သေနတ်

ပဲခူး၊ ဇန်နဝါရီ ၂၆၊ ၂၀၂၃။

ပဲခူးတိုင်းဒေသကြီး၊ ဖြူးမြို့နယ်နဲ့ ညောင်လေးပင်မြို့နယ်မြို့နယ်တွေမှာ စစ်ကောင်စီနဲ့ပေါင်းပြီး လောင်းကစားဒိုင်လုပ်နေတဲ့ သူ​ ၃ ဦး ပစ်သတ်ခံရလို့ သေဆုံးသွားတယ်လို့ သိရပါတယ်။

သေဆုံးသူတွေဟာ မျိုးဇော်ဦး၊ ဦးဇော်မင်းအောင်(ခ)စာကလေးခွေနဲ့ ဇနီးဖြစ်သူ မအိမွန် တို့ ၃ဦးဖြစ်ကာ သူတို့ဟာ ပျူစောထီးတွေလည်းဖြစ်တယ်လို့ Bago Region PDF တာဝန်ရှိသူတဦးကပြောပါတယ်။

“ပစ်ခတ်ခံရသူတွေက ပျူစောထီးတွေဖြစ်တယ်။ ရဲနဲ့တပ်နဲ့ပေါင်းပြီး လောင်းကစားဒိုင်လုပ်တယ်။ ရဲနဲ့တပ်ကို လိုင်းကြေးပေးပြီးတော့ပေါ့ ဒါကြောင့်ပစ်ခတ်ရှင်းလင်းတာဖြစ်တယ်။ စကစနဲ့ရဲအတွက် ငွေရှာပေးနေတာလေ”လို့ ပြောပါတယ်။

ပျူစောထီး မျိုးဇော်ဦးကို ဇန်နဝါရီ ၂၅ရက် ညနေ ၄နာရီခွဲလောက်မှာ စက်ကုန်းကျေးရွာအုပ်ချုပ်ရေးမှူး အိမ်မှာရောက်နေတဲ့အချိန် ဖြူးပကဖ က ပစ်ခတ်ရှင်းလင်းခဲ့တာဖြစ်ပါတယ်။

ပျူစောထီး ဇော်မင်းအောင်တို့ လင်မယား၂ယောက်ကိုတော့ အဲ့ဒီနေ့ ညနေ ၅နာရီခွဲလောက်မှာ ကြက်ဝိုင်းကနေပြန်လာချိန် ညောင်လေးပင် ပကဖ က ပစ်ခတ်ရှင်းလင်းခဲ့တာဖြစ်ပါတယ်။

သေနတ်နဲ့ပစ်ခံရလို့ ဦး​ဇော်မင်းအောင်မှာ နဖူးကျည်ဖောက်ဝင်ဒဏ်ရာတချက်၊ ဝဲမျက်ခုံးကျည်ဖောက်ဝင်ဒဏ်ရာတချက်နဲ့နေရာမှာ သေဆုံးခဲ့ပြီး ‌ဇနီးဖြစ်သူ မအိမွန်မှာ ယာနထင်ကျည်ဖောက်ဝင်ဒဏ်ရာတချက်ရရှိသေဆုံးသွားတယ်လို့ ဆိုပါတယ်။

သေဆုံးသွားသူတွေကိုတော့ ဒေသလူမှုကူညီရေးအသင်းတွေက ညောင်လေးပင်ဆေးရုံကို သယ်ဆောင်သွားတယ်လို့ သိရပါတယ်။

ဇန်နဝါရီလ ၂၂ ရက် မနက်ပိုင်းက ညောင်လေးပင်မြို့နယ်၊ ပုဇွန်မြောင်ကျေးရွာ၊ ဆွဲဒလဲပိုင်းက ဦးဝင်းဌေးအပါအဝင် မိသားစု ၃ ဦးနေအိမ်မှာ ပစ်သတ်ခံရလို့ သေဆုံးသွားပြီး ဘယ်အဖွဲ့က လုပ်တယ်ဆိုတာ မသိရသေးပါဘူး။

မန္တလေး၊ ဒီဇင်ဘာ ၂၅၊ ၂၀၂၂။

မန္တလေးတိုင်း၊ ဝမ်းတွင်းမြို့နယ်၊ ညောင်တိုကျေးရွာက အုပ်ချုပ်ရေးမှူး သားအဖ သေနတ်နဲ့ပစ်ခတ်ခံရပြီး သေဆုံးသွားတယ်လို့ သိရပါတယ်။

ဒီဇင်ဘာလ ၂၄ ရက်မနေ့ကည ၈ နာရီခန့်မှာ ညောင်တိုကျေးရွာနေ အသက် ၅၀ နှစ်ဝန်းကျင် အုပ်ချုပ်ရေးမှူးဦးပြေအေး နဲ့ သူ၏သား ၂၅ နှစ်ဝန်းကျင် ကိုစိုင်မြင့်အောင်ပြေ (ခ) ပုလုံးတို့ကို နေအိမ်မှာပဲ လက်နက်ကိုင်အဖွဲ့တခုကပစ်သတ်ခဲ့တာလို့ ဒေသခံတဦးက ပြောပါတယ်။

“သူတို့သားအဖပစ်သတ်ခံရတာက ဟုတ်တယ်။ အုပ်ချုပ်ရေးမှူးဆိုတော့ သူတို့ကရွာထဲမှာ လူတွင်ကျယ်လုပ်ချင်တာလည်း ရှိတာပေါ့။ ဒါကြောင့်လာပစ်သတ်သွားတာလားတော့မသိရဘူး”လို့ ပြောပါတယ်။

အုပ်ချုပ်ရေးမှူးသားအဖအသတ်ခံရတယ်လို့သတင်းရပြီး လာရောက်စစ်ဆေးတဲ့ စစ်ကောင်စီအင်အား ၂၀ ခန့်ပါတဲ့ကားလည်း ရိုးစုကျေးရွာနဲ့ ဖုန်းစိုးကျေးရွာကြားမှာ မိုင်းဆွဲခံခဲ့ရကာ ထိခိုက်သေဆုံးမှုကိုမသိရသေးဘူးလို့ ဆိုပါတယ်။

အုပ်ချုပ်ရေးမှူး ကိုပြည်အေးဆိုသူမှာ မြို့နယ်အတွင်း အကြီးစားပျူစောထီးခေါင်းဆောင်ဖြစ်ပြီး၊ ကျေးရွာနေပြည်သူများအပေါ် အမြဲတမ်းဗိုလ်ကျအနိုင်ကျင့်နေသူဖြစ်သလို သားဖြစ်သူဟာလည်း ပျူစောထီးအဖွဲ့ဝင်တဦးဖြစ်ပြီး ရွာတွေကို PDF တွေ မလာအောင်၊ PDFတွေကိုရှာဖွေပြီး စစ်ကောင်စီကိုသတင်းပေးနေလို့ ရှင်းလင်းခဲ့တာဖြစ်သလို အလောင်းကောက်ဖို့လာတဲ့ စစ်ကောင်စီကားကိုလည်းမိုင်းဆွဲခဲ့တာဖြစ်တယ်လို့ WTRF (wundwin township revolution force)က ထုတ်ပြန်ထားပါတယ်။

ဒါ့အပြင် ဒီဇင်ဘာလ ၁၀ ရက်မှာလည်း သဲတောလေးကျေးရွာ အုပ်ချုပ်ရေးမှူးမောင်ရှိန်ကို WTRF အဖွဲ့က သုတ်သင်ရှင်းလင်းခဲ့ပါသေးတယ်။

မန္တလေး၊ ဒီဇင်ဘာ ၂၃၊ ၂၀၂၂။

မန္တလေးတိုင်း၊ ပြင်ဦးလွင်ခရိုင်၊ သပိတ်ကျင်းမြို့နယ်တနေရာမှာ ဒီဇင်ဘာလ ၂၂ ရက်မနေ့ကနေ့လည်ပိုင်းမှာ စစ်ကောင်စီဘက်မှ ဒုရဲတပ်ကြပ်တဦးကို ဖမ်းဆီးမိပြီးနောက် ခုခံထွက်ပြေးတဲ့အတွက် ဒေသခံကာကွယ်ရေးတပ်သားတွေက သေနတ်နဲ့ပစ်ခတ်ရှင်းလင်းခဲ့တယ်လို့ သိရပါတယ်။

သပိတ်ကျင်းမြို့နယ်၊ တကောင်းနီကယ်စက်ရုံမှာ လုံခြုံရေးတာဝန်ကျထမ်းဆောင်နေတဲ့ ဒုရဲတပ်ကြပ် ဆန်းမင်းဇော်ကို မနေ့ကမနက် ၁၀ နာရီ ၄၅ မိနစ်မှာ ဖမ်းဆီးခဲ့တာဖြစ်ပြီး၊ ဖမ်းဆီးထားချိန်မှာ ခုခံထွက်ပြေးတာကြောင့် ခုလိုရှင်းလင်းခဲ့တာလို့ TBK တောဆင်ရိုင်းပြောက်ကျားတပ်ဖွဲ့မှ ဗိုလ်မျက်ပြူးက ပြောပါတယ်။

“တကောင်းနီကယ်စက်ရုံမှာ လုံခြုံရေးတာဝန်ကျပြီး ခွင့်နဲ့သူမိသားစုဆီပြန်တာ။ အဲဒါကို ကျနော်တို့အဖွဲ့ကသိပြီး သပိတ်ကျင်းမြို့တနေရာမှာ ဖမ်းဆီးခဲ့တာ။ ဖမ်းဆီးခေါ်လာပြီး စစ်ဆေးနေချိန်ခုခံပြီးထွက်ပြေးလို့ သေနတ်နဲ့ပစ်ရှင်းခဲ့တယ်။ ဝဲဘက်ရင်အုံ ၁ ချက်၊ လက်ပြင် ၁ ချက်မှန်ပြီးသေတယ်။ အလောင်းကိုတော့ ကျနော်တို့မြေမြှုပ်ပေးလိုက်တယ်” လို့ ပြောပါတယ်။

မိဘဆီကိုပြန်တာဖြစ်တဲ့အတွက် သူ့မှာ ဘာလက်နက်ခဲယမ်းမှ မပါလာခဲ့ဘူးလို့လည်း ဆိုထားပြီး၊ ဘယ်နေရာမှာ ပစ်ခတ်ရှင်းလင်းခဲ့တာလည်းဆိုတာကိုတော့ ထည့်သွင်းပြောကြားခဲ့ခြင်းမရှိပါဘူး။

ဒီဇင်ဘာလ ၁၄ ရက်ကလည်း သပိတ်ကျင်းမြို့နယ်အတွင်း စစ်ကောင်စီအထိုင်ချတပ်စွဲထားတဲ့ နေရာတခုကို TBK တောဆင်ရိုင်းပြောက်ကျားတပ်ဖွဲ့က တာဝေးပစ်လက်နက်ကြီးနဲ့ပစ်ခတ်တိုက်ခိုက်ခဲ့ပါသေးတယ်။

မကွေး၊ သြဂုတ် ၂၂၊ ၂၀၂၂။

မကွေးတိုင်း၊ ဆောမြို့၊ အထက ၁ အနီးက နေအိမ်လုံးမှာ သြဂုတ်လ ၂၁ ရက်မနေ့ည ၈ နာရီခန့်က အသက် ၁၃ နှစ်အရွယ်မိန်းကလေး ၁ ဦးအပါအဝင် ဒေသခံ ၆ ဦး သေနတ်နဲ့ ပစ်ခတ်သတ်ဖြတ်ခံခဲ့ရတယ်လို့ ဒေသခံတွေဆီက သိရပါတယ်။

ပစ်ခတ်သတ်ဖြတ်ခံရတဲ့နေအိမ်ဟာ ဦးခင်မောင်လင်းဆိုသူရဲ့နေအိမ်ဖြစ်ပြီး အမည်မသိလက်နက်ကိုင်လူတစုက ဝင်ရောက်ပစ်ခတ်ခဲ့လို့ ၎င်းအပါအဝင် နေအိမ်အတွင်းမှာရှိတဲ့ သူရဲ့မိသားစုဝင်တွေထဲက ဇနီးဖြစ်သူ ဒေါ်ယဥ်ငွေ၊ ချွေးမဖြစ်သူ ဒေါ်ခင်မာသက်၊ အသက် ၁၃ နှစ်အရွယ် မြေးဖြစ်သူ မသက်အေးငြိမ်း၊ ညီဖြစ်သူ ဦးဇော်ဌေးတို့နဲ့ TV လာကြည့်တဲ့ ဧည်သည့်တွေဖြစ်တဲ့ ဦးအောင်သိန်းဝင်းတို့ ၆ ဦးသေဆုံးခဲ့ပြီး တခြားဒေသခံ ၂ ဦးဒဏ်ရာရရှိခဲ့တယ်လို့ ဒေသခံတဦးကပြောပါတယ်။

“ည ၈ နာရီလောက်ကြီး ဝင်ပစ်သွားတာ။ သေသွားတာက ဦးခင်မောင်လင်းရယ်၊ သူ့မိန်းမ၊ သူ့ညီ၊ သူ့ချွေးမ၊ သူ့မြေးမလေးရယ် ကလေးမလေးက ၁၃ နှစ်ဘဲရှိသေးတယ်။ နောက်တယောက်က သူတို့အိမ်ကို TV လာကြည့်တဲ့တယောက်။ အားလုံး ၆ ယောက်သေတယ် ဘေးအိမ်အနီးအနားက ၂ ယောက်ဒဏ် ရာရတယ်” ဆောမြို့ခံတဦးက မြေလတ်အသံကို ပြောပါတယ်။

ဦးခင်မောင်လင်းဟာ အုတ်သဲကျောက်ရောင်းဝယ်ရေးလုပ်ကိုင်သူဖြစ်ပြီး စစ်တပ်သတင်းပေး ၁ ဦးလို့စွပ်စွဲကာ မိသားစုလိုက်ပစ်ခတ်သွားခြင်းဖြစ်တယ်လို့ ဆောမြို့နယ်ပြည်သူ့အုပ်ချုပ်ရေးအဖွဲ့တာဝန်ခံက မြေလတ်အသံကို ပြောပါတယ်။

“အခုကအခြေအနေတွေကရှုပ်ထွေးနေတယ်။ အဲ့ဒီဖြစ်စဥ်ကို စုံစမ်းနေတုန်းဘဲ ရှိသေးတယ်။ မျက်မြင်တွေ့သူတွေပြောကြားချက်အရ ဆော PDF အဖွဲ့တခုဖြစ်တယ်လို့ သိရတယ်။ ဒီကျနော်တို့တပ်ဖွဲ့ဝင်တွေကို ဒလန်ရှင်းမယ်ဆိုရင်တောင် ဒလန်လို့ကျော်ဇောနေရင်တောင် ဘယ်အရာတွေလုပ်ဆောင်လို့ ဒလန်လို့သတ်မှတ်တာလဲဆိုတာတွေ အသေးစိတ်စုံစမ်းပြီးမှ ရှင်းလင်းတာတွေလုပ်ဆောင်ဖို့ မှာကြားထားပြီးသားဖြစ်တယ်။ အခုက သူကဒလန်လည်းမဟုတ်ဘူး။ နောက်ပြီးတော့မိသားစုဝင် ခလေးတွေပါအကုန်သတ်သွားပြီး ပစ္စည်းယူသွားတာ” လို့ ဆောမြို့နယ်ပြည်သူ့အုပ် ချုပ်ရေးအဖွဲ့တာဝန်ခံက ပြောပါတယ်။

ဒါ့အပြင် လာရောက်ပစ်ခတ်သွားသူတွေဟာ ကား ၂ စီး၊ ရွှေထည်၊ ငွေသားနဲ့ အခြားအဖိုးတန်ပစ္စည်းတွေကိုလည်း ယူဆောင်ထွက်ပြေးသွားတယ်လို့ ဒေသခံတွေဆီက သိရပါတယ်။

ဒီဖြစ်စဥ်နဲ့ပတ်သက်လို့ YDF(Saw) အဖွဲ့ဝင်တွေက ဒလန်အကြောင်းပြပစ်ခတ်သတ်ဖြတ်ခဲ့တာဖြစ်ပြီး၊ ဒီလုပ်ဆောင်မှုကိုရှုတ်ချတယ်လို့ ဆောမြို့နယ်ပြည်သူ့အုပ်ချုပ်ရေးအဖွဲ့၊ လောင်းရှည်ဒေသပြည်သူ့ကာကွယ်ရေးတပ်ဖွဲ့-LSRPDF၊ ဆောပြည်သူ့ကာကွယ်ရေးတပ်ဖွဲ့ (PDF Saw)၊ The Youth Force (Saw&Kyaukhtu)၊ ကျောက်ထုဒေသပြည်သူ့ကာကွယ်ရေးတပ်ဖွဲ့ (KTU Region)နဲ့ ကိုရီးယားရောက်ယောသူ၊ ယောသားများအဖွဲ့စတဲ့ ဒေသတွင်း PDF တွေနဲ့ တော်လှန်ရေးအင်အားစုတွေဘက်က ထုတ်ပြန်ထားပါတယ်။

ဒေသတွင်း PDF တွေရဲ့ YDF(Saw)အပေါ် ပူးပေါင်းထုတ်ပြန်ချက်နဲ့ပတ်သက်လို့ မြေလတ်အသံအနေနဲ့ YDF(Saw) အဖွဲ့ထံ အဆက်မပြတ်ဆက်သွယ်ခဲ့ပေမယ့် ဒီညနေပိုင်းအထိ ဆက်သွယ်လို့မရခဲ့ပါဘူး။

မြေလတ်အသံ၊ ဇွန် ၂၈၊ ၂၀၂၂။

ရှမ်းပြည်နယ်မြောက်ပိုင်း၊ တန့်ယန်းမြို့မှာ မနေ့ကည (၈) နာရီကျော်ခန့်က မန်ပန်ဌာနေပြည်သူ့စစ်အဖွဲ့ဝင်တဦး သေနတ်နဲ့အပစ်ခံရပြီး အခင်းဖြစ်နေရာမှာပဲ ပွဲချင်းပြီး သေဆုံးသွားတယ်လို့ သိရပါတယ်။

“ညရှစ်နာရီကျော်လောက်က သေနတ်သံတချက်ကြားလိုက်တယ်။ ဘယ်သူဘယ်အဖွဲ့က ပစ်တာလဲဆိုတာတော့ မသိဘူး။ သူ့အိမ်ထဲအထိကားနဲ့ဝင်လာပြီး ‌ပစ်သွားပုံအရဆိုရင် ဓာတ်သိ‌တွေထဲကလို့ပဲထင်ရတယ်။ ငွေရေးကြေးရေးစီးပွားရေးကြောင့်လား၊ ရန်ငြိုးရန်စကြောင့်လားဆိုတာတော့ မပြောတတ်ဘူး” လို့ ရပ်ကွက်နီးချင်းနေထိုင်သူတဦးက ပြောပါတယ်။

အပစ်ခံရပြီးသေဆုံးသူမှာ တန်းယန့်မြို့၊ ရပ်ကွက်(၂)မှာနေထိုင်တဲ့ သက်လတ်ပိုင်းအရွယ် အားချန် ဆိုသူဖြစ်ပြီး၊ မန်ပန်ပြည်သူ့စစ်အဖွဲ့ထဲကို အမည်ခံဝင်ရောက်ထားသူဖြစ်ပြီး၊ မှောင်ခိုလုပ်ငန်းများလုပ်ကိုင်ခြင်း၊ ကျေးရွာလူထုအပေါ် လက်နက်အားကိုးဖြင့်ခြိမ်း ခြောက်အနိုင်ကျင့်တာတွေ မကြာခဏပြုလုပ်လေ့ရှိသူဖြစ်တယ်လို့ ဒေသခံတွေက ပြောပါတယ်။

မန်ပန်ဌာနေပြည်သူ့စစ်အဖွဲ့ဆိုတာ ဘိန်းဘုရင်ခွန်ဆာ(MTA)အဖွဲ့ လက်နက်ချပြီး ၁၉၉၆ ခုနှစ်နောက်ပိုင်း သကဆဖ(သောင်းကျန်းသူဆန့်ကျင်‌ရေးအဖွဲ့)အဖြစ် ပြန်လည်ဖွဲ့စည်းထားခဲ့တဲ့ ခွန်ဆာတပည့်လက်ကျန်အဖွဲ့ဖြစ်ကာ ဦးစိုင်းမွန်းနဲ့ သားဖြစ်သူက လက်ရှိအချိန်ထိ အုပ်ချုပ်ထားပြီး၊ အဲဒီအဖွဲ့ဟာ စစ်ကောင်စီ နယ်မြေခံတပ်ရင်းတွေရဲ့ ထိန်းချုပ်ကြီးကြပ်မှု‌အောက်မှာ လက်ဝေခံအဖြစ်နေထိုင်ရပေမယ့် မှောင်ခိုလုပ်ငန်းတွေကို စိတ်ကြိုက်လုပ်ကိုင်ခွင့်ရတဲ့အပြင် ကျေးရွာနေလူထုတွေအပေါ် လယ်ယာမြေတွေမတရား သိမ်းဆည်းတာတွေ၊ ဆက်ကြေးကောက်ခံတာတွေနဲ့ စစ်သားစုဆောင်းရေးအလုပ်တွေကို မကြာခဏပြုလုပ်လေ့ရှိလို့ မြို့ပေါ်ကျေးရွာမကျန် အာဏာအင်အားကြီးတဲ့အဖွဲ့ဖြစ်တယ်လို့ သိရပါတယ်။

ပဲခူး၊ ဇွန် ၁၁၊ ၂၀၂၂။

ပဲခူးတိုင်းအနောက်ခြမ်း၊ ပြည်မြို့မှာ စစ်ကောင်စီက ကျောင်းစောင့်ရာထူးအတွက် ဝန်ထမ်းခေါ်ခဲ့ပြီး လာလျှောက်သူကို စစ်ယူနီဖောင်းဝတ်စေပြီး ကျည်မပါတဲ့ သေနတ်ကိုင်ခိုင်းကာ လုံခြုံရေးတာဝန်ကို ပေးထားတယ်လို့ ဒေသခံတွေ ဆီကသိရပါတယ်။

တလ ၃သိန်းနဲ့ ကျောင်းစောင့်လုပ်ရမယ်ဆိုတဲ့ အချက်နဲ့ ဝန်ထမ်းခေါ်ခဲ့တာကြောင့် အလုပ်လျှောက်ခဲ့ပြီး အလုပ်ဝင်ဝင်ချင်းမှာပဲ ယူနီးဖောင်းဝတ်ခိုင်းပြီး ပြည်မြို့ အမှတ် ၅ ကျောင်း အလယ်ပေါက်မှာ လုံခြုံရေးဂိတ်စောင့် လုပ်နေရတာဖြစ်တယ်လို့ ဒေသခံတဦးက ပြောပါတယ်။

” အဲ့ဒီလို မလုပ်ပါရစေနဲ့ ပိုက်ဆံလည်း မပေးပါနဲ့တော့၊ တောင်းပန်ပြီး ထွက်ခွင့်တောင်းတာ မရဘူး၊ တလပြည့်အောင် လုပ်ရမယ် ရှေ့တန်းခေါ်ရင်လည်း လိုက်ရမယ်လို့ ပြောတယ်” လို့ ပြည်မြို့က ဒေသခံတဦးက ပြောပါတယ်။

ပြည်မြို့ အမှတ်၅ ကျောင်းရှေ့လမ်းကို စစ်ကောင်စီက ဖြတ်သန်းသွားလာခွင့်ပိတ်ထားတာဖြစ်ပေမယ့် ကျောင်းကြိုပို့ လုပ်နေတဲ့ မိဘတွေကတော့ အလယ်ပေါက်မှာ ယူနီဖောင်းနဲ့ စောင့်နေတာကို မြင်ရတယ်လို့ လည်း ပြောပါတယ်။

အဲ့ဒီလိုစောင့်နေတဲ့ ယူနီဖောင်းနဲ့ လုံခြုံရေးဝန်ထမ်းကို တွေ့တာ တပတ်ကျော်လောက်သာ ရှိသေးပြီး အရင်က အဲ့လိုစောင့်တာမျိုး မရှိဘူးလို့ နောက်ထပ် ‌ဒေသခံအမျိုးသမီးတဦးက ပြောပါတယ်။

” ဟုတ်တယ် စစ်ဝတ်စုံနဲ့ အဝမှာတွေ့တယ် တပတ်အတွင်းလောက်ပေါ့၊ အရင်ကဆို လမ်းထိပ်က ဂိတ်မှာပဲ တွေ့တာ”လို့ ပြောပါတယ်။

အဲ့ဒီလို ဝန်ထမ်း ဘယ်နှစ်ယောက်ရှိနေတယ်ဆိုတာနဲ့ အမှတ်၅ ကျောင်းအပြင် ပြည်မြို့က ဘယ်ကျောင်းတွေမှာ အခုလိုမျိုး ကျောင်းစောင့်ခေါပြီး လုံခြုံရေးတာဝန်ကို ပေးထားသေးလဲဆိုတာကိုတော့ မြေလတ်အသံအနေနဲ့ အတည်ပြုနိုင်ဖို့ စုံစမ်းနေဆဲဖြစ်ပါတယ်။

မြေလတ်အသံ၊‌ မတ် ၃၀၊ ၂၀၂၂။

ပုသိမ်-မုံရွာလမ်းအတိုင်း တက်လာတဲ့ စစ်ကောင်စီကား ၆စီးဟာ မကွေးတိုင်း ငဖဲမြို့နယ် ပဒါန်းကျေးရွာအရောက်မှာ လမ်းဘေးတလျှောက်လူနေအိမ်တွေကို ကားပေါ်က ရမ်းသမ်းပစ်ခတ်သွားလို့ ပြည်သူ ၃ဦး သေနတ်ထိမှန်ပြီး ဆေးကုသနေရပါတယ်။

မင်းဘူးမြို့နယ် ပန်းတောင်းကျေးရွာဘက်ကနေ ရခိုင်ပြည်နယ် အမ်းဘက်ကို သွားတဲ့ အဲ့ဒီစစ်ကောင်စီ ကားတွေဟာ မတ်လ ၂၈ရက် က ပဒါန်းကျေးရွာကို ဖြတ်သွားချိန် ကားမောင်းနေရင်းပဲ ပစ်ခတ်သွားခဲ့တာဖြစ်တယ်လို့ ဒေသခံတဦးက ပြောပါတယ်။

” အဲ့ဒီပစ်ခတ်မှုကြောင့် ငဖဲမြို့နယ် ကုန်းသာရွာက စျေးလာဝယ်တဲ့ ပြည်သူ အမျိုးသား ၂ဦးနဲ့ ပဒါန်းက အမျိုးသမီး ၁ဦး စုစုပေါင်း ၃ဦးမှာ အမျိုးသား ၂ဦးက ခြေသလုံး ကျည်ထိတယ် အမျိုးသမီးကတော့ ခြေဖနောင့်ထိပြီး မင်းဘူးဆေးရုံကို လွှဲလိုက်ပြီး ဆေးဝါးကုသနေရတယ်၊ ပဒါန်းမှာ ရှိမရှိမသိရဘူး “ လို့ ဒေသခံတဦးက ပြောပါတယ်။

ပစ်ခတ်မှုကြောင့် လူ၃ဦး သေနတ်ထိမှန်တာအပြင် လမ်းဘေးတောက်‌လျှောက်က လူနေအိမ်တွေနဲ့ ဆိုင်တွေ ထိခိုက်ပျက်စီးတာတွေလည်း ရှိခဲ့ပါတယ်။

“ပဒါန်း နပခ( အနောက်ပိုင်းတိုင်းစစ်ဌာနချုပ် ကြားစခန်း) နားတစ်ဝိုက်နဲ့ လမ်းဆုံမီးပွိုင့် ယာဉ်ထိန်းရုံးလည်းကိုမှန်တယ် ပြီးတော့ သဇင်တည်းခိုခန်းခြေရင်း အပျိူကြီးဈေးဆိုင် က မှန်ဘီရိုမှန်တယ်မှန်ကွဲတယ် ရေခဲသေတ္တာ မှန်တယ်” လို့ ပြောပါတယ်။

မင်းဘူးမြို့နယ် ပန်းတောင်းကျေးရွာနဲ့ ငဖဲမြို့နယ် ပဒါန်းကျေးရွာကြားထဲမှာ အဲ့ဒီစစ်ကောင်စီ ကား ၆စီး မိုင်းဆွဲခံရတယ်လို့ သတင်းရရှိထားပြီး အဲ့ဒီကိစ္စကြောင့် ပဒါန်းကျေးရွာကို ဖြတ်သွားချိန်မှာ ပစ်ခတ်သွားတာဖြစ်နိုင်တယ်လို့ အဲ့ဒီဒေသခံကပဲ ပြောပါတယ်။