မြေလတ်အသံ၊ စက်တင်ဘာ ၂၃၊၂၀၂၅ ။

စစ်ကိုင်းတိုင်း၊ ကနီမြို့နယ်၊ သမင်ခြံရွာကို စစ်ကော်မရှင်တပ်က ပါရာမော်တာနဲ့ ဗုံးကြဲချတိုက်ခိုက်ခဲ့လို့ ၄ ဦး ဗုံးစထိမှန်သေဆုံးခဲ့တယ်လို့ ဒေသခံတွေထံက သိရပါတယ်။

စက်တင်ဘာ ၂၂ မနေ့ ညနေ ၆ နာရီခန့်မှာ နမခစစ်ဌာနချုပ်ကလာတဲ့ ပါရာမော်တာနဲ့ ဗုံး ၂ ကြိမ်ကြဲချ တိုက်ခိုက်ခဲ့ရာ ကျေးရွာတွင်းနေအိမ်တွေပေါ်ကျရောက် ပေါက်ကွဲခဲ့တာလို့ ဆိုပါတယ်။

” စစ်ရှောင်ရာကနေ အိမ်ပြန်ရတာမှ မကြာသေးဘူး ပါရာမော်တာလာပစ်ခံရတယ်။ ၂ လအတွင်းကို ၅ယောက်သေဆုံးပြီးပြီ” လို့ ရွာခံတဦးက မြေလတ်အသံကို ပြောပါတယ်။

ဗုံးပေါက်ကွဲမှုကြောင့် သမင်ခြံကျေးရွာနေ ဦးကြည်အေး ၇၁ နှစ်၊ မသန်းသန်းပို ၃၃ နှစ်၊ ဒေါ်ပြား ၆၈ နှစ်၊ ကိုကျော်သူ ၃၆ နှစ်တို့ ၄ ဦး ဗုံးစထိမှန်ဒဏ်ရာတွေနဲ့သေဆုံးခဲ့ပြီး နေအိမ် ၂ လုံးပျက်စီးခဲ့ကာ ခြံဝန်းအတွင်းရှိ နွား ၆ ကောင်လည်းသေဆုံးခဲ့တယ်လို့ သိရပါတယ်။

သမင်ခြံရွာကို စစ်ကော်မရှင်တပ်က လေကြောင်းကနေ မကြာခဏဗုံးကြဲတိုက်ခိုက်နေတာနဲ့ စက်တင်ဘာလပထမပတ်အတွင်းဖြစ်ပွားခဲ့တဲ့ ချောင်းမရွာအနီးတိုက်ပွဲတွေကြောင့် ရွာခံတွေက စစ်ရှောင်တိမ်းနေထိုင်ရာက တိုက်ပွဲတွေပြီးဆုံးသွားပြီးနောက် ကျေးရွာတွင်းပြန်လည်နေထိုင်တာ ၇ ရက်ခန့်သာ ရှိသေးတယ်လို့ ဆိုပါတယ်။

သမင်ခြံရွာကို သြဂုတ်လအတွင်းကလည်း လေကြောင်းကနေဗုံးကြဲတိုက်ခိုက်ခဲ့တာကြောင့် အသက် ၁၈ နှစ်အရွယ်ကျောင်းသားတဦး သေဆုံးခဲ့တာလည်း ဖြစ်ပါတယ်။

စာတည်း – ဟိန်းစံ

ကနီ၊ စက်တင်ဘာ ၁၆၊ ၂၀၂၅။

စစ်ကိုင်းတိုင်း၊ ကနီမြို့နယ်၊ ချောင်းမအရှေ့ရွာကအမျိုးသားတဦး စစ်ကော်မရှင်တပ်တွေထောင်ထားခဲ့တဲ့ မြေမြုပ်မိုင်းနင်းမိပြီး ခြေကျင်းဝတ်ပြတ်သွားတယ်လို့ တော်လှန်ရေးတပ်ဖွဲ့ဝင်တဦးဆီက သိရပါတယ်။

စက်တင်ဘာ ၁၅ ရက်မှာ ဘက်ထရီအိုးပြန်ယူဖို့ ရွာထဲဝင်သွားတဲ့ ၃၈ နှစ်အရွယ် အမျိုးသား ၁ ဦး နေအိမ်ခြံဝင်းထဲမှာပဲ နင်းမိုင်းမိပြီး ခြေကျင်းဝတ်ပြတ်တောက်ခဲ့တာလို့ တော်လှန်ရေးတပ်ဖွဲ့ဝင်တဦးက မြေလတ်အသံကို ပြောပါတယ်။

“မရှင်းလင်းသေဘူး၊ ရှင်းလင်းရေးက မပြီးသေးဘူး၊ အဲ့တော့မဝင်ဖို့ တားထားသေးတယ်၊ သူက ခိုးဝင်တာ၊ မသိမသာ ခိုးဝင်ပြီးတော့ ဘက်ထရီအိုးယူတာ၊ ဘက်ထရီအိုးဝင်ယူတော့ကျ အဲ့မှာ နင်းမိုင်းမိတယ်၊ နင်းမိုင်းက ခြေကျင်းဝတ်ပေါ့၊ ခြေကျင်းဝတ်ကနေ ဖြတ်လိုက်ရတာ၊ ပြီးတော့ ပေါင်ရိုးလည်းကျိုးတယ်။” လို့ အထက်ပါ တော်လှန်ရေးတပ်ဖွဲ့ဝင်တဦးက ပြောပါတယ်။

လက်ရှိမှာ နင်းမိုင်းမိသူကို ဒေသတွင်းဆေးရုံတခုမှာ ဆေးကုသမှုပေးထားပြီး အသက်အန္တရာယ်ကတော့ မစိုးရိမ်ရတော့ဘူးလို့ သိရပါတယ်။

ချောင်းမရွာထဲကို စစ်ကော်မရှင်တပ်တွေ ထောင်ထားခဲ့တဲ့ မိုင်းနဲ့ စစ်လက်နက်ပစ္စည်း အကြွင်းအကျန်တွေရှိနေနိုင်သေးတာကြောင့် တော်လှန်ရေးတပ်ဖွဲ့ဝင်တွေ ရှင်းလင်းပြီးမှသာ ပြည်သူတွေ ပြန်လည်ဝင်ရောက်စေချင်တယ်လို့ အထက်ပါတော်လှန်ရေးတပ်ဖွဲ့ဝင်က ပြောပါတယ်။

စစ်ကော်မရှင်တပ်တွေအထိုင်ချထားတဲ့ ချောင်းမရွာအနီးမှာ ခမရ ၁၆ က ဗိုလ်မှူး သူရိန် ဦးဆောင်တဲ့ အင်အား ၁၀၀ ခန့်ပါစစ်ကြောင်းကို စက်တင်ဘာ ၁၁ ရက် မနက် ၁၁ နာရီမှာ တော်လှန်ရေးတပ်တွေ ဝင်ရောက်တိုက်ခိုက်ခဲ့ရာ စစ်ကောင်မရှင်တပ်ဖွဲ့ဝင်တွေ ထိခိုက်သေဆုံးပြီး ဘန့်ဘွေးရွာကို ဆုတ်ခွာခဲ့တယ်လို့ သိရပါတယ်။

အဲ့ဒီနောက်မှာ ချောင်းမရွာကို တော်လှန်ရေးတပ်တွေ ပြန်လည်ရယူခဲ့ပြီး စစ်ကော်မရှင်တပ်သား အလောင်း ၃ လောင်း၊ ဂျန်ဘာ ၁ လုံး၊ သေနတ် ၄ လက်နဲ့ ဆက်စပ်ပစ္စည်းတွေကို သိမ်းဆည်းခဲ့ပြီး စစ်သုံ့ပန်း ၄ ဦးကိုလည်းဖမ်းမိခဲ့တယ်လို့ အမျိုးသားညီညွတ်ရေးအစိုးရ-NUG ရဲ့ ကာကွယ်ရေးဝန်ကြီးဌာနက စက်တင်ဘာ ၁၂ ရက်မှာ ထုတ်ပြန်ခဲ့ပါတယ်။

စာတည်း – လင်း

ကနီ၊ စက်တင်ဘာ ၄၊ ၂၀၂၅။

စစ်ကိုင်းတိုင်း၊ ကနီမြို့နယ်၊ သမင်ခြံကျေးရွာကို စစ်ကော်မရှင်တပ်က လေကြောင်းဗုံးကြဲတိုက်ခိုက်ခဲ့တာကြောင့် ရွာခံလူငယ်အမျိုးသား ၁ ဦး သေဆုံးခဲ့တယ်လို့ ဒေသခံတွေထံက သိရပါတယ်။

စက်တင်ဘာ ၃ ရက် မနေ့နေ့လယ် ၂ နာရီလောက်မှာ စစ်ကောင်စီတိုက်လေယာဥ် ၁ စီးဟာ သမင်ခြံကျေးရွာကို ဗုံးကြဲတိုက်ခိုက်ခဲ့ရာ ကျေးရွာနေအိမ် ၁ ခုတွင်းကျရောက်ပေါက်ကွဲပြီး အသက် ၁၇ နှစ်အရွယ်အမျိုးသား ၁ ဦးသေဆုံးခဲ့တာလို့ ဆိုပါတယ်။

“ အိမ်သာကျင်းအသစ် တူးထားတာပေါ့နော်၊ အဲဒီကျင်းထဲကို ကလေးကဆင်းပြီးတော့ ရှောင်လိုက်တာပေါ့။ လေယာဉ်လာတဲ့အခါကျမှ ကလေးက ကျင်းထဲကိုဆင်းပြီး ပုန်းတာပေါ့။ ပုန်းတဲ့အချိန်မှာမှ ဘေးအိမ်က သားမိ ၂ယောက်ကို လက်ယက်ပြီး သူ့ဆီလာဆိုပြီး ထခေါ်လိုက်တဲ့အချိန်မှာ ဒီအိမ်သာကျင်းတူးထားတဲ့တွင်းနှုတ်ခမ်းကို (ဗုံးက) လာကျတာ”လို့ ရွာခံအမျိုးသမီးတဦးက မြေလတ်အသံကို ပြောပါတယ်။

ဗုံးထိမှန်တာကြောင့် လူငယ်အမျိုးသားဟာ ​ဦးခေါင်းပြတ်တောက်သေဆုံးခဲ့ပြီး ခြံဝန်းအတွင်းရှိ အိမ်မွေးတိရစ္ဆာန်တွေလည်း ဒဏ်ရာရရှိခဲ့ကာ သမင်ခြံရွာကို လေကြောင်းတိုက်ခိုက်မှုတွေ ဆက်တိုက်လုပ်ဆောင်နေတာကြောင့် ဒေသခံတွေ ထိတ်လန့်နေရတယ်လို့ ဆိုပါတယ်။

“ သူတို့က **ဒရုန်းနဲ့အရင် ကင်းထောက်တယ်၊ **ဒရုန်းပတ်လာပြီဟေ့ ဆိုလို့ရှိရင် နောက်နာရီဝက် ၁ နာရီလောက်ပေါ့နော်၊ အဲဒီလောက်ဆိုရင် လေယာဉ်အမြဲတမ်းလာတယ်ပေါ့နော်။ အဲဒီလိုမျိုးအနေအထားကနေပြီး ပြည်သူလူထုအနေနဲ့က သက်ကြီးရွယ်အို၊ ဘုန်းကြီး၊ ရဟန်းသံဃာမှမကဘူးပေါ့နော်၊ အကုန်လုံး ထွက်ပြေးရတဲ့ အနေအထားကို ဖြစ်နေပြီ၊ **ဒရုန်းပတ်လာပြီဟေ့ဆိုရင် ရွာခံတွေအကုန် ထွက်ပြေးရတာပေါ့နော” လို့ အထက်ပါအမျိုးသမီးက ပြောပါတယ်။

ဩဂုတ် ၃၁ ရက်မှာလည်း သမင်ခြံကျေးရွာလေကြောင်းတိုက်ခိုက်ခံရတာကြောင့် ရွာခံ ၁ ဦး သေဆုံးထားပြီး ၁ ပတ်အတွင်း လူ ၂ ဦးသေဆုံးခဲ့ကာ ယခုနှစ်အတွင်း လေယာဥ်ဗုံးကြောင့်သေဆုံးသူ ၄ ဦးအထိ ရှိလာတယ်လို့ သိရပါတယ်။

ဒါ့အပြင် ယင်းမာပင်မြို့နယ်၊ ဘန့်ဘွေးရွာကထွက်လာတဲ့ အင်အားရာချီပါ ပျူစောထီးနဲ့ စစ်ကော်မရှင်ပူးပေါင်းစစ်ကြောင်းက ကနီနဲ့ယင်းမာပင်အစပ်က ရွာတွေကို ရောက်ရှိနေတာကြောင့် ကနီမြို့နယ်ထဲက ကျေးရွာဒေသခံတွေစစ်ရှောင်ဖို့ပြင်ဆင်နေရတယ်လို့ သိရပါတယ်။

စာတည်း – ဟိန်းစံ

ကနီ၊ ဩဂုတ် ၃၁၊ ၂၀၂၅။

စစ်ကိုင်းတိုင်း၊ ကနီမြို့နယ်၊ သမင်ခြံကျေးရွာကို စစ်တပ်က MiG 29 တိုက်ခိုက်ရေး လေယာဉ်နဲ့ ဗုံးကြဲခဲ့တာကြောင့် အမျိုးသမီး ၁ ဦး သေဆုံး ခဲ့တယ်လို့ ဒေသခံတွေဆီက သိရပါတယ်။

ဩဂုတ် ၃၁ ရက် ဒီနေ့လယ် ၂ နာရီခွဲဝန်းကျင်မှာ လေကြောင်းကနေ ဗုံးသီး ၂ လုံးကြဲချခဲ့ချိန် အသက် ၆၀ အရွယ် ဒေါ်ကြည်စိန်သေဆုံးပြီး အသက် ၇၀ အရွယ် အမျိုးသမီး ၁ ဦးထိခိုက်ခဲ့တယ်လို့ ဆိုပါတယ်။

“ထိခိုက်တာက ၂ ယောက် ဆိုပေမယ့် ၁ ယောက်ကတော့ အသက်ပေးလိုက်ရတာ၊ ဒီဗုံးကျင်းထဲ အသက်ကုန်သွားတာ၊ ငါ့လက်ပေါ်ကနေပြီးတော့ အသက်ကုန်သွားတာ။”လို့ သေဆုံးသူနဲ့ အတူပုန်းခိုခဲ့ရသူ အမျိုးသမီးက ပြောပါတယ်။

အဆိုပါ ပစ်ခတ်တိုက်ခိုက်မှုကြောင့် သမင်ခြံရွာရှိ ပြည်သူပိုင် နေအိမ် ၅ လုံးထက်မနည်း ပျက်စီးခဲ့ပြီး နွား ၁ ကောင် ဒဏ်ရာရကာ သိုလှောင်ထားတဲ့ တောင်သူထွက်ကုန်ပစ္စည်းအချို့ ဆုံးရှုံးခဲ့တယ်လို့ ဆိုပါတယ်။

အဆိုပါ လေကြောင်းတိုက်ခိုက်မှုကြောင့် ကနီမြို့နယ်၊ သမင်ခြံကျေးရွာက ပြည်သူအချို့ကတော့ ကြောက်လန့်ပြီး အခြားဒေသတွေမှာ ထွက်ပြေးတိမ်းရှောင်နေကြရပါတယ်။

ဦးခေါင်းထိမှန်ဒဏ်ရာရခဲ့တဲ့ အသက် ၇၀ အရွယ်အမျိုးသမီးကတော့ လက်ရှိမှာ ဆေးရုံကို ပို့ဆောင်ထားရပြီး အသက်အန္တရာယ် မစိုးရိမ်ရဘူးလို့ သမင်ခြံရွာခံတွေဆီက သိရပါတယ်။

“ထိခိုက်တာ ၁ ယောက်တည်း၊ အဘွားကြီး၊ ခေါင်းထိတာတဲ့၊ နောက်ထိတာ ဆေးခန်းမယ်တဲ့၊ သက်သာတယ်လို့တော့ ပြောသံကြားတယ်။”လို့ အထက်ပါအမျိုးသမီးက ပြောပါတယ်။

၂၀၂၁၊ စစ်အာဏာသိမ်းချိန်ကနေ ၂၀၂၅၊ ဩဂုတ် ၃၀ အထိ စစ်ကော်မရှင်တပ်ရဲ့ သတ်ဖြတ်မှုကြောင့် သေဆုံးခဲ့ရတဲ့ ပြည်သူပေါင်း ၇,၁၅၉ ဦး ရှိတယ်လို့ နိုင်ငံရေးအကျဉ်းသားများကူညီစောင့်ရှောက်ရေး အသင်း – AAPP ကထုတ်ပြန်ထားပါတယ်။

စာတည်း – လင်း

မြေလတ်အသံ၊ သြဂုတ် ၂၅၊ ၂၀၂၅။

စစ်ကိုင်းတိုင်း၊ ကနီမြို့နယ်က ပသုံးလုံးတာဝန်ခံတွေအပါအဝင် တခြားဌာနဆိုင်ရာအသီးသီးက တာဝန်ခံ ၁၃ ဦးတို့ကို ဖမ်းဆီးထားပြီး ခုံရုံးနဲ့ ဆက်လက်စစ်ဆေးကာ တရားစွဲဆိုသွားမယ်လို့ ဖြစ်စဉ်ကို သိရှိထားသူတွေဆီက သိရပါတယ်။

သြဂုတ် ၂၄ ရက်နေ့ ည ၉ နာရီကျော်မှာ ကနီမြို့နယ် ပြည်သူ့အုပ်ချုပ်ရေးအဖွဲ့ (ပအဖ) တာဝန်ခံ ဦးအောင်မျိုးမင်း၊ ပြည်သူ့ကာကွယ်ရေးအဖွဲ့ (ပကဖ) တာဝန်ခံ ဦးဝေဖြိုးသန့်၊ ပြည်သူ့လုံခြုံရေးအဖွဲ့ (ပလဖ) တာဝန်ခံ ဦးစိုးမင်း၊ မြို့နယ် သယံဇာတ စီမံအုပ်ချုပ်မှုအဖွဲ့တာဝန်ခံ ဦးနိုင်မျိုးဝင်း၊ တိုက်နယ် (၄) ပကဖ တာဝန်ခံ ဦးခင်မောင်မျိုး၊ တိုက်နယ် ၂ ပကဖ တာဝန်ခံ ဦးလှိုင်ဝင်းတို့ ၆ ဦး၊ မြို့နယ်သယံဇာတ အဖွဲ့ဝင် နဲ့ ဂိတ်တာဝန်ခံ ၇ ဦးတို့ ဖမ်းဆီးခံခဲ့ရတာလို့ သိရပါတယ်။

ဖမ်းဆီးခံရသူ ၁၃ ဦးဟာ ကြားကာလအစိုးရအဖွဲ့ အစည်းအ‌ဝေးဆုံးဖြတ်ချက်အရ ပြည်သူပိုင်ငွေ အလွဲသုံးစားလုပ်ခြင်းမှာပါဝင်ကြောင်း သံသယရှိတာမို့ ဖမ်းဆီးခဲ့တာဖြစ်ပြီး စုံစမ်းစစ်ဆေးရေးခုံရုံးက စစ်ဆေးကာ ရလဒ်အပေါ်မူတည်ပြီး တရားစွဲဆိုသွားမယ်လို့ သိရပါတယ်။

“မနေ့ည က ၉နာရီလောက် တချိန်တည်းဖမ်းတာပါ။ ကြားကာလ ဗဟိုအုပ်ချုပ်ရေးကော်မတီ ဥက္ကဌ လက်မှတ်နဲ့ဖမ်းတာပါ။ အဂတိကြောင့်လို့သိရတယ်။ အဖမ်းခံရတာမှာ သယံဇာတအဖွဲ့ဝင်တွေ ပါတယ်။ဂိတ်တာဝန်ခံတွေ ပါတယ်။ သူတို့နာမည်တွေကို တော့မသိရဘူး”လို့ ကနီမြို့ နယ်အုပ်ချုပ်ရေးအဖွဲ့(ပအဖ)နဲ့နီးစပ်သူ အမျိုးသားတဦးကပြောပါတယ်။

မြို့နယ်စည်ပင်ဌာန၊ ဆက်သွယ်ရေးဌာန၊ လူသားစာနာဌာန၊ ဘဏ္ဍာရေးဌာန၊ အခွန်ဌာန၊ ဥပဒေဌာန၊ တရားရေးဌာနစတဲ့ ဌာနဆိုင်ရာ ၇ ခုမှ တာဝန်ခံတွေကတော့ ဖမ်းဆီးခံရတဲ့အထဲ မပါဝင်ဘူးလို့ အထက်ပါအမျိုးသားက ဆိုပါတယ်။

စစ်ကိုင်းတိုင်းမှာ အခွန်ကိစ္စနဲ့ ပတ်သက်ပြီး ပသုံးလုံး အဖွဲ့အစည်းတချို့ ဝေဖန်ခံနေရချိန် ယခုလို အထက်အမိန့်နဲ့ ကနီမြို့နယ်မှာ ပထမဆုံး ပသုံးလုံးအဖွဲ့အစည်း ဖမ်းဆီးခံခဲ့ရတာပါ။

စာတည်း – မြတ်

မြေလတ်အသံ၊ ဇူလိုင် ၂၅၊ ၂၀၂၅။

စစ်ကိုင်းတိုင်း၊ ကနီမြို့နယ်တရားသူကြီးအဖွဲ့မှ ဥက္ကဌအပါအဝင် ၄ ဦးကို ဇူလိုင် ၁၇ ရက်မှာ တာဝန်ကနေ ရပ်စဲလိုက်တယ်လို့တရားရေးဌာနနဲ့ နီးစပ်သူတဦးက မြေလတ်အသံကို ပြောပါတယ်။

တာဝန်ကနေရပ်စဲခံရလိုက်ရသူ ၄ ဦးဟာ အမျိုးသားညီညွတ်ရေးအစိုးရ – NUG တရားရေးဝန်ကြီး ဌာနရဲ့ ကနီမြို့နယ်တရားသူကြီးအဖွဲ့မှ ဥက္ကဌအမျိုးသမီး ၁ ဦးနဲ့ အဖွဲ့ဝင်အမျိုးသား ၃ ဦးဖြစ်ပါတယ်။

“NUGက စာထွက်တာပါ။ သူတို့ ၄ ဦးက အချင်းချင်း မသင့်မြတ်ကြဘူး။ ဒါပေမယ့် လာဘ်စားတာတို့ ဘာတို့တော့မရှိဘူး”လို့ တရားရေးဌာနနဲ့နီးစပ်သူ အမျိုးသားတဦးကပြောပါတယ်။

အမျိုးသားညီညွတ်ရေးအစိုးရ၊ နိုင်ငံတော်သမ္မတရုံးရဲ့ ဇူလိုင် ၁၇ ရက်စွဲပါ ထုတ်ပြန်စာမှာတော့ ကနီမြို့နယ်တရားသူကြီးအဖွဲ့မှအထက်ပါပုဂ္ဂိုလ်တို့ကို ၎င်းတို့အကြားတွင်ဖြစ်ပေါ်နေတဲ့ အခြေအနေတွေအရ ဆက်လက်တာဝန်ပေးအပ်ရန်မသင့်တာကြောင့် တာဝန်မှရပ်စဲလိုက်တယ်လို့ ဖော်ပြပါတယ်။

အဆိုပါတရားသူကြီးအဖွဲ့အတွင်း လစ်လပ်သွားတဲ့နေရာတွေအတွက်ကိုတော့ ဇူလိုင် ၂၅ ရက်ဒီကနေ့အထိ အစားထိုးခန့်အပ်တာမလုပ်ဆောင်နိုင်သေးဘူးလို့ အထက်ပါအမျိုးသားက ဆိုပါတယ်။

စာတည်း – လင်း