အမ်း၊ ဖေဖော်ဝါရီ ၆၊ ၂၀၂၃။
စစ်ကိုင်းတိုင်း၊ ဆာလင်းကြီးမြို့နယ်၊ ပုသိမ် – မုံရွာလမ်းမှာ ဖေဖေါ်ဝါရီလ ၆ ရက် ဒီနေ့ညနေက တော်လှန်ရေးအင်အားစု ၂ ဖွဲ့ပေါင်းပြီး ပြောက်ကျားသပိတ် ဖော်ဆောင်ခဲ့ကြပါတယ်။
“ဖက်ဆစ်ရွေးကောက်ပွဲသပိတ်မှောက် ဖက်ဒရယ်လမ်းကို ရဲရဲလျှောက်” စာသားကိုင်ဆောင်ကာ အညာပစ်တိုင်းထောင်လေးများအဖွဲ့နဲ့ မုံရွာလူငယ်များအစည်းရုံးတို့က ပူးပေါင်းခဲ့ကြတာလို့ သိရပါတယ်။
အမ်း၊ ဖေဖော်ဝါရီ ၆၊ ၂၀၂၃။
စစ်ကိုင်းတိုင်း၊ ပုလဲမြို့နယ်ထဲက စစ်ကောင်စီတပ်တွေ မီးရှို့ခဲ့တဲ့ ကျေးရွာ ၇ ရွာက ဒေသခံတွေအတွက် စားနပ်ရိက္ခာကို ပုလဲမြို့နယ် ပြည်သူ့အုပ်ချုပ်ရေးအဖွဲ့ဝင်တွေက ပြီးခဲ့တဲ့ဖေဖော်ဝါရီလ ၄ ရက်နဲ့ ၅ ရက်မှာ သွားရောက် ထောက်ပံ့ခဲ့ပါတယ်။
ကမ်းလက်မေတ္တာအဖွဲ့ လှူဒါန်းတဲ့ ကျပ်သိန်း ၃၅၀ ကျော်ကို ပအဖအဖွဲ့တွေက စီမံခန့်ခွဲပြီး အိမ်ထောင်စု ၁၂၆ စုကို ထောက်ပံ့ပေးခဲ့တာလို့ ပုလဲမြို့နယ် ပြည်သူ့အုပ်ချုပ်ရေးအဖွဲ့ခေါင်းဆောင် ကိုထက်ဇော်က ပြောပါတယ်။
“ဖေဖော်ဝါရီလ ၄ ရက်နေ့က သရက်ကန်၊ ညောင်ရင်းကုန်း၊ သရက်လှ၊ တောင်ရွာသစ်နဲ့ ဖေဖော်ဝါရီလ ၅ ရက်က သပြေအေး၊ ကြောင်ဝန်ဒူး၊ ကိုးပင်ရွာတွေကို ကျနော်တို့အဖွဲ့တွေ ကူညီခဲ့တာ၊ ကမ်းလက်မေတ္တာအဖွဲ့က သိန်း ၃၅၀ ကျော် ရန်ပုံငွေထဲက ကူညီထောက်ပံ့ပေးခဲ့တာ၊ အိမ်ထောင်စု ၁၆၂ စု စာအတွက် ၁ စု ကို ပစ္စည်း ၁၆ မျိုး ထောက်ပံ့ပေးခဲ့ပြီး ငွေကျပ်တန်းဖိုးအရ ၂ သိန်းကျော်ဖိုး ထောက်ပံ့ပေးခဲ့တာ” လို့ ပြောပါတယ်။
အိမ်ထောင်စု ၁ စုကို ဆန် ၁ အိတ်၊ ဆီ ၅ ပိဿာ ၁ ပုံး၊ ဆား ၂ ပိဿာ၊ ပဲဆံ ၁ ပြည်၊ ရေချိုင့် ၁ လုံး၊ ပုဆိုး ၁ ထည်၊ ထမိန် ၁ ထည်၊ ဖိနပ် ၁ ရံ၊ ဓါတ်ဘူး ၁ လုံး၊ ဓါတ်မီး ၁ လက်၊ မိုးကာ ၁ စ၊ ရေခွက် ၁ လုံး၊ ဒန်အိုး ၁ လုံး၊ ဒယ်အိုး ၁ လုံး၊ ဇွန်းကြီး ၁ ချောင်းနဲ့ ဓါးမ ၁ ချောင်းတို့ကို လှူဒါန်းပေးနိုင်ခဲ့တယ်လို့ သိရပါတယ်။
စစ်ကိုင်း၊ ဖေဖော်ဝါရီ ၅၊ ၂၀၂၃။
စစ်ကိုင်းတိုင်း၊ ရွှေဘိုခရိုင်၊ ခင်ဦးမြို့နယ်အတွင်း ပြီးခဲ့တဲ့ဇန်နဝါရီလ ၃၀ ရက်ကစတင်ပြီး စစ်ကောင်စီရဲ့ မီးရှို့ခြင်းခံရတဲ့ ကျေးရွာ ၄ ရွာကို မြို့နယ်အုပ်ချုပ်ရေးအဖွဲ့ကဦးဆောင်ပြီး ဒီနေ့ဖေဖော်ဝါရီလ ၅ ရက်မှာ ဆီနဲ့ငွေသားတချို့ ထောက်ပံ့လှူဒါန်းခဲ့ တယ်လို့ သိရပါတယ်။
“ဇန်နဝါရီ ၃၀ ရက်ကနေ ဖေဖော်ဝါရီလ ၂ ရက်နေ့အထိ ၄ ရက်အတွင်းကို ဗျိုင်းကြိုင်၊ မှန်သာ၊ ရုံးစု၊ ညောင်ပင်ကြီးစု အစရှိတဲ့ ကျေးရွာ ၄ ရွာလုံးမှာရွာလုံးကျွတ်နီးပါး မီးရှို့ဖျက်ဆီးခံခဲ့ရတာပါ။ အဲ့ဒီ ၄ ရွာလုံးကအိမ်ထောင်စု ၇၀၀ လောက် အိုးမဲ့အိမ်မဲ့ဖြစ်နေရပြီး အကူအညီတွေလိုအပ်နေတာ”လို့ မြိုနယ်အုပ်ချုပ်ရေးအဖွဲ့ တာဝန်ရှိသူတဦးက ပြောပါတယ်။
အဲ့ဒီကျေးရွာ ၄ ရွာအတွင်းကမီးရှို့ဖျက်ဆီးခံလိုက်ရတဲ့အိမ်ထောင်စုတွေအတွက် စားသုံးဆီနဲ့ ငွေသားတွေကို ခင်ဦးမြို့နယ်အုပ်ချုပ်ရေးအဖွဲ့ကဦးဆောင်ပြီး ဆီနဲ့ ငွေသားတွေ ထောက်ပံ့လှူဒါန်းခဲ့တာပါ။ အိမ်ထောင်စု ၇၀၀ အတွက် ဆီ ၅၀ ကျပ်သား နဲ့ ငွေသား တသောင်းကျပ်စီ ထောက်ပံ့လှူဒါန်းခဲ့တာလို့ သိရပါတယ်။
ခင်ဦးမြို့နယ်မှာ စစ်ကောင်စီတပ်တွေက ၂၀၂၁ ခုနှစ် ဖေဖော်ဝါရီ ၁ ရက်အာဏာသိမ်းပြီးချိန်ကစပြီး ၂၀၂၃ ခုနှစ် ဖေဖော်ဝါရီလ ၁ ရက် ၂ နှစ်ပြည့်အချိန်ထိ ကျေးရွာပေါင်း ၆၃ ရွာက နေအိမ်ပေါင်း ၃၇၀၀ အထိ မီးရှို့ဖျက်ဆီးခဲ့တာကြောင့် မီးဘေးသင့် အိုးမဲ့အိမ်မဲ့ပြည်သူ ၁၈၀၀၀ ခန့်အထိရှိနေပြီလို့ ဆိုပါတယ်။
စစ်ကိုင်း၊ ဖေဖော်ဝါရီ ၄၊ ၂၀၂၃။
စစ်ကိုင်းတိုင်း၊ ကောလင်းမြို့၊ ပြင်ဦးလွင်ရပ်ကွက်မှာနေထိုင်တဲ့ အမျိုးသားတဦး ဖေဖော်ဝါရီလ ၄ ရက်ဒီမနက် ၇ နာရီလောက်မှာ သူရဲ့အလုပ်ကိုသွားချိန် စစ်ကောင်စီတပ်သားတွေက ပစ်ခတ်ခဲ့တာကြောင့် ပေါင်ကိုကျည်ထိမှန်ခဲ့တယ်လို့ သိရပါတယ်။
ဒဏ်ရာရှိသူမှာ ကိုသူရိန်ထွန်း ဖြစ်ပြီး၊ သူအိမ်ကနေ ဆိုင်ကယ်နဲ့ အလုပ်လုပ်တဲ့ ဆန်စက်ကိုသွားချိန် ကောလင်းမြို့၊ သုဝဏရပ်ကွက်၊ နှင်းဆီနီ (KTV) အနီးအရောက်မှာ ကင်းပုန်းဝပ်နေတဲ့ စစ်ကောင်စီတပ်သားတွေက ပစ်ခတ်လိုက်တာလို့ KawLin Revolution-KR မှ တာဝန်ရှိသူတဦးက ပြောပါတယ်။
“မနက်မှာ စကစအင်အားက ခန့်မှန်း ၆၀ ခန့်နဲ့ ပြင်ဦးလွင်ရပ်ကွက်ကို စစ်ဆေးနေတဲ့အချိန် ကင်းပုန်းဝက်ထားတဲ့အဖွဲ့နဲ့ တိုးတာ။ သူက စကစတွေနဲ့တွေ့လို့ နေအိမ်ဘက်ကိုပြန်လှည့်သွားတဲ့အခါ ပစ်ခတ်လိုက်တာ။ ကျည်ဆံကတော့ ပေါင်ကိုထိပြီး ဖောက်ထွက်သွားတာတော့ သေချာပါတယ်”လို့ အထက်ပါတာဝန်ရှိသူက အတည်ပြုပြောပါတယ်။
ပစ်ခတ်ခံရပြီးနောက် ကိုသူရိန်ထွန်းကိုဆေးရုံပို့လိုက်လား၊ စစ်ကောင်စီကပဲ ဖမ်းဆီးသွားလားဆိုတာမသိရှိရသေးသလို နောက်ဆက်တွဲအခြေအနေတွေကိုတော့ မြေလတ်အသံက စုံစမ်းနေဆဲဖြစ်ပါတယ်။
အာဏသိမ်းပြီး ၂ နှစ်ပြည့်ပြီးနောက် စစ်ကောင်စီကသူတို့ထိန်းချုပ်မနိုင်တဲ့ တိုင်းနဲ့ ပြည်နယ်တွေထဲက မြို့နယ်အချို့ကို စစ်အုပ် ချုပ်ရေးမြို့နယ်တွေအဖြစ် ဖေဖော်ဝါရီလ ၂ ရက်နေ့မှာ ကြေညာခဲ့ရာ ကောလင်းမြို့နယ်လည်း ပါဝင်ခဲ့ပါတယ်။
အဲ့ဒီနောက်ပိုင်းကစလို့ ကောလင်းမြို့ပေါ်မှာလည်း အိမ်ထောင်စုစာရင်းတွေ ကောက်တာ၊ ဆိုင်ကယ်တွေနဲ့ကင်းပတ်တာ၊ ကင်းပုန်းဝပ်စစ်ဆေးတာတွေကို တင်းတင်းကြပ်ကြပ်လုပ်ဆောင်လာနေတယ်လို့ သိရပါတယ်။
စစ်ကိုင်း၊ ဖေဖော်ဝါရီ ၃၊ ၂၀၂၃။
စစ်ကိုင်းတိုင်း၊ ကန့်ဘလူမြို့နယ်၊ ကိုးတောင်ဘို့တိုက်နယ်က စစ်ရှောင်အမျိုးသမီး ၂ ဦးဟာ ၂ ရက်ဆက်တိုက် မြွေကိုက်ခံရတယ်လို့ ဒေသခံတွေဆီက သိရပါတယ်။
ကိုးတောင်ဘို့တိုက်နယ်အစပ် စစ်ရှောင်တဲမှာနေထိုင်တဲ့ အသက် ၅၈ နှစ အရွယ် အမျိုးသမီးတဦးဟာ ဖေဖော်ဝါရီ ၂ ရက်မနေ့ကနေလယ် ၁၂ နာရီကျော်လောက်မှာ နွားသွားလှန်ရင်းကိုက်ခံရတယ်လို့ ဆိုပါတယ်။
အလားတူ ဖေဖော်ဝါရီ ၃ ရက် ဒီနေ့မနက် ၁၂ နာရီလောက်မှာပဲ စစ်ရှောင်တဲမှာ နေထိုင်တဲ့ အသက် ၂၄ နှစ်အရွယ် အမျိုးသမီး ၁ ဦးဟာလည်း ကြံဖတ်လှန်းနေစဉ်မှာ မြွေကိုက်ခံရတယ်လို့ စစ်ရှောင်ကူညီသူတဦးက မြေလတ်အသံကိုပြောပါတယ်။
“မနေ့ကအမျိုးသမီးက ကျွဲ၊ နွားတွေသွားလှန်ရင်းပိုးထိသွားတယ်။ သူ့ကိုကိုက်လိုက်တဲ့ ကောင်ကတော်တော်ကြီးတာ၊ အဲဒါကြောင့် သူ့ကို BPI မြွေဆိပ်ဖြေဆေးခြောက်လုံးနဲ့ အိန္ဒိယမြွေဆိပ်ဖြေဆေး ၄ လုံး စုစုပေါင်း ၁၀ လုံးထိုးထားပေးတယ်။ ဒီမနက်ကိုက်ခံရတဲ့ အမျိုးသမီးကလည်း ၈၀ ရာခိုင်နှုန်းလောက်က သက်သာလာပါပြီ” လို့ ဆိုပါတယ်။
ကိုးတောင်ဘို့ တိုက်နယ်ဆိုတာဟာ ကန့်ဘလူမြို့နယ်ထဲက တိုက်နယ် ၈ ခုထဲက တခုဖြစ်ပြီး ကိုးတောင်ဘို့တိုက်နယ်မှာတော့ ကျေးရွာစုစုပေါင်း ၂၃ ရွာ နဲ့ဖွဲ့စည်းထားတာပဲဖြစ်ပါတယ်။
ယခင်လပိုင်းတွေမှာတော့ စစ်ဘေးရှောင်ပြည်သူတွေကို မြွေအန္တရာယ်ကာကွယ်ဖို့နဲ့ပတ်သက်ပြီးလိုက်လံ ဆွေးနွေးနိုင်ပေမဲ့လည်း နောက်ပိုင်းမှာတော့ စစ်ရှောင်ဦးရေတိုးလာတဲ့အပြင် လိုက်လံဟော်ပြောပေးဖို့ကလည်း အဆင်မပြေသေးဘူးလို့ ဆိုပါတယ်။
အခုလက်ရှိအချိန်မှာစစ်ရှောင်ဦးရေ တိုးလာတာကြောင့် စစ်ရှောင်တွေအတွက် ဆေးဝါး နဲ့ စွပ်ဖိနပ်တွေလိုအပ်နေကြောင်းကိုလည်း အထက်ပါတာဝန်ရှိသူက ပြောပါတယ်။
“ဆေးဝါးရရှိဖို့ ခက်ခဲသလို ၊ ဆေးဝါးဝယ်ဖို့ ငွေကြေးတွေကလည်းခက်ခဲပါတယ်။ စစ်ရှောင်တွေက စားဖို့သောက်ဖို့ခက်ခဲတာကတပိုင်း၊ အခုလိုဆေးဝါးတွေထပ်ပြီးလိုအပ်တော့ ပိုခက်ခဲသွားတာပေါ့၊ မြွေတွေကအဓိက သီးနှံစိုက်ပျိုးတဲ့အချိန်နဲ့ သီးနှံရိတ်သိမ်းတဲ့အချိန်တွေပိုထွက်ပါတယ်။ စစ်ရှောင်တွေတိုးလာတဲ့အတွက် မြွေအန္တရာယ်ပိုပြီး ဂရုစိုက်ရမယ်” လို့ ဆိုပါတယ်။
ပြီးခဲ့တဲ့ ဇန်နဝါရီလကလည်း ကိုးတောင်ဘို့တိုက်နယ်ထဲကအသက် ၃၅ နှစ်အရွယ် အမျိုးသမီးတဦး မြွေကိုက်မှုဖြစ်ပွားခဲ့ပါသေးတယ်။
၂၀၂၁ ခု ၄ လပိုင်းကနေ ၂၀၂၃ ခုနှစ်အထိမြွေကိုက်ခံရသူ ကိုးတောင်ဘို့တိုက်နယ်နဲ့ အခြားရွာနားနီးစပ်က ဒေသခံပြည်သူ ၄၇ ဦးရှိပြီးဖြစ်တယ်လို့ ဆိုပါတယ်။
စစ်ကိုင်း၊ ဖေဖော်ဝါရီ ၁၊ ၂၀၂၃။
စစ်ကိုင်းတိုင်း၊ ရေဦးမြို့နယ်၊ မူးသာကုန်းကျေးရွာထဲကို စစ်ကောင်စီတပ်က ဖေဖော်ဝါရီ ၁ ရက် ဒီနေ့နေ့လယ်လောက်မှာ လက်နက်ကြီး နဲ့ပစ်ခတ်ခဲ့တာကြောင့် အသက် ၂၀ နှစ်အရွယ်အမျိုးသမီးတဦး ကျည်ထိမှန်သေဆုံးခဲ့တယ်လို့ သိရပါတယ်။
စစ်ကောင်စီတပ်ဖွဲ့ဟာ ရေဦးမြို့နယ် တိုင်းရင်းဆေးရုံထဲကနေ လက်နက်ကြီးတွေနဲ့ ပစ်ခတ်ခဲ့တဲ့အတွက် မူးသာကုန်ရွာသားတဦးရဲ့နေအိမ်ပေါ်ကျရောက်ခဲ့ရာ မိသားစု ၄ ဦးအနက် ၃ ဦးဒဏ်ရာရပြီး ၁ ဦးမှာသေဆုံးခဲ့တာလည်း ဖြစ်ပါတယ်။
“လက်နက်ကြီးနဲ့ ရမ်းသမ်းပစ်တာကတော့ နေ့တိုင်းဆိုသလိုပါပဲ။ အရင်ကတော့ လူထိခိုက်တာမျိုးတော့ရှိတယ်။ သေတဲ့အထိတော့မဖြစ်ဖူးဘူး။ ဒီတခေါက်တော့ မိသားစုလေးဦးလည်းထိသွားတယ်။ အငယ်ဆုံးသမီးကတော့ ဆုံးသွားတယ်။ ရွာထဲကကျွဲ ၂ ကောင်လည်းထိသွားတယ်”လို့ ရေဦးဒေသခံတဦးက ပြောပါတယ်။
သေဆုံးသူနာမည်နဲ့ နောက်ဆက်တွဲအခြေအနေတွေကိုတော့ အသေးစိတ်မသိရှိရသေးပါဘူး။
ပြီးခဲ့တဲ့နှစ် မေလ ပိုင်းလောက်ကလည်း မူးသာကုန်းကျေးရွာက နေအိမ် ၄ လုံးကို စစ်ကောင်စီတပ်ဖွဲ့တွေက မီးရှို့ဖျက်ဆီးသွားခဲ့သေးတယ်လို့ သိရပါတယ်။
မန္တလေး၊ ဖေဖော်ဝါရီ ၁၊ ၂၀၂၃။
မန္တလေးတိုင်း၊ မတ္တရာမြို့နယ်က ပြည်သူ့ကာကွယ်ရေးတပ်ဖွဲ့တွေနဲ့ စစ်ကိုင်းမြို့နယ်က ပြည်သူ့ကာကွယ်ရေးတပ်ဖွဲ့တွေက ဖေဖော်ဝါရီ ၁ ရက်ဒီမနက်၇ နာရီလောက်မှာ တော်လှန်ရေးကာလ ၂ နှစ်ပြည့်သွားပေမယ့် ရဲဘော်တွေအနေနဲ့ ဘယ်တော့မှသွေးမအေးကြောင်း ဆန္ဒဖော်ထုတ်ခဲ့ကြပါတယ်။
ဒီလှုပ်ရှားမှုမှာ စုစုပေါင်းရဲဘော် အင်အား ၂၀၀ ဝန်းကျင်ပါဝင်ပြီး မနက် ၇ နာရီကနေ ၁၀ နာရီအတွင်း ပြုလုပ်ခဲ့ကြတာပါ။
နဂါးနီပြောက်ကျားတပ်ဖွဲ့မှ တာဝန်ခံ ကိုသားငယ်က “ဒါက ကျနော်တို့ဘက်က တော်လှန်ရေး ၂ နှစ်ပြည့် သွေးမအေးကြောင်း ပြည်သူနဲ့တသားတည်းရှိကြောင်း ရဲဘော်တွေလက်နက်မကိုင်ပဲ သပိတ်ဆန္ဒထုတ်ဖော်ကြတာပါဗျ” လို့ ပြောပါတယ်။
မတ္တရာမြို့နယ်က ကောင်းကင်တော်လှန်ရေးအင်အားစု၊ နဂါးနီပြောက်ကျားတပ်ဖွဲ့ဝင်တွေနဲ့ စစ်ကိုင်းမြို့နယ်အရှေ့ခြမ်းက LPDF ပြောက်ကျားတပ်ဖွဲ့များ၊ စစ်ကိုင်းမြို့နယ်ကျေးရွာ(ပ.က.ဖ) တပ်ဖွဲ့ဝင်တွေက စုပေါင်းပြုလုပ်ခဲ့တာလည်း ဖြစ်ပါတယ်။
မြောင်၊ ဇန်နဝါရီ ၃၀၊ ၂၀၂၃။
စစ်ကိုင်းတိုင်း၊ မြောင်မြို့နယ်ထဲကို စစ်ကြောင်း ၂ ကြောင်းခွဲဝင်ရောက်လာတဲ့ စစ်ကောင်စီတပ်သားတွေကို ဇန်နဝါရီလ ၂၉ ရက်မနေ့ကနေ့လည်ပိုင်းကစပြီး ဒေသခံကာကွယ်ရေးတပ်တွေက ၃ ကြိမ်မိုင်းဆွဲတိုက်ခိုက်ခဲ့တဲ့အပြင် လက်နက်တွေနဲ့ပါ ပစ်ခတ်တိုက်ခိုက်ခဲ့တယ်လို့ သိရပါတယ်။
ကျောက်ရစ်ရွာဘက်ကိုထွက်လာတဲ့ စစ်ကြောင်းတခုကို ကင်းရွာနဲ့ကိုးပင်ရွာကြားအရောက် နေ့လယ် ၁၁ နာရီခွဲလောက်မှာ တကြိမ်နဲ့ ကိုးပင်ရွာထဲကိုဝင်ချိန် နေ့လယ် ၁၂ နာရီလောက်မှာ တကြိမ်တိုက်ခိုက်ခဲ့တယ်လို့ မြောင်မြို့နယ် ပြည်သူ့ကာကွယ်ရေးတပ် − T.G.Rမှ ဗိုလ်တိုက်ဂါးက ပြောပါတယ်။
“ကျောက်ရစ်ကိုထွက်လာတဲ့ အင်အား ၄၀ စစ်ကြောင်းကို နေ့လယ် ၁၁ နာရီခွဲဝန်းကျင် ကင်းရွာနှင့် ကိုးပင်ရွာအကြားမှာ ၁ ပွိုင့် မိုင်းဆွဲတိုက်ခိုက်တယ်၊ သူကတော့ ထိခိုက်မှုရှိတယ်၊ အသေအပျောက်မရှိဘူး၊ ကိုးပင်ရွာအဝင်မှာ နေ့လယ် ၁၂ နာရီဝန်းကျင်မှာ နောက်ထပ် ၁ ကြိမ် မိုင်းဆွဲတိုက်ခိုက်ခဲ့တယ်” လို့ ပြောပါတယ်။
ဒါ့အပြင် ညနေ ၃ နာရီလောက်မှာတော့ မြောင်မြို့ကနေ ကူတို့ကုန်းရွာဘက်ကိုထွက်လာတဲ့ စစ်ကြောင်းကို အဲ့ဒီလမ်းကြားတနေရာမှာပဲ ရှေ့ထွက်မိုင်း ၁ လုံးနဲ့ထပ်မံတိုက်ခိုက်ခဲ့တာလို့ ဗိုက်တိုက်ဂါးက ဆက်ပြောပါတယ်။
“မြောင်နဲ့ကူတို့ကုန်းရွာအကြား ညနေ ၃ နာရီ ဝန်းကျင်မှာ ရှေ့ထွက်မိုင်း ၃ လုံးနဲ့တိုက်ခိုက်တာ၊ နေရာမှာတင်ပွဲခြင်းပြီး ၁ ကောင်သေတယ်၊ ဒဏ်ရာအပြင်းအထန် ၄ ကောင်ရပြီး ကားနဲ့စခန်းကို တိုက်သွားတယ်၊ စခန်းရောက်မှ ၃ ကောင်ထပ်သေတယ်” လို့ ပြောပါတယ်။
တိုက်ခိုက်ချိန်တွေအတွင်း စုစုပေါင်းတပ်သား ၇ ဦးသေဆုံးခဲ့တယ်လို့ မြေပြင်တိုက်ခိုက်ရေးရဲဘော်တွေက ပြောပေမယ့် မြေလတ်အသံက သီးခြားအတည်ပြုနိုင်ခြင်းမရှိသေးပါဘူး။
ခုစစ်ကြောင်းထိုးလာတဲ့ စစ်ကောင်စီတပ်တွေဟာ မိတ္ထီလာအခြေစိုက် တမခ ၉၉ က ဖြစ်တယ်လို့လည်း သိရပါတယ်။
ပြီးခဲ့တဲ့ ဇန်နဝါရီလ ၂၇ ရက်ကလည်း စစ်ကိုင်းကထွက်လာတဲ့ စစ်ကား ၃ စီးကို မြင်းမူမြို့နယ်၊ ဂွေးပင်တောရွာနဲ့ နတ်ရေကန်ရွာအကြားမှာ T.G.R အဖွဲ့က မိုင်းဆွဲတိုက်ခိုက်ခဲ့ရာ စစ်သား ၁၇ ဦး သေဆုံးခဲ့ပါသေးတယ်။
ခင်ဦး၊ ဇန်နဝါရီ ၃၀၊ ၂၀၂၃။
စစ်ကိုင်းတိုင်း၊ ခင်ဦးမြို့နယ်၊ ဗျိုင်းကြိုင်ရွာက ဒေသခံ ၂၀ ဦးကို စစ်ကိုင်း တပ်မ ၃၃ ကတပ်သားတွေက ဇန်နဝါရီလ ၃၀ ရက် ဒီနေ့မနက်ပိုင်းမှာ ဝင်ရောက်လာပြီး ဖမ်းဆီးထားတယ်လို့ သိရပါတယ်။
မအူပင်မြို့ပေါ်ကနေ အင်အား ၈၀ ကျော်ရှိတဲ့ စစ်ကိုင်းတပ်မ ၃၃ တပ်သားတွေက ဇန်နဝါရီလ ၃၀ ရက် မနက်ပိုင်းမှာ ဗျိုင်းကြိုင်ကျေးရွာက ဒေသခံ ၂၀ ဦး ဖမ်းဆီးထားပြီး နေအိမ်တွေကို မီးရှို့နေတယ်လို့ FIRE DRAGON PDF ဗိုလ်ပျောက်ကြီးက ပြောပါတယ်။
“မနက် ၉ နာရီလောက်ကနေ မအူပင်ကနေ စထွက်လာပြီးတော့ ရွှေဘိုမြို့နယ် အင်ကြင်းပင်ရွာအနောက်ဘက်က တဲတွေမီးရှို့တယ်။ ခင်ဦးမြို့နယ် ဗိုင်းကြိုင်ရွာမှာ မီးရှို့နေတယ်။ အိမ်ခြေက ၁၅၀ လောက်ပဲရှိတာ။ အခုမှ မီးစရှို့နေတာ။ စစ်ခွေးတွေက အဲဒီရွာမှာ ခဏနားနေတယ်။ ပြည်သူ ၂၀ ကျော်လောက် အဖမ်းခံထားရတယ်။ တပ်မ ၃၃ က စစ်ခွေးတွေနဲ့ ပျူတွေဝင်ရောက်နေတာ” လို့ ဗိုလ်ပျောက်ကြီးက ပြောပါတယ်။
ဗျိုင်းကြိုင်ကျေးရွာက ဖမ်းခံရသူတွေဟာ အသက် ၄၀ ကျော်နဲ့ ၅၀ ဝန်းကျင်အမျိုးသားတွေ ဖြစ်ကြပြီး ကလေးအမေတွေကိုပါ ဖမ်းဆီးထားကာ လက်ရှိစစ်ကြောင်းဝင်လာလို့ ထွက်ပြေးရသူ ၇၀၀ ကျော်ရှိတယ်လို့ ဆက်ပြောပါတယ်။
ဗျိုင်းကြိုင်ရွာကနေ စစ်သားအင်အား ၄၀ နဲ့ခွဲထွက်သွားပြီး ယခုအချိန်မှာ စိုင်တိုးရွာ မီးရှို့နေတယ်လို့ ဆက်ပြောပါတယ်။
မုံရွာ၊ ဇန်နဝါရီ ၃၀၊ ၂၀၂၃။
စစ်ကိုင်းတိုင်း၊ မုံရွာမြို့ပေါ်က နေရာ ၄ ခုမှာ အညာပစ်တိုင်းထောင်လေးများအဖွဲ့က စစ်တပ်က အာဏာသိမ်းယူတဲ့ ၂ နှစ်ပြည့်နေ့မှာ ပြုလုပ်မယ့် တိတ်ဆိတ်သပိတ်မှာ ပြည်သူတွေအနေနဲ့ပါဝင်ဖို့ လှုံ့ဆော်တဲ့ Stickers တွေကို လမ်းမပေါ်မှာ ဖြန့်ကြဲတာနဲ့ လိုက်လံကပ်တာတွေကို ဇန်နဝါရီလ ၃၀ ရက် ဒီမနက်မှာ ပြုလုပ်ခဲ့ ကြပါတယ်။
“ဖေဖော်ဝါရီ ၁ ရက် မနက် ၁၀ နာရီကနေ ညနေ ၃ နာရီအထိ တိတ်ဆိတ်သပိတ်မှာ တိုင်းသူပြည်သားတိုင်း ပါဝင်ဖို့ ဖိတ်ခေါ်လိုက်ပါတယ်” ဆိုတဲ့ စာသားတွေရေးထားတဲ့ Stickers တွေ ဖြစ်ပါတယ်။