တိုက်ပွဲ

စလင်း၊ ဒီဇင်ဘာ ၇၊ ၂၀၂၅။

မကွေးတိုင်း၊ စလင်းမြို့မရဲစခန်းက ထွက်လာတဲ့စစ်ကော်မရှင်တပ်ဖွဲ့ဝင်တွေကို ပစ်ခတ်တိုက်ခိုက်ပြီး လက်ပစ်ဗုံးနဲ့ ခဲယမ်းတွေသိမ်းဆည်းခဲ့တယ်လို့ စလင်းပြည်သူ့ကာကွယ်ရေးတပ်ဖွဲ့ဆီက သိရပါတယ်။

ဒီဇင်ဘာ ၆ ရက် နေ့လယ် ၂ နာရီခွဲလောက်မှာ စလင်းမြို့မရဲစခန်းကနေ စစ်ကော်မရှင်တပ်သားနဲ့ ရဲတွေ ဆိုင်ကယ် ၄ စီး၊ ကား ၁ စီးနဲ့ထွက်လာချိန် မြို့မရဲစခန်းနဲ့ စိမ်းစိုဂိတ်ကြားမှာ ပစ်ခတ်တိုက်ခိုက်ခဲ့တာလို့ ဆိုပါတယ်။

“ပြည်သူလူထုကို အသိပေးပြီး ကျနော်တို့မြို့အထွက်လမ်းတွေကို ပိတ်တယ်၊ လမ်းအနည်းငယ်တော့ ဖွင့်ပေးထားတယ်၊ စစ်ကော်မရှင်က မြို့ထဲကနေထွက်ပြီး အရပ်သားပြည်သူတွေကို ပေါ်တာဆွဲတာတွေလုပ်တယ်၊ သူတို့ပေါ်တာဆွဲဖို့အတွက် ဆိုင်ကယ်နောက်မှာ ကားလည်းပါတယ်၊ ကျနော်တို့ မိုင်း ပိတ်ထားတဲ့နေရာကို သူတို့ထွက်လာတာ၊ မြို့ထဲကနေ စိမ်းစိုဂိတ်ကို ထွက်လာတာမှာ ကျနော်တို့ အသင့်စောင့်ကြိုပြီး ကြားဖြတ်တိုက်ခိုက်ခဲ့တာ၊ အရင်ဆုံး မိုင်းဆွဲလိုက်တယ်။” စလင်းပကဖတာဝန်ခံ M 4 က ပြောပါတယ်။

တိုက်ခိုက်မှုအတွင်းစစ်ကော်မရှင်တပ်ဖွဲ့ဝင်တွေ ထိခိုက်ဒဏ်ရာရခဲ့ပြီး G 3 ကျည်ဘောက် ၂ ခု၊ လက်ပစ်ဗုံး ၂ လုံးနဲ့ ကျည် ၃၀ တောင့်တို့ကို သိမ်းဆည်းရမိခဲ့တယ်လိုသိရပါတယ်။

“စစ်ကော်မရှင်ဘက်က ကျနော်တို့မျက်မြင်ကတော့ ရှေ့ဆုံးက ၂ ဦး (ဆိုင်ကယ်)စီးလာတာလဲသွားတယ်၊ နောက်က ၂ ဦးကလည်း ၁ ဦးက ဝမ်းဗိုက်နဲ့လည်ပင်း ထိခိုက်ဒဏ်ရာရသွားတယ်၊ နောက်ထပ် ၁ ဦးကလည်း လက်ဖျံရိုးပြတ်လုနီးနီးဖြစ်တယ်၊ နောက်ကလိုက်လာတဲ့ စစ်ကော်မရှင်တပ်သားတွေက ပြန်လည် တိုက်ခိုက်တယ်၊” လို့ သူက ဆက်ပြောပါတယ်။

ပစ်ခတ်ခံရပြီးနောက် အဲ့ဒီစစ်ကော်မရှင်တပ်တွေဟာ စလင်းမြို့မရဲစခန်းကိုပြန်ဆုတ်သွားပြီး ဒဏ်ရာရသူတွေထဲက စစ်သား ၂ ဦး၊ မြင်းတင်ရပ်ကွက်နေ ရဲတပ်သား အောင်ညီညီနဲ့ ဖောင်းလင်းနယ်ထိန်း မင်းခန့်တို့ကို စလင်းပြည်သူ့ဆေးရုံကိုပို့ဆောင်ထားတယ်လို့သိရကြောင်း သူကဆက်ပြောပါတယ်။

ပြီးခဲ့တဲ့ စက်တင်ဘာ ၇ ရက်ကလည်း စလင်းမြို့ပေါ်ကနေ ပေါ်တာဆွဲဖို့ထွက်လာတဲ့ စစ်ကော်မရှင် တပ်ဖွဲ့ဝင်တွေလိုက်ပါလာတဲ့ကားတွေကို စလင်းပကဖက စလင်းမြို့၊ မြင်တင်ရပ်ကွက်အနီးမှာ ပစ်ခတ်တိုက်ခိုက်ခဲ့ပါသေးတယ်။

စာတည်း – လင်း

မိုးကုတ်၊ ဒီဇင်ဘာ ၆၊ ၂၀၂၅။

မန္တလေးတိုင်း၊ သပိတ်ကျင်းမြို့နယ်၊ မိုးကုတ်မြို့အနီးမှာ တပတ်အတွင်း တိုက်ပွဲ ၉ ကြိမ်ထက်မနည်းဖြစ်ပြီး စစ်ကော်မရှင် စခန်းကုန်း ၁ ခုသိမ်းပိုက်နိုင်ခဲ့တယ်လို့ ဒီဇင်ဘာ ၆ ရက်မှာ အမျိုးသားညီညွတ်ရေးအစိုးရ-NUG ကာကွယ်ရေးဝန်ကြီးဌာနက သတင်းထုတ်ပြန်ပါတယ်။

မိုးကုတ်မြို့ကို စစ်ကော်မရှင်အဖွဲ့တွေ စတင်ဝင်ရောက်ခဲ့တဲ့ နိုဝင်ဘာ ၃၀ ရက် ညနေ ၆ နာရီခန့်ကစတင်ပြီး မိုးကုတ်မြို့အနီးဝန်းကျင်မှာ စစ်ကော်မရှင်တပ်တွေက ခြေကုပ်ယူထားတဲ့နေရာတွေကို စတင်တိုက်ခိုက်ခဲ့တယ်လို့ ဆိုပါတယ်။

ဒီဇင်ဘာ ၆ ရက်ဒီကနေ့အထိ တိုက်ပွဲပေါင်း ၉ ကြိမ်ဖြစ်ပြီးနောက် စစ်ကော်မရှင်တပ်ရဲ့ စခန်းကုန်းတခုကို သိမ်းပိုက်ထားနိုင်ခဲ့တယ်လို့ ထုတ်ပြန်ချက်မှာ ဖော်ပြထားပါတယ်။

တိုက်ပွဲတွေမဖြစ်ခင်ကတည်း ဒေသခံတွေထိခိုက်မှုမရှိစေဖို့ ဘေးလွတ်ရာနယ်မြေတွေကို ကြိုတင် ရွှေ့ပြောင်းပေးတာ၊ နေရာချထားပေးတာနဲ့ လိုအပ်တဲ့ထောက်ပံ့ကူညီမှုတွေကို အချိန်နဲ့တပြေးညီ ပေးအပ်နိုင်ဖို့ကို အရပ်ဘက်လူမှုအဖွဲ့အစည်းတွေနဲ့ ပူးပေါင်းပြီး အလျင်အမြန်ဆောင်ရွက်ထားတယ်လို့လည်း ဆိုထားပါတယ်။

ပြည်သူ့ကာကွယ်ရေးတပ်တွေအနေနဲ့ မိုးကုတ်-မိုးမိတ်ဒေသကိုဝင်ရောက်လာတဲ့ စစ်ကော်မရှင်တပ်တွေကို ပြည်သူလူထုနဲ့လက်တွဲပြီး ဆက်လက်တိုက်ပွဲဝင်နေတယ်လို့ ထုတ်ပြန်ချက်မှာ ဖော်ပြထားပါတယ်။

၁၀၂၇ စစ်ဆင်ရေးမှာ မိုးကုတ်နဲ့မိုးမိတ်မြို့ကို TNLAနဲ့ PDF ပူးပေါင်းတပ်တွေကသိမ်းယူခဲ့ပြီးနောက် အောက်တိုဘာ ၂၇ နဲ့ ၂၈ ရက်မှာ စစ်ကော်မရှင်နဲ့ TNLA တပ်ဖွဲ့တို့ တရုတ်ရဲ့ကြားဝင် စေ့စပ်မှုအပြီး TNLA တပ်ဖွဲ့က စစ်ကော်မရှင်ဆီ လွှဲပြောင်းဖို့ သဘောတူခဲ့တာပါ။

အဲ့ဒီနောက် နိုဝင်ဘာ ၂၉ ရက် ညပိုင်းကစလို့ စစ်ကော်မရှင်တပ်က အင်အားအလုံးအရင်းနဲ့ မိုးကုတ်နဲ့ မိုးမိတ်မြို့တွေထဲကို ပြန်ဝင်လာပြီးနောက် ဒေသခံကာကွယ်ရေးတပ်တွေနဲ့ တိုက်ပွဲဖြစ်တာအပြင် နေအိမ်မီးရှို့တာနဲ့ ဗုံးကြဲတိုက်ခိုက်မှုတွေကိုလည်း ပြုလုပ်နေခဲ့တာပါ။

မြေလတ်အသံ၊ ဒီဇင်ဘာ ၆၊ ၂၀၂၅။

ပဲခူးတိုင်း၊ ဖြူးမြို့နယ်တိုက်ပွဲအတွင်းမှာ အရှင်ဖမ်းမိတဲ့ တပ်ကြပ်ကြီးဟောင်းနဲ့ စစ်ကော်မရှင်တပ်သား ၁ ဦးတို့ကို ထွက်ပြေးချိန်ပစ်ခတ်ခဲ့တာကြောင့် သေဆုံးခဲ့တယ်လို့ ဖြူးမြို့နယ်ပြည်သူ့ကာကွယ်ရေးအဖွဲ့ဆီက သိရပါတယ်။

ဒီဇင်ဘာ ၄ ရက်မနက် ၁၀ နာရီကျော်က ဖြူးမြို့နယ်၊ ဇေယျဝတီမြို့အရှေ့တောင်ဘက် ကြပ်ကွင်းကျေးရွာရဲ့ တာဝါတိုင်အနီးမှာ စစ်ကော်မရှင်တပ်သားတွေနဲ့ ကင်းလှည့်ထွက်တဲ့ ပကဖ တပ်ဖွဲ့ဝင်တွေ နာရီဝက်ကြာ ထိတွေ့တိုက်ပွဲဖြစ်ပြီးနောက်မှာ စစ်ကော်မရှင်တပ်သား ၂ ဦးကိုဖမ်းမိခဲ့တာလို့ ဆိုပါတယ်။

“မြင်လိုက်တာက ၄ ယောက်ပါ။ သူတို့ကိုပစ်နေတုန်း နောက်ကသူတွေက ပြေးကုန်တယ်။ သူတို့(စကမ) ၄ ယောက်ကိုမြင်လို့ ပစ်တဲ့အချိန်မှာဖမ်းမိတာပါ။ သူတို့ကလုပြီး အတူထွက်ပြေးတော့ ပစ်ခတ်လိုက်ရတာပါ။ သူတို့ကအမြဲ လာပစ်နေသူတွေပါ” လို့ ဖြူးမြို့နယ်ပကဖမှတာဝန်ရှိသူတဦးက ပြောပါတယ်။

ဖမ်းမိသူ ၂ ဦးမှာ ခမရ ၃၀၆ ကနေတပ်ကြပ်ကြီးရာထူးနဲ့ပင်စင်ယူထားသူ ကြည်တင်နဲ့ မြင့်ကြည်တို့ဖြစ်ပြီး ကပဖစခန်းကိုခေါ်ဆောင်သွားပြီးနောက် ကော်ကုလားထိုင်နှစ်လုံးပေါ်မှာ ထိုင်ခိုင်းပြီးစစ်ဆေးမေးမြန်းနေချိန် ဖြူးမြို့နယ်ပကဖ တပ်စုမှူးဆီကနေပစ္စတိုသေနတ်ကို လုယူထွက်ပြေးတဲ့အတွက်ပစ်ခတ်ခဲ့တာလို့ ဆိုပါတယ်။

တင်ကြည်ဟာ အာဏာသိမ်းပြီးချိန်မှစတင်ကာ စစ်ကော်မရှင်တပ်နဲ့ ပြန်လည်ပူးပေါင်းပြီး ဖြူးမြို့နယ် အတွင်းရှိ တံခွန်တိုင်ဂိတ်၊ ဆားဂွန်းဂိတ်တို့မှာအဖွဲ့ခေါင်းဆောင်အဖြစ် တာဝန်ယူထားသူ ဖြစ်တယ်လို့လည်း စစ်ဆေးမှုလုပ်ခဲ့ချိန်ထွက်ဆိုခဲ့တယ်လို့ အထက်ပါတာဝန်ရှိသူကပြောပါတယ်။

အထက်ပါတိုက်ပွဲအတွင်းမှာလည်း G-3 ၁ လက်၊ G-4 ၁ လက်၊ ကျည်ဘောက် ၅ ခု၊ ကျည် ၁၅ တောင့်တို့ကို သိမ်းဆည်းရရှိခဲ့တယ်လို့ ဆိုပါတယ်။

ပြီးခဲ့တဲ့နိုဝင်ဘာ ၁၇ ရက်ကလည်း ဖြူးမြို့နယ်၊ ညောင်ပင်သာရွာကနေ ကင်းလှည့်ထွက်လာတဲ့ စစ်ကော်မရှင်တပ်ဖွဲ့ဝင် ၃၀ ဦးကို တော်လှန်ရေးပူးပေါင်းတပ်ဖွဲ့တွေက ကြားဖြတ်တိုက်ခိုက်ခဲ့တာကြောင့် စစ်ကော်မရှင်တပ်သား ၂ ဦးသေဆုံးခဲ့တယ်လို့ သိရပါတယ်။

စာတည်း – လင်း

ပခုက္ကူ၊ ဒီဇင်ဘာ ၄၊ ၂၀၂၅။

မကွေးတိုင်း၊ မြိုင်မြို့နယ်ကထွက်လာတဲ့ စစ်ကြောင်းကိုကြားဖြတ်တိုက်ခိုက်ချိန် စစ်ကော်မရှင် တပ်သား ၁ ဦးကိုဖမ်းမိပြီး လက်နက်ခဲယမ်းတချို့ကိုလည်း သိမ်းဆည်းရရှိခဲ့တယ်လို့ Earthquake People’s Defence Force ဆီက သိရပါတယ်။

မြိုင်မြို့ပေါ်ကနေထွက်လာတဲ့ အင်အား ၁၀၀ ဝန်းကျင်ပါ တပ်မ ၉၉ ကစစ်ကြောင်းကို ဒီဇင်ဘာ ၂ ရက်မနက် ၁၀ နာရီဝန်ကျင်က တကြိမ်၊ ညနေ ၅ နာရီဝန်းကျင်ကမှာ တကြိမ် ပခုက္ကူမြို့နယ်အစပ်မှာပဲ တိုက်ခိုက်ခဲ့တာလို့ ဆိုပါတယ်။

“ပခုက္ကူနဲ့ မြိုင်နယ်ထဲကို ထိုးနေတဲ့စစ်ကြောင်းပေါ့၊ တပ်မ ၉၉ စစ်ကြောင်းလို့ သိရပါတယ်။ ပခုက္ကူနဲ့ မြိုင်နယ်အစပ်မှာ ဒရုန်းနဲ့ ဗုံးသီးချတယ်။ လက်နက်ငယ်တွေနဲ့လည်း ပစ်ခတ်ခဲ့တယ်။ အရှင် ၁ ဦး ဖမ်းမိတယ်၊ ထိခိုက်ဒဏ်ရာရတာက ၂၀ ဝန်းကျင်ရှိတယ်” လို့ Earthquake People’s Defence Force တာဝန်ရှိသူတဦးက ပြောပါတယ်။

စစ်ကော်မရှင်တပ်တွေထွက်ကျခဲ့တဲ့ RPG အဖူး၊ ၆၀ မမ ၂ ဖူးနဲ့ အသုံး အဆောင်ပစ္စည်းတချို့ကိုလည်း သိမ်းဆည်းရရှိခဲ့ပြီး ဖမ်းမိတဲ့တပ်သားကိုတော့ လက်ရှိမှာ စစ်ဆေးမေးမြန်းနေဆဲလို့ ဆိုပါတယ်။

ဒီတိုက်ခိုက်မှုကို Earthquake People’s Defence Force၊ ပခုက္ကူခရိုင် Local တပ်ရင်း ၁ (PDLB)၊ MGY PDF၊ Kanma Underground Force (ကမ္မတပ်ပေါင်းစု) နဲ့ မြိုင်ပကဖတို့ပူးပေါင်းတိုက်ခိုက်ခဲ့တာဖြစ်ပြီး လက်ရှိမှာစစ်ကြောင်းက ပခုက္ကူအခြေစိုက် တပ်မ ၁၀၁ ထဲကိုရောက်ရှိနေတယ်လို့ သိရပါတယ်။

ပြီးခဲ့တဲ့ နိုဝင်ဘာ ၁၆ ရက်ကလည်း ပခုက္ကူမြို့နယ်၊ တင်းဂါတ်ရွာက ပျူစောထီးတွေကို Earthquake People’s Defence Force ဝင်ရောက်တိုက်ခိုက်ခဲ့ပါသေးတယ်။

စာတည်း – လင်း

မြေလတ်အသံ၊ ဒီဇင်ဘာ ၄၊ ၂၀၂၅။

ပဲခူးတိုင်း၊ ရေတာရှည်မြို့နယ်မှာ နိုဝင်ဘာ ၂၆ ရက်နေ့လယ်ပိုင်းမှာ စစ်ကော်မရှင်တပ်တွေနဲ့ ဒေသခံကာကွယ်ရေးတပ်တို့တိုက်ပွဲဖြစ်ကာ ထိခိုက်သေဆုံးမှုရှိပြီး လက်နက်ခဲယမ်းတချို့လည်း သိမ်းဆည်းခဲ့တယ်လို့ ရေတာရှည်အခြေစိုက်၊ တပ်ရင်း ၃၅၀၄မှ သတင်းနဲ့ပြန်ကြားရေးတာဝန်ခံက ပြောပါတယ်။

နေ့လယ် ၂ နာရီကျော်မှာ တောင်ပိုင်းတိုင်းစစ်ဌာနချုပ်မှ အင်အား ၄၀ ခန့်ပါစစ်ကား ၃ စီးနဲ့စစ်ကြောင်းထိုးလာချိန် ကွမ်းအုံးရွာနဲ့ ဝမ်းမကြီးရွာကြားမှာ ကြားဖြတ်တိုက်ခိုက်ပြီး ၂ နာရီကြာထိတွေ့ တိုက်ပွဲဖြစ်ပွားခဲ့တယ်လို့ ဆိုပါတယ်။

“စစ်ကားတွေက တခွဲကျဲရွာကနေ စပါးရိတ်သိမ်းပြီး လယ်ကြားလမ်းအတိုင်း ကွမ်းအုံးရွာ ဝမ်းမကြီးရွာဘက်ကို မောင်းလာတာ။ အဲ့မှာမိုင်းဆွဲတယ်။ ပြီးတော့ ပွဲဖြစ်တာ။ တိုက်ပွဲက ၂ နာရီလောက်ကြာတယ်” လို့ အထက်ပါပြန်ကြားရေးတာဝန်ခံက ပြောပါတယ်။

တိုက်ပွဲအတွင်း စစ်ကော်မရှင်တပ်သား ၆ ဦး သေဆုံးပြီး ၂ ဦးဒဏ်ရာရရှိခဲ့တာကို မျက်မြင်အတည်ပြုခဲ့တာဖြစ်ကာ တိုက်ပွဲဖြစ်ပြီး နောက် ၁၃ မိုင်ခန့်ကွာဝေးတဲ့ တောင်ပိုင်းတိုင်းစစ်ဌာနချုပ် (တပခ) ဘက်ကိုဆုတ်ခွာ သွားခဲ့တယ်လို့ သူကဆိုပါတယ်။

တိုက်ပွဲအတွင်း ပူးပေါင်းတပ်ဖွဲ့ဖြစ်တဲ့ တပ်ရင်း ၃၅၀၄ နဲ့ ရေတာရှည်မြို့နယ်ပကဖတို့ဘက်က ထိခိုက်မှုမရှိခဲ့ဘဲ စစ်ကော်မရှင်တပ်ဘက်မှ အီနာဂါဗုံးသီး ၁ လုံး၊ လက်ပစ်ဗုံး ၁ လုံး၊ အီကွေးမန့် ၁ ခု၊ MA-11 ကျည်ဘောက် ၁ ခု၊ ဦးထုပ် ၂ လုံး၊ ၅.၅၆ ကျည် ၈၉ တောင့်သိမ်းဆည်းရရှိခဲ့တယ်လို့ သိရပါတယ်။

နိုဝင်ဘာ ၂၅ ရက်မနက် ၁၁ နာရီမှာ တောင်ပိုင်းတိုင်းစစ်ဌာနချုပ်(တပခ)၊ လုံခြုံရေးတပ်ခွဲ (၂) မှ တပ်ကြပ်ကြီး မြင့်လွင်ကို လက်ပစ် ဗုံး ၃ လုံး၊ သက်သေခံကဒ်ပြား၊ ငွေသား ၁,၂၀၀ ကျပ်၊ ဖုန်း ၂လုံး၊ ကား ၁ စီးနဲ့အတူ တခွဲကျဲကျေးရွာအနီးမှာ ဒေသခံကာကွယ်ရေးတပ်တွေကဖမ်းဆီးခံခဲ့ရပါတယ်။

ခုလိုဖမ်းဆီးခံရပြီးနောက် ၁ ရက်အကြာမှာပဲ အထက်ပါစစ်ကော်မရှင်တပ်က စစ်ကြောင်းထိုးလာတဲ့အတွက် ဖမ်းခံရတဲ့တပ်ကြပ်ကြီးကိုလိုက်ရှာတာဖြစ်နိုင်တယ်လို့ အထက်ပါပြန်ကြားရေးတာဝန်ခံက ခန့်မှန်းပါတယ်။

“သူက(မြင့်လွင်) နှစ်တိုင်းလယ်သမားတွေဆီက သီးစားခလာလာကောက်ပါတယ်။ သတင်းရရှိတာနဲ့ ကင်းပုန်းဝပ်စောင့်ပြီး ဖမ်းဆီးခဲ့တာပါ။ လက်ပစ်ဗုံး ၃ လုံးပဲပါတယ်။ ကားကတော့ တပ်ထဲကကားပါ။ လိုင်စင်မဲ့ပါ။ သူ့ကို မြစ်အနောက်ဘက်ကမ်းအထိတော်လှန်ရေးတွေဘက်က သွားရောက်ဖမ်းဆီးတာပါ”လို့ ရေတာရှည်အခြေစိုက်၊ တပ်ရင်း ၃၅၀၄မှ သတင်းနဲ့ပြန်ကြားရေးတာဝန်ခံက ပြောပါတယ်။

လက်ရှိမှာတော့ ဖမ်းဆီးခံတပ်ကြပ်ကြီးမြင့်လွင်ကို တပ်ရင်း ၃၅၀၄ မှာ ဥပဒေနဲ့အညီထိန်းသိမ်းထားတယ်လို့ ဆိုပါတယ်။

ပြီးခဲ့တဲ့အောက်တိုဘာ ၂၀ ရက်နေ့လယ် ၁ နာရီ ၅၀ မိနစ်ကလည်း ရေတာရှည်မြို့နယ်၊ ရွာသစ်ကျေးရွာရှိ အင်အား ၆၀ ကျော်နဲ့ ၁ နှစ်ကျော်ကြာတပ်စွဲထားတဲ့စစ်ကော်မရှင်တပ်ကို နာရီပိုင်းအတွင်းသိမ်းပိုက်နိုင်ခဲ့တယ်လို့ နေပြည်တော်တိုင်းစစ်ဌာနချုပ်တာဝန်ရှိသူတွေဆီက သိရပါတယ်။

စာတည်း – လင်း

မြေလတ်အသံ၊ ဒီဇင်ဘာ ၃၊ ၂၀၂၅။

စစ်ကိုင်းတိုင်း၊ ခင်ဦးမြို့နယ်အတွင်း စစ်ကော်မရှင်တပ်စစ်ကြောင်းကိုတိုက်ခိုက်ပြီးနောက် သိမ်းဆည်းရရှိခဲ့တဲ့ လက်နက်ငယ်တွေကို ပူးပေါင်းတိုက်ခိုက်ခဲ့တဲ့ မြို့နယ်ပကဖလက်အောက် တိုက်နယ် နဲ့ UG ပကဖတွေကို ခွဲဝေပေးအပ်ခဲ့တယ်လို့ ခင်ဦးမြို့နယ်ပကဖကပြောပါတယ်။

တိုက်ပွဲအတွင်းသိမ်းနိုင်ခဲ့တဲ့ လက်နက်ငယ် ၂၈ လက်အနက် MA-1 ၁၀ လက်နဲ့ G-3 ၄ လက်ကို တိုက်နယ် ၁ ကနေ ၅ အထိနဲ့ UG ပကဖတွေထံ အချိုးကျခွဲဝေပေးခဲ့တာဖြစ်ပြီး အဲ့ဒီလက်နက်ပေးအပ်ပွဲကို ဒီဇင်ဘာ ၂ ရက် ယမန်နေ့လယ် ၃ နာရီကျော်မှာ ပြုလုပ်ခဲ့တာလို့ ဆိုပါတယ်။

” ဒီလက်နက်တွေက မုံလှတိုက်ပွဲတုန်းကရရှိခဲ့တဲ့ လက်နက်တွေဖြစ်တယ်။ အဲ့ဒီလက်နက်တွေကို ပူးပေါင်းတပ်ဖြစ်တဲ့ တပ်ရင်းပကဖ ပူးပေါင်းတပ်တွေက ခွဲခြမ်းစိပ်ဖြာပြီးပြီ။ ပကဖက ခုရရှိခဲ့တဲ့ ခွဲတမ်းထဲကနေပြီးတော့ ကိုယ့်ရဲ့ပူးပေါင်းတပ်တွေဖြစ်တဲ့ တိုက်နယ်တွေ၊ UG တွေကို ပြန်ပြီးတော့ပေးအပ်ခြင်းဖြစ်တယ်” လို့ ခင်ဦးမြို့နယ်ပကဖတာဝန်ရှိသူတဦးက မြေလတ်အသံကို ပြောပါတယ်။

မုံလှကျေးရွာအနီး နိုဝင်ဘာ ၂၃ ရက်က အင်အား ၁၈၀ ခန့်ပါ စစ်ကော်မရှင်စစ်ကြောင်းကို တော်လှန်ရေးတပ်တွေက ကြားဖြတ်တိုက်ခိုက်ခဲ့မှုမှာ စစ်ကော်မရှင်တပ်ဖွဲ့ဝင် ၄၀ ဦးခန့် သေဆုံးပြီး ၎င်းတို့ကိုင်ဆောင်တဲ့ လက်နက်ငယ် MA-1 ၁၅ လက်၊ MA-2 ၃ လက်၊ MA-3 ၃ လက်၊ MA-4 ၁ လက်၊ G-3 ၄ လက်၊ MAS Sniper ၁ လက်၊ ငါးကြင်းမှီး ၁ လက်၊ BA-100 ၆၀ မမ ကွန်မန်ဒို စိန်ပြောင်း ၁ လက် စုစုပေါင်း ၂၈ လက်နဲ့ ဆက်စပ်ခဲယမ်းပစ္စည်းတွေကို သိမ်းဆည်းရရှိခဲ့တာပါ။

ခွဲဝေပေးခဲ့တဲ့သေနတ်တွေကို ခင်ဦးမြို့နယ် တိုက်နယ် ၁၊ ၂၊ ၃၊ ၄၊ ၅ ပကဖခေါင်းဆောင်၊ ဒုခေါင်းဆောင်နဲ့အဖွဲ့တွေ၊ UG ပကဖခေါင်းဆောင်နဲ့အဖွဲ့တွေနဲ့ သက်ဆိုင်ရာပကဖရဲဘော်တွေက အသီးသီးလက်ခံရယူခဲ့ကြတယ်လို့ သူက ဆက်ပြောပါတယ်။

” ရှေ့မှာလည်း တိုက်ပွဲကရရှိခဲ့တဲ့လက်နက်တွေကို အခုလိုပဲခွဲခြမ်းစိပ်ဖြာပြီးပေးခဲ့တာပါ။ မကြာသော ၂ လမြောက် အဲဒီတုန်းကဆိုရင်လည်း ခင်ဦး-ရွှေဘိုနယ်စပ်မှာဖြစ်ခဲ့တဲ့တိုက်ပွဲကနေရရှိခဲ့တဲ့လက်နက်တွေကို အခုလိုမျိုးပေးခဲ့တာရှိသလို ရှေ့မှာကတိုက်ပွဲကရရှိတဲ့လက်နက်တွေကို အခုလိုပဲပေးအပ်ခြင်းဖြစ်တယ်”လို့ အထက်ပါတာဝန်ရှိသူက ပြောပါတယ်။

ဒီလက်နက်ပေးအပ်တဲ့ အခမ်းအနားကို မြို့ နယ်ပြည်သူ့အုပ်ချုပ်ရေးအဖွဲ့မှ မြို့နယ်ပအဖခေါင်းဆောင်၊ တရားရေးဥက္ကဌ၊ အကျဥ်းတာဝန်ခံ၊ အခွန်တော်အရာရှိ၊ ဘဏ္ဍာရေးတွဲဘက်၊ စည်ပင်၊ လျှပ်စစ်တွဲဘက်၊ သယံဇာတဥက္ကဌ၊ သယံဇာတတွဲဘက်အတွင်းရေးမှူး၊ ပအဖရုံးအဖွဲ့မှူး၊ ရုံးအဖွဲ့မှူးတွဲဘက်နဲ့ မြို့နယ်ပကဖ (EC) အဖွဲ့မှ တပ်ဖွဲ့ဝင်တွေ အသီးသီး တက်ရောက်ခဲ့ကြတယ်လို့ သိရပါတယ်။

စာတည်း – ဟိန်းစံ

မိုးကုတ်၊ ဒီဇင်ဘာ ၁၊ ၂၀၂၅။

စစ်‌‌ကော်မရှင်တပ်တွေပြန်လည်တောင်းယူခဲ့တဲ့ မန္တလေးတိုင်း၊ မိုးကုတ်နဲ့ ရှမ်းပြည်နယ်မြောက်ပိုင်း၊ မိုးမိတ်မြို့အနီးမှာ နိုဝင်ဘာ ၃၀ ရက်မနေ့ညပိုင်းက စစ်ကော်ရှင်တပ်နဲ့ တော်လှန်ရေးတပ်တွေတိုက်ပွဲဖြစ်ပြီးနောက် စစ်ကော်မရှင်ဘက်ကအင်အားထပ်တိုးနေတယ်လို့ ဒေသခံစစ်ရေးသတင်းအရင်းမြစ်တွေဆီက သိရပါတယ်။

နိုဝင်ဘာ ၃၀ ရက် မနေ့က ညနေ ၅ နာရီခွဲမှာ မိုးကုတ်မြို့အပြင်ထွက်လာတဲ့ စစ်ကော်မရှင်တပ်နဲ့ တော်လှန်ရေးတပ်တွေတိုက်ပွဲဖြစ်ခဲ့ကာ မိုးမိတ်မြို့မှာလည်း ည ၈ နာရီခန့်မှာ တိုက်ပွဲဖြစ်ခဲ့တယ်လို့ စစ်ရေးသတင်းအရင်းမြစ်တဦးက ပြောပါတယ်။

“နာရီဝက်ကြာ ထိတွေ့ တိုက်ပွဲငယ် ဖြစ်ပွားတယ်။ အဲ့ဒီနောက်တော့ စစ်တပ်ဘက်က ပြန်ဆုတ်သွားတယ်ပေါ့နော်။ ထိခိုက်သေဆူံးနဲ့ ပတ်သက်ပြီးတော့ သိမထားရသေးပါဘူး။ မိုးကုတ်မှာဆိုရင်လည်း ထိတွေ့ဖြစ်ခဲ့တဲ့နယ်မြေမှာ စစ်တပ်အင်အားတွေထပ်တိုးထားသလို မိုးမိတ်မှာဆိုရင်လည်း စစ်အင်အားတွေ တိုးချဲ့ပြင်ဆင်နေတာတွေ တွေ့ရပါတယ်”လို့ သူကပြောပါတယ်။

တိုက်ပွဲဖြစ်တဲ့နေရာ အသေးစိတ်ကို လုံခြုံရေးအရထုတ်ဖော်မပြောပေမယ့် စစ်ကော်မရှင် ဘက်ကတော့ မိုးကုတ်နဲ့ မိုးမိတ်မြို့အပြင်ဘက်က ‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌တောင်ကုန်းတချို့ကို နယ်မြေချဲ့လာတဲ့အတွက် တိုက်ပွဲဖြစ်ပွားခဲ့တာလို့ ဆိုပါတယ်။

ဒီဇင်ဘာ ၁ ရက်ဒီနေ့မှာတော့ ထပ်မံတိုက်ပွဲဖြစ်တာမရှိသေးဘဲ စစ်ကော်မရှင်ဘက်က မိုးမိတ်မြို့ကို အင်အားတိုးတာနဲ့ ထိတွေ့တိုက်ပွဲဖြစ်ခဲ့တဲ့ နေရာတချို့ကို အင်အားဖြန့်ထားတယ်လို့ ဆိုပါတယ်။

၁၀၂၇ စစ်ဆင်ရေးမှာ မိုးကုတ်နဲ့မိုးမိတ်မြို့ကို TNLAနဲ့ PDF ပူးပေါင်းတပ်တွေကသိမ်းယူခဲ့ပြီးနောက် အောက်တိုဘာ ၂၇ နဲ့ ၂၈ ရက်မှာ စစ်ကော်မရှင်နဲ့ TNLA တပ်ဖွဲ့တို့ တရုတ်ရဲ့ကြားဝင် စေ့စပ်မှုအပြီး TNLA တပ်ဖွဲ့က စစ်ကော်မရှင်ဆီ လွှဲပြောင်းဖို့ သဘောတူခဲ့တာပါ။

အဲ့ဒီနောက် နိုဝင်ဘာ ၂၉ ရက် ညပိုင်းကစလို့ စစ်ကော်မရှင်တပ်က အင်အားအလုံးအရင်းနဲ့ မိုးကုတ်နဲ့ မိုးမိတ်မြို့တွေထဲကို ပြန်ဝင်လာတာလို့ သိရပါတယ်။

မိုးကုတ်ဟာ ပတ္တမြားအများဆုံးထွက်ရာမြို့ဖြစ်ပြီး မိုးမိတ်ကတော့ စိန်ထွက်ရာ မြို့အဖြစ် ထင်ရှားပါတယ်။

သတင်း – မြတ်