စစ်သား

ပေါက်၊ ဖေဖော်ဝါရီ ၂၂၊ ၂၀၂၃။

မကွေးတိုင်း၊ ပေါက်မြို့နယ်၊ ကုက္ကိုလ်စုရွာရှိ စစ်သားနဲ့ ပျူစောထီးတွေရဲ့ တပ်စခန်းကို ဖေဖော်ဝါရီလ ၂၂ ရက် ဒီမနက် ၅ နာရီခန့်မှာ PDF တွေက ဝင်ရောက်တိုက်ခိုက်ပြီး စစ်သား၂ ဦးကို ရှင်းလင်းနိုင်ခဲ့တယ်လို့ သိရပါတယ်။

ခန့်မှန်းအင်အား ၃၀ ကျော်ရှိတဲ့ အဲ့ဒီတပ်စခန်းကို ကာကွယ်ရေးပူးပေါင်းတပ်ဖွဲ့ ၅ ဖွဲ့က ဝင်ရောက်တိုက်ခိုက်ခဲ့တာလို့ M7 People’s Defense Army မှ ဒုတပ်ရင်းမှူး ဗိုလ်မြတ်က ပြောပါတယ်။

“ကျနော်တို့ စခန်းထဲက ဘန်ကာတွေကို ဖြိုဖျက်ဖို့ လုပ်နေတဲ့အချိန်မှာ လေယာဥ်တစီးရောက်လာလို့ ပြန်ဆုတ်ခဲ့ရတယ်။ စကစနှစ်ယောက် သေတာကိုတော့ မျက်မြင်တွေ့ခဲ့ရတာ။ ဒဏ်ရာရသူတွေလည်း ရှိနိုင်တယ်။ လေယာဥ်သာ မရောက်လာခဲ့ရင် စခန်းကိုသိမ်းပိုက်နိုင်တယ်”လို့ ဆိုပါတယ်။

ဒီတိုက်ခိုက်မှုအတွင်း စစ်ကောင်စီဘက်က ထိခိုက်သေဆုံးသူ အရေအတွက် အတိအကျကိုတော့ မြေလတ်အသံက သီးခြားအတည်မပြုနိုင်သေးပါဘူး။

စခန်းကို ဝင်ရောက်တိုက်ခိုက်နေချိန် စစ်ကောင်စီဘက်မှ Mi35 ရဟတ်ယာဥ်တစီး စစ်ကူရောက်ရှိလာပြီး ၁၀ မိနစ်ကျော်ကြာ ပစ်ခတ်ခဲ့ပေမယ့် ရဲဘော်တွေ အထိအခိုက်မရှိပြန်ဆုတ်နိုင်ခဲ့တယ်လို့ ဗိုလ်မြတ်က ပြောပါတယ်။

ဒီတိုက်ခိုက်မှုကို မိုးကြိုးပြောက်ကျားတပ်ဖွဲ့၊ စစ်ဒေသ ၂၀၂ M7 PEOPLE’S DEFENSE ARMY၊ God Of Mying၊ ဗိုလ်စကား ပြောက်ကျားတပ်ဖွဲ့၊ ပေါက်မြို့နယ် တပ်ပေါင်းစုတွေက ပူးပေါင်းတိုက်ခိုက်ခဲ့တာ ဖြစ်ပါတယ်။

ပြီးခဲ့တဲ့ ဖေဖော်ဝါရီလ ၁၆ ရက်မှာလည်း ပုလဲမြို့ရဲစခန်းရဲ့ တောင်ဘက်ကို ကင်းလှည့်ထွက်လာတဲ့ စစ်အုပ်စုကို ဒေသခံကာကွယ်ရေးတပ်တွေက မိုင်းဆွဲတိုက်ခိုက်ခဲ့တဲ့အပြင် ၁ နာရီကြာ အပြန်အလှန်ပစ်ခတ်မှုလည်း ဖြစ်ခဲ့တာကြောင့် စစ်အုပ်ဘက်က ထိခိုက်သေဆုံးမှုတွေ ရှိခဲ့ပါသေးတယ်။

စစ်ကိုင်း၊ ဖေဖော်ဝါရီ ၁၅၊ ၂၀၂၃။

စစ်ကိုင်းတိုင်းဒေသကြီး၊ မုံရွာမြို့အဝင်ရပ်ကွက်ရှိ ရေဦးဆန်ဆိုင် စစ်ကောင်စီဂိတ်အနီး အသံမိုင်းကွဲတာကို လာထွက်ကြည့်တဲ့ စစ်ကောင်စီတပ်သား ၂ ဦး ပစ်ခတ်ခံရပြီး သေဆုံးသွားတယ်လို့ သိရပါတယ်။

ဖေဖော်ဝါရီလ ၁၄ ရက် မနေ့ည ၈ နာရီခန့်မှာ စစ်ကောင်စီဂိတ်က စစ်ကောင်စီတပ်သားတွေ လမ်းပေါ်ထွက်လာဖို့ ရေဦးလမ်းကြား၊ ကွမ်းသီးဆိုင်နားမှာ အသံမိုင်း ၂ လုံးကို ဟန်ပြခွဲခဲ့တယ်လို့ Monywa the Boys အဖွဲ့ခေါင်းဆောင် ဒေါနမောင်မောင်က ပြောပါတယ်။

“သူတို့ထွက်လာအောင် တမင်အသံမိုင်းခွဲခဲ့တာ။ အဲဒီမှာ စကစ တပ်သား ၂ ယောက် ထွက်လာတာ မြင်တော့ ဝိုင်းပစ်တာ။ အပစ်ခံရတဲ့နေရာမှာပဲ လဲကျသွားတာ မျက်မြင်ပါ။ ပစ်ပြီးတာနဲ့ ကျနော်တို့ဘက်က ပြန်ဆုတ်လာတယ်။ သူတို့ဘက်ကတော့ တရစပ် ပစ်ကျန်ခဲ့တယ်” လို့ ပြောပါတယ်။

အဲဒီတိုက်ခိုက်မှုကိုတော့ Monywa the Boys၊ မုံရွာခရိုင် ပြည်သူ့ကာကွယ်ရေးတပ်မတော် Chindwin Attack force၊ တပ်ရင်း ၂၊ တပ်ရင်း ၃၊ တပ်ရင်း ၄၊ အထူးစုံစမ်းစစ်ဆင်ရေး(Chindwin Attack force)၊ Spring Dove အဖွဲ့တွေက ပူးပေါင်းတိုက်ခိုက်ခဲ့တာဖြစ်ပါတယ်။

ပစ်ခတ်ခံရတဲ့ စစ်ကောင်စီတပ်သား ၂ ဦးဟာ နေရာမှာပဲ သေဆုံးသွားပြီး စစ်ကောင်စီဘက်က အလောင်းတွေကို ပြန်ကောက်သွားတယ်လို့ ဆိုပါတယ်။

ဖေဖော်ဝါရီလ ၁၃ ရက်နေ့က မုံရွာမြို့ရှိ အနောက်မြောက်တိုင်းစစ်ဌာနချုပ်ကို PDF တွေက ၁၂၀ မမတွေနဲ့ ပစ်ခတ်တိုက်ခိုက်ခဲ့ရာ လက်နက်ကြီးတွေဟာ အဆောင်တွေပေါ်ကို ကျရောက်ပေါက်ကွဲခဲ့ပါသေးတယ်။

စစ်ကိုင်း၊ ဖေဖော်ဝါရီ ၅၊ ၂၀၂၃။

စစ်ကိုင်းအခြေစိုက် တမခ ၃၃ ကထွက်လာတဲ့စစ်ကား ၁ စီး ဖေဖော်ဝါရီလ ၅ ရက်ဒီမနက်ပိုင်းမှာ မိုင်းဆွဲတိုက်ခိုက်ခံရပြီးနောက် ကားပေါ်လိုက်ပါလာတဲ့ စစ်သား ၂ ဦးသေဆုံးခဲ့တယ်လို့ သိရပါတယ်။

စစ်သားအင်အား ၃၀ ဝန်းကျင်ပါတဲ့အဲ့ဒီကားကို ရွာမနဲ့ နတ်ခရိုင်ရွာအကြားမှာ ဒီမနက် ၁၁ နာရီလောက်က မိုင်းဆွဲတိုက်ခိုက်ခဲ့တာလို့ Zero ပြောက်ကျားတပ်မဟာ တပ်ရင်း ၇-မြင်းခြံခရိုင်မှ တပ်ရင်းမှူးဗိုလ်သက်ကြီးက ပြောပါတယ်။

“ဒီနေ့မနက် ၁၁ နာရီအချိန် စစ်ကိုင်းတပ်မ ၃၃ ကနေထွက်လာတဲ့ စစ်*ကားကို ရွာမ နဲ့ နတ်ခရိုင်အကြား မိုင်းဆွဲလိုက်တယ်၊ မိုင်းဆွဲတဲ့အချိန် ကားကိုရပ်ပြီးလိုက်ပစ်တာ၊ လိုက်ပစ်တဲ့အချိန် လယ်ကွင်းထဲကနေ မိုင်း ၁ လုံး ထပ်ဆွဲလိုက်တယ်၊ ၂ ကောင်နေရာမှာတင် ပွဲချင်းပြီးသေသွားတယ်” လို့ ပြောပါတယ်။

ဒီတိုက်ခိုက်မှုကို Zero ပြောက်ကျားတပ်မဟာ တပ်ရင်း ၇-မြင်းခြံခရိုင်နဲ့ အတူသရဲနီးအဖွဲ့တို့က ပူးပေါင်းလုပ်ဆောင်ခဲ့တာ ဖြစ်ပါတယ်။

တိုက်ခိုက်မှုအတွင်း စစ်ကောင်စီဘက်ကသေဆုံးမှုတွေကိုတော့ လမ်းသွားပြည်သူအချို့ရဲ့ သတင်းပေးပို့ချက်တွေအရ အတည်ပြုနိုင်ခဲ့တာလို့ ကာကွယ်ရေးရဲဘော်တွေကဆိုပေမယ့် မြေလတ်အသံက သီးခြားအတည်မပြုနိုင်သေးပါဘူး။

ပြီးခဲ့တဲ့ ဖေဖော်ဝါရီလ ၄ ရက်နေ့ကလည်း မြင်းမူမြို့နယ်၊ မန္တလေး-မုံရွာလမ်းပေါ်ရှိ စစ်ကောင်စီတပ်စွဲထားတဲ့ ထီးဆောင်းရွာကို Zero ပြောက်ကျားတပ်မဟာ တပ်ရင်း ၇-မြင်းခြံခရိုင်အဖွဲ့က စခန်းသိမ်းဝင်ရောက်တိုက်ခိုက်ခဲ့ရာ စစ်သား ၁၅ ဦးသေဆုံးပြီး လက်နက်ခဲယမ်းတွေ သိမ်းဆည်းရမိခဲ့တယ်လို့ သိရပါတယ်။

မန္တလေး၊ ဒီဇင်ဘာ ၂၄၊ ၂၀၂၂။

မန္တလေးတိုင်း၊ ပြည်ကြီးတံခွန်မြို့နယ်၊ 62 x 117 လမ်းရှိ (ဃ)ရပ်ကွက်ရုံးအတွင်းဗုံးပေါက်ကွဲပြီး အဲ့ဒီရုံးမှာတပ်စွဲနေတဲ့ စစ်ကောင်စီတပ်သားတွေထဲက ၃ ဦး သေဆုံးခဲ့တယ်လို့ သိရပါတယ်။

ဒီဇင်ဘာလ ၂၃ ရက်မနေ့ည ၈ နာရီ ၄၅ မိနစ်လောက်မှာ အဲ့ဒီရုံးအတွင်းကို ဒေသခံကာကွယ်ရေးတပ်တွေက ဗုံးပစ်သွင်းတိုက်ခိုက်ခဲ့ပေမယ့် ချက်ချင်းပေါက်ကွဲမှုမရှိပဲ အဲ့ဒီဗုံးကို စစ်ကောင်စီတပ်သားတွေစစ်ဆေးနေချိန်ကျမှ ပေါက်ကွဲခဲ့တာလို့ Anonymous Force MDY တာဝန်ခံက မြေလတ်အသံကို ပြောပါတယ်။

“ဗုံးက error ဖြစ်ပြီး မပေါက်ကွဲဘူး။ ၉ နာရီလောက်မှာ စစ်သားတွေစစ်ဆေးနေချိန်မှာ ထပေါက်သွားတာ။ စစ်သား ၃ ကောင်သေတယ်။ ဘယ်စစ်တပ်ကလဲတော့အသေးစိတ်မသိရဘူး” လို့ ပြောပါတယ်။

အဲ့ဒီရုံးအတွင်းမှာ စစ်သား ၁၅ ဦး တပ်စွဲနေထိုင်နေတာဖြစ်ပြီး၊ တပ်တွင်းသတင်းပေးတွေရဲ့ ပြောပြချက်အရ ဒီပေါက်ကွဲမှုကြောင့် စစ်သား ၃ ဦး သေဆုံးခဲ့တယ်လို့လည်း ဆိုပါတယ်။

ဒီတိုက်ခိုက်မှုကို Anonymous Force MDY နဲ့ Brother Defense Force တို့ လုပ်ဆောင်ခဲ့တာဖြစ်ပြီး၊ ပြီးခဲ့တဲ့ ဒီဇင်ဘာလ ၁၄ ရက်ကလည်း ပြည်ကြီးတံခွန်မြို့နယ်ရှိ အဆင်မြင့်ရဲစခန်းဂိတ်ပေါက်ဝမှာ စောင့်နေတဲ့ ရဲတွေကို Anonymous Force MDY လက်ပစ်ဗုံးနဲ့ ပစ်ခတ်တိုက်ခိုက်ခဲ့ပါသေးတယ်။