အုတ်ဖို

ပဲခူး၊ ဖေဖော်ဝါရီ ၆၊ ၂၀၂၅။

ပဲခူးတိုင်း၊ သာယာဝတီခရိုင်၊ အုတ်ဖိုမြို့ရှိ မြန်မာနိုင်ငံစစ်မှုထမ်းဟောင်းအဖွဲ့ ရုံးကို Golden Garuda Battalion – G2B တပ်ဖွဲ့မှ မိုင်းခွဲတိုက်ခိုက်ခဲ့တယ်လို့ အဲဒီတပ်ဖွဲ့ဆီက သိရပါတယ်။

ဖေဖော်ဝါရီ ၅ ရက် မနေ့က မနက် ၄ နာရီခွဲလောက်မှာ အုတ်ဖိုမြို့၊ မြို့မရဲစခန်းအနီးမှာရှိတဲ့ စစ်မှုထမ်းဟောင်းအဖွဲ့ရုံးကို ကာကွယ်ရေးတပ်ဖွဲ့တွေက မိုင်း ၂ လုံးနဲ့ သွားရောက်တိုက်ခိုက်ခဲ့ရာ စစ်မှုထမ်းဟောင်းအဖွဲ့၀င် ၁ ဦးသေဆုံးပြီး ၃ ဦးထက်မနည်း ထိမှန်ဒဏ်ရာရရှိခဲ့တယ်လို့ ဆိုပါတယ်။

“အဲဒီရုံးမှာက အမြဲတမ်း ဒီအုပ်ချုပ်ရေးအဖွဲ့တွေ ၇ ဦးလောက်ရှိတယ်။ သေဆုံးသွားတာကတော့ ၁ ဦးကတော့ သေချာတယ်။ ကျန်တဲ့ ၂ ဦး ၃ ဦးမက ဒဏ်ရာရတာရှိတယ်။ ပြင်းထန်ဒဏ်ရာရတယ်။ သေဆုံးတဲ့သူ အလောင်းကို ရဲကားနဲ့သယ်သွားတယ်။ ပြီးတော့ အုတ်ဖိုဆေးရုံရင်ခွဲရုံကိုပို့တယ်။” လို့ Golden Garuda Battalion – G2B တပ်ဖွဲ့ရဲ့စစ်ရေးတာဝန်ခံ ကိုဂျာနူးက ပြောပါတယ်။

၆၄ နှစ်မြောက်ကချင်တော်လှန်ရေးနေ့ကို ဂုဏ်ပြုတဲ့အနေနဲ့ စာစောင်တွေထုတ်ဝေပြီး ဂုဏ်ပြုတာထက်စာရင် အခုလိုမစ်ရှင်နဲ့ ဂုဏ်ပြုချင်တဲ့အတွက် လုပ်ဆောင်ရခြင်းဖြစ်တယ်လို့ သူကဆိုပါတယ်။

ဒါ့အပြင် အဆိုပါရုံးမှာ စစ်မှုထမ်းဖို့ဖမ်းလာတဲ့သူတွေကို လာရောက်စုဆောင်းတာမျိုးတွေ ပြုလုပ်သလို အဲဒီရုံးက ကားတွေနဲ့ စစ်မှုထမ်းဖို့အတွက် အတင်းအကြပ်ပေါ်တာဆွဲခေါ်တာတွေလုပ်တယ်လို့ ကိုဂျာနူးက ပြောပါတယ်။

အဲ့ဒီရုံးဟာ အုတ်ဖိုမြို့မရဲစခန်းအနီးမှာရှိတဲ့အတွက် မစ်ရှင်ကိုဖော်ဆောင်ဖို့ အခက်အခဲတွေရှိခဲ့တယ်လို့ ဆိုပါတယ်။

“မြို့မရဲစခန်းနဲ့က ခြံစည်းရိုးပဲခြားတယ်။ လုံခြုံရေးတင်းကျပ်တဲ့ အခြေနေတွေကနေပြီးတော့ ကျနော်တို့ရအောင်သွားပြီးတော့ ခက်ခက်ခဲခဲမိုင်းထောင်ပြီးတော့မှ သေချာပြင်ဆင်ရတာဖြစ်တဲ့အတွက် အသက်အန္တရာယ်တွေ အများကြီးရှိတာပေါ့။ တချက်ကလေး ပေါက်သွားတာနဲ့ ကျနော်တို့ရဲဘော်တွေ အားလုံး အသက်ဆုံးရှုံးနိုင်ချေရှိတယ်ဆိုတော့ ဒီဟာကိုဖော်ဆောင်ဖို့အတွက်ကတော့ ကြာပြီပေါ့နော်။ စစ်မှုထမ်းတွေကိုအတင်းအကြပ် ပေါ်တာဆွဲကတည်းက ကျနော်တို့သေချာစောင့်ကြည့်နေတာဖြစ်တယ်။”လို့ ကိုဂျာနူးကပြောပါတယ်။

တိုက်ခိုက်ပြီးနောက် ကာကွယ်ရေးတပ်ဖွဲ့တွေထွက်လို့မရအောင် မြို့ပတ်ပတ်လည်မှာ စစ်ကောင်စီက ဂိတ်ချလုံခြုံရေးချထားသလို ရုံးပတ်ပတ်လည်ကိုလည်း အရပ်ဝတ်တွေနဲ့ ကင်းပုန်းဝပ်ပြီးစောင့်ဆိုင်းနေတာမျိုးတွေလည်းရှိတယ်လို့ သိရပါတယ်။

စာတည်း − လင်း

ပဲခူး၊ ဇန်နဝါရီ ၂၉၊ ၂၀၂၅။

ပဲခူးတိုင်း၊ သာယာဝတီခရိုင်၊ အုတ်ဖိုမြို့နယ်မှာ ဇန်နဝါရီ ၂၈ ရက်နေ့လယ် ၁ နာရီလောက်မှာ ပျူစောထီး ၁ ဦးကို သေနတ်နဲ့ပစ်ခတ်ရာသေဆုံးခဲ့တယ်လို့ သာယာဝတီခရိုင် တပ်ရင်း ၃၈၀၂၊ တပ်ခွဲ ၄ မြေအောက်ပြောက်ကျားတပ်ဖွဲ့ -အုတ်ဖို ဆီကသိရပါတယ်။

အုတ်ဖိုမြို့နယ်၊ သဖန်းပင်ဆိပ်ရွာမှာနေထိုင်တဲ့ ပျူစောထီး တင်နိုင်ထွန်း ဆိုသူကို အုတ်ဖိုတာဆုံနဲ့ သဖန်းပင်ဆိပ်ရွာကြားမှာ ဆိုင်ကယ်နဲ့လာတာကိုသတင်းရတဲ့အတွက် စောင့်ကြိုပစ်ခတ်ခဲ့တာလို့ ဆိုပါတယ်။

“သူက တပ်ကထွက်တာ။ အာဏာသိမ်းစက စစ်**စိတ် လုံးဝမပျောက်ဘူး။ ပြည်သူတွေအပေါ်လူပါးဝတဲ့ လူစားမျိုးပါ။ သူကြွေးကြော်တာက ငါသာခုချိန်ထိ စစ်ထဲကမထွက်သေးရင် ခုမြို့နယ်က PDF တွေကို အပြီးချေမှုန်းပစ်မယ်တဲ့။ သူ့ကြောင့်အသတ်ခံရတာက ပြည်သူ ၄ ယောက်၊ အဖမ်းခံရ၊ စစ်မှုထမ်းအတွက်ပေါ် တာကိုထည့်တာက ၈ ယောက်။ လူငယ်တွေချည်းပဲ။” လို့ ၃၈၀၂ တပ်ရင်း၊ တပ်ခွဲ ၄ မှ တပ်ခွဲမှူးရဲဘော်ဒေဝ က ပြောပါတယ်။

ပစ်ခတ်ပြီးနောက် လက်ပစ်ဗုံး ၁ လုံး၊ မိုဘိုင်းဖုန်း ၁ လုံးနဲ့ ဆိုင်ကယ် ၁ စီးတို့ကိုသိမ်းဆည်းခဲ့တယ်လို့ သိရပါတယ်။

ကိုတင်နိုင်ထွန်းဟာ ကာကွယ်ရေးအဖွဲ့တွေရဲ့အချက်အလက်တွေကို စစ်ကောင်စီတပ်ဖွဲ့ဝင်တွေဆီပေးပို့တာ၊ လူငယ်တွေကိုပေါ်တာဆွဲဖို့ စစ်ကောင်စီဆီသတင်းပေးတာ၊ ဖမ်းဆီးခိုင်းတာတွေလုပ်တယ်လို့ သာယာဝတီခရိုင် တပ်ရင်း ၃၈၀၂၊ တပ်ခွဲ ၄ မြေအောက်ပြောက်ကျားတပ်ဖွဲ့-အုတ်ဖိုရဲ့ ထုတ်ပြန်ချက်မှာပါရှိပါတယ်။

ပြီးခဲ့တဲ့ ၂၀၂၄ ဒီဇင်ဘာ ၄ ရက်ကလည်း တိမ်မြှုပ်ရွာအခြေစိုက် ခမရ ၆ ကနေထွက်လာတဲ့စစ်ကောင်စီ ဆိုင်ကယ်ယာဉ်တန်းကို သာယာဝတီခရိုင် တပ်ရင်း ၃၈၀၂၊ တပ်ခွဲ ၄ မြေအောက်ပြောက်ကျားတပ်ဖွဲ့ -အုတ်ဖို တပ်ဖွဲ့ဝင်တွေက စောင့်ကြိုတိုက်ခိုက်ခဲ့ရာ MA 3 သေနတ် ၁ လက်၊ ကျည်ဘောက် ၂ ခု၊ ၅.၅၆ ကျည် ၄၉ တောင့်၊ လက်ပစ်ဗုံး ၃ လုံး၊ မိုဘိုင်းဖုန်း ၂ လုံး၊ ကျောပိုးအိတ် ၁ လုံး၊ မှတ်ပုံတင် ၁ ခု၊ ငွေသား ၄၀,၀၀၀ ကျပ်နဲ့ ခမရ ၆ တပ်ရဲ့ လျှို့ဝှက်စာရွက်စာတမ်းများကို သိမ်းဆည်းရရှိခဲ့တယ်လို့ သိရပါတယ်။

စာတည်း – လင်း

အုတ်ဖို၊ ဧပြီ ၂၅၊ ၂၀၂၃။

ပဲခူးတိုင်း၊ အနောက်ခြမ်းအုတ်ဖိုမြို့နယ်၊ ငါးရှည့်ရိုးအုပ်စုမှာ ညဘက်အချိန် ဖါးရိုက်၊ ငါးရှာ ထွက်လာသူ ၂ ဦးကို ရဲကဖမ်းဆီးရိုက်နှက်ပြီး အုပ်ချုပ်ရေးမှူးက အမှုကြေအေးဖို့အတွက် ငွေကျပ် သိန်း ၂၀တောင်းခံခဲ့တယ်လို့ ဒေသခံတဦးဆီက ဆိုပါတယ်။

အုတ်ဖိုမြို့နယ်၊ သရက်ကုန်းရွာက ကိုတင်လိူင်နဲ့ ကိုဇော်ထွန်းတို့ ၂ ဦးကို အုတ်ဖိုမြို့နယ် ရဲတပ်ဖွဲ့မှ ဒုရဲအုပ်အာကာလင်းနိုင်နဲ့အဖွဲ့က မတ်လ ၁၈ ရက် ညကဖမ်းဆီးရိုက်နှက်ပြီး ငါးရှည့်ရိုးကျေးရွာအုပ်ချုပ်ရေးမှူး ကိုနိုင်ဦးက အမှုပြေလည်ဖို့အတွက်ဆိုကာ ငွေတောင်းခံခဲ့တာဖြစ်ပါတယ်။

သူတို့နှစ်ဦးကို ဘာကြောင့်ဖမ်းခဲ့တယ်ဆိုတာကို အတိအကျမသိဘူးလို့ သရက်ကုန်းရွာခံတဦးက ဆိုပါတယ်။

“သူတို့နှစ်ဦးကို ရဲကရိုက်နှက်ပြီး အုပ်ကြီးအိမ်ကိုခေါ်သွားတာ။ အုပ်ကြီးကိုနိုင်ဦးက သူညှိပေးမယ်၊ စစ်ကောင်စီဗိုလ်မှူးအတွက် ၅ သိန်း ကျန်တဲ့အဖွဲ့အစည်းတွေလည်းပေးရမှာဖြစ်လို့ သိန်း ၂၀ တောင်းတယ်။ တောင်းတောင်းပန်ပန်နဲ့ အဲဒီည အုပ်ကြီးကို ၄ သိန်းပေးလိုက်ရတယ်။ နောက်နေ့ (မတ်လ ၁၉ ရက်)မနက်မှာ အုပ်ကြီးနိုင်ဦးက ၆ သိန်းထပ်တောင်းလို့ပေးရတယ်။ ကိုဇော်ထွန်းဆီက ငွေမတောင်းဘူး။ ကိုတင်လိူင်ကတော့ ရိုက်ထားတဲ့ဒဏ်နဲ့ လက် ၂ ဘက်ကျိုးလို့ အုတ်ဖိုဆေးရုံတက်လိုက်ရသေးတယ်” လို့ဒေသခံတဦးကပြောပါတယ်။

အဲဒီကိစ္စပတ်သက်ပြီး ဧပြီလ ၅ ရက်နေ့မှာ မြို့နယ်စစ်ကောင်စီဥက္ကဌဗိုလ်မှူးမျိုးမင်းဦးက ကိုတင်လိူင်၊ ကိုဇော်ထွန်း၊ နနွင်းကုန်းအုပ်ချုပ်ရေးမှူးကိုညွှန့်ဝင်းနဲ့ ကိုနိုင်ဦးတို့ကိုခေါ်ယူစစ်ဆေးပေမယ့် ဖြေရှင်းဆောင်ရွက်ပေးတာ ဘာမှမရှိဘူးလို့ သူက ဆက်ပြောပါတယ်။

လက်ရှိမှာ ကိုတင်လိူင်နဲ့ကိုဇော်ထွန်းတို့ ၂ ဦးမှာ ထပ်မံဖမ်းဆီးရိုက်နှက်မှာကို စိုးရိမ်တဲ့အတွက် ကျေးရွာမှာ မနေရဲတော့ဘဲ တိမ်းရှောင်နေကြတယ်လို့ သိရပါတယ်။

ပြီးခဲ့တဲ့ဖေဖေါ်ဝါရီလ ၁၈ ရက် ည ၈ နာရီခွဲလောက်ကလည်း အုတ်ဖိုမြို့နယ်၊ သစ်ဆိမ့်ကုန်းရွာထိပ် စာသင်ကျောင်းအနီး ရန်ကုန်-ပြည်ကားလမ်းပေါ်မှာ ဆိုင်ကယ်စီးလာတဲ့ လူငယ် ၂ ယောက်ကို ရဲတွေက ဖမ်းဆီးငွေတောင်းပြီးမှ ပြန်လွှတ်ပေးခဲ့တယ်လို့ ဒေသခံတဦးဆီက သိရပါတယ်။

ပဲခူးတိုင်အနောက်ခြမ်းက အုတ်ဖိုမြို့နယ်၊ နတ်တလင်းမြို့နယ်၊ ပေါင်းတည်မြို့နယ်နဲ့ ပေါက်ခေါက်မြို့နယ်တို့ကို စစ်ကောင်စီက ဖေဖော်ဝါရီလ ၂ ရက်မှာ စစ်အုပ်ချုပ်ရေးကြေညာထားပါတယ်။

စာတည်း-လင်းဇေ

အုတ်ဖို၊ ဧပြီ ၁၀၊ ၂၀၂၃။

ပဲခူးတိုင်းအနောက်ခြမ်း၊ အုတ်ဖိုမြို့နယ်ထဲက လောင်းကစားဝိုင်းတွေကို ဆက်ပြီးမလုပ်ဖို့ မြေအောက်ပြောက်ကျားတပ်ဖွဲ့က ဧပြီလ ၉ ရက်မှာ ပထမဆုံးနဲ့နောက်ဆုံးအကြိမ် သတိပေးချက် ထုတ်ပြန်လိုက်ပါတယ်။

လောင်းကစားဝိုင်းတွေကို အုတ်ဖိုမြို့နယ်၊ ဂုံညှင်းတန်းအုပ်စု၊ ဂရံရွာနဲ့ ဒီးဒူးပင်အရှေ့ရွာမှာ လုပ်ဆောင်နေကာ၊ အဲ့ဒီလောင်းကစားဝိုင်းတွေကို ရှေ့ဆက်လုပ်ဆောင်ပါက ပစ်ခတ်တိုက်ခိုက်မှုတွေ လုပ်ဆောင်သွားမှာလို့ မြေအောက်ပြောက်ကျားတပ်ဖွဲ့မှ သတင်းတာဝန်ခံ ဗိုလ်တောက်တံ့က ပြောပါတယ်။

“ဖဲဝိုင်း ဂျင်ဝိုင်း ကြက်ဝိုင်းနဲ့ လောင်းကစားနည်း မျိုးစုံလုပ်နေတာ။ တပတ်လုံးလုပ်တာ။ ပြည်သူတွေရဲ့စီပွားရေးကို ထိခိုက်နစ်နာလို့ တားရတာပါ။ ဒါနောက်ဆုံးအကြိမ် သတိပေးတာ။ ပြည်သူတွေလည်း မသွားဖို့ ဝေးဝေးမှာနေဖို့ ပြောချင်တယ်။ ရပ်တန်းကမရပ်လို့ ပစ်ခတ်တိုက်ခိုက်တဲ့အခါ ပြည်သူတွေထိခဲ့ရင် ဖြေရှင်းမပေးနိုင်ဘူး” လို့ ပြောပါတယ်။

ဒါ့အပြင် လောင်းကစားဝိုင်းဒိုင်တွေက နယ်ခံပျူစောထီးတွေကတဆင့် စစ်ကောင်စီကို ဆက်ကြေးကောက်ပေးရပြီး၊ တနင်္လာနေ့ကနေ ကြာသပတေးနေ့အထိ ၁၆ သိန်း၊ သောကြာ-စနေ-တနင်္ဂနွေ သုံးရက်လုပ်ခွင့် ၁၆ သိန်းပေးရကာ စစ်ကောင်စီတပ်သားတွေကလည်း အရပ်ဝတ်၊ လက်နက်တွေကိုင်ပြီး လုံခြုံရေးယူပေးတယ်လို့ သိရပါတယ်။

အလားတူ စစ်တပ်က အာဏာသိမ်းပြီးနောက်ပိုင်းမှာ ပဲခူးတိုင်းအနောက်ခြမ်းက ပေါင်းတည်၊ နတ်တလင်း၊ မိုးညို စတဲ့မြို့နယ်တွေမှာလည်း စစ်ကောင်စီကို ဆက်ကြေးပေးကာ လောင်းကစားဝိုင်းတွေကို ပေါ်ပေါ်ထင်ထင်ပြုလုပ်လာနေသလို ကာကွယ်ရေးတပ်တွေဘက်ကလည်း သတိပေးတိုက်ခိုက်တာတွေကို လုပ်ဆောင်လျှက် ရှိနေပါတယ်။

အုတ်ဖို၊ မတ် ၂၂၊ ၂၀၂၃။

ပဲခူးတိုင်းအနောက်ခြမ်း၊ အုတ်ဖိုမြို့နယ်မှာ လောင်းကစားဒိုင်နေအိမ်ကို ပစ်ခတ်တဲ့ ၄၀ မမကျည်က အနီးရှိ ကင်းပုန်းဝပ်နေတဲ့ စစ်သားတွေဆီ ကျရောက်ခဲ့တာကြောင့် ၂ ဦး ပြင်းထန်ဒဏ်ရာ ရရှိသွားတယ်လို့ အုတ်ဖို မြေအောက်ပြောက်ကျားတပ်ဖွဲ့ဆီက သိရပါတယ်။

အုတ်ဖိုမြို့နယ်၊ ကြို့ကိုးပင်ကျေးရွာက လောင်းကစားဒိုင်ပြုလုပ်တဲ့ ကိုဖိုးသဲ နေအိမ်ကို မတ်လ ၂၀ ရက် မနက်အစောပိုင်းမှာ ၄၀ မမနဲ့ပစ်ခတ်ချိန် အနီးရှိစာသင်ကျောင်းဝန်းထဲကို ကျရောက်ခဲ့ရာ အဲ့ဒီနေရာမှာ ကင်းပုန်းဝပ်နေတဲ့စစ်သားတွေကို ထိမှန်ခဲ့တာလို့ အမှတ် ၂၊ ၃၈၀၂ တပ်ရင်းတပ်ခွဲ ၄ မြေအောက်ပြောက်ကျားတပ်ဖွဲ့ (အုပ်ဖို)မှ တပ်ဖွဲ့ဝင်တဦးက ပြောပါတယ်။

“ဖိုးသဲက ချဲဒိုင်လုပ်တယ်။ လောင်းကစားဝိုင်းတွေလည်း ထောင်ပြီးတော့ စစ်ကောင်စီကို ငွေရှာပေးနေတာ။ အဲဒါကြောင့် သတိပေးတဲ့အနေနဲ့ ပစ်ခတ်ခဲ့တာ။ ကံဆိုးချင်တော့ ဖိုးသဲအိမ်နားက စာသင်ကျောင်းနောက်မှာ ကင်းပုန်းဝပ်နေတဲ့ စစ်သားတွေဆီကို ၄၀ မမတလုံးကျပြီး ၂ ဦး ဒဏ်ရာရသွားတာ” လို့ ပြောပါတယ်။

ကိုဖိုးသဲဟာ လောင်းကစားဒိုင်တဦးဖြစ်ကာ ပျူစောထီးခေါင်းဆောင် လုပ်နေသူလည်း ဖြစ်ပြီး စစ်ကောင်စီနဲ့ပတ်သက်ဆက်နွယ်ကာ ငွေရှာပေးနေသူဖြစ်တယ်လို့ သူကဆက်ပြောပါတယ်။

ဒါ့အပြင် အဲ့ဒီနေ့မနက်မှာပဲ အုတ်ဖိုမြို့နယ်၊ အောက်ကိုင်းအုပ်စုက လောင်းကစားဝိုင်း ထောင်ထားတဲ့ အုပ်ချုပ်ရေးမှူး ကိုကြည်မြင့် အိမ်ကိုလည်း သေနတ်နဲ့ဝင်ရောက်ပစ်ခတ်ခဲ့ရာ ထွက်ပြေးသွားခဲ့လို့ ကျည်ထိမှန်မှု ရှိ၊ မရှိကို သေချာမသိရဘူးလို့ မြေအောက်ပြောက်ကျားတပ်ဖွဲ့ (အုတ်ဖို)မှ တပ်ဖွဲ့ဝင်တဦးက ပြောပါတယ်။

စာတည်း – လင်း