ချောင်းဦး

ချောင်းဦး၊ အောက်တိုဘာ ၂၆၊ ၂၀၂၅။

စစ်ကိုင်းတိုင်း၊ ချောင်းဦးမြို့နယ်၊ ခင်မွန်ကျေးရွာကို စစ်ကြောင်းဝင်နေတဲ့ စစ်ကော်မရှင်တပ်က အမျိုးသမီး ၁ ဦးကိုပစ်သတ်ပြီး ပြည်သူ ၁၀ ဦးကိုဖမ်းဆီးသွားတယ်လို့ ချောင်းဦးမြို့နယ် ပြည်သူ့ကာကွယ်ရေးအဖွဲ့ဆီက သိရပါတယ်။

အောက်တိုဘာ ၂၅ ရက်မနက် ၇ နာရီခန့်မှာ တောပု၊ မုံရွေးတိုးဂိတ်၊ မြပုလဲ၊ ချောင်းဦးမြို့တို့က ပျူစောထီးနဲ့စစ်ကော်မရှင်တပ်ဖွဲ့ဝင်တွေပေါင်းထားတဲ့ အင်အား ၄၀ ခန့်ဟာ ခင်မွန်ရွာထဲရှိ ရပ်သာရပ်ကွက်ထဲဝင်ပြီးဖမ်းဆီးချိန် ကြောက်လန့်ပြီးထွက်ပြေးတဲ့ အသက် ၄၀ အရွယ် အမျိုးသမီး ၁ ဦးကို ပစ်သတ်ခဲ့တာလို့ ဆိုပါတယ်။

“လိုက်ဖမ်းတော့ အခြားသူလည်းပြေးနေကြတယ်။ သူလည်း ကြောက်အားလန့်အားနဲ့ပြေးနေရင်း ပစ်သတ်ခံရတယ်လို့တော့သိရတယ်။ သူတို့က ရွာထဲဝင်ပြီး ပြည်သူကိုဖမ်းတယ်။ ချောင်းဦးမြို့ထဲ ခေါ်သွားတယ်။ ထွက်ပြေးတဲ့သူကို ပစ်သတ်တာ။ “လို့ ချောင်းဦးမြို့နယ်ပကဖ တာဝန်ရှိသူက ပြောပါတယ်။

စစ်ကော်မရှင်ပူးပေါင်းအဖွဲ့ဟာ ရပ်သာရပ်ကွက်ကိုဝင်ချိန် ပြည်သူ ၅၀ ထက်မနည်းကို ဖမ်းဆီးပြီး ကျေးရွာဘောလုံးကွင်းထဲမှာစုခိုင်းထားပြီးနောက် အိမ်ထောင်စုစာရင်းတွေယူခိုင်းပြီး စစ်ဆေးခဲ့တယ်လို့ဆိုပါတယ်။

အဲ့ဒီနောက် စစ်ကြောင်းဟာ ည ၇ နာရီခန့်မှာ ကျေးရွာကနေပြန်ထွက်ချိန် အမျိုးသား၊ အမျိုးသမီး ၁၀ ဦးကိုသာ ချောင်းဦးမြို့ထဲကိုဆက်ဖမ်းခေါ်သွားခဲ့ပြီး ဖမ်းဆီးခံရသူတွေနဲ့ပတ်သက်တဲ့အချက်အလက်တွေကိုတော့ စိစစ်နေဆဲဖြစ်တယ်လို့ အထက်ပါတာဝန်ရှိသူကပြောပါတယ်။

ခင်မွန်ကျေးရွာဟာ မြပုလဲစစ်ကော်မရှင်ဂိတ်နဲ့ ဘက်စုံပူးပေါင်းဂိတ်ကြား အိမ်ခြေ ၁,၀၀၀ ဝန်းကျင်ရှိတဲ့ကျေးရွာဖြစ်ပြီး စစ်ကြောင်းဝင်ချိန် ဒေသခံတွေတိမ်းရှောင်ခဲ့ပြီး အောက်တိုဘာ ၂၆ ရက် ဒီမနက်ပိုင်းမှာတော့ အနည်းစုလောက်သာ ရွာကိုပြန်ဝင်နေကြတယ်လို့ ဆိုပါတယ်။

အောက်တိုဘာ ၆ ရက်ကလည်း ချောင်းဦးမြို့နယ်၊ ဗုံတိုကျေးရွာမှာ ဆီမီးသပိတ်ပြုလုပ်နေချိန် စစ်ကော်မရှင်တပ်က ဗုံးကြဲတိုက်ခိုက်ခဲ့လို့ ဒေသခံ ၂၀ ကျော်သေဆုံးပြီး ၄၀ ခန့်ဒဏ်ရာရရှိခဲ့ပါသေးတယ်။

စာတည်း – လင်း

မြေလတ်အသံ၊ အောက်တိုဘာ ၁၁၊ ၂၀၂၅။

စစ်ကိုင်းတိုင်း၊ ချောင်းဦးမြို့နယ်၊ ငါးလုံးတင်ကျေးရွာကို စစ်ကော်မရှင်တပ်ပစ်ခတ်လိုက်တဲ့ လက်နက်ကြီးကျရောက်ပေါက်ကွဲခဲ့တာကြောင့် အမျိုးသမီး ၂ ဦးသေဆုံးခဲ့တယ်လို့ ဒေသခံတွေဆီက သိရပါတယ်။

အောက်တိုဘာ ၁၀ ရက်ည ၉ နာရီကျော်မှာ ချောင်းဦးမြို့ပေါ်ကနေ ပစ်ခတ်လိုက်တဲ့ လက်နက်ကြီး ကျည် ၁ လုံးက ငါးလုံးတင်ရွာထဲကိုကျရောက်ပေါက်ကွဲခဲ့ရာ အသက် ၅၀ ကျော်အရွယ် အမျိုးသမီး ၂ ဦး သေဆုံးကာ ၁၁ နှစ်အရွယ်ယောကျာ်းလေး ၁ ဦးဒဏ်ရာရရှိခဲ့ တာလို့ဆိုပါတယ်။

“သေဆုံးတဲ့သူတွေက ဆွေမျိုးတွေမတော်ကြဘူး။ စစ်ဘေးရှောင်တွေ။ ကလေးနဲ့ အမျိုးသမီးကြီး ၁ ယောက်ကတော့ မြေးဖွားတော်ကြတယ်။ အမျိုးသမီး ၂ ယောက်မှာ ၁ ယောက်က ပွဲချင်းပြီး သေတယ်။ နောက် ၁ ယောက်ကတော့ ဆေးကုနေရင်းသေတာ”လို့ ချောင်းဦးဒေသခံအမျိုးသား တဦးကပြောပါတယ်။

သေဆုံးသူ ၂ ဦးမှာ ၁ ဦးက အောက်တိုဘာ ၁၀ ရက်ညမှာသေဆုံးခဲ့ပြီး နောက် ၁ ဦးကတော့ အောက်တိုဘာ ၁၁ ရက်ဒီမနက်ပိုင်းမှာဘဲ ဆေးကုသရင်းသေဆုံးခဲ့တာဖြစ်တာလို့ ဆိုပါတယ်။

ငါးလုံးတင်ကျေးရွာဟာ အိမ်ခြေစုစုပေါင်း ၁,၀၀၀ ခန့်ရှိပြီး ချောင်းဦးမြို့နယ်၊ တောင်ဘက်မှာတည်ရှိကာ ချောင်းဦးမြို့နဲ့ ၆ မိုင်ကျော်ကွာဝေးပါတယ်။

ပြီးခဲ့တဲ့မေ ၁၅ ရက်ည ၉ နာရီကလည်း ချောင်းဦးမြို့ပေါ်ကနေ ပစ်ခတ်လိုက်တဲ့ လက်နက်ကြီးကျည် ၂ လုံးဟာ ငါးလုံးတင်ကျေးရွာကို ကျရောက်ပေါက်ကွဲခဲ့တာကြောင့် ရွာသား ၅ ဦးသေဆုံးခဲ့တယ်လို့ ဒေသခံတွေဆီကသိရပါတယ်။

အလားတူ အောက်တိုဘာ ၆ ရက် (သီတင်းကျွတ်လပြည့်နေ့) ည ၈ နာရီမှာလည်း ချောင်းဦးမြို့နယ်၊ ဘုံတိုကျေးရွာအနီး ဒေသတွင်းသပိတ်အဖွဲ့တွေနဲ့ ပြည်သူတွေစုပေါင်းပြီး ဆီမီးသပိတ် ပြုလုပ်နေချိန် မုံရွာနမခက တက်လာတဲ့ ပါရာမော်တာက ၁၂၀ မမ ဗုံးသီး ၂ လုံးကြဲချခဲ့ရာ သပိတ်ဦးဆောင်သူတွေ အပါအဝင် ပြည်သူ ၂၄ ဦးသေဆုံးကာ ၄၆ ဦး ဒဏ်ရာရခဲ့ပါသေးတယ်။

စာတည်း – လင်း

ဆေးဝါးကုသမှုအတွက် လိုအပ်ချက်မြင့်မားနေဆဲ

ချောင်းဦး၊ အောက်တိုဘာ ၁၀၊ ၂၀၂၅။

စစ်ကိုင်းတိုင်း၊ ချောင်းဦးမြို့နယ်၊ ဘုံတိုရွာလေကြောင်းတိုက်ခိုက်မှုအတွင်း ထိခိုက်ဒဏ်ရာရခဲ့သူတွေအတွက် ဆေးကုသဖို့လိုအပ်နေပြီး ဆေးဝါးနဲ့ရိက္ခာထောက်ပံ့ပေးခဲ့တယ်လို့ စစ်ကိုင်းပြည်သူဖေးမကူကွန်ရက်ဆီက သိရပါတယ်။

တိုက်ခိုက်ခံရပြီးနောက် စစ်ကိုင်းပြည်သူဖေးမကူကွန်ရက် အရေးပေါ်ကုသမှုနဲ့ ဆေးဝါးလိုအပ်ချက်တွေ ဖြည့်တင်းပေးခဲ့ကာ အောက်တိုဘာ ၉ ရက်မှာ ကျပ် ၂၂၅ သိန်းကျော်တန်ဖိုးရှိ ဆေးဝါးနဲ့ ရိက္ခာတွေ ကူညီပေးခဲ့တယ်လို့ အထက်ပါတာဝန်ရှိသူကပြောပါတယ်။

“ငွေကျပ်အားဖြင့် ၂၂၅ သိန်းကျော်ဖိုးပေါ့ဗျာ၊ ကျနော်တို့ လှူခဲ့တယ်၊ အဓိကကတော့ ဆေးဝါးတွေပါတယ်၊ နောက် ဝှီးလ်ချဲတို့ပေါ့ဗျာ၊ နောက် ထိုးဆေး၊ စားဆေး၊ ဆေးထိုးအပ်တို့၊ ဆလိုင်းပိုက်တို့ပေါ့နော်၊ အဲ့ဒီလိုမျိုးတွေ ဆေးဘက်ဆိုင်ရာ Medical tools တွေပေါ့၊ Medical tools တွေပါတယ်၊ နောက်ခါ ဆေးကုသနေတဲ့ ဆေးအဖွဲ့တွေနဲ့ ဆေးရုံတက်လူနာတွေကို စားသောက်နိုင်ဖို့အတွက် ဆန်တွေပါတယ်ပေါ့၊ ရိက္ခာပေါ့ဗျာ။” လို့ စစ်ကိုင်းပြည်သူဖေးမကူကွန်ရက် တာဝန်ရှိသူတဦးက ပြောပါတယ်။

အောက်တိုဘာ ၆ ရက် (သီတင်းကျွတ်လပြည့်နေ့) ည ၈ နာရီခန့်မှာ ချောင်းဦးမြို့နယ်၊ ဘုံတိုကျေးရွာအနီး ဒေသတွင်းသပိတ်အဖွဲ့တွေနဲ့ ပြည်သူတွေစုပေါင်းပြီး ဆီမီးသပိတ် ပြုလုပ်နေချိန် မုံရွာနမခက တက်လာတဲ့ ပါရာမော်တာက ၁၂၀ မမ ဗုံးသီး ၂ လုံးကြဲချခဲ့ရာ သပိတ်ပြုလုပ်နေတဲ့လူအုပ်ကြားထဲပေါက်ကွဲပြီး ထိခိုက် သေဆုံးသူများခဲ့တာပါ။

အဆိုပါတိုက်ခိုက်ခံရမှုမှာ သပိတ်ဦးဆောင်သူတွေအပါအဝင် ပြည်သူ ၂၄ ဦးသေဆုံးကာ ၄၆ ဦး ဒဏ်ရာရခဲ့တယ်လို့ ဒေသတွင်းမှတ်တမ်းတွေအရသိရပြီး မှတ်တမ်းမယူထားနိုင်တဲ့ အရေအတွက် အချို့လည်း ရှိနေနိုင်သေးတယ်လို့ စစ်ကိုင်းပြည်သူဖေးမကူကွန်ရက်တာဝန်ရှိသူတဦးက မြေလတ်အသံကို ပြောပါတယ်။

ထိခိုက်ဒဏ်ရာရသူတွေအတွက် ကုသပေးနေတဲ့ ဆေးရုံနဲ့ ဆေးအဖွဲ့တွေမှာ သွေး၊ ဆေးဝါး၊ ဆေးဘက်ဆိုင်ရာပစ္စည်းတွေနဲ့ ကုသပေးနိုင်တဲ့ပညာရှင်တွေ လိုအပ်နေဆဲဖြစ်တယ်လို့ သိရပါတယ်။

ဆေးဝါးနဲ့ လုံလောက်တဲ့ကုသမှုတွေပေးနိုင်ဖို့ ဒေသတွင်းအဖွဲ့အစည်းအသီးသီးက ကြိုးပမ်းနေကြပေမယ့် လိုအပ်နေတာတွေကို အချိန်မီမဖြည့်ဆည်းနိုင်ရင် မလိုအပ်ဘဲလူသေဆုံးမှုတွေ ထပ်ကြုံလာရနိုင်တယ်လို့ အထက်ပါတာဝန်ရှိသူတဦးက သုံးသပ်ပါတယ်။

“အပ်နဲ့ထွင်းရမယ့်ဟာ ပေါက်ဆိန်နဲ့ပေါက်ရတာမျိုး ဖြစ်လာနိုင်တာပေါ့၊ ပြီးတော့ မသေဆုံးသင့်ဘဲ သေဆုံးရတာမျိုးတွေ၊ ဒဏ်ရာပိုဆိုးသွားတာမျိုးတွေပေါ့နော်၊ ဒီလိုအခြေအနေမျိုးတွေ ရှိနိုင်ပါတယ်၊ အဆိုးဆုံးကတော့ စစ်ကိုင်းတိုင်းမှာ ဆေးဝါးအပါအဝင်ပေါ့၊ အဓိကကတော့ဆေးဝါးနဲ့ ဆေးဘက်ဆိုင်ရာ ပစ္စည်းတွေက သယ်ယူလို့မရနိုင်အောင် အကြမ်းဖက်စစ်တပ်က ဖြတ်လေးဖြတ် ဖြတ်ထားတာပေါ့နော်။” လို့ အထက်ပါတာဝန်ရှိသူက ပြောပါတယ်။

၂၀၂၁၊ စစ်အာဏာသိမ်းချိန်ကနေ ၂၀၂၅၊ အောက်တိုဘာ ၉ ရက်အထိ စစ်ကော်မရှင်တပ်နဲ့ လက်အောက်ခံအဖွဲ့အစည်းတွေကြောင့် သေဆုံးခဲ့ရတဲ့ ပြည်သူစုစုပေါင်း ၇,၃၆၀ ဦးရှိပြီလို့ နိုင်ငံရေးအကျဉ်းသားများ ကူညီစောင့်ရှောက်ရေးအသင်း – AAPPက ထုတ်ပြန်ပါတယ်။

စာတည်း – လင်း

ချောင်းဦး၊ အောက်တိုဘာ ၇၊ ၂၀၂၅။

စစ်ကိုင်းတိုင်း၊ ချောင်းဦးမြို့နယ်မှာ ဆီမီးသပိတ်ပြုလုပ်နေချိန် စစ်ကော်မရှင်တပ်က ပါရာမော်တာနဲ့ ဗုံးကြဲခဲ့တာကြောင့် လူ ၂၀ ကျော်သေဆုံးပြီး ၄၀ ခန့်ဒဏ်ရာရသွားတယ်လို့ ဒေသကာကွယ်ရေးအဖွဲ့ဝင်တွေထံက သိရပါတယ်။

အောက်တိုဘာ ၆ ရက် (သီတင်းကျွတ်လပြည့်နေ့) ည ၈ နာရီခန့်မှာ ချောင်းဦးမြို့နယ်၊ ဗုံတိုကျေးရွာအနီး ဒေသတွင်းသပိတ်အဖွဲ့တွေနဲ့ ပြည်သူတွေစုပေါင်းပြီး ဆီမီးသပိတ် ပြုလုပ်နေချိန် မုံရွာနမခက တက်လာတဲ့ ပါရာမော်တာက ၁၂၀ မမ ဗုံးသီး ၂ လုံးကြဲချခဲ့ရာ သပိတ်ပြုလုပ်နေတဲ့လူအုပ်ကြားထဲပေါက်ကွဲပြီး ထိခိုက်သေဆုံးသူများခဲ့တာလို့ ဆိုပါတယ်။

” မလုပ်တာလည်းကြာပြီဆိုတော့ လူကစုံနေတာ။ ပါရာမိုတာလာတာကို လေကြောင်းသတိပေးနေတာကို မကြားလိုက်တာနေမယ်။ တည့်တည့်ကျတာ ၁၂၀ နှစ်လုံး။ လူအုပ်ထဲကို ကျတာ။ လူကများတယ်ရာဂဏန်းထိရှိတယ်။ အနည်းဆုံး ၃၀၀ ကျော်လောက်ရှိမယ်။ ပွဲထဲကျတာ”လို့ မုံရွာခရိုင်ဒေ သကာကွယ်ရေးအဖွဲ့ဝင်တဦးက မြေလတ်အသံကို ပြောပါတယ်။

စစ်အာဏာရှင်ဆန့်ကျင်ရေးဆီမီးသပိတ်ကို ညနေ ၃ နာရီကျော်လောက်ကတည်းက ပြုလုပ်နေတာဖြစ်ပြီး ပွဲလုပ်ချိန်ကြာမြင့်သွားတာဖြစ်သလို လာရောက်ကြည့်ရှု့သူတွေလည်းများလို့ စစ်ကောင်စီသတင်းပေးတွေက သတင်းပေးလို့ ဗုံးလာကြဲတာဖြစ်နိုင်တယ်လို့ သူက ဆက်ပြောပါတယ်။

ဗုံးကြဲခံရလို့ ညောင်ပင်၊ ဗုံတို၊ သစ်ဆိပ်၊ ဝယားတိုအပါအဝင် ကျေးရွာတွေက ၂၀ ကျော်သေဆုံးခဲ့ပြီး သေဆုံးသူတွေထဲမှာ အသက် ၁၀ နှစ်အောက်ကလေးငယ်၊ CDM ကျောင်းဆရာ၊ အုပ်ချုပ်ရေးအဖွဲ့ဝင်၊ ကျောင်းသားတွေပါဝင်တယ်လို့ ဆိုပါတယ်။

ဒါ့အပြင် ထိခိုက်ဒဏ်ရာရသူ ၄၀ ကျော်ရှိခဲ့ပြီး ထိခိုက်သူတွေထဲမှာ လုံခြုံရေးယူပေးနေတဲ့ ဒေသကာ ကွယ်ရေးအဖွဲ့ဝင်၊ သပိတ်ကော်မတီဝင်တွေနဲ့ ဒေသခံပြည်သူတွေလည်းပါဝင်တယ်လို့ သိရပါတယ်။

ထိခိုက်သေဆုံးသူများပြားနေတာကြောင့် သေဆုံးထိခိုက်သူတွေရဲ့အချက်အလက်တွေကို လတ်တလောမှာ ကောက်ယူနိုင်တာမရှိသေးဘူးလို့ ဆိုပါတယ်။

ဗုံးကြဲခံရပြီးနောက် ထိခိုက်သေဆုံးသူတွေကို ကူညီဆောင်ရွက်ပေးနေကြချိန် ည ၁၁ နာရီခန့်မှာ ပါရာမိုတာနဲ့နောက်ထပ် ၁ ကြိမ် ဗုံး ၂ လုံးကြဲချခဲ့သေးရာ လူထိခိုက်တာမရှိပေမယ့် စာသင်ကျောင်း ၁ ဆောင်ပျက်စီးသွားခဲ့တယ်လို့ သိရပါတယ်။

ဗုံးကြဲလို့ ထိခိုက်သူဆုံးသူတွေထဲမှာ ခြေပြတ်လက်ပြတ် အသားစကြေမွတာတွေပါဝင်နေလို့ အောက်တိုဘာ ၇ ရက်နေ့မနက်ပိုင်းထိ ရှင်းလင်းရေးဆက်လုပ်နေကြရသေးတယ်လို့ ဆိုပါတယ်။

ဇူလိုင် ၂၁ ရက်ကလည်း ချောင်းဦးမြို့နယ်၊ မှန်ချိုကျေးရွာမှာ အလက ကျောင်းအနီးစစ်တပ်ပစ်တဲ့ လက်နက်ကြီးကျလို့ ကျောင်းသူ ၁ ဦးသေဆုံးပြီး ၃ ဦးဒဏ်ရာရတယ်လို့ သိရပါတယ်။

စာတည်း – ဟိန်းစံ

မြေလတ်အသံ၊ အောက်တိုဘာ ၁၊ ၂၀၂၅။

စစ်ကိုင်းတိုင်း၊ ချောင်းဦးမြို့နယ်နဲ့ ဝက်လက်မြို့နယ်တို့မှာ စက်တင်ဘာ ၃၀ ရက်က စစ်ကော်မရှင် တပ်ရဲ့ ရွေးကောက်ပွဲကို ဆန့်ကျင်ဆန္ဒပြတဲ့ လူထုလှုပ်ရှားမှုတွေ ပြုလုပ်ခဲ့တယ်လို့ သပိတ်မှာပါဝင်ခဲ့ သူတွေဆီက သိရပါတယ်။

စစ်ကော်မရှင်က ကျူးလွန်ခဲ့တဲ့ စစ်ရာဇဝတ်မှုတွေကို ခဝါချဖို့ ပြည်သူလူထုက လက်မခံတဲ့ တရားမဝင်ရွေးကောက်ပွဲကို ကျင်းပဖို့ကြိုးစားနေတာကြောင့် အခုလိုသပိတ်မှောက်တာလို့ ချောင်းဦးမြို့နယ်လူငယ်အင်အားစုသပိတ်ကော်မတီဝင် ကိုဇွဲလေးက မြေလတ်အသံကို ပြောပါတယ်။

“ပြည်သူလူထုရဲ့ ဆန္ဒမပါတဲ့၊ ပြည်သူလူထုက လက်မခံတဲ့ ရွေးကောက်ပွဲတခု ဖြစ်နေတယ်၊ အဲ့ဒီတော့ ဒီရွေးကောက်ပွဲကို ကျနော်တို့ပြည်သူလူထုက လက်မခံတဲ့ ကျနော်တို့ပြည်သူလူထုရဲ့ အခက်အခဲ အကျပ်အတည်းကို ပြေလည်စေမယ့် ထွက်ပေါက်မဟုတ်ဘဲ စစ်ကောင်စီက သူတို့ကျူးလွန်ခဲ့တဲ့ စစ်ရာဇဝတ်မှုတွေကို ခဝါချချင်လို့၊ ပြစ်ဒဏ်ကင်းလွတ်ခွင့်ရချင်တဲ့အတွက် ပုံဖော်ဖန်တီးတဲ့ အတုအယောင်ရွေးကောက်ပွဲဖြစ်တဲ့အတွက် ကျနော်တို့ ဆန့်ကျင်တော်လှန်ကြခြင်းဖြစ်ပါတယ်။”လို့ ကိုဇွဲလေးက ပြောပါတယ်။

အဆိုပါ ဆန္ဒပြပွဲကို ချောင်းဦးမြို့နယ်လူငယ်အင်အားစု သပိတ်ကော်မတီ၊ ချောင်းဦးမြို့နယ် ကျောင်းသားများသမဂ္ဂ(ဗကသများအဖွဲ့ချုပ်)၊ မုံရွာ-အမြင့်လမ်း သပိတ်ဦးဆောင်ကော်မတီတို့က ပူးပေါင်းပြီး လူထုအင်အား ၆၀ ခန့်နဲ့ ဆိုင်ကယ်သပိတ်ပြုလုပ်ခဲ့တာလို့ သိရပါတယ်။

အလားတူ စက်တင်ဘာ ၃၀ ရက်မှာပဲ စစ်ကိုင်းတိုင်း၊ ဝက်လက်မြို့နယ်မှာလည်း စစ်ကော်မရှင် တပ်ရဲ့ ရွေးကောက်ပွဲကိုဆန့်ကျင်တဲ့သပိတ်လှုပ်ရှားမှုတခုကို ပြုလုပ်ခဲ့ကြပါသေးတယ်။

ဒီလှုပ်ရှားမှုကို ဝက်လက်မြို့နယ်ကျောင်းသားများသမဂ္ဂ(ဗကသများအဖွဲ့ချုပ်)က ရွာသာကြီးကျေးရွာ စစ်တပ်အထိုင်စခန်းနဲ့ ပေ ၇၀၀ကျော်အကွာမှာ “ရွေးကောက်ပွဲဟာ ဒီမိုကရေစီမဟုတ်”စာသားပါ ဘန်ကာချိတ်ဆွဲပြီး စစ်ကော်မရှင်ရဲ့ ရွေးကောက်ပွဲကို ဆန့်ကျင်တဲ့ လှုပ်ရှားမှုပြုလုပ်ခဲ့တာလို့ သိရပါတယ်။

ချောင်းဦး၊ သြဂုတ် ၂၂၊ ၂၀၂၅။

စစ်ကိုင်းတိုင်း၊ မုံရွာ-ချောင်းဦးလမ်းပိုင်းမှာ ခရီးသည်တင်ကားတွေ မိုင်းထိလို့ ယာဥ်မောင်း ၁ ဦးသေဆုံးကာ ယာဥ်နောက်လိုက် ၁ ဦး ထိခိုက်ဒဏ်ရာရရှိခဲ့တယ်လို့ ကြုံတွေ့ခဲ့ရသူခရီးသည်တွေဆီက သိရပါတယ်။

သြဂုတ် ၂၂ ရက်ဒီကနေ့ မနက် ၉ နာရီလောက်မှာ ချောင်းဦးမြို့နယ်၊ ရေပိုးစားကန်ရွာအနီး မုံရွာ-ချောင်းဦးလမ်းမှာ မုံရွာမြို့ကနေ မန္တလေးကို မောင်းနှင်လာတဲ့ ခရီးသည်တင်ကား ၃ စီးမှာ မိုင်းထိမှန်ခဲ့တာလို့ ဆိုပါတယ်။

“မုံရွာကနေ မန္တလေးဘက်သွားတဲ့ကားတွေ မိုင်းဆွဲခံရတာပါ။ Honda Fit ကားသေးနဲ့ ရွှေမြန်မာကားကတော့ တော်တော် ထိသွားတယ်။ ရှေ့မှန်တွေလည်း အက်ကွဲပြီး ကားဘော်ဒီ တခုလုံးလည်း ရစရာမရှိဘူး။ စစ်သားတွေ ရောက်လာပြီး ရှင်းလင်းရေးတွေတော့ လုပ်နေကြတာ တွေ့ခဲ့တယ်”လို့ ကိုယ်တိုင်ကြုံ တွေ့ခဲ့ရသူ ခရီးသည်တဦးက မြေလတ်အသံကို ပြောပါတယ်။

မိုင်းထိတာကြောင့် ခရီးသည်တင်ယာဥ် Express ၁ စီး၊ Honda Fit ကားသေး(ခရီးသည်တင်) ၁ စီးနဲ့ အံစားတုံးခရီးသည်တင်ယာဥ် ၁ စီးတို့ မိုင်းစထိမှန်ခဲ့ကာ အံစာတုံးကားက ယာဥ်မောင်းအမျိုးသား နေရာမှာသေဆုံးခဲ့ပြီး ယာဥ်နောက်လိုက်မှာ ထိခိုက်ဒဏ်ရာ(ပြင်းထန်) ရရှိခဲ့တာကြောင့် မြင်းမူဆေးရုံမှာ အရေးပေါ် ဆေးကုသနေရပြီး အခြေအနေ စိုးရိမ်ရတယ်လို့ သိရပါတယ်။

ဒါ့အပြင် မိုင်းပေါက်ကွဲမှုကြောင့် Honda Fit ကားမှာ မောင်းနှင်မရတော့တဲ့အထိ အပျက်အစီးများခဲ့လို့ ကရိန်းကားနဲ့ မုံရွာဘက်ကို သယ်ဆောင်သွားကာ ယာဥ်မောင်းနဲ့ ခရီးသည်တွေ အထိခိုက်မရှိ​ခဲ့ဘူးလို့ ဆိုပါတယ်။

” အဲ့ကားသေးလေးပေါ်က ခရီးသည်တွေကိုတော့ သူတို့ကားသေးလိုင်းက ကားတွေကပဲ ကူညီပြီး မုံရွာဘက်ကို ပြန်ခေါ်သွားကြတယ်။ ခရီးသည်တွေအကုန် သူတို့နေအိမ်တွေ ပြန်ရောက်သွားကြပါပြီ။ မဟာနွယ်(Express) ကားကတော့ အထိခိုက်နည်းလို့ မန္တလေးဘက်ကို ဆက်မောင်းသွားတယ်”လို့ ခရီးသည်တင်ယာဥ်မောင်းတဦးက ပြောပါတယ်။

ခရီးသည်ယာဥ်တွေ မိုင်းထိတာကြောင့် အခင်းဖြစ်နေရာအနီး မုံရွာ – မန္တလေးလမ်းပိုင်းမှာ ကားအစီးရေ ၇၀ နီးပါးဟာ ၂ နာရီကျော်ကြာ လမ်းပိတ်ဆို့မှုဖြစ်ပွားခဲ့ပြီးနောက် လက်ရှိမှာတော့ ပုံမှန်အတိုင်းဆက်လက်သွားလာနေကြတယ်လို့ သိရပါတယ်။

ခရီးသည်တင်ကားတွေ မိုင်းထိတာနဲ့ ပတ်သက်ပြီး ဘယ်အဖွဲ့အစည်းတွေကလုပ်ဆောင်တယ်ဆိုတာ ကို မြေလတ်အသံအနေနဲ့ အတည်မပြုနိုင်သေးဘဲ မုံရွာ-ချောင်းဦးလမ်းပိုင်းဟာ စစ်ကော်မရှင်တပ်နဲ့ ကာကွယ်ရေးတပ်ဖွဲ့တွေအကြား တိုက်ပွဲဖြစ်ပွားတာနဲ့ မိုင်းဆွဲတိုက်ခိုက်မှုတွေကြောင့် အရပ်သားသေဆုံးမှုတွေ မကြာခဏဆိုသလို ဖြစ်ပွားလေ့ရှိတာပါ။

ပြီးခဲ့တဲ့ မတ် ၄ ရက်က မုံရွာ – ချောင်းဦးလမ်းပိုင်း နတ်ရေကန်အနီးမှာ စစ်ကော်မရှင်တပ်ဖွဲ့ဝင်နဲ့ ဒေသတွင်းကာကွယ်ရေးတပ်ဖွဲ့တွေ နှစ်ဖက် အပြန်အလှန် ပစ်ခတ်မှုအကြားမှာ ခရီးသည်တင်ကားပေါ်က ၁ နှစ်ခွဲအရွယ် ကလေးငယ် အပါအဝင် ၃ ဦးသေဆုံးခဲ့တယ်လို့လည်း သိရပါတယ်။

စာတည်း – မြတ်