ထောက်ပံ့

စလင်း၊ မေ ၁၈၊ ၂၀၂၆။

မကွေးတိုင်း၊ စလင်းမြို့နယ်မှာ စစ်ကော်မရှင်စစ်ကြောင်းထိုးမီးရှို့သွားတဲ့ ရွာ ၂ ရွာက အိမ်ထောင်စု ၂၀၀ ကို ထောက်ပံ့ပေးခဲ့တယ်လို့ စလင်းမြို့နယ်ပြည်သူ့ကာကွယ်ရေးအဖွဲ့ဆီက သိရပါတယ်။

မေ ၁၅ ရက်နဲ့ ၁၆ ရက်‌တို့မှာ ၁ အိမ်ထောင်ကို ဆန် ၂ ပြည်၊ ငွေ ၁ သောင်းကျပ်နဲ့ အ၀တ်အထည်တွေ ကူညီထောက်ပံ့ပေးခဲ့တာလို့ ဆိုပါတယ်။

“အခက်အခဲကတော့ အများပေါ့။ မိုးရာသီလည်း နီးလာတော့ မိုးကာကအစ သူတို့မှာလိုအပ်ချက်တွေရှိတယ်။ ကျနော်တို့ကိုယ်တိုင်လည်း ပြည်သူတွေလိုအပ်သလောက် မထောက်ပံ့နိုင်တော့ အားငယ်မှုလည်းရှိပါတယ်”လို့ စလင်းပကဖ တာ၀န်ခံက မြေလတ်အသံကို ပြောပါတယ်။

ရပ်ကျေးပကဖ ကူညီရေးတာဝန်ခံတွေရဲ့ ကူညီထောက်ပံ့မှုကို စလင်းမြို့နယ် ပကဖ တာဝန်ခံတွေနဲ့ တပ်ဖွဲ့၀င်တွေက အခုလို ၂ ရက်ဆက်တိုက် သွားရောက်ကူညီထောက်ပံ့ခဲ့တာလို့လည်း သိရပါတယ်။

မေလ ၁ ရက်နဲ့ ၄ ရက်မှာ စလင်းမြို့နယ်ထဲက ရွာ ၆ ရွာကိုစစ်ကော်မရှင်တပ်က စစ်ကြောင်းထိုး မီးရှို့တာကြောင့် နေအိမ် ၆၀၀ ကျော်ပျက်စီးခဲ့ပြီး အဲ့ဒီထဲက အခုသွားလှူခဲ့တဲ့ရွာတွေအမည်ကိုတော့ လုံခြုံရေးအရ ဖော်ပြလို့မရဘူးလို့ ဆိုပါတယ်။

ပြီးခဲ့တဲ့ မေလ ‌၁၀ ရက်ကလည်း စလင်းမြို့နယ်အတွင်းက စစ်ရှောင်တွေအတွက် ငွေကျပ် သိန်း ၂၀‌‌ ကျော်၊စားနပ်ရိက္ခာနဲ့ အသုံးအဆောင်ပစ္စည်းတွေကို မြို့နယ်ကူညီကယ်ဆယ်‌ရေးတာဝန်ခံနဲ့ ချိတ်ဆက်ပြီးကူညီထောက်ပံ့ခဲ့တယ်လို့ စလင်းပကဖက ထုတ်ပြန်ထားခဲ့ပါတယ်။

စာတည်း – လင်း

ချောက်၊ ဖေဖော်ဝါရီ ၃၊ ၂၀၂၆။

မကွေးတိုင်း၊ ချောက်မြို့နယ်ရှိ စစ်ကော်မရှင်တပ်တွေမီးရှို့ခဲ့တဲ့ ကျေးရွာ ၂ ရွာကို ဖေဖော်ဝါရီ ၂ ရက်မှာ ရိက္ခာတွေ ထောက်ပံ့ပေးခဲ့တယ်လို့ ချောက်မြို့နယ်ပြည်သူ့ကာကွယ်ရေးအဖွဲ့ဆီက သိရပါတယ်။

စစ်ကော်မရှင်တပ်တွေရဲ့ မီးရှို့ဖျက်ဆီးမှုကိုခံထားရတဲ့ အဆိုပါကျေးရွာ ၂ ရွာက အိမ်ထောင်စု ၁၂၀ ကို ဆန်၊ ဆီ၊ ဆားအပါအဝင် အခြေခံရိက္ခာပစ္စည်းတွေထောက်ပံ့ပေးခဲ့တာလို့ ဆိုပါတယ်။

“အိမ်ခြေ ၁၂၀ ကို လှူဒါန်းခဲ့ပါတယ်၊ အဓိကတော့ အခြေခံမီးဘေးသင့်ပြည်သူတွေလိုအပ်တဲ့ ဆန်၊ ဆီ၊ ဆား၊ ငါးပိ၊ ကြက်သွန်၊ ခရမ်းချဉ်သီး၊ ခရမ်းခေါင်းသီး၊ အားလူး၊ အသားတု စတဲ့စားနပ်ရိက္ခာတွေကို သွားရောက်လှူဒါန်းခဲ့တာပါ၊ ဆန်ဆိုရင် ၁ အိမ်ထောင်ကို ၄ ပြည်နှုန်း ပေးလှူဒါန်းခဲ့ပါတယ်။” လို့ ချောက်မြို့နယ်ပြည်သူ့ကာကွယ်ရေးအဖွဲ့ တာဝန်ရှိသူတဦးက ပြောပါတယ်။

ဒီထောက်ပံ့မှုဟာ အဆိုပါဒေသခံတွေအတွက် ခဏတာအဆင်ပြေနိုင်ပေမယ့် ရေရှည်နေထိုင် စားသောက်ဖို့ကတော့ အခက်အခဲတွေရှိနေသေးတယ်လို့ ဆိုပါတယ်။

“ကျနော်တို့လည်း တတ်နိုင်တာပဲလုပ်ရတာဆိုတော့ ပြည်သူမှပြည်သူသို့ အစီအစဉ်နဲ့ လုပ်ရတဲ့ အနေအထားဆိုတော့ ခေတ္တခဏ ၁ ရက်တန် ၂ ရက်တန်အထိတော့ သူတို့စားရေး သောက်ရေးတော့ အဆင်ပြေကောင်းပြေလိမ့်မယ်၊ ဒါပေမဲ့ ရေရှည်မှာတော့ အိမ်ရဲ့ ပိုင်ဆိုင်မှုတွေအကုန်လုံး ဆုံးရှုံးသွားတာဆိုတော့ သူတို့ဘဝတွေအတွက်က အခက်အခဲတွေ အများကြီးရှိပါတယ်။” လို့ သူက ပြောပါတယ်။

လက်ရှိမှာ နေအိမ်တွေမီးရှိ့ခံထားရတာကြောင့် အရိပ်ရှိတဲ့နေရာတွေမှာ နေထိုင်နေကြရပြီး နေစရာလည်း အခက်တွေ့နေတယ်လို့ သိရပါတယ်။

“ပြီးရင် သူတို့မှာ လွန်တီးခေါင်ပြင်ထဲမှာ နေရပြီး တဲလောက်တောင် မထိုးနိုင်ဘဲ အရိပ်ရှိတဲ့နေရာမှာ ဖြစ်သလို မိသားစုတွေ နေထိုင်ရတာ၊ တော်တော်လေး ခက်ခဲကြမ်းတမ်းကြပါတယ်၊ မီးဘေးသင့် ပြည်သူတွေရဲ့ အနေအထားကိုကြည့်ရတာ ရင်နာစရာလည်းကောင်းပါတယ်။” လို့ ဆိုပါတယ်။

အဆိုပါကျေးရွာ ၂ ရွာကို အခုနှစ် ဇန်နဝါရီ ၂၇ ရက်မှာ စစ်ကော်မရှင်တပ်တွေက စစ်ကြောင်းထိုး မီးရှို့ခဲ့တာကြောင့် နေအိမ် ၁၂၀ ပျက်စီးခဲ့တာလည်း ဖြစ်ပါတယ်။

စာတည်း – လင်း

ခင်ဦး၊ နိုဝင်ဘာ ၂၆၊ ၂၀၂၅။

စစ်ကိုင်းတိုင်း၊ ခင်ဦးမြို့နယ်အတွင်းက စစ်ရှောင်အိမ်ထောင်စု ၅၀၀ ကို ရိက္ခာအတွက် အခြေခံစားကုန်တွေထောက်ပံ့ပေးခဲ့တယ်လို့ ခင်ဦးမြို့နယ်ပြည်သူ့ကာကွယ်ရေးအဖွဲ့ထံက သိရပါတယ်။

နိုဝင်ဘာ ၂၄ နဲ့ ၂၅ ရက်တွေမှာ ခင်ဦးမြို့နယ်အတွင်း ကျေးရွာ ၂၀ ခန့်က အရေးပေါ်စစ်ရှောင်နေရတဲ့ အိမ်ထောင်စု ၅၀၀ ခန့်ကို ဆန်၊ ဆီ၊ ထောပတ်ပဲ၊ မြေထောက်ပဲ၊ အိုင်အိုဒင်းဆား စတဲ့အခြေခံစားကုန်တွေနဲ့ မုန့်ထုပ်တွေ စုစုပေါင်းတန်ဖိုး ကျပ်သိန်း ၁၉၀ ခန့် ထောက်ပံ့ပေးခဲ့တာလို့ ဆိုပါတယ်။

“ဘာတွေကိုအဓိကလှူဒါန်းလဲဆိုတော့ အဓိက ကတော့ဆန်ရယ်၊ ဆီရယ်၊ ဆားရယ်၊ ပဲရယ် အရေးပေါ်လိုအပ်ချက်ကတော့ စားနပ်ရိက္ခာပေါ့။ ပေးဝေတဲ့လုပ်ငန်းကို တောက်လျောက်လုပ်နေပါတယ်။ ကျန်တဲ့ရွာတွေကို ဆက်ပြီးလုပ်ဖို့ရှိနေပါတယ်။ “လို့ မြို့နယ်ပကဖတာဝန်ရှိသူတဦးက မြေလတ်အသံကို ပြောပါတယ်။

နိုဝင်ဘာ ၁၁ ရက်က ကန့်ဘလူကနေ ခင်ဦးဘက်ကို စစ်ကော်မရှင်တပ် အင်အား ၃၀၀ ဝန်းကျင်နဲ့စစ်ကြောင်းထိုး ဝင်ရောက်လာတာကြောင့် ခင်ဦးမြို့နယ် အနောက်ခြမ်းနဲ့ ကန့်ဘလူမြို့နယ် အနောက်တောင်ခြမ်းက ကျေးရွာပေါင်း ၂၀ ခန့်က အိမ်ထောင်စုတွေ အရေးပေါ်စစ်ရှောင်နေကြရတာပါ။

စစ်ရှောင်ရတာ ၁၆ ရက် ရှိနေခဲ့ပြီး ရက်ရှည်လာတာနဲ့အမျှ စစ်ရှောင်တွေအတွက် နေစရာ၊စားနပ်ရိက္ခာအခက်အခဲတွေများတဲ့အပြင် ရာသီဥတု ပြင်းထန်တာကြောင့် ဖျားနာနေသူတွေလည်းရှိနေတယ်လို့ ၎င်းကဆိုပါတယ်။

လက်ရှိမှာ အဲ့ဒီစစ်ကြောင်းဟာ ကန့်ဘလူမြို့နယ်က ကျောက်တိုင်ကျေးရွာကို မီးရှို့ခဲ့ပြီး မုံလှကျေးရွာမှာပဲရှိနေတယ်လို့ သိရပါတယ်။

ကူညီထောက်ပံ့မှုတွေကို ခင်ဦးမြို့နယ် ပအဖ၊ ပကဖ၊ ခင်ဦးမြို့နယ် လူသားစာနာ တာဝန်ခံ၊ မြို့နယ် တရားရေး ဥက္ကဌနှင့် အဖွဲ့ဝင် ၁ ဦး၊ မြို့နယ် အခွန်တော် အရာရှိ၊ ဘဏ္ဍာရေး တွဲဘက်၊ သယံဇာတ ဥက္ကဌ၊ လျှပ်စစ် တွဲဘက်၊ စိုက်ပျိုးရေး၊ မြို့နယ် ပအဖ ရုံးအဖွဲ့မှူး၊ မြို့နယ် ပကဖ ရဲဘော်များ၊ ကျေးရွာ ပအဖ၊ ပကဖ များမှ ပါဝင်ကူညီဆောင်ရွက်ခဲ့တယ်လို့ သိရပါတယ်။

အဆိုပါ စစ်ကြောင်း ဝင်ရောက်နေတာကြောင့် ကန့်ဘလူမြို့နယ်ရှိ ကျောက်တိုင်၊ ကျီစု၊ယင်းတိုက်၊ ဝက်တိုး၊ အိုင်ပေါင်းချောင် ကျေးရွာ၊ ရေဦးမြို့နယ်၊ ပင်စိမ်းခင်းကျေးရွာ၊ ခင်ဦးမြို့နယ်ရှိ မုံလှ၊ သာဝတ္ထိ၊ သရက်တော၊ ကင်းပြစ်၊ ကလုံ၊ မြင်းကျ၊ ကျွန်းတောကြီး၊ ဥယျာဉ်၊ယာတော်၊ မကျီးအုပ်၊ မြင်းဒေါင်း၊ သရက်ပင်စု၊ သက်သာပန်းတောင်းစတဲ့ကျေးရွာက စစ်ရှောင်ပြည်သူ ၄ သောင်း ခန့် စစ်ရှောင်နေကြရတယ်လို့ သိရပါတယ်။

◼ စစ်ဘေးရှောင်ထောင်ချီ ဆေးဝါးနဲ့ စားနပ်ရိက္ခာလိုအပ်နေ

ဝက်လက်၊ နိုဝင်ဘာ ၂၄၊ ၂၀၂၅။

စစ်ကိုင်းတိုင်း၊ ဝက်လက်မြို့နယ်က စစ်ဘေးရှောင် ၁၀၀ ကျော်အတွက် လူငယ်လွတ်မြောက်ရေး အဖွဲ့ချုပ် – YLA က ဆေးဝါးကုသမှုပေးပြီး အဝတ်အထည်တွေ ကူညီထောက်ပံ့ခဲ့တယ်လို့ YLA အဖွဲ့ဝင်တဦးဆီက သိရပါတယ်။

ဝက်လက်မြို့နယ်မှာ နိုဝင်ဘာလအစောပိုင်းကစလို့ စစ်ကော်မရှင်တပ်က အင်အားအလုံးအရင်းနဲ့ စစ်ကြောင်းထိုးပြီး ကျေးရွာ ၁၉ ရွာကို မီးရှို့ခဲ့တာကြောင့် သောင်းနဲ့ချီတဲ့ ဝက်လက်မြို့နယ်ထဲက ဒေသခံတွေ စစ်ဘေးတိမ်းရှောင်နေရတာပါ။

“ခုတခေါက်ကတော့ အိမ်ထောင်စုရေနဲ့မသိရပေမယ့် လူ ၁၀၀ နီးပါးထိ ကူပေးနိုင်ခဲ့ပါတယ်။ အဓိကလိုအပ်ချက်ကတော့ စားနပ်ရိက္ခာနဲ့ဆေးဝါးပါ။ နေတာက အဆင်ပြေသလိုနေလို့ရပေမယ့် အရေးပေါ်တိမ်းရှောင်လာရတော့ စားနပ်ရိက္ခာလိုအပ်နေတာတွေရှိပါတယ်။ ကျနော်တို့ အနေနဲ့ကတော့ ခုချိန်မှာ အ၀တ်အစားအသုံးအဆောင်နဲ့ ဆေးဝါးကုသမှု‌ပဲ ကူနိုင်ပါသေးတယ်၊ စားနပ်ရိက္ခာအတွက်ကူနိုင်ဖို့ အထောက်အပံ့တွေလည်း လိုအပ်နေပါသေးတယ်။” လို့ ရဲဘော်အေကေက ဆိုပါတယ်။

ဝက်လက်မြို့နယ်မှာ နိုဝင်ဘာလအတွင်း မူးကြီး၊တံတားဦး၊ ထုံးဘို၊ လိန်ပင်၊ ခေါတော၊ မြင်တော်၊ ဦးတည်ကုန်း၊ တမာကုန်း၊ ရွာတော်ကုန်း၊ ရွာသာကြီး၊ သရက်ကြီး၊ ဘုရားပျံ၊ ဥယျာဉ်မ၊ ကျီးကန်တောင်ရွာ၊ ကျီးကန်မြောက်ရွာ၊ လှတော၊ ရွှေကျင်နဲ့ စိုင်နိုင်လေးကျေးရွာတွေကို မီးရှို့ခဲ့ပြီး ဒီကနေ့အထိ ဆက်လက်စစ်ကြောင်းထိုးနေဆဲလို့ သိရပါတယ်။

“စစ်ရှောင်တွေကရှောင်နေရတာက ကြာပြီခင်ဗျ။ ခုရက်ပိုင်းမှ ၀က်လက်မြို့ကနေ ပြန်ထွက်လာတဲ့ စစ်ကြောင်းက ရွှေဘို-မန္တလေးကားလမ်းမပေါ်က ဘုရားပျံကျေးရွာ၊ သရက်ကြီးကျေးရွာတွေကို မီးရှို့ ဖျက်ဆီးပြီး အဲ့ဒီကနေအရှေ့ဘက် ဆင့်ကွပ်ရွာအနောက်ဘက်ထိတက်လာပြီးတော့မှ တောင်ဘက်ကို ပြန်သွားပြီး ရွှေဘို-မန်းလေးကားလမ်းမပေါ်က ရွာတွေမှာ မွှေနှောက်နေကြတယ်။” လို့ YLA ဥက္ကဌ အေကေ က မြေလတ်အသံကို ပြောပါတယ်။

စစ်ကြောင်းကြောင့်တိမ်းရှောင်နေရတဲ့ စစ်ဘေးရှောင်တွေမှ ဆေးဝါးနဲ့ စားနပ်ရိက္ခာတွေလိုအပ်နေဆဲ ဖြစ်တယ်လို့ ဥက္ကဌ အေကေ က ဆက်ပြောပါတယ်။

အထက်ပါကျေးရွာတွေကို မီးရှို့ခဲ့တဲ့စစ်ကြောင်းဟာ လက်ရှိဘုရားပျံရွာနဲ့ ဆားတောင်မြို့ကြားမှာရှိနေပြီး ကားကွင်းလမ်းတွေ ထိပ်မှာပိတ်ကာ စခန်းချထားတယ်လို့လည်း သိရပါတယ်။

စာတည်း – လင်း

ဘုတလင်၊ စက်တင်ဘာ ၁၅၊ ၂၀၂၅။

စစ်ကိုင်းတိုင်း၊ ဘုတလင်မြို့နယ် ရွာ ၅ ရွာက စစ်ဘေး၊ မီးဘေးသင့်ပြည်သူတွေကို အခြေခံစားသောက်ကုန်တွေ ထောက်ပံ့လှူဒါန်းခဲ့တယ်လို့ ဒေါင်းရာဇာပင်မသပိတ်လူမှုကူညီရေးအသင်း ဘုတလင်မြို့နယ်ဆီက သိရပါတယ်။

စစ်ကော်မရှင်စစ်ကြောင်းရဲ့မီးရှို့ခံထားရတဲ့ ရွှေတောင်၊ ပေါက်စိန်ပေါက်၊ ကံသာ၊ ထူးကြီး၊ ဇီးတောရွာတွေက အိမ်ထောင်စု ၇၀ အတွက် စက်တင်ဘာ ၁၃ ရက်မှာ ၁ အိမ်ထောင်ကို ကျပ် ၃၅,၀၀၀ ဖိုး ဆန်၊ ဆီ၊ ဆား၊ ကြက်သွန်တွေ ကျေးရွာတွေအထိသွားရောက် ထောက်ပံ့လှူဒါန်းခဲ့တာလို့ ဆိုပါတယ်။

” စစ်ကြောင်းဘယ်နေ့လာမှာလည်းဆိုပြီး ပြည်သူတွေအနေနဲ့တော့ ခေါင်းပြားအောင်မအိပ်ရပါဘူး၊ စိတ်ဒုက္ခတွေလည်း ရောက်ကြရတယ်၊ နောက်ပြီး ရာသီဥတုအခြေအနေကလည်း နေပူလိုက်၊ မိုးရွာလိုက်ဆိုတော့ ဖျားကြနာကြတယ်။ အဲ့လိုအခက်အခဲတွေတော့ ရှိပါတယ်” လို့ ဒေါင်းရာဇာပင်မသပိတ်လူမှုကူညီရေးအသင်း – ဘုတလင်အဖွဲ့ အတွင်းရေးမှူးက ပြောပါတယ်။

အထက်ပါကျေးရွာတွေကအိမ်ထောင်စုတွေဟာ ၂၀၂၄ စက်တင်ဘာလမှာ စစ်ကော်မရှင်တပ်က စစ်ကြောင်းထိုးမီးရှို့ခဲ့တာကြောင့် နေအိမ်တွေဆုံးရှုံးခဲ့ရတဲ့ စစ်ဘေး၊ မီးဘေးသင့်ခဲ့သူတွေဖြစ်တယ်လို့ သိရပါတယ်။

ဘုတလင်မြို့နယ်ကို စစ်ကော်မရှင်တပ်ဖွဲ့တွေရဲ့ မကြာခဏစစ်ကြောင်းထိုးဝင်ရောက်မှု မီးရှို့မှုတွေကြောင့် ဒေသခံတွေမှာ အရေးပေါ်စစ်ရှောင်နေရကာ အလုပ်မလုပ်နိုင်တာကြောင့် စားဝတ်နေရေး အခက်အခဲတွေရှိနေတယ်လို့ ဆိုပါတယ်။

ပုလဲ၊ ဇွန် ၂၄၊ ၂၀၂၅။

စစ်ကိုင်းတိုင်း၊ ပုလဲမြို့နယ်၊ ကန့်ဒေါင့်၊ ဇီးဖြူကုန်းနဲ့ အင်မထီးရွာတွေမှာ ဖြစ်ပွားခဲ့တဲ့တိုက်ပွဲတွေကြောင့် ရှောင်တိမ်းနေကြရတဲ့ စစ်ဘေးရှောင်တွေကို ဗမာနိုင်ငံလုံးဆိုင်ရာလူငယ်ကဗျာဆရာများသမဂ္ဂ (ဗလကသ) က စားနပ်ရိက္ခာတွေ ထောက်ပံ့ပေးခဲ့တယ်လို့ သိရပါတယ်။

ဇွန် ၂၂ ရက်မှာ စစ်ရှောင်အိမ်ထောင်စု ၅၀ စာအတွက် အခြေခံစားကုန် ၄ မျိုး ဆန်၊ ဆီ၊ ဆားနဲ့ ပဲ ထောက်ပံ့ပေးခဲ့တာဖြစ်ပြီး မိုးရာသီဖြစ်တာကြောင့် ဆေးဝါး၊ မိုးကာနဲ့ အခြေခံစားကုန်အကူအညီတွေ လိုအပ်နေဆဲဖြစ်တယ်လို့ ဆိုပါတယ်။

“ လက်ရှိပုလဲဘက်မှာက စစ်ရေးအခြေအနေက မတည်ငြိမ်သေးပါဘူး။ စစ်ကောင်စီအနေနဲ့လေကြောင်းကနေလည်း လာရောက်တိုက်ခိုက်မှုတွေရှိနေပါသေးတယ်။ စစ်ရှောင်တွေက အကုန်ပြန့်ကြဲနေတော့ ကူညီရေးအနေနဲ့သွားရောက်ရတဲ့အခါတွေမှာ ခက်ခဲမှုတွေရှိပါတယ်။ အဓိကနယ်မြေအခြေအနေအရ မတည်ငြိမ်သေးတော့ အခြေခံစားသောက်ကုန်တွေ အကူအညီလိုအပ်ပါတယ်” လို့ ဗလကသ ရဲ့ ပြောရေးဆိုခွင့်ရှိသူက မြေလတ်အသံကို ပြောပါတယ်။

ကျေးရွာပေါင်း ၂၀ ကျော်က ဒေသခံတွေက စစ်ပွဲနဲ့ဝေးတဲ့နေရာတွေကို ရှောင်တိမ်းနေကြရတာဖြစ်ပြီး လက်ရှိမှာ ပုလဲနယ်ထဲ တိုက်ပွဲတချို့ဆက်ဖြစ်နေတာကြောင့် စစ်ရှောင်တွေနေရပ်မပြန်နိုင်သေးဘူးလို့ ဆိုပါတယ်။

“ အစကတော့ လူပေါင်း တသောင်းကျော်လောက် စစ်ရှောင်နေကြရပါတယ်၊ ခု ကန့်ဒေါင့်တိုက်ပွဲပြီးသွားတော့ တချို့ဝေးတဲ့ရွာတွေကတော့ ပြန်လည်ဝင်ရောက်နေထိုင်ကြတာရှိပါတယ်။ ခုတော့ ရွာပေါင်း ၁၀ ရွာကျော်လောက် ဆက်ရှောင်နေကြရသေးတယ်ဗျ။ ခုက မိုးရာသီဖြစ်တဲ့အတွက် စစ်ရှောင်တွေအနေနဲ့ မိုးကာတွေလည်းလိုအပ်မယ်ဗျ။ တချို့ဆို သစ်ပင်အောက်မှာ၊ ယာတဲလေးတွေထဲမှာ ဖြစ်သလို ခိုလှုံပြီး စစ်ရှောင်နေကြရတာတွေရှိပါတယ်” လို့ အထက်ပါကဗျာ ဆရာက ပြောပါတယ်။

ကန့်ဒေါင့်စခန်း သိမ်းပြီးနောက် ဇွန် ၂၃ နဲ့ ၂၄ ရက်တွေမှာ ပြည်သူ့လွတ်မြောက်ရေးတပ်-PLA နဲ့ပူးပေါင်းတပ်တွေဟာ အင်မထီးကနေထွက်လာတဲ့ စစ်ကြောင်းနဲ့ ထိတွေ့မှုတွေရှိပြီး စစ်ကောင်စီတပ်ကလည်း လေကြောင်းတိုက်ခိုက်မှုအပြင်းအထန်ပြုလုပ်နေတာကြောင့် စစ်ရေးဆက်လက်တင်းမာနေဆဲဖြစ်တယ်လို့ ဒေသခံတွေဆီက သိရပါတယ်။

စာတည်း – ဟိန်းစံ