စစ်ကိုင်း

ရွှေဘို၊ ဇန်နဝါရီ ၂၉၊ ၂၀၂၃။

စစ်ကိုင်းတိုင်း၊ ဆားလင်းကြီးမြို့နယ်၊ မြန်မာဝမ်ပေါင်ကုမ္မဏီကိုလာတဲ့ စစ်ကောင်စီအရာရှိကားကို ဒေသခံကာကွယ်ရေးတပ်တွေက ယမားတံတားပေါ်မှာ ဇန်နဝါရီလ ၂၈ ရက်နေ့လယ်ပိုင်းက မိုင်းဆွဲခဲ့ပြီး ဒဏ်ရာရသူတွေလာသယ်တဲ့ကားကိုပါ မိုင်းထပ်ဆွဲခဲ့တယ်လို့ သိရပါတယ်။

နေ့လယ် ၁၁ နာရီ နဲ့ ၁၂ နာရီလောက်မှာ တိုက်ခိုက်ခဲ့တာဖြစ်ပြီး၊ တိုက်ခိုက်မှုကြောင့် စစ်တပ်အရာရှိ ၁ ဦးအပါ ၅ ဦး ထိခိုက်ဒဏ်ရာရရှိခဲ့တယ်လို့ Regional Friend Fighters − RFF တာဝန်ခံက ပြောပါတယ်။

“နေ့လယ် ၁၁ နာရီမှာက ရှေ့ထွက်ပြောင်းတွေနဲ့ချလိုက်တဲ့အပြင် မိုင်းလည်းဆွဲလိုက်တယ်၊ ထိခိုက်ဒဏ်ရာရပြီး ကားလည်းမီးစွဲတယ်၊ ထိခိုက်တဲ့သူတွေကို ပြန်သယ်အပို့မှာလည်း ယမားတံတားပေါ်မှာ ထပ်ပြီး ပတ်လည်မိုင်းနဲ့ ထပ်ခွဲလိုက်တယ်၊ အဲဒါကတော့ ၁၂ နာရီလောက်မှာမိုင်းခွဲလိုက်တာ၊ မိုင်း ၂ ကြိမ်ဆွဲခဲ့တာပါ၊ ထိခိုက်ဒဏ်ရာရသူ ၅ ဦးရှိပြီး ၁ ဦးက သေနိုင်တယ်” လို့ ပြောပါတယ်။

ဒီတိုက်ခိုက်မှုကို Regional Friend Fighters – RFF နဲ့ ညီနောင်မဟာမိတ် Revolution Youth Group – RYG တို့ ပူးပေါင်းတိုက်ခိုက် ခဲ့တာလည်း ဖြစ်ပါတယ်။

ဒါ့အပြင် အဆိုပါစစ်ကောင်စီစစ်ကြောင်းဟာ မုံရွာ နမခ တပ်ကထွက်လာတာဖြစ်ပြီး ဒဏ်ရာရသူတွေရှိခဲ့တဲ့အပြင် ကန်ဒါကား ၁ စီး နဲ့ အံစာတုံးကား ၃ စီးလည်း ထိခိုက်ပျက်စီးသွားခဲ့ပါသေးတယ်။

ပြီးခဲ့တဲ့ ဒီဇင်ဘာလ ၂၇ ရက်ကလည်း စစ်ကောင်စီတပ်တွေမီးရှို့သွားတဲ့ ယင်းမာပင်မြို့နယ်၊ မြရိပ်ကျေးရွာက မီးလောင်ပြင်ကို Regional Friend Fighters − RFF အဖွဲ့က ရှင်းလင်းရေးလုပ်ဆောင်ပေးခဲ့တယ်လို့ သိရပါတယ်။

စစ်ကိုင်း၊ ဇန်နဝါရီ ၂၆၊ ၂၀၂၃။

စစ်ကိုင်းတိုင်း၊ ခင်ဦးမြို့နယ်မှာ PDF တွေ ခြုံခိုတိုက်ခိုက်မှာကိုကြောက်လို့ သစ်ပင်၊ ခြုံနွယ်တောတွေကိုမီးရှို့တဲ့စစ်အုပ်စု ဇန်နဝါရီ ၂၅ ရက်နေ့မနက်ပိုင်းမှာ တိုက်ခိုက်ခံရတာကြောင့် ၅ ဦးသေဆုံးခဲ့တယ်လို့ သိရပါတယ်။

အဲဒီစစ်အုပ်စုမှာ အင်အား ၃၀ ခန့်နဲ့ အင်းပတ်ကွေ့စျေးတန်း၊ ရွာသစ်ကုန်း(ပျူ)ရွာ တို့မှာ အထိုင်ချတပ်စွဲကာ ကျေးရွာတွေကိုမီးရှို့နေတာကြောင့် ကာကွယ်ရေးပူးပေါင်းတပ်ဖွဲ့တွေက လက်နက်ကြီး ၁၈ လုံးပစ်ခတ်တိုက်ခိုက်ခဲ့တာ ဖြစ်တယ်လို့ Khin U Dog Killers(KDK)မှ ပြန်ကြားရေးတာဝန်ခံက ပြောပါတယ်။

“စကစအများစုက ဒီပဲယင်းမြို့နယ် ညောင်လှကျွေးရွာဘက်က အထိနာနေတဲ့ကောင်တွေကို သွားကြိုနေတဲ့အချိန် စခန်းမှာကျန်ခဲ့တာတွေကို ကျနော်တို့က တိုက်ခိုက်ခဲ့တာပါ။ စကစ ဘက်ကလည်း လက်နက်ငယ်နဲ့ခဏပဲရမ်းပစ်ခဲ့တယ်။ အတွင်းသတင်းအရ ငါးယောက်သေတာကို အတည်ပြုနိုင်ခဲ့တယ်။ သေတဲ့ငါးယောက်က စျေးတန်းကကောင်တွေဗျ။ ကျနော်တို့ ရဲဘော်တွေတော့ အထိအခိုက်မရှိ ဆုတ်ခွာနိုင်ခဲ့တယ်” လို့ဆိုပါတယ်။

ဒီတိုက်ခိုက်မှုကိုတော့ Khin U Specialforce Organization_KSO၊ Khin U Dog Killers၊ Local Brothers၊Wolf Guerrilla (Ye-U)၊FAF၊PDA၊ တပ်ရင်း၂၀ခွဲ-၃တို့က ပူးပေါင်းလုပ် ဆောင်ခဲ့တာဖြစ်ပါတယ်။

အဲဒီစစ်ကောင်စီတွေက ရေဦးမြို့နယ် နဲ့ ဒီပဲယင်းမြို့နယ်ဘက်တို့ကို တပ်ကူလုပ်ပေးနေတဲ့စခန်းတွေဖြစ်ပြီး ဇန်နဝါရီ ၂၃ ရက်နေ့မှာလည်း KSO အဖွဲ့ကမိုင်းဆွဲတိုက်ခိုက်ခဲ့တာကြောင့် ၅ ဦးသေဆုံးခဲ့သေးတယ်လို့ သိရပါတယ်၊

ဇန်နဝါရီ ၂၄ ရက်နေ့မှာ တပ်စွဲထားတဲ့စခန်းထဲကနေ တပ်သား ၁၅ ဦးမှာ PDFရဲ့ ပုန်းလျိုတိုက်ခိုက်မှုက ကင်းလွတ်အောင် သူတို့စခန်းအနီးမှာရှိတဲ့ ငှက်ပျောခြံ၊ လျှော်ဖြူခြံ၊ ခြုံတောတွေကို မီးရှို့ခဲ့တာကြောင့် အင်းပတ်ကျေးရွာကို မီးကူးစက်ကာ လူနေအိမ် ၂လုံး လောင်ကျွမ်းပြာကျခဲ့ပါတယ်။

စစ်ကိုင်း၊ ဇန်နဝါရီ ၂၆၊ ၂၀၂၃။

စစ်ကိုင်းတိုင်း၊ ဝက်လက်မြို့နယ်၊ ခေါတောကျေးရွာ လယ်တောအနီးမှာ နေအိမ်တွေမီးရှို့ပြီးပြန်လာတဲ့ စစ်ကောင်စီအဖွဲ့ ဒရုန်းနဲ့တိုက်ခိုက်ခံရပြီး ၄ ဦးသေဆုံးတယ်လို့ သိရပါတယ်။

ဇန်နဝါရီလ ၂၅ ရက်မနေ့ကနေ့လယ် ၂ နာရီခန့်မှာ မူးကြီးကျေးရွာကနေအိမ်အချို့ကို မီးရှို့ပြန်လာတဲ့ စစ်သားနဲ့ ပျူစောထီး အင်အား ၆၀ ခန့်ကို ဒရုန်းနဲ့ဗုံး ၆ လုံးချ တိုက်ခိုက်ခဲ့တာလို့ NgweDwin Revolution Force တာဝန်ရှိသူက ပြောပါတယ်။

“သူတို့က ဝက်လက်အနောက်ဘက်ခြမ်းကရွာတွေကို မီးပတ်ရှို့၊ ပစ္စည်းလု လုပ်နေတာ ၃ ရက်လောက်ရှိပြီ။ မနေ့ကလည်း မူးကြီးရွာကို သူတို့အဲ့လိုလုပ်ပြီး ခေါတောရွာဘက်အကူးလမ်းက လယ်တဲတခုမှာ နားနေတာကို သတင်းရလို့ သွားရောက်တိုက်ခိုက်ခဲ့တာ ဖြစ်တယ်။ သူတို့က သွားလုလိုက်၊ ရလာတာကို လှတောရဲစခန်းထဲ ပြန်ပို့လိုက် လုပ်နေတာ”လို့ ပြောပါတယ်။

အဲ့ဒီစစ်အုပ်စုဟာ လှတောရဲစခန်းမှာတပ်စွဲနေတာဖြစ်ပြီး၊ ဒရုန်းနဲ့တိုက်ခိုက်ခံရလို့ စစ်ကောင်စီတပ်သား ၂ ဦး၊ ပျူစောထီး ၂ ဦး စုစုပေါင်း ၄ ဦးသေဆုံးပြီး သေဆုံးအလောင်းတွေကို ပြန်သယ်သွားတာမလုပ်ဘဲ လယ်တဲထဲမှာသာ စွန့်ပစ်ခဲ့တယ်လို့ ဆိုပါတယ်။

တိုက်ခိုက်ခံရပြီးနောက်မှာတော့ အဆိုပါစစ်ကောင်စီတပ်တွေဟာ လုရာပါပစ္စည်းတွေနဲ့အတူ လှတောရဲစခန်းဘက်ကို ပြန်ထွက်သွားတယ်လို့ သိရပါတယ်။

ဒီတိုက်ခိုက်မှုကို MSaiNaw ငရဲမီးအဖွဲ့၊ မုံရွာခရိုင်တပ်ရင်း၆၊ MRTF၊ မုံရွာခရိုင်တပ်ရင်း၂၁ တပ်ခွဲ.၂၊ NDRF တို့က ပူးပေါင်းတိုက်ခိုက်ခဲ့တာ ဖြစ်ပါတယ်။

ဇန်နဝါရီလ ၂၃ ရက်နဲ့ ၂၄ ရက်မှာလည်း ဝက်လက်မြို့နယ်ထဲမှာ စစ်ကောင်စီတပ်နဲ့ ဒေသကာကွယ်ရေးအဖွဲ့တွေ အကြား တိုက်ပွဲပြင်းထန်ခဲ့ပြီးနောက် စစ်ကောင်စီဘက်က မကျီးတုံးကျေးရွာနဲ့ ပင်ဇင်းကျေးရွာကိုမီးရှို့ခဲ့လို့ နေအိမ် ၁၀ လုံးထက်မနည်း မီးလောင်ခဲ့ပြီး အဘိုးအို ၁ ဦးပါ မီးလောင်သေဆုံးခဲ့ပါသေးတယ်။

စစ်ကိုင်း၊ ဇန်နဝါရီ ၂၆၊ ၂၀၂၃။

စစ်ကိုင်းအခြေစိုက် တမခ ၃၃ ကနေ မိုင်းရှင်းဖို့ထွက်လာတဲ့ စစ်ကား ၁ စီးကို ဇန်နဝါရီလ ၂၅ ရက် မနေ့ညနေပိုင်းက မြင်းမူမြို့နယ်၊ နတ်ခရိုင်ရွာနဲ့လယ်ကြီးရွာအကြားမှာ မိုင်းဆွဲတိုက်ခိုက်ခဲ့တယ်လို့ သိရပါတယ်။

အင်အား ၄၀ ဝန်းကျင်ရှိတဲ့ အဆိုပါစစ်ကောင်စီတပ်တွေကို မနေ့ကညနေ ၅ နာရီ ၄၅ မိနစ်ခန့်မှာတိုက်ခိုက်ခဲ့တာလို့ Zero ပြောက်ကျားတပ်မဟာ တပ်ရင်း ၇ – မြင်းခြံခရိုင်အဖွဲ့မှ တပ်ရင်းမှူးဗိုလ်သက်ကြီးက ပြောပါတယ်။

“မနေ့ကနေ့ခင်းပိုင်းမှာ စစ်ကိုင်းတပ်မ ၃၃ ကထွက်လာပြီး မိုင်းရှင်းတဲ့စစ်သားတွေက ညောင်ပင်ဝန်းစခန်းထဲကို ခဏဝင်ပါတယ်။ အဲဒီစခန်းကအပြန်မှာ ကျနော်တို့ထောင်ထားတဲ့ မိုင်းတွေဖော်ယူသွားတယ်၊ မိုင်းရှင်းတဲ့စစ်သားတွေ ညောင်ပင်ဝန်းစခန်းကနေ ကား ၁ စီးနဲ့ ပြန်အဆုတ်မှာ လက်ကျန်မိုင်း ၅ လုံးနဲ့ နတ်ခရိုင်နဲ့ လယ်ကြီးအကြားမှာ ဖောက်ခွဲတိုက်ခိုက်ခဲ့တယ်” လို့ပြောပါတယ်။

မျက်မြင်တွေ့ရှိသူတွေရဲ့ပြောပြချက်အရ တိုက်ခိုက်မှုအတွင်း စစ်သား ၂ ဦးသေဆုံးခဲ့ကာ အလောင်းတွေကို နာရေးကားနဲ့ပြန်တင်သွားရတယ်လို့လည်း သိရပါတယ်။

ဒီတိုက်ခိုက်မှုကို Zero ပြောက်ကျားတပ်မဟာ တပ်ရင်း ၇-မြင်းခြံခရိုင်၊ သရဲနီ၊ စွန်ရဲနဲ့ THREE D တို့အဖွဲ့က ပူးပေါင်းလုပ်ဆောင်ခဲ့တယ်လို့ သိရပါတယ်။

ပြီးခဲ့တဲ့ဇန်နဝါရီလ ၂၂ ရက်ကလည်း မြင်းမူမြို့နယ်၊ ထီးဆောင်းကျေးရွာမှာ တပ်စွဲပြီးဆပ်ကြေးကောက်နေတဲ့ စစ်အုပ်စုစခန်းကို Zero ပြောက်ကျားတပ်မဟာ တပ်ရင်း ၇-မြင်းခြံခရိုင်အဖွဲ့က ဝင်ရောက်ပစ်ခတ်ခဲ့ရာ စစ်သား ၃ ဦး သေဆုံးခဲ့ပါသေးတယ်။