ရာအိမ်မှူး

ညောင်လေးပင်၊ စက်တင်ဘာ ၅၊ ၂၀၂၆။

ပဲခူးတိုင်း၊ ညောင်လေးပင်မြို့နယ်၊ အောင်းကြီးကျေးရွာနဲ့ ပြွန်တန်ဆာမြို့သွားလမ်းပေါ်မှာ အုပ်ချုပ်ရေးမှူးနဲ့ ရာအိမ်မှူးဆိုသူတို့ ပစ်ခတ်ခံရပြီး သေဆုံးနိုင်တယ်လို့ 9 star UG အဖွဲ့ဆီက သိရပါတယ်။

ပစ်ခတ်ခံရသူတွေဟာ ရေတွင်းကုန်းကျေးရွာ အုပ်ချုပ်ရေးမှူး အသက် ၆၅ နှစ်အရွယ် ဦးစိုးဌေး၊ တပည့်ဖြစ်သူ အောင်းကြီးကျေးရွာနေသူ ရာအိမ်မှူး ပျူစောထီးခေါင်းဆောင် အသက် ၃၀ အရွယ် ကိုကျော် (ခ) အောင်ကျော်မျိုးတို့ဖြစ်ပြီး စက်တင်ဘာ ၄ ရက် နေ့လယ် ၁ နာရီကျော်မှာ ပစ်ခတ်ခဲ့တာလို့ ဆိုပါတယ်။

“ဆိုင်ကယ် နဲ့ မြို့ပေါ်အတတ်ကို နောက်က လိုက်ပစ်တာ။ ဘာကိစ္စ နဲ့ မြို့ပေါ်တတ်တယ်ဆိုတာတော့ မသိဘူး။ ဆိုင်ကယ်က နှစ်ယောက်တစီး စီးပြီးလာတဲ့အချိန် လိုက်ပစ်တော့ ဆိုင်ကယ်လဲသွားတဲ့အချိန် အုပ်ကြီးကိုက ကျောထဲလေးချက် ခြေနှစ်ချောင်းလုံး နှစ်ချက်။ ရာအိမ်မှူးကိုက သုံးချက် ရင်ဘတ်ထဲပဲ ပစ်ထည့်တာ လဲနေလို့ သေပြီဆိုပြီး ထားခဲ့တာ”လို့ 9 star UG အဖွဲ့တာဝန်ရှိသူကပြောပါတယ်။

သေနတ်နဲ့အနီးကပ်ပစ်ခဲ့တာကြောင့် အုပ်ချုပ်ရေးမှုးနဲ့ရာအိမ်မှူးဟာ အဆိုပါနေရာမှာပင် ကျည်ထိဒဏ်ရာတွေနဲ့ ငြိမ်သက်သွားပြီး လမ်းသွားလမ်းလာများတဲ့လမ်းပိုင်းဖြစ်လို့ မည်သည့်ပစ္စည်းမှ မယူလာနိုင်ဘဲ အမြန်ပြန်ထွက်လာရတယ်လို့ ဆိုပါတယ်။

ပစ်ခတ်ခံရတဲ့ အုပ်ချုပ်ရေးမှူးနဲ့ရာအိမ်မှူးကိုတော့ ဒေသခံတွေက ပဲခူးဆေးရုံအထိ သယ်ဆောင်သွားတယ်လို့ သတင်းရထားပြီး သေဆုံးနိုင်ခြေများတယ်လို့ ဆိုပါတယ်။

အုပ်ကြီး စိုးဋ္ဌေးဟာ ရွှေကျင်မြို့နယ်၊ ဒုံစရစ် ခမရ ၅၈၉ တပ်တွင်းသို့ ဆန်၊ ရိက္ခာ၊ ဓာတ်ဆီတို့ကို တာဝန်ယူပို့ဆောင်ပေးခြင်း၊ ကျေးရွာအတွင်း စစ်တပ် အထိုင်ချနေထိုင်နိုင်ရန် စီစဥ်ဆောင်ရွက်ပေးတာ၊ ကျေးရွာနေပြည်သူများအပေါ် စစ်မှုထမ်းကြေး လစဥ်ကောက်ခံတဲ့အပြင် ဒေသအတွင်းပေါ်တာဆွဲကာ ဖမ်းမိပြည်သူတွေကို ငွေနဲ့ပြန်ရွေးယူခိုင်းတာတွေလုပ်တဲ့အပြင် ပျူ ခေါင်းဆောင် ကိုမျိုး(ခ)အောင်ကျော်မျိုးကလည်း ပြည်သူတွေအပေါ် ရိုက်နှက်နှိပ်စက်တာ၊ အနိုင်ကျင့် စော်ကားတာ၊ WY ဆေးပြားတွေရောင်းဝယ်ရာမှာ လိုင်းကြေးယူပြီး ကာကွယ်ပေးနေတာတွေကြောင့် ပစ်ခတ်ခဲ့တာလို့ သိရပါတယ်။

ပြီးခဲ့တဲ့ဇန်နဝါရီ ၁၂ ရက်ကလည်း ပြွန်တန်ဆာမြို့၊ မြို့မ ၁ ရပ်ကွက် အုပ်ချုပ်ရေးမှူး လှသောင်းဟာ ပစ်ခတ်ခံရပြီးသေဆုံးခဲ့သေးတယ်လို့သိရပါတယ်။

◾️အုပ်ချုပ်ရေးမှူးကိုဖမ်းချိန် သားမက်ဖြစ်သူကိုလည်း ဖမ်းသွား

ကျောက်ပန်းတောင်း၊ ဩဂုတ် ၂၈၊ ၂၀၂၆။

မန္တလေးတိုင်း၊ ညောင်ဦးခရိုင်၊ ကျောက်ပန်းတောင်းမြို့နယ်မှာ (၁)လအတွင်း အုပ်ချုပ်ရေးမှူး (၁) ဦးနဲ့ ရာအိမ်မှူး ၂ ဦးအပါ စုစုပေါင်း ၄ ဦးကို အမည်မသိလက်နက်ကိုင်အဖွဲ့က ဖမ်းဆီးသွားတယ်လို့ ဒေသခံတွေဆီက သိရပါတယ်။

ကျောက်ပန်းတောင်းမြို့၊ ဘူတာရပ်ကွက်က အသက် (၆၆) နှစ်ဝန်းကျင် ဦးမောင်ဆန်း ကို ဩဂုတ်လ (၂၅) ရက် ည (၉) နာရီခန့်က နေအိမ်ကနေဖမ်းဆီးသွားခဲ့ပြီး လယ်ယားအုပ်စု၊ တောင်ချေရွာ ရာအိမ်မှူး(တာဝန်ခံ) အသက် (၆၃) နှစ်အရွယ် ဦးလှညွှန့် နဲ့ ကြံစို့ရွာက အသက် (၆၇) နှစ်အရွယ် ဦးမောင်တိုး တို့ကိုလည်း ဩဂုတ်လ (၁၄) ရက် မနက် (၈) နာရီခွဲလောက်မှာ တောင်ချေရွာကနေ ဆိုင်ကယ်နဲ့ ထွက်လာချိန် အင်းခေါင်းရွာအနီးအရောက်မှာ ဖမ်းဆီးခံလိုက်ရတယ်လို့ ဆိုပါတယ်။

ဘူတာအုပ်ချုပ်ရေးမှူးကိုဖမ်းဆီးချိန်မှာ သားမက်ဖြစ်သူ ကိုအောင်ပြည့်သော်ကိုလည်းဖမ်းဆီးသွားခဲ့သလို ဦးမောင်ဆန်း ပိုင် HONDA 110 အမျိုးအစားမော်တော်ဆိုင်ကယ်ကိုလည်း ယူဆောင်သွားတယ်လို့ စစ်အစိုးရရဲမှတ်တမ်းတွေက ဖော်ပြထားပါတယ်။

“အုပ်ချုပ်ရေးမှူး နဲ့ တာဝန်ခံ(ရာအိမ်မှူး) ၂ ဦးဖမ်းဆီးခံရတာ ဟုတ်ပါတယ်။ အခုထိတော့ အားလုံးကပြန်မလွတ်သေးဘူး။ ဦးပခန်းညိုဆိုရင် သိန်း၂၅၀ တောင်းလို့ ပေးပြီးတာကို ထပ်တောင်းတာ မပေးနိုင်လို့ သူ့မိသားစုက အိမ်နဲ့ခြံရောင်းပြီး ပြောင်းသွားပြီ” လို့ ကျောက်ပန်းတောင်းမြို့ခံတဦးက ပြောပါတယ်။

လက်ပံအိုင့်အုပ်စု အုပ်ချုပ်ရေးမှူး အသက် (၇၃) နှစ်အရွယ် ဦးပခန်းညိုကိုတော့ဇွန်လ (၁၅) ရက် မနက် (၉) နာရီလောက်မှာ နေအိမ်ကနေ ဖမ်းဆီးသွားတယ်လို့ အာဏာသိမ်းစစ်တပ်ရဲ့ ဇွန်လ (၁၇) ရက် ထုတ်ပြန်ချက်အရ သိရပါတယ်။

ဖမ်းဆီးမှုတွေနဲ့ပတ်သက်ပြီး “စစ်ကောင်စီထောက်တိုင် အုပ်ချုပ်ရေးမှူးတွေကိုဖမ်းတာနဲ့ပတ်သက်ပြီး ဘာမှ မှတ်ချက်မပေးလိုပါဘူး၊ အရပ်သားတွေကိုဖမ်းတာမျိုးတော့ မလုပ်စေချင်ဘူး” လို့ ကျောက်ပန်းတောင်းမြို့ခံတစ်ဦးကလည်း ပြောပါတယ်။

ပြီးခဲ့တဲ့ ဇူလိုင်လ ၂၇ ရက်မွန်းလွဲပိုင်းက ကျောက်ပန်းတောင်းမြို့ ပုပ္ပါးတောင်ခြေရှိ Popa Garden Resort မှာ တည်းခိုပြီး အလည်အပတ်ထွက်ချိန် ဖမ်းဆီးခံရတဲ့ အမျိုးသား ၉ ဦးနဲ့ အမျိုးသမီး ၂ ဦးတို့ကို ဖမ်းဆီးသူတွေဆီက လွှဲပြောင်းယူကာ ပြီးခဲ့တဲ့ တပါတ်လောက်က ညောင်ဦးခရိုင် ပကဖ ကပြန်လွှတ်ပေးခဲ့တယ်လို့ သတင်းတွေထွက်ပေါ်နေပေမယ့် တရားဝင်ထုတ်ပြန်တာမျိုးတော့ မတွေ့ရပါဘူး။

သတင်း-သော်တာအောင်၊ စာတည်း-စိုးဦး

ပေါင်းတည်၊ မေ ၂၆၊ ၂၀၂၆။

ပဲခူးတိုင်း၊ ပေါင်းတည်မြို့နယ်၊ ရှမ်းစပ်ကျေးရွာက ရာအိမ်မှူး ပစ်ခတ်ခံရပြီးသေဆုံးခဲ့တယ်လို့ မေ ၂၆ ရက် ဒီကနေ့မှာ ပြည်ခရိုင်တပ်ရင်း ၁ က သတင်းထုတ်ပြန်ပါတယ်။

ပစ်သတ်ခံရသူဟာ ရှမ်းစပ်ရွာရာအိမ်မှူးဖြစ်သူ အသက် ၆၅ နှစ်အရွယ် ဦးမြင့်အေးဖြစ်ပြီး မေ ၂၃ ရက်မနက် ၅ နာရီကျော်မှာ ကာကွယ်ရေးတပ်ဖွဲ့ဝင်တွေက နေအိမ်ထဲဝင်ရောက်ပစ်ခတ်ခဲ့တာလို့ ဆိုပါတယ်။

“သူကို ခုခံခွင့်မပေးဘူး၊ တွေ့တာနဲ့ ပစ်ခတ်ရှင်းလင်းတာပဲ။ ၂ ချက်ပစ်ခဲ့တယ်။ ခေါင်းကို ၁ ချက် ရင်ဘတ်ကို ၁ ချက်။ နေရာတင် တန်းသေတာပဲ။ သူကိုဆက်မလုပ်ဖို့ ဖုန်းနဲ့သတိပေးဖူးတယ်။ သူအိမ်သားတွေရှိပေမယ့်လည်း မဆိုင်တဲ့သူတွေကို မလုပ်ခဲ့ဘူး”လို့ ပြည်ခရိုင်တပ်ရင်း ၁ စစ်ထောက်လှမ်းရေးနှင့်သတင်းပြန်ကြားတာဝန်ခံ ရဲဘော် Shadow က ပြောပါတယ်။

ပစ်ခတ်မှုကြောင့် ရာအိမ်မှူးဟာ နေရာမှာတင်သေဆုံးပြီး သူ့ဆီကနေ ဖုန်း ၁ လုံးကိုသိမ်းဆည်းရမိခဲ့ကာ ဖုန်းထဲမှာလည်း အုပ်ချုပ်ရေးအဖွဲ့၊ စစ်ကော်မရှင်အဖွဲ့တွေနဲ့ ဆက်သွယ်ထားတဲ့ ဖုန်းနံပါတ်တွေကို ရထားတယ်လို့ ဆိုပါတယ်။

ပစ်ခတ်မှုဖြစ်ပြီးနောက် မနက် ၇ နာရီကျော်လောက်မှာတော့ စစ်ကော်မရှင်အဖွဲ့တွေ ကျေးရွာထဲ ရောက်လာပြီး အလောင်းလာကောက်သွားတယ်လို့ သိရပါတယ်။

ရာအိမ်မှူး ဦးမြင့်အေးဟာ စစ်မှုထမ်းအကြောင်းပြပြီး ရွာခံတွေဆီကနေ ငွေကြေး ကျပ် ၅၀,၀၀၀ မှ ၁၅၀,၀၀၀ အထိ စစ်ကော်မရှင်အဖွဲ့ဝင်တွေကို ကောက်ခံပေးတဲ့အပြင် ကိုယ်ကျိုးအတွက် အသုံးပြုတာတွေလည်းရှိပြီး သူ့ကြောင့် ရွာခံအမျိုးသား ၅ ဦးထက်မနည်း စစ်မှုထမ်းခဲ့ရတယ်လို့ ဆိုပါတယ်။

ပြီးခဲ့တဲ့ ဒီဇင်ဘာ ၁၈ ရက်ကလည်း ပေါင်းတည်မြို့နယ်၊ ကွေ့မကျေးရွာမှာ နေအိမ်အတွင်းရှိနေတဲ့ ရာအိမ်မှူး အထွန်း ဆိုသူ နေအိမ်အတွင်းပစ်သတ်ခံရပြီး သေဆုံးခဲ့ပါသေးတယ်။

စာတည်း – လင်း

တောင်တွင်းကြီး၊ ဇန်နဝါရီ ၆၊ ၂၀၂၅။

မကွေးတိုင်း၊ တောင်တွင်းကြီးမြို့နယ်၊ ပရပ်ကြယ်ကျေးရွာမှ ရာအိမ်မှူး ၁ ဦးပစ်ခတ်ခံရပြီး သေဆုံးသွားတယ်လို့ ကျေးရွာနဲ့နီးစပ်သူတွေဆီက သိရပါတယ်။

ပစ်ခတ်ခံရသူဟာ ပရပ်ကြယ်ကျေးရွာနေ အသက် ၅၆ နှစ်အရွယ် ဦးဇော်ဝင်းဆိုသူဖြစ်ပြီး ဇန်နဝါရီ ၄ ရက်မနက် ၇ နာရီခန့်မှာ အောင်မြင်သာကျေးရွာအနီးမှာ ပစ်ခတ်ခံရတာလို့ ဆိုပါတယ်။

“သူက အလုပ်ကိစ္စအတွက် ဆိုင်ကယ်နဲ့သွားတာကို လမ်းမှာပစ်ခတ်သွားတာလို့တော့ သိရတယ်။ လမ်းမှာသေနေတာကို ဒေသခံတွေက အကြောင်းကြားလို့ သိရတာ။ အလောင်းကတော့ အခုအိမ်ပြန်ရောက်ပြီး နာရေးလည်း လုပ်ပြီးပြီ။”လို့ ကျေးရွာနဲ့နီးစပ်သူတဦးက ပြောပါတယ်။

ပစ်ခတ်ခံရပြီး ရာအိမ်မှူး ဦးဇော်ဝင်းမှာ ခြေထောက်၊ လက်နဲ့ဝမ်းဗိုက်တွေမှာ ကျည်ထိဒဏ်ရာတွေနဲ့ သေဆုံးခဲ့တယ်လို့ ဆိုပါတယ်။

သူသေဆုံးတဲ့နေ့မှာတင် စစ်ကော်မရှင်အဖွဲ့တွေက အလောင်းကိုသွားယူကာ တောင်တွင်းကြီးဆေးရုံကို ပို့ဆောင်ပေးခဲ့ကြပြီး ဇန်နဝါရီ ၅ ရက်မှာတော့ အလောင်းကို မိသားစုတွေကနေအိမ်ပြန်သယ်ပြီး နာရေးပြုလုပ်ကြတယ်လို့ ဆိုပါတယ်။

ဒီပစ်ခတ်မှုကို ဘယ်အဖွဲ့တွေက ပစ်ခတ်ခဲ့တယ်ဆိုတာတော့ ဇန်နဝါရီ ၆ ရက် ဒီကနေ့အထိ သတင်းထုတ်ပြန်တာမျိုး မရှိသေးပါဘူး။

ပြီးခဲ့တဲ့ ဇွန် ၃၀ ရက်ကလည်း တောင်တွင်းကြီးမြို့နယ်၊ အိုးပေါက်ကျေးရွာနေ အုပ်ချုပ်ရေးမှူး ဦးခင်မောင်လတ်ဆိုသူ နေအိမ်ထဲထိဝင်ရောက်ပစ်ခတ်ခံရပြီး သေဆုံးသွားခဲ့သေးတယ်လို့သိရပါတယ်။

စာတည်း – လင်း

ညောင်လေးပင်၊ ဒီဇင်ဘာ ၂၀၊ ၂၀၂၅။

ပဲခူးတိုင်း၊ ညောင်လေးပင်မြို့နယ်၊ သံတံတားစံပြကျေးရွာမှာ အုပ်ချုပ်ရေးမှူး ၁ ဦး သေနတ်နဲ့ပစ်ခံရပြီး သေဆုံးခဲ့တယ်လို့ 9 Stars UG အဖွဲ့ဆီက သိရပါတယ်။

ပစ်သတ်ခံရသူဟာ သံတံတားစံပြကျေးရွာအုပ်ချုပ်ရေးမှူး အသက် ၄၅ နှစ်အရွယ် နိုင်ဝင်းဆိုသူဖြစ်ပြီး ဒီဇင်ဘာ ၁၉ ရက်ညနေ ၅ နာရီကျော်မှာ ရွာထဲရှိ အမှတ် ၉ ရပ်ကွက်လမ်းပေါ်မှာ ပစ်သတ်ခံရတာလို့ ဆိုပါတယ်။

“သူကဆိုင်ကယ်နဲ့လာတာကို လိုက်ပစ်ရတာ။ သူကလည်း မောင်းပြေးတာ။ သူလည်း လည်တယ်။ သူ့အိတ်ကို ဖြုတ်ထားပြီးပြီ။ အသီး(လက်ပစ်ဗုံး)ကို နှိုက်နေတာ။ ခေါင်းကို သုံးချက်ပစ်ခဲ့တာ”လို့ 9 Stars UG တာဝန်ခံ မြွေပွေးကပြောပါတယ်။

သေနတ်ကျည်ထိလို့ အုပ်ချုပ်ရေးမှူး ဝင်းနိုင် ဟာ နေရာမှာတင်သေဆုံးပြီးနောက် သူ့ဆီကနေ လက်ပစ်ဗုံး ၂ လုံး၊ မှတ်ပုံတင်၊ ကားသော့နဲ့ ဖုန်း ၁ လုံးတို့ကို သိမ်းယူရရှိခဲ့တယ်လို့ ဆိုပါတယ်။

အုပ်ချုပ်ရေးမှူးဝင်းနိုင်ဟာ စစ်ကော်မရှင်ရွေးကောက်ပွဲဖြစ်မြောက်ဖို့အတွက် ပြည်သူတွေ ကိုဖိအားပေးတာ၊ စစ်မှုထမ်းကြေး ၁ လ ၂၀,၀၀၀ ကျပ်ကောက်ခံတာ၊ စစ်မှု့ထမ်းပေါ်တာဆွဲတာလည်းလုပ်တာကြောင့် ခုလိုပစ်ခတ်ရှင်းလင်းခဲ့တာလို့ ဆိုပါတယ်။

ပစ်ခတ်မှုဖြစ်ပြီးနောက် ညောင်လေးပင်ရဲစခန်းက ရဲတွေလာရောက်စစ်ဆေးပြီး အလောင်းကိုဆေးရုံကို ယူဆောင်သွားကြတယ်လို့ သိရပါတယ်။

ပြီးခဲ့တဲ့နိုဝင်ဘာ ၈ ရက်ကလည်း ညောင်လေးပင်မြို့နယ်၊ စီပင်ကျေးရွာ၊ ဝိသဖန်းအင်းအနီး ဝန်းကျင်မှာ စီပင်ရွာအုပ်ချုပ်ရေးမှူးတပည့် ပျူစောထီးအဖွဲ့ဝင် မင်းမင်းဆိုသူပစ်သတ်ခံရလို့ သေဆုံးသွားသေးတယ်လို့ သိရပါတယ်။

စာတည်း – လင်း

အုတ်ဖို၊ စက်တင်ဘာ ၂၉၊ ၂၀၂၅။

ပဲခူးတိုင်း၊ သာယာဝတီခရိုင်၊ အုတ်ဖိုမြို့နယ်၊ ရှမ်းကုန်းအုပ်စု၊ ရှမ်းကုန်းရွာမှာ PDF တွေလာတာကို စစ်ကော်မရှင်တပ်သားတွေလာတယ်အထင်နဲ့ ဧည့်ခံတဲ့ရာအိမ်မှူး ပစ်ခတ်ခံရပြီး သေဆုံးသွားတယ်လို့ သာယာဝတီခရိုင် တပ်ရင်း ၃၈၀၂ တပ်ခွဲ ၅ ပြန်ကြားရေးတာဝန်ခံဆီက သိရပါတယ်။

စက်တင်ဘာ ၂၇ ရက်နေ့လယ် ၁၂ နာရီခန့်မှာ ရှမ်းကုန်းရွာ ရာအိမ်မှူး အသက် ၅၀ ကျော်အရွယ် ဦးမြင့်အောင်ကို သူ့နေအိမ်အတွင်းမှာ သေနတ်နဲ့ ၄ ချက်ပစ်ခတ်ခဲ့တယ်လို့ ဆိုပါတယ်။

“ကျနော်တို့သွားတာ အရပ်ဝတ်နဲ့။ ကျနော်တို့အဖွဲ့တွေဝင်သွားတော့ စ**တွေထင်လို့ ဆရာတို့က ဘယ်တပ်စိပ်ကလဲ မေးသေးတယ်။ ဆရာတို့ထိုင်ပါအုံး။ လက်ဖက်ရည်ကြမ်းသောက်ပါအုံး။ လက်ဖက်သုပ်အုံးမယ်ပြောပြီး ထရော သေနတ်နဲ့ ၄ ချက်ပစ်တာ။ ၃ ချက်ပဲထွက်ပြီး ၁ ချက်က ကျည်´အ´သွားတယ်။”လို့ သာယာဝတီခရိုင် တပ်ရင်း ၃၈၀၂ တပ်ခွဲ ၅ ပြန်ကြားရေးတာဝန်ခံကပြောပါတယ်။

ရှမ်းကုန်းရွာအနီး မိုင်ဝက်လောက်အကွာမှာ ခမရ ၆ တပ်ရှိတာကြောင့် PDF တွေလာတာကို အဆိုပါ တပ်က တပ်သားတွေလာတယ်အထင်နဲ့ဧည့်ခံတာဖြစ်နိုင်ပြီး သေနတ်နဲ့အနီးကပ်ပစ်ခံရလို့ ရာအိမ်မှူး ဦးမြင့်အောင်မှာ ရင်ဘတ်ကျည်ထိဒဏ်ရာတွေနဲ့နေရာမှာတင် သေဆုံးခဲ့တယ်လို့ ဆိုပါတယ်။

ရာအိမ်မှူး မြင့်အောင်ဟာ စစ်မှုထမ်းဟောင်းတဦးဖြစ်သလို စစ်ကော်မရှင်တပ်ရဲ့ အမာခံထောက်တိုင်ဖြစ်ပြီး စစ်မှုထမ်းကြေးဟုဆိုကာ ပြည်သူတွေဆီက ငွေကြေးအတင်းအကြပ် ကောက်ခံတာ၊ စစ်မှုထမ်းကြေး မပေးသူတွေကို ဖမ်းဆီးခိုင်းတာ၊ လူငယ်တွေကိုစစ်မှုထမ်းဖို့အတင်းအကြပ် စုဆောင်းတာတွေ ပြုလုပ်နေတာကြောင့် ပစ်ခတ်ရှင်းလင်းခဲ့တာလို့သိရပါတယ်။

စက်တင်ဘာ ၇ ရက်ကလည်း အုတ်ဖိုမြို့နယ်၊ စစ်တောကျေးရွာမှာ ဘေးတွဲဆိုင်ကယ်နဲ့လာတဲ့ ရာအိမ်မှူး ဦးသန်းစိုးဆိုသူ ပစ်သတ်ခံရပြီး သေဆုံးခဲ့ပါသေးတယ်။

စာတည်း – လင်း

နတ်တလင်း၊ စက်တင်ဘာ ၂၀၊ ၂၀၂၅။

ပဲခူးတိုင်း၊ နတ်တလင်းမြို့နယ်၊ စံကြီးလောင့်ကျေးရွာက ရာအိမ်မှူး ၁ ဦးနေအိမ်မှာပစ်ခတ်ခံရပြီး သေဆုံးခဲ့တယ်လို့ Bamar Revolution Army – B.R.A ဆီကသိရပါတယ်။

ပစ်သတ်ခံရသူဟာ စံကြီးလောင့်ကျေးရွာ ရာအိမ်မှူး အသက် ၄၀ အရွယ် ဇော်မင်းနိုင်ဆိုသူဖြစ်ပြီး စက်တင်ဘာ ၁၉ ရက် ည ၉ နာရီခန့်က သူ့နေအိမ်မှာရှိနေချိန်ပစ်ခတ်ခဲ့တာလို့ဆိုပါတယ်။

“ရွာလယ်ပိုင်းက သူ့အမေကြီးနေအိမ်မှာရှင်းခဲ့တာ။ ထွက်ပြေးဖို့လုပ်လို့ သေနတ်အရှည်နဲ့ ၇ ချက် ပစ်ခတ်ခဲ့တယ်။ သူ့အမေကြီးအိမ်မှာဆိုတော့ ဘာမှသိမ်းဆည်းရမိတာမရှိဘူး။ သူတို့အိမ်သားတွေ ရှိပေမယ့် ထိခိုက်မှုမရှိအောင်ဂရုစိုက်လုပ်ခဲ့ပါတယ်”လို့ Bamar Revolution Army- B.R.A တပ်ခွဲမှူး လကျာ်ကပြောပါတယ်။

သေနတ်နဲ့အနီးကပ်ပစ်ခံရလို့ ရာအိမ်မှူး ဇော်မင်းနိုင်မှာ ဦးခေါင်း၊ ရင်ဘတ်မှာ ကျည်ထိဒဏ်ရာရပြီး ပစ်ခတ်ခံရတဲ့နေရာမှာတင်သေဆုံးခဲ့တယ်လို့ ဆိုပါတယ်။

ဇော်မင်းနိုင်ဟာ စစ်ကော်မရှင်တပ်သားတွေဆီ ဆက်ကြေးပေးပြီး ကျေးရွာမှာ လောင်းကစားဝိုင်းတွေပြုလုပ်တာ၊ စစ်မှုထမ်းကြေးကောက်ပေးတာ၊ စစ်ကော်မရှင်တပ်သားတွေ ကင်းထွက်ချိန်တွေမှာ လမ်းပြအဖြစ်လိုက်ပါလုပ်ဆောင်တာတွေရှိတာကြောင့် ခုလိုပစ်ခတ်ခဲ့တာလို့ ဆိုပါတယ်။

ရာအိမ်မှူးကိုပစ်ခတ်ပြီးနောက် BRA အဖွဲ့ဝင်တွေပြန်ဆုတ်လာချိန် စံကြီးလောင့်ရွာရဲ့ တမိုင်ခန့်အကွာရှိ ဒမငယ်ရဲစခန်းဘက်ကနေ လက်နက်ငယ်ပစ်သံတွေကြားရပြီး ဒီပစ်ခတ်မှုဟာ တော်လှန်ရေးတပ်တွေကို ခြိမ်းခြောက်ပစ်ခတ်တာဖြစ်နိုင်တယ်လို့ တပ်ခွဲမှူး လကျာ်ကခန့်မှန်းပါတယ်။

စက်တင်ဘာ ၁၇ ရက်ကလည်း နတ်တလင်းမြို့နယ်၊ ရှားစီးဘိုးရွာအောက်စုနေ ရာအိမ်မှူး ဦးဖိုးကျော်ဆိုသူလည်း သူရဲ့နေအိမ်အနီးမှာ ပစ်သတ်ခံရပြီးသေဆုံးခဲ့သေးတယ်လို့ သိရပါတယ်။

စာတည်း – လင်း

မြေလတ်အသံ၊ စက်တင်ဘာ ၁၈၊ ၂၀၂၅။

ပဲခူးတိုင်း၊ နတ်တလင်းမြို့နယ်က စစ်ကော်မရှင်ခန့် ရာအိမ်မှူး ၁ ဦးကို စက်တင်ဘာ ၁၇ ရက်မနက် ၉ နာရီကျော်မှာ ပစ်ခတ်ရာသေဆုံးခဲ့တယ်လို့ သာယာဝတီခရိုင် ၃၈၀၁၊ တပ်ခွဲ ၇ ဆီကသိရပါတယ်။

အသတ်ခံရသူဟာ ရှားစီးဘိုရွာအောက်စု အသက် ၅၀ ကျော်အရွယ် ရာအိမ်မှူးဖိုးကျော်ဖြစ်ပြီး သူ့ရဲ့နေအိမ်အနီးမှာ တော်လှန်ရေးတပ်ဖွဲ့ဝင်တွေကပစ်ခတ်ရာမှာ သေဆုံးခဲ့တာလို့ ဆိုပါတယ်။

“ကျနော်တို့ရဲဘော်တွေ သူ့အိမ်ရှေ့ရောက် ထွက်ပြေးတော့ သူ့အိမ်နဲ့ဆိုအရမ်းတော့မဝေးဘူး။ သုံး၊ လေး အိမ်လောက်ပဲကျော်မယ်။ အဲ့ သုံး၊ လေးအိမ်အရောက်မှာ လှမ်းပြီးပစ်လိုက်တော့ မှန်သွားတော့လဲသွားတာ။ အဲ့နေရာမှာဘဲ ရှင်းလင်းခဲ့တယ်ပေါ့ “လို့ ၃၈၀၁၊ တပ်ခွဲ ၇ မှ တပ်ခွဲမှူးလှော်ကြီးက ပြောပါတယ်။

ရာအိမ်မှူးလုပ်သက် ၃ နှစ်ရှိပြီဖြစ်တဲ့ ဖိုးကျော်ဆီကနေ ဆိုင်ကယ် ၁ စီး၊ လက်ကိုင်ဖုန်း ၁ လုံးတို့ကို သိမ်းဆည်းရရှိခဲ့ကာ သူနေထိုင်တဲ့ ရှားစီးဘိုရွာဟာ စစ်ကောင်စီတပ်စခန်းရှိတဲ့ ဒမင်ငယ်ကျေးရွာနဲ့ ၁ မိုင်ကျော်ကွာတာကြောင့် ပစ်ခတ်ပြီးပြန်လည်ဆုတ်ခွာခဲ့တယ်လို့ တပ်ခွဲမှူးလှော်ကြီးက ဆိုပါတယ်။

ရာအိမ်မှူး ဖိုးကျော်ဟာ စစ်ကော်မရှင်တပ်ဘက်က အမာခံရပ်တည်ပြီး ပြည်သူလူထုကို စစ်မှုထမ်းဖို့ ပေါ်တာဆွဲတာ၊ စစ်မှုထမ်းကြေး အတင်းအဓမ္မကောက်ခံတာတွေကို လုပ်ဆောင်နေသူတဦးလည်းဖြစ်တယ်လို့ သိရပါတယ်။

ပြီးခဲ့တဲ့နှစ်၊ မတ် ၁၅ ရက်ကလည်း နတ်တလင်းမြို့နယ်၊ ကျောက်ခွက်အုပ်စု၊ စစ်ကော်မရှင်ခန့် အုပ်ချုပ်ရေးမှူး အသက် ၅၅ နှစ်အရွယ်ရှိတဲ့ ကိုဝင်းသိန်း ကိုလည်း သူနေတဲ့ကျောက်စွယ်ရွာမှာဘဲ နတ်တလင်းမြို့နယ် ပြည်သူ့ကာကွယ်‌ရေးအဖွဲ့ (ပကဖ)က သေနတ်နဲ့ပစ်ခတ်ခဲ့ပါသေးတယ်။

စာတည်း – လင်း