မြေလတ်အသံ

စစ်ကိုင်း၊ မေ ၉၊ ၂၀၂၆။

စစ်ကိုင်းတိုင်း၊ မော်လိုက်ခရိုင်၊ ဖောင်းပြင်မြို့နယ်ရှိ ကျေးရွာ ၂ ရွာကိုစစ်ကော်မရှင်တပ်က ဒရုန်း၊ လက်နက်ကြီးတွေနဲ့ ပစ်ခတ်တိုက်ခိုက်ခဲ့တာကြောင့် သက်ကြီးပိုင်းအမျိုးသမီး ၂ ဦးသေဆုံးပြီး ထိခိုက်ဒဏ်ရာရရှိ‌သူ‌တွေနဲ့ နေအိမ်ပျက်စီးမှုတွေရှိခဲ့တယ်လို့ ဖောင်းပြင်မြို့နယ်ပကဖဆီက သိရပါတယ်။

မေလ ၈ ရက် နေ့လယ် ၃ နာရီ ၂၅ မိနစ်ခန့်မှာ ဖောင်းပြင်မြို့နယ်၊ မင်းယာရွာကို ၁၂၀ မမလက်နက်ကြီးနဲ့ ၁ ချက်ခန့်ပစ်ခတ်ခဲ့ပြီး နေ့လယ် ၃ နာရီမှ ၄ နာရီအထိ နောင်ရင်းရွာကို ဒရုန်းဗုံးနဲ့ ၄ ကြိမ်တိုက်ခိုက်ခဲ့တဲ့ အပြင် ၆၀ မမ ၆ လုံး၊ ၁၂၀ မမ ၁ လုံးတို့နဲ့လည်း ပစ်ခတ်ခဲ့တာလို့ ဆိုပါတယ်။

“မနေ့တုန်းက တိုက်ပွဲဖြစ်တာလည်းမရှိဘူး။ တော်လှန်ရေးရဲဘော်တွေ အင်အားစုဖွဲ့မှု လုပ်နေတာမျိုးလည်းမရှိဘူး။ မင်းယားက ဒေါ်မယ်စိန်တို့ နေအိမ်တည့်တည့်ကိုတော့ ၁၂၀ နဲ့ ခမရ ၃၆၇ ကနေ ပစ်တယ်။ နေအိမ်ပေါ်မှာရှိတဲ့အမျိုးသမီး ၂ ဦးကတော့ ဆုံးသွားတယ်”လို့ ဖောင်းပြင်မြို့နယ် ပကဖရဲ့ ဆက်သွယ်ရေးတာဝန်ခံ ကိုဆင်ပေါက်ကြီးက မြေလတ်အသံကိုပြောပါတယ်။

အဆိုပါ ပစ်ခတ်မှုတွေကြောင့် ‌မင်းယားရွာက နေအိမ်ပေါ် လက်နက်ကြီးကျရောက်ပေါက်ကွဲပြီး နေအိမ်ထဲမှာရှိနေတဲ့ အသက် ၇၈ နှစ်အရွယ် ဒေါ်မယ်စိန်နဲ့ အသက် ၅၇ နှစ်အရွယ် ဒေါ်မြသိန်းတို့သေဆုံးကာ နေအိမ် ၂ လုံးပျက်စီးခဲ့တယ်လို့ ဆိုပါတယ်။

ဒါ့အပြင် နောင်ရင်းရွာကိုတိုက်ခိုက်မှုမှာတော့ အသက် ၂၀ ကနေ ၃၀ အကြား ရပ်ကျေးပကဖအဖွဲ့ဝင် ၃ ဦး ထိခိုက်ဒဏ်ရာရရှိခဲ့ပြီး နေအိမ် ၃ လုံးပျက်စီးသွားတယ်လို့အထက်ပါ ဆက်သွယ်ရေးတာ၀န်ခံက ဆိုပါတယ်။

အဲ့ဒီတိုက်ခိုက်မှုတွေကို ဖောင်းပြင်မြို့မှာရှိတဲ့ အမှတ် ၃၆၇ ခြေမြန်တပ်ရင်း (ခမရ ၃၆၇) က လုပ်ဆောင်ခဲ့တာလို့သိရပြီး ပြည်သူ့စစ်အဖွဲ့‌၀င်တွေထိန်းချုပ်ထားတဲ့ ပိုးစားကုန်းရွာနဲ့ တော်လှန်ရေးတပ်ဖွဲ့တွေထိန်းချုပ်ထားတဲ့ နောင်ရင်းရွာတို့ဟာ မီတာ ၁၀၀ ကျော်အကွာအဝေးမှာ ရှိတယ်လို့သိရပါတယ်။

စာတည်း – လင်း

မြင်းခြံ၊ မေ ၉၊ ၂၀၂၆။

မန္တလေးတိုင်း၊ မြင်းခြံမြို့နယ်ထဲက ကျေးရွာတွေကို စစ်ကြောင်းထိုးနေတဲ့ စစ်ကော်မရှင်တပ်ဖွဲ့ဝင်တွေဟာ အမျိုးသမီး ၄ ဦးကိုအဓမ္မပြုကျင့်ပြီး အမျိုးသား ၁ ဦးကို သတ်ဖြတ်သွားတယ်လို့ ဒေသခံတွေဆီက သိရပါတယ်။

မေလ ၄ ရက် နေ့လယ် ၁၂ နာရီခန့်မှာ ကိုင်းရွာဘက်ကနေ ထွက်လာတဲ့စစ်ကြောင်းဟာ မရိုးကုန်းရွာကိုရောက်လာချိန် စစ်ရှောင်နေရာကကျေးရွာထဲပစ္စည်းပြန်ယူတဲ့ အသက် ၂၁ အရွယ်အမျိုးသမီး ၁ ဦးကို အဓမ္မပြုကျင့်ခဲ့တာလို့ ဆိုပါတယ်။

“သူကရှောင်တာက တောထဲမှာစစ်ရှောင်နေတာ။ ပစ္စည်းကျန်ခဲ့လို့ ပြန်ဝင်ယူတာမှာ မိသွားတာ။ ကျနော်တို့ဘက်စစ်ရှောင်လာသူတွေက အဲလိုဖြစ်ခဲ့တာကိုပြန်ပြောပြလို့သိရတာ။ ကာယကံရှင်နဲ့ လည်းပြောရတယ်။ တောထဲမှာပဲ ဖြစ်ခဲ့တာ။”လို့ ဒေသခံတဦးက ပြောပါတယ်။

အဆိုပါအမျိုးသမီးငယ်ဟာ စစ်ကြောင်းထွက်သွားပြီးနောက် မိသားစုလိုက် ကျေးရွာထဲပြန်လည်နေထိုင်နေပေမယ့် စိတ်မူမှန်မှုမရှိဘဲ အမြဲတမ်းကြောက်လန့်တကြားဖြစ်နေတယ်လို့ ဆိုပါတယ်။

ဒါ့အပြင် မေလ ၆ ရက်မနက်ပိုင်းကလည်း မရိုးကုန်းကနေထွက်လာတဲ့ စစ်ကြောင်းဟာ သိမ်ရွာကို ရောက်ရှိပြီး စစ်ကြောင်းလာချိန် ဖမ်းမိခဲ့တဲ့ သိမ်ရွာက အသက် ၂၀ ကျော်အရွယ် အမျိုးသမီး ၂ ဦးနဲ့ အသက် ၅၀ အရွယ် အိမ်ထောင်သည်အမျိုးသမီး ၁ ဦးကို အုပ်စုဖွဲ့အဓမ္မပြုကျင့်ခဲ့ကြတယ်လို့ ဆိုပါတယ်။

“သိမ်ရွာကကျတော့ အိမ်ထောင်သည်အမျိုးသမီး ၁ ယောက်ကို ၅ ယောက်က ဝိုင်းကျင့်တာ။ သူတို့က တပြိုင်တည်းတနေရာတည်း တအုပ်စုလုံးဖြစ်တာ။ သူတို့ကျတော့မရှောင်တာ ရွာထဲမှာမိတာ။ “လို့ အထက်ပါဒေသခံက ဆက်ပြောပါတယ်။

စစ်ကော်မရှင်စစ်ကြောင်း သိမ်ရွာကထွက်သွားချိန် သတ်ဖြတ်ခံထားရတဲ့ အသက် ၃၀ အရွယ် အမျိုးသားအလောင်း ၁ လောင်းကိုလည်းတွေ့ရတယ်လို့ ဆိုပါတယ်။

“အမျိုးသားသေတာလည်း သိမ်ရွာဝင်တဲ့ တရက်တည်းဖြစ်တာ။ သူက နတ်မောက်သား သိမ်ရွာသူနဲ့ အိမ်ထောင်ကျလို့ ရွာမှာနေတာ။ သူလည်းရွာထဲမှာပဲမိတာ။ သူ့ကိုဖမ်းသွားတာသိပြီး ဘယ်လိုသတ်လဲဆိုတာမသိဘူး။ အလောင်းတွေ့တဲ့အချိန်တော့ ၂ ပိုင်းဖြစ်နေတယ်။ အလောင်းကတော့ ရွာထဲမှာပဲတွေ့တာ”လို့ အထက်ပါဒေသခံက ဆက်ပြောပါတယ်။

အဲ့ဒီကျေးရွာတွေထဲက တန်ဖိုးရှိပစ္စည်းတွေ ယူဆောင်သွားခဲ့ပြီး မေလ ၉ ရက်ဒီနေ့အထိ ဆီမီးခုံကျေးရွာမှာဆက်ရှိနေတယ်လို့ သိရပါတယ်။

ဒီစစ်ကြောင်းဟာ မေလ ၁ ရက်ကတည်းက တောပုပျူစောထီးစခန်းကနေထွက်လာတဲ့ အင်အား ၃၀၀ ကျော်ပါစစ်ကြောင်းဖြစ်ပြီး အဲ့ဒီနေ့မှာပဲ ဆင်ချောင်းရွာကနေအိမ် ၆၀ ဝန်းကျင်ကို မီးရှို့ဖျက်ဆီးခဲ့ပါသေးတယ်။

စစ်ကြောင်းထိုးလာပြီး တိုက်ပွဲတွေလည်းဖြစ်နေတာကြောင့် ကမ်းပါးနီ၊ ဖက်ပင်အိုင်၊ ဆင်ချောင်း၊ ညောင်တို၊ ကိုင်း၊ ရန္တပို၊ နဘူးအိုင်၊ မရိုးကုန်းအပါအဝင် ကျေးရွာ ၁၀ ကက ပြည်သူ ၅,၀၀၀ ကျော်ဟာ ဧရာဝတီမြစ်ကို ဖြတ်ကူးပြီး မြောင်မြို့နယ်ထဲကကျေးရွာတွေမှာ စစ်ဘေးရှောင်နေကြရတယ်လို့ သိရပါတယ်။

စာတည်း – လင်း

မြေလတ်အသံ၊ မေ ၉၊ ၂၀၂၆။

ဗမာနိုင်ငံလုံးဆိုင်ရာကျောင်းသားသမဂ္ဂများအဖွဲ့ချုပ် (ဗကသများအဖွဲ့ချုပ်) နှစ် ၉၀ ပြည့် အခမ်းအနားကို စစ်ကိုင်းတိုင်း၊ အရာတော်မြို့နယ်နဲ့ ကနီမြို့နယ်တွေမှာ မေလ ၈ ရက်က ပြုလုပ်ခဲ့တယ်လို့ အရာတော်မြို့နယ် ကျောင်းသားများသမဂ္ဂဆီက သိရပါတယ်။

အရာတော်မြို့နယ်မှာကျင်းပတဲ့ ဗကသများအဖွဲ့ချုပ်ရဲ့ နှစ်ပတ်လည်အခမ်းအနားကို မျိုးဆက်ဟောင်း ကျောင်းသားခေါင်းဆောင်တွေ၊ တာဝန်ထမ်းဆောင်ဆဲ မျိုးဆက်သစ်ကျောင်းသားတွေနဲ့ ဒေသတွင်း အုပ်ချုပ်ရေး၊ ကာကွယ်ရေး၊ ပညာရေး တာဝန်ရှိသူတွေက တက်ရောက်ခဲ့တာဖြစ်ပါတယ်။

အဆိုပါအခမ်းအနားကို တက်ရောက်သူ ၁၀၀ ခန့်နဲ့ ကျင်းပခဲ့တာဖြစ်ပြီး ဗကသခွပ်ဒေါင်းအလံတင်တာ၊ ဗကသအလံကို အလေးပြုတာ၊ မျိုးဆက်ဟောင်းနဲ့ တာဝန်ထမ်းဆောင်ဆဲ ကျောင်းသားတွေက အမှတ်တရ စကားပြောကြားတာ၊ ဗကသများအဖွဲ့ချုပ်ရဲ့ နှစ် ၉၀ ပြည့် ထုတ်ပြန်ချက်နဲ့ မိတ်ဖက်အဖွဲ့အစည်းတွေက ပေးပို့တဲ့ သဝဏ်လွှာဖတ်ကြားတာနဲ့ သမဂ္ဂသီချင်း သီဆိုဖျော်ဖြေတာတွေ ပြုလုပ်ခဲ့ပါတယ်။

ကနီမြို့နယ်မှာလည်း ဗကသများအဖွဲ့ချုပ် နှစ် ၉၀ ပြည့်အခမ်းအနားကို ကျင်းပခဲ့ပြီး ဒေသခံပြည်သူတွေနဲ့ ဒေသတွင်းကျောင်းသား ၁၀၀ ခန့် တက်ရောက်ခဲ့တယ်လို့ အခမ်းအနား သမဂ္ဂအဖွဲ့ဝင်တဦးက ဆိုပါတယ်။

ဗကသများအဖွဲ့ချုပ်က အာဏာရှင်စနစ် အမြစ်ပြတ်တဲ့အထိ ဆန့်ကျင်သွားမှာဖြစ်ပြီး ညီညွတ်ရေးကို ရှေးရှုပြီး ဆက်လက်တိုက်ပွဲဝင်သွားမယ်လို့ သူတို့ရဲ့ မေလ ၈ ရက်နေ့ ထုတ်ပြန်ကြေညာချက်မှာ ဖော်ပြထားပါတယ်။

ဗကသများအဖွဲ့ချုပ်ရဲ့ နှစ်ပေါင်း ၉၀ ပြည့်အခမ်းအနားကို ကရင်နီဒေသနဲ့ ထိုင်းနိုင်ငံ မဲဆောက်မြို့တို့ မှာလည်း ကျင်းပပြုလုပ်ခဲ့တယ်လို့ သိရပါတယ်။

သခင်ဗဟိန်း၊ သခင်အောင်ဆန်း စတဲ့ ကျောင်းသားခေါင်းဆောင်တွေ ဦးဆောင်ပြီး ၁၉၃၆ ခုနှစ် မေလ ၈ ရက်မှာ စတင်ဖွဲ့စည်းခဲ့တဲ့ ဗကသများအဖွဲ့ချုပ်ဟာ အခုနှစ် မေလ ၈ ရက်မှာ နှစ်ပေါင်း ၉၀ ပြည့်မြောက်ခဲ့တာလည်း ဖြစ်ပါတယ်။

ထန်းတပင်၊ မေ ၈၊ ၂၀၂၆။

ပဲခူးတိုင်း၊ ဖြူးမြို့နယ်၊ သစ်ချောက်ခင်ကျေးရွာနဲ့ ထန်းတပင်မြို့နယ်၊ ဖွားအေစုရွာအစပ်က လှေဆိပ်ဗုံးကြဲခံရပြီး ပြည်သူ ၆ ဦးသေဆုံးခဲ့တယ်လို့ ဖြူးမြို့နယ်ပကဖတာဝန်ရှိသူဆီက သိရပါတယ်။

မေလ ၇ ရက် နေ့လယ် ၁၂ နာရီကျော်မှာ စစ်ကော်မရှင်တပ်က ဂျက်ဖိုက်တာ ၂ စီး၊ အသေခံဒရုန်း၊ Mi 35 ရဟတ်ယာဉ်တွေနဲ့ ဖွားအေစုရွာအပြင်ဘက်ရှိလှေဆိပ်ကို ၄ ကြိမ်ထက်မနည်း ပစ်ခတ်ဗုံးကြဲခဲ့တာလို့ ဆိုပါတယ်။

“အဲ့နေရာလေးမှာ လှေဆိပ်ဆိုတော့ စျေးဆိုင်လေးရှိတယ်။ လှေဆိပ်ရဲ့သဘာဝ စျေးဆိုင်လေးရှိတော့ ဆိုင်ပိုင်ရှင်ကာ ကုန်ပစ္စည်းတွေလာတိုက်တဲ့ ဂွန်ဒေါင်း(ထော်လာဂျီ)မောင်းသူတွေကောရှိနေချိန် လာကြဲတာ။ ဂွန်ဒေါင်းသမားတွေကောဆိုင်ပိုင်ရှင်ကော လှေဆိပ်ရှိနေသူတွေပါကုန်တာ”လို့ ဖြူးမြို့နယ်ပကဖတာဝန်ရှိသူက ပြောပါတယ်။

ဗုံးကြဲမှုကြောင့် အသက် ၁၀ နှစ်အောက် ကလေး ၂ ဦး၊ ဂွန်ဒေါင်းသမားနဲ့ လှေသမားတွေဖြစ်တဲ့ အသက် ၂၅ နှစ်ကနေ ၅၀ ကြားတွေဖြစ်တဲ့ ကိုဇော်ဝင်းထွဋ်၊ ကိုသံခဲ၊ ကိုစိုင်းကိုကို၊ ကိုဝကြီးတို့ သေဆုံးခဲ့တယ်လို့ ဆိုပါတယ်။

ဒါ့အပြင် စျေးဆိုင်ပိုင်ရှင်တွေအပါအဝင် လှေစောင့်နေသူတွေဖြစ်တဲ့ အသက် ၃၀ ကျော်အရွယ် အမျိုးသမီး ၁ ဦးနဲ့ အမျိုးသား ၃ ဦးထိခိုက်ဒဏ်ရာရခဲ့ပြီး စျေးဆိုင်နဲ့ ထော်လာဂျီအချို့ ပျက်စီးပါတယ်။

မေလ ၃ ရက်ကလည်း ထန်းတပင်မြို့နယ်၊ ငါးဆီလှောင်၊ ဇလုပ်ကြီး၊ ဖွားအေစုရွာတွေ လေကြောင်းကနေဗုံးကြဲခံရပြီး ပြည်သူ ၂ ဦးသေဆုံးကာ နေအိမ်တွေလည်းပျက်စီးခဲ့တယ်လို့ သိရပါတယ်။

စာတည်း – လင်း

မုန်း၊ မေ ၇၊ ၂၀၂၆။

ပဲခူးတိုင်း၊ ကျောက်ကြီးမြို့နယ်၊ မုန်းမြို့မှာ မြေမြှုပ်မိုင်းထိလို့ ဆယ်ကျော်သက်မိန်းကလေး ၁ ဦး မျက်လုံးနဲ့ခြေထောက် ၁ ဖက်စီ ဆုံးရှုံးခဲ့ရတယ်လို့ မိသားစုနဲ့နီးစပ်သူတွေထံက သိရပါတယ်။

မိုင်းထိသူဟာ မုန်းမြို့၊ အမှတ် ၄ ရပ်ကွက်နေထိုင်တဲ့ အသက် ၁၅ နှစ်အရွယ် မချယ်ရီလင်း ဖြစ်ပြီး မေလ ၂ ရက် မနက် ၉ နာရီခန့်မှာ ၆ ရပ်ကွက်အနောက်ကြောရှိ ဥယျာဥ်ခြံအတွင်း သီးနှံတွေဝယ်ဖို့သွားရောက်စဥ် မြေမြှုပ်မိုင်းနင်းမိခဲ့တာလို့ ဆိုပါတယ်။

“အမေနဲ့လိုက်သွားတာ။ ခြံထဲကို ၃ ယောက်သွားတာ။ ခြံရှင်ရယ်၊ အမေရယ်၊ သူရယ်။ ခြံ ၂ ခြံကြားမှာ (မိုင်း)ပေါက်တာ။ သူကအလယ်က၊ အမေကျော်သွားပြီးမှ မိုင်းကပေါက်တာ” လို့ မိသားစုနဲ့နီးစပ်သူက မြေလတ်အသံကို ပြောပါတယ်။

မိုင်းထိတာကြောင့် မချယ်ရီလင်းမှာ ခြေထောက်နဲ့မျက်လုံးတွေမှာ မိုင်းစထိမှန်ဒဏ်ရာတွေအများအပြားရရှိခဲ့ပြီး တောင်ငူဆေးရုံမှာဆေးကုသမှုခံယူခဲ့ရကာ ရရှိဒဏ်ရာပြင်းထန်တာကြောင့် ညာဘက်ခြေထောက်ဖြတ်တောက်လိုက်ရသလို မျက်စိ ၁ လုံးကိုလည်း ထုတ်လိုက်ရတယ်လို့ သိရပါတယ်။

ဒါ့အပြင်ကျန်ရှိနေတဲ့ မျက်လုံး ၁ လုံးကိုလည်း ခွဲစိတ်ထားရပြီး ပြန်ကောင်းလာဖို့မျှော်လင့်နေရသလို ဘယ်ခြေထောက် ၁ ချောင်းမှာလည်း မိုင်းအစဝင်ဒဏ်ရာအများအပြားရရှိထားပါတယ်။

မိုင်းထိပြီး ဆေးကုသနေရတဲ့ ကလေးငယ်အတွက် ဆေးဖိုးဝါခအချို့ကို အလှူရှင်အချို့ကလှူဒါန်းမှုတွေလည်းရှိနေပြီး ဆေးကုသစရိတ်ကြီးမာတာကြောင့် မိသားစုဝင်တွေအနေနဲ့ ငွေကြေးလိုအပ်မှုတွေတော့ရှိနေတယ်လို့ သိရပါတယ်။

မိုင်းထိတဲ့ မိန်းကလေးငယ်ရဲ့ ဖခင်ဖြစ်သူကလည်း ၂၀၀၇ ခုနှစ်က မုန်းမြို့အနီး တောင်ပေါ်မှာ ဟင်းရွက်ခူးသွားချိန်မိုင်းထိလို့ မျက်စိ ၂ ဖက်ကွယ်ထားသလို ခြေထောက် ၁ ဖက်လည်း ဆုံးရှုံးထားတယ်လို့ ဆိုပါတယ်။

မုန်းမြို့အနီးဝန်းကျင်မှာ ၂ ဖက်လက်နက်ကိုင်တပ်ဖွဲ့တွေထောင်ထားတဲ့ မိုင်းတွေကြောင့် ဒေသခံတွေအနေနဲ့ မြေမြှုပ်မိုင်းနင်းမိတဲ့ဖြစ်စဥ်တွေ မကြာခဏဆိုသလိုဖြစ်ပွားနေပြီး သေဆုံး၊ ဒဏ်ရာရတာတွေ ဖြစ်ပေါ်နေတာပါ။

ပြီးခဲ့တဲ့နှစ် စက်တင်ဘာ ၂၈ ရက်ကလည်း ကျောက်ကြီးမြို့နယ်၊ မုန်းမြို့၊ ရေအိုးစင်ကျေးရွာအနီးမှာ ထင်းခုတ်သွားတဲ့အမျိုးသား မိုင်းထိလို့သေဆုံးသွားခဲ့တယ်လို့ သိရပါတယ်။

မင်းလှ၊ မေ ၇၊ ၂၀၂၆။

ပဲခူးတိုင်းအနောက်ခြမ်း၊ မင်းလှမြို့နယ်၊ ကိုင်းပြင်ကြီးရွာမှာ သေနတ်သံကြားလို့ ထွက်ပြေးတဲ့လူငယ်တွေကို စစ်တပ်က လိုက်လံပစ်ခတ်ရာက ဆယ်ကျော်သက် ၁ ဦး သေဆုံးခဲ့တယ်လို့ ဒေသခံတွေဆီက သိရပါတယ်။

မေလ ၆ ရက် ယမန်နေ့ ည ၈ နာရီခန့်က ကိုင်းပြင်ကြီးကျေးရွာနေအိမ်တခုရှေ့မှာ မိုလ်ဘိုင်းဂိမ်းကစားနေကြတဲ့ လူငယ်တွေကို ကျေးရွာတွင်းသေနတ်ပစ်ဖောက်ဝင်ရောက်လာတဲ့ စစ်ကော်မရှင်တပ်နဲ့ပြည်သူ့စစ်တပ်ဖွဲ့ဝင်တွေက သေနတ်နဲ့လိုက်လံပစ်ခတ်ရာက သေဆုံးခဲ့တာလို့ ဆိုပါတယ်။

“ အဲ့(စစ်သားဟောင်းဦးရဲဘော်ကြီး)အိမ်က ကလေးပျော်တဲ့အိမ်၊ ကလေးတွေက ဂိမ်းဆော့နေတာပေါ့။ မီးဖွင့်ထားတယ်ပေါ့။ ပေါ်တာဆွဲတာမဟုတ်ဘူး။ သေနတ် ၂ချက်ဖောက်လို့ ကလေးတွေကထွက်ပြေးတာ” လို့ ကိုင်းပြင်ကြီးရွာခံတဦးက မြေလတ်အသံကို ပြောပါတယ်။

သေနတ်ပစ်ဖောက်သံကြားတာကြောင့် ဂိမ်းဆော့နေတဲ့လူငယ်တွေဟာ ကြောက်လန့်ပြီး နေအိမ်အနောက်ဘက်ရှိ ကျွန်းပင်တန်းတွေအတွင်း ဝင်ရောက်ထွက်ပြေးချိန်မှာ စစ်တပ်နဲ့ပြည်သူ့စစ်တပ်ဖွဲ့ဝင်တွေက အနောက်ကနေ သေနတ်နဲ့လိုက်လံပစ်ခတ်ခဲ့တာလို့ သိရပါတယ်။

သေနတ်နဲ့လိုက်လံပစ်ခတ်တာကြောင့် ကိုင်းပြင်ကြီးရွာနေ အသက် ၁၅ နှစ်အရွယ် မောင်အောင်ဇေယျာဖြိုး မှာ ရင်ဘတ်ဖောက်ထွက်ထိမှန်ဒဏ်ရာတွေနဲ့ သေဆုံးခဲ့တာပါ။

ပစ်ခတ်သူတွေဟာ ကိုင်းပြင်ကြီးရွာပြည်သူ့စစ်ခေါင်းဆောင် နေလင်းနဲ့ ပူးပေါင်းစစ်ကော်မရှင်တပ်ဖွဲ့ဝင်တွေဖြစ်ပြီး မောင်အောင်ဇေယျာဖြိုး သေဆုံးမှုအပေါ် နစ်နာကြေး၊ နာရေးစရိတ်ပေးမယ်ဆိုကာ လာရောက်ပြောဆိုသွားတယ်လို့ ဆိုပါတယ်။

“ပစ်ပြီးတော့ ၁ ယောက်တော့လဲသွားတယ်။ မှန်ပြီးလဲသွားတယ်။ စိတ်တော့မကောင်းဘူးလို့ စစ်ကော်မရှင်တပ်သားတွေကပြောပြီး ဒီကောင်တွေမပြန်ဘူး။ စကားတွေဘာတွေပြောဆိုပြီးမှ ပြန်သွားတာ” လို့ နောက်ထပ်ဒေသခံတဦးက ပြောပါတယ်။

သေဆုံးလူငယ်ရဲ့မိဘတွေဟာ ထိုင်းနိုင်ငံမှာ အလုပ်သွားရောက်လုပ်ကိုင်နေတာ ၃ နှစ်နီးပါးရှိပြီဖြစ်ပြီး အသက် ၆ နှစ်အရွယ်ညီမဖြစ်သူနဲ့အတူ ကိုင်းပြင်ကြီးရွာရှိ အဒေါ်နေအိမ်မှာနေထိုင်ကြတယ်လို့ သိရပါတယ်။

ကနီ၊ မေ ၇၊ ၂၀၂၆။

စစ်ကိုင်းတိုင်း၊ ကနီမြို့နယ်အတွင်း ကျေးရွာ ၁ ရွာရှိဆေးရုံ လေကြောင်းကနေဗုံးကြဲတိုက်ခိုက်ခံရပြီး ဆေးကုသနေသူ ၂ ဦးသေဆုံးခဲ့တယ်လို့ ဒေသကာကွယ်ရေးအဖွဲ့ဝင်တွေနဲ့နီးစပ်သူတွေဆီက သိရပါတယ်။

မေလ ၇ ရက်မနက် ၁၀ နာရီမှာ အဆိုပါဆေးရုံကို ဂျက်ဖိုက်တာ ၁ စီးနဲ့ ဗုံး ၄ လုံးကြဲချခဲ့ရာမှာ သေဆုံးခဲ့ကြတာလို့ ဆိုပါတယ်။

“ဂျက်ဖိုက်တာကော ဒရုန်းနဲ့ကောချတာ။ ဂျက်ဖိုက်တာနဲ့က ဗုံး ၄ လုံး၊ ရောကတ်နဲ့ ၂ လုံးချသွားတာ။ ဆေးရုံနေရာကို ထိမှန်တာ”လို့ ဒေသကာကွယ်ရေးအဖွဲ့ဝင်တွေနဲ့ နီးစပ်သူတဦးက ပြောပါတယ်။

ဗုံးကြဲခံရလို့ ဆေးကုသနေတဲ့ အမျိုးသား ၂ ဦးသေဆုံးပြီး ထိခိုက်သူအချို့လည်းရှိပြီး အသေးစိတ်ကိုတော့ စာရင်းကောက်ယူနေတုန်းလို့ ဆိုပါတယ်။

ဗုံးကြဲခံရပြီးနောက် အခြားဆေးကုသနေသူတွေကို အရေးပေါ်ပြောင်းရွှေ့ရပြီး ဒဏ်ရာရသူတွေလည်း နေရာရွှေ့ပြောင်းနေရတယ်လို့ သိရပါတယ်။

ပြီးခဲ့တဲ့နှစ် နိုဝင်ဘာ ၁၁ ရက်ကလည်း ကနီမြို့နယ်အတွင်းက ဆေးရုံ ၁ ခုကို စစ်ကော်မရှင်ဘက်က စက်တပ်လေထီးနဲ့ဗုံးကြဲခဲ့လို့ ဆေးရုံဝန်ထမ်းအချို့အပါအဝင် ဆေးကုသူနေသူ ၇ ဦးသေဆုံးပြီး ၂၀ ကျော်ဒဏ်ရာရခဲ့သေးတယ်လို့ သိရပါတယ်။

စာတည်း – လင်း