အုတ်ဖို၊ စက်တင်ဘာ ၈၊ ၂၀၂၅။

ပဲခူးတိုင်း၊ အုတ်ဖိုမြို့နယ်၊ စစ်တောကျေးရွာမှာ ရာအိမ်မှူးတဦး ပစ်ခတ်ခံရလို့ သေဆုံးခဲ့တယ်လို့ သာယာဝတီခရိုင် အမှတ် ၁ တပ်ရင်း (၃၈၀၁)၊ တပ်ခွဲ ၅၊ ကြို့ပင်ကောက် HERO ပြောက်ကျားတပ်ဖွဲ့ဆီက သိရပါတယ်။

ပစ်သတ်ခံရသူက စစ်တောကျေးရွာရာအိမ်မှူး အသက် ၅၀ ကျော်အရွယ် ဦးသန်းစိုးဖြစ်ပြီး စက်တင်ဘာ ၇ ရက် မနက် ၁၁ နာရီခွဲမှာ သူ့နေအိမ်ကနေ လယ်တဲကိုဘေးတွဲဆိုင်ကယ်နဲ့အလာမှာ တော်လှန်ရေးတပ်ဖွဲ့ဝင်တွေက လမ်းမှာစောင့်ပြီး ပစ်ခတ်ခဲ့တာလို့ဆိုပါတယ်။

“သူအိမ်နဲ့လယ်က တမိုင်လောက်ကွာတယ်။ သူကဆိုင်ကယ်နဲ့စီးလာတဲ့ အချိန် လမ်းမှာစောင့်ဆိုင်းပစ်ခတ်ခဲ့တာ။ ဦးခေါင်းကို တချက်၊ ရင်ဘတ်ကို နှစ်ချက်ပစ်ခဲ့လိုက်တာ”လို့ သာယာဝတီခရိုင် အမှတ် ၁ တပ်ရင်း(၃၈၀၁)၊ တပ်ခွဲ ၅၊ ကြို့ပင်ကောက် HERO ပြောက်ကျားတပ်ဖွဲ့ တာဝန်ခံမိုးသီးက ပြောပါတယ်။

ပစ်ခတ်ခံရလို့ ရာအိမ်မှူး ဦးသန်းစိုးဟာ နေရာမှာတင်သေဆုံးသွားပြီး သူ့ဆီမှာ ဗုံးသီး ၁ လုံး၊ ပစ္စတိုသေနတ် ၁ လက်ရှိတယ်လို့သတင်းရထားပေမယ့် ပစ်ခတ်ချိန်က လမ်းမှာဖြစ်နေတာကြောင့် အဆိုပါ ပစ္စည်းတွေတော့ သိမ်းဆည်းရမိတာမရှိဘူးလို့ဆိုပါတယ်။

ပစ်ခတ်မှုဖြစ်ပြီးနောက်ပိုင်း ညနေပိုင်းလောက်မှာ စစ်ကော်မရှင်အဖွဲ့တွေကျေးရွာထဲကို ရောက်လာပြီး ရာအိမ်မှူး ဦးသန်းစိုးနေအိမ်က လက်နက်တွေကိုပြန်သိမ်းသွားတာလို့သိရကြောင်း တာဝန်ခံမိုးသီးက ပြောပါတယ်။

ရာအိမ်မှူး ဦးသန်းစိုးဟာ ကျေးရွာထဲမှာ စစ်မှုထမ်းကြေးကို ဦးဆောင်လိုက်ကောက်နေပြီး ဒေသကာကွယ်ရေးအဖွဲ့တွေရဲ့ သတင်းကိုလိုက်လံစုံစမ်းနေသူဖြစ်တာကြောင့် ပစ်ခတ်ရှင်းလင်းရတာဖြစ်တယ်လို့ ကိုမိုးသီးကဆက်ပြောပါတယ်။

ပြီးခဲ့တဲ့စက်တင်ဘာ ၅ ရက် ည ၆ နာရီကျော်မှာလည်း အုတ်ဖိုမြို့နယ်၊ ဖလန်ပင်ကျေးရွာမှာ နေထိုင်တဲ့ စစ်တပ်သတင်းပေး အသက် ၅၇ အရွယ် ဦးမြင့်ရွှေဆိုသူ ပစ်သတ်ခံခဲ့ရပါသေးတယ်။

စာတည်း – လင်း

အုတ်တွင်း၊ ဩဂုတ် ၂၅၊ ၂၀၂၅။

ပဲခူးတိုင်း၊ အုတ်တွင်းမြို့နယ်၊ ဂုံမင်းတာကျေးရွာအနီးမှာ ဆီဘောက်ဆာကားကို လက်နက်ကိုင်အဖွဲ့တွေက ရထားလမ်းပေါ်တင် မီးရှို့ပြီး ရာအိမ်မှူး ၁ ဦးလည်း ပစ်သတ်ခံရတယ်လို့ ဒေသခံတွေဆီက သိရပါတယ်။

ဩဂုတ် ၂၃ ရက်မနက် ၃ နာရီကျော်မှာ လက်နက်ကိုင်အဖွဲ့ ၁ ဖွဲ့က စည်ပင်သာကျေးရွာအနီးရပ်ထားတဲ့ ဆီဘောက်ဆာကား ၁ စီးကို မောင်းနှင်လာပြီး စည်ပင်သာနဲ့ ဂုံမင်းတာကျေးရွာကြား ရန်ကုန်-မန္တလေး ရထားလမ်းပေါ်ကိုတင်ကာ မီးရှို့ပြီးနောက် မနက် ၅ နာရီခန့်မှာ ဂုံမင်းတာရွာထဲက အသက် ၄၃ နှစ်အရွယ် ရာအိမ်မှူး ဦးချစ်အောင် (ခ) မျိုးကိုကို ကို ပစ်သတ်သွားခဲ့တယ်လို့ဆိုပါတယ်။

“စည်ပင်သာယာရွာနားမှာ ကားကြီးသမားတွေထမင်းစားညအိပ်ကြတဲ့ ထမင်းဆိုင်တွေရှိတယ်။ အဲ့ကနေ့ အရှေ့ဘက်ကို ချိုးချလိုက်ရင် ရထားသံလမ်းဘဲ။ ရထားသံလမ်းအလယ်မှာရှို့သွားတာ။ အဲ့ဒါဖြစ်ပြီး သူတို့(စကစ)ဘက်က ရှင်းနေတဲ့အချိန် ရွာထဲသေနတ်သံကြားတာဘဲ”လို့ ဖြစ်စဥ်ကို သိထားတဲ့ဒေသခံကပြောပါတယ်။

ရာအိမ်မှူး ဦးချစ်အောင် (ခ) မျိုးကိုကိုကတော့ သူပိုင်ကြက်ခြံအနီး လမ်းပေါ်မှာ လက်နက်ကိုင်အဖွဲ့က ပစ်သတ်သွားတာဖြစ်ပြီး ဦးခေါင်းပွင့်ထွက်ဒဏ်ရာနဲ့နေရာမှာတင်သေဆုံးသွားတာလို့ ဆိုပါတယ်။

သေဆုံးသူ ရာအိမ်မှူးဟာ ကျေးရွာအုပ်ချုပ်ရေးမှူးက ကျေးရွာကနေ ထွက်ပြေးတိမ်းရှောင်နေတာကြောင့် သူကယာယီအုပ်ချုပ်ရေးမှူးလုပ်နေသူဖြစ်တယ်လို့ သိရပါတယ်။

အဆိုပါ ကားမီးရှို့မှုနဲ့ ရာအိမ်မှူးကို ပစ်သတ်သွားတာက ဘယ်အဖွဲ့တွေကပြုလုပ်တယ်ဆိုတာ ဩဂုတ် ၂၅ ရက်အထိ သက်ဆိုင်ရာအဖွဲ့တွေဘက်က သတင်းထုတ်ပြန်တာမျိုးမရှိသေးပါဘူး။

စာတည်း – လင်း

ညောင်ဦး၊ ဇွန် ၁၀၊ ၂၀၂၅။

မန္တလေးတိုင်း၊ ညောင်ဦးမြို့နယ်၊ ဒဟတ်ကန်ကျေးရွာမှာ ကျေးရွာရာအိမ်မှူး ၁ ဦးနဲ့ ကြံ့ခိုင်ရေးပါတီဝင် ၂ ဦး သေနတ်နဲ့ပစ်သတ်ခံခဲ့ရတယ်လို့ ဒေသကာကွယ်ရေးအဖွဲ့ဝင်တွေထံက သိရပါတယ်။

ပစ်သတ်ခံရသူတွေက ဒဟတ်ကန်ကျေးရွာ ရာအိမ်မှူး အသက် ၅၈ နှစ်အရွယ် ဦးတင်စိုး၊ အဆိုပါကျေးရွာနေ ရပ်ကျေးကြံ့ခိုင်ရေးပါတီဝင်တွေဖြစ်တဲ့ ၅၂ နှစ်အရွယ် ဦးဝင်းနိုင်၊ ၃၃ နှစ်အရွယ် ဦးချမ်းသာတို့ဖြစ်ပြီး ဇွန် ၉ ရက် ယမန်နေ့မနက် ၉ နာရီကျော်မှာ နေအိမ်တွေမှာရှိနေချိန် ပစ်သတ်ခံရတာလို့ ဆိုပါတယ်။

” အဲ့ဘက်ခြမ်းမှာ စခန်းတွေဝင်စီးခံရတာကော သေနတ်တွေ ဆုံးရှုံးခံရတာတွေအရင်ကရှိခဲ့တယ်။ ခုဟာ အရင်ကတိုင်တဲ့ ဒလန်တွေ၊ ပျုတွေကို ရှင်းတာလို့တော့ သိရတယ်”လို့ ဒေသအခြေစိုက်ကာကွယ်ရေးအဖွဲ့တာဝန်ရှိသူတဦးက မြေလတ်အသံကို ပြောပါတယ်။

သေနတ်နဲ့ပစ်ခံရတာတွေကြောင့် ရာအိမ်မှူးနဲ့ကြံ့ခိုင်ရေးပါတီဝင် ၂ ဦးတို့မှာ ဦးခေါင်းနဲ့ရင်ဘတ်တွေမှာ ကျည်ထိဒဏ်ရာတွေနဲ့နေရာမှာပဲ သေဆုံးသွားကြတယ်လို့ သိရပါတယ်။

အဆိုပါ ပစ်ခတ်မှုနဲ့ပတ်သက်ပြီး ညောင်ဦးမြို့နယ်ပကဖတာဝန်ခံထံ မြေလတ်အသံက ဆက်သွယ်ခဲ့ရာ ၎င်းမှာ ခရီးထွက်နေတာကြောင့် အခြေအနေကို မသိရှိသေးဘူးလို့ ဆိုပါတယ်။

စစ်ကောင်စီထောက်ခံတယ်လီဂရမ်တွေမှာတော့ ရာအိမ်မှူးနဲ့ကြံ့ခိုင်ရေးပါတီဝင်တွေကို PDF ၈ ဦးက လာရောက်ပစ်သတ်ခဲ့လို့ သေဆုံးခဲ့ရပြီး ဦးဝင်းနိုင်ပိုင်ဆိုင်တဲ့ ကား ၂ စီးကိုလည်း ယူဆောင်သွားကြတယ်လို့ ရေးသားဖော်ပြထားကြပါတယ်။

ဇွန် ၁ ရက်ကလည်း ညောင်ဦးမြို့နယ်၊ ပုဂံမြို့သစ်၊ ဂန့်ဂါရပ်ကွက် ဇရပ်မှာရှိနေတဲ့ အုပ်ချုပ်ရေးမှူးအဖွဲ့ကို ထနောင်းမြေစစ်ကြောင်းအဖွဲ့ဝင်တွေက ဝင်ရောက်ပစ်ခတ်ခဲ့လို့ အုပ်ချုပ်ရေးမှူးအပါအဝင် ၈ ဦး သေဆုံးခဲ့ပြီး လက်နက်အချို့ သိမ်းဆည်းရမိခဲ့တယ်လို့ သိရပါတယ်။

စာတည်း – ဟိန်းစံ

အုတ်ဖို၊ ဇွန် ၃ ၊၂၀၂၅။

ပဲခူးတိုင်း၊ အုတ်ဖိုမြို့နယ်မှာ စစ်ကောင်စီလက်အောက် ရာအိမ်မှူး ၁ ဦး သေနတ်ပစ်ခံရပြီး သေဆုံးခဲ့တယ်လို့ သာယာဝတီခရိုင် တပ်ရင်း ၃၈၀၂ တပ်ခွဲ ၄ ထံက သိရပါတယ်။

သေဆုံးသူဟာ ထန်းပင်ကုန်းကျေးရွာနေ ရာအိမ်မှူး အောင်မိုးခိုင် ၅၂ နှစ် ဖြစ်ပြီး ချောင်းခွ(ကေ)ရွာနဲ့ သရက်နှစ်ဖျားလိန်ရွာကြားလမ်းပေါ်မှာ ဇွန် ၁ ရက်ညနေ ၆ နာရီကျော်က သေနတ်နဲ့ပစ်ခတ်ခံခဲ့ရတာလို့ ဆိုပါတယ်။

” ကျနော်တို့ရဲဘော်တွေ ကင်းပုန်း၀ပ်နေတဲ့အချိန်ဗျ။ သူလာမယ်ဆိုလို့ ကင်းပုန်း၀ပ်ပြီး စောင့်နေတာ၊ အောင်မိုးခိုင်တယောက်တည်းလာတာပါ။ ကျနော်တို့ကိုမြင်တော့ သူကအရင် လက်ပစ်ဗုံးနဲ့ စပစ်တာ၊ လက်ပစ်ဗုံးကကွဲတယ်ဗျ။ ကျနော်တို့ဘက်တော့မရောက်ဘူး၊ နေရာလွဲသွားတယ်” လို့ သာယာဝတီခရိုင်တပ်ရင်း ၃၈၀၂ တပ်ခွဲ ၄ မှ ပြန်ကြားရေးတာဝန်ခံက ပြောပါတယ်။

သေဆုံးသူရာအိမ်မှူးမှာ တိမ်မြုပ်ကျေးရွာအခြေစိုက် ခမရ ၆ တပ်ရင်းမှ ဆေးတပ်သားဟောင်းဖြစ်ပြီး စစ်အာဏာသိမ်းပြီးနောက် စစ်ကောင်စီလက်အောက်အုပ်ချုပ်ရေးအဖွဲ့ဝင်သတင်းပေးလုပ်ဆောင်ကာ လက်ပစ်ဗုံးကိုင်ဆောင်ထားသူဖြစ်တယ်လို့ သိရပါတယ်။

ရာအိမ်မှူး အောင်မိုးခိုင်ဟာ တော်လှန်ရေးတပ်ဖွဲ့တွေရဲ့အချက်အလက်တွေ စုံစမ်းထောက်လှမ်းတာ၊ ပြည်သူတွေထံ စစ်မှုထမ်းကြေးခြိမ်းခြောက်ကောက်ခံတာ၊ စစ်ကောင်စီတပ်ဖွဲ့တွေနဲ့အတူ လူငယ်တွေကို ပေါ်တာဆွဲဖမ်းဆီးတာ၊ စစ်ကောင်စီစစ်ကြောင်းတွေမှာ လမ်းပြလုပ်ဆောင်နေသူဖြစ်တယ်လို့ ဆိုပါတယ်။

အောင်မိုးခိုင် အသတ်ခံရပြီးနောက် ရုပ်အလောင်းကို ခမရ ၆ တပ်ရင်းမှ စစ်ကောင်စီတပ်ဖွဲ့ဝင်တွေက ကားတစီးနဲ့လာရောက် ကောက်ယူသွားတယ်လို့ သိရပါတယ်။

စာတည်း – ဟိန်းစံ

လက်ပံတန်း၊ မေ ၂၈၊ ၂၀၂၅။

ပဲခူးတိုင်း၊ လက်ပံတန်းမြို့နယ်၊ ပုတိမ်စုကျေးရွာက ပျူစောထီးခေါင်းဆောင် ရာအိမ်မှူးဖြစ်သူကို မေ ၂၇ ရက်နေ့လယ် ၁ နာရီကျော်မှာ ပစ်ခတ်ရာသေဆုံးခဲ့တယ်လို့ သာယာဝတီခရိုင် တပ်ရင်း ၃၈ဝ၂ တပ်ခွဲ ၂ ကပြောပါတယ်။

အသက် ၄၂ အရွယ် ရာအိမ်မှူးထွန်းထွန်းကို ရွာသစ်ကျေးရွာအနီးရှိ အင်အား ၃၀ ခန့်ရှိတဲ့ ရဲကင်းစခန်းကနေ ပုတိမ်စုကျေးရွာကိုခြေလျင်ပြန်လာချိန်လမ်းမှာ ပစ်ခတ်ခဲ့တာလို့ဆိုပါတယ်။

“စခန်းကနေ သူ့(ထွန်းထွန်း)ရွာကို ထွက်လာတဲ့လမ်းမှာပေါ့။ သူ့ကိုပစ်ခတ်တဲ့နေရာကစခန်းနဲ့ဆို တမိုင် အကွာရှိတယ်။ ဦးခေါင်းကို ၃ ချက်ပစ်ခဲ့တယ်။ သူကစခန်းကို သွားလိုက်ပြန်လိုက်လုပ်နေတာ။ ပြည်သူကိုလည်း ခြိမ်းခြောက်လိုက်ပေါ့”လို့ သာယာဝတီခရိုင် တပ်ရင်း ၃၈ဝ၂ တပ်ခွဲ ၂ မှ တာဝန်ရှိသူတဦးကပြောပါတယ်။

သူဟာ ပြီးခဲ့တဲ့ ၂၀၂၁ ကစတင်ပြီး ပျူစောထီးခေါင်းဆောင် နဲ့ ရာအိမ်မှူးအဖြစ် တာဝန်ယူလုပ်ဆောင်နေတာဖြစ်ပြီး ပစ်ခတ်ပြီးချိန် လက်ကိုင်ဖုန်းတလုံးကို သိမ်းဆည်းရရှိခဲ့တယ်လို့ သူကဆိုပါတယ်။

အလားတူ မေ ၂၇ ရက်ကလည်း လက်ပံတန်းမြို့နယ်၊ မြေစီးကျေးရွာက စစ်ကောင်စီခန့် အုပ်ချုပ်ရေးမှူးချစ်လင်းကို ရွှေတန်းမြေပြည်သူ့ကာကွယ်ရေးတပ်ဖွဲ့က ပစ်ခတ်ရာ သေဆုံးခဲ့တယ်လို့ သိရပါတယ်။

စာတည်း – လင်း

လက်ပံတန်း၊ မေ ၂၁၊ ၂၀၂၅။

ပဲခူးတိုင်း၊ လက်ပံတန်းမြို့နယ်၊ သိုက်ဝါးချောင်းရွာက စစ်ကောင်စီတပ်သတင်းပေး ရာအိမ်မှူး ၁ ဦးကို မေ ၂၁ ရက်မနက် ၁၁ နာရီကျော်မှာ ပစ်ခတ်ရှင်းလင်းခဲ့တယ်လို့ ရွှေတန်းမြေပြည်သူ့ကာကွယ်ရေးအဖွဲ့က ထုတ်ပြန်ပါတယ်။

ပစ်ခတ်ခံရသူဟာ အသက် ၆၀ အရွယ် ဦးအုန်းသန်းဖြစ်ပြီး ကျေးရွာရှိ ဂျင်လောင်းကစားဝိုင်းမှာ ရှိနေချိန် သေနတ်နဲ့ ၂ ချက်ပစ်ခတ်ခဲ့တာလို့ ဆိုပါတယ်။

“လူအင်အား ၅၀ ကျော်ခန့်ရှိတဲ့ ဂျင်ဝိုင်းပါ။ ပြန်လည်မခုခံနိုင်ခဲ့ပါဘူး။ လူအုပ်ထဲမှာပဲ 9mm အတိုနဲ့ နားထင်တချက်၊ ရင်ဝတချက်ပစ်ခတ်ခဲ့တာ”လို့ သာယာဝတီခရိုင်ပကဖ၊ အမှတ်(၁) တိုက်ခိုက်ရေးတပ်ဖွဲ့၊ ရွှေတန်းမြေပြည်သူ့ကာကွယ်ရေးတပ်ဖွဲ့တာဝန်ခံ ကပြောပါတယ်။

ဦးအုန်းသန်းဟာ ၂၀၂ ၁ စစ်အာဏာသိမ်းပြီးနောက် ရာအိမ်မှူးဖြစ်လာသူဖြစ်ပြီး ဒေသခံတွေအပေါ် အာဏာပြဆက်ဆံတာ၊ စစ်မှုထမ်းကြေးအဓမ္မကောက်တာ၊ မပေးနိုင်သူတွေကိုဖမ်းဆီးဖို့ စာရင်းပို့တာ၊ လောင်ကစားဝိုင်းတွေကို ကူညီပေးနေသူဖြစ်တယ်လို့ အထက်ပါတာဝန်ခံကဆိုပါတယ်။

သိုက်ဝါးချောင်းကျေးရွာဟာ ရန်ကုန်-ပြည်ကားလမ်းမနံဘေးရှိ စစ်ကောင်စီတပ်ဖွဲ့ဝင်တွေတပ်စွဲထားတဲ့ ဂရံစံပြကျေးရွာနဲ့ မိုင်ဝက်ခန့်ဝေးတဲ့အတွက် ဦးအုန်းသန်းကိုပစ်ခတ်ပြီးနောက် တော်လှန်ရေးတပ်ဖွဲ့ဝင်တွေ ချက်ချင်းပြန်ဆုတ်ခွာလာခဲ့ရတယ်လို့ သူကဆက်ပြောပါတယ်။

ပြီးခဲ့တဲ့ ဖေဖော်ဝါရီ ၂၄ ရက်ကလည်း လက်ပံတန်းမြို့နယ်၊ မှော်အင်းကျေးရွာအုပ်စု စစ်ကောင်စီခန့် အုပ်ချုပ်ရေးမှူး သန်းဦးကို သာယာဝတီခရိုင် တပ်ရင်း ၃၈၀၂ တပ်ခွဲ ၂ နဲ့ တပ်ခွဲ ၃ တပ်ဖွဲ့ဝင်တွေက ပစ်ခတ်ခဲ့သေးတယ်လို့ သိရပါတယ်။

စာတည်း – လင်း

အင်းတကော်၊ မတ် ၆၊ ၂၀၂၅။

ပဲခူးမြို့နယ်၊ အင်းတကော်မြို့၊ ကင်းပိုင်ကျုံရွာနဲ့ ကျောက်တန်းရွာသွား လမ်းမပေါ်မှာ ကင်းပိုင်ကျုံရွာရဲ့ရာအိမ်မှူးကို ပစ်ခတ်ခဲ့တယ်လို့ အင်းတကော်မြို့ ပြည်သူ့ကာကွယ်ရေးတပ်ဖွဲ့ထံက သိရပါတယ်။

သေဆုံးသူဟာ ကင်းပိုင်ကျုံရွာနေ အသက် ၅၈ နှစ်ခန့်ရှိ ရာအိမ်မှူး ဦးကျော်ထူးဆိုသူဖြစ်ပြီး မတ် ၅ ရက် နေ့လယ် ၁၂ နာရီခန့်မှာ ကျောက်တန်းရွာဘက်ကနေ ကင်းပိုင်ကျုံရွာဘက်ကို တဦးတည်းဆိုင်ကယ်နဲ့ပြန်လာချိန် ပစ်ခတ်ရှင်းလင်းခဲ့တာလို့ဆိုပါတယ်။

“သူ စစ်မှုထမ်းကြေးကောက်လို့ နေ့လယ်နားချိန် ပြန်လာတာ။ ခေါင်းကိုပဲ နှစ်ချက်ပစ်ခတ်ခဲ့တယ်။ ဘာမှမသိမ်းခဲ့ရပါဘူး။ လမ်းရှင်းတုန်း အမြန်ပြန်ထွက်ရတာမို့ပါ။” လို့ အင်းတကော်မြို့ ပြည်သူ့ကာကွယ်ရေးတပ်ဖွဲ့ ပြန်ကြားရေးတာဝန်ခံက ပြောပါတယ်။

သေနတ်နဲ့ဦးခေါင်းကိုပစ်ခတ်ခံရလို့ ဦးကျော်ထူးမှာ နေရာမှာတင်သေဆုံးသွားခဲ့ပြီး အင်းတကော်ပကဖအဖွဲ့ဝင်တွေလည်း ချက်ချင်းပြန်ဆုတ်ခဲ့ရတယ်လို့ ဆိုပါတယ်။

ပစ်ခတ်မှုဖြစ်ပွားပြီးနောက် စစ်ကောင်စီအဖွဲ့တွေရောက်လာကာ လမ်းသွားလမ်းလာတွေကိုစစ်ဆေးတာ၊ ကင်းပိုင်ကျုံရွာအနီးဝန်းကျင်မှာ ရှာဖွေတာတွေ ပြုလုပ်ခဲ့ပြီးနောက် ဦးကျော်ထူးရဲ့အလောင်းကိုကောက်ယူသွားတယ်လို့ ဒေသခံတွေရဲ့သတင်းပေးပို့ချက်အရ သိရတယ်လို့ ဆိုပါတယ်။

ရာအိမ်မှူးဦးကျော်ထူးဟာ ကင်းပိုင်ကျုံရွာအုပ်ချုပ်ရေးမှူးရဲ့ အားကိုးရသူတဦးဖြစ်ပြီး ရပ်ရွာအတွင်း စစ်မှုထမ်းဥပဒေအကြောင်းပြကာ စစ်မှုထမ်းကြေးကို ဆင်းရဲချမ်းသာမရွေး မညှာမတာကောက်ခံတာ၊ စစ်ကောင်စီတပ်ဖွဲ့ဝင်တွေနဲ့ ရဲတပ်ဖွဲ့ဝင်တွေကိုဦးဆောင်ပြီး ကင်းလှည့်တာ၊ ကျေးရွာအတွင်း ပြဿနာကြီးငယ်တွေဖြစ်ပေါ်လာပါက စစ်ကောင်စီတပ်ဖွဲ့ဝင်တွေကိုခေါ်ကာ ရှင်းလင်းခိုင်းတာတွေလုပ်ဆောင်နေပြီး ရပ်ရွာနေပြည်သူများက မကျေနပ်လို့လာရောက်တိုင်တန်းပြောလာတာကြောင့် ပစ်ခတ်ရှင်းလင်းခဲ့တာလို့ ဆိုပါတယ်။

၂၀၂၄ ဇူလိုင် ၂၁ ရက်ကလည်း ပဲခူးမြို့နယ်၊ သံစို့ပင်ကျေးရွာအုပ်စု၊ ဝံကိုက်လျှိုကျေးရွာ၊ စလူဆည်အနီးမှာ ကျေးရွာတာဝန်ခံနဲ့ တပည့်ဖြစ်သူတို့ နေအိမ်ကနေဖမ်းဆီး ပစ်သတ်ခံခဲရတယ်လို့ သိရပါတယ်။

စာတည်း – ကိုချမ်း