တန့်ဆည်၊ ဖေဖော်ဝါရီ ၃၊ ၂၀၂၆။

စစ်ကိုင်းတိုင်း၊ တန့်ဆည်မြို့နယ်၊ ကော်တက်ကျေးရွာမှာ လေကြောင်းကနေ ဗုံးကြဲခံရလို့ အမျိုးသမီး ၂ ဦးဒဏ်ရာရပြီးနေအိမ် ၃ လုံးပျက်စီးခဲ့တယ်လို့ ကျေးရွာနဲ့ နီးစပ်သူတွေဆီက သိရပါတယ်။

ဖေဖော်ဝါရီ ၂ ရက်ညနေ ၃ နာရီကျော်မှာ စစ်ကော်မရှင်ရဲ့ဂျက်ဖိုက်တာ ၁ စီးဟာ ကျေးရွာထဲကို ပေါင် ၂၀၀ လို့ယူဆရတဲ့ ဗုံး ၂ လုံးကြဲချခဲ့တယ်လို့ ဆိုပါတယ်။

“ရွာထဲက အိမ်ဝန်းထဲကိုကျတာပေါ့။ ဘေးက ကပ်လျက်အိမ်တွေလည်း ပျက်စီးတယ်။ ဗုံးက ၃ အိမ်ကြားကို ကျတာဆိုတော့ ဘယ်ညာညှပ်ထားတဲ့ ၂ အိမ်ကိုသွားထိတာမှာ မင်္ဂလာဆောင်လာဖိတ်တဲ့ အမျိုးသမီး ၂ ဦးထိတာ။”လို့ ကျေးရွာနဲ့နီးစပ်သူတဦးက ပြောပါတယ်။

ဗုံးလာကြဲချိန် ကျေးရွာအနီးဝန်းကျင်တိုက်ပွဲဖြစ်နေတာမရှိဘဲ ရွာကို ၃ ပတ်လောက်ပတ်ပြီးမှ ကြဲချသွားတာဖြစ်ပြီး ဗုံးပေါက်ကွဲစထိမှန်တဲ့အတွက် အသက် ၃၀ အရွယ် အမျိုးသမီး ၂ ဦး ထိခိုက်ဒဏ်ရာရကာ နေအိမ် ၃ လုံးလည်း ပျက်စီးသွားတယ်လို့ ဆိုပါတယ်။

ဇန်နဝါရီ ၂၃ ရက်ကလည်း တန့်ဆည်မြို့နယ်၊ ကံထူးမကျေးရွာကို စစ်ကော်မရှင်ဘက်က လေကြောင်းကနေ ဗုံးကြဲခဲ့တာကြောင့် ကျေးရွာအတွင်း ဓာတ်တိုင်နဲ့နေအိမ်အချို့ ပျက်စီးခဲ့တယ်လို့ သိရပါတယ်။

စာတည်း – လင်း

■ ကားမှောက်နေချိန် ခရီးသွားကားတွေကူညီမှုမရှိတာကြောင့် သေဆုံးမှုပိုများခဲ့ဟုဆို

မြေလတ်အသံ၊ ဇန်နဝါရီ ၂၉၊ ၂၀၂၆ ။

နေပြည်တော်ကောင်စီနယ်မြေ၊ တောင်တွင်းကြီး-တောင်ညိုလမ်းပိုင်းမှာ “ဇော်လေးနိုင်ဇာတ်သဘင်အဖွဲ့” ကားတိမ်းမှောက်ခဲ့ကာ ၈ ဦးသေဆုံးပြီး ၂၀ နီးပါးဒဏ်ရာရတယ်လို့ ဇာတ်အဖွဲ့သားတွေထံက သိရပါတယ်။

ဇန်နဝါရီ ၂၈ ရက် ယမန်နေ့ညနေ ၃ နာရီခွဲခန့်မှာ ဇာတ်အဖွဲ့သား ၂၇ ဦးလိုက်ပါလာတဲ့ အဲ့ဒီဇာတ်သဘင်ကားဟာ တောင်တွင်းကြီးကနေ နေပြည်တော်ကို မောင်းနှင်လာတာဖြစ်ပြီး ဂွေးချိုကျေးရွာအနီး ကုန်းအဆင်းအရောက်မှာ ချောက်ထဲကိုထိုးကျတိမ်းမှောက်ခဲ့တာလို့ ဆိုပါတယ်။

” ဇာတ်ကားက ကုန်းအဆင်းမှာ ဘရိတ်ပေါက်သွားတာ။ ကားကလည်ပြီး ချောက်ထဲထိုးကျသွားတာ။ ချောက်ကတော့ တော်တော်နက်တယ်။ ညကအလောင်း ၃ လောင်းက ဖော်မရဘူး။ ဒီမနက်မှရတယ်။ ညကချက်ချင်းသယ်နိုင်တာက ၅ လောင်းပါ” လို့ ဇော်လေးနိုင်ဇာတ်အဖွဲ့သားတဦးက မြေလတ်အသံကို ပြောပါတယ်။

ဇာတ်သဘင်ကားတိမ်းမှောက်ချိန်မှာ ကားပေါ်ကနေ လမ်းမပေါ် ပြုတ်ကျခဲ့တဲ့ ဒဏ်ရာရဇာတ်သဘင်အဖွဲ့ဝင်တချို့ရှိပြီး အဲ့ဒီဇာတ်အဖွဲ့ဝင်တွေက ဖြတ်သွားဖြတ်လာကားတွေကိုအကူညီတောင်းခံပေမယ့် ကူညီမပေးတာကြောင့် ညနေ ၆ နာရီကျော်မှ ကယ်ဆယ်ရေးကားတွေရောက်ရှိပြီး သေဆုံးသူပိုများခဲ့တာလို့ ဆိုပါတယ်။

” ကားမှောက်ပြီးတော့ ကားသုံးလေးစီး ဖြတ်သွားတယ်။ အကူအညီတောင်းတယ်။ ဘယ်သူမှမရပ်ပေးဘူး။ စပ်စုပြီးထွက်သွားတယ်။ ခရီးသည်အန်တီကြီးတယောက်က သူကထားခဲ့မယ်ဆိုရင်တောင် နေခဲ့မယ်ဆိုပြီး ဆင်းကျန်ရစ်ပြီး ဖုန်းဆက်ပေးလို့ အကူအညီတွေရောက်လာကြတာ”လို့ အထက်ပါဇာတ်အဖွဲ့ဝင်ကဆက်ပြောပါတယ်။

ကားတိမ်းမှောက်တာကြောင့် ဇာတ်အဖွဲ့ဝင် အသက် ၂၀အရွယ် အမျိုးသမီး ၁ ဦး၊ အသက် ၆၀ အရွယ်အမျိုးသမီး ၁ ဦးနဲ့ အသက် ၃၀ ကနေ ၄၀ ကြားအမျိုးသား ၆ ဦးသေဆုံးခဲ့ပြီး ကားပေါ်ပါ ကလေးငယ်တွေအပါအဝင် ၁၉ ဦးထိခိုက်ဒဏ်ရာရကာ ကားလည်းပျက်စီးသွားတယ်လို့ ဆိုပါတယ်။

ကားမှောက်လို့ ထိခိုက်ဒဏ်ရာရသူတွေကိုနေပြည်တော်ပရဟိတအဖွဲ့တွေနဲ့ မီးသတ်တပ်ဖွဲ့တွေက ကူညီကယ်ဆယ်ပြီး နေပြည်တော် ကုတင် ၁၀၀၀ ဆေးရုံကိုပို့ဆောင်ပေးထားရပြီး ဆေးကုသမှုခံယူနေကြတယ်လို့ သိရပါတယ်။

ဝက်လက်၊ ဇန်နဝါရီ ၂၇၊ ၂၀၂၆။

စစ်ကိုင်းတိုင်း၊ ဝက်လက်မြို့နယ်၊ ပေါက်ကန်ဘူတာကျေးရွာလမ်းဆုံ စစ်ကိုင်း-ရွှေဘိုကားလမ်းပေါ်မှာ ဒရုန်းနဲ့ဗုံးချခံရလို့ ခရီးသွားပြည်သူ ၂ ဦးဒဏ်ရာရခဲ့တယ်လို့ ဝက်လက်မြို့နယ်ပကဖထံက သိရပါတယ်။

ဇန်နဝါရီ ၂၇ ရက်ဒီကနေ့မနက် ၉ နာရီကျော်မှာ ရှိန်းမကားရွာစစ်ကော်မရှင်စစ်ဆေးရေးဂိတ်ကလွှတ်လိုက်တဲ့ ဒရုန်း ၂ စီးဟာ ကျေးရွာလမ်းဆုံကို ဗုံးသီး ၂ လုံးကြဲချခဲ့တာဖြစ်ပြီး ခရီးသွားကား ၁ စီးပေါ် ကျရောက်ပေါက်ကွဲခဲ့တာလို့ ဆိုပါတယ်။

” အဲ့နားမှာ ကား ၁ စီးကရပ်ထားတာ ကားပေါ်က အမျိုးသား ၁ ယောက်က နှာခေါင်းထိတယ်။ အမျိုးသမီးက ၁ ယောက်လည်း ထိတော့ထိသွားတယ်။ ရွာခံတွေမဟုတ်ဘူး။ ခရီးသွားတွေထိတာ။ လမ်းပေါ်ဆိုတော့ ခရီးသွားကားတွေနား ကျတာ။” လို့ ဝက်လက်မြိုနယ်ပကဖပြန်ကြားရေးတာဝန်ခံက မြေလတ််အသံကို ပြောပါတယ်။

ဒရုန်းဗုံးပေါက်ကွဲတာကြောင့် အသက် ၄၀ ကျော်အရွယ် အမျိုးသား ၁ ဦးနဲ့အမျိုသမီး ၁ ဦးတို့ဒဏ်ရာရခဲ့ပြီး ဒဏ်ရာရသူတွေဟာ ခရီးသွားတွေဖြစ်ကာ သူတို့နဲ့ပတ်သက်တဲ့အချက်အလက်တွေကိုတော့ မသိရသေးပါဘူး။

ဒရုန်းဗုံးချခံရပြီးနောက် မန္တလေး-ရွှေဘိုလမ်းပိုင်းကို ဒေသကာကွယ်ရေးအဖွဲ့တွေဘက်က နာရီဝက်လောက် ပိတ်ထားခဲ့ပေမယ့် လက်ရှိမှာတော့ ပုံမှန်အတိုင်းပြန်လည်သွားလာခွင့်ပေးလိုက်တယ်လို့ သိရပါတယ်။

ဇန်နဝါရီ ၁၆ ရက်ကလည်း ဝက်လက်မြို့နယ်၊ ညောင်ကန်ကျေးရွာက စစ်ရှောင်တွေနေထိုင်တဲ့ စာသင်ကျောင်း လေကြောင်းကနေ တိုက်ခိုက်ခံရလို့ ၁ ဦးသေဆုံးပြီး ၄ ဦးဒဏ်ရာရတယ်လို့ သိရပါတယ်။

ဆင်ဖြူကျွန်း၊ ဇန်နဝါရီ ၇၊ ၂၀၂၆။

မကွေးတိုင်း၊ ဆင်ဖြူကျွန်းမြို့မှာ စစ်ကော်မရှင်တပ်ကထောင်ထားတဲ့ မိုင်းတွေကြောင့် မြို့ခံပြည်သူ ၁၅ ဦးခန့် ထိခိုက်ဒဏ်ရာရခဲ့တယ်လို့ မြို့ခံတွေဆီက သိရပါတယ်။

ဇန်နဝါရီ ၇ ရက်မနက်ပိုင်းမှာ ဆင်ဖြူကျွန်းဈေး၊ ပိုးအရှေ့ရပ်ကွက်၊ ပိုးအနောက်ရပ်ကွက်၊ ပြန်လွင့်ရပ်ကွက်နဲ့ ဘုရားကြီးကုန်းရပ်ကွက်တွေမှာ မိုင်းထိခဲ့ကြတာဖြစ်ပြီး စုစုပေါင်း ၁၅ ဦးခန့်ဒဏ်ရာရရှိခဲ့တာလို့ ဆိုပါတယ်။

” ကြားတာကတော့ ကြိုးမိုင်း(တိုက်မိုင်း)တိုက်မိတာ။ (မိုင်းထောင်တာက) စစ်တပ်ကပဲ နေမှာပေါ့၊ မြို့ပေါ်သူတို့ပဲရှိတာ သူတို့ပဲ ထောင်မှာပေါ့။ ဒဏ်ရာရတဲ့သူတွေကိုတော့ စလင်းမြို့ ပြည်သူ့ဆေးရုံကို ပို့ထားတယ်” လို့ ဆင်ဖြူကျွန်းမြို့ခံတဦးက ပြောပါတယ်။

လက်ရှိမှာ ပိုးအနောက်ရပ်ကွက်က ၇ ဦး၊ ပိုးအရှေ့ရပ်ကွက်က ၂ ဦး၊ ဘုရားကြီးကုန်းက ၄ ဦး၊ ပြန်လွင့်ရပ်ကွက်က ၁ ဦးနဲ့ ဆင်ဖြူကျွန်းဈေး ဈေးစောင့် ၁ ဦးအပါ အမျိုးသား ၁၁ ဦး အမျိုးသမီး ၄ ဦး စုစုပေါင်း ၁၅ ဦး မိုင်းထိဒဏ်ရာရထားတယ်လို့ ဆိုပါတယ်။

အဆိုပါမိုင်းတွေဟာ တော်လှန်ရေးတပ်ဖွဲ့တွေ ဆင်ဖြူကျွန်းမြို့တွင်းကိုဝင်ရောက်လာနိုင်တဲ့ နေရာတွေမှာ စစ်ကော်မရှင်တပ်က ထောင်ထားတာဖြစ်နိုင်ပြီး မြို့ပေါ် လူအသွားအလာများတဲ့နေရာတွေမှာ မိုင်းတွေထောင်ထားတာလို့ သူက ဆက်ပြောပါတယ်။

“တော်လှန်ရေးတပ်ဖွဲ့ဝင်တွေ ဝင်တိုက်မှာကြောက်ပြီး မိုင်းထောင်နေကြတာ၊ နေအိမ်တွေရှေ့ မိုင်းထောင်တာတော့ အဓိပ္ပါယ်မရှိဘူး။ ကျနော်တို့ သိသလောက်တော့ တော်လှန်ရေးတပ်ဖွဲ့ဝင်တွေ မိုင်းထောင်ရင် ဘယ်နားမှာ မိုင်းထောင်တယ် မိုင်းရှိတယ်ဆိုတာ ပြောပြတယ်၊ စစ်တပ်ကတော့ အသားလွတ်ကြီးထောင်တာ၊ ပြည်သူဘယ်သူသေသေဆိုတဲ့ သဘောပဲ၊ မြို့ပေါ်မှာဆို လူအသွားများတဲ့လမ်းတွေမှာ‌ မိုင်းထောင်ထားကြတာ” လို့ သူက ပြောပါတယ်။

မိုင်းထိတဲ့နေရာတွေမှာ ယခင်ရက်တွေကလည်း ဒေသခံသွားလာလှုပ်ရှားမှုတွေရှိနေပြီး ဒီနေ့မနက်မှ မိုင်းထိကြတာဟာ ယမန်နေ့ညကမှ မိုင်းလာထောင်ကြတာမျိုးဖြစ်နိုင်တယ်လို့ အထက်ပါ​​ ဒေသခံက သုံးသပ်ပြောဆိုပါတယ်။

ဆင်ဖြူကျွန်းမြို့မှာ ဒီဇင်ဘာ ၂၃ ရက်နဲ့ ၂၄ ရက်ကတည်းက ဒေသခံကာကွယ်ရေးတပ်တွေနဲ့ စစ်ကော်မရှင်တပ်တို့ တိုက်ပွဲဖြစ်ပွားခဲ့ပြီး လက်ရှိမှာ တိုက်ပွဲဆက်လက်ဖြစ်ပွားနေတာမရှိတော့ဘဲ စစ်ကော်မရှင်တပ်ဖွဲ့ဝင်တွေက ဆင်ဖြူကျွန်းမြို့ နွယ်တမယ်တံတားထိပ်၊ ကမ္ဘာဇဘဏ်ရှေ့နဲ့ ရဲစခန်းတို့မှာ အင်အား ၁၅၀ ကျော်ခန့် အထိုင်ချတပ်စွဲထားတယ်လို့ သိရပါတယ်။

မြေလတ်အသံ၊ ဒီဇင်ဘာ၂၃၊ ၂၀၂၅။

စစ်ကိုင်းတိုင်း(အထက်ပိုင်း) ကလေး၊ ဗန်းမောက်နဲ့ ကောလင်းမြို့နယ်တွေကို စစ်ကော်မရှင်တပ်က လေကြောင်းကနေ ဗုံးကြဲတိုက်ခိုက်ခဲ့တာကြောင့် အရပ်သား ၁ ဦး သေဆုံးပြီး ၁၃ ဦး ဒဏ်ရာရရှိခဲ့တယ်လို့ ဒေသခံတွေဆီက သိရပါတယ်။

ကလေးမြို့နယ်တောင်ပိုင်း၊ ရှားဖိုကျေးရွာကို ဒီဇင်ဘာ ၂၂ ရက် ယမန်နေ့ ညနေ ၅ နာရီကျော်မှာ မှန်တောရွာစစ်တပ်အထိုင်စခန်းကနေ ဒရုန်း ၁ စီးနဲ့ ဗုံးသီးကြဲချတိုက်ခိုက်ခဲ့ရာ အသက် ၃၄ နှစ်အရွယ် အမျိုးသမီး ၁ ဦးသေဆုံးပြီး အမျိုးသား ၁ ဦး ဒဏ်ရာရရှိခဲ့တယ်လို့ ကလေးဒေသခံတော်လှန်ရေးတပ်ဖွဲ့ဝင်တဦးက မြေလတ်အသံကို ပြောပါတယ်။

” ကလေးတောင်ပိုင်းမှာက ထိတွေ့တိုက်ပွဲက နေ့တိုင်းလိုလိုရှိနေတာ။ မှန်တောရွာမှာက ပျူတွေနဲ့ ** တွေ စခန်းချနေတာ။ အဲ့ရွာအနီးမှာဘဲ ရှားဖိုရွာရှိတာ။ သေဆုံးသူနဲ့ ဒဏ်ရာရသူတွေက ရွာကနေမထွက်ပဲ အိမ်စောင့်ကျန်နေတဲ့သူတွေလို့သိရတယ်” လို့ သူက ပြောပါတယ်။

အလားတူ ဒီဇင်ဘာ ၂၁ ရက် ည ၈ နာရီမှာ ဗန်းမောက်မြို့နယ်အနောက်ခြမ်း နားပင်ကျေးရွာဘုန်းကြီးကျောင်းကို တိုက်လေယာဥ် ၁ စီးနဲ့ ဗုံးကြဲတိုက်ခိုက်ခဲ့ရာ ကျောင်းအတွင်းကျရောက်ပေါက်ကွဲပြီး သံဃာ ၁ ပါးအပါ အမျိုးသား၊ အမျိုးသမီး ၆ ဦးဒဏ်ရာရရှိခဲ့တာပါ။

” တိုက်ပွဲမဖြစ်ဘူးဗျ။ အဲ့နေရာကတော်လှန်ရေးတပ်က ထိန်းချုပ်ထားတာ။ အကြောင်းမဲ့လာကြဲတာ။ ၆ ယောက်မှာ ၄ ယောက်က ဒဏ်ရာပြင်းတယ်ဗျ။ ဗုံးသီးက ရေကန်နားမှာကျသွားတာ။ ဘုန်းကြီးကျောင်းလည်း တဝက်တပျက် ပျက်စီးသွားတယ်” လို့ ဗန်းမောက်ဒေသခံအမျိုးသားတဦးက ပြောပါတယ်။

ဒါ့အပြင် ဒီဇင်ဘာ၂၂ ရက် ညနေ ၅ နာရီကျော်မှာ ကောလင်းမြို့နယ်၊ နတ်အင်းကျေးရွာ စာသင်ကျောင်းကို တိုက်လေယာဥ်နဲ့ ဗုံးကြဲတိုက်ခိုက်ခဲ့ရာ အမျိုးသား ၄ ဦး၊ အမျိုးသမီး ၂ ဦး ဒဏ်ရာရရှိခဲ့တယ်လို့ ဆိုပါတယ်။

“နွားတကောင်တော့ ပွဲချင်းပြီးသေတယ်။ စာသင်ကျောင်းခြံထဲမှာကျတာဗျ။ ကျောင်းကတော့ပျက်စီးသွားတယ်။ ဒဏ်ရာရတဲ့သူတွေက ကျောင်းအနီးမှာနေကြတဲ့ အိမ်ကလူတွေရသွားတာ။ ကျောင်းကပိတ်ထားတာ” လို့ ကောလင်းဒေသခံအမျိုးသားတဦးက ပြောပါတယ်။

ဒဏ်ရာရသူ ၆ ဦးမှာ စာသင်ကျောင်းအနီးနေထိုင်တဲ့ နတ်အင်းရွာခံ ဦးမြင့်ဝင်း၊ ဦးကျော်ပိုင်ဦး၊ ဦးစိုးသူအောင်၊ ဦးအောင်မျိုးသူ၊ ဒေါ်အေး၊ ဒေါ်နှင်းမိုးအေး တို့ ၆ ဦးဖြစ်တယ်လို့ သိရပါတယ်၊

ပြီးခဲ့တဲ့ဒီဇင်ဘာ ၇ ရက်ကလည်း ဗန်းမောက်မြို့နယ်တောင်ပိုင်း၊ သုံးမြေဆုံရွှေလုပ်ကွက်ကို တိုက် လေယာဥ်နဲ့ ဗုံးကြဲတိုက်ခိုက်ခဲ့ရာ အမျိုးသား ၁ ဦးသေဆုံးပြီး ၅ ဦးဒဏ်ရာရရှိခဲ့ပါတယ်။

စာတည်း – ဟိန်းစံ

တောင်သာ၊ ဒီဇင်ဘာ ၁၅၊ ၂၀၂၅။

မန္တလေးတိုင်း၊ တောင်သာမြို့နယ်၊ အင်းတဲကျေးရွာနဲ့ နတ်စောင့်ကျေးရွာကြားမှာ မြေမြှုပ်မိုင်းထိပြီး မိသားစုဝင် ၃ ဦးဒဏ်ရာရတယ်လို့ ကျေးရွာနဲ့နီးစပ်သူတွေဆီက သိရပါတယ်။

မိုင်းထိသူတွေဟာ အင်းတဲကျေးရွာနေ အသက် ၃၀ အရွယ် ကိုစိုးအောင်၊ ယောက္ခမဖြစ်သူ အသက် ၅၀ အရွယ် ဒေါ်လှဌေး၊ ခယ်မဖြစ်သူ အသက် ၁၃ နှစ်အရွယ် မနွယ်ဝင်းခိုင်တို့ ၃ ဦးဖြစ်ပြီး ဒီဇင်ဘာ ၁၃ ရက် မနက် ၁၀ နာရီခန့်မှာ အင်းတဲကျေးရွာအဝင်မှာ မိုင်းထိခဲ့တာလို့ ဆိုပါတယ်။

“အဲ့နားပတ်လည်မှာတော့ ** မိုင်းတွေလည်းရှိသလို ဌာနေမိုင်းတွေလည်းရှိတယ်။ သူတို့ရွာကို ဝင်လာတဲ့အချိန်မှာထိတာဆိုတော့ ဘယ်သူမိုင်းဆိုတာတော့သေချာမသိရဘူး။ ရွာထဲကိုပြန်ဝင်ကြချိန် ထိတာ။ သူ့ယောက္ခမရွာ အင်းတဲကနေလာကြတာ”လို့ ကျေးရွာနဲ့နီးစပ်သူတဦးက ပြောပါတယ်။

မိုင်းထိသူ ၃ ဦးစလုံးမှာ ခြေထောက် ၂ ဖက်စလုံးစီမှာ မိုင်းစဖောက်ဝင်ဒဏ်ရာတွေရပြီး တောင်သာမြို့နယ်ပြည်သူ့ဆေးရုံမှာ ဆေးကုသနေကာ အသက်အန္တရာယ်မစိုးရိမ်ရပေမယ့် ခြေထောက်မှာထိထားတဲ့ မိုင်းစတွေကြောင့် ဒီဇင်ဘာ ၁၅ ရက်အထိ ဆေးရုံကနေမဆင်းရသေးဘဲ ဆေးကုသမှုခံယူနေရတယ်လို့ ဆိုပါတယ်။

မိုင်းထိမှန်ခဲ့တဲ့ နတ်စောင့်ကျေးရွာအနီးတဝိုက်မှာ စစ်ကော်မရှင်တပ်ရော ဒေသကာကွယ်ရေးအဖွဲ့တွေဘက်ကပါ စစ်ရေးလှုပ်ရှားမှုတွေရှိတာကြောင့် ဘယ်အဖွဲ့ထောင်တဲ့မိုင်းလဲဆိုတာ မသိရဘူးလို့ အထက်ပါကျေးရွာနဲ့နီးစပ်သူက ပြောပါတယ်။

စက်တင်ဘာ ၂၈ ရက်ကလည်း ပဲခူးတိုင်း၊ ကျောက်ကြီးမြို့နယ်၊ မုန်းမြို့၊ ရေအိုးစင်ကျေးရွာအနီးမှာ ထင်းခုတ်သွားတဲ့အမျိုးသား မိုင်းထိပြီးသေဆုံးခဲ့ပါသေးတယ်။

စာတည်း – လင်း

စဥ့်ကူး၊ ဒီဇင်ဘာ ၂၊ ၂၀၂၅။

မန္တလေးတိုင်း၊ စဉ့်ကူးမြို့နယ်၊ ညောင်ဝန်းကျေးရွာကို လေယာဥ်နဲ့ ဗုံးကြဲခံရလို့ အမျိုးသား ၁ ဦး သေဆုံးပြီး ၄ ဦးဒဏ်ရာရတယ်လို့ စဥ့်ကူးမြို့နယ်ပကဖဆီက သိရပါတယ်။

ဒီဇင်ဘာ ၂ ရက်မနက် ၁၀ နာရီ မိနစ် ၅၀ ခန့်မှာ တံတားဦးလေဆိပ်ကတက်လာတဲ့ ဂျက်ဖိုက်တာ ၁ စီးဟာ ညောင်ဝန်းကျေးရွာထဲကို ဗုံး ၁ လုံးကြဲချခဲ့ရာ ရွာအလယ်ပိုင်း နေအိမ်အနီး ကျရောက်ပေါက်ကွဲခဲ့တာလို့ ဆိုပါတယ်။

“ညောင်ဝန်းရွာနားမှာတော့ တိုက်ပွဲမရှိဘူး။ တော်လှန်ရေးအင်အားစုတွေ နေတာထိုင်တာလည်းမရှိဘူး။ ပြည်သူနေအိမ်ကို သက်သက်ကိုလာကြဲသွားတာ။ နေအိမ်ဘေးကိုကျတာ။ ပေါင် ၂၅၀ ဗုံးဖြစ်နိုင်တယ်”လို့ စဥ့်ကူးမြို့နယ် သတင်းနဲ့ပြန်ကြားရေးတာဝန်ခံ ကိုသံမဏိကပြောပါတယ်။

ဗုံးကျပေါက်ကွဲလို့ နေအိမ်အတွင်းရှိ အသက် ၃၅ နှစ်အရွယ် အမျိုးသား ၁ ဦးနေရာမှာတင်သေဆုံးခဲ့ပြီး အသက် ၁၀ နှစ်အရွယ် မိန်းကလေးငယ် ၁ ဦး၊ အသက် ၅၀ အရွယ် အမျိုးသမီး၊ အသက် ၄၀ နဲ့ ၂၀ အရွယ် အမျိုးသား ၂ ဦးတို့ ထိခိုက်ဒဏ်ရာရခဲ့ကာ နေအိမ် ၂ လုံးပျက်စီးခဲ့တယ်လို့ ဆိုပါတယ်။

စစ်ကောာ်မရှင်ဘက်က ဗုံးလာကြဲတာကြောင့်ရွာခံတွေမှာ စိုးရိမ်ထိတ်လန့်နေကြပြီး အခြေအနေကိုစောင့်ကြည့်နေကြရတယ်လို့ သိရပါတယ်။

အောက်တိုဘာ ၃၀ ရက်ကလည်း စဥ့်ကူးမြို့နယ်၊ လက်ပန်လှကျေးရွာ၊ အေးချမ်းသာရပ်ကွက်မှာ ဗုံးကြဲခံရပြီး မိန်းကလေးငယ် ၁ ဦးအပါအဝင် ၂ ဦးသေဆုံးခဲ့တယ်လို့ သိရပါတယ်။

စာတည်း – လင်း

အုတ်တွင်း၊ နိုဝင်ဘာ ၂၁၊ ၂၀၂၅။

ပဲခူးတိုင်း၊ အုတ်တွင်းမြို့နယ်၊ သရက်တောကျေးရွာမှာ ဒရုန်းနဲ့ဗုံးကြဲခံရတာကြောင့် မိန်းကလေးငယ် ၁ ဦးသေဆုံးပြီး ၂ ဦးဒဏ်ရာရခဲ့တယ်လို့ ကျေးရွာနဲ့နီးစပ်သူတွေဆီက သိရပါတယ်။

နိုဝင်ဘာလ ၂၁ ရက်ဒီမနက် မနက် ၉ နာရီ ၄၀ မိနစ်မှာ ဒရုန်းတစီးပေါ်ကနေ ဗုံးသီး ၁ လုံးကြဲချခဲ့ရာက နေအိမ်ပေါ်ကျပြီး အိမ်ထဲမှာရှိနေသူတွေ ထိခိုက်သေဆုံးခဲ့တာလို့ ဆိုပါတယ်။

“မင်္ဂလာဆောင်အိမ်ကို ဗုံးလာကြဲတာ။ ဘေးအိမ်ကလူတွေထိခိုက်ကုန်တာ”လို့ ကျေးရွာနဲ့ နီးစပ်သူတဦးက ပြောပါတယ်။

ဒရုန်းဗုံးပေါက်ကွဲစတွေထိမှန်လို့ အသက် ၁၆ နှစ်အရွယ် မချမ်းမီမီအောင်သေဆုံးပြီး အသက် ၁၀ နှစ်အရွယ် မယွန်းမီမီအောင် ရဲ့ မျက်နှာ၊ ကျော နဲ့ ခြေလက်တွေ ဒဏ်ရာရခဲ့ပြီး မယွန်းမီမီဇော်ရဲ့ ကျော၊ ပေါင်နဲ့ ခြေလက် ဒဏ်ရာရရှိခဲ့ကာ နေအိမ်လည်းပျက်စီးခဲ့တယ်လို့ ဆိုပါတယ်။

ထိခိုက်သေဆုံးသူတွေဟာ ညီမအရင်းတွေဖြစ်ပြီး ဒဏ်ရာရရှိသူကလေးငယ် ၂ ဦးကတော့ အမွှာ ညီအစ်မတွေ ဖြစ်တယ်လို့ သိရပါတယ်။

ဒီဗုံးကြဲမှုကို စစ်ကော်မရှင်ကလုပ်ဆောင်ခဲ့တယ်လို့ဆိုပေမယ့် မြေလတ်အသံကသီးခြားအတည်မပြုနိုင်သေးပါဘူး။

နိုဝင်ဘာ ၆ ရက်ကလည်း ဖြူးမြို့နယ်၊ မန်ကျည်းကုန်းတောင်ကျေးရွာက စစ်ကော်မရှင်ဘက်က ဂျိုင်ရိုကော်ပတာနဲ့ဗုံးကြဲခဲ့ရာ ပြည်သူ ၁ ဦးသေဆုံးပြီး နေအိမ် ၆ လုံးပျက်စီးခဲ့သေးတယ်လို့ သိရပါတယ်။

စာတည်း – လင်း