ဒေသခံရိက္ခာတွေနဲ့ပစ္စည်းတွေပါယူသွားလို့ ကျပ်သိန်း ၁၀၀ ကျော်ဆုံးရှုံးနိုင်ဟုဆို

ပေါက်၊ ဩဂုတ် ၁၄၊ ၂၀၂၅။

မကွေးတိုင်း၊ ပေါက်မြို့နယ်က ရွာ ၁၀ ရွာကျော်ကို စစ်ကောင်စီတပ်က သြဂုတ် ၁၃ ရက် မနေ့ကစစ်ကြောင်းထိုးမွှေနှောက်ပြီး ဒေသခံအမျိုးသားတွေကိုလည်းဖမ်းဆီးသွားတယ်လို့ ပေါက်မြို့ဒေသခံဆီက သိရပါတယ်။

ပခုက္ကူအခြေစိုက်တပ်မ ၁၀၁ ကနေ ရိက္ခာယာဥ်တန်း ၁၀၀ ကျော်၊ အင်အား ၂၀၀ ဝန်းကျင်ပါတဲ့ စစ်ကြောင်းက ဆယ်၀ရွာ၊ ထန်းတောကုန်းရွာ၊ ပျဥ်းချောင်းရွာ၊ အောက်ကျင်းရွာ၊ ဆင်သေရွာ၊ ကျွန်းပင်စုရွာ၊ ငမို့လေးရွာ၊ ငမို့ကြီးရွာ၊ ရွှေလှံရွာ၊ မြင်းခြံကုန်းရွာ၊ ရေပြာရွာ၊ ဘုရားတောင်ရွာ၊ မကျီးစင်ရွာ၊ ညောင်ပင်သာရွာ၊ ဆယ်ပင်းရွာ၊ ဇီးတောရွာ၊ လယ်ဘဲ့ရွာ၊ ကျူတောရွာ၊ နတ်ဦးယဉ်ရွာနဲ့ သမားတော်ရွာ တို့ကိုဝင်ရောက်ခဲ့တာလို့ ဆိုပါတယ်။

“ရေပြာရွာနားအနီးတဝိုက်က ကျေးရွာ ၁၀ ရွာကျော်က ပစ္စည်းတွေသယ်သွားတာ၊ ဆန်အိတ်တွေ၊ မြေပဲ‌အိတ်တွေ၊ စက်ပစ္စည်းတွေ သယ်သွားတာ၊ ဆယ်ဝရွာက ပစ္စည်းတွေတော့ သယ်မသွားဘူး၊ ရွာကိုတော့ ဝင်မွှေသွားတယ်၊ ချက်ပြုတ်ပြီးလည်း စားသောက်သွားကြတယ်၊” လို့ ပေါက်မြို့ခံတဦး ကပြောပါတယ်။

ဒါ့အပြင် စစ်ကြောင်းဝင်ချိန် ဘုရားတောင်ရွာက အသက် ၃၀ နဲ့ ၄၀ ကျော်အရွယ် အမျိုးသား ၇ ဦးကိုလည်း ဖမ်းဆီးသွားပြီး ဒီနေ့ထိပြန်မလွတ်သေးဘူးလို့ ဆိုပါတယ်။

“မနေ့က ဘုရားတောင်ရွာကို စစ်ကြောင်းဝင်တာ၊ ပြည်သူ ၇ ဦးကို ဖမ်းသွားတယ်၊ အခုထိ ပြန်မလွှတ်သေးပါဘူး၊ ဖမ်းသွားတာက အမျိုးသားတွေပါ၊ ရွာထဲမှာတွေ့တာနဲ့ ဖမ်းသွားတာ၊ ဘာကြောင့် ဖမ်းတာလည်းတော့ မသိဘူး” လို့ ပေါက်မြို့ခံ ကိုလရောင်က ပြောပါတယ်။

အဆိုပါစစ်ကြောင်းဟာ ကျေးရွာတွေထဲကိုဝင်ချိန်မှာ နေအိမ်တွေကပစ္စည်းတွေနဲ့ ရိက္ခာတွေကိုသယ်ယူသွားတာကြောင့် အနည်းဆုံး စုစုပေါင်းကျပ်သိန်း ၁၀၀ ဝန်းကျင်လောက်ဆုံးရှုံးနိုင်တယ်လို့လည်းဆိုပါတယ်။

တော်လှန်ရေးတပ်တွေက လမ်းပိုင်းတွေဖြတ်တောက်ထားတာကြောင့် ပေါက်မြို့နယ်ထဲက ပျူစောထီး အားကောင်းတဲ့ရွာတွေမှာလည်း ရိက္ခာပြတ်လပ်နေတာတွေရှိပြီး စစ်ကောင်စီဘက်က လေကြောင်းကနေပဲ ရိက္ခာပို့ပေးနေရတယ်လို့ ကိုလရောင်က ပြောပါတယ်။

ခုလိုစစ်ကြောင်းထိုးနေတာကြောင့် အထက်ပါကျေးရွာတွေက ဒေသခံ ၁ သောင်းကျော်လည်း ထွက်ပြေးတိမ်းရှောင်နေကြရတယ်လို့ ဆိုပါတယ်။

လက်ရှိမှာတော့ အဲ့ဒီစစ်ကြောင်းနဲ့ ရိက္ခာယာဉ်တန်း ၁၀၀ ကျော်ဟာ ပေါက်မြို့နယ်၊ ရေပြာတံတားအနီးမှာ ယာဉ်တန်းနဲ့အတူ တပ်ဖြန့်ထားပြီး မိုင်းရှင်းလင်းရေးတွေ လုပ်နေတယ်လို့ သိရပါတယ်။

ဒါ့အပြင် ပေါက်မြို့နယ်၊ တိုက်တောရိုးရွာကို သြဂုတ် ၁၄ ရက် ဒီမနက် ၈ နာရီလောက်မှာ စစ်ကောင်စီတပ်က မီးရှို့ဖျက်ဆီးခဲ့တယ်လို့ ပေါက်မြို့ခံတွေဆီက သိရပါတယ်။

ဆိပ်ဖြူမြို့နယ်၊ ရွှေဘိုးကျွန်းရွာအခြေစိုက် ကပစ ၂၂ က အင်အား ၁၈၀ ဝန်းကျင်ပါစစ်ကောင်စီ စစ်ကြောင်းဟာ သြဂုတ် ၁၃ ရက်မနေ့ကမနက်ပိုင်းမှာ စတင်စစ်ကြောင်းထိုးလာခဲ့ပြီး သပြေ တောတိုက်မှာညအိပ်တပ်စွဲပြီးနောက် ဒီမနက်ပိုင်းမှ တိုက်တောရိုးရွာကိုဝင်ပြီး မီးရှို့ခဲ့တာလို့ ဆိုပါတယ်။

“တိုက်တောရိုးရွာကလည်း ပေါက်နယ်တောင်ပိုင်း နယ်စပ်မှာရှိတာ၊ မနက် ၈ နာရီထိုးလောက်မှာ ရွာထဲဝင်ပြီး ပြည်သူနေအိမ်တွေကို မီးရှို့သွားတယ်၊ နေအိမ်တော့ အတိအကျမရသေးဘူး၊ ရွာကတော့ သေးသေးလေးပဲ၊ တရွာလုံးပေါင်းမှ အိမ်ခြေ ၃၀ လောက်ရှိတာ”လို့ ပေါက်မြို့ခံတဦးက ပြောပါတယ်။

စစ်ကြောင်းဝင်လာတဲ့ လမ်းတလျောက်မှာလည်း ချောင်းဆုံရွာက ကားသမား ၁ ဦးကို ရိုက်နှက်ဖမ်းဆီးခဲ့ပြီး ချောင်းဆုံရွာလမ်းစုံအရောက်မှ ပြန်လွှတ်ခဲ့တယ်လို့ ဆိုပါတယ်။

ဒါ့အပြင် ချောင်းဆုံရွာလမ်းစုံမှာ ကင်းပုန်းဝပ်တပ်စွဲနေချိန်မှာလည်း လက်နက်ကြီးတွေနဲ့ ပစ်ခတ်တဲ့အတွက် သပြေတောတိုက်ရှိ ဒေသခံနေအိမ်ပေါ်ကျကာ မီးလောင်ပြီး နွား ၁ ကောင်သေဆုံးကာ ၂ ကောင် ထိခိုက်ခဲ့တယ်လို့ သိရပါတယ်။

လက်ရှိမှာစစ်ကြောင်းက ကပစ ၂၂ တပ်ထဲကို ပြန်ဝင်သွားတယ်လို့ သိရကာ ပြီးခဲ့တဲ့ ဩဂုတ် ၁၀ ရက်က လည်း ပေါက်မြို့နယ်အတွင်းက ရွာ ၁၂ ရွာကျော်ကို စစ်ကောင်စီတပ်က ဗုံး ၅၀ ကျော်ကြဲချတာကြောင့် ကလေးအပါအဝင် ၅ ဦး သေဆုံးခဲ့ပါသေးတယ်။

စာတည်း – လင်း

ဂန့်ဂေါ၊ သြဂုတ် ၄၊ ၂၀၂၅။

မကွေးတိုင်း၊ ဂန့်ဂေါမြို့နယ် ကျေးရွာ ၂ ရွာက ဒေသခံပြည်သူ ၁၀ ဦးကို စစ်ကောင်စီတပ်ဖွဲ့ဝင်တွေက စစ်ကြောင်းထိုးဝင်ရောက်ကာ ဖမ်းဆီးခေါ်ဆောင်သွားခဲ့တယ်လို့ ယောအလင်းတန်းအဖွဲ့မှ ကိုဘကောင်းဆီက သိရပါတယ်။

သြဂုတ် ၄ ရက် ဒီနေ့မနက် ၃ နာရီလောက်က ဂန့်ဂေါမြို့နယ်၊ ရှုံးရှီရွာနဲ့ အနောက်ဂန့်ဂေါရွာ ၂ ရွာကို ခလရ ၅၀ က ထွက်ခွာလာတဲ့ စစ်ကောင်စီတပ်ဖွဲ့ဝင်တွေနဲ့ ရှောက်ပင်ရွာမှာ ကင်းချထားတဲ့ စစ်ကောင်စီတပ်ဖွဲ့ဝင်တွေပူးပေါင်းပြီး စစ်ကြောင်းထိုးဝင်ရောက်ခဲ့တယ်လို့ သိရပါတယ်။

အဆိုပါကျေးရွာ ၂ ရွာကို လက်နက်ငယ်တွေနဲ့ ပစ်ခတ်ဝင်ရောက်ပြီးနောက် ပြည်သူ ၁၂ ဦးကို ဖမ်းဆီးကာ အဲ့ဒီထဲက အမျိုးသမီး ၂ ဦးကို ပြန်လည်လွှတ်ပေးခဲ့ပြီး ကျန် ၁၀ ဦးကိုတော့ ဖမ်းဆီးသွားခဲ့တယ်လို့ ဆိုပါတယ်။

“အဲ့ရွာ ၂ ရွာက အိမ်တွေပါ ဆက်နေတာဗျ။ သေနတ်တွေပစ်ပြီး ဝင်လာတုန်း ပြေးဖို့လုပ်တဲ့သူတွေကို ဖမ်းခေါ်သွားတယ် ကြားတယ်။ စစ်မှုထမ်းဖို့ ဖမ်းတာမျိုးတော့ မဟုတ်ဘူး။ ခုချိန်မှာ ကျားမ အရေအတွက်ကို ကျနော်တို့ဘက်က အတည်မပြုနိုင်သေးဘူးဗျ။ ဖုန်းလိုင်းအခက်ခဲကြောင့် ဘာမှ မသိရသေးတာဗျ။”လို့ ယောအလင်းတန်း ကိုဘကောင်းက မြေလတ်အသံကို ပြောပါတယ်။

ဒီမနက် ၆ နာရီခွဲလောက်မှာတော့ စစ်ကြောင်း ၂ ကြောင်းခွဲပြီး ကျေးရွာတွေကပြန်ဆုတ်ခွာသွားရာ ဖမ်းဆီးသွားသူတွေထဲက အမျိုးသမီး ၂ ဦးကို We love GanGaw ဆိုင်းဘုတ်အနီးက တံတားထိပ်မှာ ပြန်လည်လွှတ်ပေးခဲ့တယ်လို့ သူကဆက်ပြောပါတယ်။

“စစ်ကြောင်းက ၂ ကြောင်းခွဲ ဆုတ်သွားတာ။ ၁ ကြောင်းက ရှောက်ပင်ရွာထဲ ပြန်ဆုတ်သွားတယ်။ ၁ ကြောင်းကတော့ ခလရ ၅၀ ထဲက စစ်သားတွေဆိုတော့ စစ်ကား ၃ စီးနဲ့ We love GanGaw တံတားထိပ်မှာ လာကြိုသွားတယ်။”လို့ ကိုဘကောင်းက ပြောပါတယ်။

ကျန်ရှိတဲ့ ပြည်သူ ၁၀ ဦးကိုတော့ စစ်ကားပေါ် တင်ဆောင်ကာ ဂန့်ဂေါမြို့အတွင်းသို့ ဖမ်းဆီး ခေါ်ဆောင်သွားပြီး သြဂုတ် ၄ ရက် ဒီညနေပိုင်းအထိ ပြန်လည်လွတ်မြောက်လာတာ မရှိသေးဘူးလို့ သိရပါတယ်။

စာတည်း – လင်း

ညောင်ဦး၊ ဇူလိုင် ၁၀၊ ၂၀၂၅။

မန္တလေးတိုင်း၊ ညောင်ဦးမြို့နယ်ထဲက ကျေးရွာ ၆ ရွာကို စစ်ကောင်စီစစ်ကြောင်းက မီးရှို့ပြီး နေအိမ်တွေကိုဖျက်ဆီးနေတာကြောင့် ဒေသခံ ၂ သောင်းကျော် ထွက်ပြေးနေရတယ်လို့ ဒေသခံတွေဆီက သိရပါတယ်။

ဇူလိုင် ၈ ရက်မနက် ၉ နာရီကျော်မှာ တောင်ဇင်းကျေးရွာရဲစခန်းကနေ အင်အား ၁၅၀ ခန့်ပါ စစ်ကြောင်းက ချောင်းရှည်၊ အနောက်အုံ၊ ယာတောကြီးကျေးရွာတွေကို မီးရှို့ခဲ့ပြီး ယာတောကြီးရွာမှာ စခန်းချညအိပ်ခဲ့တယ်လို့ ဆိုပါတယ်။

အဲဒီနောက် ဇူလိုင် ၉ ရက်မနက်မှာ ကျောက်ပြင်ကန်၊ ဇီးစမြင်၊ မြောင်ကျေးရွာတွေကို ဆက်လက်မီးရှို့ခဲ့ပြီး မြောင်ကျေးရွာမှာတပ်စွဲထားကာ ဇူလိုင် ၁၀ ရက်မနက် ၈ နာရီခန့်မှာ မြောင်ကနေတဆင့် ကန်သာရွာဘက်ကို ဆက်လက်ထွက်ခွာသွားတယ်လို့ ဆိုပါတယ်။

“ဒီနားမှာက ဆိုးဆိုးဝါးဝါး တိုက်ပွဲကြီးဘာညာဆိုတာလည်း မရှိဘူး။ အဲဒီရွာဘက်တွေမှာ သူတို့(စကစ) ရဲဘော်တွေ အများကြီးကျတာမရှိဘူး။ ပစ်ပြေးနဲ့ မိုင်းဆွဲတာလောက်ပဲ ရှိတာ။ အဲဒါကို သက်သက်လာ ရှို့တာ”လို့ ဒေသခံတဦးက ပြောပါတယ်။

မီးရှို့ခံရလို့ ချောင်းရှည်ရွာက နေအိမ် ၁၂ လုံးနဲ့ စာသင်ကျောင်း ၂ ကျောင်း၊ အနောက်အုံရွာက နေအိမ် ၁ လုံး၊ ကျောက်ပြင်ကန်ရွာက အိမ် ၁၀ လုံး၊ ယာတောကြီးရွာက အိမ် ၁၀ လုံးခန့်၊ ဇီးစမြင်ရွာက ၁၅ လုံးခန်နဲ့ မြောင်ရွာက အခြေနေကိုတော့ စုံစမ်းနေဆဲဖြစ်တယ်လို့ ဆိုပါတယ်။

စစ်ကြောင်းဝင်မီးရှို့နေလို့ အိမ်ခြေ ၁၀၀ ကျော်ကနေ ၅၀၀ ခန့်ရှိတဲ့ ရွာတွေဖြစ်တဲ့ ချောင်းရှည်၊ ယာတောကြီး၊ ဇီးစမြင်၊ ကျောက်ပြင်ကန်၊ ဂျိုးကန်၊ စခါး၊ မြောင်၊ ရွှေကဖြူ၊ ကြအို၊ မြေသန့်တောင်၊ မအူပင်၊ ပျော်ဘွယ်၊ ရွာသာ၊ ညောင်လှ၊ ပြင်းချောင်း၊ လယ်ကန်၊ ကန်သာ၊ ကံကြီးကုန်းရွာတွေအပါအဝင် ဒေသခံ ၂ သောင်းကျော်လောက် ထွက်ပြေးနေရတယ်လို့ သိရပါတယ်။

ပြီးခဲ့တဲ့ ဇူလိုင် ၁ ရက်ကလည်း စစ်ကောင်စီစစ်ကြောင်းက မောင်းဂွက်တောနဲ့ ရွာပုလဲ ကျေးရွာတို့ကိုမီးရှို့ခဲ့ရာ နေအိမ် ၃၀ ကျော်မီးလောင်ပျက်စီးခဲ့ပြီး ဒေသခံ ၁,၅၀၀၀ ကျော် ထွက်ပြေးခဲ့ရပါသေးတယ်။

စာတည်း – လင်း

စလင်း၊ ဇွန် ၂၉၊ ၂၀၂၅။

မကွေးတိုင်း၊ စလင်းမြို့နယ်၊ ပန်းတိမ်ကုန်းရွာကို စစ်ကောင်စီတပ်ဖွဲ့ဝင်တွေက ဇွန် ၂၉ ရက် နေ့လယ်ပိုင်းမှာဝင်ရောက်ပြီး ရွာကိုမီးရှို့ဖျက်ဆီးနေတယ်လို့ စလင်းမြို့ခံတွေဆီက သိရပါတယ်။

အမြောက်နဲ့သံချပ်ကာကား ၅ စီးအပါ တပ်ဖွဲ့ဝင်အင်အား ၁၀၀ ခန့်ပါစစ်ကြောင်းက အိမ်ခြေ ၂၀၀၊ အိမ်ထောင်စု ၂၀၀ ရှိတဲ့ ပန်းတိမ်ကုန်းရွာကို ဒီညနေပိုင်းအထိ မီးရှို့နေတာကြောင့် ပျက်စီးဆုံးရှုံးမှုမသိရသေးဘူးလို့ ဆိုပါတယ်။

“ပန်းတိမ်ကုန်းရွာထဲဝင်တာက နေ့လယ် ၁၀ နာရီလောက်ကဝင်တာ၊ ကနဦးစရှို့တာက ကောက်ရိုးပုံကို ရှို့တာ၊ လွန်ခဲ့တဲ့ ၁ နာရီလောက်ကတော့ ရွာကိုရှို့နေပါတယ်၊ မီး‌ရှို့ခံရတဲ့ အိမ်ခြေကတော့ အတည်ပြုလို့ မရသေးပါဘူး၊ အခုအချိန်ထိ စစ်တပ်မီးရှို့နေတုန်းပါ၊” လို့ စလင်းမြို့ခံတဦးက ပြောပါတယ်။

ဒါ့အပြင် ဒီညနေပိုင်းမှာပဲ ကြည်တော်စုရွာက အသက် ၁၈ နှစ် အရွယ် စိတ်ကျန်းမာရေးချို့တဲ့သူ ကိုဖိုးထူးကိုပစ်သတ်ခဲ့သေးတယ်လို့ ဆိုပါတယ်။

အဲ့ဒီစစ်ကြောင်းဟာ ဇွန် ၂၈ ရက် မနေ့ကလည်း မြောင်းမကုန်းရွာမှာစခန်းချပြီး ရွာသား ၂ ဦးကိုဖမ်းဆီး ကာ ဒေါ်အောင်ဆန်းစုကြည်ပုံတက်တူးထိုးထားတဲ့နေရာတွေကို ဓါးနဲ့မွန်းပြီး ပြန်လွှတ်ပေးခဲ့တယ်လို့ သူကဆက်ပြောပါတယ်။

“အဲ့ဒီစစ်တပ်က မနေ့ကတဲ့က ဂုံကုန်းရွာဘက်မှာ ကားတွေထားပြီး ဆည်မြောင်းဘောင်လမ်းအတိုင်း တက်လာတာ၊ မနေ့က တောတွင်ရွာထဲဝင်ပြီးတော့ မွှေနှောက်သွားတယ်၊ နောက်တခါ မြောင်းမကုန်းရွာကထွေအုပ်စာရေးအိမ်မှာ စစ်ကြောင်းကစခန်းချပြီးတော့နေတယ်၊ ရွာသား ၂ ဦးကိုလည်း ဖမ်းတယ်၊ သူတို့က ရင်ဘတ်မှာ အမေစုပုံထိုးထားတယ်၊ အဲ့ဒီနေရာကိုလည်း ဓါးနဲ့မွှန်းသွားတယ်”လို့ စလင်းမြို့ခံ အမျိုးသမီးတဦးက ပြောပါတယ်။

ဒါ့အပြင် ဒီမနက်ပိုင်းမှာလည်း မိုးဝန်းရွာကနေ သရက်ချဥ်ရွာကိုသွားချိန်လမ်းမှာတွေ့တဲ့ မိုးဝန်းရွာသား ၅ ဦးကိုဖမ်းဆီးကာ သရက်ချဥ်ရွာအရောက်မှာပြန်လွှတ်ပေးခဲ့ပြီး ပန်းတိမ်းကုန်းရွာဘက်ကိုဆက်လက် စစ်ကြောင်းထိုးလာချိန်မှာလည်း နောက်ထပ်ဒေသခံ ၄ ဦးထပ်မံဖမ်းဆီးခဲ့ကာ လက်ရှိအချိန်ထိ ပြန်မလွှတ်သေးဘူးလို့ ဆိုပါတယ်။

ခုလို စစ်ကြောင်းထိုးမီးရှို့နေတာကြောင့် ဂုံကုန်းရွာ၊ ကျက်သကိုင်ရွာ၊ မင်းတဲရွာ၊ ပေါင်လောင်ရွာ၊ တပ်ပြင်ရွာ၊ သာစည်ရွာ၊ မြောင်းမကုန်းရွာ၊ မိုးဝန်းရွာ၊ သရက်ချဉ်ရွာ၊ ပန်းတိမ်ကုန်း၊ ကျီးသိုက်ရွာ၊ ကညှပ်ရွာ တို့က ဒေသခံ ၅,၀၀၀ ကျော်လည်း ဘေးလွတ်ရာကို ထွက်ပြေးတိမ်းရှောင်နေကြရတယ်လို့ သိရပါတယ်။

စာတည်း – လင်း