စဉ့်ကူး

စဥ့်ကူး၊ ဒီဇင်ဘာ ၂၊ ၂၀၂၅။

မန္တလေးတိုင်း၊ စဉ့်ကူးမြို့နယ်၊ ညောင်ဝန်းကျေးရွာကို လေယာဥ်နဲ့ ဗုံးကြဲခံရလို့ အမျိုးသား ၁ ဦး သေဆုံးပြီး ၄ ဦးဒဏ်ရာရတယ်လို့ စဥ့်ကူးမြို့နယ်ပကဖဆီက သိရပါတယ်။

ဒီဇင်ဘာ ၂ ရက်မနက် ၁၀ နာရီ မိနစ် ၅၀ ခန့်မှာ တံတားဦးလေဆိပ်ကတက်လာတဲ့ ဂျက်ဖိုက်တာ ၁ စီးဟာ ညောင်ဝန်းကျေးရွာထဲကို ဗုံး ၁ လုံးကြဲချခဲ့ရာ ရွာအလယ်ပိုင်း နေအိမ်အနီး ကျရောက်ပေါက်ကွဲခဲ့တာလို့ ဆိုပါတယ်။

“ညောင်ဝန်းရွာနားမှာတော့ တိုက်ပွဲမရှိဘူး။ တော်လှန်ရေးအင်အားစုတွေ နေတာထိုင်တာလည်းမရှိဘူး။ ပြည်သူနေအိမ်ကို သက်သက်ကိုလာကြဲသွားတာ။ နေအိမ်ဘေးကိုကျတာ။ ပေါင် ၂၅၀ ဗုံးဖြစ်နိုင်တယ်”လို့ စဥ့်ကူးမြို့နယ် သတင်းနဲ့ပြန်ကြားရေးတာဝန်ခံ ကိုသံမဏိကပြောပါတယ်။

ဗုံးကျပေါက်ကွဲလို့ နေအိမ်အတွင်းရှိ အသက် ၃၅ နှစ်အရွယ် အမျိုးသား ၁ ဦးနေရာမှာတင်သေဆုံးခဲ့ပြီး အသက် ၁၀ နှစ်အရွယ် မိန်းကလေးငယ် ၁ ဦး၊ အသက် ၅၀ အရွယ် အမျိုးသမီး၊ အသက် ၄၀ နဲ့ ၂၀ အရွယ် အမျိုးသား ၂ ဦးတို့ ထိခိုက်ဒဏ်ရာရခဲ့ကာ နေအိမ် ၂ လုံးပျက်စီးခဲ့တယ်လို့ ဆိုပါတယ်။

စစ်ကောာ်မရှင်ဘက်က ဗုံးလာကြဲတာကြောင့်ရွာခံတွေမှာ စိုးရိမ်ထိတ်လန့်နေကြပြီး အခြေအနေကိုစောင့်ကြည့်နေကြရတယ်လို့ သိရပါတယ်။

အောက်တိုဘာ ၃၀ ရက်ကလည်း စဥ့်ကူးမြို့နယ်၊ လက်ပန်လှကျေးရွာ၊ အေးချမ်းသာရပ်ကွက်မှာ ဗုံးကြဲခံရပြီး မိန်းကလေးငယ် ၁ ဦးအပါအဝင် ၂ ဦးသေဆုံးခဲ့တယ်လို့ သိရပါတယ်။

စာတည်း – လင်း

စဉ့်ကူး၊ မတ် ၁၅၊ ၂၀၂၅။

တော်လှန်ရေးတပ်ဖွဲ့တွေထိန်းချုပ်ထားတဲ့ မန္တလေးတိုင်း၊ စဥ့်ကူးမြို့နယ်၊ လက်ပံလှကျေးရွာ လေကြောင်းတိုက်ခိုက်မှုမှာ ကလေးငယ် ၆ ဦးအပါအဝင် ၂၇ ဦးသေဆုံးခဲ့တယ်လို့ MDY-PDF ပြောရေးဆိုခွင့်ရှိသူဆီက သိရပါတယ်။

မတ် ၁၄ ရက်နေ့လယ် ၃ နာရီခန့်က လူစည်ကားတဲ့ကျေးရွာစျေးအနီးကို စစ်ကောင်စီရဲ့ ဂျက်ဖိုက်တာ ၁ စီးက ဗုံး ၂ လုံးကြဲချခဲ့ရာ စျေးအနီးဝန်းကျင်ကို ကျရောက်ပေါက်ကွဲခဲ့ပြီး ပြည်သူတွေထိခိုက်သေဆုံးခဲ့ကြတာပါ။

“လေကြောင်းတိုက်ခိုက်မှုဖြစ်စဥ်ဖြစ်ဖြစ်ချင်းကတော့ On the spot, dead body ၁၁ လောင်းပါ။ ကျန်တဲ့သူတွေကတော့ ဆေးဝါးကုသမှုခံယူနေစဥ်မှာဘဲ အသက်ဆုံးရှုံးသွားကြတာတွေပါ။ ကလေးငယ်က ၆ ဦးသေဆုံးထားပါတယ်”လို့ MDY-PDF ပြောရေးဆိုခွင့်ရှိသူ ကိုအော်စမွန်က ပြောပါတယ်။

လေကြောင်းတိုက်ခိုက်မှုအတွင်း အသက် ၈ နှစ်အောက် ကလေးငယ် ၆ ဦးနဲ့ အမျိုးသား အမျိုးသမီး ၂၁ ဦး၊ ထိခိုက်ဒဏ်ရာရသူ ၃၀ ဦးဝန်းကျင်ထဲမှာလည်း ကလေးငယ်တွေပါဝင်ပြီး ထိခိုက်သေဆုံးသူတွေရဲ့ အချက်အလက်တွေကိုတော့ ကောက်ယူနေဆဲဖြစ်တယ်လို့ဆိုပါတယ်။

ဒါ့အပြင် လူနေအိမ် ၁၀ လုံး၊ စျေးဆိုင်ခန်း ၂၀ နီးပါးပျက်စီးသွားပြီး ထိခိုက်သေဆုံးသူတွေအများစုက လက်ပံလှရွာသားတွေဖြစ်ပြီး ရွေ့ပြောင်းလုပ်သားတွေနဲ့ခရီးသွားတွေလည်းပါဝင်တယ်လို့ သိရပါတယ်။

ဒဏ်ရာရရှိသူတွေကိုဆေးကုသပေးနေပြီး ပျက်စီးမှုတွေကိုတော့ ဒေသခံတွေကရှင်းလင်းနေကြကာ လေကြောင်းကနေ ဗုံးကြဲခံရတာကြောင့် နောက်ထပ်ဗုံးကြဲခံရမှာစိုးရိမ်ပြီး ဒေသခံအချို့ကတော့ ကျေးရွာကနေ ပြောင်းရွေ့နေကြတယ်လို့ ဆိုပါတယ်။

စဥ့်ကူးမြို့နယ်တခုလုံးကို ၂၀၂၄ ခုနှစ် ဇူလိုင်လမှာ တော်လှန်ရေးပူးပေါင်းတပ်တွေက ထိန်းချုပ်ထားခဲ့တာဖြစ်ပြီး လက်ပံလှကျေးရွာအတွင်းကိုလည်း တော်လှန်ရေးအဖွဲ့တွေ ဖြတ်သန်းသွားလာတာသာရှိကာ တိုက်ပွဲမဖြစ်တာလည်း ၈ လလောက်ရှိပြီလို့ သိရပါတယ်။

ဇန်နဝါရီ ၉ ရက်ကလည်း စဥ့်ကူးမြို့နယ်၊ ကံတောင်ရွာကို စစ်ကောင်စီတပ်ဘက်က လေကြောင်းကနေ ဗုံးကြဲတိုက်ခိုက်ခဲ့တာကြောင့် ဒေသခံ ၃၀ ထက်မနည်း ထိခိုက် ဒဏ်ရာရခဲ့သေးတယ်လို့ သိရပါတယ်။

စာတည်း – လင်း

မန္တလေး၊ ဖေဖော်ဝါရီ ၁၄၊ ၂၀၂၅။

မန္တလေးတိုင်း၊ စဥ့်ကူးမြို့နယ်၊ ရွှေပြည်ကျေးရွာအုပ်စု၊ ကျွန်းစည်ကျေးရွာမှာရှိတဲ့ ဘုံသာဘုန်းကြီးကျောင်းထဲကို ဖေဖော်ဝါရီ ၁၁ ရက် မနက် ၁၀ နာရီခန့်က စစ်ကောင်စီက လေကြောင်းကနေ ဗုံး ၅ လုံး ကြဲချခဲ့တာကြောင့် ဘုန်းကြီးကျောင်းထဲက အဆောက်အဦတွေ ပျက်စီးခဲ့တယ်လို့ သိရပါတယ်။

စစ်ကောင်စီရဲ့ လေယာဉ် ၁ စီးဟာ ပေါင် ၅၀၀ နဲ့ ပေါင် ၁၂၀ ဗုံးသီးတွေကို ကြဲချတိုက်ခိုက်ခဲ့တာဖြစ်ပြီး ဗုံး ၃ လုံးက ဘုန်းကြီးကျောင်းထဲ ကျရောက်ပေါက်ကွဲကာ ကျန် ၂ လုံးကတော့ ဘုန်းကြီးကျောင်းဘေးကို ကျရောက်ပေါက်ကွဲခဲ့တယ်လို့ ဒေသခံတွေက ပြောပါတယ်။

ဗုံးကြဲတိုက်ခိုက်မှုကြောင့် ဘုံသာဘုန်းကြီးကျောင်းထဲမှာရှိတဲ့ ဆွမ်းစားဆောင်၊ ရေစင်နဲ့ အဆောက်အဦတချို့ ထိခိုက်ပျက်စီးခဲ့သလို အနီးဝန်းကျင်မှာရှိတဲ့ အိမ်‌တွေက မှန်တွေကွဲခဲ့တယ်လို့ သိရပါတယ်။

ဘုန်းကြီးကျောင်းထဲမှာ အလှူအတန်းနဲ့ ဥပုသ်သည်တွေ မရှိတာကြောင့် ထိခိုက်သေဆုံးတာနဲ့ ဒဏ်ရာရတာတွေမရှိပေမယ့် ကျေးရွာအတွင်းက ဆန်စက်မှာ စပါးလာကြိတ်တဲ့ အမျိုးသမီးတဦး ဗုံးသံကြောင့် မေ့လဲသွားတာတော့ဖြစ်ခဲ့တယ်လို့ ဒေသခံတွေက ပြောပါတယ်။

အဲဒီစစ်ကောင်စီရဲ့လေကြောင်းတိုက်ခိုက်မှုဟာ စဥ့်ကူးမြို့နယ်အတွင်းက ပြည်သူ့ကာကွယ်ရေးတပ်ဖွဲ့က အရာရှိတဦးရဲ့ မင်္ဂလာဆောင်နဲ့ ဘုန်းကြီးကျောင်းကို မှားကြဲတာဖြစ်နိုင်တယ်လို့ ဒေသခံတွေက ဆိုပါတယ်။

ရွှေပြည်ကျေးရွာအုပ်စုအတွင်းမှာတော့ အခုလေကြောင်းဗုံးကြဲတိုက်ခိုက်မှုဟာ ပထမဆုံးအကြိမ်ဖြစ်တယ်လို့ သိရပါတယ်။

မန္တလေးတိုင်း၊ စဥ့်ကူးမြို့နယ်ဟာ ၂‌၀၂၄ ဇူလိုင်လကတည်းက ပြည်သူ့ကာကွယ်ရေးတပ်ဖွဲ့တွေ သိမ်းပိုက်ထားတဲ့ မြို့နယ်တခုဖြစ်ပါတယ်။

သတင်း – မြတ်သော်တာ၊ စာတည်း – လင်းဇေ

စဉ့်ကူး၊ မေ ၂၊ ၂၀၂၃။

မန္တလေးတိုင်း၊ စဉ့်ကူးမြို့နယ်၊ ကြက်တူရွေးကျေးရွာက စစ်ကောင်စီလက်အောက်ခံ ပျူစောထီးခေါင်းဆောင်နေအိမ် ဧပြီလ ၃၀ ရက် နေ့လည်ပိုင်းအချိန်မှာ မီးရှို့ခံခဲ့ရတယ်လို့ဒေသခံတွေဆီက သိရပါတယ်။

အသက် ၅၀ နှစ်အရွယ် ပျူစောထီးခေါင်းဆောင် ဦးငမော်(ခ)သဲမော်ဟာ စဉ့်ကူးနယ်ထဲက စစ်ကောင်စီတပ်အတွင်းမှာ သွားရောက်ရှောင်တိမ်းနေတာဖြစ်ပြီး သူ့ရဲ့နေအိမ် မီးရှို့ခံရတာဖြစ်တယ်လို့ ဆိုပါတယ်။

“ငမော်က ဒလန်လုပ်နေတာကြာပြီ။ သူ့ကို ပကဖတွေက ဖမ်းဖို့လိုက်နေလို့ စစ်တပ်ထဲမှာ နေနေတယ်။ သူ့ အိမ်ကို ပကဖဘက်က မီးလာရှို့တာ၊ ဘေးကအိမ် ၂ လုံးပါ လောင်သွားတယ်” လို့ ရွာခံတဦးက မြေလတ်အသံကို ပြောပါတယ်။

အဲ့ဒီပျူစောထီးနေအိမ် မီးလောင်မှုကနေတဆင့် အနီးအနားက ဒေသခံတွေဖြစ်တဲ့ ဒေါ်သောင်းကြည်နဲ့ ဒေါ် မဌေး တို့ရဲ့ နေအိမ် ၂ လုံးပါ မီးလောင်ကျွမ်းခဲ့တယ်လို့ အဲ့ဒီရွာခံကဆက်ပြောပါတယ်။

အဲ့ဒီဖြစ်စဥ်နဲ့ပတ်သက်လို့ စဉ့်ကူးမြို့နယ် ပြည်သူ့ကာကွယ်ရေးတပ်ဖွဲ့(ပကဖ)မှ တာဝန်ရှိသူတဦးက ဦးငမော်ရဲ့နေအိမ်ကို တပ်ဖွဲ့ဝင် ၃ ဦးက မီးရှို့ခဲ့တာဟုတ်မှန်ပေမယ့် ပြည်သူတွေရဲ့နေအိမ်တွေကို မီးကူးစက်လောင်ကျွမ်းခဲ့တာ မရှိခဲ့ဘူးလို့ ပြောပါတယ်။

“ရဲဘော် ၃ ယောက်က စိတ်မထိန်းနိုင်လို့ မီးရှို့ခဲ့တာဆိုပြီးတော့ ဝန်ခံကြတယ်။ မီးရှို့ခဲ့လို့လည်း ပျူခေါင်းဆောင်တယောက်ရဲ့အိမ်ပဲ လောင်ကျွမ်းခဲ့တယ်။ အနီးအနားကအိမ်တွေ မလောင်ခဲ့ဘူး။ ကျနော်တို့ တပ်ဖွဲ့ဝင်တွေနဲ့ ရွာသားတွေပေါင်းပြီးတော့ မီးငြှိမ်းပေးခဲ့တာ” လို့ ဆိုပါတယ်။

လက်ရှိမှာ ပျူစောထီးခေါင်းဆောင် ဦးငမော် အနေနဲ့ သူ့ရဲ့မိသားစုတွေနဲ့အတူ စစ်ကောင်စီတပ်တခုမှာ ဝင်ရောက်ခိုလှုံနေတယ်လို့ သိရပါတယ်။

စာတည်း – ရင်ငြိမ်း

စဉ့်ကူး၊ ဖေဖော်ဝါရီ ၂၃၊ ၂၀၂၃။

မန္တလေးတိုင်း၊ စဉ့်ကူးမြို့နယ်၊ နွယ်ရုံနယ်‌မြေ ရဲစခန်းအတွင်းကို ဖေဖော်ဝါရီလ ၂၂ ရက် မနေ့နေ့လည် ၂ နာရီလောက်မှာ ဒရုန်းနဲ့ ဗုံးကြဲတိုက်ခိုက်ခဲ့တယ်လို့ ဗိုလ်လင်းယုန်အဖွဲ့ထံက သိရပါတယ်။

ရဲစခန်းအတွင်း ဒရုန်းနဲ့ ၂ ကြိမ် ဗုံးကြဲတိုက်ခိုက်ရာမှာ ရဲစခန်းအဆောက်အဦးအတွင်းကို ကျရောက်ပေါက်ကွဲခဲ့လို့ ရဲတပ်ဖွဲ့ဝင်တွေဘက်က လူနဲ့အဆောက်အဦးတွေ ထိခိုက်သေဆုံး၊ ဒဏ်ရာရတွေရှိခဲ့ပြီး စခန်းအတွင်းကနေ ပြန်လည် ပစ်ခတ်မှုတွေ ရှိခဲ့တယ်လို့ ဆိုပါတယ်။

“အားလုံး ၆ လုံး ကြဲချတာ၊ အဆောက်အဦးအတွင်းထဲတွေကို ကျတယ်။ ပထမ ၁ လုံး ၂ လုံး စကြဲတော့ ရဲစခန်းထဲကနေ ဒီကောင်တွေ ဘေးပတ်ဝန်းကျင်တွေကို အချက် ၂၀ လောက် ရမ်းသမ်းပစ်တယ်။ ထိခိုက်မှုက ရခ ၃ ကောင်‌သေပြီး ၂ ကောင် ပြင်းထန်ဒဏ်ရာနဲ့ ဆေးရုံသို့ပို့လိုက် ဆိုတာ စောင့်ကြည့်ရဲဘော်တွေက ပြန်ပြောလို့ သိရတယ်” လို့ အဖွဲ့ ခေါင်းဆောင် ဗိုလ်လင်းယုန်က မြေလတ်အသံကို ပြောပါတယ်။

အဲ့ဒီတိုက်ခိုက်မှုကို ဗိုလ်ကောင်းကင်တပ်ဖွဲ့ (ပြင်ဦးလွင်ခရိုင် ပ.က.ဖ)၊ ဗိုလ်လင်းယုန်တပ် ဖွဲ့ (ပြင်ဦးလွင်ခရိုင် ပ.က.ဖ)၊ စဉ့်ကူးမြို့နယ် (ပ.က.ဖ)၊ ဧရာဝတီပျံလွှား၊ Sky Hero (Madaya) ARDF တော်လှန်ရေးအင်အားစု၊ Peacock Warrior Force စတဲ့ တော်လှန်ရေးတပ်ဖွဲ့တွေပူးပေါင်းလုပ်ဆောင်ခဲ့တာ ဖြစ်တယ်လို့ သိရပါတယ်။

ဇန်နဝါရီလ ၅ ရက်နေ့ကလည်း သပိတ်ကျင်းမြို့နယ်ထဲက ချောင်းကြီးနယ်မြေ ရဲစခန်းကို ဗိုလ်လင်းယုန်အဖွဲ့နဲ့ ပူးပေါင်းမဟာမိတ်တပ်ဖွဲ့တွေ သွားရောက်တိုက်ခိုက်ခဲ့လို့ ရဲတပ်ဖွဲ့ဝင် ၅ ဦး သေဆုံးခဲ့တယ်လို့ ထုတ်ပြန်ထားပါတယ်။