မကွေး

မြေလတ်အသံ၊ ဒီဇင်ဘာ ၅၊ ၂၀၂၅။

မကွေးတိုင်း၊ အောင်လံမြို့နယ်က အမျိုးသား ၂ ဦးကို စစ်ကော်မရှင်တပ်က ဒီဇင်ဘာ ၄ ရက်ညနေ ၅ နာရီကျော်မှာ ဖမ်းဆီးသွားခဲ့တယ်လို့ ဒေသခံတွေကပြောပါတယ်။

ဖမ်းဆီးခံရသူ ၂ ဦးမှာ အသက် ၃၀ အရွယ်ကိုသန်းနိုင်နဲ့ နထားကျေးရွာမှ ကုန်စုံဆိုင်ပိုင်ရှင် မောင်မောင်တ တို့ဖြစ်ပြီး သူတို့ကို ရွှေပန်းတောရွာရဲစခန်းရှိ စစ်ကော်မရှင်တပ်ဖွဲ့ဝင် ၂၀ ဦးက နေအိမ်တွေကနေ ဖမ်းဆီးခဲ့တာလို့ ဆိုပါတယ်။

“မြို့ပေါ်ကို ဖမ်းခေါ်တာပဲသိတယ်။ အရင်လူတွေကိုတော့ စရဖမှာ စစ်ဆေးတယ်။ အခုလူတွေကိုလည်း စရဖ ရုံးကိုပို့တာဖြစ်နိုင်တယ်”လို့ မြေပြင်အခြေအနေကိုသိရှိတဲ့ အမျိုးသားတဦးက ပြောပါတယ်။

ပြီးခဲ့တဲ့နိုဝင်ဘာ ၂၉ ရက်မနက် ၆ နာရီကနထားကျေးရွာမြောက်ဘက် ကျေးရွာချင်းဆက်လမ်းမပေါ်ရှိ ရွေပန်းတောကျေးရွာမြောက်ဘက်အဝင်ရှိ စစ်ကော်မရှင်တပ်တွေအထိုင်ချထားတဲ့ဂိတ် (နထားဂိတ်) ပစ်ခတ်ခံရပြီးနောက် ခုလိုဖမ်းဆီးမှုတွေရှိလာတာလို့ ဆိုပါတယ်။

“ပစ်ခတ်မှုနဲ့ပတ်သက်ပြီး အသေးစိတ်အခြေအနေတော့မသိပါ။ ပစ်ခတ်ခံရတယ်ဆိုတာပဲသိထားပါတယ်။ အဲ့ပစ်ခတ်မှုမှာ ထိခိုက်မှုများလို့ လိုက်ဖမ်းနေတယ်ဆိုတာလောက်ပဲသိထားရတာပါ။ ဂိတ်ပစ်ခတ်ခံရတာနဲ့ ပတ်သက်လို့ ဖမ်းဆီးခံရတာ ၅ ဦးထိရှိပါပြီ။ ဆက်လက်ပြီးဖမ်းဆီနိုင်ပါသေးတယ်”လို့ အထက်ပါအမျိုးသားက ပြောပါတယ်။

ပြီးခဲ့တဲ့နိုဝင်ဘာ ၃၀ ရက်မှာ ရွှေပန်းတောကျေးရွာမှ ကိုသန်းထွန်းလေးနဲ့ ကိုဝင်းသိန်း၊ ဒီဇင်ဘာ ၃ ရက်မှာ နတ်မောက်ကျေးရွာမှ ကိုဒေးဗစ် တို့ ဖမ်းဆီးခံခဲ့ရပြီး ဒီဇင်ဘာ ၅ ရက်ဒီကနေ့အထိ ပြန်မလွတ်လာသေးဘူးလို့ သိရပါတယ်။

စာတည်း – လင်း

ချောက်၊ ဒီဇင်ဘာ ၅၊ ၂၀၂၅။

မကွေးတိုင်း၊ ချောက်မြို့၊ အမှတ် ၅ ရပ်ကွက် အုပ်ချုပ်ရေးမှူးကို လူငယ် ၂ ဦးက ဧည့်စာရင်းတိုင်ဖို့ဆိုကာ ဝင်ရောက်လာပြီးနောက် နေအိမ်ထဲမှာပဲပစ်သတ်သွားတယ်လို့ ဖြစ်စဥ်ကိုသိရှိတဲ့ ချောက်မြို့ခံတွေဆီက သိရပါတယ်။

ပစ်သတ်ခံရသူက အမှတ် ၅ ရပ်ကွက်အုပ်ချုပ်ရေးမှူး အသက် ၅၂ အရွယ် ထွေးအောင်နိုင်ဖြစ်ပြီး ဒီဇင်ဘာ ၄ ရက် ညနေ ၅ နာရီဝန်းကျင်မှာ ပစ်သတ်ခံရတဲ့အပြင် လက်တဖက်လည်း ဖြတ်ခံလိုက်ရတယ်လို့ ဆိုပါတယ်။

“ကောင်လေး ၂ ဦးက ဧည့်စာရင်းတိုင်ချင်တယ်ဆိုပြီး အိမ်ထဲဝင်ပစ်သွားတာ၊ အိမ်ထဲထိဝင်ပြီး ၃ ချက် ပစ်သွားတာ၊ ဦးခေါင်းပွင့်သွားတယ်၊ လက်တဖက် ပြတ်သွားတယ်၊ သေသွားပြီ၊ အခု ‘မနောဖြူ’ နာရေးကားနဲ့ ချောက်ရင်ခွဲရုံကိုပို့ထားတယ်၊ သူ့လက်ထဲမှာလည်း သေနက်အတိုရှိတယ်၊ သူကိုယ်ပိုင်ဝယ်ကိုင်ထားတာ၊ ချောက်မြို့မှာ ၁၅ ရပ်ကွက် ရှိတာကို ၁၅ ရပ်ကွက်ရဲ့ အုပ်ချုပ်ရေးမှူးတွေ အပေါ်မှာဆရာကြီးလိုနေတာ”လို့ ချောက်မြို့ခံတဦးက ပြောပါတယ်။

ဒီပစ်ခတ်မှုကိုဘယ်အဖွဲ့အစည်းတွေကလုပ်ခဲ့တယ်ဆိုတာကိုတော့ ထုတ်ပြန်ကြေညာတာမရှိသေးပါဘူး။

အမှတ် ၅ အုပ်ချုပ်ရေးမှူး ပစ်ခတ်ခံရပြီးနောက် ချောက်မြို့ အမှတ် ၁ ရပ်ကွက်၊ အမှတ် ၂ ရပ်ကွက်၊ အမှတ် ၃ ရပ်ကွက်၊ အမှတ် ၄ ရပ်ကွက်နေရာတွေမှာ စစ်ကော်မရှင်တပ်တွေက အသွားအလာတွေကို စစ်ဆေးနေတယ်လို့ သိရပါတယ်။

ပြီးခဲ့တဲ့ ဇန်နဝါရီ ၁၁ ရက်ကလည်း ချောက်မြို့နယ်၊ ဆားလယ်ကျွန်းကျေးရွာက စစ်တပ် သတင်းပေး ထွန်းနိုင် ဆိုသူ အသတ်ခံရပြီးသေဆုံးခဲ့ပါသေးတယ်။

စာတည်း – လင်း

မြစ်ခြေ၊ ဒီဇင်ဘာ ၂၊ ၂၀၂၅။

မကွေးတိုင်း၊ မြစ်ခြေမြို့အနီးကကျေးရွာတွေကို စစ်ကော်မရှင်တပ်ကစစ်ကြောင်းထိုး ဝင်ရောက်လာတာကြောင့် ဒေသခံတွေတိမ်းရှောင်နေရတယ်လို့ မြစ်ခြေမြို့ခံတွေဆီက သိရပါတယ်။

ဒီဇင်ဘာ ၁ ရက် ညနေ ၆ နာရီမှာ စတင်စစ်ကြောင်းထိုးလာတဲ့ အင်အား ၃၀၀ ခန့်ပါ စစ်ကော်မရှင်တပ်ဖွဲ့တွေဟာစစ်ကြောင်း ၂ ကြောင်းပေါင်းပြီး မြစ်ခြေဘက်ကိုစစ်ကြောင်းထိုး လာတာကြောင့် ဒေသခံ ၂,၀၀၀ နီးပါး တိမ်းရှောင်နေရတယ်လို့ ဆိုပါတယ်။

“စစ်ကြောင်းထိုးလာတာက မနေ့က ညနေပိုင်းက စထိုးလာတာ၊ ညောင်ဦးဘက်ကနေ ကား ၂ စီးနဲ့ လှေဆိပ်ကိုလာပြီး လှေဆိပ်ကနေလှေနဲ့တဆင့် ဆိပ်ခွာရွာဘက်ကို ကပ်တာ၊ အရှေ့ဘက်ကလာတဲ့ စစ်ကြောင်းနဲ့ ဆိပ်ခွာဘက်ကလာတဲ့ စစ်ကြောင်း ၂ ကြောင်းပေါင်းပြီး မြစ်ခြေဘက်ကို စစ်ကြောင်းထိုးလာတာ ၃၀၀ လောက်တော့ရှိတယ်၊ အင်အား ၁၀၀ လောက်က ကျွန်းချောင်းလျှပ်စစ်ဓါတ်အား‌ပေးစက်ရုံထဲကို ဝင်သွားတယ်”လို့ မြစ်ခြေဒေသခံတဦးက ပြောပါတယ်။

ညောင်ဦးနဲ့ ဆိပ်ခွာရွာကနေ ထွက်ခွာလာတဲ့ အထက်ပါစစ်ကြောင်းဟာ ယခင်ကျွန်းချောင်းလျှပ်စစ်ဓါတ်အားပေးစက်ရုံမှာ အထိုင်ချထားတဲ့ စစ်ကော်မရှင်တပ်တွေနဲ့ စခန်းချိန်းဖို့လာတာလို့ သိရကြောင်း သူကဆက်ပြောပါတယ်။

“ကျွန်းချောင်းလျှပ်စစ်ဓါတ်အားပေးစက်ရုံထဲမှာ အထိုင်ချထားတဲ့ စစ်ကော်မရှင်တပ်ဖွဲ့ဝင်တွေနဲ့ စခန်းချိန်းတာ၊ ဗိုလ်နဲ့ တပ်ဖွဲ့ဝင်ဟောင်းတွေ အကုန်ချိန်းသွားတာ၊ နယ်မြေအခြေအနေအရ တိမ်းရှောင်နေရလို့ ရှေ့ကိုတက်ကြည့်လို့ မရသေးဘူး”လို့ ဆိုပါတယ်။

ခုလိုစစ်ကြောင်းထိုးတာကြောင့် မြစ်ခြေမြို့အတွင်းက ငှက်ပျောတောရွာ၊ မြို့ဆိုးရွာ၊ မိုးပုလဲရွာ၊ အိုင်းကြီးရွာ၊ ပေါက်တောရွာ၊ ကံကြီးစုရွာတွေက ဒေသခံတွေ စစ်ရှောင်ထွက်ပြေးနေကြရတာပါ။

လက်ရှိမှာစစ်ကြောင်းက ကျွန်းချောင်းလျှပ်စစ်ဓါတ်အားပေးစက်ရုံထဲကိုရောက်ရှိနေပြီး ဒေသခံကာကွယ်ရေးတပ်တွေနဲ့ စစ်ကော်မရှင်တပ်တွေလည်း တိုက်ပွဲဖြစ်နေတယ်လို့ သိရကာ တိုက်ပွဲနဲ့ပတ်သက်တဲ့အခြေအနေတွေကိုတော့ မြေလတ်အသံက ဆက်လက်စုံစမ်းနေပါတယ်။

စာတည်း – လင်း