ချောင်းဦး

ချောင်းဦး၊ မေ ၂၇၊ ၂၀၂၆။

စစ်ကိုင်းတိုင်း၊ ချောင်းဦးမြို့နယ်၊ မုံရွာ-အမြင့်လမ်းပေါ်ရှိ လှော်ကားကျေးရွာကို အသေခံဆူဆိုက်ဒရုန်းနဲ့ဗုံးကြဲတိုက်ခိုက်ခဲ့တာကြောင့် သားအမိ ၂ ဦးသေဆုံးတယ်လို့ ချောင်းဦးမြို့နယ်ပကဖတာဝန်ရှိသူတွေထံက သိရပါတယ်။

မေလ ၂၇ ရက် ဒီကနေ့ နေ့လယ် ၁၂ နာရီ ၃၀ မိနစ်ခန့်မှာ မုံရွာအခြေစိုက် နမခစစ်ဌာနချုပ်ကနေ ပျံသန်းလာတဲ့ အသေခံဆူဆိုက်ဒရုန်း ၁ စီးဟာ ကျေးရွာအလယ်စျေးဆိုင်တွေအနီးလမ်းပေါ်ကို ကျရောက်ပေါက်ကွဲခဲ့တာလို့ ဆိုပါတယ်။

” ရွာထဲစျေးဆိုင်တွေရှိတဲ့နားကို ကျတာ။ ထိတဲ့သူတွေက ဒရုန်းကျတဲ့​​နေရာအနီးက လက်ဖက်ရည်ဆိုင်မှာ ရှိနေသူတွေ။ သေတာက လက်ဖက်ရည်လာသောက်တဲ့သားအမိ။ ဒဏ်ရာရတာက လက်ဖက်ရည်ဆိုင်ပိုင်ရှင်သားအဖ”လို့ ချောင်းဦးမြို့နယ်ပကဖ တာဝန်ရှိသူတဦးက မြေလတ်အသံကို ပြောပါတယ်။

ဒရုန်းထိမှန်လို့ လက်ဖက်ရည်ဆိုင်အတွင်းရှိနေတဲ့ အသက် ၃ နှစ်အရွယ်ကလေးနဲ့ အသက် ၄၀ ဝန်းကျင် မိခင်ဖြစ်သူ အမျိုးသမီးတို့ နေရာမှာသေဆုံးသွားခဲ့ပြီး လက်ဖက်ရည်ဆိုင်ပိုင်ရှင်တွေဖြစ်တဲ့ အသက် ၄၀ ဝန်းကျင် အမျိုးသားနဲ့ အသက် ၄ နှစ်ဝန်းကျင် သားဖြစ်သူတို့ ထိခိုက်ဒဏ်ရာရခဲ့ကာ လက်ဖက်ရည်ဆိုင်လည်း အနည်းငယ်ပျက်စီးသွားတယ်လို့ ဆိုပါတယ်။

အခင်းဖြစ်ကျေးရွာနဲ့အနီးဝန်းကျင်မှာ တိုက်ပွဲဖြစ်ပွားတာမျိုးမရှိဘဲ တိုက်ခိုက်ခဲ့တာဖြစ်ပြီး ဒရုန်းကျရောက်ပေါက်ကွဲပြီးနောက် ဒေသခံတွေကြောက်လန့်နေကြကာ ကျေးရွာလမ်းပေါ် မှာ လူသွားလူလာနည်းပါးသွားတယ်လို့ သိရပါတယ်။

မေလ ၁၂ ရက်ကလည်း ချောင်းဦးမြို့နယ်၊ ရှမ်းထူးကျေးရွာမှာ ချောင်းဦးထွေအုပ်ရုံးအထိုင်ချစစ်ကော်မရှင်အဖွဲ့ဘက်ကပစ်တဲ့ လက်နက်ကြီးထိမှန်လို့ သက်ကြီးအမျိုးသမီး ၁ ဦးသေဆုံးပြီး ၂ ဦးဒဏ်ရာရခဲ့တယ်လို့ သိရပါတယ်။သေဆုံး

ချောင်းဦး၊ မေ ၁၃၊ ၂၀၂၆။

စစ်ကိုင်းတိုင်း၊ ချောင်းဦးမြို့နယ်၊ ရှမ်းထူးကျေးရွာမှာ စစ်ကော်မရှင်တပ်ကပစ်ခတ်တဲ့ လက်နက်ကြီးထိမှန်ပြီး သက်ကြီးပိုင်းအမျိုးသမီး ၁ ဦးသေဆုံးကာ ၂ ဦးဒဏ်ရာရခဲ့တယ်လို့ ချောင်းဦးမြို့နယ်ပကဖတာဝန်ရှိသူတွေဆီက သိရပါတယ်။

ချောင်းဦးမြို့ ထွေအုပ်ရုံးမှာအထိုင်ချနေတဲ့ စစ်ကော်မရှင်တပ်ဖွဲ့ဝင်တွေဟာ မေ ၁၂ ရက်ညနေ ၃ နာရီကျော်မှာ လက်နက်ကြီးနဲ့ ၅ လုံးပစ်ခတ်ခဲ့ရာမှာ ကျေးရွာထဲကို ကျရောက်ပေါက်ကွဲခဲ့တာလို့ ဆိုပါတယ်။

“ဘာမှမဖြစ်ဘူး။ ရုတ်တရက်ပစ်တာ။ ရွာထဲကို ၂ လုံးကျတာ။ ကျန်တာက ရွာဝန်းကျင်ကိုကျတာ။ ရွာထဲကျတဲ့အလုံးထဲက ၁ လုံးက နေအိမ်ပေါ်ကျတာ”လို့ ချောင်းဦးမြို့နယ်ပကဖတာဝန်ရှိသူက ပြောပါတယ်။

လက်နက်ကြီးထိမှန်ပြီး အသက် ၇၀ ကျော်အရွယ်အမျိုးသမီး ၁ ဦးနေရာမှာတင်သေဆုံးခဲ့ပြီး အသက် ၄၅ နှစ်ကျော်အရွယ် အမျိုးသမီး ၂ ဦးဒဏ်ရာရကာ နေအိမ် ၂ လုံးလည်းပျက်စီးခဲ့တယ်လို့ ဆိုပါတယ်။

ပြီးခဲ့တဲ့ ဇန်နဝါရီ ၁၀ ရက်ကလည်း ချောင်းဦးမြို့နယ်၊ ညောင်ပင်တဲကျေးရွာနဲ့ တောင်ဖီလာကျေးရွာမှာ စက်တပ်လေထီးနဲ့ဗုံးချခံရပြီး ကလေးငယ် ၁ ဦးအပါအဝင် ၂ ဦးသေဆုံးကာ ၅ ဦးဒဏ်ရာရခဲ့တယ်လို့ သိရပါတယ်။

စာတည်း – လင်း

ချောင်းဦး၊ မတ် ၂၀၊ ၂၀၂၆။

စစ်ကိုင်းတိုင်း၊ ချောင်းဦးမြိုနယ်၊ ငါးယှန်ကျေးရွာကို စစ်ကော်မရှင်တပ်ကမီးရှို့ခဲ့တာကြောင့် အိမ်ခြေ ၁၃၀ ကျော်မီးလောင်ပျက်စီးခဲ့တယ်လို့ ချောင်းဦးမြို့နယ်ပြည်သူ့ကာကွယ်ရေးအဖွဲ့ဆီက သိရပါတယ်။

မတ်လ ၁၉ ရက်မနက် ၇ နာရီလောက်မှာ ငါးယှန်ရွာအတွင်း အင်အား ၅၀ ကျော်နဲ့အထိုင်ချထားတဲ့ စစ်ကော်မရှင်အဖွဲ့တွေက ရွာထဲကနေအိမ်တွေကိုမီးရှို့ခဲ့တာလို့ ဆိုပါတယ်။

“ရွာထိပ်စာသင်ကျောင်းဘေးမှာကို အထိုင်ချထားတာရှိတယ်။ ဟန်သစ်ဆီဆိုင်ဝန်းကျင်ကအိမ်တွေကို မီးရှို့တာ။ နွေရာသီဆိုတော့ လေတွေလည်းတိုက်နေတာနဲ့ မနေ့ကတည်းကလောင်တဲ့မီးက ဒီမနက်ထိ လောင်နေတုန်း”လို့ ချောင်းဦးပကဖတာဝန်ရှိသူတဦးက ပြောပါတယ်။

ငါးယှန်ကျေးရွာမှာ ၂၀၂၄ အတွင်း စစ်ကော်မရှင်စစ်ကြောင်းတွေအထိုင်လာချပြီးကတည်းက ဒေသခံတွေဟာ ဘေးလွတ်ရာမှာ ထွက်ပြေးတိမ်းရှောင်နေကြတာကြောင့် မီးရှို့ချိန်မှာ ရွာခံတွေမရှိကြဘူးလို့ ဆိုပါတယ်။

ငါးယှန်ရွာမှာ အိမ်ခြေ ၁,၀၀၀ ကျော်ရှိပြီး စစ်ကော်မရှင်တပ်သားတွေအထိုင်လာချပြီးကတည်းက ကျေးရွာနေအိမ်တွေကိုမီးရှို့တာ ၁၀ ကြိမ်ခန့်ရှိပြီဖြစ်ကာ အိမ်ခြေထက်ဝက်ကျော် မီးလောင်ပျက်စီးထားတယ်လို့ သိရပါတယ်။

မတ်လ ၁၀ ရက်ကလည်း စစ်ကိုင်းတိုင်း၊ ဝက်လက်မြို့နယ်၊ ငါးဘတ်ချောင်းကျေးရွာကို စစ်ကော်မရှင်စစ်ကြောင်းဝင်သွားပြီးနောက် မီးရှို့သတ်ဖြတ်ခံထားရတဲ့ အမျိုးသမီးအလောင်း ၁ လောင်းတွေ့ရှိခဲ့ကာ နေအိမ် ၆ လုံးလည်း မီးလောင်ပျက်စီးခဲ့တယ်လို့ သိရပါတယ်။

စာတည်း – လင်း

ချောင်းဦး၊ ဇန်နဝါရီ ၁၀၊ ၂၀၂၆။

စစ်ကိုင်းတိုင်း၊ ချောင်းဦးမြို့နယ်က ကျေးရွာ ၃ ရွာ စက်တပ်လေထီးနဲ့ဗုံးချခဲ့ရပြီး ကလေးငယ်အပါအဝင် ၂ ဦးသေဆုံးခဲ့တယ်လို့ ချောင်းဦးမြို့နယ်ပကဖ တာဝန်ရှိသူတွေဆီက သိရပါတယ်။

ဇန်နဝါရီ ၁၀ ရက် မနက် ၉ နာရီခွဲခန့်မှာ စက်တပ်လေထီးဟာ တောင်ဖီလာ၊ ညောင်ပင်တဲ၊ ညောင်ပင်သာရွာတွေကို ဗုံး ၁ လုံးစီကြဲချသွားတာလို့ ဆိုပါတယ်။

“ဗုံးတွေက ပြည်သူနေအိမ်တွေနား ရွာထဲကိုကျတာ။ ကလေးငယ် ၁ ယောက်နဲ့ အမျိုးသား ၁ ယောက် သေတယ်။ တောင်ဖီလာမှာက ရွာကိုလာလည်တဲ့ဧည့်သည်သေတာ။ ကလေးကကျတော့ စက်တပ်လေထီး လာတာကို ထွက်ကြည့်ချိန်ထိတာလို့တော့ ကြားတယ်”လို့ ချောင်းဦးမြို့နယ်ပကဖတာဝန်ရှိသူက ပြောပါတယ်။

ဗုံးထိမှန်တာကြောင့် ညောင်ပင်တဲကျေးရွာက အသက် ၁၀ နှစ်ဝန်းကျင် မိန်းကလေးငယ် ၁ ဦး၊ တောင်ဖီလာကျေးရွာက အသက် ၃၀ ကျော်အမျိုးသား ၁ ဦးတို့သေဆုံးခဲ့တယ်လို့ ဆိုပါတယ်။

ဒါ့အပြင် အဆိုပါကျေးရွာ ၂ ရွာပေါင်း ဒေသခံပြည်သူ ၅ ဦးခန့်ထိခိုက်ဒဏ်ရာရပြီး အရေးပေါ်ဆေးကုသနေကာ ညောင်ပင်သာကျေးရွာကတော့ လူထိခိုက်မရှိဘူးလို့ ဆိုပါတယ်။

ဗုံးကြဲခံရတဲ့ ကျေးရွာ ၃ ရွာက ၁ မိုင်ခွဲဝန်းကျင်ကွာဝေးပြီး ဒေသခံတွေကတော့ ဗုံးလာကြဲချိန် ကတုတ်ကျင်းတွေထဲ ဝင်ပုန်းခဲ့ကာ ရွာကနေထွက်ပြေးကြတာတော့မရှိဘူးလို့ သိရပါတယ်။

နိုဝင်ဘာ ၂ ရက်ကလည်း ချောင်းဦးမြို့နယ်၊ ငါးလုံးတင်ကျေးရွာမှာ လက်နက်ကြီးကျလို့ အမျိုးသမီး ၂ ဦးသေဆုံးခဲ့တယ်လို့ သိရပါတယ်။

စာတည်း – လင်း

ချောင်းဦး၊ ဒီဇင်ဘာ ၃၀၊ ၂၀၂၅။

စစ်ကိုင်းတိုင်း၊ ချောင်းဦးမြို့နယ်၊ ကျီကုန်းရွာမှာ အမျိုးသားတဦး မိုင်းနင်းမိပြီး ခြေထောက်ပြတ်သွားတယ်လို့ ချောင်းဦးမြို့နယ်ပကဖဆီက သိရပါတယ်။

မိုင်းနင်းမိသူဟာ ကျီကုန်းရွာနေ အသက် ၃၄ နှစ်အရွယ်ရှိ အမျိုးသား ၁ ဦးဖြစ်ပြီး ဒီဇင်ဘာ ၂၉ ရက်မနက် ၁၁ နာရီခန့်မှာ သူနေအိမ်ခြံဝင်းထဲမှာတင် မိုင်းနင်းမိခဲ့တာလို့ဆိုပါတယ်။

“မနေ့ကတယောက်က သူ့အိမ်ထဲထိတာ။ အိမ်မရောက်တာကြာတာရယ် ကိုယ့်အိမ်ကိုယ်ရှိသေးရဲ့လား ဆိုပြီး ပြန်ကြည့်တာ။ ရွာမှာက မီးရှို့ခံထားရတာလည်းများတာဆိုတော့။ မိုင်းထိလို့ညာဘက် ခြေထောက်တော့ ပြတ်သွားတယ်”လို့ ချောင်းဦးမြို့နယ်ပကဖတာဝန်ရှိသူက ပြောပါတယ်။

မိုင်းထိလို့ခြေထောက်ပြတ်သွားသူကိုတော့ နီးစပ်ရာနေရာမှာဆေးကုသနေရပြီး အသက်အန္တရာယ်တော့ မစိုးရိမ်ရဘူးလို့ ဆိုပါတယ်။

ဒီဇင်ဘာ ၂၈ ရက်မှာလည်း ကျေးရွာထဲကို စစ်ဘေးရှောင်နေရာကနေ ဆိုင်ကယ်နဲ့ပြန်လာတဲ့ အမျိုးသား ၁ ဦးကျေးရွာအလယ်လမ်းပေါ်မှာ မိုင်းနင်းမိပြီး လူထိခိုက်မှုမရှိပေမယ့် ဆိုင်ကယ်တော့ ပျက်စီးသွားပါသေးတယ်။

ဒီဇင်ဘာ ၁ ရက်ကစတင်ပြီး ကျီကုန်းကျေးရွာထဲကို စစ်ကော်မရှင်တပ်ဖွဲ့ဝင်အင်အား ၁၀၀ ကျော် ဝင်ရောက်လာပြီးနောက် ကျေးရွာထဲက သံဃာတော်နဲ့ ဒေသခံတွေကိုပစ်ခတ်ကာ နေအိမ်တွေကိုပါ မီးရှို့ပြီးနောက် ဒီဇင်ဘာ ၂၆ ရက်မှာ ချောင်းဦးမြို့ဘက်ကို ပြန်ထွက်သွားခဲ့တယ်လို့ ဆိုပါတယ်။

စစ်ကြောင်းက သတ်ဖြတ်ခဲ့လို့ သက်တော် ၆၁ နှစ် ဝါတော် ၄၀ ရှိ ဦးသုမန၊ ၄၄ နှစ်အရွယ် ကိုမင်းနိုင်၊ အသက် ၇၀ အရွယ် ဦးဖိုးဌေး နဲ့ ၅၆ နှစ်အရွယ် ဦးကျော်လင်းတို့ သေဆုံးခဲ့ပြီး ကျီးကုန်းရွာလယ်က နေအိမ် ၁၃၅ လုံးနဲ့ ကျီကုန်းအနောက်ရွာက နေအိမ် ၈၅ လုံးမီးလောင်ပျက်စီးခဲ့တယ်လို့ သိရပါတယ်။

စစ်ကော်မရှင်စစ်ကြောင်းဟာ ကျေးရွာထဲမှာအထိုင်ချနေထိုင်စဥ် နင်းမိုင်းတွေကိုထောင်ထားခဲ့တာကြောင့် ဒေသကာကွယ်ရေးအဖွဲ့တွေ မိုင်းရှင်းလင်းရာ ဒီဇင်ဘာ ၂၇ ရက်ကနေ ၂၉ ရက်အတွင်း ခြေနင်းမိုင်း ၁၁ လုံးသိမ်းဆည်းရမိရှိထားတယ်လို့ သိရပါတယ်။

မိုင်းရှင်းလင်းရေးလုပ်နေတာကြောင့် ဒီဇင်ဘာလ ၃၀ ရက်အထိတော့ ရွာခံတွေကို ကျေးရွာထဲ ပြန်ဝင်ခွင့်မပေးသေးဘူးလို့ ဆိုပါတယ်။

စာတည်း – လင်း

မြေလတ်အသံ၊ ဒီဇင်ဘာ ၂၊ ၂၀၂၅။

စစ်ကိုင်းတိုင်း၊ ချောင်းဦးမြို့နယ်ကို စစ်ကြောင်းထိုးနေတဲ့ စစ်ကော်မရှင်တပ်ဖွဲ့ဝင်တွေက ဒေသခံအမျိုးသား ၁ ဦးကို ပစ်သတ်ခဲ့တာကြောင့် သေဆုံးသွားခဲ့တယ်လို့ ဒေသခံတွေကပြောပါတယ်။

သေဆုံးသူမှာ ကျီးကုန်းရွာမှ အသက် ၄၃ နှစ်အရွယ် ကိုမင်းနိုင် ဖြစ်ပြီး ချောင်းဦးမြို့ပေါ်ကနေ အင်အား ၁၀၀ ခန့်ပါတဲ့စစ်ကြောင်းက ကျီးကုန်းရွာကိုဝင်ရောက်လာချိန် နိုဝင်ဘာ ၃၀ ရက်ညနေ ၅ နာရီကျော်မှာ ပစ်ခံခဲ့ရတာလို့ ဆိုပါတယ်။

“တိုက်ပွဲမရှိဘူးဗျ။ ချောင်းဦးဘက်က **ကားနှစ်စီးနဲ့ လာတာပါဗျာ။ ခင်မွန်ရွာကိုဖြတ်ပြီး ကျီးကုန်းဝင်တာ။ ရွာကလူတွေကတော့ ထွက်ပြေးကြတာပေါ့။ စစ်ကြောင်းက ရွာကိုဝင်ပြီး ခဏအကြာမှာတော့ ပြန်ထွက်သွားတာ။ အလောင်းကို ရွာထဲရှင်းလင်းရေးပြန်ဝင်ရင် တွေ့တာပါ”လို့ ဒေသခံတော်လှန်ရေးတပ်ဖွဲ့ဝင်တဦးကပြောပါတယ်။

ကျီးကုန်းရွာကိုဝင်ခဲ့စစ်ကြောင်းဟာ ညတွင်းချင်းရွာကပြန်ထွက်သွားတာကြောင့် တော်လှန်ရေးတပ်ဖွဲ့တွေက ဒီဇင်ဘာ ၁ ရက်မနက်ပိုင်းမှာ ရှင်းလင်းရေးဝင်ချိန် ကိုမင်းနိုင်ရဲ့ ရုပ်အလောင်းကို ရွာလယ်ရှိလမ်းမပေါ်မှာ ဦးခေါင်းပွင့်ထွက်ဒဏ်ရာနဲ့တွေ့ရှိခဲ့ပြီး မြေမြှုပ်သင်္ဂြိုဟ်ပေးခဲ့တယ်လို့ သူက ဆိုပါတယ်။

အဆိုပါအင်အား ၁၀၀ ခန့်ပါစစ်ကြောင်းဟာ ကျီးကုန်းကျေးရွာကို ဒီဇင်ဘာ ၂ ရက်ဒီမနက် ပိုင်းမှာ ထပ်မံဝင်ရောက်လာပြီးနောက် လူနေအိမ်တွေကိုမီးရှို့ဖျက်ဆီးပြီး ရွာမှာတပ်စွဲထားတယ်လို့ အထက်ပါတပ်ဖွဲ့ဝင်က ပြောပါတယ်။

ပြီးခဲ့တဲ့ဇူလိုင် ၂၉ ရက်ကလည်း ကျီးကုန်းကျေးရွာအတွင်းကို မြပုလဲဂိတ်ကနေပစ်ခတ်လိုက်တဲ့ လက်နက်ကြီးကျည် ကျရောက်ပေါက်ကွဲခဲ့တာကြောင့် ၁၀ နှစ်ကလေး ၁ ဦးနဲ့ ၃၀ နှစ်အမျိုးသမီး ၁ ဦးသေဆုံးခဲ့တယ်လို့ သိရပါတယ်။

စာတည်း – လင်း