မြေလတ်အသံ

စစ်ကိုင်း၊ ဇွန် ၂၇၊ ၂၀၂၆။

စစ်ကိုင်းတိုင်း၊ ဝက်လက်မြို့နယ်နဲ့ ရွှေဘိုမြို့နယ်တို့က ကျေးရွာ ၃ ရွာမှာ စစ်ကော်မရှင်တပ်က လေကြောင်းကနေဗုံးကြဲခဲ့တာကြောင့် နေအိမ် ၁၀ လုံးပျက်စီးတယ်လို့ သက်ဆိုင်ရာမြို့နယ်ပကဖတွေနဲ့ တိုက်နယ်ပကဖ တာဝန်ရှိသူတွေဆီက သိရပါတယ်။

ဇွန် ၂၆ ရက်မနက် ၅ နာရီကျော်မှာ Y12 လေယာဥ်က ဝက်လက်မြို့နယ်၊ မြင်းသည်ကျေးရွာအနီး တောစပ်ကို ဗုံး ၆ လုံးကြဲချရာ ထိခိုက်ပျက်စီးမှုမရှိခဲ့ဘူးလို့ ဝက်လက်မြို့နယ်ပကဖတာဝန်ရှိသူဆီက သိရပါတယ်။

အဲဒီနောက်တဆက်တည်းဆိုသလို ရွှေဘိုမြို့နယ်၊ ရေတော်မူကျေးရွာကို ဗုံး ၄ လုံး ကြဲချရာ ၂ လုံးပေါက်ကွဲခဲ့သလို တက်တူကျေးရွာကို ၆ လုံးကြဲချခဲ့ရာ ၆ လုံးစလုံးပေါက်ကွဲခဲ့တာလို့လည်း ရွာခံကာကွယ်ရေးအဖွဲ့ဝင်တဦးက ပြောပါတယ်။

“မြင်သည်ဘက်က လေကြောင်းတိုက်ခိုက်မှုလုပ်တယ်လို့ သိသိချင်း ဗုံးခိုကျင်းတွေထဲ ဝင်ခိုင်းလိုက်တော့ လူထိခိုက်မရှိလိုက်ဘူး။ အိမ်တွေကြားကိုချတာဆိုတော့ အိမ်ထိခိုက်ပျက်စီးတော့ရှိတယ်။ “လို့ ရွာခံကာကွယ်ရေးအဖွဲ့ဝင်တဦးက ပြောပါတယ်။

တက်တူးရွာဗုံးကြဲခံရမှုမှာ နေအိမ် ၈ လုံး၊ ယက္ကန်းစင် ၂ ခု၊ ထော်လာဂျီ ၁ စီးပျက်စီးမှုရှိခဲ့ပြီး ရေတော်မူကျေးရွာမှာတော့ လူနေအိမ် ၂ လုံးပျက်စီးခဲ့တယ်လို့ ဆိုပါတယ်။

ဗုံးကြဲမှုကြောင့် မြင်းသည်နဲ့ရေတော်မူရွာတွေက ပြည်သူတွေက နေရပ်တိမ်းရှောင်တာ မရှိပေမယ့် တက်တူးရွာခံတွေကတော့ ဘေးလွတ်ရာတိမ်းရှောင်နေကြရပါတယ်။

မေ ၂၇ ရက်ကလည်း ရွှေဘိုမြို့နယ်၊ ရေတော်မူကျေးရွာကို စစ်ကော်မရှင်ရဲ့ ဒရုန်းကျရောက်ပေါက်ကွဲပြီး လင်မယား ၂ ဦးသေဆုံးကာ အမျိုးသမီး ၂ ဦးဒဏ်ရာရခဲ့ပါသေးတယ်။

စာတည်း – လင်း

နတ်မောက်၊ ဇွန် ၂၆၊ ၂၀၂၆။

မကွေးတိုင်း၊ နတ်မောက်မြို့နယ်၊ သမုန်းကုန်းကျေးရွာကို စစ်ကော်မရှင်တပ်က လေကြောင်းကနေဗုံးကြဲ၊ ပစ်ခတ်ခဲ့တာကြောင့် ပြည်သူ ၅ ဦးသေဆုံးတယ်လို့ နတ်မောက်မြို့နယ် ပကဖတာဝန်ရှိသူတွေဆီ သိရပါတယ်။

ဇွန် ၂၅ ရက်ညနေ ၄ နာရီကျော်မှာ ရွာထဲကို စစ်ကော်မရှင်ရဲ့ဂျက်ဖိုက်တာ ၂ စီးကနေ ဗုံး ၄ လုံးကြဲချခဲ့တဲ့အပြင် စက်သေနတ်တွေနဲ့ပါ ပစ်ခတ်ခဲ့တာလို့ ဆိုပါတယ်။

“ရွာလယ်ပေ ၅၀ လမ်းရဲ့တဖက်က နေအိမ်တွေနားရယ် ရွာမြောက်ဘက်ခြမ်းက လူနေအိမ်ကြားတွေထဲကို ကျတာ။ တိုက်ပွဲတွေဖြစ်နေတာမျိုးလည်းမရှိဘူး”လို့ နတ်မောက်မြို့နယ်ပကဖတာဝန်ရှိသူက ပြောပါတယ်။

ဗုံးပေါက်ကွဲစထိမှန်တာကြောင့် အသက် ၃၃ နှစ်အရွယ်မသန်းသန်းမော်၊ သားဖြစ်သူ အသက် ၁၂ နှစ်အရွယ် မောင်အောင်ဘုန်းခန့်၊ အသက် ၈ နှစ်အရွယ် ညီဘုန်းခန့်၊ အသက် ၃၉ နှစ်အရွယ် ကိုချစ်ဦး၊ အသက် ၆၉ နှစ်အရွယ် ဒေါ်ရီသက်တို့ သေဆုံးခဲ့တယ်လို့ ဆိုပါတယ်။

ဒါ့အပြင် အသက် ၁၀ အရွယ် မိန်းကလေးငယ် ၁ ဦး၊ အသက် ၃၀ ကနေ ၄၀ ကြားရှိ အမျိုးသမီး ၁ ဦးနဲ့အမျိုးသား ၁ ဦးတို့ ထိခိုက်ဒဏ်ရာရပြီး နေအိမ် ၁၀ လုံးလည်း ပျက်စီးသွားတယ်လို့ နတ်မောက်မြို့နယ်ပကဖတာဝန်ရှိသူက ပြောပါတယ်။

ဗုံးကြဲခံရပြီးနောက် ရွာခံအချို့ဟာ ဘေးလွတ်ရာကို တိမ်းရှောင်သွားကြရတယ်လို့ ဆိုပါတယ်။

မတ် ၁ ရက်ကလည်း မကွေးတိုင်း၊ မင်းတုန်းမြို့နယ်၊ ပြောင်းကျေးရွာအနီးကို စစ်ကော်မရှင်ဘက်က လေကြောင်းကနေ ဗုံးကြဲတာကြောင့် ပြည်သူ ၂၅ ဦးသေဆုံးကာ ၂၀ ကျော်ဒဏ်ရာရခဲ့ပါသေးတယ်။

စာတည်း – လင်း

စစ်ကိုင်း၊ ဇွန် ၂၆၊ ၂၀၂၆။

စစ်ကိုင်းတိုင်း၊ ရွှေဘိုမြို့နယ်နဲ့ မြောင်မြို့နယ်တို့မှာ အသေခံဒရုန်းနဲ့တိုက်ခိုက်ခံရလို့ ပြည်သူ ၁ ဦး ဒဏ်ရာရပြီး နေအိမ် ၆ လုံး မီးလောင်ခဲ့တယ်လို့ ဒေသကာကွယ်ရေးအဖွဲ့ဝင်တွေဆီက သိရပါတယ်။

ဇွန် ၂၅ ရက်မနက် ၁၁ နာရီကျော်မှာ ရွှေဘိုမြို့နယ်၊ ဘိုတဲကုန်းကျေးရွာကို ရွှေဘိုလေ့ကျင့်ရေး ၈ က လွှတ်တင်လိုက်တဲ့ အသေခံဒရုန်း ၂ စီးက ကျရောက်ပေါက်ကွဲခဲ့တာလို့ ဆိုပါတယ်။

“ရွာထိပ် သံတိုသံစရောင်းဝယ်ရေးလုပ်တဲ့ ဆိုင်ပေါ်ကျတယ်။ ပြီးတော့ စိုက်ပျိုးရေးရုံးထဲ တစီးကျတယ်။ သံတိုသံစဆိုင်ကို ဒရုန်းကျချိန်တော့လူထိတာရှိတယ်”လို့ ရွှေဘိုမြို့နယ်ပကဖတာဝန်ရှိသူက ပြောပါတယ်။

ဒရုန်းထိမှန်တာကြောင့် အသက် ၄၀ ကျော်အရွယ် အမျိုးသမီး ၁ ဦးလက်မောင်းထိခိုက်ဒဏ်ရာရပြီး ဆိုင်နဲ့ ရုံးအဆောက်အဦ: ပျက်စီးမှုရှိခဲ့တယ်လို့ ဆိုပါတယ်။

အလားတူ ည ၇ နာရီကျော်မှာ နမခကနေ လွှတ်တင်လိုက်တဲ့ အသေခံဒရုန်း ၄ စီးဟာ မြောင်မြို့နယ်၊ နဘတ်ကျေးရွာထဲက ပြည်သူနေအိမ်တွေပေါ်ကို ကျရောက်ပေါက်ကွဲခဲ့တယ်လို့ နဘတ်တိုက်နယ် တာဝန်ခံက ပြောပါတယ်။

“၆ နာရီလောက်ကတည်းက မိုက်နဲ့လိုက်အော်ပြီး လူတွေကိုရွာပြင်ထုတ်လိုက်နိုင်တယ်။ သတင်းကြိုရလို့ပါ။ အိမ်တွေတော့ မီးလောင်ပျက်စီးတာရှိတယ်”လို့ ဆိုပါတယ်။

ဒီတိုက်ခိုက်မှုကြောင့် နေအိမ် ၆ လုံးမီးလောင်ပျက်စီးခဲ့ပြီး ဒေသခံတွေကတော့ ဘေးလွတ်ရာမှာ တိမ်းရှောင်နေကြရတယ်လို့ ဆိုပါတယ်။

ဧပြီ ၃ ရက်နေ့ကလည်း မြောင်မြို့နယ်၊ နဘက်ကျေးရွာကို ဗုံးကြဲခံရလို့ မိန်းကလေးငယ် ၁ ဦး သေဆုံးပြီး မိဘနှစ်ဦးဒဏ်ရာရခဲ့ပါသေးတယ်။

စာတည်း – လင်း

စစ်ကိုင်း၊ ဇွန် ၂၅၊ ၂၀၂၆။

စစ်ကိုင်းတိုင်း၊ မုံရွာ၊ မြင်းမူ၊ ချောင်းဦး၊ စစ်ကိုင်း၊ ဘုတလင်မြို့နယ်တွေမှာ တိုက်ပွဲဖြစ်ခဲ့ပြီး စစ်ကော်မရှင်တပ်ဖွဲ့ဝင် ၃၃ ဦးသေဆုံးတယ်လို့ ဇွန် ၂၄ ရက်မှာ ပြည်သူ့ကာကွယ်ရေးတပ်မတော် – PDF က သတင်းထုတ်ပြန်ပါတယ်။

မေ ၅ ရက်မှာ မုံရွာမြို့နယ်၊ မုံရွာ-ယာကြီး-ကလေးဝလမ်းပေါ် သင့်ငံရွာမှာရောက်ရှိနေတဲ့ တပ်မ ၉၉ လက်အောက်ခံ ခမရ-၁၄ မှ အင်အား ၂၀၀ ပါစစ်ကြောင်းကို ယင်းမာပင်ခရိုင်စစ်ဌာနကွပ်ကဲမှုနဲ့ မိုင်းခွဲ တိုက်ခိုက်ခဲ့ရာ စစ်ကော်မရှင်တပ်ဖွဲ့ဝင် ၆ ဦး သေဆုံးပြီး ထိခိုက်ဒဏ်ရာရသူအများအပြားရှိတယ်လို့ ဆိုပါတယ်။

အဲ့ဒီနောက် မေ ၆ ရက်မှာ အဲ့ဒီစစ်ကြောင်းကခွဲထွက်လာတဲ့ အင်အား ၅၀ ပါ စစ်ကြောင်းဟာ ချောင်းမရွာကိုရောက်လာစဥ် သေဆုံးတပ်သား ၁ ဦးရဲ့ ရုပ်အလောင်းကိုမြှုပ်ကာ ကျန်ဒဏ်ရာရ တပ်သားတွေနဲ့ ဘန့်ဘွေး(ပျူရွာ)ကိုဝင်ရောက်သွားတယ်လို့ ထုတ်ပြန်ချက်မှာဖော်ပြထားပါတယ်။

ဒါ့အပြင် မေ ၁၉ ရက်မှာလည်း မြင်းမူမြို့နယ်၊ အလ္လကပ္ပရွာအရှေ့ထိပ် စစ်ကော်မရှင်ဂိတ်က ထွက်လာတဲ့ စစ်ကော်မရှင်တပ်သားတွေကို လက်လုပ်မိုင်း ၃ လုံးနဲ့ မိုင်းဆွဲတိုက်ခိုက်ခဲ့ရာ ၃ ဦး သေဆုံးပြီး ၃ ဦး ထိခိုက်ဒဏ်ရာရရှိခဲ့တယ်လို့ ဆိုပါတယ်။

အလားတူ ဇွန် ၂ ရက်မှာ ချောင်းဦးမြို့နယ်၊ ငါးယှန်ကျေးရွာကထွက်လာတဲ့ တပ်မ ၃၃ လက်အောက်ခံ ခလရ – ၇၆)၊ ခမရ – ၁၃၊ ရတဖ – ၁၆၊ ပြည်သူ့စစ်ပူးပေါင်းအင်အား ၁၀၀ ပါစစ်ကြောင်းကို ချောင်းဦး – ပခုက္ကူ လမ်းပိုင်းပေါ်ရှိ ဆင်မြေကျေးရွာကိုထွက်လာချိန် ထပ်မံတိုက်ခိုက်ခဲ့ပါတယ်။

ဒီတိုက်ခိုက်မှုအတွင်း စစ်ကော်မရှင်တပ်ဖွဲ့ဝင် ၂၃ ဦးသေဆုံး၊ ၉ ဦးဒဏ်ရာရကာ စစ်သုံ့ပန်း ၂ ဦးဖမ်းမိပြီး လက်နက်မျိုးစုံ ၁၆ လက်လည်းသိမ်းဆည်းနိုင်ခဲ့တယ်လို့ ဆိုပါတယ်။

အလားတူ ဇွန် ၅ ရက်မှာလည်း စစ်ကိုင်းမြို့နယ်၊ ကျောက်ဆည်ရွာနဲ့ အုန်းတောရွာကြားမှာ နမခ က ထွက်လာတဲ့ သံပြားကာ ကား ၈ စီး၊ ဆီဘောက်ဆာ ကား ၁၄ စီးကို စစ်ကိုင်းခရိုင်စစ်ဌာနကွပ်ကဲမှုနဲ့ မိုင်း ၆ လုံးသုံးတိုက်ခိုက်ရာ ကား ၁ စီးပျက်စီးပြီး ထိခိုက်ဒဏ်ရာရသူ အများအပြားရှိခဲ့တယ်လို့ ဆိုပါတယ်။

အဲ့ဒီနေ့မှာပဲ မြင်းမူမြို့နယ်၊ ထီးဆောင်းရွာ အရှေ့ဘက် စစ်ကိုင်း တမခ -၃၃ မှ ထွက်ခွာလာတဲ့ သံပြားကာ ကား ၈ စီး၊ ၁၂ ဘီးကား ၂ စီး နဲ့ ၆ ဘီးကား ၅ စီးကို စစ်ကိုင်းခရိုင်စစ်ဌာနကွပ်ကဲမှုနဲ့ ကြားဖြတ်မိုင်းဆွဲတိုက်ခိုက်ခဲ့သေးတယ်လို့ ထုတ်ပြန်ချက်မှာ ဖော်ပြပါတယ်။

ဇွန် ၁၅ ရက်မှာလည်း မြင်းမူမြို့နယ်၊ ဂွေးပင်တောရွာအထိုင်ချစစ်ကော်မရှင်တပ်သား အင်အား ၂၅ ဦးခန့်နဲ့ မြောင်လမ်းခွဲနဲ့ ဂွေးပင်တောရွာကြား ကင်းပုန်းဝပ်ဖို့ထွက်လာချိန် မိုင်းဆွဲတိုက်ခိုက်ခဲ့တယ်လို့ ဆိုပါတယ်။

အဲ့ဒီနေ့မှာပဲ စစ်ကိုင်းမြို့နယ်၊ နှုံးတွင်းရွာနဲ့ နတ်ခရိုင်ရွာကြား နမခ ကထွက်လာတဲ့ စစ်ယာဥ်တန်းကို လက်လုပ်မိုင်း ၂ လုံးနဲ့ မိုင်းဆွဲတိုက်ခိုက်ခဲ့ရာ ကား ၂ စီးထိခိုက်ပျက်စီးခဲ့သလို စစ်ကိုင်း တမခ -၃၃ မှ ထွက်လာတဲ့ စစ်ယာဥ်တန်းကို မြင်းမူမြို့နယ်၊ ထီးဆောင်းရွာအရှေ့ဘက်မှာ ထပ်မံပြီး ပဒေသာမိုင်း ၃ လုံးနဲ့ မိုင်းဆွဲတိုက်ခိုက်ခဲ့တယ်လို့ ထုတ်ပြန်ချက်မှာ ဖော်ပြထားပါတယ်။

ဇွန် ၁၈ ရက်မှာတော့ ဘုတလင်မြို့နယ်၊ အနောက်ဇီးတောရွာမှ ဘုတလင်မြို့ ထွေ/အုပ်ရုံးကို ထွက်လာတဲ့ နမခ မှ အင်အား ၂၅၀ ခန့်ပါစစ်ကြောင်းကို မုံရွာခရိုင်စစ်ဌာနကွပ်ကဲမှုနဲ့ စောင့်ကြို မိုင်းဆွဲတိုက်ခိုက်ခဲ့ရာ စစ်ကော်မရှင်တပ်ဖွဲ့ဝင် ၅ ဦးခန့် ပြင်းထန်ထိခိုက်ဒဏ်ရာ ရရှိခဲ့တယ်လို့ သိရပါတယ်။

ဒီတိုက်ခိုက်မှုတွေအတွင်း စစ်ကော်မရှင်တပ်ဖွဲ့ဝင် ၃၃ ဦးသေဆုံးကာ ၁၇ ဦး ထိခိုက်ဒဏ်ရာရရှိပြီး စစ်သုံ့ပန်း ၂ ဦး အပါအဝင် လက်နက်မျိုးစုံ ၁၆ လက်နဲ့ ခဲယမ်းပစ္စည်းတွေကို သိမ်းပိုက်ရရှိခဲ့တယ်လို့ ထုတ်ပြန်ချက်မှာ ဖော်ပြထားပါတယ်။

တံတားဦး၊ ဇွန် ၂၄၊ ၂၀၂၆။

မန္တလေးတိုင်း၊ တံတားဦးမြို့မှာ လမ်းနယ်နိမိတ်ကိုကျူးကျော်တယ်ဆိုကာ နေအိမ်တချို့ကို ဇွန် ၂၅ ရက်နောက်ဆုံးထားပြီး ဖျက်သိမ်းဖို့ စစ်ကော်မရှင်ရဲ့ တံတားဦးမြို့နယ်၊ လမ်းတံတားဌာနက အသိပေးထုတ်ပြန်ထားတယ်လို့ မြို့ခံတွေက ပြောပါတယ်။

တံတားဦးမြို့အရှေ့ဘက်အဝင်ကနေ မြို့လည်မီးပွိုင့်အထိ လမ်းဘေးဝဲယာက နေအိမ် ၁၀၀ နီးပါးကို ဖျက်သိမ်းဖို့ မေ ၂၅ ရက်မှာ ထုတ်ပြန်ခဲ့တာလို့ ဆိုပါတယ်။

“ဒီကာလကြီး နေစရာအခက်အခဲနဲ့ ဘယ်သူမှမဖျက်ကြဘူး။ သူတို့လာထိုးဖျက်တော့လည်း ကဲဖျက်ပေါ့။ ဘယ်တက်နိုင်မလဲ။ ထိုင်ကြည့်ကြရုံပေါ့”လို့ ဒေသခံတဦးက ပြောပါတယ်။

လက်ရှိ ဖျက်ခိုင်းတဲ့နေရာတွေက မြေဈေးကွက်ဟာ တပေကို ကျပ်သိန်း ၁၀၀ ဝန်းကျင်အထိ ဈေးပေါက်တယ်လို့ တံတားဦးမြို့ခံတွေဆီက သိရပါတယ်။ ဖျက်သိမ်းရမယ့် နေအိမ်တွေအတွက် မည်သည့်လျော်ကြေးငွေမှ ပေးလျော်သွားမည်မဟုတ်ကြောင်းလည်း အကြောင်းကြားထားတယ်လို့ မြို့ခံတွေက ပြောပါတယ်။

ဖျက်ခိုင်းတဲ့နေအိမ်တွေဟာ တံတားဦးမြို့အပိုင် ရန်ကုန်-ပြည်-မန္တလေး ကားလမ်းမကြီးဘေးမှာဖြစ်ပြီး ယခင်ကတည်းက ဒီကားလမ်းဟာ ပေ ၁၅၀ ရှိကာ လမ်းရဲ့ဝဲယာဘက် ၇၅ ပေစီနဲ့ မလွတ်တဲ့အိမ်တွေ အကုန်ဖျက်ဖို့အတွက် စာထုတ်ပြန်တာလို့ ဆိုပါတယ်။

လမ်းဦးစီးဌာနထုတ်ပြန်ချက်မှာ နေအိမ်တွေမဖျက်ပါကလမ်းမကြီးဥပေဒေနဲ့ပါ အရေးယူမယ်လို့ ထုတ်ပြန်ချက်မှာ ဖော်ပြထားပါတယ်။