ကျော်ကြီး 
စလင်း၊ ဇူလိုင် ၃၊ ၂၀၂၆။
မကွေးတိုင်း၊ စလင်းမြို့နယ်၊ ဆင်ဖြူကျွန်းမြို့အနီး နွယ်တမယ်တံတားစောင့် စစ်ကော်မရှင်တပ်သားအချင်းချင်း ဓားထိုးမှုဖြစ်လို့ ၁ ဦးသေတယ်လို့ မြို့ခံတွေဆီက သိရပါတယ်။
ဇူလိုင်လ ၂ ရက်နေ့ည ၈ နာရီခန့်မှာ တံတားစောင့် စစ်ကော်မရှင်တပ်သား ၂ ဦး စကားများရန်ဖြစ်ရာမှ တပ်သား ၁ ဦးက နောက်တပ်သား ၁ ဦးကို ဓားနဲ့ထိုးခဲ့တာလို့ ဆိုပါတယ်။
“အချင်းချင်းမူးပြီး စကားများကြတာ။ ရိုးရိုးတပ်သားတွေ။ နှစ်ယောက်မှာ တယောက်က ဓားနဲ့ထိုးတာ။ တယောက်က အုတ်ခဲနဲ့ထုတာ။ ဓားနဲ့ထိုးခံရတဲ့တပ်သားက ပွဲချင်းပြီးပဲ”လို့ မြို့ခံတဦးက ပြောပါတယ်။
ဓားနဲ့ထိုးခံရတဲ့ အသက် ၃၈ နှစ်အရွယ် စစ်ကော်မရှင်တပ်သားဟာ နေရာမှာပင်သေဆုံးသွားပြီး အုတ်ခဲနဲ့ထုခံရသူတပ်သားကတော့ ဆင်ဖြုကျွန်းဆေးရုံမှာ ဆေးကုသမှုခံယူနေရပါတယ်။
သေဆုံးသူ စစ်ကော်မရှင်တပ်သားရဲ့အလောင်းကိုတော့ ဇူလိုင်လ ၃ ရက်နေ့မနက်ပိုင်းက ဆင်ဖြူကျွန်းမြို့ သုသာန်မှာ သင်္ဂြိုလ်လိုက်တယ်လို့ ဆိုပါတယ်။
နွယ်တမယ်တံတားမှာ ၂၀၂၅ ခုနှစ်အစပိုင်းလောက်ကတည်းကစပြီး ပခုက္ကူအခြေစိုက် တပ်မ ၁၀၁ တပ်မ လက်အောက်ခံတပ်တွေက တံတားလုံခြုံရေးစောင့်နေတာဖြစ်ပြီး အနည်းဆုံးအင်အား ၂၀ ခန့်ရှိတယ်လို့ သိရပါတယ်။
ဇွန်လ ၃၀ ရက်နေ့ကလည်း စလင်းမြို့နယ်၊ ဆင်ဖြုုကျွန်းမြို့၊ အေးစုဖိုစု ရပ်ကွက်မှာ အမျိုးသမီး ၁ ဦးကို ဆေးကြောင်နေတဲ့ စစ်ကော်မရှင်တပ်သားကနေအိမ်ပေါ်တက်သေနတ်နဲ့ပစ်သတ်သွားလို့သေဆုံးခဲ့သေးတယ်လို့သိရပါတယ်။