ပွင့်ဖြူ၊ ဇွန် ၁၄၊ ၂၀၂၅။

မကွေးတိုင်း၊ ပွင့်ဖြူမြို့နယ်၊ ကျွဲခြံကျေးရွာနဲ့ ကျောက်ပုံကျေးရွာတွေက စစ်ကောင်စီဖမ်းဆီးခဲ့တဲ့ ဒေသခံ ၆ ဦးထဲက ၂ ဦးစစ်မှုထမ်းပို့ခံရတယ်လို့ ဒေသခံတွေဆီကသိရပါတယ်။

ဇွန် ၁၀ ရက်မှာ ကျောက်ပုံရွာက အသက် ၂၃ နှစ်အရွယ် ကိုဝင်းနိုင်ဦး၊ ဇွန် ၁၁ ရက်မှာ ကျွဲခြံကျေးရွာနေ အသက် ၃၇ နှစ်အရွယ် ကိုဇင်မျိုးအောင်၊ ၄၆ နှစ်အရွယ် ကိုခင်မောင်သိန်း၊ ၄၃ အရွယ် မဥမ္မာဝင်း၊ ၃၁ နှစ်အရွယ် ဌေးနိုင်ဝင်း၊ ၁၅ နှစ်အရွယ် ဟိန်းသူရနိုင်တို့ကို နေအိမ်တွေကနေ ဝင်ရောက် ဖမ်းဆီးသွားပါတယ်။

“ပွင့်ဖြူနယ်ထဲမှာ ဒီဇွန်လအတွင်းမှာ ဖမ်းဆီးမှုတွေတောက်လျှောက်လုပ်လာတယ်။ အခုနောက်ပိုင်းက အမျိုးသား အသက်ငယ်သူဆိုရင် စစ်မှုထမ်းဖို့၊ အမျိုးသမီးတွေကိုတော့ မသင်္ကာလို့ ဖမ်းဆီးပေမယ့် ငွေနဲ့ ပြန်ရွေးခိုင်းတာမျိုးလိုက်ရတယ်။ ငွေကြေးယူပြန်လွတ်တာမျိုးပါ”လို့ မိသားစုနဲ့ နီးစပ်သူတဦးက ပြောပါတယ်။

ဖမ်းဆီးခံရသူတွေကို မဲဇလီရဲစခန်းမှာဖမ်းဆီးထားပြီး ဇွန် ၁၂ ရက်မှာတော့ ကိုဇင်မျိုးအောင်နဲ့ ကိုဝင်းနိုင်ဦးတို့ ၂ ဦးကို မိတ္ထီလာအခြေစိုက် တမခ ၉၉ ကို စစ်မှုထမ်းအဖြစ်ပို့ဆောင်ခံလိုက်ရတယ်လို့ သိရကြောင်း သူကဆက်ပြောပါတယ်။

ကျန်တဲ့ဖမ်းဆီးခံထားရသူ ၄ ဦးကတော့ ဇွန် ၁၄ ရက်အထိပြန်မလွတ်လာသေးဘဲ မိသားစုဝင်တွေနဲ့လည်းတွေ့ခွင့်မရဘူးလို့ ဆိုပါတယ်။

ယခုဖမ်းဆီးခံရသူတွေဟာ ဒေသကာကွယ်ရေးအင်အားစုတွေနဲ့ပတ်သက်သူတွေမဟုတ်ဘူးလို့လည်း ဆိုပါတယ်။

ပြီးခဲ့တဲ့နှစ် ဒီဇင်ဘာ ၁၉ ရက်ကလည်း ပွင့်ဖြူမြို့နယ်၊ ကနီကျေးရွာလမ်းထိပ်ရှိ ထန်းရည်ဆိုင်မှာရှိနေတဲ့ လူငယ် ၆ ဦးကို စစ်မှုထမ်းဖို့ဆိုက ပျူစောထီးအဖွဲ့ကဖမ်းဆီးသွားသေးတယ်လို့ မင်းဘူးခရိုင်ပြည်သူ့ကာကွယ်ရေးအဖွဲ့ဆီက သိရပါတယ်။

စာတည်း – လင်း

ပွင့်ဖြူ၊ မတ် ၁၄၊ ၂၀၂၅။

မကွေးတိုင်း၊ ပွင့်ဖြူမြို့နယ်၊ မုန်းဇလဲကျေးရွာက မီးဘေးသင့်ပြည်သူ ၁,၄၀၀ ကျော်အတွက် အကူအညီလိုအပ်နေတယ်လို့ ကူညီဆောင်ရွက်ပေးနေသူတွေဆီက သိရပါတယ်။

မီးဘေးသင့်ပြည်သူတွေအတွက် လူမှုကူညီရေးအသင်းအဖွဲ့တွေနဲ့ စစ်ကောင်စီလက်အောက် ဌာနဆိုင်ရာအချို့က လာရောက်လှူဒါန်းမှုတွေရှိပေမယ့် လုံလောက်မှုမရှိဘူးလို့ ဆိုပါတယ်။

“အိမ်သာတွေ လိုမယ်။ စက်ရေတွင်းတွေ ပြန်လည်တူးဖော်ဖို့ လိုမယ်။ တောင်သူသုံးပစ္စည်းတွေ လိုမယ်။ မသန်စွမ်းတွေအတွက် အထောက်ကူပြုပစ္စည်းတွေ လိုမယ်။ ကိုယ်ဝန်ဆောင်မိခင်၊ သက်ကြီးရွယ်အိုတွေနဲ့ကလေးသူငယ်တွေအတွက် လိုအပ်တဲ့ဖြည့်စွက်စာတွေ လိုမယ်။ အခြား ဆန်ဆီဆေးဆားတွေလည်း လိုတယ်။”လို့ မီးဘေးသင့်ပြည်သူတွေကို ကူညီပေးနေသူတဦးက ပြောပါတယ်။

မီးဘေးသင့်ပြည်သူ ၁,၄၄၅ ဦးကတော့ ကျေးရွာအတွင်းရှိ ဘုန်းကြီးကျောင်း ၃ ကျောင်းနဲ့ အခြေခံပညာကျောင်းတွေမှာ ယာယီခိုလှုံနေကြရပါတယ်။

မတ် ၁၂ ရက်နေ့လယ် ၂ နာရီခန့်မှာ မုန်းဇလဲကျေးရွာ အနောက်တောင်အရပ်က နေအိမ် ၁ လုံးမှာ လူကြီးတွေမရှိချိန် ကလေးတွေက ထင်းမီးနဲ့ဟင်းချက်စားရာကနေ နေအိမ်ကိုမီးကူးပြီး မီးလောင်မှုစတင်ဖြစ်ခဲ့တယ်လို့ ဆိုပါတယ်။

မီးလောင်ချိန်မှာ ရာသီဥတုကပူပြင်းတာနဲ့ လေကလည်းတိုက်နေချိန်ဖြစ်တာကြောင့် မီးစလောင်တဲ့ နေအိမ်က မီးလောင်လက်စဝါးတွေနဲ့သစ်တွေက အခြားနေအိမ်တွေပေါ်ကျရာကနေ ထပ်ဆင့်မီးကူးပြီး ရွာရဲ့ ၇၀ ရာခိုင်နှုန်းနီးပါး မီးလောင်ကုန်တာလို့ဆိုပါတယ်။

မီးလောင်မှုကြောင့် ကျန်းမာရေးမကောင်းတဲ့ အသက် ၆၈ နှစ်အရွယ် ဦးထွေးရင်ဆိုသူ မီးလောင်သေဆုံးပြီး နွား ၃ ကောင်၊ မြင်း ၁ ကောင်၊ ဝက် ၁၀ ကောင်၊ အိမ်ခြေ ၃၇၂ အိမ်၊ လှည်းတွေအပါအဝင် လယ်ယာသုံးစက်ပစ္စည်းတွေနဲ့ အိမ်တွင်းပစ္စည်းတွေ မီးလောင်ပျက်စီးသွားတယ်လို့ သိရပါတယ်။

မီးလောင်အပျက်စီးတွေကိုတော့ မတ် ၁၄ ရက်မနက်ပိုင်းထိ ဒေသခံတွေက ဆက်လက်ရှင်းလင်းနေပြီး မီးဘေးသင့်ပြည်သူတွေကတော့ ဘုန်းကြီးကျောင်းနဲ့စာသင်ကျောင်းတွေမှာ ဆက်လက် ခိုလှုံနေကြရတယ်လို့ သိရပါတယ်။

စာတည်း – လင်း

ပွင့်ဖြူ၊ ဖေဖော်ဝါရီ ၂၁၊ ၂၀၂၅။

မကွေးတိုင်း၊ ပွင့်ဖြူမြို့နယ်၊ ရေပုတ်ကလေးရွာခံအမျိုးသား ၁၂ ဦး ဖမ်းဆီးခံရပြီးနောက် ၆ ဦး အသတ်ခံခဲ့ရတယ်လို့ ဒေသခံတွေထံက သိရပါတယ်။

ဖေဖော်ဝါရီ ၁၇ ရက်မှာ စစ်ကောင်စီတပ်နဲ့ ပျူစောထီးပူးပေါင်းအင်အား ၁၅၀ ဝန်းကျင်ဟာ ရေပုတ်ကလေးရွာကို စစ်ကြောင်းထိုးဝင်ရောက်လာကာ ရွာခံအမျိုးသား ၁၂ ဦးကို ဖမ်းဆီးခေါ်ဆောင်သွားခဲ့ပြီး အဲ့ဒီထဲက ၆ ဦးကို မဒဲရွာအနီးမှာ သတ်ဖြတ်ခဲ့တာလို့ ဆိုပါတယ်။

“ မျက်နှာတွေကိုဓားနဲ့မွှန်းတယ်။ လည်ပင်းကိုဓားနဲ့လှီးတယ်။ ပြီးတော့မှ မုန်းချောင်းထဲကို မျှောချလိုက်တယ်” လို့ ဖမ်းဆီးခံရမှုမှာလွတ်မြောက်လာသူတဦးရဲ့ပြောဆိုချက်ကို ကိုးကားပြီး ဖြစ်စဥ်ကိုသိရှိထားတဲ့ ဒေသခံအမျိုးသားတဦးက ပြောပါတယ်။

သေဆုံးသူတွေဟာ ရေပုတ်ကလေးရွာခံ NLD ပါတီထောက်ခံသူတွေဖြစ်တဲ့ ကိုအောင်ကျော်ဦး ၃၇ နှစ်၊ ကိုဌေးမြင့် ၆၃ နှစ်၊ ကိုစိုးနိုင် ၆၀ နှစ်၊ ကိုခင်မောင်သန်း ၅၇ နှစ်၊ ကိုမှတ်ကြီး ၅၃ နှစ်၊ ကိုလှမောင် ၆၅ နှစ်တို့ဖြစ်ကြပြီး ၎င်းတို့ထဲက ရုပ်အလောင်း ၄ ခုကို အသတ်ခံရတဲ့ နေရာအနီး မုန်းချောင်းထဲမျှောချခဲ့ကာ နောက်ထပ်ရုပ်အလောင်း ၂ ခုကို မဒဲရွာသုဿန်မှာ ပစ်ထားခဲ့တယ်လို့ ဆိုပါတယ်။

ဖေဖော်ဝါရီ ၁၉ ရက်မှာ ရေပုတ်ကလေးရွာခံအမျိုးသား ၆ ဦးဒဏ်ရာတချို့နဲ့ပြန်လွတ်လာပြီး ဘေးလွတ်ရာကိုထပ်မံထွက်ပြေးနေရကာ မဒဲရွာအတွင်းမှာ နောက်ထပ်စစ်ကောင်စီတပ်စစ်ကြောင်းတခုရှိနေလို့ သေဆုံးရုပ်အလောင်းတွေမကောက်ယူနိုင်သေးဘူးလို့ သိရပါတယ်။

“ လူ ၆ ဦးသတ်ခံရမှုမှာ ရေပုတ်ကလေးရွာသား ဦးသန်းအေးက အဓိကပါဝင်ပါတယ်။ သူက ရေပုတ်ကလေး ပျူစောထီးခေါင်းဆောင်ပိုင်းထဲက” လို့ အထက်ပါဒေသခံက ပြောပါတယ်။

ဖမ်းဆီးသတ်ဖြတ်ခဲ့တဲ့အဆိုပါစစ်ကောင်စီစစ်ကြောင်းမှာ ပွင့်ဖြူ ဝါစိုက်ပျိုးရေးတပ်၊ စလင်း အခြေစိုက် ခလရ ၂၅၃၊ ၂၅၄၊ ၂၅၅၊ ကျောက်ကြီးကုန်းနဲ့ ရေပုတ်ကလေးရွာ ပျူစောထီးအဖွဲ့တွေပါဝင်တဲ့ပူးပေါင်းစစ်ကြောင်းဖြစ်ကာ လက်ရှိမှာ ကြီးအုံကြီးဝတမံကို ရောက်ရှိနေတယ်လို့ ဆိုပါတယ်။

ကြံ့ခိုင်ရေးပါတီရော NLD ပါတီပါ အားကောင်းတဲ့ရေပုတ်ကလေးရွာဟာ အိမ်ခြေ ၂၀၀၊လူဦးရေ ၁,၀၀၀ ခန့်၊ ပျူစောထီးအင်အား ၂၅ ဦးခန့်ရှိကာ လက်ရှိမှာ ကျေးရွာအတွင်းကနေ စစ်ကြောင်းပြန်လည်ထွက်ခွာသွားပေမယ့် ယနေ့အထိ တရွာလုံးနီးပါးတိမ်းရှောင်နေကြဆဲဖြစ်တယ်လို့ သိရပါတယ်။

စာတည်း – ကိုချမ်း

မကွေး၊ ဇန်နဝါရီ ၁၄၊ ၂၀၂၅။

မကွေးတိုင်း၊ ပွင့်ဖြူမြို့နယ်၊ မဒဲကျေးရွာအုပ်စုထဲက ကျေးရွာတွေကို စစ်မှုမထမ်းချင်ရင် ၁ အိမ်ထောင် ၁ သောင်းခွဲကျပ် ပေးရမယ်ဆိုပြီး အုပ်ချုပ်ရေးမှူးနဲ့ ဆယ်အိမ်မှူးတွေက အတင်းအဓမ္မခြိမ်းခြောက် ကောက်ခံသွားတယ်လို့ ဒေသခံတွေဆီက သိရပါတယ်။

ဇန်နဝါရီ ၁၃ ရက်နေ့ နေ့လယ်၁၂ နာရီမှာ အုပ်ချုပ်ရေးမှူး ဒေါ်ဝင်းဝင်းအေးနဲ့ ဆယ်အိမ်မှူးတွေဖြစ်တဲ့ ဦးလှဝင်း၊ ဦးစောတင်၊ မပြုံးကြည်တို့က ၁ အိမ်ထောင် ကျပ် ၁ သောင်းခွဲကောက်ခံပြီး ငွေမပေးနိုင်ရင် စစ်မှုထမ်းရမယ်ဆိုကာ အတင်းအဓမ္မခြိမ်းခြောက် ကောက်ခံခဲ့တာလို့ ဆိုပါတယ်။

“တကယ်လို့မှ မပေးဆောင်ရင် မဒဲရွာအရှေ့က ကျောင်းကုန်းကြီးကျေးရွာအုပ်စုနဲ့ ရေပုတ်ကလေးကျေးရွာအုပ်စုက ပျူစောထီးတွေကိုခေါ်ပြီးတော့ နေ့ချင်းညချင်း ဖမ်းဆီးခိုင်းပါမယ်ဆိုလို့ ခံဝန်ကတိတွေနဲ့ မပေးရင်မဖြစ်လို့ကြောက်အားလန့်အားကြီးပြီးတော့ ကျနော်တို့ပေးရပါတယ်”လို့ ဒေသခံတဦး ပြောပါတယ်။

မဒဲကျေးရွာအုပ်စုထဲမှာ အိမ်ခြေ ၄၀၀ ရှိတဲ့ မဒဲကျေးရွာအပါအဝင် ၇ ရွာရှိကာ မဒဲကုန်းရွာ အိမ်ခြေ ၁၀၀၊ ထိန်အိုင်ရွာ အိမ်ခြေ ၃၈၀၊ သစ်ပုတီးကုန်း ၁၃၅ အိမ်၊ မလွှကုန်းရွာမ အိမ်ခြေ ၁၃၀၊ မလွှကုန်းရွာသစ် အိမ်ခြေ ၉၀ နဲ့ အိမ်ခြေ ၁၃၈ အိမ်ရှိပေတောကျောင်းကုန်းရွာတို့ ပါဝင်ပါတယ်။

ရာအိမ်မှူးနဲ့အဖွဲ့ဟာ တနေ့ ၁ ရွာနှုန်းဝင်ရောက်ကောက်ခံခဲ့ပြီး ဇန်နဝါရီ ၁၃ ရက်နေ့မှာ မဒဲကုန်းရွာကို နောက်ဆုံးကောက်ခံခဲ့တာကြောင့် နေ့လယ် ၁၂ နာရီကနေ ၃ နာရီအတွင်း မဒဲကျေးရွာ ရပ်ကွက်ရုံးကို သွားရောက်ပေးဆောင်ခဲ့ကြရတယ်လို့ သိရပါတယ်။

ကျေးရွာအုပ်စု ၇ ရွာထဲက အိမ်ထောင်စုအားလုံးနီးပါး ပေးဆောင်ခဲ့ကြရကာ စားဝတ်နေရေး ကျပ်တည်းပြီး မပေးနိုင်တဲ့သူ ၄၊ ၅၊ ၁၀ ဦး လောက်ဟာလည်း ဘယ်နေ့ဘယ်ရက်မှာ ပေးပါမယ်ဆိုတဲ့ ခံဝန်ကတိပေးထားကြရတယ်လို့ ဒေသခံတဦးက ပြောပါတယ်။

မဒဲကျေးရွာ အုပ်ချုပ်ရေးမှူး ဒေါ်ဝင်းဝင်းအေးဟာ ပွင့်ဖြူမြို့ ပြည်ထောင်စုကြံ့ခိုင်ဖွံ့ဖြိုးရေးရုံးမှာ နေထိုင်ပြီး ဆယ်အိမ်မှူးဖြစ်တဲ့ ဦးလှဝင်း၊ ဦးစောတင်၊ မပြုံးကြည် တို့က မဒဲကျေးရွာမှာ နေထိုင်ကာ အုပ်စုတွင်းကျေးရွာတွေကို ငွေကြေးလိုက်လံကောက်ခံတယ်လို့ သိရပါတယ်။

စာတည်း – ကိုချမ်း