ပဲခူး

ပေါင်းတည်၊ မတ် ၁၃၊ ၂၀၂၃။

ပဲခူးတိုင်း(အနောက်ပိုင်း) ပြည်ခရိုင်၊ ပေါင်းတည်မြို့ ပန်းခြံမှာ ကိုဖုန်းမော်နေ့ အမှတ်တရ လူထုလှုပ်ရှားမှုကို မတ်လ ၁၃ ရက် ဒီကနေ့မနက် ၁၁ နာရီမှာ ပြုလုပ်ခဲ့ကြတယ်လို့ သိရပါတယ်။

ပေါင်းတည်၊ ရန်ကုန် – ပြည်လမ်းပေါ်က ရဲစခန်းရှေ့ ငြိမ်းချမ်းရွှေတည် ပြည်သူ့ပန်းခြံထဲမှာ နှင်းဆီနီ လူထုလူပ်ရှားမူအဖြစ် ပြုလုပ်တာဖြစ်ပြီး စစ်အာဏာရှင်စနစ်ဆန့်ကျင်ရေး၊ ဒီမိုကရေစီရရှိရေး၊ ၂၀၀၈ ဖွဲ့စည်းပုံဖျက်သိမ်းရေး၊ ငါတို့အစိုးရ ငါတို့ပြန်ပေး၊ ဖက်ဒရယ်ဒီမိုကရေစီဖော်ဆောင်ရေး စာတန်းတွေပါတဲ့ တီရှပ်အင်္ကျီတွေ ဝေငှခဲ့ကြသလို ပန်းခြံထဲက ခုံတွေနဲ့ အလှပန်းပင်တွေပေါ်မှာလည်း ချိတ်ဆွဲခဲ့တာ ဖြစ်ပါတယ်။

စက်မှုကျောင်းသား ကိုဖုန်းမော် အပါအဝင် ခေတ်အဆက်ဆက်နဲ့ နွေဦးတော်လှန်ရေးအတွင်း ဒီမိုကရေစီတိုက်ပွဲမှာ ကျဆုံးခဲ့ရတဲ့ ရဟန်းရှင်လူကျောင်းသားပြည်သူအပေါင်းတို့ကို အောက်မေ့ဂုဏ်ပြုတဲ့အနေနဲ့ ၇/အဖွဲ့က ပြုလုပ်ခဲ့တာလို့ သိရပါတယ်။

စာတည်း – 007

ပဲခူး၊ မတ် ၁၃၊ ၂၀၂၃။

ပဲခူးတိုင်း(အနောက်ခြမ်း)၊ သာယာဝတီခရိုင်၊ မင်းလှမြို့နယ်ထဲမှာ မတ်လ ၁၃ ရက် ဒီနေ့မနက်အစောပိုင်း ၂ နာရီလောက်က မိုးသက်လေပြင်းတိုက်ခတ်ခဲ့တာကြောင့် လူနေအိမ်တွေထိခိုက်ပျက်စီးခဲ့တယ်လို့ သိရပါတယ်။

လေပြင်းတိုက်ခတ်တာကြောင့် မင်းလှမြို့နယ်၊ စိန်ကန့်လန့်ရွာက လူနေအိမ် ၁ လုံးပြိုကျပျက်စီးခဲ့ပြီး၊ နေအိမ် ၂၅ လုံးခန့်အမိုးလန်ပျက်စီးကာ ရန်ကုန်-ပြည်ကားလမ်းမပေါ်က ကိုင်းပြင်ကြီးရွာ မူလတန်းလွန်ကျောင်းမှာလည်း အမိုးလန်ခဲ့တယ်လို့ ဒေသခံတဦးက မြေလတ်အသံကို ပြောပါတယ်။

“မိုးရောလေရောတိုက်တာဗျ။ လေကလည်းပြင်းသလို မိုးကလည်းကြီးတယ်။ ညပိုင်းဖြစ်နေတော့ မနက်ရောက်မှ အပျက်အစီးတွေမြင်ပြီးမှအမိုးလန်တာကိုသိရတာ။ ပြည်လမ်းပေါ်က ကိုင်းပြင်ကြီးရွာ မူလွန်ကျောင်းမှာလည်း လေပြင်းကြောင့် သွပ်အချပ် ၃၀ လောက်ပျက်စီးခဲ့တယ်” လို့ ပြောပါတယ်။

ကိုင်းပြင်ကြီးရွာအနီး ရန်ကုန်-ပြည်ကားလမ်းမပေါ်မှာလည်း လေပြင်းတိုက်ခတ်မှုကြောင့် သစ်ပင်တွေကျိုးကျနေလို့ လမ်းပိတ်ဆို့မှုတွေဖြစ်ပေါ်ခဲ့သေးတယ်လို့ သူကဆက်ပြောပါတယ်။

ပြင်ပမိုးလေဝသပညာရှင်အချို့ရဲ့ခန့်မှန်းချက်မှာလည်း မြန်မာနိုင်ငံမြေလတ်ဒေသ စစ်ကိုင်း၊ မန္တလေး၊ ပဲခူးနဲ့ မကွေးတိုင်းအပါအဝင်ဒေသအများစုမှာ မတ်လ ၁၃ ရက်ကစတင်လို့ အချိန်အခါမဟုတ် မိုးသက်လေပြင်းကျရောက်တာတွေဖြစ်ပေါ်လာနိုင်တယ်လို့ ခန့်မှန်းထုတ်ပြန်ထားပါတယ်။

ကရင်ပြည်နယ်နဲ့မွန်ပြည်နယ်ကမြို့နယ်အချို့မှာလည်း မနေ့ညပိုင်းနဲ့ ဒီမနက်ပိုင်းမှာ မိုးကြီးပြီးလေပြင်းတိုက်ခဲ့မှုတွေ ဖြစ်ပေါ်ခဲ့တယ်လို့ သိရပါတယ်။

ပြီးခဲ့တဲ့ဖေဖေါ်ဝါရီလ ၁၆ ရက်ကလည်း ပဲခူးတိုင်းအနောက်ခြမ်းက နတ်တလင်း၊ ကြို့ပင်ကောက်၊ မင်းလှမြို့နယ်တွေမှာ မိုးရွာသွန်းခဲ့ပြီး မိုးညိုမြို့နယ်မှာတော့ နေအိမ် ၂၀ ကျော်အမိုးလန်ပျက်စီးခဲ့ပါသေးတယ်။

စာတည်း- ရင်ငြိမ်း

ပြည်၊ မတ် ၁၃၊ ၂၀၂၃။

ပဲခူးတိုင်း(အနောက်ခြမ်း)၊ ပြည်မြို့မှာ ကျဆုံးခဲ့တဲ့ ရေကြောင်းတက္ကသိုလ်ကျောင်းသား ထက်မြတ်အောင်ရဲ့ ကျဆုံးခြင်း ၂ နှစ်ပြည့် လှုပ်ရှားမှုကို ရေကြောင်းပညာတက္ကသိုလ် ကျောင်းသားများသမဂ္ဂက ကျောင်းပရဝုဏ်အနီးမှာပဲ ပြုလုပ်ခဲ့တယ်လို့ သိရပါတယ်။

ဒီကနေ့ မတ်လ ၁၃ ရက်နေ့မှာ ကျရောက်မယ့် ကျဆုံးခြင်း ၂ နှစ်ပြည့်အတွက် မတ်လ ၁၂ ရက် မနေ့ မနက် ၇ နာရီလောက်မှာ အကြိုလှုပ်ရှားမှု ပြုလုပ်ခဲ့တာဖြစ်တယ်လို့ ရေကြောင်းပညာတက္ကသိုလ် ကျောင်းသားသမဂ္ဂအဖွဲ့ဝင် တဦးက မြေလတ်အသံကို ပြောပါတယ်။

“မနှစ်ကတော့ ဘန်နာကပ်တယ်။ ဒီနှစ်ကတော့ အမှတ်တရသဘောမျိုး တခုခုလုပ်ကြမယ်ဆိုပြီး အမှုဆောင်တွေတိုင်ပင်ပြီး လုပ်ဖြစ်တာပါ။ ထက်မြတ်အောင်က ဝမ်းဗိုက်နေရာနားကို ကျည်ဆံထိမှန်တာရယ်၊ ပထမနှစ်ကျောင်းသားလည်း ဖြစ်တာရယ်ကြောင့် ကျနော်တို့ ကျောင်းယူနီဖောင်း ပထမနှစ်ဘားနဲ့ အင်္ကျီပေါ်မှာ ဆေးနီတွေပက်ပြီး လုပ်လိုက်တာပါ” လို့ ပြောပါတယ်။

ထက်မြတ်အောင်ဟာ ၂၀၂၁ ခုနှစ်၊ မတ်လ ၁၃ ရက်နေ့က ပြည်မြို့၊ ခရမ်းကုန်းရပ်ကွက်မှာ ပြုလုပ်ခဲ့တဲ့ စစ်အာဏာရှင်ဆန္ဒပြသပိတ်စစ်ကြောင်းကို စစ်ကောင်စီတပ်က ကျည်အစစ်တွေနဲ့ ပစ်ခတ်ဖြိုခွင်းစဉ်မှာ ရှေ့တန်းကနေ ဒိုင်းနဲ့အကာအကွယ်ပေးရင်း ဝမ်းဗိုက်ကျည်ထိမှန် ကျဆုံးခဲ့တာ ဖြစ်ပါတယ်။

အဲ့ဒီနေ့ ပစ်ခတ်ဖြိုခွင်းခံရတဲ့ ပြည်မြို့သပိတ်စစ်ကြောင်းမှာပဲ အသက် ၂၀ ဝန်းကျင် ဖြိုးဝေယံကျော် ဆိုသူ လူငယ်လည်း ဦးခေါင်းကျည်ထိမှန်ခဲ့ကာ စစ်ကောင်စီတပ် ကုတင် ၁၀၀ စစ်ဆေးရုံကို ပို့ဆောင်ကုသစဉ်မှာ ကျဆုံးခဲ့ပါတယ်။

“ထက်မြတ်အောင် ကျဆုံးမှုအတွက်ကို ကျနော်က ဝမ်းနည်းတာထက် ဂုဏ်ယူတာက ပိုပါတယ်။ သေသွားတဲ့လူအတွက် ခဏကလေး ဝမ်းနည်းပြတာဟာ လုံလောက်မှုမရှိဘူးလို့ ထင်ပါတယ်။ သူ့သေဆုံးမှုဟာ တရားမမျှတဘူးလို့ ယုံကြည်ရင် တော်လှန်ပါ။ ဒီနည်းလမ်းပဲ ရှိပါတယ်။ အပြင်ပန်းကနေ ဝမ်းနည်း ကြေကွဲ ပြရတာ ဘာအဓိပ္ပာယ်မှ မရှိပါဘူး” လို့ ကျောင်းသားတဦးက ပြောပါတယ်။

ပြီးခဲ့တဲ့ ၂၀၂၂ ခုနှစ် မတ်လ ၁၃ ရက်နေ့ ၁ နှစ်ပြည့်တုန်းကလည်း ကျဆုံးလူငယ် ၂ ဦးအတွက် သူတို့ အုတ်ဂူမှာ အထိမ်းအမှတ်ပန်းခွေ လာချတာနဲ့ပတ်သက်ပြီး မီးသဂြိုလ်စက်ဝန်ထမ်းတဦး စစ်ကောင်စီရဲ့ ဖမ်းဆီးခြင်းကို ခံခဲ့ရပါသေးတယ်။

စာတည်း – ရင်ငြိမ်း

ရွှေကျင်၊ မတ် ၁၃၊ ၂၀၂၃။

ပဲခူးတိုင်း၊ ရွှေကျင်မြို့နယ်၊ ညောင်ခြေထောက်ကျေးရွာ ချောင်းလှေဆိပ်မှာ ဆက်ကြေးကောက်နေတဲ့ စစ်ကောင်စီတပ်ဖွဲ့ဝင် တပ်ကြပ်ကြီးတဦး သေနတ်နဲ့ ပစ်သတ်ခံခဲ့ရပါတယ်။

မတ်လ ၁၂ ရက်နေ့လည် ၁၂ နာရီခန့်မှာ ခမရ ၅၉၈ မှ အသက် ၅၀ နှစ်အရွယ် တပ်ကြပ်ကြီး ဦးငပေါက် ဆိုသူကို ဆပ်ကြေးကောက်တဲ့နေရာမှာ အလစ်ဝင်ရောက်ပြီး ပစ်ခတ်ရှင်းလင်းခဲ့တာလို့ Soul Takers – Yangon Underground Force မှ ပြန်ကြားရေးတာဝန်ရှိသူက ပြောပါတယ်။

“ကျနော်တို့ဘက်က ပစ်ခတ်ချိန်မှာ သူတဦးတည်းကို တွေ့ရတယ်။ သူက လှေတွေဆီကနေ မိုက်ကြေးခွဲ ဆက်ကြေးကောက်နေကြပါ။ အဲ့လှေဆိပ်မှာက သူ့ကိုလူတိုင်းသိကြတယ်။ ကျနော်တို့ဘက်က အလစ်တိုက် အမြန်ပြန်ထွက်လုပ်ရတာ ဖြစ်တယ်။ သူဘက်က ခုခံချိန်မရလိုက်ဘူး” လို့ ပြောပါတယ်။

အဲ့ဒီတပ်ကြပ်ကြီးဟာ အများအားဖြင့် သူ့ရဲ့အဖွဲ့တွေနဲ့ ဆက်ကြေးကောက်လေ့ရှိပြီး၊ ပစ်ခတ်ခံရချိန်မှာတော့ တဦးတည်း ရှိနေတာလို့လည်း ဆိုပါတယ်။

ခုလိုပစ်ခတ်မှုကြောင့် နေရာတင် ပွဲချင်းပြီး သေဆုံးခဲ့ပြီး၊ သူ့ဆီကနေ သေနတ်တလက်၊ ကျည်ဘောက် ၂ ခု၊ ကျည်ဆံ ၅၄ တောင့်ကို သိမ်းဆည်းရခဲ့တယ်လို့ အထက်ပါပြန်ကြားရေး တာဝန်ခံက ပြောပါတယ်။

ဒါ့အပြင် ပစ်ခတ်ခံရပြီးနောက် အဲ့ဒီနေရာကို စစ်ကောင်စီအဖွဲ့တွေ ရောက်လာပြီး လှေဆိပ်အနီး ပိတ်ဆို့ရှာဖွေတာတွေ လုပ်ခဲ့သေးတယ်လို့ သိရပါတယ်။

ပြီးခဲ့တဲ့ ဖေဖော်ဝါရီလ ၁၆ ရက်ကလည်း ရွှေကျင်မြို့နယ်၊ ရေအေးမြောင်ကျေးရွာက စစ်ကောင်စီခန့် အုပ်ချုပ်ရေးမှူး အောင်ဆန်းလင်း ဆိုသူကို ဒေသခံကာကွယ်ရေးတပ်တွေက သေနတ်နဲ့ ပစ်ခတ်ရှင်းလင်းခဲ့ပါသေးတယ်။

စာတည်း – လင်း

ပြည်၊ မတ် ၁၃၊ ၂၀၂၃။

ပဲခူးတိုင်းဒေသကြီး(အနောက်ပိုင်း)၊ ပြည်မြို့၊ မင်းကြီးတောင်ပေါ်ရှိ စစ်ဘက်ဆိုင်ရာလုံခြုံရေးတပ်ဖွဲ့ရုံးမှာ ဗုံးပေါက်ကွဲမှုဖြစ်ပွားပြီး၊ တပ်ဖွဲ့ဝင် ၄ ဦးသေဆုံးခဲ့တယ်လို့ ဌာနဆိုင်ရာဝန်ထမ်းတချို့ထံက သိရသည်။

ပြီးခဲ့တဲ့ မတ်လ ၁၂ ရက်နေ့ ညနေပိုင်းက ပြည်မြို့၊ မင်းကြီးတောင်ပေါ်မှာ ရှိတဲ့ စစ်ဘက်ဆိုင်ရာလုံခြုံရေးတပ်ဖွဲ့ရုံးမှာ ပေါက်ကွဲမှုဖြစ်ပွားခဲ့တာဖြစ်ပြီး အဲဒီနေရာဟာ စစ်အာဏာရှင်အဆက်ဆက် စစ်ကြောရေးလုပ်ရာနေရာဖြစ်ပြီး ဒကစ အကြီးပိုင်းများ လာရောက်လေ့ရှိကာ စစ်တပ်မိသားစုလိုင်းခန်းများ ပတ်လည်ဝိုင်းထားရာ နေရာလည်း ဖြစ်တယ်လို့ ဆိုပါတယ်။

“မနေ့ကညနေက ပေါက်ကွဲမှု ဖြစ်တယ်။ သူတို့ဗုံးနဲ့သူတို့ပေါက်ကွဲတယ်လို့ ကနဦးသိထားတယ်။ ၃ ဦးကတော့ ချက်ချင်းသေပြီး ၁ ဦးကတော့ ဆေးရုံရောက်မှ သေတယ်လို့ ကြားတယ်။ အခုလောလောဆယ်တော့ အဲအပေါ်ကို တက်ခွင့်ပိတ်ထားတယ်။” လို့ နီးစပ်သူများထံက သိရပါတယ်။

အဲဒီနေရာကို ယခင်ကတည်းက တက်ရောက်ခွင့်ပိတ်ပင်ထားပြီး စစ်အာဏာသိမ်းမှုဖြစ်ပြီးနောက် လာရောက်ခွင့် ပိုမိုတင်းကျပ်ထားတဲ့အတွက် ပါဆယ်ဗုံးလာပို့တာ မဖြစ်နိုင်ဘူးလို့ ယင်းနေရာအနီး ရပ်ကွက်နေထိုင်သူများက ဆိုပါတယ်။

“မနေညကတော့ ဖြစ်ပြီး တင်းတင်းကျပ်ကျပ် ပိတ်ထားတယ်။ ဘယ်သူမှ တက်မရဘူး။ အဲရုံးကိုသွားတဲ့လမ်းက ဆင်စုရပ်ကွက်နဲ့ နဝဒေးတံတားကိုသွားတဲ့ ဖြတ်လမ်းပေါ့။ မြန်မာ့အသံ ထပ်ဆင့်လွှင့်ရုံလည်း ရှိတယ်။ ကျန်တာကတော့ သူတို့ ဝန်ထမ်းတွေပဲနေတာ စစ်ကြောရေးက အဲမှာလည်းလုပ်တယ်။ နာမည်ကြီးနေရာပေါ့” ဟု မြို့ခံတဦးက ဆိုပါတယ်။

ဒဏ်ရာရသူတွေကိုတော့ နွားမယံကျေးရွာ အုပ်စုမှာရှိတဲ့ ကုတင် ၁၀၀ စစ်ဆေးရုံမှာ တက်ရောက်ကုသနေရတယ်လို့ သိရပါတယ်။

ပေါက်ကွဲမှုနဲ့ပတ်သက်ပြီးတော့ “မြေပြင်သတင်းစုံစမ်းချက်အရတော့ သူတို့ရုံးကို PDF၊ UG တွေဘက်က လုပ်တာမျိုးမရှိဘူး။ သိရတဲ့ သတင်းအရတော့ သူတို့ တပ်ဖွဲ့ဝင်တွေ အချိန်းအပြောင်းလုပ်တဲ့ အချိန် လက်နက်တွေပါ ရွှေ့ပြောင်းရာကနေ မတော်တဆဖြစ်ပြီး ပေါက်ကွဲတာလို့တော့ သိရတယ်။” လို့ ပြည်ခရိုင် တော်လှန်ရေးအင်အားစု ပြန်ကြားရေးတာဝန်ရှိသူက ပြောပါတယ်။

ပဲခူး၊ မတ် ၁၁၊ ၂၀၂၃။

ပဲခူးတိုင်း၊ ပဲခူးခရိုင်၊ ကဝမြို့နယ်၊ သရက်ကုန်းကျေးရွာမှာ စစ်ကောင်စီအတွက် ဆက်ကြေးကောက်ပေးနေတဲ့ ပျူစောထီးခေါင်းဆောင်ဆိုသူ သေနတ်နဲ့ပစ်ခံရပြီး သေဆုံးသွားတယ်လို့ သိရပါတယ်။

အသက် ၅၅ နှစ်အရွယ် သရက်ကုန်းရွာသား ဦးတင်မြင့်ဖြစ်ပြီး မတ်လ ၁၀ ရက်မနေ့ကမနက် ၇ နာရီ ၃၀ မိနစ်လောက်က သရက်ကုန်းစျေးထဲမှာ ပစ်ခတ်ရှင်းလင်းခဲ့တာလို့ ကဝမြို့နယ် ပကဖ တာဝန်ရှိသူက ပြောပါတယ်။

“ကျနော်တို့ဘက်က စကစ ဘက်ကလူတွေကို ရှင်းတော့မယ်ဆိုရင် သေချာစိစစ်ပြီးမှ ရှင်းတာဖြစ်တယ်။ နံပါတ်စဥ်ပြီးမှ ဘယ်သူကို အရင်ရှင်းရမလဲဆိုတာ လုပ်ပါတယ်။ ခုက တင်မြင့်က ရှင်းရမယ့် သူတွေထဲက တယောက်ဖြစ်လို့ နန်းထိုက်အောင်စစ်ဆင်ရေးအနေနဲ့ ရှင်းလင်းလိုက်တာ ဖြစ်ပါတယ်” လို့ ပြောပါတယ်။

သေနတ်နဲ့ပစ်ခတ်ခံရလို့ ဦးတင်မြင့်ရဲ့ ဦးခေါင်းနဲ့ခန္ဓာကိုယ်မှာ ကျည်ထိဒဏ်ရာနဲ့ နေရာမှာပဲ သေဆုံးသွားခဲ့တာဖြစ်ပြီး၊ ပစ်သတ်ခံရပြီးနောက်မှာ စစ်ကောင်စီအဖွဲ့တွေ ရောက်လာကာ လမ်းပိတ်ဆို့ စစ်ဆေးရှာဖွေတာတွေ လုပ်ဆောင်ခဲ့တယ်လို့ သိရပါတယ်။

သရက်ကုန်းကျေးရွာမှာ စစ်ကောင်စီတပ်ဖွဲ့ဝင် ၁၀ ဦးခန့် အမြဲတမ်းတပ်စွဲထားပြီး အုပ်ချုပ်‌ရေးမှူး၊ ပျူစောထီးတွေနဲ့ ပူးပေါင်းကာ ပြည်သူလူထုကို ဒုက္ခမျိုးစုံပေးလျက်ရှိတယ်လို့လည်း ဆိုပါတယ်။

ဦးတင်မြင့်ဟာ သရက်ကုန်းရွာမှာ တပ်စွဲထားတဲ့ စစ်ကောင်စီတပ်ဖွဲ့ဝင်တွေနဲ့ အခြားကျေးရွာတွေကို ဆိုင်ကယ်နဲ့လှည့်လည်ရာမှာ ကိုယ်တိုင်သေနတ်လွယ် ဆိုင်ကယ်မောင်းပြီး နေ့ရောညပါ သတင်းပေး လမ်းပြပြုလုပ်နေသူဖြစ်တယ်လို့လည်း သိရပါတယ်။

ဒါ့အပြင် သူဟာ သရက်ကုန်းကျေးရွာ ဈေးနဲ့ လောင်းကစားဒိုင်ဆီကနေ ဆက်ကြေးကောက်ခံပြီး စစ်ကောင်စီတပ်တွေနဲ့ အုပ်ချုပ်ရေးမှူးဆီကို ဆက်ကြေးပေးသွင်းတာ၊ စစ်ကောင်စီတပ်ဖွဲ့ဝင်တွေနဲ့ ပူးပေါင်းပြီး သေနတ်ပစ်ဖောက် လေ့ကျင့်တာ၊ ပြည်သူတွေကို ခြိမ်းခြောက်ဖိနှိပ်ငွေညှစ်တာ၊ မတရားစွပ်စွဲပြီး ဖမ်းဆီးထောင်ချခိုင်းတာ၊ တော်လှန်ရေးတပ်ဖွဲ့တွေရဲ့သတင်းကို စုံစမ်းပေးပို့တာတွေ ကျူးလွန်ဆောင်ရွက်နေသူ ဖြစ်တယ်လို့ ဆိုပါတယ်။

၂၀၂၂ ခုနှစ်၊ ဧပြီလ ၂၈ ရက်ကလည်း ကဝမြို့၊ အမှတ် ၃ ရပ်ကွက် လဝကရုံးအနီးမှာ ကဝမြို့နယ် ရဲတပ်ဖွဲ့မှူး ရဲမှူးဝင်းနိုင်ဆိုသူ သေနတ်နဲ့ပစ်သတ်ခံခဲ့ရပါသေးတယ်။

ပေါင်းတည်၊ မတ် ၁၀၊ ၂၀၂၃။

ပဲခူးတိုင်းအနောက်ခြမ်း၊ ပေါင်းတည်မြို့နယ်က စစ်တပ်သတင်းပေး ပျူစောထီးခေါင်းဆောင်လို့ လူသိများသူတဦးကို မတ်လ ၁၀ ရက်ဒီနေ့လယ် ၁၂ နာရီလောက်မှာသေနတ်နဲ့ပစ်သတ်ခဲ့တယ်လို့ Thegon PDF က သတင်းထုတ်ပြန်ထားပါတယ်။

ပေါင်းတည်မြို့နယ်၊ သစ်ပုတ်ကျေးရွာမှာနေထိုင်တဲ့ အသက် ၅၀ နှစ်အရွယ် ကိုအောင်ဝင်းဌေးဆိုသူဖြစ်ပြီး သူ့ကို နန်းထိုက်အောင် စစ်ဆင်ရေးအဖြစ် ရှင်းလင်းခဲ့တာလို့ တပ်ခွဲ ၄ – TPDF ရဲ့ သတင်းတာဝန်ခံက ပြောပါတယ်။

“သူက ရွာကိုဆိုင်ကယ်နဲ့တဦးတည်း ပြန်လာတာကို လက်ပံခုံရွာအနီး မြေနီလမ်းပေါ်မှာ ရှင်းလိုက်တာ၊ ပွဲချင်းပြီး သေတယ်။ နားထင်၊ ရင်ဘတ်နဲ့ နံညွန့်တွေကို တချက်စီနဲ့ ၃ ချက်ပစ်ခတ်ခဲ့တာဖြစ်တယ်” လို့ ပြောပါတယ်။

ကိုအောင်ဝင်းဌေးဟာ သစ်ပုတ်တာဝါတိုင်က စစ်သားတွေနဲ့ပေါင်းပြီး ကျွန်းသစ်ခိုးတာ၊လမ်းပြတာ၊ အိမ်ထောင်စုစာရင်းကောက်ယူတာ၊ စစ်တပ်ကို မမှန်သတင်းပေးတာ၊ လောင်းကစားဝိုင်းပြုလုပ်တာနဲ့ ဆက်ကြေးကောက်တာတွေ ပြုလုပ်နေတာဖြစ်သလို သူနဲ့ပတ်သက်ပြီး သတင်းပေးပို့ချက်တွေလည်း ရှိတာကြောင့် စိစစ်ပြီးမှ ခုလိုလုပ်ဆောင်ခဲ့တာလို့ ထုတ်ပြန်ချက်မှာ ဖော်ပြထားပါတယ်။

ပစ်ခတ်ပြီးချိန်ကစလို့ လက်ရှိအချိန်ထိ ကိုအောင်ဝင်းဌေးနဲ့ပူးပေါင်းနေတဲ့ စစ်သားတွေလည်း သူ့အိမ်ကို ရောက်ရှိလာခြင်းမရှိဘူးလို့ ဆိုပါတယ်။

ဒီရှင်းလင်းမှုကို တပ်ရင်း ၃၆၀၁၊ တပ်ခွဲ ၃ နဲ့ တပ်ရင်း ၃၆၀၂၊ တပ်ခွဲ ၄ – TPDF၊ တပ်စု ၆၊ တပ်စိတ် ၁၆ တို့က ပူးပေါင်းလုပ်ဆောင်ခဲ့တာလို့ သိရပါတယ်။

ပြီးခဲ့တဲ့ မတ်လ ၇ ရက်ကလည်း ပေါင်းတည်မြို့နယ်၊ ကျောက်တံခါးအုပ်စု၊ အောင်သပြေရွာကို ကျွန်းသစ်ခိုးယူဖို့လာတဲ့ ဖောကားတစီးကို ပေါင်းတည်မြို့နယ်တပ်ရင်း ၃၆၀၁ တပ်ခွဲ ၃ က မီးရှို့ဖျက်ဆီးခဲ့ပါသေးတယ်။

စာတည်း – လင်း

ပခုက္ကူ၊ မတ် ၉၊ ၂၀၂၃။

ပဲခူးတိုင်းအတွင်း လယ်မြေ၊ ယာမြေ၊ မြေနုကျွန်းမြေများမှာ ရာသီအလိုက် သီးနှံမျိုးစုံကို ထွန်ယက်စိုက်ပျိုးလုပ်ငန်းခွင်တွေမှာ လုပ်သားရှားပါးလာတယ်လို့ တောင်သူလယ်သမားတွေဆီက သိရပါတယ်။

လယ်ယာလုပ်ငန်းခွင်တွေဖြစ်တဲ့ ဆေးဖြန်းလုပ်သားခ တရက်လျှင် ယခင်နှစ် ၅၀၀၀ ကျပ်မှ ယခုနှစ်တွင် ၇၀၀၀ ကျပ်၊ ပဲနှုတ်လုပ်သား တရက်လျှင် ယခင်နှစ်က ၅၀၀၀ ကျပ်မှ ယခုနှစ် ၇၅၀၀ ကျပ်၊ ပဲခြွေခ တတင်းလျှင် ယခင်က ၁၂၀၀ ကျပ်၊ ယခုနှစ်တွင် ၂၀၀၀ ကျပ်၊ ပေါင်းလိုက်လုပ်သားခ တရက်လျှင် ယခင်က ၄၅၀၀ကျပ်၊ ယခုနှစ် ၇၀၀၀ ကျပ် ဝန်းကျင်ပေးခေါ်ယူနေရပြီး အဲဒီဈေးနှုန်းမှာ ပျှမ်းမျှနှုန်းသာဖြစ်လို့ ဒေသအလိုက် စားရိတ်အနည်းငယ် ကွာခြားနိုင်တယ်လို့ တောင်သူလယ်သမားတွေက ဆိုပါတယ်။

“စပါး၊ ပဲ၊ ဟင်းသီးဟင်းရွက် ဘာသီးနှံစိုက်စိုက် လူခေါ်ရတာ မလွယ်တော့ဘူး။ အရင်ကဆို လူကြုံနဲ့စကားပါးလိုက်ရင် မနက်အလုပ်ဆင်းတဲ့သူတွေကို ပေါနေတာ။ အခု နှစ်ရက်သုံးရက် ကြိုပြောရတာ တခြားနေရာက လူတွေ လိုက်ခေါ် ရတာတွေတောင် ရှိတယ်။ ရွာတွေမှာက လူငယ် လူလတ်ပိုင်း ယောင်္ကျားရောမိန်းခလေးတွေပါ တခြားမြို့တွေတင် ဘယ်ဟုတ််မလဲဗျ။ ထိုင်း၊ တရုတ်၊ ကိုရီးယား၊ မလေး ထွက်ပြီး အလုပ်လုပ်နေကျတယ်” လို့ ပေါင်းတည်မြို့နယ်ထဲက တောင်သူတဦးက ပြောပါတယ်။

ပင်ပန်းကြီးစွာနဲ့ လုပ်ကိုင်စားသောက်နေကျတဲ့ တောင်သူလယ်သမားတွေအနေနဲ့ လုပ်သားခေါ်ယူတဲ့အခါ တနေ့တခြား ရှားပါးလားပြီးတော့၊ နေ့တွက်စားရိတ်တွေလည်း ယခင်ကထက် စျေးပိုပေးကာ ခေါ်ယူလုပ်ကိုင်နေရပေမယ့် လုပ်သားရှားပါးတယ်လို့ ဆိုကြပါတယ်။

“ဒီမှာက စိုက်တဲ့အချိန်ရယ် ရိတ်သိမ်းတဲ့အချိန်ရယ်ပဲ အလုပ်ရှိတာလေ။ လက်ထဲမှာလည်း ငွေကြေးက များများစားစားမှ မရှိကြတာ။ ကျောင်းသူ/သားနဲ့ ကျန်းမာရေးမကောင်းတဲ့သူရှိရင် အဲ့ဒီမိသားစုက ပိုပြီးရုန်းကန်ရတယ်” လို့ သာယာဝတီနယ်ထဲက တောင်သူတဦးက ပြောပါတယ်။

အာဏာသိမ်းပြီးနောက် စိုးရိမ်ကြောက်လန့်နေကြတဲ့ ဒေသခံတွေအဖို့ နေ့စဉ်စားဝတ်နေရေးအပြင် အပိုအလျှံမရှိဘဲ စိုက်ပျိုးရေးမကောင်းသည့်အချိန်တွင် ပိုမိုကျပ်တည်းခက်ခဲသလို ခေတ်အခြေအနေအရ ပြည်ပထွက် အလုပ်လုပ်ကိုင်နေသူ အများစုဖြစ်လာတာကြောင့် လယ်ယာလုပ်ငန်းခွင်တွေမှာ လုပ်သားရှားပါးလာနေတာ ဖြစ်တယ်လို့ တောင်သူတွေက ဆိုပါတယ်။

စာတည်း – 007