယ်အမျိုးသားရဲ့ပေါင်မှာ အစထိမှန်ဒဏ်ရာရပြီး အသက် ၂၀ ကျော်ကျေးရွာကာကွယ်ရေးအဖွဲ့ဝင် ၁ ဦးလည်းထိခိုက်ဒဏ်ရာရတဲ့အပြင် နေအိမ် ၁ လုံးလည်းပျက်စီးခဲ့ပါတယ်။

ဒဏ်ရာရသူတွေကတော့ သက်သာတဲ့အခြေအနေမှာရှိတယ်လို့ သိရပါတယ်။

ညောင်ကုန်းကျေးရွာမှာအိမ်ခြေ ၄၀၀ ကျော် ဒေသခံ ၂၀၀၀ ခန့်ရှိပြီး လက်ရှိမှာ ဒေသခံထက်ဝက်နီးပါးဟာဘေးလွတ်ရာကို ထွက်ပြေးတိမ်းရှောင်နေကြရပါတယ်။

ပြီးခဲ့တဲ့နှစ် ဇွန် ၈ ရက်ကလည်း စစ်ကိုင်းမြို့နယ်၊ ထန်းတောဆိပ်ကျေးရွာအုပ်စု၊ သပြေသာကျေးရွာ ဘုန်းကြီးကျောင်းမှာ တော်လှန်ရေးအဖွဲ့တွေအစည်းဝေးလုပ်နေချိန် ဗုံးကြဲခံရလို့ သံဃာ ၂ ပါး အပါအဝင် သေဆုံးသူ ၈ ဦးနဲ့ ဒဏ်ရာရသူ ၅၀ ကျော်ရှိတယ်လို့ သိရပါတယ်။

စာတည်း – လင်း

စစ်ကိုင်း၊ ဖေ‌ဖော်ဝါရီ ၂၃၊ ၂၀၂၅။

စစ်ကိုင်းတိုင်း၊ စစ်ကိုင်းမြို့၊ မြောက်ဘော်ဂါရပ်ကွက်ကနေအိမ်မှာ အမျိုးသားတဦး ပစ်သတ်ခံလိုက်ရတယ်လို့ ဖြစ်စဉ်ကိုသိထားတဲ့ဒေသခံတဦးဆီက သိရပါတယ်။

သေဆုံးသူဟာ အသက် ၃၅ နှစ်အရွယ် ကိုကိုဦး (ခ) ကမ္ဘာစိုးဆိုသူဖြစ်ပြီး ဖေဖော်ဝါရီ ၂၂ ရက် နေ့လယ် ၂ နာရီကျော်မှာ နေအိမ်မှာရှိနေချိန် လက်နက်ကိုင်လူတစုက လာရောက်ပစ်သတ်သွားတာ လို့ဆိုပါတယ်။

“ဆိုင်ကယ် ၂ စီး လူ ၄ ယောက်ဝင်လာပြီးတော့ နာမည်တောင်မခေါ်ဘူး။ သူ့ကိုလူတွေ အများကြီးကြားထဲက ကျောက်သမားတွေဆိုတော့ ကျောက်စီတာ ကျောက်ဖြန့်တာ လုပ်နေတဲ့ကြားက သူကထမင်းစားနေတာ။ သူ့ကိုရွေးပစ်သွားတာ။”လို့ ဖြစ်စဉ်ကိုသိထားတဲ့ ဒေသခံတဦးက ပြောပါတယ်။

သေနတ်နဲ့အနီးကပ်ပစ်ခံရတာကြောင့် ညာဘက်ရင်အုံ၊ ဘယ်ဘက်ချိုင်းအောက်တို့မှာ စုစုပေါင်းကျည်ထိဒဏ်ရာ ၈ ချက်ဝန်းကျင်ရပြီး နေရာမှာတင် သေဆုံးသွားတယ်လို့ ဆိုပါတယ်။

ပစ်ခတ်မှုဖြစ်ပြီးနောက်မှာ စစ်ကောင်စီအဖွဲ့တွေရောက်လာပြီး အလောင်းကိုစစ်ဆေးကာ စစ်ကိုင်းဆေးရုံကို ယူဆောင်သွာတယ်လို့ သိရပါတယ်။

ဒေသခံတွေပြောဆိုချက်အရ သေဆုံးသူအမျိုးသားဟာ သူမသေဆုံးခင်တပတ်ခန့်အလိုလောက်က PDF အဖွဲ့တွေကို စိန်ခေါ်ပြောဆိုမှုတွေရှိနေပြီး စစ်ကောင်စီ၊ အုပ်ချုပ်ရေးပိုင်းတွေနဲ့ပတ်သက်မှု ရှိ မရှိတော့ မသိရဘူးလို့ ဆိုပါတယ်။

အဲ့ဒီပစ်ခတ်မှုကိုတော့ ဘယ်အဖွဲ့အစည်းတွေဘက်က လုပ်ဆောင်ခဲ့တယ်ဆိုတာကိုတော့ ထုတ်ပြန်ကြေညာတာမရှိသေးပါဘူး။

ဖေဖော်ဝါရီ ၁၀ ကလည်း စစ်ကိုင်းမြို့နယ်၊ မင်းကွန်းမြို့မှာ မင်းကွန်းနယ်မြေရဲစခန်းမှူး ရဲအုပ်မြင့်လွင် နေအိမ်မှာပစ်သတ်ခံရလို့ သေဆုံးခဲ့သေးတယ်လို့ သိရပါတယ်။

စာတည်း – လင်း

စစ်ကိုင်း၊ ဖေဖော်ဝါရီ ၁၉၊ ၂၀၂၅။

စစ်ကိုင်းတိုင်း၊ ကနီမြို့နယ်နဲ့ ချောင်းဦးမြို့နယ်မှာ စစ်ကောင်စီတပ်ဖွဲ့ဝင်တွေက စက်တပ်လေထီးနဲ့ဗုံးကြဲတာ၊ လက်နက်ကြီးနဲ့ ပစ်ခတ်တာတွေ လုပ်ခဲ့ပြီး အရပ်သားပြည်သူ ၇ ဦးသေဆုံးကာ ဒဏ်ရာရရှိသူ ၂၀ ဝန်းကျင်ရှိတယ်လို့ ဒေသခံတွေဆီက သိရပါတယ်။

ဖေဖော်ဝါရီ ၁၈ ရက် မနေ့ နေ့လယ်ပိုင်းမှာ မုံရွာနမခကနေ တက်လာတဲ့ စက်တပ်လေထီးနဲ့ ကနီမြို့နယ်၊ ချောင်းမကျေးရွာကို ဗုံး ၂ လုံးကြဲချခဲ့ပြီး ပြည်သူ ၃ ဦး ပွဲချင်းပြီးသေဆုံးကာ ဆေးကုသနေရင်း ၂ ဦး ထပ်မံသေဆုံးခဲ့တာကြောင့် စုစုပေါင်း ၅ ဦးသေဆုံးခဲ့တယ်လို့ ဆိုပါတယ်။

အဆိုပါ ဗုံးကြဲတိုက်ခိုက်မှုအတွင်း ကိုနေမင်းဝင်း၊ ကိုဟန်ကိုကို၊ ကိုချစ်ဦး၊ ဒေါ်မြတ်ဌေးနဲ့ အချက်အလက်စုံစမ်းဆဲ အမျိုးသား ၁ ဦးတို့ သေဆုံးခဲ့ကာ ၁၅ ယောက်ကျော် ဒဏ်ရာရရှိထားပြီး သေဆုံးသူတွေထဲမှာ အသက် ၁၇ နှစ်အရွယ် လူငယ် ၁ ဦးလည်း ပါဝင်တယ်လို့ သိရပါတယ်။

“ထိတာ တော်တော်များတယ်၊ ဘော်လန်ဒီယာဆရာမ ၁ ယောက်လည်း တကိုယ်လုံးအနှံ့ ဒဏ်ရာရတယ်။ G 11 ကျောင်းသား ၁ ယောက်တော့ (သေဆုံးတာ) သေချာတယ်။”လို့ ကနီဒေသခံ အမျိုးသမီးတဦးက ပြောပါတယ်။

ဒါ့အပြင် အဲ့ဒီနေ့ ညနေ ၆ နာရီဝန်းကျင်မှာလည်း ချောင်းဦးမြို့နယ်၊ မြပုလဲဂိတ်မှာရှိတဲ့ စစ်ကောင်စီတပ်ဖွဲ့ဝင်တွေက လက်နက်ကြီးနဲ့ပစ်ခတ်လို့ ကျီကုန်းကျေးရွာက ပြည်သူ ၂ ဦး ထိမှန်သေဆုံးခဲ့ပြီး အသက် ၅ နှစ်အရွယ် ကလေးငယ် ၁ ဦးအပါအဝင် ၃ ဦး ဒဏ်ရာရခဲ့တယ်လို့ ဆိုပါတယ်။

ပြီးခဲ့တဲ့ ဖေဖော်ဝါရီ ၁၂ ရက်ကနေ ၁၄ ရက်အထိ ၃ ရက်တာအတွင်း ကလေးမြို့နယ်၊ မုံရွာမြို့နယ်နဲ့ ချောင်းဦးမြို့နယ်မှာ စစ်ကောင်စီတပ်ဖွဲ့ဝင်တွေရဲ့ လေကြောင်းတိုက်ခိုက်မှုတွေကြောင့် ကလေးငယ် ၆ ဦးအပါ အရပ်သား ပြည်သူ ၁၅ ဦး သေဆုံးခဲ့တယ်လို့ သိရပါတယ်။

စစ်ကိုင်း၊ ဖေဖော်ဝါရီ ၁၉၊ ၂၀၂၅။

စစ်ကိုင်းတိုင်းအခြေစိုက် Rural Rangers အဖွဲ့မှ ကျဆုံးခဲ့တဲ့တပ်ဖွဲ့ဝင်ရဲဘော်လေးဝိုင်း (ခ) မောင်မောင်ဦးကို ဈာပနစစ်ရေးပြနဲ့ အလေးပြုခဲ့ပြီး ဂူသွင်းပေးခဲ့တယ်လို့ Rural Rangers ဆီမှ သိရပါတယ်။

အသက် ၂၃ နှစ်အရွယ် Rural Rangers ကာကွယ်ရေးတပ်ဖွဲ့ဝင် ရဲဘော်လေးဝိုင်းဟာ အဖွဲ့ရဲ့ တာဝန်ခံတဦးဖြစ်ပြီး ဖေဖော်ဝါရီ ၁၅ ရက် ချောင်းဦးမြို့နယ်က စစ်ကောင်စီတပ်စခန်းတခုကို ထိုးစစ်ဆင်တိုက်ခိုက်စဉ် နေ့လယ် ၂ နာရီကျော်မှာ ရင်ဘတ်ကျည်ထိမှန်ပြီး ကျဆုံးခဲ့တာလို့ ဆိုပါတယ်။

“ကျနော် ရေမြောင်းထဲကနေ ဆွဲတက်နေတုန်း လေးဝိုင်းရဲ့ အသက်ကိုမနည်းအားယူပြီရှူနေရတဲ့ အသံကို ကြားရတာ။ ကျနော်လည်းရောက်သွားကော သူ့ဘေးနားကကောင်တွေကို ဘယ်လိုထိသွားတာလဲမေးပြီး ကျနော်လည်း သူ့ကိုအော်ခေါ်ပြီး ဒဏ်ရာကိုကြည့်တော့ တကယ့်သေးသေးလေးဗျာ ဒဏ်ရာက။ ကျနော်လည်း ရင်ဘက်ကိုဖိပြီး ပါးစပ်ထဲကို လေမှုတ်ပြီး သူ့နာမည်ကိုအော်ခေါ်နေကြတာတာပေါ့။ အဲ့မှာ အသက်တချက်ရှူပြီး ဘယ်လိုမှ မလှုပ်ရှားနိုင်တော့ဘူး။”လို့ Rural Rangersမှ ရဲဘော် ရန်ကုန်ကပြောပါတယ်။

ကာကွယ်ရေးတပ်ဖွဲ့ဝင် ရဲဘော်လေးဝိုင်း ကျဆုံးခဲ့တဲ့တိုက်ပွဲမှာ ကာကွယ်ရေးပူးပေါင်းတပ်တွေဘက်က စစ်ကောင်စီတပ်စခန်းကို ၇၅ ရာခိုင်နှုန်း သိမ်းပိုက်နိုင်ခဲ့ပြီး စစ်သုံ့ပန်းအချို့ကို ဖမ်းဆီးရမိခဲ့ပေမယ့် စစ်ကောင်စီတပ်ဖွဲ့ဘက်က မြေပြင်စစ်ကူရောက်လာကာ ကာကွယ်ရေးပူးပေါင်းတပ်တွေဘက်မှာလည်း ခဲယမ်းနဲ့ကျည် နည်းပါးသွားတာကြောင့် ပြန်လည်ဆုတ်ခွါခဲ့ရတယ်လို့ သူက ဆက်ပြောပါတယ်။

ယင်းမာပင်မြို့နယ် ပကဖလက်ရုံးတပ် ULF ရဲ့စစ်ကြောင်း Rural Rangers အဖွဲ့တာဝန်ခံရဲဘော် လေးဝိုင်း(ခ)မောင်မောင်ဦးရဲ့ ရုပ်ကလာပ်ကို ဖေဖော်ဝါရီ ၁၇ ရက် မနက်ပိုင်းမှာ ဈာပနစစ်ရေးပြနဲ့ အလေးပြုခဲ့ပြီး အရိုးပြာကို အာဇာနည်ဗိမာန်ဂူသွင်းပေးခဲ့တယ်လို့ သိရပါတယ်။

စာတည်း – ကိုချမ်း

စစ်ကိုင်း၊ ဖေဖော်ဝါရီ ၁၈၊ ၂၀၂၅။

စစ်ကိုင်းတိုင်း၊ မုံရွာမြို့အခြေစိုက် အနောက်မြောက်တိုင်းစစ်ဌာနချုပ်ကလာတဲ့ စစ်ကောင်စီရိက္ခာတင် ယာဥ်တန်းကို ဖေဖော်ဝါရီ ၁၇ ရက်မနေ့ကညနေ ၄ နာရီကျော်မှာမိုင်းဆွဲတိုက်ခိုက်ခဲ့တယ်လို့ Royal Tiger Force ပြောက်ကျားတပ်ဖွဲ့ဆီက သိရပါတယ်။

ရိက္ခာနဲ့ စစ်ကောင်စီတပ်ဖွဲ့ဝင်တွေလိုက်လာတဲ့ သံပြားကာကား ၇ စီးကို ချောင်းဦးမြို့နယ်ထဲမှာ ပဒေသာမိုင်း ၁၅ လုံးနဲ့ ၃ ပွိုင့်ခွဲပြီးတိုက်ခိုက်ခဲ့တာလို့ ဆိုပါတယ်။

“တတိယမြောက်ကားကိုတော့ ကျနော်တို့ထိထိမိမိ မိုင်းဆွဲနိုင်ခဲ့တယ်၊ စတုတ္ထမြောက်ကားလည်း ထိသွားတယ်၊ တတိယမြောက်ကားကတော့ ပျက်စီးသွားတဲ့အတွက် နတ်ရေကန်ဂိတ်မှာထားခဲ့တယ်၊” လို့ Royal Tiger Force ပြောက်ကျားတပ်ဖွဲ့ သတင်းနဲ့ပြန်ကြားရေးတာဝန်ခံက ပြောပါတယ်။

ကား ၇ စီးထဲမှ ၆ စီးကတော့ စစ်ကိုင်းဘက်ကိုဆက်သွားပြီး မိုင်းမိတဲ့ ၁ စီးကတော့ နတ်ရေကန်စစ်ကောင်စီ ဂိတ်မှာပဲထားခဲ့တာလို့ ဆိုပါတယ်။

ဒီတိုက်ခိုက်မှုအတွင်း စစ်ကောင်စီတပ်သား ၂ ဦးသေဆုံးတယ်လို့သိရပေမယ့် ဒီသေဆုံးမှုနဲ့ပတ်သက်ပြီး မြေလတ်အသံကသီးခြားအတည်မပြုနိုင်သေးပါဘူး။

ဒီမိုင်းဆွဲတိုက်ခိုက်မှုကို Royal Tiger Force ပြောက်ကျားတပ်ဖွဲ့၊ မုံရွာခရိုင် အမှတ်၁၂ တပ်ရင်း တပ်ခွဲ ၃ လျှပ်စီးတပ်ခွဲ၊ မုံရွာခရိုင် အမှတ် ၁၅ တပ်ရင်း တပ်ခွဲ ၃၊ People Defense Force၊ Nway Oo Brothers Column (နွေဦးညီအကိုများစစ်ကြောင်း) တို့က ပူးပေါင်းလုပ်ဆောင်ခဲ့တာဖြစ်ပါတယ်။

ပြီးခဲ့တဲ့ ဖေဖော်ဝါရီ ၃ ရက်ကလည်း မုံရွာမြို့ နမခ ကထွက်လာတဲ့ စစ်ကောင်စီသံပြားကာကား ၃ စီးကို Royal Tiger Force ပြောက်ကျားတပ်ဖွဲ့က ချောင်းဦးနဲ့ မြင်းမူကားလမ်းပိုင်းမှာ ဒရုန်းနဲ့ ဗုံးကြဲချခဲ့ရာ ၉ ဦးသေဆုံးပြီး ၂ ဦးဒဏ်ရာရခဲ့ပါသေးတယ်။

စာတည်း – လင်း

◼ ကလေးငယ် ၆ ဦးအပါ အရပ်သား ပြည်သူ ၁၅ ဦး သေဆုံး

စစ်ကိုင်း၊ ဖေဖော်ဝါရီ ၁၈၊ ၂၀၂၅။

စစ်ကိုင်းတိုင်း၊ ကလေးမြို့နယ်၊ မုံရွာမြို့နယ်နဲ့ ချောင်းဦးမြို့နယ်မှာ စစ်ကောင်စီတပ်ဖွဲ့ဝင်တွေက ၃ ရက်အတွင်း လေကြောင်းနဲ့ ဗုံးအလုံး ၂၀၀ ကျော် ကြဲချခဲ့တာကြောင့် ကလေးငယ် ၆ ဦးအပါ အရပ်သား ပြည်သူ ၁၅ ဦး သေဆုံးခဲ့တယ်လို့ အမျိုးသားညီညွတ်ရေးအစိုးရ လူ့အခွင့်အရေးဆိုင်ရာ ဝန်ကြီးဌာနက ဖေဖော်ဝါရီ ၁၇ ရက်နေ့မှာ ထုတ်ပြန်ထားပါတယ်။

ဖေဖော်ဝါရီ ၁၂ ရက်နေ့ မနက်ပိုင်းမှာ မုံရွာမြို့နယ်၊ ညောင်ဖြူပင်ရွာနဲ့ သစ်ဆိမ့်ရွာအနီးဝန်းကျင်က ကျေးရွာတွေကို ဗုံးသီး ၄၈ လုံး၊ ညပိုင်းမှာတော့ မုံရွာမြို့နယ်နဲ့ ချောင်းဦးမြို့နယ်ထဲက ကျေးရွာတချို့ကို ထောက်ပို့ယာဥ်နဲ့ ၉ ကြိမ် ဗုံးကြဲခဲ့သလို အဲ့ဒီနေ့တရက်ထဲမှာ ကလေးမြို့နယ် တောင်ပိုင်းက ကျေးရွာတွေကို ဗုံးသီး ၉၄ လုံး ကြဲချခဲ့တယ်လို့ ဆိုပါတယ်။

ဖေဖော်ဝါရီ ၁၂ ရက်နေ့ လေကြောင်းတိုက်ခိုက်မှုအတွင်း မုံရွာမြို့နယ် စစ်ရှောင်စခန်းတခုက ကလေးငယ် ၂ ဦးနဲ့ အမျိုးသား ၁ ဦး၊ ညောင်ဖြူပင်ရွာနဲ့ သစ်ဆိမ့်ရွာက ပြည်သူ ၃ ဦးသေဆုံးပြီး ၂၃ ဦး ဒဏ်ရာရခဲ့တဲ့အပြင် မုံရွာမြို့နယ် ဘုဘရွာမှာတော့ လက်နက်ကြီးကျည်ထိမှန်လို့ အသက် ၁၁ နှစ်အရွယ် ကလေး ၁ ဦးအပါ ၂ ဦး သေဆုံးခဲ့တယ်လို့ သိရပါတယ်။

ဖေဖော်ဝါရီ ၁၃ ရက်နေ့မှာတော့ မုံရွာမြို့နယ်၊ ကိုးရှင်းကျွန်းရွာကို လေကြောင်းနဲ့ ဗုံးကြဲလို့ အသက် ၁၃ နှစ်အရွယ် ကလေး ၁ ဦး၊ ချောင်းဦးမြို့နယ်၊ ညောင်ပင်သာရွာကို စက်တပ်လေထီးနဲ့ ဗုံးကြဲလို့ အသက် ၁၀ နှစ်အရွယ် ကလေး ၁ ဦးနဲ့ ပြည်သူ ၁ ဦးသေဆုံးကာ စုစုပေါင်း ပြည်သူ ၆ ဦး ဒဏ်ရာရခဲ့တယ်လို့ ဆိုပါတယ်။

အဲ့ဒီနေ့မှာပဲ ကလေးမြို့နယ် တောင်ပိုင်းက ဟားခါးလေး၊ ရှားဖို၊ အရှေ့စည်း၊ ဒိုးနွယ် စတဲ့ကျေးရွာတွေကိုလည်း Y12နဲ့ ဗုံးသီး ၄၀ ကျော် ကြဲချခဲ့တယ်လို့ ထုတ်ပြန်ချက်မှာ ပါရှိပါတယ်။

ဖေဖော်ဝါရီ ၁၄ ရက်နေ့ မနက် ၁၀ နာရီခွဲဝန်းကျင်မှာတော့ ကလေးမြို့နယ် တောင်ပိုင်းက နတ်ချောင်းတိုက်နယ်ဆေးရုံကို ဗုံး ၃၀ ကျော်ကြဲချခဲ့တာကြောင့် ဆေးရုံအဆောက်အဦတချို့ ပျက်စီးခဲ့ပြီး ည ၁၀ နာရီမှာတော့ သံဖိုရွာကို ဗုံးကြဲခဲ့ကာ ကလေးငယ် ၁ ဦးအပါအဝင် ပြည်သူ ၄ ဦး သေဆုံးခဲ့တယ်လို့ သိရပါတယ်။

စစ်ကောင်စီတပ်ဖွဲ့ဝင်တွေရဲ့ အရပ်သားပြည်သူတွေအပေါ် ပစ်မှတ်ထား လေကြောင်းတိုက်ခိုက်တဲ့ စစ်ရာဇဝတ်မှုတွေကို အမြန်ဆုံးရပ်တန့်နိုင်ဖို့အတွက် လေယာဥ်ဆီအပါအဝင် စစ်လက်နက်ပစ္စည်းတွေ၊ နည်းပညာတွေ၊ အထောက်အကူပစ္စည်းတွေကို တင်ပို့၊ သယ်ယူ ရောင်းချတာတွေကို အမြန်ဆုံးရပ်တန့်ဖို့၊ စစ်အုပ်စုကို အမြန်ဆုံးအရေးယူနိုင်ရေး လုပ်ဆောင်ပေးဖို့ ကုလသမဂ္ဂအပါအဝင် နိုင်ငံတကာ အစိုးရတွေကို တောင်းဆိုတယ်လို့လည်း ထုတ်ပြန်ချက်မှာ ပါရှိပါတယ်။

စစ်ကိုင်း၊ ဖေဖော်ဝါရီ ၁၇၊ ၂၀၂၅။

စစ်ကိုင်းတိုင်း၊ ကနီမြို့နယ်၊ မုဌောအရှေ့ရွာရှိ ချင်းတွင်းမြစ်ကူးတို့ဆိပ်ကို စစ်ကောင်စီတပ်က လေကြောင်းကနေဗုံးကြဲပစ်ခတ်လို့ သံဃာ ၁ ပါးအပါ ၃ ဦးဒဏ်ရာရရှိပြီး ကားနဲ့ဆိုင်ကယ်တွေ မီးလောင်ပျက်စီးခဲ့တယ်လို့ ဒေသခံတွေထံက သိရပါတယ်။

ဖေဖော်ဝါရီ ၁၇ ရက် ဒီကနေ့ နေ့လယ် ၁ နာရီ မိနစ် ၂၀ ခန့်မှာ အဆိုပါ ချင်းတွင်းမြစ်ကူးတို့ဆိပ်ကို စစ်ကောင်စီလေတပ်တိုက်လေယာဉ် ၁ စီးက ပေါင် ၅၀၀ ဗုံး ၁ လုံးကြဲချခဲ့ပြီး လေယာဉ်ပါရော့ကတ်တွေနဲ့ ၂ ကြိမ် ပစ်ခတ်ခဲ့တာလို့ ဆိုပါတယ်။

” ထိခိုက်ဒဏ်ရာရသူတွေက ဗုံးစမှန်တာ။ ပေါင် ၅၀၀ ချတယ်ဆိုတော့ ဆီကားကိုလည်းထိပြီး မီးလောင်သွားတာ။ ကားပေါ်မှာက ဆီပေပါ(စက်သုံးဆီ) တွေတင်ထားတာ။ ဗုံးက ဆီကားဘေးကို ကျတာ။ ထိခိုက်ဒဏ်ရာရသူတွေက ကူးတို့ကူးဖို့စောင့်နေကြတာ။”လို့ ကနီဒေသခံတဦးက မြေလတ်အသံကို ပြောပါတယ်။

ကူးတို့ဆိပ်ကို ပေါင် ၅၀၀ ဗုံးကျရောက်ပေါက်ကွဲတာကြောင့် တဖက်ကမ်းရှိ နတ်ကြီးရွာကို ကမ်းကူးဖို့လှေစောင့်နေတဲ့ အသက် ၃၀ ကျော်အရွယ် သံဃာ ၁ ပါး၊ အမျိုးသား ၁ ဦးနဲ့ အမျိုးသမီး ၁ ဦးတို့ ဗုံးစထိမှန် (မစိုးရိမ်ရ)ဒဏ်ရာရရှိပြီး စက်သုံးဆီပေပါ အလုံး ၂၀၀ ခန့် တင်ဆောင်ထားတဲ့ကုန်တင်ကား ၂ စီးနဲ့ ဆိုင်ကယ် ၁၁ စီး မီးလောင်ပျက်စီးခဲ့တယ်လို့ သိရပါတယ်။

ထိခိုက်ဒဏ်ရာသူတွေနဲ့ပတ်သက်တဲ့ အသေးစိတ်အချက်အလက်ကိုတော့မသိရသေးဘဲ ဒဏ်ရာရသူတွေကို နီးစပ်ရာဆေးရုံကိုပို့ထားရတယ်လို့ ဆိုပါတယ်။

စစ်ကောင်စီတပ်က လေကြောင်းကနေ ဗုံးလာကြဲသွားတဲ့ မုဌောရွာကူးတို့ဆိပ်နဲ့အနီးတဝိုက်မှာ တိုက်ပွဲဖြစ်ပွားနေတာမျိုးမရှိဘူးလို့ သိရပါတယ်။

ဖေဖော်ဝါရီ ၇ ရက်ကလည်း ကနီမြို့နယ်၊ ဆူးလေကုန်းကျေးရွာကို စစ်ကောင်စီတပ်က စက်တပ်လေထီးနဲ့ဗုံးချခဲ့လို့ အမျိုးသား ၁ ဦးသေဆုံးပြီး ၁ ဦးဒဏ်ရာရခဲ့ကာ ဘုန်းကြီးကျောင်းနဲ့နေအိမ်တွေပျက်စီးခဲ့တယ်လို့ သိရပါတယ်။

စာတည်း – ဟိန်းစံ

စစ်ကိုင်း၊ ဖေဖော်ဝါရီ ၁၆၊ ၂၀၂၅။

စစ်ကိုင်းတိုင်း၊ စစ်ကိုင်းမြို့ပြည်သူ့ဆေးရုံနဲ့ ကားကြီးဝန်းမှာ မိုင်းပေါက်ကွဲမှုဖြစ်ပြီး ကလေး ၁ ဦးအပါအဝင် ၂ ဦးဒဏ်ရာရတယ်လို့ ဒေသခံတွေဆီက သိရပါတယ်။

ဖေဖော်ဝါရီ ၁၅ ရက် ညနေ ၃ နာရီခန့်မှာ စစ်ကိုင်းတံတားအဆင်း ကားကြီးဝန်းဝင်ပေါက်အနီးမှာ မိုင်းပေါက်ကွဲခဲ့ပြီး ၅ မိနစ်ခန့်အကြာ စစ်ကိုင်းပြည်သူ့ဆေးရုံဝန်းရှိ ဓာတ်မှန်ခန်းနဲ့ဓာတ်ခွဲခန်းကြားမှာ မိုင်းပေါက်ကွဲခဲ့တာလို့ ဒေသခံတဦးကပြောပါတယ်။

ဒါ့အပြင် ပေါက်ကွဲအားကြောင့် ဓာတ်မှန်ခန်းနဲ့ဓာတ်ခွဲခန်းရှိ ပြတင်ပေါက်မှန်တွေအားလုံးနီးပါး ပျက်စီးသွားပြီး မှန်အစတွေလွင့်စင်ခဲ့တယ်လို့ ဆိုပါတယ်။

” ၁ လုံးပြီး ၁ လုံးကွဲတာ။ ကားဝန်းဘက်အရင်ဖြစ်ပြီးမှ ဆေးရုံဘက်ဖြစ်တာ။ ကားဝန်းဘက်က အမှုန်စင်တာလောက်ပဲ။ ဓာတ်မှန်ဘက်မှာက မှန်စစင်တယ်။ မှန်ကွဲစ စင်ပြီးတော့ ဓာတ်မှန်က ၁ ယောက်၊ ဓာတ်ခွဲခန်းဘက်က ကလေး ၁ ယောက် (ထိတယ်)။ မှန်တွေက အကုန်ကွဲသွားတာကို။”လို့ ဒေသခံတဦးက ပြောပါတယ်။

ဆေးရုံဝန်းအတွင်းပေါက်ကွဲမှုမှာတော့ ဓာတ်ခွဲခန်းဝန်ထမ်းရဲ့ သားဖြစ်သူ အသက် ၃ နှစ်ကျော်အရွယ် ကလေး ၁ ဦးနဲ့ ဓာတ်မှန်ခန်းမှာတော့ ဓာတ်မှန်ရိုက်ဖို့စောင့်နေတဲ့ ဆေးရုံတက်လူနာ အသက် ၃၀ ကျော်အရွယ် အမျိုးသား ၁ ဦး နောက်ကျော မှန်စထိမှန်ဒဏ်ရာရခဲ့တာပါ။

ဒီမိုင်းပေါက်ကွဲမှုနဲ့ပတ်သက်ပြီး ဘယ်သူတွေလုပ်ဆောင်တယ်ဆိုတာကိုတော့ ထုတ်ပြန်ကြေညာထားတာ မတွေ့ရသေးပါဘူး။

ပြီးခဲ့တဲ့နှစ် အောက်တိုဘာ ၅ ရက်ကလည်း စစ်ကိုင်းမြို့၊ ပိုးတန်းရပ်ကွက်ရှိ ရှင်ပင်ငန်းစွယ် ဘုရားရှေ့ ခြင်္သေ့ရုပ်အနီး၊ မြို့မစျေးမီးပွိုင့်အနီးနဲ့ ကမ္ဘာ့ရတနာဘဏ်ရှေ့တို့မှာ တရက်တည်း မိုင်းပေါက်ကွဲမှု ၃ ကြိမ်ဖြစ်ပြီး အဆောက်အဦတချို့ပျက်စီးခဲ့ပါသေးတယ်။

စာတည်း – လင်း

စစ်ကိုင်း၊ ဖေဖော်ဝါရီ ၁၃၊ ၂၀၂၅။

စစ်ကိုင်းတိုင်း၊ ချောင်းဦးမြို့နယ်နဲ့ မုံရွာမြို့နယ်ထဲက ကျေးရွာတွေကို စစ်ကောင်စီတပ်ဖွဲ့ဝင်တွေက လေကြောင်းနဲ့ ဗုံး ၅၀ ကျော် ကြဲချခဲ့တာကြောင့် ပြည်သူ ၉ ဦးသေဆုံးကာ ၂၀ ဦးခန့် ထိခိုက်ဒဏ်ရာရခဲ့တယ်လို့ ဒေသခံတွေဆီက သိရပါတယ်။

ဖေဖော်ဝါရီ ၁၂ရက် မနေ့ည ၁၁ နာရီဝန်းကျင်ကနေ မနက် ၁ နာရီဝန်းကျင်အတွင်း ချောင်းဦးမြို့နယ်အလယ်ခြမ်းက ကျေးရွာတွေနဲ့ မုံရွာမြို့နယ်ထဲက ညောင်ဖြူပင်၊ ဘုဘ၊ သစ်ဆိမ့်ကျေးရွာတွေကို ပထမအကြိမ် လေကြောင်းကြဲခဲ့ပြီး ကလေးငယ်တွေအပါအဝင် အရပ်သားသေဆုံးမှုတွေ ရှိခဲ့တယ်လို့ ဆိုပါတယ်။

“ကလေး ၂ ယောက်သေတယ်။ သက်ကြီးရွယ်အို ၁ ယောက်သေတယ်။ ကျနော်တို့နား ချသွားတာတော့ ၄ လုံး၊ ကျနော်တို့လည်း တညလုံး ကတုတ်ကျင်းထဲမှာပဲ အိပ်နေရတာ။ ဗုံးအလုံးရေကတော့ စုစုပေါင်း ၁၂ လုံးထက်မနည်းရှိမယ်။ မနေ့ညက ဘေးနားကျတာ ကတုတ်ကျင်းထဲမို့သာ အစာတွေ(ဗုံးသီးအစတွေ)က ဝှီးကနဲ ဝှီးကနဲပဲ။ ခုလည်း ပြန်ပတ်လာနေပြီ Y12။”လို့ ချောင်းဦးဒေသခံတဦးက ပြောပါတယ်။

ဖေဖော်ဝါရီ ၁၃ ရက် ဒီကနေ့မနက် ၅ နာရီဝန်းကျင်မှာတော့ မုံရွာမြို့နယ်ထဲ သစ်ဆိမ့်၊ ညောင်ဖြူပင်၊ ဘုဘ၊ ဆူးလေကုန်း၊ ဂျိုးစု စတဲ့ကျေးရွာတွေနဲ့ ဆားလင်းကြီးမြို့နယ်ထဲက ဝဲကြီးရွာဘက်ကို ဒုတိယအကြိမ် လေကြောင်းတိုက်ခိုက်ခဲ့ပြီး ဗုံး ၄၈ လုံး ကြဲချခဲ့ကာ ၂ မြို့နယ်ပေါင်း လေကြောင်းတိုက်ခိုက်မှုအတွင်း ဗုံးအလုံးရေ ရာဂဏန်းနီးပါး ကြဲခံခဲ့ရတာဖြစ်တယ်လို့ ဒေသခံတွေက ပြောပါတယ်။

“ဒီဘက်မှာ စစ်ရေးဘာညာ လှုပ်ရှားမှုတခုမှမရှိဘဲနဲ့ Y12 နဲ့ ၂ ကြိမ် ဗုံးကြဲတိုက်ခိုက်သွားတယ်။ ညပိုင်းရယ် မနက်ပိုင်းရယ် ၂ ကြိမ်ကိုမှ Y12 နဲ့ ဗုံးအလုံး ၁၀၀ ကျော်မယ် ချသွားတာဗျ၊ ပြည်သူ အထိခိုက်လည်း များတယ်။”လို့ မုံရွာဒေသခံတဦးက ပြောပါတယ်။

အဆိုပါ လေကြောင်းတိုက်ခိုက်မှုတွေအတွင်း ချောင်းဦးမြို့နယ်၊ စစ်ရှောင်စခန်း ၁ ခုက အသက် ၅ နှစ်အရွယ် ယောကျ်ားလေး ၁ ဦး၊ အသက် ၈ နှစ်အရွယ် မိန်းကလေး ၁ ဦး၊ အသက် ၇၀ အရွယ် အမျိုးသား ၁ ဦး၊ မုံရွာမြို့နယ်၊ သစ်ဆိမ့်ရွာက အသက် ၅၀ အရွယ် အမျိုးသမီး ၁ ဦးနဲ့ အချက်အလက်စုံစမ်းဆဲ ပြည်သူ ၃ ဦး၊ ညောင်ဖြူပင်ရွာက အသက် ၅၀ ဝန်းကျင် အမျိုးသား ၁ ဦး၊ အမျိုးသမီး ၁ ဦး စုစုပေါင်း ၉ ဦး သေဆုံးခဲ့တယ်လို့ သိရပါတယ်။

ဒါ့အပြင် မုံရွာမြို့နယ်ဘက်ခြမ်းမှာ ပြည်သူ ၁၆ ဦး၊ ချောင်းဦးမြို့နယ်ဘက်ခြမ်းမှာ ပြည်သူ ၃ ဦး ထိခိုက်ဒဏ်ရာရခဲ့ပြီး အဆိုပါ ထိခိုက်ဒဏ်ရာရသူတွေထဲမှာ G-9 နဲ့ G-7 ကျောင်းသူတွေလည်း ပါဝင်ကာ တိရစ္ဆာန်တွေလည်း ထိခိုက်သေဆုံးခဲ့တယ်လို့ နောက်ထပ် မုံရွာဒေသခံတဦးက ဆိုပါတယ်။

ပြီးခဲ့တဲ့ ဖေဖော်ဝါရီ ၁၀ ရက်ကလည်း မန္တလေးတိုင်း၊ မိုးကုတ်မြို့အနောက်ခြမ်းမှာရှိတဲ့ ဝင်းထရံရပ်ကွက်ထဲက ကျောက်တွင်းလုပ်ငန်းခွင်ကို Y 12 နဲ့ ဗုံးကြဲခဲ့တာကြောင့် ပြည်သူ ၅ ဦးသေဆုံးကာ ၂၀ နီးပါးဒဏ်ရာရရှိခဲ့တယ်လို့ သိရပါတယ်။

စစ်ကိုင်း၊ ဖေဖော်ဝါရီ ၁၂၊ ၂၀၂၅။

စစ်ကိုင်းတိုင်း၊ စစ်ကိုင်းမြို့နယ်၊ မင်းကွန်းမြို့က မင်းကွန်းနယ်မြေရဲစခန်းမှူး ပစ်ခတ်ခံရပြီးသေဆုံးခဲ့တယ်လို့ ယူနီကွန်းပြောက်ကျားတပ်ဖွဲ့ဆီက သိရပါတယ်။

သေဆုံးသူဟာ မင်းကွန်းနယ်မြေရဲစခန်းမှူး အသက် ၄၀ နှစ်အရွယ် ရဲအုပ်မြင့်လွင်ဆိုသူဖြစ်ပြီး ဖေဖော်ဝါရီ ၁၀ ရက် နေ့လယ် ၂ နာရီခန့်မှာ ရဲစခန်းနဲ့ ၁ မိုင်အကွာရှိ သူ့မိသားစုဝင်နေအိမ်မှာ အလည်ရောက်နေချိန် ပစ်ခတ်ခဲ့တာလို့ဆိုပါတယ်။

“ဖမ်းတာကို ထွက်ပြေးလို့ပါ။ ပြန်လည်ခုခံတာမရှိဘဲ ထွက်ပြေးတာ။ ၁၀ ချက်လောက်ပဲ ပစ်လိုက်ရပါတယ်။ သူစီးတဲ့ဆိုင်ကယ် ၁ စီးတော့ သိမ်းဆည်းလာခဲ့တယ်။”လို့ ယူနီကွန်းပြောက်ကျားတပ်ဖွဲ့ တာဝန်ခံကပြောပါတယ်။

ပစ်ခတ်ခံရပြီး ရဲအုပ်မြင့်လွင်ရဲ့ နောက်ကျောနဲ့ ဦးခေါင်းနောက်ပိုင်းကို ကျည်ထိပြီး နေရာမှာတင် သေဆုံးခဲ့တယ်လို့ ဆိုပါတယ်။

ပစ်ခတ်ပြီး ၁ နာရီခန့်အကြာမှာတော့ စစ်ကောင်စီနဲ့ရဲအဖွဲ့ဝင်တွေ လာရောက်စစ်ဆေးခဲ့ပြီး အလောင်းကိုသယ်သွားဖို့လုပ်ပေမယ့် မိသားစုကလက်မခံတာကြောင့် နေအိမ်မှာပဲထားခဲ့တယ်လို့ ဆိုပါတယ်။

အလောင်းကို မင်းကွန်းရှိသုသာန်မှာ ဖေဖော်ဝါရီ ၁၁ ရက် နေ့လယ် ၁၂ နာရီကျော်က သင်္ဂြိုဟ်လိုက်တယ်လို့ ယူနီကွန်းပြောက်ကျားတပ်ဖွဲ့ တာဝန်ခံက ပြောပါတယ်။

ဒီပစ်ခတ်မှုကိုတော့ ယူနီကွန်းပြောက်ကျားတပ်ဖွဲ့၊ Road To Mandalay နဲ့ Royal Falcon (Sadaung Falcon ) အဖွဲ့ဝင်တွေက ပူးပေါင်းလုပ်ဆောင်ခဲ့တာလို့ သိရပါတယ်။

ပြီးခဲ့တဲ့ ဇန်နဝါရီ ၇ ရက်ကလည်း မင်းကွန်း-စစ်ကိုင်းသွားလမ်း၊ လက်ပံရွာအနီးမှာ ပျူစောထီးအဖွဲ့ဝင်တွေစီးလာတဲ့ကား တိုက်ခိုက်ခံရပြီး ၆ ဦးသေဆုံးခဲ့ပါသေးတယ်။

စာတည်း – လင်း