ကန့်ဘလူ၊ မတ် ၅၊ ၂၀၂၅။

စစ်ကိုင်းတိုင်း၊ ကန့်ဘလူမြို့နယ်၊ ကာဘိုးကျေးရွာမှာ စစ်ကောင်စီစစ်ကိုင်းတိုင်းဝန်ကြီးချုပ် ဦးမြတ်ကျော်ရဲ့ခယ်မ အပါအဝင် ၆ ဦးဖမ်းဆီးခံရတယ်လို့ ကာဘိုးတိုက်နယ်ဒေသကာကွယ်ရေးအဖွဲ့ဝင်တဦးထံက သိရပါတယ်။

မတ် ၃ ရက် မနက် ၉ နာရီခန့်မှာ စစ်ကောင်စီအင်အား ၂၀ ကျော်လောက်က ကျေးရွာထဲကို ကားတွေနဲ့ဝင်လာပြီး ဦးမြတ်ကျော်ရဲ့ ခယ်မဖြစ်သူ ဒေါ်ကေသီ ၊ ကိုအောင်ကျော်၊ ဦးမျိုးဝင်းမောင်၊ ဒေါ်ဝင်းတင့်နဲ့ နောက်ထပ်အမျိုးသမီး ၂ ဦး စုစုပေါင်း ၆ ဦးကို ၎င်းတို့ရဲ့နေအိမ်တွေကနေ အသီးသီးဖမ်းဆီးခေါ်ဆောင်သွားတာလို့ ဆိုပါတယ်။

“သူတို့ဘက်က မသင်္ကာဘူးဆိုပြီး လာဖမ်းသွားတာပဲ။ ကာဘိုးက စကစကုန်းရှိတယ် တပ်စွဲထားတာ။ ဖမ်းခံရတဲ့ရွာခံအချို့လည်း သာမန်ဒေသခံတွေပဲ။ အရက်ရောင်းတာ၊ လက်ဖက်ရည်ရောင်းတာတွေပဲ။”လို့ ကာဘိုးတိုက်နယ် ဒေသကာကွယ်ရေးတာဝန်ရှိသူတဦးက မြေလတ်အသံကို ပြောပါတယ်။

ဖမ်းဆီးခံရသူတွေထဲမှာ အမည်မသိအမျိုးသမီး ၂ ဦးက အရပ်သားအစိုးရလက်ထက် စစ်ကိုင်းတိုင်းဝန်ကြီးချုပ် ဒေါက်တာမြင့်နိုင်ရဲ့ ဇနီး ဒေါ်ရီခင်နဲ့သမီးဖြစ်သူတို့ဖြစ်တယ်လို့ သတင်းတွေ ထွက်ပေါ်နေပြီး အတည်ပြုနိုင်ဖို့စုံစမ်းနေတယ်လို့ သူကဆက်ပြောပါတယ်။

စစ်ကောင်စီအဖွဲ့ဝင်တွေဟာ ဖမ်းဆီးထားသူ ၆ ဦးကို ကန့်ဘလူမြို့အခြေစိုက် ၆၀၀၆ တင့်ကားတပ်ထဲကိုခေါ်ဆောင်သွားခဲ့တာဖြစ်ပြီး မတ် ၅ ရက် ဒီကနေ့ နေ့လယ်ပိုင်းအထိ ဖမ်းဆီးခံရသူတွေနဲ့အဆက်အသွယ်မရဘူးလို့ ဆိုပါတယ်။

ကာဘိုးကျေးရွာဟာ စစ်ကောင်စီခန့်စစ်ကိုင်းတိုင်းဝန်ကြီးချုပ် ဦးမြတ်ကျော်ရဲ့ ဇာတိကျေးရွာဖြစ်ပြီး အဆိုပါကျေးရွာကို စစ်ကောင်စီတပ်က ထိန်းချုပ်ထားကာ ကျေးရွာထဲမှာ စစ်ကောင်စီတပ်အင်အား ၅၀ ကျော်နဲ့ စခန်းအထိုင်ချတပ်ဆွဲထားတယ်လို့ သိရပါတယ်။

ဖေဖော်ဝါရီ ၂၃ ရက်ကလည်း ငှက်ပျောတိုင်းကျေးရွာမှာတပ်စွဲထားတဲ့ စစ်ကောင်စီတပ်ဖွဲ့ဝင် ၁၅ ဦးခန့်က ငှက်ပျောတိုင်း-ကျေးပင်အက်လမ်းအတိုင်း ကင်းလှည့်နေစဥ် ရွှေကပ်ကျော် ဘုရားအနီးမှာ လူ ၇ ဦးကို ဖမ်းဆီးခဲ့ပြီး ၄ ဦးကို သေနတ်နဲ့ပစ်သတ်ခဲ့တယ်လို့ သိရပါတယ်။

စာတည်း – ဟိန်းစံ

ကန့်ဘလူ၊ ဖေဖော်ဝါရီ ၂၄၊ ၂၀၂၅။

စစ်ကိုင်းတိုင်း၊ ကန့်ဘလူမြို့နယ်၊ ငှက်ပျောတိုင်းကျေးရွာနဲ့ ကျေးပင်အက်ကျေးရွာသွားလမ်းပိုင်းမှာ ကျေးရွာပြည်သူ့ကာကွယ်ရေးအဖွဲ့ ဒုတာဝန်ခံအပါအဝင် ၄ ဦးကို စစ်ကောင်စီအဖွဲ့ဝင်တွေက ဖမ်းဆီးပစ်သတ်ခဲ့တယ်လို့ ကန့်ဘလူမြို့နယ်ပြည်သူ့ကာကွယ်ရေးအဖွဲ့ဆီက သိရပါတယ်။

ဖေဖော်ဝါရီ ၂၃ ရက်နေ့လယ် ၁၂ နာရီကျော်မှာ ငှက်ပျောတိုင်းကျေးရွာမှာတပ်စွဲထားတဲ့ စစ်ကောင်စီတပ်ဖွဲ့ဝင် အင်အား ၁၅ ဦးခန့်ဟာ ငှက်ပျောတိုင်း-ကျေးပင်အက်လမ်းပိုင်းမှာ ကင်းလှည့်နေချိန် ရွှေကပ်ကျော်ဘုရားအနီးမှာ ငှက်ပျောတိုင်းရွာပကဖဒုတာဝန်ခံနဲ့ အမျိုးသား ၆ ဦးကို ဖမ်းဆီးခဲ့တာလို့ ဆိုပါတယ်။

“ဘုရားနားလေးမှာ တဲတိုက်လေးတွေရှိတယ်။ အဲ့နားလေးက ပြည်သူတွေမိတဲ့အခါကျတော့ အဲနားလေးမှာ ဆေဗ့်မဖြစ်တဲ့သူတွေကို သတ်တာ။ ဘုရားနား တဲတန်းလေးတွေနားမှာ ဖြစ်တာ။ သေဆုံးက ၄ ယောက်။ အဖမ်းခံထားရသူတွေလည်း ပြန်လွတ်တယ်ကြားတယ်။”လို့ ကန့်ဘလူမြို့နယ်ပြည်သူ့ကာကွယ်ရေးအဖွဲ့ပြန်ကြားရေးတာဝန်ခံက ပြောပါတယ်။

သေဆုံးသူတွေနဲ့အတူ အဖမ်းခံလိုက်ရတဲ့ အမျိုးသား ၃ ဦးနဲ့ပတ်သက်တဲ့အခြေအနေတွေကိုတော့ အတည်မပြုနိုင်သေးပေးဘဲ ပြန်လွှတ်လိုက်တဲ့သတင်းတွေတော့ထွက်နေတယ်လို့ ဆိုပါတယ်။

အသတ်ခံရသူတွေဟာ ငှက်ပျောတိုင်းကျေးရွာပကဖ ဒုတာဝန်ခံ အသက် ၂၇ နှစ်အရွယ်ရှိ ရဲထွန်း၊ တော်လှန်ရေးအဖွဲ့နဲ့ဆက်စပ်မှုရှိသူ အသက် ၄၅ နှစ်ခန့်ရှိ ကိုဝင်းဇော်၊ ငှက်ပျောတိုင်ရွာသား အသက် ၁၆ နှစ်အရွယ် ဉာဏ်လင်းအောင်၊ နောက်ထပ်အသက် ၃၀ အရွယ်အမျိုးသား ၁ ဦးတို့ဖြစ်တယ်လို့ ဆိုပါတယ်။

“ရဲထွန်းက လူစိမ်းတွေမြင်လို့ဆိုပြီး လိုက်တာ။ သူတို့(စကစ)အဖွဲ့ဝင်တွေကလည်း အရပ်ဝတ် အရပ်စားနဲ့လာကြတာကိုး။ ဘေးမှာ ကင်းပုန်းဝပ်နေတဲ့ကောင်တွေလည်း ရှိသေးတာကိုး။ သူက ဆိုင်ကယ်နဲ့လိုက်ရင်း အနောက်ကို ပြန်အလှည့်မှာ ပိတ်ဖမ်းခံလိုက်ရတာ”လို့ သူကဆက်ပြောပါတယ်။

အဆိုပါ စစ်ကောင်စီအဖွဲ့ဝင်တွေဟာ ဖေဖော်ဝါရီ ၁၉ ရက်ကတည်းက ပေကြီးရွာဘက်ကနေ ငှက်ပျောတိုင်းကျေးရွာဘက်ကိုရောက်ရှိလာပြီး တပ်စွဲနေထိုင်နေတဲ့ အင်အား ၂၀၀ ခန့်ထဲက အဖွဲ့ဝင်အချို့ဖြစ်ကာ ပစ်ခတ်ပြီးနောက် ငှက်ပျောတိုင်းကျေးရွာဘက်ကို ပြန်ဝင်သွားတယ်လို့ ဆိုပါတယ်။

အလောင်းတွေကိုတော့ ဒေသခံတွေကကောက်ယူပြီး နေ့ချင်းနာရေးပြုလုပ်လိုက်တယ်လို့ ကန့်ဘလူမြို့နယ်ပြည်သူ့ကာကွယ်ရေးအဖွဲ့ပြန်ကြားရေးတာဝန်ခံက ပြောပါတယ်။

ဖေဖော်ဝါရီ ၂၀ ရက်နဲ့ ၂၁ ရက်ကလည်း အဲ့ဒီစစ်ကောင်စီအဖွဲ့တွေနဲ့ ဒေသခံကာကွယ်ရေးတပ်တို့ တိုက်ပွဲဖြစ်ခဲ့ပြီး ဒေသကာကွယ်ရေးပူးပေါင်းတပ်တွေဘက်က ၂ ဦးထိခိုက်ကာ စစ်ကောင်စီတပ်ဖွဲ့ဝင်တွေဘက်က ၄ ဦးသေဆုံးပြီး ၁၂ ဦးဒဏ်ရာရထားတယ်လို့ သိရပါတယ်။

စာတည်း – လင်း

ကန့်ဘလူ၊ ဖေဖော်ဝါရီ ၂၃၊ ၂၀၂၅။

စစ်ကိုင်းတိုင်း၊ ကန့်ဘလူမြို့နယ် ပလဖအချုပ်စခန်းတခုမှာ ချုပ်နှောင်ခံထားရတဲ့ အကျဉ်းသူတွေအပေါ် လိင်ပိုင်းဆိုင်ရာကျူးလွန်မှုနဲ့ ရာထူးကနေယာယီရပ်နားခံထားရတဲ့ ကန့်ဘလူခရိုင်နဲ့ မြို့နယ်ပြည်သူ့အုပ်ချုပ်ရေးအဖွဲ့ခေါင်းဆောင် ဦးမဲခေါင် ထွက်ပြေးလွတ်မြောက်နေတယ်လို့ ဒေသခံတွေဆီက သိရပါတယ်။

ဖေဖော်ဝါရီ ၂၂ရက် မနေ့နေ့လယ်ပိုင်းမှာ ရာထူးမှယာယီရပ်နားပြီးနောက် အကျယ််ချုပ်အဖြစ်ထားရှိတဲ့နေရာကနေ ၎င်းနဲ့အတူ လိင်ပိုင်းဆိုင်ရာကျူးလွန်မှုမှာပါဝင်သူတဦးလည်း ထွက်ပြေးလွတ်မြောက်သွားတယ်လို့ ဆိုပါတယ်။

“ အောင်ဇေယျလည်း ပါသွားတယ်။ အကျယ်ချုပ်ပုံစံမျိုး ဒီတိုင်းပဲလွှတ်ထားတာ။ ခုကျတော့အပေါ်ကနေ ဖမ်းမိန့်ကျလာတယ်။ ကျလာတော့ လိုက်သွားတာ ဟိုကျတော့ ၂ ယောက်လုံး မရှိတော့ဘူး၊ အခုထိ မမိသေးဘူး။ ကျနော်ထင်တာတော့ အပေါ်ကဖမ်းမိန့်ကျတယ်ဆိုထဲက ကြိုတင်ရှောင်ဖြစ်သွားတာထင်တာပဲ။ ဒီလောက်မြန်မြန်ရှောင်နိုင်တာက။”လို့ ကန့်ဘလူအခြေစိုက် PDFတပ်ရင်းတွေနဲ့ နီးစပ်သူတဦးက ပြောပါတယ်။

ကန့်ဘလူမြို့နယ် ပလဖလက်အောက်အချုပ်ခန်းတွေက အချုပ်သူအမျိုးသမီးတွေကို ပသုံးလုံးခေါင်းဆောင်တွေက လိင်အကြမ်းဖက်မှုတွေ ကျူးလွန်ခဲ့ကြောင်းနဲ့ အဆိုပါကျူးလွန်မှုတွေအပေါ် အမျိုးသားညီညွတ်ရေးအစိုးရ NUG က တာဝန်ခံရမှာဖြစ်ကြောင်း ပြီးခဲ့တဲ့ဇန်နဝါရီလအတွင်း သတင်းမီဒီယာတွေမှာ သတင်းဆောင်းပါးဖော်ပြခံခဲ့ရပြီးနောက် NUG ဘက်က ကန့်ဘလူပအဖတာဝန်ခံနဲ့ အဖွဲ့ဝင် ၃ ဦးကို ရာထူးက ယာယီရပ်နားခဲ့တာပါ။

သတင်းမီဒီယာတွေရဲ့ ဖော်ပြချက်တွေအရ ကန့်ဘလူခရိုင်နဲ့ မြို့နယ်ပြည်သူ့အုပ်ချုပ်ရေးအဖွဲ့ခေါင်းဆောင် ဦးမဲခေါင်၊ ပလဖစခန်းမှူးဟောင်း ဦးရဲရင့်၊ ပလဖစစ်ရေးပြသင်တန်းမှူး ဦးအာကာနဲ့ ဦးရဲရင့်နေရာမှာ အစားထိုးရောက်လာတဲ့ စခန်းမှူး ဦးအောင်ဇေယျတို့ ၄ ဦးဟာ ၂၀၂၃ နဲ့ ၂၀၂၄ အတွင်း ပလဖအချုပ်ခန်းတွေအတွင်း ချုပ်နှောင်ခံထားရတဲ့ အကျဉ်းသူအမျိုးသမီး ၄ ဦးကို လိင်အကြမ်းဖက်မှုတွေ ကျူးလွန်ခဲ့တယ်လို့ ဆိုပါတယ်။

အဆိုပါဖြစ်စဉ်တွေနဲ့ပတ်သက်ပြီး ကျူးလွန်သူတွေကို NUG ပြည်ထဲရေးဝန်ကြီးဌာနရဲ့ဗဟိုတိုင်ကြားစာကော်မတီကနေ အွန်လိုင်းကတဆင့်စစ်ဆေးခဲ့သလို မြေပြင်မှာလည်းစစ်ဆေးရေးအဖွဲ့ ဖွဲ့စည်းပြီး ရဲချုပ်ကိုယ်တိုင် စစ်ဆေးဆောင်ရွက်နေတယ်လို့ ဖေဖော်ဝါရီ ၁၈ ရက်မှာ ထုတ်လွှင့်ခဲ့တဲ့ “ပြည်သူလူထုနှင့် နိုင်ငံတကာသို့ သတင်းစကားပြောကြားခြင်း” အစီအစဉ်မှာ သမ္မတရုံးရဲ့ပြောရေးဆိုခွင့်ရှိသူ ဦးကျော်ဇော်က ပြောဆိုခဲ့ပါတယ်။

ကန့်ဘလူမြို့နယ် ပြည်သူ့အုပ်ချုပ်ရေးအဖွဲ့ခေါင်းဆောင် ဦးမဲခေါင်နဲ့ အဖွဲ့ဝင် ၃ ဦးကို တာဝန်ကယာယီရပ်ဆိုင်းထားသလို နစ်နာသူ အချုပ်သူအမျိုးသမီးတွေကိုလည်း လုံခြုံတဲ့နေရာတွေကို ရွှေ့ပြောင်းပေးထားတယ်လို့ အဲ့ဒီနေ့ အစီအစ​ဉ်မှာ ပြောဆိုထားပါတယ်။

မြေပြင်ရဲဘော်နဲ့ ပြည်သူတချို့ကလည်း ဦးမဲခေါင် ထွက်ပြေးလွတ်မြောက်သွားတာဟာ မှန်ကန်ပြီး နယ်မြေခံအဖွဲ့အစည်းတွေက ပြန်လည်ဖမ်းဆီးရမိရေး လုပ်ဆောင်နေကြတယ်လို့ ဆိုပါတယ်။

“သက်ဆိုင်ရာတွေ အဖွဲ့အစည်းတွေရော အသိပေးထားပြီးတော့ တွေ့တဲ့နေရာမှာ ထိန်းသိမ်းဖို့တော့လုပ်နေကြတယ်၊ လောလောဆယ်ထိတော့ မမိသေးပါဘူး။”လို့ အမည်မဖော်လိုတဲ့ ကန့်ဘလူဒေသခံတဦးက ပြောပါတယ်။

မြေလတ်အသံ၊ မတ် ၁၇၊ ၂၀၂၃။

စစ်ကိုင်းတိုင်း၊ ကန့်ဘလူမြို့နယ်၊ ခါးတောက်ရင်းရွာမှာ စစ်ရှောင်နေရလို့ ရွာသားတွေ နေထိုင်ခြင်းမရှိတော့တဲ့ အိမ်တွေကိုဖျက်ပြီး စစ်ကောင်စီတပ်တွေက အထိုင်စခန်းချဖို့ လုပ်ဆောင်နေတယ်လို့ သိရပါတယ်။

ပြီးခဲ့တဲ့မတ်လ ၁၃ ရက်က ယင်းသာရွာနဲ့ ခါးတောက်ရင်းရွာမှာ ပျူစောထီးသင်တန်းဆင်းပွဲ ပြုလုပ်ခဲ့ပြီးနောက် အခုလိုရွာမှာ အထိုင်ချဖို့ လုပ်ဆောင်နေတာ ဖြစ်တယ်လို့ ဆိုပါတယ်။

“ရွာက လူမနေတဲ့အိမ်တွေကိုဖျက်ပြီး အဲ့ရွာမှာ စခန်းချမလို့တဲ့။ သူတို့စခန်းဆောက်ဖို့ ရွာထဲက တအိမ် ၅ သောင်းကောက်တယ်။ မပေးတဲ့အိမ်ဆို ခေါ်ရိုက်တာ။ တပတ်အတွင်းမပေးရင် မိသားစုလိုက်သတ်မယ် ပြောတယ်။ အိမ်ဖျက်တာတောင် သူတို့မဖျက်ဘူး။ ရွာသားတွေကို ခိုင်းတာ။ လစဥ်ငွေကောက်တာ ခံရတော့မယ်ထင်တယ်” လို့ ရွာနီးစပ်ဒေသခံတဦးက ပြောပါတယ်။

အခုလက်ရှိအချိန်ထိ စစ်သားနဲ့ပျူစောထီးအဖွဲ့တွေဟာ မှော်တော်ရွာနဲ့ ကိုင်းရိုးရွာဘက်မှာ နေထိုင်နေပြီး ခါးထောက်ရင်းရွာကို ထပ်မံတပ်စွဲဖို့ လုပ်နေကြတာဖြစ်သလို မှော်တော်ရွာအနီးက ကျေးရွာတွေကိုလည်း ချိန်းခြောက်ပြီး မီးကြေးကောက်ခံတာတွေ လုပ်လေ့ရှိတယ်လို့ ဆိုပါတယ်။

ကန့်ဘလူနဲ့ ကျွန်းလှနယ်တွေမှာရှိတဲ့ ကျေးရွာတွေကို ပျူစောထီးခေါင်းဆောင်ဖြစ်တဲ့ ဘုန်းကြီးဝါသဝက ဦးဆောင်ကာ ပျူစောထီးသင်တန်းတက်ခိုင်းတာတွေ၊ ရွာတွေမှာ အထိုင်ချတပ်စွဲတာတွေလည်း လုပ်လေ့ရှိပြီး ကန့်ဘလူနယ်ထဲက ကျေးရွာ ၄၀ ကျော်မှာလည်း ပျူစခန်းတွေ ဖွင့်လှစ်ထားတယ်လို့ သိရပါတယ်။

ပုံစာ – ယင်းသာရွာနဲ့ ခါးတောက်ရင်းရွာမှာ မတ်လ ၁၃ ရက်က ပြုလုပ်ခဲ့သည့် ပျူသင်တန်းဆင်းပွဲ။

စာတည်း – လင်း