စစ်ကိုင်း

မြေလတ်အသံ၊ ဒီဇင်ဘာ ၈၊ ၂၀၂၅။

စစ်ကိုင်းတိုင်း၊ ဗန်းမောက်မြို့နဲ့ ကသာမြို့ နယ်တို့ကို စစ်ကော်မရှင်တပ်က ဒီဇင်ဘာ ၇ ရက်မှာ ဗုံးကြဲတိုက်ခိုက်ခဲ့တာကြောင့် ဒေသခံ ၁ ဦးသေဆုံးပြီး ၇ ဦး ဒဏ်ရာရရှိခဲ့တယ်လို့ ဒေသခံတွေဆီက သိရပါတယ်။

ဒီဇင်ဘာ ၇ ရက်နေ့လယ် ၂ နာရီကျော်မှာ ဗန်းမောက်မြို့နယ်၊ တောင်ပိုင်းရှိ သုံးမြေဆုံ ရွှေလုပ်ကွက်နေရာကို တိုက်ခိုက်ရေးလေယာဥ် ၂ စီးနဲ့ ဗုံးသီး ၈ လုံးကြဲချခဲ့တာကြောင့် အမျိုးသား ၁ ဦးသေဆုံးပြီး ၅ ဦးဒဏ်ရာရရှိခဲ့တယ်လို့ ဆိုပါတယ်။

“ကြဲတာက ထာဝရ ကုမ္ပဏီဆိုက် သုံးမြေဆုံကိုဗျ။ ရွှေကွက်က လုပ်သားဒေသခံတွေပဲဗျ။ ၁ ယောက်ကတော့ပွဲချင်းပြီးသေတယ်။ ၅ ယောက်ကတော့ ထိတာ။ အဲဒီထဲက ၂ ယောက်ကတော့ ဒဏ်ရာပြင်းတယ်လို့ သိရတယ်”လို့ ဗန်းမောက်ဒေသခံအမျိုးသားတဦးက ပြောပါတယ်။

သေဆုံးသူမှာ အသက် ၃၃ နှစ်အရွယ်ရှိ ကိုငြိမ်းမောင်ဖြစ်ပြီး ဒဏ်ရာရရှိသူတွေကတော့ အမျိုးသား ၃ ဦးနဲ့ အမျိုးသမီး ၂ ဦး တို့ဖြစ်ကာ ဗုံးကြဲခဲ့တဲ့နေရာဟာ တိုက်ပွဲပြင်းထန်နေတဲ့ ဗန်းမောက်မြို့နဲ့ မိုင်၂၀ ခန့် ကွာဝေးတယ်လို့ သူကဆိုပါတယ်။

အလားတူ ဒီဇင်ဘာ ၇ ရက်ည ၇ နာရီနဲ့ ၁၀ နာရီတို့မှာလည်း ကသာမြို့နယ်၊ နမ့်စမ်းကျေးရွာရှိ အလယ်တန်းစာသင်ကျောင်းနဲ့ ကျောက်ထုံးကြီးကျေးရွာကို တိုက်ခိုက်ရေးလေယာဥ်နဲ့ ဗုံးကြဲတိုက်ခိုက်ခဲ့တယ်လို့ ဆိုပါတယ်။

“အဲ့ကျောင်းမှာ ကျောင်းတက်တာ၊ စာသင်တာမရှိဘူးဗျ။ ပိတ်ထားတာ။ လူအထိအခိုက် ကတော့ မရှိဘူးဗျ။ KG ဆောင်ကတော့ လုံးဝပျက်စီးသွားတယ်။ နှစ်ထပ်ကျောင်းဆောင်ကတော့ အနည်းငယ်ပျက်စီးတယ်” လို့ ကသာဒေသခံအမျိုးသားတဦးက ပြောပါတယ်။

ဗုံးကြဲတိုက်ခိုက်မှုကြောင့် ကျောက်ထုံးကြီးကျေးရွာမှအမျိုးသမီး ၂ ဦး ဒဏ်ရာရရှိခဲ့ကာ လူနေအိမ် ၃ လုံးလည်း တချို့တဝက်ပျက်စီးခဲ့တယ်လို့ သူကဆိုပါတယ်။

စစ်ကော်မရှင်တပ်က အခုလိုဗုံးကြဲတိုက်ခိုက်ခဲ့တဲ့နေရာတွေဟာ တိုက်ပွဲဖြစ်ပွားမှုမရှိဘဲ ဒေသခံတွေနေထိုင်ကြတဲ့ ကျေးရွာတွေဖြစ်တယ်လို့ ဒေသခံတွေကပြောပါတယ်။

ပြီးခဲ့တဲ့အောက်တိုဘာ ၂၉ ရက်လည်း ကသာမြို့နယ်၊ ညောင်ခြေထောက်ကျေးရွာကို တိုက်ခိုက်ရေး လေယာဥ် ၁ စီးနဲ့ ဗုံး ၃ လုံးကြဲချခဲ့ရာ ၁၀ နှစ်အရွယ် ယောကျာ်းလေး ၁ ဦး၊ အသက် ၆၀ ကျော်အရွယ် အမျိုးသား ၁ ဦးနဲ့ အမျိုးသမီး ၁ ဦး၊ အသက် ၄၀ အရွယ်အမျိုးသမီး ၂ ဦးတို့ သေဆုံးခဲ့တယ်လို့ သိရပါတယ်။

စာတည်း – လင်း

မြေလတ်အသံ၊ ဒီဇင်ဘာ ၇၊ ၂၀၂၅။

စစ်ကိုင်းတိုင်း၊ မော်လိုက်မြို့နယ်၊ မော်လိုက်ကလေးရွာကို စစ်ကာ်မရှင်တပ်သားတွေက ဒီဇင်ဘာ ၆ ရက်ညနေ ၄ နာရီကျော်မှာ မီးရှို့ခဲ့တာကြောင့် နေအိမ် ၅၀ ခန့်ပျက်စီးခဲ့တယ်လို့ Mawlaik Revolutions အဖွဲ့ကပြောပါတယ်။

ရွာလုံးကျွတ်စစ်ဘေးရှောင်နေကြရတဲ့ အိမ်ခြေ ၂၅၀ ရှိ မော်လိုက်ကလေးရွာကို အင်အား ၃၀ ပါ စစ်ကော်မရှင်တပ်သားတွေက ဝင်ရောက်တပ်စွဲပြီး ရွာရဲ့တောင်ပိုင်းကို မီးရှို့ခဲ့တာလို့ဆိုပါတယ်။

“အဲဒီအပိုင်းက (ရွာတောင်ပိုင်း) က အိမ်ခြေ ၆၀ လောက်တော့ရှိတယ်။ အိမ်ခြေ ၅၀ လောက်တော့ လောင်သွားနိုင်တယ်ဗျ။ ရှို့နေတုန်းကတော့မများပေမယ့် မီးကူးတာတွေ ဖြစ်သွားနိုင်တယ်။ ပြီးတော့ အဲ့ဒီနေရာတွေက အိမ်ခြေလည်းစိပ်တယ်။ စကစတွေက အခုထိရွာထဲမှာရှိနေသေးတယ်။”လို့ Mawlaik Revolutions မှ တာဝန်ရှိသူတဦးက ပြောပါတယ်။

မော်လိုက်ကလေးရွာက ဒေသခံပြည်သူတွေဟာ NUG အစိုးရရဲ့ မော်လိုက်ခရိုင် သိမ်းငှက်စစ်ဆင်ရေးစတင်ပြီးနောက် ပြီးခဲ့တဲ့စက်တင်ဘာလကတည်းကစပြီး ရွာလုံး ကျွတ်စစ်ရှောင်နေကြတာ ဒီဇင်ဘာ ၆ ရက်အထိနေရပ်မပြန်နိုင်ကြသေးဘူးလို့ အထက်ပါတာဝန်ရှိသူ ကပြောပါတယ်။

သိမ်းငှက်စစ်ဆင်ရေးအတွင်းမှာ တော်လှန်ရေးတပ်ဖွဲ့တွေက မော်လိုက်ကလေးရွာမှာ အခြေပြုအထိုင်ချခဲ့ပေမယ့် ဒီစစ်ဆင်ရေးကို ရပ်နားလိုက်တဲ့ နိုဝင်ဘာ ၂၄ ရက်ကစလို့ တော်လှန်ရေးတပ်ဖွဲ့တွေက ရွာကနေဆုတ်ပေးခဲ့တယ်လို့ သူကဆိုပါတယ်။

“အဲဒီရွာကိုက ကျနော်တို့ သိမ်းငှက်စစ်ဆင်ရေးထဲမှာ အခြေုပြုထားတာပေါ့။ သူတို့ပျူစောထီးရွာကျတော့ မော်လိုက်ကလေးရွာနဲ့ ၁ ဖာလုံလောက်ပဲရှိမှာ။ အဲ့မှာ(မော်လိုက်ကလေးရွာ) အခြေပြုထားပြီးတော့ နိုဝင်ဘာလ ၂၄ ရက်မှာပဲ ကျနော်တို့ကို အထက်က စစ်ဆင်ရေးကိုရပ်တန့်ပါဆိုပြီး ညွှန်ကြားချက်အရ ရွာကနေ ဆုတ်ခွာထားတယ်။”လို့ အထက်ပါတာဝန်ရှိသူက ဆိုပါတယ်။

မော်လိုက်ကလေးကျေးရွာကနေ တော်လှန်ရေးတပ်ဖွဲ့တွေ ဆုတ်ခွာခဲ့ပြီးနောက် နိုဝင်ဘာ ၂၆ ရက်မှာ စစ်ကော်မရှင်တပ်သားတွေက လယ်ထွန်စက်တွေ၊ ကားတွေနဲ့ ကျေးရွာအတွင်းဝင်ရောက်လာပြီး နေအိမ်တွေဆီကနေ တန်ဖိုးရှိပစ္စည်းတွေကို ယူဆောင်သွားခဲ့ကြတယ်လို့လည်း သူကပြောပါတယ်။

မော်လိုက်တော်လှန်ရေးအင်အားစုတွေဖြစ်တဲ့ ခရိုင်တပ်ရင်း ၁၊၂၊၃၊၄၊ မော်လိုက်၊ဖောင်းပြင်မြို့နယ် ပြည်သူ့ကာကွယ်ရေးအဖွဲ့ (ပကဖ)၊ ပြည်သူ့လုံခြုံရေးတပ်ဖွဲ့(ပလဖ)၊ ခရိုင်ကွတ်ကဲရေးရုံးတိုက်ခိုက်ရေး အဖွဲ့တို့က ပြီးခဲ့တဲ့ ဩဂုတ်နဲ့ စက်တင်ဘာလအတွင်းမှာ “သိမ်းငှက်စစ်ဆင်ရေး” အမည်နဲ့ စစ်ဆင်ရေးဖော်ဆောင်ခဲ့ပါတယ်။

သိမ်းငှက်စစ်ဆင်ရေးအတွင်း မော်လိုက်မြို့နယ်မှ စစ်ကော်မရှင်တပ်နဲ့ ပျူစောထီးပူးပေါင်းစခန်း ၈ ခု၊ ကျေးရွာပေါင်း ၁၇ ရွာတို့ကို စိုးမိုးထိန်းချုပ်နိုင်ခဲ့ပြီး စစ်ကော်မရှင်တပ်သားတွေကို အရှင်ဖမ်းမိခဲ့သလို လက်နက်ကြီး၊ လက်နက်ငယ်၊ ခဲယမ်းတွေအမြောက်အများတို့ကို သိမ်းဆည်းနိုင်ခဲ့တယ်လို့ Mawlaik Revolutions ကထုတ်ပြန်ခဲ့ပါတယ်။

စာတည်း – လင်း

ကျော်ကြီး၊ ဒိန်းဂျား

ဒီပဲယင်း၊ ဒီဇင်ဘာ ၆၊ ၂၀၂၅။

စစ်ကိုင်းတိုင်း၊ ဒီပဲယင်းမြို့နယ်၊ မရကန်ကျေးရွာမှာ လူစည်ကားနေတဲ့လက်ဖက်ရည်ဆိုင်ကို စစ်ကော်မရှင်တပ်က လေကြောင်းကနေဗုံးကြဲပစ်ခတ်မှုကြောင့် သေဆုံးသူ ၂၀ ခန့်သေဆုံးခဲ့တယ်လို့ ကျေးရွာနဲ့ နီးစပ်သူတွေဆီက သိရပါတယ်။

ဒီဇင်ဘာ ၅ ရက်ည ၈ နာရီ ၁၀ မိနစ်ခန့်မှာ တံတားဦးလေတပ်ဘက်ကနေ တက်လာတဲ့ ဂျက်ဖိုက်တာ ၁ စီး ကျေးရွာထဲရှိအထက်ပါလက်ဖက်ရည်ဆိုင်ကို ရော့ကတ် ၁ လုံး ဆိုင်အနီးလူနေအိမ်တွေကြားကို ၁ လုံး ပစ်ခတ်ခဲ့တာလို့ ဆိုပါတယ်။

“ရွာပေါ်မှာမြင်ရတဲ့သူတွေပြောပြချက်အရ ရွာပေါ်မရောက်ခင်ကတည်းက ပစ်တာ။ မီးတန်း နှစ်တန်း မြင်ရတယ်။ လက်ဖက်ရည်ဆိုင် ရွာသူရွာသားတွေကြည့်နေတဲ့ ဆိုင်ထဲ ၁ ခုကျတယ်။ လမ်းမနောက်ဖက် နေအိမ်ပေါ် ၁ လုံးကျတယ်။ လက်ဖက်ရည်ဆိုင်ရှိနေတဲ့သူအားလုံးနီးပါး ထိခိုက်သေဆုံးကြတယ်။ အိမ်နားဝန်းကျင်မှာထိသူလည်းရှိတယ်”လို့ ကျေးရွာနဲ့နီးစပ်သူတဦးက ပြောပါတယ်။

ပစ်ခတ်မခံရခင် လူဦးရေ ၄၀ ကျော်လောက် လက်ဖက်ရည်ဆိုင်မှာဘေားလုံးပွဲကြည့်နေခဲ့ပြီး ရော့ကတ်နဲ့ လာပစ်ချိန်ဟာ ဘောလုံးပွဲပြီးခါစအချိန် လာကြည့်သူတချို့ပြန်သွားတဲ့အတွက် ထိခိုက်သေဆုံးသူ ယခုလောက်သာရှိခဲ့ရတယ်လို့ သူကဆက်ပြောပါတယ်။

သေဆုံးသူတွေထဲက အသက် ၅ နှစ်အောက်ကလေး ၂ ဦးနဲ့ အမျိုးသမီးအလောင်း ၃ လောင်းအပါအဝင် ၁၈ အလောင်းကိုရထားပြီး အလောင်းမရဘဲခန္ခာကိုယ်တစစီဖြစ်သွားသူတွေလည်းရှိတာကြောင့် စုစုပေါင်း သေဆုံးသူဟာ ၂၀ ကျော်ရှိတယ်လို့ ဆိုပါတယ်။

သေဆုံးသူတွေထဲက ၁၈ ဦးကတော့ ဦးလင်းအောင် ၅၀ နှစ်၊ ဒေါ်ဌေးစီ ၅၃ နှစ်၊ ဦးသန်းဇော်ဦး (တိုင်နတ်)၊ ဦးတင်ရွှေ ၇၇ နှစ်၊ ဒေါ်ခင်မာအေး ၅၃ နှစ်၊ ဦးဖိုးနီ ၄၄ နှစ်၊ ဒေါ်ခင်မော် ၅၉ နှစ်၊ ဦးမြတ်ရှိန်း ၇၂ နှစ်၊ ဦးဉာဏ်ပို ၇၅ နှစ်၊ ဦးရဲထက် ၃၃ နှစ်၊ ဦးဇော်ဌေး ၄၄ နှစ်၊ ပူတူး ၃၇ နှစ်၊ မောင်ခန့်ဇေယျာအောင် ၅ နှစ်၊ ကိုဝေယံ ၃၇ နှစ်၊ ဦးမြင့်သောင်း ၅၇ နှစ်၊ ဦးကျော်မြင့် ၅၉ နှစ်၊ ကိုဖြိုး ၂၀ နှစ်၊ ဦးကံဌေး ၅၆ နှစ် တို့ဖြစ်တယ်လို့ သိရပါတယ်။

ဒါ့အပြင် ထိခိုက်ဒဏ်ရာရသူ ၂၀ နီးပါးရှိပြီး ထိခိုက်သူတွေကို ချက်ချင်းကယ်ဆယ်ရေးလုပ်ဆောင်ရလို့ ကျား၊ မအရေအတွက်တွေ စိစစ်နေကာ နေအိမ် ၁၀ လုံးနီးပါလည်းပျက်စီးခဲ့တယ်လို့ သိရပါတယ်။

“မရကန်ကျေးရွာကို ကြဲတာတော့ အထိအခိုက်ရှိတယ်၊ ရွယ်လည်ခေါင် လက်ဘက်ရည်ဆိုင်ကို ကြဲသွားတာ၊ လက်ဘက်ရည်ဆိုင်မှာတော့ ဘာမှမရှိဘူး၊ အားလုံး လက်ဘက်ရည်သောက် စကားပြောရင်းနဲ့ TV စုကြည့်ကြတာ၊ ရွာသူရွာသားအားလုံးပေါင်း လူ ၄၀ လောက်ရှိမယ်၊ ဗုံး ၁ လုံးက ကျရောက်ပေါက်ကွဲပြီးတော့ ပထမ ပွဲချင်းပြီး ၉ ဦးသေတယ်၊” လို့ နောက်ထပ်ဒေသခံတဦးက ပြောပါတယ်။

လက်ရှိမှာ ထိခိုက်ဒဏ်ရာရသူတွေကိုလည်း ဆေးကုသပေးနေပြီး သေဆုံးသူတွေကိုတော့ ဒီဇင်ဘာ ၆ ရက် ဒီနေ့မှာသင်္ဂြိုဟ်သွားမယ်လို့ ဆိုပါတယ်။

မရကန်ရွာမှာ အိမ်ခြေ ၅၀၀ ကျော်ရှိပြီး တိုက်ခိုက်မှုကြောင့်ဒေသခံတွေလည်းထွက်ပြေးတိမ်းရှောင်ခဲ့ရကာ တချို့ကတော့ ဒီမနက်ပိုင်းမှာရွာကိုပြန်လာနေကြတယ်လို့ သိရပါတယ်။

စစ်ကော်မရှင်တပ်ဟာ ဒီဇင်ဘာလဆန်းပိုင်းအတွင်း ရွှေဘို၊ ခင်ဦး၊ ဘုတလင် စတဲ့ကျေးရွာတွေကိုလည်း နေ့စဥ်နီးပါးလေကြောင်းကနေဗုံးကြဲတိုက်ခိုက်နေတာကြောင့် ဒေသခံထိခိုက်သေဆုံးမှုတွေလည်း ရှိခဲ့ပါသေးတယ်။

သတင်း – ၊ စာတည်း – လင်း

ဆားလင်းကြီး၊ ဒီဇင်ဘာ ၆၊ ၂၀၂၅။

စစ်ကိုင်းတိုင်း၊ ဆားလင်းကြီးမြို့နယ်အတွင်းမှာ ရွေးကောက်ပွဲဆန့်ကျင်ရေး Billboard ထောင်ပြီး စစ်အာဏာရှင်စနစ်ဆန့်ကျင်ရေးလှုပ်ရှားမှု ပြုလုပ်ခဲ့တယ်လို့ ဒီဇင်ဘာ ၅ ရက်မှာ ဆာလင်းကြီးမြို့နယ်သပိတ်အင်အားစုက သတင်းထုတ်ပြန်ပါတယ်။

အဲ့ဒီရွေးကောက်ပွဲဆန့်ကျင်ရေး Billboard တွေကို ဒီဇင်ဘာ ၃ ရက်နဲ့ ၄ ရက်တွေမှာ ဆားလင်းကြီးမြို့နယ်အတွင်း အများပြည်သူအသုံးများတဲ့ လမ်းမကြီးတွေဘေးမှာ စိုက်ထူခဲ့ပြီး လှုပ်ရှားမှုမှာ ဆာလင်းကြီးမြို့နယ်သပိတ်အင်အားစုတွေနဲ့ မြို့နယ်ပြည်သူ့အုပ်ချုပ်ရေးအဖွဲ့ဝင်တွေ၊ နယ်မြေတာဝန်ခံတွေပါဝင်ကြတယ်လို့ ဆိုပါတယ်။

“အဓိက ရည်ရွယ်ချက်ကတော့ လာမယ့်ဒီဇင်ဘာ ၂၈ ရက်နေနဲ့ ဇန်နဝါရီ ၁၁ ရက်တွေမှာ အပိုင်းလိုက်ကျင်းပမယ့် စစ်တပ်ရဲ့ရွေးကောက်ပွဲကို ဆန့်ကျင်တဲ့အနေနဲ့ Billboard ထောင်ပြီး အထူးလှုပ်ရှားမှုလုပ်တာလို့ ပြောချင်ပါတယ်။ ခရီးသွားပြည်သူတွေအများကြီး ဖြတ်သန်းသွားလာနေတဲ့ပြ​ည်သူတွေ သိရှိဖို့ရယ်၊ မြို့ပြလူထုဖြစ်ဖြစ် အွန်လိုင်းက စောင့်ကြည့်တဲ့ ပြည်သူဖြစ်ဖြစ် မြေပြင်မှာသွားလာနေတဲ့ လမ်းသွားလမ်းလာကျေးလက်နေပြည်သူ တော်လှန်ရေးသမားတွေဖြစ်ဖြစ် လူထုလှုပ်ရှားမှုကနေဦးဆောင်ဦးရွက်ပြုတဲ့ Billboard ထောင်ပြီး ရွေးကောက်ပွဲဆန့်ကျင်ရေး။ ဒါကြီးကို ထောင်လိုက်ခြင်းအားဖြင့် ပြည်သူတရပ်လုံးသိရှိနိုင်ဖို့ ရည်ရွယ်ပြုလုပ်တဲ့ လှုပ်ရှားမှု ဖြစ်ပါတယ်။”လို့ ဆာလင်းကြီးမြို့နယ်သပိတ်အင်အားစုကတာဝန်ရှိသူတဦးက မြေလတ်အသံကို ပြောပါတယ်။

“သင့်မဲဖြင့် တရားဝင် လူသတ်ခွင့်မပေးနဲ့”စာတန်းပါ Billboard တွေကို စိုက်ထူခဲ့တာဖြစ်ပြီး အများပြည်သူတွေအနေနဲ့ စစ်ကော်မရှင်က ပြုလုပ်မယ့်ရွေးကောက်ပွဲဟာ အတုအယောင်သာဖြစ်တယ်ဆိုတာကို နိုင်ငံရေးအသိ၊ တော်လှန်အသိရသွားစေဖို့မျှော်လင့်တယ်”လို့ သိရပါတယ်။

စစ်ကော်မရှင်ဟာ နိုင်ငံရေးထွက်ပေါက်ဖြစ်တဲ့ ရွေးကောက်ပွဲကိုဖန်တီးပြီး အရပ်သားအသွင်ပြောင်းလဲကာ စစ်အာဏာရှင်စနစ်အုပ်ချုပ်ရေးတစ်ခု အမြစ်တွယ်စေဖို့၊ စစ်တပ်က တိုင်းပြည်နဲ့ ပြည်သူလူထုအပေါ် ရာသက်ပန်ဓားမိုးအုပ်ချုပ်သွားဖို့ဆိုတဲ့ စစ်တပ်ကြီးစိုးတဲ့နိုင်ငံရေးမျိုးကို ပုံဖော်သွားဖို့၊ ဒီအတုအယောင်ရွေးကောက်ပွဲကို ကျင်းပရန် စိုင်းပြင်းနေခြင်းလည်း ဖြစ်တယ်လို့ သပိတ်ကော်မတီထံက သိရပါတယ်။

မြေလတ်အသံ၊ ဒီဇင်ဘာ ၅၊ ၂၀၂၅။

စစ်ကိုင်းတိုင်း၊ ရွှေဘိုမြို့နယ်အရှေ့ခြမ်းရှိ သစ်ချိုပင်ကျေးရွာကို စစ်ကော်မရှင်တပ်က ဒီဇင်ဘာ ၅ ရက် ဒီမနက် ၁ နာရီကျော်မှာ လေယာဥ်နဲ့ဗုံးကြဲခဲ့တာကြောင့် ကလေးငယ် ၁ ဦးနဲ့ လင်မယား ၂ ဦးတို့ သေဆုံးခဲ့တယ်လို့ ဒေသခံတွေကပြောပါတယ်။

သစ်ချိုပင်ကျေးရွာအတွင်းကို တိုက်ခိုက်ရေး လေယာဥ် ၁ စီးနဲ့ ပေါင် ၂၅၀ ဗုံးသီး ၂ လုံးကြဲချခဲ့တာကြောင့် အသက် ၇ နှစ်အရွယ် မဝင်းလဲ့လဲ့ထွန်း၊ ၃၅ နှစ်အရွယ် ကိုမြင့်သူဝင်းနဲ့ ဇနီးမမေလွမ်းသူတို့ ၃ ဦးသေဆုံးခဲ့တာလို့ ဆိုပါတယ်။

“အခုဖိုက်တာပစ်တဲ့ဖက်မှာက တိုက်ပွဲဖြစ်ပွားမှုမရှိဘဲနဲ့ အကြောင်းမဲ့သက်သက် လေ ကြောင်းတိုက်ခိုက်သွားတာပါ။ ရွာလယ်ကိုကျပါတယ်။ လင်မယား ၂ ယောက်အိမ်ကို တည့်တည့်ကျပါတယ်။ သူတို့ ဘေးအိမ်က ကလေး ၁ ယောက်ကလည်း သေပါတယ် “လို့ ရွှေဘိုဒေသခံအမျိုးသားတဦးက ပြောပါတယ်။

သေဆုံးသူမှာ ခန္ခာကိုယ်တွေပြတ်ထွက်ပြီး သေဆုံးခဲ့တာလို့ နောက်ထပ်ဒေသခံအမျိုးသားတဦးက ပြောပါတယ်။

“ကလေးကလည်း တစစီဖြစ်သွားတယ်။ လင်မယားနှစ်ယောက်ကလည်း ခါးတွေ ပြတ်ထွက်သွားတယ်”လို့ သူကဆိုပါတယ်။

ဒါ့အပြင် ဗုံးကြဲတိုက်ခိုက်မှုကြောင့် နောက်ထပ်ဒေသခံ အမျိုးသား၊ အမျိုးသမီး ၈ ဦး တို့ဒဏ်ရာရရှိခဲ့ပြီး လူနေအိမ် ၁၀ လုံး၊ ဆိုင်ကယ် ၂ စီး၊ ဖောကား ၁ စီးတို့ပျက်စီးပြီး နွား ၉ ကောင်သေဆုံးခဲ့တယ်လို့ ဆိုပါတယ်။

ပြီးခဲ့တဲ့ဒီဇင်ဘာ ၂ ရက်ကလည်း ဝက်လက်မြို့နယ်၊ နတ်မှော်ဦးကျေးရွာကို တိုက်ခိုက်ရေးလေယာဥ် ၁ စီးနဲ့ ပေါင် ၂၅၀ ဗုံးသီး ၂ လုံးကြဲချခဲ့တာကြောင့် ၁၀ နှစ်အရွယ် ကလေး ၁ ဦးအပါအဝင် မိသားစု ၅ ဦးသေဆုံးခဲ့တယ်လို့ ဒေသခံတွေဆီက သိရပါတယ်။

စာတည်း – လင်း

ဝက်လက်၊ ဒီဇင်ဘာ ၄၊ ၂၀၂၅။

စစ်ကိုင်းတိုင်း၊ ဝက်လက်မြို့နယ်ကို စစ်ကြောင်းထိုးဝင်ရောက်စဥ် ဖမ်းဆီးသွားတဲ့ ဝက်လက်ဒေသခံ ၅ ဦးရဲ့ ရုပ်အလောင်းတွေကို စစ်ကိုင်းမြို့နယ်၊ သိမ်ချောင်းတံတားအောက်မှာ တွေ့ရှိခဲ့တယ်လို့ ဝက်လက်မြို့နယ် ပကဖသတင်းတာဝန်ခံထံက သိရပါတယ်။

ဝက်လက်မြို့နယ်ထဲက ရပ်ကျေး ပကဖ တွေနဲ့ စစ်ကိုင်းမြို့နယ် တပ်ရင်းတွေက နိုဝင်ဘာ ၂၉ ရက်မှာ နယ်မြေရှင်းလင်းရေးလုပ်ဆောင်စဉ် အဲ့ဒီရုပ်အလောင်းတွေကို စစ်ကိုင်းမြို့နယ်၊ သိမ်ချောင်းတံတားအောက်မှာ တွေ့ရှိခဲ့တာဖြစ်ပြီး သေဆုံးနေတဲ့ အမျိုးသားတွေဟာ ဝက်လက်မြို့နယ် ရွာတော်ကုန်း၊ တမာကုန်းနဲ့ လှတောရွာက ဒေသခံတွေလို့ သိရပါတယ်။

“ ရွာတော်ကုန်း၊ တမာကုန်း၊ လှတော ကျေးရွာက လို့သိရပါတယ်၊ စစ်ကြောင်းက ဖမ်းခေါ်သွားတဲ့ ဓါးစာခံတွေပါ၊ နယ်မြေရှင်းလင်းရေး လုပ်ရင်းတွေ့တာပါ။” လို့ ဝက်လက်မြို့နယ် ပကဖသတင်းတာဝန်ခံက မြေလတ်အသံကို ပြောပါတယ်။

နိုဝင်ဘာ ၅ ရက်နေ့မှာ ဆားတောင်ကနေ ရွာသာကြီးအထိုင်စခန်းကို ဖြည့်လာတဲ့အင်အားနဲ့ လှတောရွာအထိုင်စခန်းက ထွက်လာတဲ့ အင်အားတို့ ပေါင်းထားတဲ့ အင်အား ၅၀၀ ကျော်ပါ စစ်ကြောင်းက ဝက်လက်မြို့အတွင်းဝင်ရောက်လာစဉ် ကျေးရွာ ၂၀ ကျော်ကို မီးရှို့ဖျက်ဆီးခဲ့ပြီး ဒေသခံ ၄၀ ကျော်ကို ဓားစာခံ ဖမ်းဆီးသွားခဲ့တာပါ။

ဖမ်းဆီးသွားတဲ့ ဓားစာခံတွေဟာ ဝက်လက်မြို့နယ်နဲ့ ရွေဘိုမြို့နယ်ထဲက အရပ်သားတွေဖြစ်ပြီး နိုဝင်ဘာ ၂၁ ရက် စစ်ကြောင်းပြန်ထွက်ပြီးနောက် ၂၀ ဦးပြန်လွှတ်ပေးခဲ့ကာ ဒီကနေ့အထိ ပြန်လွတ်မလာသေးတဲ့ အရပ်သားတွေလည်းရှိနေသေးသလို အခုလိုသေဆုံးနေတဲ့ ရုပ်အလောင်းတွေလည်းတွေ့ခဲ့တာလည်း ဖြစ်ပါတယ်။

အဲ့ဒီစစ်ကြောင်းဟာ ဝက်လက်မြို့နယ်အတွင်း စစ်ကြောင်းဝင်ရာလမ်းတလျှောက်ကျေးရွာတွေဖြစ်တဲ့ မူးကြီး၊ တံတားဦး၊ ထုံးဘို၊ လိန်ပင်၊ ခေါတော၊ မြင်တော်၊ ဦးတည်ကုန်း၊ တမာကုန်း၊ ရွာတော်ကုန်း၊ ရွာသာကြီး၊ သရက်ကြီး၊ ဘုရားပျံ၊ ဥယျာဉ်မ၊ ကျီးကန်တောင်ရွာ၊ ပင်းဇင်း၊ ကျီးကန်မြောက်ရွာ၊ လှတော၊ ရွှေကျင်၊ စိုင်နိုင်လေးနဲ့ ပုဏ္ဏားရွာတွေကို မီးရှို့ခဲ့ပြီး ဆားတောင်မြို့ အထိုင်စခန်းကို ပြန်လည်ရောက်ရှိနေပါတယ်။

စာတည်း – ဟိန်းစံ