မြေလတ်အသံ၊ ဧပြီ ၆၊ ၂၀၂၆။

ဧပြီ ၅ ရက် မနေ့ညပိုင်းမှာ ထိုင်းနိုင်ငံ၊ ပထုံထာနီခရိုင်အတွင်း အထပ် ၉ ထပ်ရှိ တက္ကသိုလ်အဆောင် ၁ ခုကနေ အမျိုးသား ၁ ဦး ပြုတ်ကျသေဆုံးခဲ့ကြောင်း သတင်းရရှိတာကြောင့် အရေးပေါ်ကယ်ဆယ်ရေးအဖွဲ့တွေ ရောက်ရှိစစ်ဆေးခဲ့ရာ သေဆုံးသူမှာ အသက် ၃၀ အရွယ် တရုတ်နိုင်ငံသားဖြစ်ပြီး Humanities ပထမနှစ် ကျောင်းသား ၁ ဦး ဖြစ်တယ်လို့ သိရပါတယ်။

အဲ့ဒီနောက် ဧပြီ ၆ ရက် ယနေ့မနက် ၁၀ နာရီခွဲခန့်မှာလည်း အဆိုပါအဆောင်ရဲ့ ၈ ထပ်ရှိ အခန်း ၁ ခန်းမှာ အသက် ၂၁ နှစ်အရွယ် အမျိုးသမီး ၁ ဦး သေဆုံးနေတာကို ထပ်မံသိရှိခဲ့ရတယ်လို့ ဆိုပါတယ်။

သေဆုံးသူ အမျိုးသမီးကလည်း အဆိုပါဘာသာရပ် ပထမနှစ်ကျောင်းသူ ၁ ဦးဖြစ်ပြီး လည်ပင်း၊ ဦးခေါင်း၊ ရင်ဘတ်နဲ့ လက်မောင်းတွေမှာ ဓားဒဏ်ရာအမြောက်အမြားနဲ့ ရေချိုးခန်းအတွင်း သေဆုံးနေတာကို တွေ့ရှိခဲ့ရကာ သေဆုံးချိန်ဟာ ၈ နာရီကနေ ၂၄ နာရီခန့်အထိ ကြာမြင့်နေပြီဖြစ်တယ်လို့ မှုခင်းဆေးစစ်ချက်အရ သိရပါတယ်။

သေဆုံးအမျိုးသမီးရဲ့ အခန်းအတွင်းမှာ ပစ္စည်းတွေ ဖရိုဖရဲဖြစ်နေပြီး တံခါးအနီးရှိ စားပွဲပေါ်မှာ သွေးစွန်းနေတဲ့ ဓား ၁ ချောင်းကိုလည်း ရှာဖွေတွေ့ရှိခဲ့ရတယ်လို့ ဆိုပါတယ်။

ဒါ့အပြင် အခန်းအတွင်းနဲ့ ရေချိုးခန်းနံရံတွေပေါ်မှာ “ထွက်ခွာသွားရန် လိုအပ်ကြောင်း” ၊ “ကြိုးစားမှုများအကြောင်း” နဲ့ “ငွေထက် နားလည်မှုက ပိုအရေးကြီးကြောင်း” စတဲ့အကြောင်းအရာတွေကိုလည်း သွေးနဲ့ ရေးခြစ်ထားတာကို တွေ့ရတယ်လို့ ဆိုပါတယ်။

CCTV မှတ်တမ်းတွေအရ သေဆုံးသူကျောင်းသားရဲ့ အခန်းကို ရှာဖွေနိုင်ခဲ့တာဖြစ်ပြီး အဲ့ဒီကနေတဆင့် သေဆုံးသူ ကျောင်းသူရဲ့ ရုပ်အလောင်းကို ထပ်မံတွေ့ရှိခဲ့ရတာလို့ သိရပါတယ်။

ကနဦးစုံစမ်းချက်တွေအရ ၎င်းတို့ ၂ ဦးက ချစ်သူတွေဖြစ်ကြပြီး လွန်ခဲ့တဲ့ ၂ ပတ်ခန့်က အဆိုပါကျောင်းသားဟာ ဖုန်းကနေတဆင့် တဦးဦးနဲ့ ပြင်းပြင်းထန်ထန်စကားများခဲ့ကြောင်း အနီးအနားအခန်းရှိ ကျောင်းသား ၁ ဦးက ထွက်ဆိုထားပါတယ်။

ရဲတပ်ဖွဲ့က အဆိုပါစုံတွဲဟာ စကားများရန်ဖြစ်မှုကနေတဆင့် အမျိုးသားက အမျိုးသမီးကို ဓားနဲ့ တိုက်ခိုက်သတ်ဖြတ်ခဲ့တာ ဖြစ်နိုင်တယ်လို့ ယူဆထားပြီး အဲ့ဒီနောက် အမျိုးသားဖြစ်သူက မိမိကိုယ်ကိုယ် ဒဏ်ရာရအောင်ပြုလုပ်ကာ နံရံပေါ်မှာ စာတွေရေးပြီးနောက် ဝရံတာကခုန်ချကာ သေကြောင်းကြံစည်ခဲ့တာဖြစ်နိုင်တယ်လို့ သံသယရှိနေတာလည်း ဖြစ်ပါတယ်။

ရုပ်အလောင်း ၂ ခုလုံးကို အသေးစိတ် စစ်ဆေးဖို့ မှုခင်းဆေးပညာဌာနသို့ပို့ဆောင်ထားပြီး ရဲတပ်ဖွဲ့က ဆက်လက်စုံစမ်းစစ်ဆေးနေဆဲ ဖြစ်တယ်လို့ သိရပါတယ်။

Source – Bangkok Post.

တောင်ငူ၊ မတ် ၂၄၊ ၂၀၂၅။

ပဲခူးတိုင်း၊ တောင်ငူမြို့နယ်၊ ကျွန်းကုန်းကျေးရွာမှာ ၉ တန်းကျောင်းသူ ၁ ဦး အုပ်စုဖွဲ့ အဓမ္မပြုကျင့်သတ်ဖြတ်ခံရမှုဖြစ်ပွားခဲ့တယ်လို့ သေဆုံးသူရဲ့ မိသားစုဝင်တွေနဲ့နီးစပ်သူတွေထံက သိရပါတယ်။

သေဆုံးသူမှာ အသက် ၁၆ နှစ်အရွယ် မခိုင်သဇင်ထွန်း ဖြစ်ပြီး မတ် ၁၉ ရက် ညနေ ၄ နာရီကျော်မှာ နေအိမ်တွင်း ၁ ဦးတည်းအိပ်ပျော်နေစဥ် အုပ်စုဖွဲ့အဓမ္မပြုကျင့်ပြီး သတ်ဖြတ်ခံရတာလို့ ဆိုပါတယ်။

” ဖြစ်တဲ့နေ့က သူအမေက ဖက်ရွက်သွားကောက်တာ။ သူအဖေကတောထဲ သစ်တိုက်သွားတာ။ ကလေးလေးက အိမ်ထဲတယောက်တည်းအိပ်နေခဲ့တာ။ ရွာဆိုတော့ အိမ်ခန်းတံခါးမရှိ အိမ်တံခါးမရှိပေါ့။ သူတို့အိမ်ဝန်းကျင်နားအိမ်တွေရှိပေမယ့်အများစုက အလုပ်သွားနေကြတာ။ တရားခံမိသားစု ၃ အိမ်ကတော့လူရှိတယ်” လို့ မိသားစုနဲ့နီးစပ်သူဒေသခံတဦးက မြေလတ်အသံကို ပြောပါတယ်။

မိခင်နေအိမ်သို့ပြန်လည်ရောက်ရှိချိန် သမီးဖြစ်သူ မခိုင်သဇင်ထွန်းမှာ လည်ပင်းပြတ်လုနီးပါးပြတ်ရှဒဏ်ရာ၊ ရင်ဘတ်နဲ့နှာခေါင်းမှာ ထိုးကြိတ်ဒဏ်ရာတွေနဲ့ သေဆုံးနေခဲ့တာကို တွေ့ရှိခဲ့ပြီး ကျေးရွာအုပ်ချုပ်ရေးအဖွဲ့နဲ့ ရဲအဖွဲ့တွေထံ အကြောင်းကြားခဲ့တာလို့ ဆိုပါတယ်။

မခိုင်သဇင်ထွန်း အဓမ္မပြုကျင့်အသတ်ခံရမှုနဲ့ပတ်သက်ပြီး အိမ်နီးချင်းတွေဖြစ်တဲ့ အသက် ၂၀ ကျော်အရွယ် စည်သူနိုင်(ခ)မှဲ့ကြီး ၊ သိန်းထိုက်အောင် (ခ) သားပု ဆိုသူ ၂ ဦးကို မတ် ၁၉ ရက်ညပိုင်းနဲ့ မတ် ၂၀ ရက်တွေမှာ ၎င်းတို့ရဲ့နေအိမ်တွေကနေ ရဲက အသီးသီးဖမ်းဆီးခဲ့တယ်လို့ သိရပါတယ်။

“တယောက်က နေ့ချင်းမိတယ်။ သူနေအိမ်မှာဘဲ ဟန်မပျက်ပြန်နေ နေကြတာ။ ကောင်မလေးသတ်ခံရပြီးတော့ သူ့မိဘတွေပြန်ရောက်လာတယ်။ ပရဟိတလူတွေကလည်း နာရေးမဏ္ဍပ်လုပ်နေကြချိန် သတ်တဲ့လူကိုယ်တိုင် နားရေးမဏ္ဍပ်လာထိုးကူတယ်။ ဟန်မပျက် ပြန်နေတယ်ပေါ့။ သတ်ခံရတဲ့မိန်းကလေးရဲ့အဖေက (ကျူးလွန်သူတွေကို) ခိုင်းနေ၊ အိမ်မှာလည်း စားနေ နေကြသူတွေဆိုတော့ သူတို့လည်းဟန်မပျက်နေကြတာ”လို့ ပြောပါတယ်။

ဖမ်းဆီးရမိသူတွေရဲ့ ထွက်ဆိုချက်အရ ကျူးလွန်သူ ၃ ဦးဖြစ်ကာ လက်ရှိမှာ ၂ ဦးဖမ်းမိထားပြီး မှုခင်းဆေးစာအရ သေဆုံးသူမိန်းကလေးမှာ အုပ်စုဖွဲ့အဓမ္မပြုကျင့်ခံထားရကြောင်း စစ်ဆေးတွေ့ရှိထားကာ ဖမ်းဆီးခံထားရသူတွေကလည်း အဓမ္မပြုကျင့်သတ်ဖြတ်ခဲ့ကြောင်း ဝန်ခံထွက်ဆိုထားတယ်လို့ သိရပါတယ်။

အခင်းဖြစ်ပွားပြီးနောက် သေဆုံးသူရဲ့ ဖုန်းနဲ့ငွေသားအချို့ပျောက်ဆုံးနေခဲ့သလို ကျူးလွန်သူတွေဟာ အိမ်ထောင်ကွဲ၊ မူးယစ်ဆေးသုံးစွဲတတ်သူတွေဖြစ်ပြီး သေဆုံးသူရဲ့နေအိမ်ကို စောင့်ကြည့်ကာ မိဘတွေမရှိတဲ့အချိန်ကို ကြိုတင်ကြံစည်လုပ်ဆောင်တာဖြစ်နိုင်တယ်လို့ ဆိုပါတယ်။

လက်ရှိမှာ အမှုနဲ့ပတ်သက်ပြီး ဖမ်းဆီးထားသူ ၂ ဦးကို တောင်ငူမြို့မရဲစခန်းမှာ ဖမ်းဆီးချုပ်နှောင်ထားပြီး ချုပ်ရက်ရမန်ရယူထားကာ ပါဝင်နေသူ နောက် ၁ ဦးကိုဖမ်းဆီးရမိရေး ရဲဘက်က လိုက်လံစုံစမ်းနေတယ်လို့ သိရပါတယ်။

“ ကျနော်တို့လိုလားတာက သေစားသေစေ သက်ဆိုင်ရာက သေဒဏ်ပေးတာမျိုးလိုချင်တယ်။ ဒါမှဘဲ သေသူရဲ့ဝိညာဥ်လည်း ကျေနပ်မယ်၊ မိသားစုတွေလည်းစိတ်ကျေနပ်မှု ရနိုင်မယ်”

စာတည်း – ဟိန်းစံ