ဘုတလင်

ဘုတလင်၊ အောက်တိုဘာ ၂၁၊ ၂၀၂၆။

စစ်ကိုင်းတိုင်း၊ ဘုတလင်မြို့နယ်၊ ကွမ်းခြံကျေးရွာမှာ စက်တပ်လေထီးနဲ့ ဗုံးကြဲချခဲ့လို့ အသက်မပြည့်သေးတဲ့ မိန်းကလေးငယ် ၄ ဦးအပါအဝင် ၆ ဦးသေဆုံးတယ်လို့ မုံရွာခရိုင်ပကဖ တာဝန်ရှိသူတွေထံက သိရပါတယ်။

အောက်တိုဘာလ ၂၀ ရက်နေ့ နေ့လယ် ၂ နာရီခွဲခန့်က မုံရွာ(နမခ)ကနေ တက်လာတဲ့ စက်တပ်လေထီးက ကျေးရွာထဲကို ဗုံးတလုံးကြဲချခဲ့တယ်လို့ ဆိုပါတယ်။

“ဗုံးက ပြည်သူနေအိမ်ပေါ် တည့်တည့်ကျတာ။ တိုက်ပွဲမရှိဘဲနဲ့ ထုံးစံအတိုင်း ပြည်သူနေအိမ်တွေကို ကြဲချတာပေါ့။ အသက်မပြည့်သေးတဲ့ အမျိုးသမီးငယ်တွေ သေဆုံးတာများတယ်”လို့ မုံရွာခရိုင်ပကဖ တာဝန်ရှိသူက ပြောပါတယ်။

ဗုံးထိမှန်တာကြောင့် ၁၃ နှစ်၊ ၁၅ နှစ်၊ ၁၇ နှစ်မိန်းခလေး ၃ ဦးနဲ့ ၄၁ နှစ်အရွယ် မိခင်ဖြစ်သူ သားအမိ ၄ ဦးအပါအဝင် ၁၇ နှစ်နဲ့ ၂၂ အရွယ် ညီအစ်မ ၂ ဦး စုစုပေါင်း ၆ ဦး သေဆုံးခဲ့ပြီး နောက်ထပ် အသက် ၄၀ ဝန်းကျင်အရွယ် အမျိုးသမီး ၁ ဦးလည်း ဒဏ်ရာရခဲ့တာဖြစ်ပါတယ်။

ဗုံးကြဲခံရပြီးနောက် နောက်ထပ်ဗုံးလာကြဲမှာကို စိုးရိမ်ပြီး ကျေးရွာကနေ တိမ်းရှောင်သွားသူတွေလည်းရှိပြီး အချို့ကျတော့ ကျေးရွာထဲမှာပဲ ဆက်လက်နေထိုင်နေကြသူတွေလည်း ရှိကြောင်း သိရပါတယ်။

ပြီးခဲ့တဲ့ စက်တင်ဘာလ ၃ ရက်နေ့ကလည်း စစ်ကိုင်းတိုင်း၊ ဝက်လက်မြို့နယ်၊ ကန်ပေါက်ကျေးရွာမှာ စစ်တပ်ရဲ့ အသေခံဒရုန်းကြောင့် အမျိုးသား ၁ ဦး သေဆုံးသွားတယ်လို့ သိရပါတယ်။

■ မော်တော်ပိုင်ရှင် အမျိုးသား ၁ ဦး သေဆုံး

ဘုတလင်၊ အောက်တိုဘာ ၇၊ ၂၀၂၆။

စစ်ကိုင်းတိုင်း၊ ဘုတလင်မြို့နယ်၊ ရွှေစာရေးရွာက ဇက်ဆိပ်ကို အာဏာသိမ်းစစ်တပ်က လေကြောင်းနဲ့ တိုက်ခိုက်ခဲ့လို့ မော်တော်ပိုင်ရှင် အမျိုးသား ၁ ဦး သေဆုံးခဲ့ရတယ်လို့ သိရပါတယ်။

အောက်တိုဘာလ ၆ ရက် နေ့လယ် ၁၂ နာရီခန့်က အနောက်မြောက်တိုင်းစစ်ဌာနချုပ်ကနေ ဂျိုင်ရိုကော်ပတာ (Gyrocopter) ၃ စီးနဲ့ ကုန်တင်ကားတွေနဲ့ မော်တော်တွေပေါ်ကို ဗုံးသီး ၂ လုံး ကြဲချတိုက်ခိုက်ခဲ့တာလို့ သိရပါတယ်။

လေကြောင်းတိုက်ခိုက်မှုကြောင့် ရွှေစာရေးဇက်ဆိပ်မှာ ကမ်းကပ်ထားတဲ့ မြတ်နိုးထွန်းမော်တော်ပိုင်ရှင် အသက် ၃၅ နှစ်အရွယ် အမျိုးသား ၁ ဦးသေဆုံးခဲ့ရပြီး ချက်ချင်းဆိပ်ကမ်းက ထွက်ခွါသွားခဲ့တာလို့ ပြောပါတယ်။

“မော်တော်ပေါ် အရင်ကျတာဗျ၊ မော်တော်ပေါ် အရင်ကျတော့ ရုတ်ရုတ်သဲသဲဖြစ်တော့ မော်တော်တွေက တခါတည်း မောင်းသွားတာ၊ မော်တော်ပေါ်ကျပြီး နည်းနည်းကြာတော့ ကားတွေပေါ် ထပ်ကျတာ၊ ကားပေါ်ထပ်ကျပြီး လူထိပြီးတော့ သူတို့ကလည်း တခါတည်း တန်းခွါသွားတာ။” လို့ ရွှေစာရေးရွာခံတဦးက ပြောပါတယ်။

အဆိုပါ လေကြောင်းတိုက်ခိုက်မှုကြောင့် ကုန်တင်လာတဲ့ မြတ်နိုးထွန်း မော်တော်အပြင် ကုန်သယ်ယူဖို့လာတဲ့ ၆ ဘီးကား ၁ စီးလည်း ပျက်စီးသွားတယ်လို့ ဒေသခံတွေဆီက သိရပါတယ်။

အဆိုပါနေရာဟာ ဒေသတွင်း ကုန်စည်ကူးသန်းရောင်းဝယ်နေတဲ့ နေရာဖြစ်ပြီး တိုက်ပွဲဖြစ်ပွါးခြင်းမရှိဘဲ မကြာခဏ လေကြောင်းတိုက်ခိုက်မှုတွေ ပြုလုပ်လေ့ရှိကြောင်း သိရပါတယ်။

◼ ပုလဲမှာလည်း လေယာဥ်နဲ့ဗုံးကြဲခံရလို့ အမျိုးသမီး ၁ ဦး သေဆုံး

သိုက်ထွန်း၊ ဟယ်သာ

မြေလတ်အသံ၊ စက်တင်ဘာ ၄၊ ၂၀၂၅။

စစ်ကိုင်းတိုင်း၊ ဘုတလင်မြို့နယ်မှာ စစ်ကော်မရှင်တပ်စစ်ကြောင်းက ရွာခံအမျိုးသမီး ၂ ဦးကို သေနတ်နဲ့ပစ်သတ်ခဲ့ပြီး ပုလဲမြို့နယ်မှာလည်း လေကြောင်းကနေ ဗုံးကြဲခံရလို့ အမျိုးသမီး ၁ ဦး သေဆုံးခဲ့တယ်လို့ ဒေသခံတွေထံက သိရပါတယ်။

ဘုတလင်မြို့မှာ တပ်စွဲထားတဲ့ စစ်ကော်မရှင်တပ်အင်အား ၉၀ ခန့်ဟာ စက်တင်ဘာလ ၄ ရက် ဒီကနေ့ နေ့လယ် ၂ နာရီလောက်မှာ ဘုတလင်-ရေဦးလမ်းပိုင်းကို စစ်ကြောင်းထိုးလာပြီးနောက် ရှမ်းတဲရွာကို စစ်ကြောင်း ၂ ကြောင်းခွဲဝင်ရောက်လာကာ အမျိုးသမီး ၂ ဦးကို သေနတ်နဲ့ပစ်သတ်သွားခဲ့တာလို့ ဆိုပါတယ်။

” ရှမ်းတဲရွာက အမျိုးသမီး ၂ ဦးက **တွေပြန်ထွက်ပြီဆိုပြီး ရွာထဲပြန်ဝင်တဲ့အချိန်သတ်ခံရတာ။ ၁ ယောက်က ၄ လသားရဲ့မိခင်၊ ကလေးတော့မမှန်ပဲ အသက်ရှင်ကျန်ရစ်တယ်” လို့ ဘုတလင်ရပ်ကျေးပအဖအဖွဲ့ဝင်တဦးက မြေလတ်အသံကို ပြောပါတယ်။

သေဆုံးသူတွေမှာ ရှမ်းတဲရွာနေ အသက် ၄၀ အရွယ် မဖြူနဲ့ အသက် ၃၀ အရွယ် မအေးသီတို့ဖြစ်ပြီး မအေးသီမှာ သားဖြစ်သူ ၄ လသားလေးကို ပွေ့ချီထားရင်း ပစ်ခတ်ခံခဲ့ရတာလို့ ဆိုပါတယ်။

ဒါ့အပြင် စစ်ကြောင်းတွေဟာ တက်လှိုင်းရွာလမ်းခွဲအနီး မြေပဲခင်းတွေမှာ မြေပဲနှုတ်နေတဲ့ မြောက်ကျည်ရွာခံ ၁၅ ဦးကိုဖမ်းဆီးသွားခဲ့ပြီး ညနေ ၅ နာရီခန့် ဘုတလင်မြို့တွင်းပြန်လည်ဝင်ရောက်ချိန်မှာ ၁၄ ဦးကို ပြန်လွှတ်ပေးခဲ့ကာ အသက် ၃၅ နှစ်ဝန်းကျင် ကိုဖိုးဇေ ကို ဆက်လက်ဖမ်းဆီး ခေါ် ဆောင်သွားတယ်လို့ သိရပါတယ်။

အလားတူ စစ်ကိုင်းတိုင်း၊ ပုလဲမြို့နယ်၊ တနယ်ကျေးရွာကို စစ်ကော်မရှင်တပ်က လေကြောင်းကနေ ဗုံးကြဲတိုက်ခိုက်ခဲ့တာကြောင့် အမျိုးသမီး ၁ ဦးသေဆုံးခဲ့ပါတယ်။

စက်တင်ဘာ ၄ ရက်နေ့လယ် ၁ နာရီခန့်မှာ စစ်ကော်မရှင်တိုက်လေယာဥ်က ဗုံး ၂ လုံးကြဲချခဲ့ရာ တနယ်ကျေးရွာအနောက်တောင်ဘက်ရှိ နေအိမ်အတွင်း ကျရောက်ပေါက်ကွဲခဲ့ပြီး အသက် ၄၀ ဝန်းကျင်အမျိုးသမီးမှာ ဗုံးစထိမှန်ကာ ခါးပြတ်သေဆုံးခဲ့တာလို့ ဒေသခံတဦးက ပြောပါတယ်။

တနယ်ကျေးရွာဟာ အိမ်ခြေ ၁,၈၀၀ ခန့်ရှိ ကျေးရွာကြီးတရွာဖြစ်ပြီး ဩဂုတ်လကုန်ပိုင်းမှာလည်း ကျေးရွာအနောက်မြောက်ဘက်ဘုန်းကြီးကျောင်းပေါ်ကို လေယာဥ်နဲ့ဗုံးကြဲခံခဲ့ရပြီး အဲ့ဒီဗုံးကြဲခံရမှုမှာ လူထိခိုက်မှုမရှိခဲ့ဘူးလို့ သိရပါတယ်။

စာတည်း – ဟိန်းစံ

မုံရွာ၊ သြဂုတ် ၃၀၊ ၂၀၂၅။

စစ်ကိုင်းတိုင်း၊ ဘုတလင်မြို့နယ်အရှေ့တောင်ခြမ်းရှိ ထူးကြီးရွာက အမျိုးသမီး ၁ ဦး စစ်ကော်မရှင်တပ်ကပစ်တဲ့လက်နက်ကြီး ထိမှန်သေဆုံးပြီး နေအိမ်အဆောက်အဦတချို့လည်း ပျက်စီးခဲ့တယ်လို့ ဒေသခံတွေဆီက သိရပါတယ်။

သြဂုတ် ၃၀ ရက် ဒီမနက် ၇ နာရီ ၄၅ မိနစ်လောက်မှာ မုံရွာအခြေစိုက် အနောက်မြောက်တိုင်း စစ်ဌာနချုပ်ကပစ်ခတ်တဲ့ ၁၂၀ မမ လက်နက်ကြီးထိမှန်ပြီး ထူးကြီးရွာဒေသခံ အသက် ၃၀ အရွယ် မသီတာအေး ထိမှန်သေဆုံးခဲ့တာလို့ ဆိုပါတယ်။

“လက်နက်ကြီးထုတဲ့အခြေနေက မလုပ်တာ၂ လလောက်ရှိပြီ။ ဒီနေ့ပြန်ထုတာ၊ ဘုတလင်က ဒီတပတ်အတွင်း လေကြောင်းရော၊ လက်နက်ကြီးနဲ့ရော၊ မြေပြင်စစ်ကြောင်းရော ဆက်တိုက် ထိုးနေတယ်”လို့ ဘုတလင်မြို့နယ်တွင်း စစ်ရှောင်ကူကယ်လုပ်နေတဲ့ အမျိုးသားတဦးက မြေလတ်အသံကိုပြောပါတယ်။

ထူးကြီးကျေးရွာမှာ အိမ်ခြေ ၁၆၀ ကျော်၊ လူဦးရေ ၆၀၀ ကျော်ရှိပြီး ဒီပစ်ခတ်မှုကြောင့် နေအိမ် ၁ လုံးလည်း ပျက်စီးခဲ့တယ်လို့ သိရပါတယ်။

သြဂုတ်ပထမပတ်ကစတင်ကာ စစ်ကော်မရှင်တပ်ဟာ နမခ နဲ့ ဘုတလင်မြို့တွင်းတပ်စွဲနေတဲ့ စစ်ကြောင်းတွေပေါင်းပြီး ဘုတလင်မြို့နယ်အတွင်းကကျေးရွာတွေကို အင်အားဖြန့်စစ်ကြောင်းထိုးတာ၊ လက်နက်ကြီး၊ ပါရာမော်တာတွေနဲ့လည်း မကြာခဏပစ်ခတ်တာတွေ ရှိခဲ့တာကြောင့် ဒေသခံထိခိုက်သေဆုံးမှုတွေလည်း ရှိခဲ့ပါတယ်။

သြဂုတ် ၂၆ ရက်တရက်တည်းမှာပဲ စစ်ကော်မရှင်တပ်က ဘုတလင်မြို့နယ်၊ တောင်ကလပ်ဘုန်းကြီးကျောင်းအနီး ပါရာမော်တာနဲ့ ဗုံးသီးချတိုက်ခိုက်လို့ အသက် ၂၀ အရွယ် စစ်ရှောင်အမျိုသမီး သေဆုံးတဲ့အပြင် သခွတ္တနယ်ရွာကိုလည်း တိုက်လေယာဥ် ၂ စီးနဲ့ ထပ်မံဗုံးကြဲခဲ့တာကြောင့် အသက် ၁၈ နဲ့ ၂၂ နှစ်အရွယ် အမျိုးသား ၂ ဦး သေဆုံးခဲ့ပါသေးတယ်။

လက်ရှိမှာတော့ စစ်ကော်မရှင်တပ်ဟာ ဘုတလင်မြို့ထဲမှာ ပြန်လည်တပ်စွဲထားပြီး စစ်ကြောင်းထိုးတာကိုရက်နားထားပေမယ့် မုံရွာ နမခ ကနေ လက်နက်ကြီးနဲ့ပစ်ခတ်နေတာကြောင့် ဒေသခံတွေ စိုးရိမ်နေကြရတယ်လို့ သိရပါတယ်။

စာတည်း – လင်း