မိုင်းဆွဲခံရ

စစ်ကိုင်း၊ မေ ၄၊ ၂၀၂၃။

စစ်ကိုင်း-မုံရွာကားလမ်းမှာ ညဘက် သန်းခေါင်ကျော် ၁ နာရီအချိန် မောင်းနှင်လာတဲ့ စစ်ကောင်စီယာဉ်သုံးစီးကို စစ်ကိုင်းတိုင်း၊ မြင်းမူမြို့နယ်၊ ဝမ်းပြည့်ကျေးရွာနဲ့ အလ္လကပ္ပကျေးရွာကြားအရောက်မှာ မိုင်းဆွဲတိုက်ခိုက်ခဲ့တယ်လို့ People’s knight Defense Force Myinmu (PKDF-MMU)မှ ဗိုလ်အေးချမ်းက ပြောပါတယ်။

အင်အား ၉၀ ခန့်ပါတဲ့ အဆိုပါ စစ်ကောင်စီယာဉ် ၃ စီးမှာ မေလ ၄ ရက် မနက်စောစော ၁ နာရီကျော်အချိန် စစ်ကိုင်းမြို့ကနေ မုံရွာမြို့ကိုထွက်ခွာလာတဲ့အချိန် မိုင်းဆွဲတိုက်ခိုက်ခဲ့တာဖြစ်ပါတယ်။

“ကား ၃ စီးမှာ ၂ စီးကိုမိုင်းဆွဲနိုင်ခဲ့တာ။ ပထမ တစီးဆိုရင် ကားကထိုးရပ်သွားတယ်။ ၅မိနစ်လောက် ကြာတယ်။ ယာဥ်မောင်းထိသွားတဲ့သဘော။ ဒုတိယအစီးကျတော့ ထိထိမိမိဆွဲနိုင်ခဲ့ပေမယ့် ရပ်မသွားခဲ့ဘူး။ သေဆုံး၊ ဒဏ်ရာရတာတွေ များနိုင်တယ်ဗျ။ သေဆုံးမှုကိုတော့ ကျနော်တို့လည်း စုံစမ်းနေတယ်”လို့ ဗိုလ်အေးချမ်းက ဆိုပါတယ်။

အခုလိုမိုင်းဆွဲခံရပြီးနောက် စစ်ကောင်စီတပ်သားတွေဟာ အလ္လကပ္ပကျေးရွာထဲနဲ့ ကားလမ်းဘေးတွေကို ၅ မိနစ်ကြာ ရမ်းသမ်းပစ်ခတ်ခဲ့ပြီး မုံရွာမြို့ဖက်ကို ဆက်လက်မောင်းနှင်သွားခဲ့တယ်လို့ သူကဆက်ပြောပါတယ်။

ဒီတိုက်ခိုက်မှုကိုတော့ People’s knight Defense Force Myinmu (PKDF-MMU) ၊ Dog Killers Defense Force ( DKPDF -MMU) ၊၊ D.B.B.F-MMU စတဲ့မဟာမိတ်အဖွဲ့တွေက ပူးပေါင်းဆောင်ရွက်ခဲ့တာ ဖြစ်ပါတယ်။

ပြီးခဲ့တဲ့ မတ် ၂၉ ရက် ည ၉ နာရီကျော်အချိန်မှာလည်း စစ်ကိုင်းမြို့ကနေ မုံရွာနယ်၊ ဘိုးမင်းကြီးကင်းကျေးရွာ စခန်းကို အင်အားသွားဖြည့်တဲ့ အင်အား ၄၀ခန့်ပါ ကားတစီးကို PKDF- MMUနဲ့ မဟာမိတ်အဖွဲ့တွေက မြင်းမူမြို့ နဲ့ ဝမ်းပြည့် ကျေးရွာကြားမှာ ၂ ကြိမ်၊ ဝမ်းပြည့်ကျေးရွာ နဲ့ အလ္လကပ္ပကျေးရွာကြားမှာ ၄ ကြိမ်၊ စုစုပေါင်း ၆ ကြိမ်တိုင် မိုင်းဆွဲခဲ့တာကြောင့် ၁၃ ဦးသေဆုံးပြီး အပြားအပြားဒဏ်ရာရရှိခဲ့တယ်လို့ သိရပါတယ်။

စာတည်း – လင်းဇေ

မြင်းခြံ၊ ဧပြီ ၂၃၊ ၂၀၂၃။

မန္တလေးတိုင်း၊ မြင်းခြံခရိုင်၊ နွားထိုးကြီးမြို့နယ်မှာ စစ်ကောင်စီတပ်ဖွဲ့ဝင်တွေလိုက်ပါလာတဲ့ အိမ်စီးကားတွေကို ဧပြီ ၂၂ ရက်နေ့လည် ၁၂ နာရီခန့်မှာ မိုင်းခွဲတိုက်ခိုက်ခဲ့တာကြောင့် ထိခိုက်သေဆုံးမှုတွေရှိတယ်လို့ သိရပါတယ်။

မြင်းခြံဘက်ကနေ နွားထိုးကြီးနယ်ဘက်ကို မောင်းနှင်လာတဲ့ စစ်ကောင်စီတပ်သားတွေလိုက်ပါလာတဲ့ အိမ်စီးကား ၃ စီးကို သာယာကုန်းရွာအနီးအရောက်မှာ ၈ လုံးတွဲ ပဒေသာမိုင်း နဲ့ဖောက်ခွဲတိုက်ခိုက်ခဲ့တာလို့ မြင်းခြံခရိုင် တပ်ရင်း အမှတ်- ၄ နွားထိုးကြီး PDF ကတာဝန်ခံက မြေလတ်အသံကို ပြောပါတယ်။

“စကစတွေလာမယ်ဆိုတာကြိုသိလို့ လမ်းဘေးမှာပဒေသာမိုင်းထောင်ထားတာပါ။ ၁ ယောက်သေ၊ ၃ ယောက်ဒဏ်ရာရတယ်လို့သိရတယ်။ ကတ္တရာလမ်းဆိုတော့ လမ်းကြောဘေးမှာကပ်ထောင်ရတော့ ကားထိခိုက်မှုနည်းတယ်။ မြေသားလမ်းမှာ ပဒေသာမိုင်းထောင်ရင် လမ်းအလယ်မှာမြုပ်လို့ရတော့ ကားတွေပါလွင့်ထွက်နိုင်တယ်” လို့ ပြောပါတယ်။

စစ်ကောင်စီဘက်ကသေဆုံးတာဒဏ်ရာရတာနဲ့ပတ်သက်ပြီး မြေပြင်သတင်းပေးအဖွဲ့ထံက ပြန်လည်သိရှိရတာလို့ PDF ကပြောဆိုပေမယ့် မြေလတ်အသံအနေနဲ့ သီးခြားအတည်မပြုနိုင်ပါဘူး။

မတ်လ ၂၇ ရက်ကလည်း နွားထိုးကြီးမြို့နယ်၊ မြင်းခြံ-နွားထိုးကြီးကားလမ်းပေါ်မှာ Alphard အိမ်စီးကားနဲ့လိုက်ပါလာတဲ့ စစ်အုပ်စု မိုင်းဆွဲခံရလို့ ထိခိုက်ဒဏ်ရာရတာတွေ ရှိခဲ့တယ်လို့ သိရပါတယ်။

စာတည်း – ရင်ငြိမ်း

အရာတော်၊ ဧပြီ ၁၅၊ ၂၀၂၃။

စစ်ကိုင်းတိုင်း၊ အရာတော်မြို့အနောက်ဖက်ကို စစ်ကြောင်းထိုးလာတဲ့စစ်ကောင်စီတပ် ဧပြီလ ၁၄ ရက် မနေ့ကမနက် ၆ နာရီကျော်လောက်က မိုင်းဆွဲခံရတာကြောင့် ထိခိုက်သေဆုံးမှုတွေရှိခဲ့တယ်လို့ သိရပါတယ်။

သစ်ကျင်းကြီးကျေးရွာအနီးရှိ အမှတ် ၃၆၉ အမြောက်တပ်ရင်းကနေထွက်ခွာလာတဲ့ အင်အား ၅၀ ခန့်ရှိ စစ်ကောင်စီစစ်ကြောင်းကို အရာတော်မြို့အနောက်ဖက်၊ ခမြင့်လမ်းခွဲအနီးအရောက်မှာ ဒေသကာကွယ်ရေးတပ်ဖွဲ့တွေက ပဒေသာမိုင်း ၃ လုံး၊ တူမီးရှေ့ထွက်ကြီး ၂ လုံးနဲ့ မိုင်းဆွဲတိုက်ခိုက် ခဲ့တာလို့ Danger Force LPDF တပ်ဖွဲ့ဝင်တဦးက ပြောပါတယ်။

“စစ်ကြောင်းခြေလျင်လာတာကို ကင်းထောက်တွေကသတင်းပေးလို့ ကျနော်တို့သွားစောင့်နေခဲ့တာပါ။ သေဆုံးမှုက ၄ ယောက်သေပြီး၊ ၃ ယောက်ဒဏ်ရာရတယ်လို့ သိရတယ်။ မြို့ခံတွေ၊ တပ်တွင်းဖရဲသီးတွေနဲ့ စောင့်ကြည့်ကင်းထောက်တွေဆီက ပြန်သိရတာပါ” လို့ မြေလတ်အသံကို ပြောပါတယ်။

မိုင်းဆွဲတိုက်ခိုက်ခံရပြီးနောက် အဲ့ဒီစစ်ကြောင်းဟာ လက်နက်ကြီး၊ လက်နက်ငယ်တွေနဲ့ ပြန်လည်ပစ်ခတ်ခဲ့တဲ့အတွက် အနီးဝန်းကျင်ကျေးရွာ ၂ ရွာက ဒေသခံတွေ ထွက်ပြေးတိမ်းရှောင်ခဲ့ရတယ်လို့ အထက်ပါတာဝန်ခံက ဆက်ပြောပါတယ်။

ဒီတိုက်ခိုက်မှုကို Danger Force LPDF တပ်ဖွဲ့နဲ့ ကြယ်နီတပ်ဦးတပ်ဖွဲ့တို့က ပူးပေါင်းလုပ်ဆောင်ခဲ့တာဖြစ်ပြီး၊ စစ်ကောင်စီဘက်က သေဆုံးမှုတွေနဲ့ပတ်သက်လို့ သီးခြားအတည်ပြုနိုင်တာမျိုး မရှိသေးပါဘူး။

Danger Force LPDF တပ်ဖွဲ့ဟာ ပြီးခဲ့တဲ့မတ်လ ၂၇ ရက် စစ်ကောင်စီတပ်မတော်နေ့မှာလည်း အရာတော်အရှေ့ဘက်ရှိ အမှတ် ၁၀ စစ်အခြေခံလေ့ကျင့်ရေးတပ် (စခတ ၁၀)ကို ရှော့ဒုံး ၄လုံးနဲ့ သွား ရောက်ပစ်ခတ်ခဲ့သေးတယ်လို့ သိရပါတယ်။

စာတည်း- ရင်ငြိမ်း

မတ္တရာ၊ ဧပြီ ၁၃၊ ၂၀၂၃။

မန္တလေးတိုင်း၊ မတ္တရာမြို့အဝင်က ကြံ့ခိုင်ရေးရုံးရှေ့မှာ ကင်းပတ်နေတဲ့ စစ်ကောင်စီတပ်သားတွေကို မိုင်းဆွဲတိုက်ခိုက်ခဲ့ရာ စစ်သား ၆ ဦးခန့် သေဆုံးခဲ့တယ်လို့ တောကြီးမြွေပွေး ပြောက်ကျားတပ်ဖွဲ့တာဝန်ခံ ဗိုလ်တီက ပြောပါတယ်။

ဧပြီလ ၁၂ ရက် မနေ့ည ၉ နာရီ‌ ၈ မိနစ်ခန့်က စစ်သား ၁၀ ဦးလောက်ကို ကြံ့ခိုင်ရေးရုံးရှေ့မှာတင် မိုင်း ၂ လုံးနဲ့ တိုက်ခိုက်ခဲ့တာလို့ ဆိုပါတယ်။

“အခုလိုမိုင်းဆွဲခဲ့ရတဲ့ ရည်ရွယ်ချက်က‌တော့ သင်္ကြန်ကာလ ရေမကစားစေချင်တာနဲ့ အဓိကတော့ ကန့်ဘလူ၊ ပဇီကြီးကျေးရွာမှာ ကျဆုံးခဲ့တဲ့ အပြစ်မဲ့ပြည်သူ ကလေးငယ်တွေအတွက် စိတ်မကောင်းဖြစ်လို့ မြို့ထဲအထိ ခဲရာခဲဆစ် ဝင်ပြီးလုပ်တာ” လို့ ဗိုလ်တီက ဆိုပါတယ်။

ဒီတိုက်ခိုက်မှုကို တောကြီးမြွေပွေး ပြောက်ကျားတပ်ဖွဲ့နဲ့ ပြည်သူ့ရဲတပ်ဖွဲ့ မတ္တရာမြို့နယ် SSTF Team 5 တို့က ပူးပေါင်းလုပ်ဆောင်ခဲ့တာဖြစ်ပြီး၊ သေဆုံးသူအရေအတွက်ကို ဒေသခံပြည်သူအချို့ရဲ့ သတင်းပေးပို့ချက်အရ အတည်ပြုနိုင်ခဲ့တာလို့လည်း ဆိုပါတယ်။

စစ်ကောင်စီဘက်က သေဆုံးသူအရေအတွက်နဲ့ ပတ်သက်ပြီး မြေလတ်အသံက သီးခြားအတည်မပြုနိုင်သေးပါဘူး။

ပြီးခဲ့တဲ့ မတ်လ ၂၉ ရက်ကလည်း မတ္တရာမြို့နယ်၊ မြွေဟင်္သာရွာက နေအိမ်‌တွေကို မီးရှို့ပြီးထွက်လာတဲ့ စစ်ကောင်စီစစ်ကြောင်းကို တောကြီးမြွေပွေး ပြောက်ကျားတပ်ဖွဲ့က တံတားဖြူအနီးမှာ မိုင်းဆွဲ တိုက်ခိုက်ခဲ့ရာ စစ်သား ၆ ဦး သေဆုံးခဲ့ပါသေးတယ်။

စာတည်း – လင်း

ပေါင်းတည်၊ ဧပြီ ၁၂၊ ၂၀၂၃။

မန္တလေးတိုင်း၊ သပိတ်ကျင်းမြို့နယ်ကနေ စစ်ကြောင်းထွက်လာတဲ့ စစ်ကောင်စီ ၁၂ ဘီးကား ၂ စီးကို တကောင်း-ပြည်သူ့ကာကွယ်ရေးတပ်ဖွဲ့က ဧပြီလ ၁၂ ရက်ဒီကနေ့ တရက်တည်းမှာတင် မိုင်း ၂ ကြိမ်ဆွဲ တိုက်ခိုက်ခဲ့တယ်လို့ သိရပါတယ်။

သပိတ်ကျင်းမြို့နယ်၊ အင်းနက်ရွာက ထွက်လာတဲ့ အဲ့ဒီကားတွေကို လေးမိုင်ရွာနဲ့ ခြောက်မိုင်ရွာကြားနဲ့ နောင်လုံတံတားအနီးမှာတကြိမ်စီ မနက် ၅ နာရီကျော်လောက်က ဆက်တိုက်ဆိုသလို တိုက်ခိုက်ခဲ့ရာ ထိခိုက်သေဆုံးသူတွေ များခဲ့တယ်လို့ တကောင်း-ပကဖ သတင်းတာဝန်ခံက ပြောပါတယ်။

“ကျနော်တို့က သတင်းရလို့ မိုင်းထောင်စောင့်နေတာ၊ ပထမတခါ မိုင်းသုံးလုံးဆင့် ဆွဲတော့ နောက်ကားကဖင်ရမ်းခါသွားတယ်။ ဒုတိယအကြိမ် ထပ်ဆွဲတော့ ရှေ့ကားခေါင်းပိုင်း တည့်တည့်ထိပြီး မီးလောင်တယ်။ အဲ့အချိန်မှာ ကျန်တဲ့ စစ်သားတွေက ကားပေါ်က ခုန်ချပြီးတော့ ညောင်ကုန်းရွာထဲဝင်ပြေးတယ်။ စစ်သား ၁၅ ယောက် သေတယ်။ ၅ ယောက်က ခြေလက်တွေပြတ် ဖြစ်ကုန်တယ်” လို့ ပြောပါတယ်။

ဒီတိုက်ခိုက်မှုအတွင်း ထိခိုက်သေဆုံးသူ အရေအတွက်ကို ဒေသခံတချို့ရဲ့ သတင်းပေးချက်အရ အတည်ပြုနိုင်ခဲ့တာလို့ပြောပေမယ့် မြေလတ်အသံက သီးခြားအတည်မပြုနိုင်သေးပါဘူး။

မိုင်းဆွဲခံရလို့ သေဆုံးဒဏ်ရာရ စစ်သားတွေကို လူနာတင်ကား သုံးစီးနဲ့တင်ကာ တကောင်းမြို့ဘက်ကို ထွက်သွားပြီး၊ ခေါင်းပိုင်းပျက်စီးသွားတဲ့ကားကိုတော့ စစ်ကောင်စီဘက်က တခြားကားနဲ့ ပြန်ဆွဲသွားတယ်လို့ သိရပါတယ်။

ပြီးခဲ့တဲ့ မတ်လ ၂၈ ရက်ကလည်း တကောင်းမြို့အနီး ညောင်ကုန်းကျေးရွာမှာ တကောင်း ပကဖ၊ ABSDF၊ လျှပ်စီးပြောက်ကျားတပ်ဖွဲ့ (ရပ်ကျေးပကဖ) နဲ့ စစ်ကောင်စီတပ်တို့ ထိတွေ့တိုက်ပွဲဖြစ်ခဲ့ပြီး၊ စစ်ကောင်စီဘက်က ထိခိုက်သေဆုံးမှုတွေ ရှိခဲ့ပါသေးတယ်။

ရွှေဘို၊ ဧပြီ ၉၊ ၂၀၂၃။

စစ်ကိုင်းတိုင်း၊ ရွှေဘိုမြို့နယ်၊ မြင်းစီးကျေးရွာက ထွက်လာတဲ့ ပျူစောထီးယာဥ်တန်း ဧပြီလ ၈ ရက်မနေ့ကမနက်ပိုင်းမှာ မိုင်းခွဲတိုက်ခိုက်ခံရတာကြောင့် ပျူစောထီး ၃ ဦးသေဆုံးခဲ့တယ်လို့ သိရပါတယ်။

ပျူစောထီးအင်အား ၃၀ ဝန်းကျင်လိုက်ပါလာတဲ့ သုံးဘီဆိုင်ကယ် ၈ စီးပါ ယာဥ်တန်းကို မနေ့ကမနက် ၁၀ နာရီလောက်က မြို့လှရွာအနီးမှာ တိုက်ခိုက်ခဲ့ရာ ၁ စီးကိုသာ မိုင်းထိမှန်ခဲ့တာကြောင့် အဲ့ဒီသုံးဘီးပေါ်မှာ လိုက်ပါလာတဲ့ ပျူစောထီး ၃ ဦး ပွဲချင်းပြီးသေဆုံးခဲ့တာလို့ ဗိုလ်ကျားရိုင်း – ရွှေဘို (LPDF) တာဝန်ခံရဲဘော်ဗလကြီးက ပြောပါတယ်။

“မိုင်းခွဲလိုက်တာ နေရာမှာတင် ၃ ကောင်ပွဲချင်းပြီးသေတယ်၊ သေသွားတဲ့အလောင်း ၃ လောင်းကို သုံးဘီးပေါ်တင်ပြီးမောင်းပြေးတာမှာ အလောင်း ၁ လောင်းနဲ့ သေနတ်တွေ ကျနေခဲ့တယ်” လို့ ပြောပါတယ်။

ကျကျန်ခဲ့တဲ့ ပျူစောထီးအလောင်းနဲ့ လက်နက်ကိုကောက်ယူဖို့ ကာကွယ်ရေးရဲဘော်တွေဘက်က ကြိုးစားပေမယ့် တိုက်ခိုက်တဲ့နေရာနဲ့ ၁ မိုင်သာသာဝေးတဲ့ ဇီးဖြူကုန်းရွာနဲ့ တလုံးရွာဘက်ကနေ စစ်သားတွေ ထွက်လာတယ်လို့ သတင်းရတာကြောင့် အလောင်းကိုမကောက်ပဲ ပြန်ဆုတ်ခွာခဲ့ရတယ်လို့ ရဲဘော်ဗလကြီးကဆက်ပြောပါတယ်။

ဒီတိုက်ခိုက်မှုကို ဗိုလ်ကျားရိုင်း-ရွှေဘို (LPDF)အဖွဲ့ ၊ မင်းဂေါင် – SHWEBO (LDF)အဖွဲ့ ၊ ဗိုလ်ဂျပန်ကြီး (TT.T) – SHWEBO (LPDF)အဖွဲ့၊ တောင်သူကြီးများအဖွဲ့ -LDF၊ ဖား‌ရွှေ‌ကျော် – ဒီပဲယင်း ပြည်သူ့ကာကွယ်ရေးတပ်ဖွဲ့ ၊ DOG KILLER- SHWEBO PEOPLE DEFENCE FORCE ၊ မတစ်ထောင်( တစ်ကောင်ဘွား ) – ဒီပဲယင်းအဖွဲ့နဲ့ ရွှေဘိုမြို့နယ် တိုက်နယ် -၂ မဟာမိတ်အင်အားစုတွေက ပူးပေါင်းလုပ်ဆောင်ခဲ့တာလည်း ဖြစ်ပါတယ်။

ပြီးခဲ့တဲ့ ဧပြီလ ၅ ရက်ကလည်း မိုင်းရှင်းဖို့ထွက်လာတဲ့ တည်တီးတောရွာ နဲ့ ဇီးဖြူကုန်းရွာက ပျူစောထီးတွေကို ဗိုလ်ကျားရိုင်း – ရွှေဘို(LPDF) အဖွဲ့က ဂျိုးမြေဇင်း လမ်းပိုင်းတ‌နေရာမှာ မိုင်းဆွဲတိုက်ခိုက်ခဲ့ရာ ပျူစောထီး ၄ ဦး သေဆုံးခဲ့ပါ သေးတယ်။

ရွှေဘို၊ ဧပြီ ၇၊ ၂၀၂၃။

စစ်ကိုင်းတိုင်း၊ ရွှေဘိုမြို့နယ်၊ တည်တီးတောရွာနဲ့ ဇီးဖြူကုန်းရွာက ပျူပူးပေါင်းအဖွဲ့ မိုင်းရှင်းထွက်လာတာကို ဧပြီလ ၅ ရက် မနက်ပိုင်းမှာ မိုင်းဆွဲတိုက်ခိုက်ခဲ့တယ်လို့ သိရပါတယ်။

အင်အား ၁၅ ဦးနဲ့ မိုင်းရှင်းလာတဲ့ ပျူစောထီးတွေကို ဂျိုးမြေဇင်း လမ်းပိုင်းတနေရာမှာ မနက် ၈ နာရီလောက်က ပဒေသာမိုင်းနဲ့တိုက်ခိုက်ခဲ့တာလို့ ဗိုလ်ကျားရိုင်း-ရွှေဘို (LPDF)အဖွဲ့ မှ ရဲဘော်ဗလကြီးက ပြောပါတယ်။

“ပျူစောထီး ၁၅ ဦးလောက်‌ ခြေလျင်မိုင်းရှင်းထွက်လာတာကို ဂျိုးမြေဇင်း လမ်းပိုင်းတနေရာမှာ ပဒေသာမိုင်း ၃ လုံးနဲ့ ၃ ကြိမ် တိုက်ခိုက်လိုက်တာ၊ နေရာတင် ပျူ ၄ ကောင် သေတယ်” လို့ ပြောပါတယ်။

တိုက်ခိုက်မှုအတွင်း ကူတို့ဆိပ်ရွာသား ကိုကုလား၊ ကိုတင်ကြူး၊ ကိုကုခြား တို့သေဆုံးခဲ့ပြီး စစ်ကောင်စီခန့် ၇ ရွာအုပ်ချုပ်ရေးမှူး တည်တီးတောရွာ မောင်ဆန်းနဲ့ သက်ဇော်ဦးတို့ကတော့ ဒဏ်ရာပြင်းထန်လို့ ရွှေဘိုဆေးရုံတင်ထားရပြီး ပျူ ကိုဝင်းဌေး က ပျောက်ဆုံးနေပြီး သေဆုံးတယ်လို့လည်း သတင်းထွက်နေတယ်လို့ ဆိုပါတယ်။

သေဆုံးသူတွေကို မြေပြင်တိုက်ခိုက်ရေး ရဲဘော်တွေရဲ့မြင်တွေ့ချက်အရ အတည်ပြုနိုင်ခဲ့တယ်လို့ဆိုပေမယ့် မြေလတ်အသံအနေနဲ့ သီးခြားအတည်မပြုနိုင်သေးပါဘူး။

ဒီတိုက်ခိုက်မှုကို ဗိုလ်ကျားရိုင်း-ရွှေဘို (LPDF)အဖွဲ့ ၊ ဗိုလ်ဂျပန်ကြီး( T.T.T)-ရွှေဘို(LPDF)အဖွဲ့၊ တောင်သူကြီးများအဖွဲ့ -LDF၊ ဖား‌ရွှေ‌ကျော်-ဒီပဲယင်း ပြည်သူ့ကာကွယ်ရေးတပ်ဖွဲ့၊ DOG KILLER- SHWEBO PEOPLE DEFENCE FORCE၊ မတစ်ထောင်( တစ်ကောင်ဘွား ) – ဒီပဲယင်းအဖွဲ့နဲ့ ရွှေဘိုမြို့နယ် တိုက်နယ်-၂ မဟာမိတ်အင်အားစုတို့က ပူးပေါင်းလုပ်ဆောင်ခဲ့တာပါ။

ပြီးခဲ့တဲ့ ဧပြီလ ၄ ရက်ကလည်း ရွှေဘိုမြို့ ဇီးဖြူကုန်းရွာထွက်လာတဲ့ စစ်သား၊ ရဲ နဲ့ ပျူစောထီးတွေကို ဇီးဖြူကုန်းမြောက်ပေါက် ဦးတင်နွဲ့ဇရပ်အနီးမှာ ဗိုလ်ကျားရိုင်း-ရွှေဘို (LPDF)အဖွဲ့က မိုင်းဆွဲတိုက်ခိုက်ခဲ့ရာ ရဲ ဇော်လှိုင်ဦးနဲ့ ပျူစောထီး ၁ ဦးသေပြီး၊ ရဲတပ်သား သိန်းဇော် ဒဏ်ရာရခဲ့သေးတယ်လို့ ဆိုပါတယ်။

စာတည်း – 007

မြိုင်၊ ဧပြီ ၅၊ ၂၀၂၃။

မကွေးတိုင်း၊ မြိုင်မြို့နယ်၊ Well-2 ရေနံမြေစခန်းက‌နေ တပ်ချိန်းပြီးပြန်ထွက်လာတဲ့ စစ်ကောင်စီအဖွဲ့တွေကို မိုင်း ၅ လုံးဆွဲတိုက်ခိုက်ခဲ့ရာ ၂ ဦးသေဆုံးခဲ့တယ်လို့ ပြည်သူ့ကာကွယ်ရေးတပ်ဖွဲ့ – မြိုင်မြို့နယ် ပကဖ ဆီက သိရပါတယ်။

အဆိုပါစခန်းမှ အင်အား ၇၀ ဝန်းကျင်ပါစစ်သား၊ ရဲနဲ့ ပျူစောထီးတွေက အင်အား ၂၀ လောက်စီခွဲပြီး တပ်ဖြန့်လာချိန် ကျွဲတွင်းရွာနဲ့ ဝါးရင်းချိုင်ရွာကြား ရောက်လာတဲ့အဖွဲ့ကို ဧပြီလ ၅ ရက်ဒီမနက် ၆ နာရီလောက်မှာ မိုင်းဆွဲတိုက်ခိုက်ခဲ့တာလို့ ပြည်သူ့ကာကွယ်ရေးတပ်ဖွဲ့ – မြိုင်မြို့နယ်မှ ဗိုလ်လက်ယာက ပြောပါတယ်။

“အင်အားကတော့ ဖြန့်လာတာ၊ ၂၀ ကျော်နဲ့ ၃ ဖွဲ့လောက်လာတာ၊ မိုင်း ၅ လုံးနဲ့ဆွဲပြီးတိုက်ခိုက်ခဲ့တာ၊ ပျူတကောင်နဲ့ တပ်က တကောင်ကတော့ ပွဲချင်းပြီးသေတယ်၊ ကျန်တဲ့ ၄ ကောင်က အပြင်းအထန်ဒဏ်ရာရတယ်၊ သူတို့ဘက်က ရမ်းသမ်းပြီးပစ်နေတာ၊ ကျနော်တို့ဘက်ကလည်း လက်လုပ်လက်နက်ကြီးတွေနဲ့ ပြန်ပစ်ကြတယ်” လို့ ပြောပါတယ်။

ဒီထိခိုက်သေဆုံးမှုတွေနဲ့ပက်သက်ပြီး မြေလတ်အသံက သီးခြားအတည်ပြုနိုင်ခြင်းမရှိသေးပါဘူး။

ခုတိုက်ခိုက်ခံရတဲ့ စစ်အုပ်စုဟာ ကိုင်းတောမရွာနဲ့ စက်မှု ၂ ဘက်က တပ်သားတွေနဲ့ တပ်ချိန်းပြီး ပြန်ထွက်လာချိန်မှာ တိုက်ခိုက်ခံရတာဖြစ်ပြီး၊ ပခုက္ကူအခြေစိုက် တမခ ၁၀၁ က ဖြစ်နိုင်တယ်လို့လည်း ကာကွယ်ရေးရဲဘော်တွေက ခန့်မှန်းထားပါတယ်။

ဒီတိုက်ခိုက်မှုကို ပြည်သူ့ကာကွယ်ရေးတပ်ဖွဲ့ – မြိုင်မြို့နယ် တပ်ရင်း ၁၊ တပ်ခွဲ ၁၊ တပ်စိပ် ၄ ၊ MUGDF နဲ့ ဇာမဏီပြောက်ကြားတပ်ဖွဲ့တို့က ပူးပေါင်းလုပ်ဆောင်ခဲ့တာလည်း ဖြစ်ပါတယ်။

ပြီးခဲ့တဲ့ ဧပြီလ ၃ ရက်ကလည်း ရေစကြိုမြို့နယ်၊ မအူရဲကင်းစခန်းကို ပြည်သူ့ကာကွယ်ရေးတပ်ဖွဲ့ – မြိုင်မြို့နယ်အဖွဲ့က ဝင်ရောက်စီးနင်း တိုက်ခိုက်ခဲ့ရာ စခန်းမှူးအပါအဝင် စစ်ကောင်စီတပ်သား ၂၄ ဦး သေဆုံးခဲ့တယ်လို့ သိရပါတယ်။

စာတည်း – လင်း