ပဲခူး၊ မေ ၂၅၊ ၂၀၂၅။

ပဲခူးတိုင်း၊ ပဲခူးမြို့နယ်၊ ရန်ကုန်-မန္တလေး အမြန်လမ်း ၃၉ မိုင်၊ အဆိပ်တောင်ကျေးရွာအနီး အင်ကြင်းကွင်းမှာ စစ်ကောင်စီစစ်ကြောင်း ကြားဖြတ်တိုက်ခိုက်ခံရပြီး ၂ ဦးသေ ၁ ဦးဒဏ်ရာရတယ်လို့ ၃၇၀၁ တပ်ရင်း IO ထံက သိရပါတယ်။

မေ ၂၄ ရက် မနက် ၈ နာရီ မိနစ် ၃၀ ခန့်မှာ တပ်မ ၇၇ လက်အောက်ခံ ခမရ ၅၁၉ နဲ့ ပျူစောထီးပူးပေါင်းအင်အား ၅၀ ကျော်ခန့်ဟာ စပူချောင်ကျေးရွာဘက်ကို စစ်ကြောင်းထိုးလာစဉ် ကြားဖြတ်တိုက်ခိုက်ခဲ့တာလို့ ဆိုပါတယ်။

“သူတို့က ပွိုင့်ထိုးလာတာ စပူချောင်းဆိုတဲ့ရွာဘက်ကို ကျနော်တို့ရဲဘော်တွေက အင်ကြင်းကွင်းလောက်ကနေဖြတ်စောင့်ပြီး ထိတွေ့တိုက်ပွဲဖြစ်တာ။ ၁၀ မိနစ်လောက်ပဲ သူပစ်ကိုယ်ပစ် ပစ်ကြတာ။ “လို့ ၃၇၀၁ တပ်ရင်း IO ကိုလရောင်က ပြောပါတယ်။

အဆိုပါ တိုက်ပွဲအတွင်း စစ်ကောင်စီဘက်က ၂ ဦးသေဆုံးပြီး ၁ ဦးဒဏ်ရာရကာ စစ်ကောင်စီတပ်သားတွေကိုင်ဆောင်တဲ့ ကာဘိုင် ၂ လက်၊ ကျည်ဘောက် ၂ ခုနဲ့ ကျည်ဆန်အချို့သိမ်းဆည်းရမိခဲ့တယ်လို့ ဆိုပါတယ်။

တိုက်ပွဲဖြစ်ပြီးနောက် စစ်ကောင်စီတပ်ဖွဲ့ဝင်တွေဘက်က လက်နက်ကြီးတွေရမ်းသန်းပစ်ခတ်ပြီးနောက်အဆိပ်တောင်ရွာထဲမှာ ညအိပ်ခဲ့ပြီး ဧည့်စာရင်းစစ်ဆေးတာတွေပြုလုပ်ခဲ့တယ်လို့ ဆိုပါတယ်။

အဆိုပါ ညပိုင်းမှာပင် စပူချောင်းကျေးရွာက အသက် ၂၄ နှစ်ခန့်အရွယ် ကိုသက်ဆိုသူကိုလည်း အဆိပ်တောင်ရွာဘက်ကို ဖမ်းဆီးသွားပြီး မတ် ၂၅ ရက်ဒီမနက်ပိုင်းထိ အဆိပ်တောင်ကျေးရွာထဲတပ်စွဲထားတယ်လို့ သိရပါတယ်။

မေ ၂၂ ရက်ကလည်း ပဲခူးမြို့နယ်၊ အမြန်လမ်း ၃၂မိုင်ရှိ လှော်ကားလသာကျေးရွာအနီးက ရဲကင်းကို တိုက်ခိုက်ခဲ့ရာ ၂ ဦးသေဆုံးခဲ့သေးတယ်လို့ သိရပါတယ်။

စာတည်း – လင်း

မင်းလှ၊ မေ ၂၄၊ ၂၀၂၅။

ပဲခူးတိုင်း၊ မင်းလှမြို့နယ်အပိုင်၊ ပဲခူးရိုးမတနေရာမှာ ဖြစ်ပွားခဲ့တဲ့တိုက်ပွဲနေရာကို နယ်မြေရှင်းလင်းရေးလုပ်ချိန် ပုပ်နံ့ထွက်နေတဲ့ စစ်ကောင်စီတပ်သား ၄ ဦးရဲ့ ရုပ်အလောင်းတွေကို တွေ့ရှိခဲ့တယ်လို့ မေ ၂၄ ရက်မှာ သာယာဝတီခရိုင် တပ်ရင်း ၃၈ဝ၂၊ တပ်ခွဲ ၅ က ထုတ်ပြန်ပါတယ်။

အဲဒီရုပ်အလောင်း ၄ လောင်းကို မေ ၂၄ ရက် မနက် ၈ နာရီကျော်က ပဲခူးရိုးမထဲရှိ တိုက်ပွဲဖြစ်ပွားခဲ့တဲ့ ဟိုင်းယုလမ်းဆုံနဲ့ ပျဉ်ကတိုးခင်းရွာကြားက တရုတ်ပေါက်၊ ကျောက်ကုန်းနေရာအနီးမှာ ရှင်းလင်းရေးလုပ်ချိန် မြေကျင်းတခုတည်း စုပြုံမြှုပ်ထားတဲ့ အလောင်း ၃ လောင်းနဲ့ ချောက်ထဲမှာစွန့်ပစ်ထားတဲ့ အလောင်း ၁ လောင်းတို့ကို တွေ့ရှိခဲ့တာလို့ ဆိုပါတယ်။

အဲဒီထဲမှာ ခလရ ၁ တပ်က တပ်ကြပ်ကြီး ဝင်းဦး လည်း ပါဝင်တယ်လို့ သာယာဝတီခရိုင်တပ်ရင်း ၃၈၀၂၊ တပ်ခွဲ ၅ သတင်းနဲ့ပြန်ကြားရေးတာဝန်ခံ တပ်ဖွဲ့၀င် ရိုးမမြေက ပြောပါတယ်။

“ခုမနက် နယ်မြေရှင်းလင်းရေးလုပ်တော့ တိုက်ပွဲဖြစ်တဲ့နားမှာ သွေးအိုင်တွေတွေ့တယ်။ နောက်ပြီးပုပ်စော်တွေလည်း တော်တော်နံတယ်။ အဲ့လိိုနဲ့ စခအင်္ကျီစထွက်နေတာတွေ့လို့ ဆွဲလည်းကြည့်ရော ***အလောင်း ၁ လောင်း အရင်တွေ့တယ်။ တွေ့တဲ့ မသာအလောင်းကို အပေါ်ဆွဲတင်တော့ အောက်မှာမသာ ၂ လောင်းပါ မြှုပ်ထားတာတွေ့တာပေါ့။ အဲ့ ၁ ကျင်းထဲတင် ၃ လောင်းတွေ့တယ်။ ထပ်ရှာတော့ အဲ့နားကချောက်ထဲမှာ မသာ ၁ လောင်းမြင်ရပါတယ်။” လို့ ပြောပါတယ်။

နယ်မြေရှင်းရေးအတွင်း ရုပ်အလောင်း ၄ လောင်းအပြင် ၆၆ တပ်မတံဆိပ်ပါ စစ်ယူနီဖောင်းအင်္ကျီနဲ့ စစ်အသုံးအဆောင် ပစ္စည်းတချို့ကိုပါ သိမ်းဆည်းရရှိခဲ့တာကြောင့် သေဆုံးခဲ့တဲ့ စစ်ကောင်စီတပ်သားတွေဟာ တပ်မ ၆၆ လက်အောက်ခံ ခလရ ၁ ကဖြစ်တယ်ဆိုတာ အတည်ပြုခဲ့တာလို့ ရိုးမမြေကဆိုပါတယ်။

အဆိုပါတိုက်ပွဲမှာ မေ ၂၂ ရက် ည ၁၁ နာရီက ပဲခူးရိုးမထဲရှိ ခါချဉ်တောင်ပေါ်ကို စိန်ကန့်လန့် -မြို့ချောင်း ရိုးမဖြတ်ကျော်လမ်းအတိုင်း ခြေလျင်တက်လာတဲ့ အင်အား ၁၀၀ ကျော်ပါ စစ်ကြောင်းနဲ့ တော်လှန်ရေးတပ်ဖွဲ့တို့ ဟိုင်းယုလမ်းဆုံနဲ့ပျဉ်က တိုးခင်းရွာကြားက တရုတ်ပေါက် ကျောက်ကုန်းအနီးမှာ ၁ နာရီကြာဖြစ်ပွားခဲ့တာလို့ ဆိုပါတယ်။

တိုက်ပွဲအတွင်း စစ်ကောင်စီတပ်က အထိအခိုက်၊ အကျအဆုံးများလာတာကြောင့် ဘန့်ဘွေးကုန်းကျေးရွာကို ပြန်ဆုတ်သွားခဲ့ပြီးနောက် မေ ၂၃ ရက်မနက် ၅ နာရီကျော်အရောက်မှာတော့ တိုက်ပွဲနေရာကို တန်ပြန်စစ်ကြောင်းထိုးလာခဲ့ရာ ၁၅ မိနစ်ခန့် ထပ်မံတိုက်ပွဲဖြစ်ပွားခဲ့သေးတယ်လို့ သိရပါတယ်။

လက်ရှိမှာတော့ အထက်ပါစစ်ကြောင်းဟာ ဘန့်ဘွေးကုန်းကျေးရွာအတွင်း တပ်စွဲနေပြီး ညပိုင်း‌မှာ လက်နက်ကြီးတွေနဲ့ ဘေးပတ်ဝန်းကျင်ကို ပစ်ခတ်တာတွေလုပ်ဆောင်နေတယ်လို့ သိရပါတယ်။

စာတည်း – လင်း

ရွှေကျင်၊ မေ ၂၁၊ ၂၀၂၅။

ပဲခူးတိုင်း၊ ရွှေကျင်မြို့နယ်၊ ရှမ်းစုကျေးရွာအနီးမှာ နေအိမ်တွေကိုမီးရှို့ပြီးထွက်လာတဲ့ စစ်ကောင်စီ စစ်ကြောင်း ကြားဖြတ်တိုက်ခိုက်ခံရတယ်လို့ ဒေသကာကွယ်ရေးအဖွဲ့ဝင်တွေဆီက သိရပါတယ်။

မေ ၂၀ ရက်နေ့လယ် ၁၂ နာရီခန့်မှာ မွန်ပြည်နယ်၊ ကျိုက်ထိုမြို့နယ်၊ ဝင်းကံကျေးရွာကနေအိမ် ၅ လုံးကို မီးရှို့ခဲ့တဲ့စစ်ကြောင်းဖြစ်ပြီး မေ ၂၁ ရက် ဒီမနက် ၈ နာရီခန့်မှာ အင်အား ၅၀ နဲ့ ရှမ်းစုကျေးရွာဘက်ကို ရောက်လာချိန် KNLA ပူးပေါင်းတပ်တွေက တိုက်ခိုက်ခဲ့တာလို့ဆိုပါတယ်။

“သူတို့ပြန်ဆုတ်တဲ့ လမ်းကြောင်းကို ကျနော်တို့ဘက်ကပစ်တာခတ်တာရှိတယ်။ နည်းနည်းတော့ ကြာသွားတယ်။ နာရီဝက် ၄၅ မိနစ်ဝန်းကျင်လောက်ကြာသွားမယ်။ စကစဘက်က လက်နက်ကြီး အသေးကောအကြီးကော ပစ်နေတုန်း”လို့ ဒေသကာကွယ်ရေးအဖွဲ့တာဝန်ရှိသူတဦးကပြောပါတယ်။

အဆိုပါ တိုက်ပွဲအတွင်းမှာ စစ်ကောင်စီဘက်က ထိခိုက်သေဆုံးရှိနိုင်ပြီး အရေအတွက်ကိုတော့ စိစစ်နေဆဲလို့ဆိုပါတယ်။

တိုက်ပွဲဖြစ်နေချိန် သိမ်ဇရပ်အခြေစိုက် ခမရ ၂၀၇၊ အမတ ၃၁၀နဲ့ ခမရ ၅၉၈ ထဲက စစ်ကောင်စီ အဖွဲ့တွေက လက်နက်ကြီးပစ်ကူပေးသလို ဝင်းကံကျေးရွာအတွင်းမှာလည်း စစ်ကောင်စီတပ်ဖွဲ့ဝင် အင်အား ၅၀ ဝန်းကျင်ရှိနေသေးတာကြောင့် နယ်မြေရှင်းလင်းရေးလုပ်ဆောင်နေတယ်လို့ ဒေသကာကွယ်ရေးအဖွဲ့တာဝန်ရှိသူတဦးကပြောပါတယ်။

စစ်ကောင်စီအဖွဲ့ဝင်တွေမီးရှိုခဲ့တာကြောင့် ဝင်းကံကျေးရွာက KNU တပ်မဟာ ၁၊ ဝင်းကံကျေးနယ်မှူး ဖားဇီးကွက်ရဲ့ မိခင်နေအိမ်အပါအဝင် ၅ လုံးမီးလောင်ပျက်စီးခဲ့တယ်လို့ ဆိုပါတယ်။

ဝင်းကံကျေးရွာဟာ အိမ်ခြေ ၃၀၀ ကျော် လူဦးရေ ၁,၀၀၀ ကျော်ရှိတဲ့ကျေးရွာဖြစ်ပြီး မေ ၁၆ ရက်ကစလို့ စစ်ကောင်စီစစ်ကြောင်းတွေဝင်ရောက်လာတဲ့အတွက် ရွာလုံးကျွတ်ထွက်ပြေးတိမ်းရှောင်နေရတယ်လို့ သိရပါတယ်။

မေ ၈ ရက် ခမရ ၅၉၈ တိုက်ပွဲအပြီး ဝင်းကံကျေးရွာကို စစ်ကောင်စီဘက်က လေကြောင်းကနေ ဗုံးကြဲမှု ၃ ကြိမ်ပြုလုပ်ခဲ့တဲ့အတွက် နေအိမ် ၂၀ ခန့်ပျက်စီးပြီး ဒေသခံအမျိုးသား ၄ ဦးလည်း ဒဏ်ရာရရှိခဲ့ပါတယ်။

ဒါ့အပြင် ခမရ ၅၉၈ တိုက်ရင်းသိမ်းတိုက်ပွဲစဖြစ်ကတည်းက ထွက်ပြေးတိမ်းရှောင်နေရတဲ့ ရွှေကျင်မြို့နယ်ထဲက ကွမ်းဆိပ်၊ ညောင်ခြေထောက်၊ ရှမ်းစု၊ ဇလုပ်ကြီးကျေးရွာတွေက ဒေသခံ ထောင်ချီလည်း မေ ၂၁ ရက်နေ့ထိ နေရပ်ကိုမပြန်လာကြရသေးဘူးလို့ သိရပါတယ်။

စာတည်း – လင်း